Post: #1
Title: ياخوانا السويد كيف ؟
Author: خضر حسين خليل
Date: 08-02-2012, 00:51 AM
قبيل حوالي الساعة 11 ضهر جاني حسبو صحبي ورفيق همي وغناي ودربي المهم قعدنا نتونس ـ في البداية بعد السلام والتحسر علي سفر صديقنا مورتا
قعدنا حوالي عشرة دقايق أي زول بقرأ في جريدة أنا كنت بقرأ في صحيفة حكايات بقرأ تحديداً قصة عوض باركليز القصة دي شدتني شديد وقبلها كنت
متابع في نفس الصحيفة قصة الجيو الحرامي التائب . ماعارف لقيت روحي اليومين ديل معجب جداً بسير الحرامية واللصوص الشرفاء وفي نفس الوقت
بقيت ما بفوت ولا لقطة من مسلسل ناجي عطا الله وبالتالي الواحد حاسي بأنو السلوك اللصوصي بدأ ينتح في القلب بفعل الشجاعة النادرة البقراها كل يوم
في قصص هؤلاء الناس .
المهم ناقشت حسبو في المسألة دي ولقيت عندو رؤي متكاملة وإتفقنا في حاجات كتيرة خالص ووعدني بمتابعة بقية حلقات اللص الشريف عوض باركليز
ومتابعة مسلسل ناجي عطا الله وفرقته التي تعرض علي شاشة الأم بي سي (ون) . الذي يحيرني الآن هو الحالة التي أمر بها كلما أحسست في إن ناجي عطا الله
وفرقته في خطر حتي إنني أدعوا الله صادقاً أن يخرجهم من ورطاتهم وأن يعودوا سالمين إلي أهلهم وذويهم .
المهم جملة التفاكير دي ودتني لحتات بعيدة خالص جزء منها عندها علاقة بالسلوك الإجرامي وجزء آخر عندو علاقة بمواطني العالم الثالث وقضاياهم وحاجاتهم العجيبة ـ
يعني بقيت أعقد في مقارنات بين قضايا جيلنا في العالم السفلي ده ونفس الجيل في العالم الأول ومستوي تفكيرهم ولي شنو نحنا عاملين كده ؟ ولي شنو مثلاً أنحنا لي يوم الليلة
بننضم في كيلو الطماطم وربطة الجرجير وأكل الله والرسول ـ يعني كان فيها شنو مثلاً لو كلنا كده كنا رعايا دولة زي السويد ؟ سويسرا الحتتين ديل إسمهم زاتو بعجب ـ
موش باللاهي الواحد هسي كان راكب ليهو مكوك فضائي وزيارات تقيلة للمريخ وزحل وعطارد والزهرة ؟ موش هسي الواحد كان راقد ليهو في مكيف إسبلت والتلاجة
مليانة حاجات كويسة ؟
الدنيا دي غريبة والله حسبو فرحان إنو الليلة حيفطر في الموناليز فول وكوارع والناس تتخيل ومورتا فرحان والدنيا ما سايعاه لأنو وصل السعودية وأنا زاتي فرحان هسي ساي لأنو المطرة وقفت والكهرباء رجعت وبتاع الدكان نايم في أمان الله ولا شغال بي زول الشغلة عنهم ياخي ناس الحلة ديل زاتو تصحي ليهم فوق كم يعني ؟ من ديونهم القاعدين يسددوها ليك ولا من ديونهم . والله المستعان
|
Post: #2
Title: Re: ياخوانا السويد كيف ؟
Author: معاوية عبيد الصائم
Date: 08-02-2012, 01:00 AM
Parent: #1
Quote: رجعت وبتاع الدكان نايم في أمان الله ولا شغال بي زول الشغلة عنهم ياخي ناس الحلة ديل زاتو تصحي ليهم فوق كم يعني ؟ من ديونهم القاعدين يسددوها ليك ولا من ديونهم . والله المستعان
|
اها وعملت شنو فى موضوع ديون الدكان
واخبار التكريم السنوى شنو لاحسن زبون
جرورة ..وهل يحق لمورتا الدخول فى مسابقة
افضل زبون جرورة..من الخارج
سلامات يامواطن وانشاء الله امطار خير وبركة
مرسل لكم عدد واحد طورية هدية ..وعدد واحد منجل
للمدعو حسبو
انتهى
|
Post: #3
Title: Re: ياخوانا السويد كيف ؟
Author: خضر حسين خليل
Date: 08-02-2012, 01:13 AM
Parent: #2
يعني يا معاوية هسي دي ظروف ترسل فيها منجل وطورية وشنو ؟؟ شكيناك لرب الشكية
كربتنا دي طواري الأرض كلها ما بتحلها
أنا رجعت أنوم يا فردة
|
Post: #4
Title: Re: ياخوانا السويد كيف ؟
Author: فايزودالقاضي
Date: 08-02-2012, 01:24 AM
Parent: #3
ناوين تقفلوا ياتو بلف المره دي صاحين ليها بدري كده ؟!!!
شكرا لمورتا الخلانا نسمع صوته الحنين ..
فرحان بدجاج الطازج ولبن المراعي ..
تحياتي خضر ..
|
Post: #5
Title: Re: ياخوانا السويد كيف ؟
Author: معاوية عبيد الصائم
Date: 08-02-2012, 01:35 AM
Parent: #4
Quote: ناوين تقفلوا ياتو بلف المره ده صاحين ليها بدري ؟!!!
|
مرحب تسفاى
والله بعد شوية الزول بمشى ع الصلاة
.اتوقع حضورك افطار البورداب
لنصلى معا ..بارك الله فيك يا اخى
|
Post: #6
Title: Re: ياخوانا السويد كيف ؟
Author: فايزودالقاضي
Date: 08-02-2012, 01:44 AM
Parent: #5
Quote: والله بعد شوية الزول بمشى ع الصلاة
.اتوقع حضورك افطار البورداب
لنصلى معا ..بارك الله فيك يا اخى |
شيوعية اخر زمن
صلاة وصوم
باقي تحجوا وتشاركوا الوهابية في رمي شقيقكم في الجمرات ..
|
Post: #7
Title: Re: ياخوانا السويد كيف ؟
Author: خضر حسين خليل
Date: 08-02-2012, 08:10 PM
Parent: #4
فايز يا قاضي إزيك ومشكور والله للمهاتفة
والله كان عارفك حتعمل كده كنا رسلنا مورتا من بدري
غايتو الزول ده أعلفوه سمح وياريتكم تزوروه البيك
الحراق عشان يعرف إنو عوضية سمك دي أكبر ماسورة في الدنيا
ياخ سلم لي عليهو وقول ليهو في إنتظار مشاهداتك يا م ع ف ن
|
Post: #8
Title: Re: ياخوانا السويد كيف ؟
Author: مرتضى احمد عبد القادر
Date: 08-02-2012, 11:52 PM
Parent: #7
حكمة البوست لص شريف خير من الف مسؤل حريف
مشتاقين يا مووفن
|
Post: #9
Title: Re: ياخوانا السويد كيف ؟
Author: yaser mostafa
Date: 08-03-2012, 00:15 AM
Parent: #8
السويد جميلة وهادئة ونظيفة والناس مهذبة ومن الساعة عشرة بتكون قفلة بيوتها عليها ونامت. والنساء في غاية الجمال والروعة .خضرة وماء ووجه حسن شديد.
..............................................................................................................................................................
الدنيا دي غريبة والله حسبو فرحان إنو الليلة حيفطر في الموناليز فول وكوارع والناس تتخيل ومورتا فرحان والدنيا ما سايعاه لأنو وصل السعودية وأنا زاتي فرحان هسي ساي لأنو المطرة وقفت والكهرباء رجعت وبتاع الدكان نايم في أمان الله ولا شغال بي زول الشغلة عنهم ياخي ناس الحلة ديل زاتو تصحي ليهم فوق كم يعني ؟ من ديونهم القاعدين يسددوها ليك ولا من ديونهم . والله المستعان
بتاع الدكان دا ماممكن يصحي دايرين لينا فتة فول حارة مع جو المطرة دي؟
تحياتي
|
Post: #10
Title: Re: ياخوانا السويد كيف ؟
Author: خالد العبيد
Date: 08-03-2012, 02:19 AM
Parent: #9
ياخوانا السويد كيف ؟
حدد .. انت جاي شتا ولا صيف
|
Post: #11
Title: Re: ياخوانا السويد كيف ؟
Author: Ridhaa
Date: 08-03-2012, 04:56 AM
Parent: #10
الأخ خضر
سلام ...
تعرف سكان السويد 8 مليون نسمة قدر سكان المدن الثلاثة ( الخرطوم
أمدرمان وبحري وامتداداتهم الجديدة ....
تحياتي
|
Post: #12
Title: Re: ياخوانا السويد كيف ؟
Author: سلمى الشيخ سلامة
Date: 08-03-2012, 03:18 PM
Parent: #11
"السويدن روض الجنان "
دى البعرفا
ياخ ازيك زاتو
ويوجد فى السويد اجمل مواطن سودانى اول حرفه قاسم نصر
فى اجمل من كدا ؟
|
|