يا البشير يا حكام يا معارضة .. انتو حاسين بالشعب ده؟

البشير وجوقته من الحكام يهددون اعداء الوطن بما فيهم المعارضة مرة بالشوي ومرة ب shoot to kill وخلافه والمعارضة بتوبها القديم هي نفس المعارضة بنفس تفكيرها القديم والشعب حاير بن الاتنين .. لا لاقي حق الملاح ولا حق الدوا خلاص اكتوي .. مابين حكام التمكين الذي حكمونا سنين ومعارضة هشة كايسة مفاوضة مرة باسم التوافق ومرة باسم الوطن والناس تايهين ما بين موية مافي كهربا مقطوعة رغم ان الرد كان السد .. يا البشير يا حكام يا معارضة تمرقوا من مفاوضة وتدخلوا في مفاوضة زي قصة النملة الدخلت وشالت حبة ودخلت نملة وشالت حبة .. لا بترول طلع نفع ناس الجنوب ولا انابيب شالته نحو الشمال حتي نسد عجز المليارات .. الشباب حس بالوجع وطلع .. المادايرين الحكومة ولا المعارضة القديمة حس بالوجع وبعضهم طلع وبعضهم ما طلع! حكومتنا قالت شوفوا الدهب وخرج الناس يبحثون عن الذهب والدهب الدهب يكاد عقلي يذهب!

يا بشير يا حكام يا معارضة .. بعضكم يطالبنا بالاستغفار لانه الرزق علي المولي عز وجل .. طيب .. المعارضة بعضها يطالب باسقاط النظام حملة وتفصيلا وهم يلوذون بالبروج المشيدة .. سبيلا .. وبعيدا عن الاحزاب والمعارضة القديمة .. وين التكنوقراط .. من اطباء ومهندسين وزراعيين ومعلمين ما هاميهم البلد ده ما حاسين بالشعب ده ما هاميهم نفسهم .. وين الزارع وين الصانع وين العامل وين الغبش بل وين الشماشة وقود الثورات؟ يا المشير يا حكام يا معارضة انتو هامين بالبلد ده؟ شفته مهاتير وناسه عملوا ماليزيا كيف؟ والترك سووا بلادهم كيف؟ ما بتغيروا قاعدين اكتر من عشرين وحصيلتكم كباري وسد والكهربا لسة بتقطع والموية لسة بتعكر واللحمة لسة بتغلا والطماطم اتعزز مع الليمون .. لا شفنا برامج تنمية لا تخطيط سليم لا تنمية بشرية ولا بلد نهضوي من كله من 54 ولغاية الفين واطناشر معقولة بس كلنا مشتركين في الحاصل حكام وشعب ومعارضة ..

يا البشير يا حكام يا معارضة انتو كفاكم كفي كفي .. من سرق ونهب وافسد وخرب فاليحاسب ومن عجز وعاوده الحنين للحكم فلا سبيل ولا طريق لكم للعودة . يا البشير يا حكام يا معارضة.. انتو حاسين بالشعب ده؟ الشعب داير مساواة وعدالة وحرية بعيدا عن التهميش والاقصاء .. داير يشوف بلاده في العلالي داير تعليم وعلاج وشغل وسكن ودي حقوقهم سينتزعوها انتزاعاً .. وداير يشوف المصانع بدخاخينها والمزارع بسنابلها والابقار بلحومها والبانها وداير يشوف اولاده وبناته خلاقين في التكنولوجي والمهارة في المشاركة في التقدم العلمي. دايرين سترة لبناتهم وروضة لاطفالهم ومدرسة حديثة لوليداتهم وجامعات تخرج ما يحتاجه السودان من كوادر في جميع المجالات. يا البشير يا حكام يا معارضة حان أوان البديل الذي يحقق كل ما ذكرناه آنفاً .. والخايفين من البديل منو؟ البديل موجود كوادر تملا عين الشمس داخل وخارج السودان .. وشباب اولاد وبنات زي الورد بكرة يفتح ويعطر دنيا السودان التغيير من كل قديم بالي لكل حديث متجدد في سبيل بناء السودان .. يا البشير يا حكام يا معارضة كرهتونا السودان وافريقيا ومحتاجين نسمع انا سوداني انا افريقي .. ونحب السودان اولا ومن ثم يتم التغيير لحياة افضل حرة كريمة.

برغم تشاؤم المتشائمين وتخذيل المخذلين وتثبيط المثبطين وغرور المتمكنين باسم الدين

لن ينقضي هذا العام باذن الله وألا نشارك جميعنا في تشييع الانقاذ لمثواها الاخير قولوا آمين في هذه الأيام المفترجات

Quote: لن ينقضي هذا العام باذن الله وألا نشارك جميعنا في تشييع الانقاذ لمثواها الاخير قولوا آمين في هذه الأيام المفترجات

آمييييييييييييييييين

يارب العالمين تستجيب دعاء مظاليم الشعب دة

عليكم بالدعاء ياعمر اخوى فى ايام الرحمة دى

غايتو أنا فى التراويح لمن الامام يدعى على بشار الأسد أنا بدعو على عمر البشير

تحياتى