الممثل في "الخواجة عبد القادر" دا ما زميلنا قصي؟

في الحلقة 7، لما الشيخ عبد القادر أخد الخواجة يتغدى معاه في البيت
الكان واقف قدام بيت الشيخ دا ما قصي سليم "ولدنا"؟

دي صورة قصي:


ودا كابشر للمثل من زاويتين:

البدعم الظن- خلاف الشبه- إنو قصي خريج قسم الدراما بقصر الشباب والأطفال

قصي دا شكله ما أتغير من أيام القصر أواخر القرن الماضي
حلبي لكن عيني باردة

سلام يا ابو الشروف
رمضان كريم
شكله ياهو صاحبك الشبه باين
يا اخي المسلسل دا ملفق شديد
والشيخ أداءه لا يشبه مشايع الصوفيةالذين طبعهم الرزانة وقلة الهرج
أما الشيخ بتاع عبد القادر أداءه اقرب للدجالين
ويتكلم كتير وينفعل وتلفيق في تلفيق

عبد الخالق محمد عمر (خلف الله) أداءه مقنع شوية
بس كلو شوية شابك الخواجة يا سيدي يا سيدي ودي غريبة شوية عندنا

Quote: والشيخ أداءه لا يشبه مشايع الصوفية الذين طبعهم الرزانة وقلة الهرج أما الشيخ بتاع عبد القادر أداءه اقرب للدجالين ويتكلم كتير وينفعل وتلفيق في تلفيق

أبو علي تصوم وتفطر على خير إنتا والأسرة
أتفق مع ملاحظتك، فعلا عمك ما كان مقنع
أظن دور عمل دا كان المفروض يلعبه الممثل السوداني ياسر عبد اللطيف
ما عارف الحصل شنو
الممثلين السودانيين ديل أول مرة أشوفهم

هلا ياعمك ورمضان كريم
وبطرفي افادة من المتصفحة اميرة الشيخ وهي ذات علاقة اكاديمية وطيدة بالمسرح
وقطعت فيه كجهيزة وهي من نواحي الدوحة قول كل خطيب
وقال ليك يااااهو زاااتو قصي مجدي سليم عضو المنبر


----------------------
يا ابو الشوش يااخي تعالنا في (كيتة الفيس بوووك) في وصية ليك برضو بهناك


وسنتابع

سلامات يا باش كاتب
بالله بلغ التحايا لبت الشيخ في تصفحها المجيد

وكيتة الفيسبوك دي بس أرسم لي إحداثيات الدخول ليها حتلقاني أساسي هناك

ابو الشوش

رمضان

اقرا اسماء الممثلين عشان تقطع الشك باليقين

انت وعادل امين شوقتونا للمسلسل دا
رغم اني قطعت العلاقات الدبلوماسية مع المسلسلات منذ الزير سالم!






----

مرات مرات -لمن القى لي فرقة- بشوف مسلسل عادل امام (فرقة ناجي عطا الله) او اياً كان اسمه

سلامات خلي
فتشت الأسماء قبل فتح البوست عشان من الشبه شكيت إنو "ولدنا"

يا قيقا المسلسلات المصرية بتابعها لو فيها الفخراني أو خالد صالح
خلاف كدا أفضل الدراما السورية
الممثلة السورية سلافة معمار

مشاركة في مسلسل "الخواجة عبد القادر"
وسلافة دي تمثيلها حكاية

والله كتبت ليكم رد طويل خلاس
وبعد ما رسلته النت فصل من الكيبول وضاع في شربة مية
يلا... ما عندكم حظ :) :)
خصوصا أشرف وأميرة لأنو نبذتكم تبذ شديد خلاس
يلا الخلاصة (بئى) انو مشتائين خالص خالص (طبعا ده لزوم الدور بتاع دقيقة الظهرنا فيهو)
والعاقبة لكم في المسرات والشكر للأخ (هاغو) -بقى قريب لي ياغو- ولاأخ عادل (فِطْر) والأخ (عبد الخالق) والأخت (سمية) لاتاحتهم لنا هذه الفرصة :) :)
----------------
نجي للأخ القال كلامو في المسلسل
والله كلامك صح مية المية.. وانا شخسيا ما قاعد احضر اي مسلسل عربي
بس برضو شفت الحلقات بتاعة الخواجة بي سرعة في الانترنت عشان اعاين لي اداء نا س عبد الخالق ولقيتو لا يقل شيئا عن اداء اخوانا العرب البي الجرب ان شاء الله.
المسلسل (رغم استواءه مع الدراما العربية ككل في خفة الصنعة والبعد عن العمق الاخراجي) الا ان فيه ايجابيات تحسب على الدراما المصرية خصوصا في قصة المسلسل وتناول الشخصية السودانية بصورة مختلفة
لا اعتقد ان الشيخ كان موفقا في دوره
ولا بائع العرقي.. ولم نعرف اصلا ان في السودان قد كان هناك رجالا يبيعون العرقي!! ومعروف ان الاندايات قد كانت في طرف الحلال!
اها عشان النت ما يقطع تاني
ودعتكم الله
بس نفت ليكم أميرة الشيخ زي ما فاتاني في كل محفل
اميرة دي اصلا ما كانت صاحبتنا
هي اصلا اصلا استاذتنا
آي والله... وكنا بنقول ليها (ست أميرة)
اها بس عشان تاني.
:)

تضحك يا حاقد :) :)
:) :)
انا عارف الطعمية حارقاك وما فوتها منك الا رمضان
صحي الشياطين بربطوها
:) :) :)

هههههههههههههههههههههههه
هههههههههههههههههههههههه
دي النجيضة والله!

يا ود الصايم طعميتك دي شكلها بادية في مكان تاني!
كيكي قال في نقاش دائر في الفيس بخصوص الموضوع
أجدع الرابط

Quote: (طبعا ده لزوم الدور بتاع دقيقة الظهرنا فيهو)

يو ديسابوينتد مي يا قصي!
أسي أنا كل يوم أقعد وأحرس راجي ظهورك أشوف نهاية نظرتك الخبيثة قدام الباب ديك تقول لي دقيقة!!
دقيقة إنتا!
يا قصي الأتيتيود بتاعك في الثواني ديك بقول حكايتك ليها بقية!!
معناتو إنتا كنت over في الدور!
متذكر الزول القال ليك "ما بتخجل كبييييير كدا وأبوك اسمو مجدي!"؟
أسي ما بتخجل خريج ليك كم طاشر سنة وتظهر لي ثانيتين بس!
الحسنة الوحيدة إنو نزلت في الريزومي بتاعك إنك اشتغلت مع الفخراني وسلافة معمار

Quote: الحسنة الوحيدة إنو نزلت في الريزومي بتاعك إنك اشتغلت مع الفخراني وسلافة معمار

وحاتك سلافة ما شفناها بي عينا... والدكتور مقعدينو في فترينة زي حلاوة المولد كلما يجيهو تصوير يتمروهو ويطلعوه ويرجعوهو :) :)
مكتوب عليه (مكتوب الاقتراب) .. كان ما العيبة كان كتبوا (والتصوير) :) :)

اها .. انا يا اخوي مشيت والله من باب الفضول لا اكثر ودوري ذاتو شنو ما كنت عارفه.. ووريني اعمل شنو في لحظة التصوير
علا اخوك اتجدع.. قالوا ليه قول (مرتي عاقر عاوز عيل) قلت ليه لع (بدور الجنى).. على نكتة الجعلي :) :)
:) :)

يا قصي المشهد بتاع (المحاولة الفاشلة لتحويل الشيخ لدجال) دا فات علي
لكن ردة فعل الشيخ كانت وهابية وهابية كدا!

هو شيخ ما بدي الجنا ده شيخ شنو؟
الشيخ لازم يدي الجنا، ويشفي المرضى.. و تحت تحت يحيي الموتى..

قالوا الحوار شيخوا مات وخلفوا ولد شيخوا.. قام مشى ليهو في غرض.. اها الشيخ الجديد قال للحوار القديم: غرضك مقضي "ان شاء الله".
بس الحوار فكاها ليك بكيه.... شيخوا يهدي فيهو وهو يبكي زيادة
في النهاية الشيخ سألوا: بتبكي مالك يا زول..
قال ليه: يا حليل ابوك الما كان بقول ان شاء الله
:)

--------------------------
بجيك صادي

Quote: قال ليه: يا حليل ابوك الما كان بقول ان شاء الله :)

آخر معلوماتي عنك من كم سنة كدا قالوا لي إنك تصوفت!
فقلت لمصدري: غريبة الود دا كان طوالي ماشي مع الكفار!!
فقال لي: أصلهم الشيوعيين ديل أول ما يعجزوا يتصوفوا

Quote: فقلت لمصدري: غريبة الود دا كان طوالي ماشي مع الكفار!! فقال لي: أصلهم الشيوعيين ديل أول ما يعجزوا يتصوفوا

هسي سيدنا عمر المسلسله شغال ده.. كان ماشي مع الشيخ المكاشفي مثلا....
:)
ما ياهو ماشي مع الشفوت (عتبة و ابو الحكم والعاص) يا زووووول خمره ونسوان وقمار .. حاله تفرح
:) :) 

يا قصي (عتبة و ابو الحكم والعاص) كانوا (مشركين)، يعني أرفع درجة في اتجاه الإيمان من أصحابك
والمشرك- وإنتا سيد العارفين- يجي منه، لأنو خاشي السستم وضاربو فايروس الاعتقاد
لكن المشكلة في (الملاحدة)!، وأصحابك ديلاك- والعياذ بالله- كانوا ملاحدة راسم عديل

يا أشرف يا عزيز
قرأت كل أسماء الممثلين وجندت زوجتي لكي تقرأ وتتابع معي لكي أجد إسم (عبدالخالق) فلم نجده
ثم ركزت لكي أقرأ إشارة واضحة تقول ما معناه (المُشاركة المُميزة للممثلين السودانيين) .. فلم أجدها أيضاً

وفي رأيي ومهما قيل فقد كان آداء الممثلين السودانيين معقولاً مقارنة بمساهمات سابقة لبعض فنانينا
في الدراما المصرية ... مُستثني بالطبع آداء المرحوم إبراهيم خان.

غايتو ما أعرفه عن أُستاذ مجدى سليم المحامي ... فهو علم في منطقة الجزيرة .. لكن ما عارف صديقكم قُصي.

يا أبو مكاوي الظاهر إنتا والمدام ما جددتو كشف النظر قريب!

سمعت عن الأستاذ مجدي سليم ومواقفه الوطنية أما قصي فهو علم أيضا كوالده (لكن في البري)
قصي من الشباب المتميزين بغزارة العلم والثقافة، وفي الزمن داك كان بقول كلام كبار كدا نفهم نصه والباقي بفهمه هو براهو

Quote: غايتو ما أعرفه عن أُستاذ مجدى سليم المحامي ... فهو علم في منطقة الجزيرة .. لكن ما عارف صديقكم قُصي.

:) :) :) :)
برضو كتر خيرك
نتعارف الليلة يا (استاذنا) عاطف مكاوي
:)

يا شماتة ابلة ظاظا
ومحمد عبدالماجد الصايم فيا
:)