أنا لم أكتب هذا المقال: (دعوة الي المحافظة علي لغاتنا ولهجاتنا )!

اتصل بي اليوم عبر وسائط تواصل مختلفة بعض الأصدقاء والمهتمين من الناس يحاورونني في مقال "اللنك أدناه" ظنآ منهم أنني كاتبه... مما أضطرني لإفتراع هذا البوست بغرض النفي... ذاك أنني لست كاتب هذا المقال... هو مجرد تشابه أسماء... وليس لي الآن ما أقوله أكثر من ذاك.

دعوة الي المحافظة علي لغاتنا ولهجاتنا السودانية الافريقية/محمد جمال

http://www.sudaneseonline.com/arabic/index.ph...%85%D8%A7%D9%84.html

وذاك ما لزم توضيحه...

مع أمنياتي للجميع بالخير والنجاح في الخاص والعام... والعمل الدؤوب من أجل غد أفضل لنا جميعآ وللأجيال المقبلة.

محمد جمال

انتهى.

---

كل عام وأنتم بخير.

اخى محمد جمال
تحياتى ورمضان كريم وكل سنة وانت طيب
شكرا على التوضيح ولفت نظرنا على هذا المقال
مقال جيد و جميل واكيد بتعبر عنك حتى ولو لم تكن كاتبه!

Quote: انتهى

ههه
انتهي كيف يا جيمي !
ما ممكن
و زي ما قال خالد حاكم المقال بعبر عنك !
عموما عندك عدة خيارات :
1-دور لينا نقاش حول المقال دا - من اجل الفائدة العامة وكدة !ياخي دا جات مقشرة
2- ورينا مثلا انك لو كنت كاتب المقال كنت ح تعدّل شنو في المقال !؟
3- هل حصلت ليك مرات عديدة المشهد دا في موضوع تطابق الاسامي!! وهل المقالات كانت تعبر عنك -هه
4- بالعدم ممكن تحكي لينا عن مواقف محرجة مررت بها في حياتك - و كدة يعني !


ياخي انت في عز الشباب !

الصديق العزيز خالد حاكم

أسعد بإطلالتك الجميلة ولو في هذه الحتة العجيبة "مكان النفي".

Quote: مقال جيد و جميل واكيد بتعبر عنك حتى ولو لم تكن كاتبه!

لم أكن أتوقع نقاشآ عند فتح هذا البوست الذي كان غرضه توضيح حقيقة صغيرة وهي أنني لست بكاتب هذا المقال بغض النظر عن محتواه... وجاء هذا النفي إضطرارآ إثر نقاش دار في الفيسبوك والإسكايبي. وهذا النفي ضروري لسببين الأول هو الحقوق الأدبية لصاحب المقال والثاني أنني لا أتحمل مسؤولية آراء الآخرين بغض النظر عن تطابقها من عدمه مع تلك التي لي.

لكن دعني الآن لطفآ أذهب إلى حيث هيثم طه وأعود إليك من جديد... إن هيثم يقول قولآ إئدا : ).

رمضان كريم وكل سنة وانت طيب...

محمد جمال الما كاتب المقال : )

إنتهي النفي يا هيثم... مع إنو يبدو أن لا شيء ينتهي كون النفي ذاتو مشكوك في فاعليته هههه

جاييك يا هيثم... أنا شكلي أتمقلبت مقلب مرمد : ).

الناس مصرة "بالإجماع" أن الأفكار الفي المقال حقتي والإسلوب حقي والإسم حقي ومافي زول غيري إسمو محمد جمال مهتم بالكتابة ... على أقل تقدير الناس الحولي ما سمعو بيه وأنا ذاتي ما سمعت بالأخ محمد جمال قبل دا. يعني الأخ محمد جمال "الآخر دا" كان ما ظهر في حتة ما، ح يكون عندي شوية مشكلة.
أكتر من كدا واحد صاحبي من بورداب هولندا قال لي إن الحكاية لا تخرج من إحتمالين: 1- إنك إستعجلت في إرسال المقال وبعد ما راجعته ما عجبك وعاوز تنكرو 2- تكون كاتبو بإسم زول تاني ولصقت فيه إسمك الحقيقي بالخطأ (وهو يشير إلى إحداهن أتهمت بأنني أكتب بإسمها للحظة ولوفي إطار ضيق)...

غايتو قصة... بجيك تاني نناقش الأفكار القطعية والحادة في المقال المعني. نسوي شنو ههههه

---
أنت وين هسه؟... تعال الإسكايب بعدين عزيني لايف في محنتي دي : )

سلامات جيمي ولا بأس ان ترمق الي الاسفل لتري المشاركة !








التعديل لنقل المشاركة!!

Quote: و زي ما قال خالد حاكم المقال بعبر عنك !

ههههههههه

الحقيقة انا ما شفت المقال الا الان
لكن لو شفتو قبل كده ما كان قلت حقك
بل على العكس.. كنت اندهشت جدا
لانو المقال لا يشبه لغتك اطلاقا "وهذا ليس بذم للمقال"
ولكن لغتك لا تشبهه ولا تقاربه
ربما هناك أفكار جيدة في عضم المقال.. ولكنها قياسا بكتاباتك غير موثقة ولا دقيقة..


وكل عام وانت بخير
ولا تحرمنا من كتاباتك

هيثم:

Quote: 1-دور لينا نقاش حول المقال دا - من اجل الفائدة العامة وكدة !ياخي دا جات مقشرة 2- ورينا مثلا انك لو كنت كاتب المقال كنت ح تعدّل شنو في المقال !؟ 3- هل حصلت ليك مرات عديدة المشهد دا في موضوع تطابق الاسامي!! وهل المقالات كانت تعبر عنك -هه 4- بالعدم ممكن تحكي لينا عن مواقف محرجة مررت بها في حياتك - و كدة يعني !

أنا غايتو حا آخدالموضوع بجدية... على الأقل نتونس شوية : ).

دي أول مرة يا هيثم تحصل عندي... ودي أول مرة أسمع بناشط أو كاتب إسمه محمد جمال "له مني التحية" ممكن أكون أنا مقصر أو ما مطلع كفاية معذرة مقدمآ للأخ محمد جمال أينما وجد... لم أسمع بغير مذيع في التلفزيون السوداني إسمه "محمد جمال الدين". لم يكن الأمر ليهمني لولا أن كثير من أصدقائي ناقشوني في الأفكار الواردة في المقال وكنت في البداية محتار جدآ عماذا يتحدثون كوني لم أقرأ المقال المعني وهم ظنوا أنني كاتبه فلا حوجة في تصورهم لمدي بمصدره أو لنك له... المهم كنت في شوية دوامة لغاية ما صديقتي "مي بركات" من السعودية أرسلت لي اللنك فقدرت أن الأمر على صغره يحتاج التوضيح كما أنني أرى في الحكاية بعض الطرافة!.

الأفكار الواردة في المقال المعني ليس فيها الكثير الجديد في تقديري. وإنما هي رؤى وقناعات كثير ما يرددها البعض منا... جدل قديم متجدد يشبه أزمتنا السياسية والإجتماعية والثقافية. والمقال من الناحية الفنية مكتوب بإستعجال من وجهة نظري الصغيرة.

وإن سألت عن رأيي الخاص حول مسألة الهوية، فليس عندي الكثير لأقوله غير الذي قلته في السابق، ومن ضمنه المساهمة الصغيرة المتضمنة في الرابط التالي:
يعني شنو "هوية" (صراع القيم والرؤى والمصالح) ووجه...ي كلام الباقر العفيف

محمد جمال

---
طبعآ دا موقف محرج شوية يا هيثم.. بس الواحد لما تحرجو الأقدار بكون صامد أكثر مما يدخل نفسو براه في المآزق وقد حدث لي كما يحدث للكثيرين... لو إنت حكيت شوية مواقف محرجة مريت بيه أنا أوعدك ما ح أقصر... بس أونسك كدا بدون مقابل، لا والف لا هههه

قصي مجدي سليم سلامات

Quote: الحقيقة انا ما شفت المقال الا الان لكن لو شفتو قبل كده ما كان قلت حقك بل على العكس.. كنت اندهشت جدا لانو المقال لا يشبه لغتك اطلاقا "وهذا ليس بذم للمقال" ولكن لغتك لا تشبهه ولا تقاربه ربما هناك أفكار جيدة في عضم المقال.. ولكنها قياسا بكتاباتك غير موثقة ولا دقيقة.. وكل عام وانت بخير ولا تحرمنا من كتاباتك

شكرآ للمجاملة الجميلة. كلنا نحاول من باب الإضطرار الإدلاء بالرأي في مسيرة حياتنا العامة المشوبة بالتعب... وأنا من الناس أفعل ما بوسعي وفق طريقتي الخاصة و لا أجدني راضيآ مني ابدآ...بل كثيرآ ما أجدني أخجل بيني وبين نفسي من قصوري الفني والمعنوي.

لك الشكر مجددآ وكل عام وانت بخير.

بالمناسبة أنا برضو ما شايفك ليك مدة!...أتمنى أن تكون بألف خير.

محمد جمال

Quote: بالمناسبة أنا برضو ما شايفك ليك مدة!

ملاحظة في مكانها..
اذ لم تعد لي طاقة للكتابة عموما.. واحس دوما باللا جدوى
بيني وبينك :) اسفيريا :) :
اظن ان الجنس البشري قد فشل.. وهو في طريقه الجاد نحو الانقراض التام..

Quote: ملاحظة في مكانها.. اذ لم تعد لي طاقة للكتابة عموما.. واحس دوما باللا جدوى بيني وبينك :) اسفيريا :) : اظن ان الجنس البشري قد فشل.. وهو في طريقه الجاد نحو الانقراض التام..

دا كلام صعب يا قصي!. مع إنو معظمنا زيك تمامآ بنصل لي حتة يأس كبيرة بس لحسن الحظ نادرآ ما تصل نقطة الدمار الشامل. والوضع دا مفهوم لأن ظروفنا الواقعية تصنفنا في قائمة الشعوب الأكثر بؤسآ وشقاءآ والأسوأ حظآ في عالم اليوم..... بس: الأمل... الأمل... الأمل.

بس بختلف معاك شوية في قصة إنقراض الجنس البشري دي!. لأن البشر في ظني يستطيعون أن يبقوا على وجه الأرض بلا عقل وبلا ضمير وبلا علم وبلا فكر وبلا أخلاق "الأخلاق وفق أتفاقية جنيفا لحقوق الإنسان". بإختصار يستطيع البشر أن يعيشوا في غابة "حرفيآ" وقد كانوا يعيشون في تلك الغابة مئات الآلاف من السنين ودون أن ينقرضوا. فقط قد ينقرض الآن الناس الكويسين فتدور الحياة دورتها الشريرة من جديد... ثم تدور وتدور وتدور إلى يوم الدين.

حاول أتفاءل شوية يا خ... نحن أملنا فيك كبير.

تحياتي

محمد جمال

Quote: بس بختلف معاي شوية في قصة إنقراض الجنس البشري دي!. لأن البشر في ظني يستطيعون أن يبقوا على وجه الأرض بلا عقل وبلا ضمير وبلا علم وبلا فكر وبلا أخلاق

هو اصلا ديل هم الحا يقرضوا البشرية: ربما الحياة كلها..
زمان.. قبل العلم.. وقبل الفكر.. لم يكن هناك خطر الانقراض
الآن.. العلم هو ما يسهل الأمر
ولن يعد هناك غابة لكي يرجع اليها الانسان لانها ستنقرض أيضا...

بس!!

Quote: بس: الأمل... الأمل... الأمل.

صح

لولا اليأس.. لما كان الأمل..

بعد إنفصال الجنوب مباشرة ألتقيت بعض أصدقائي الخواجات "المطلعين على الأمور" وقد كانوا يعلمون من نقاشات سابقة أنني أحد الناس الذين يحلمون بالوحدة... وعندما حصل الإنفصال رأيتهم يتعاطفون معي مع لمسة صغيرة من الشماتة وهم يرونني حزين "غصبآ عني" فحاولت عبر الفكاهة أن أتجاوز تلك اللحظة الما حلوة كما أصد أطياف الشماتة التي ربما كانت حقيقة أو تخيل لي... فقلت لهم أنا سعيد لأن السودان بدل واحد بقى سودانين "يعني بدل بلد واحدة بس، بقى عندنا بلدين حلوين" : ).

هسه الحمد لله إنتو بقى عندكم إتنين محمد جمال... محمدين جمالين الدينين حلوين:).

---
غايتو أرجو الراجيكم كان نسختي التانية أخدت عضوية في البورد دا، قيقاراوي ومن لف لفه إلا إعتزلو التنظير هههه

Quote: ولن يعد هناك غابة لكي يرجع اليها الانسان لانها ستنقرض أيضا...

والله انت واصل مرحلة صعبة يا قصي... ولا إمكن نكون نحن المتفائلين أكتر من اللازم!.

بس، نعم... انت صحيح: لو لا اليأس لما كان الأمل...
ولا الخوف لما كانت الطمأنينة "كلام زيادة من عندي".

Quote: هسه الحمد لله إنتو بقى عندكم إتنين محمد جمال... محمدين جمالين الدينين حلوين:)

ههههههههه
بس الدينين ما حلوين
امي قالت لي: فقيراً من الدين غني
:)

جيمي طبعا البوست ادي غرضو بـ(انتهي) !
خليني استفرد بالود قصي دا :)

تعال هنا يا قصي اول حاجة انت بتكتب كتابة لذيذة وعندك مفردات طاعمة تقول ناحتها براك لغرض المقال !
دا ما الموضوع حسع --ههه(دا كسير تلج ما قبل الشكلة !) ياخي انت فتحت بوست قبل كدة وعملنا
ليك مشاركات ووعدتنا بالعودة (بايحاء فيهو جدية !) ولسع ما جيت
شفت جني وجن زول يفتح ليهو بوست و يقوم يفكو عكس الهوا !

عليك الله لوعندك سبب اخر غير انقراض الجنس البشري انا داير توضيح للوعد المخلوف !
طبعا لومثلت اي دور براءة من شاكلة (ياتو بوست ومتين والمشغوليات ونوع "انا لم اكتب ذلك البوست" !) -حسابي
معاك ح يكون اعسر !

ابقي طيب

Quote: جيمي طبعا البوست ادي غرضو بـ(انتهى) !

تصور دا كان فهمي... أنا قايل الإمور بتمر على سلام ويا دار ما دخلك شر... تقوم تجوني إنت وخالد حاكم وتقولوا لي البتاع بعبر عنك كما قال الذين من قبلكم في الإسكايب و كتاب الوش وما كانوا له مقرنين هههه

Quote: خليني استفرد بالود قصي دا :)

كان قادر تخليه يتفاءل شوية ويطلع من البنفسجية العايش فيها دي*... مبروك عليك... ليك اللحم ولينا العضم : ).

---
هممت بقول "السوداوية" فتذكرت أن المقام مقام هوية فخفت على نفسي من النيران الصديقة وشماتة الأعداء فأستبدلتها ب "البنفسجية" كلها ألوان الله ويا دار ما دخلك شر: )

الواحد خايف يكون في الكاميرا الخفية بتاعة رمضان : )

دا واحد من الإحتمالات الواردة يا هيثم... وهناك مزيد من الإحتمالات ": إنو الواحد شالوا حمار التنظير وهو نايم... وتتعدد الإحتمالات والجرسة واحد : ).

ودا كلو هين... الخوف الكبير يجي محمد جمال "الآخر" وإنفي نفي بات إنو كتب المقال دا ويتبرأ تمامآ منه. وبعد دا أنا ما عندي حل إلا أعتذر للأصدقاء والقراء وأنحني لعاصفة الأعداء (ما عارفهم منو) وأتوكل على الله وأعيد صياغة البيان (قصدي المقال) وفق إقتراح هيثم رقم "2" في مربع الأزمة الذي وضعه أعلاه... والله المستعان.

محمد جمال

قصي:

Quote: بس الدينين ما حلوين امي قالت لي: فقيراً من الدين غني

دي لقطة حلوة منك يا قصي ومن أمك العزيزة... بس وأنت العليم ما أحلى كترة الأديان لكن السلفيون منا لا يفقهون برغم كراكتيرات صديقي الفنان المبدع عمر دفع الله!.

أما عن كلام أمك العزيزة فنحن مدانون مدانون لأن الدولة متدينة بإسمنا مليارات الدولارت وغصبآ عنا ولسه حا تتدين مع فلستها المجلجلة دي ... وعاملة فيها "الدولة" متدينة لأنها فاهمة أن الشعب متدين : ). (مش وعدونا بدستور إسلامي) ههه

شفت كيف يا قصي!. يا خ اتفاءل... أضحك ... سودانا دا نكتة كبيرة : ) ... نحن أكتر شعب مفترض يضحك لحدة الضحك ما إشرطنا دا لو ما شرطنا من زمان : )

سلام للجميع

انا جاي ابارك الشهر الكريم لصديقي محمد جمال الماكتب المقال

كل سنة وانت طيب وربنا يتقبل صيامكم وقيامكم

يكفينا من دنيانا "أملآ" يا إبن عوف أن هناك من هم مثلك في حضرة الوجود ... فهل يسمعني قصي "؟!"

كل عام وانت بخير يا صديق وشعلة في عتمة اليأس الرهيب.

يا احمد بن عوف سلامات انت الاخر :)
ياخي انت كجيت الثورة وقعدت تقول لينا ما تطلعوا من ودنوباوي ! اها - سمعنا كلامك وخلينا ودنوباوي و خليت
عبد المطلب بتاع الفيلا يشمت فينا !!
لا لمينا في ثورة ولا لمينا في ملاسي الكان بدا ثورجي وبقي يساهم في تسمية الثورات
وحسع شابك اماني اعتذري اعتذري !!

حسع دي حالة دي!!
المهم انت مطالب بالاعتذار للثورة السودانية بعد داك نتفاهم :)


--

قصي بتاع الايحاءات الجادة بالعودة امعانا في التضليل :) رأيك شنو في عمايل ابنعوف دي !!؟

---

جيمي :حصل شنو في موضوعك !

هيثم يا خ نحن بريناك بقصينا على رفعته... بس ارفع يدك عن إبن عوفنا... (الزول دا مقدس).

---
قلت لي الناس الإنشقت رجعت تاني للمربع الأول؟... أنا شكلي ما متابع المنبر كويس... معليش... بس دا متوقع... لأن الثورة دي لسه مرخرخة شوية... لما يشتد إوارها وتتسور (من سوريا) وتقطع الألسن... أوعدك سينشق الجميع ويعلنون أنهم معها ومع الشعب المسكين... أصبر شوية بس : ).

Quote: جيمي :حصل شنو في موضوعك !

والله لسه مجهجه........ وجيمي الآخر ما ظهر ولا جاب خبر : )

ياشباب والله عجبتنى ونستكم قلتا اسلم عليكم واقول ليكم كل سنه وانتو طيبين ورمضان كريم


وعندى اقتراح ( رايكم شنو نعمل حمله نسميها معا حتى يظهر محمد جمال الدين الآخر )

الاخر دى ذكرتنى مرتضى مقبول الله يطراه بالخير لو بتعرفوهو ولو مابتعرفوهو اعملو رايحين :)


تخريمه

يامحمد جمال الهنا ده ما الاخر ياخ حرمنا المصون معجبه بى كتاباتك وبترسل ليك سلامها مع هذه الكلمات ( وش غيران )

كونوا بخير

امجد البصيرى والمدام... سلامات كتيرات جدنات

Quote: يامحمد جمال الهنا ده ما الاخر ياخ حرمنا المصون معجبه بى كتاباتك وبترسل ليك سلامها مع هذه الكلمات ( وش غيران )

والله يا أمجد دا شرف لا يدانيه شرف. كم أنا سعيد بيك وبالأستاذة العزيزة وشكرآ لها على اللطف بي "أنا زول مظلوم"!.

بس تغير ليه يا خ انت ربنا حلاك... هسه لو المدام أعجبت بكتابات غارسيا ماركيز "لا قدر الله" كان مفروض تشتري كمية من الكتب بخمة قروش... هسه جاتك ملح ههه... يا خ دي مرا متواضعة جدآ وقنوعة ربنا إدينا زيها... ويديمها بينكم من محبة وسعادة... وأما المال والبنون الزمن دا بقوا إختيار حسب المواقف، فلا نقول شيء: ).

تحياتي يا أمجدالعزيز وشكرآ للمجاملة الجملية... وكل سنة وأنت والأسرة الجميلة بخير... ورمضان كريم.

محمد جمال

Quote: دفعني لكل هذا شئي غريب يحدث الان وهو ان بعض القبائل المحاطة بوسط يتحدث العربية وهي دراجة في الغالب الاعم يدفعون ابناءهم واحيانا بالضرب لتعلم اللغة العربية مع رفضهم تعليمهم لغة الام من قال لهم انهم متخلفون وهم اصحاب الحضارة الايدل هذا علي ان يدا خفية تعمل علي تقويض هذا الارث الضخم في سبيل وهم وسراب . ان الميزة التي نتميز بها كامة سودانية هو هذا التنوع الثقافي و اللغوي الجميل اضافة الي تنوع موسيقانا وايقاعاتنا ورقصاتنا في تناغم ياخذ بالالباب و تفرد قل ان تجود بمثله الانسانية جمعاء فبالله عليكم هل توجد امة في هذا العالم الممتد تضم بين جنبي دوله واحدة ما يزيد عن خمسمائة لغة ولهجة لا اظن ذلك واكاد اجزم به .

يا مهمد جمال الدين .. الكلام دا ما سامح ياخ ناكرو ليه؟؟؟!!!!

:) سلام ليك وللحلوين الفوق كلهم

مرحب بالعمدة... بس نحن نفينا بس ما نكرنا... وشتان بين النفي والنكران.

---
شكلو عبر عنك:). الحاجة السمحة برضو حقة صاحبها!. نهار سعيد وكل عام وانت بخير.

رسالة إلى الأخ العزيز محمد جمال "الآخر"

سلام وكل عام وانت بخير

والله مقالك جميل وعبر عن ناس كتيرين منهم أصدقائنا خالد حاكم وهيثم طه وعيدروس (كما تشهد به وقائع هذا البوست) وربما آخرين من الهامش وكذلك المركز الجغرافي... وأنا ذاتي معبر عني شوية مع إختلافات صغيرة لكنها نوعية لا علاقة لها بكوني من المركز فيزيائيآ لكن لأسباب فكرية ومفهومية. شكرآ لجهدك.

بس أنا عندي فوبيا من "محمد جمال" فتاريخ محمد جمال "الآخر" دائمآ بمبي معاي:
"مثلآ":
واحد إسمو محمد جمال خاتي صورتي في الفيسبوك عدة أسابيع بتحدث بلساني الضعيف لحدة ما ربنا هون وأسكت عبر تقنيات إدارة الفيس بوك... عمل لي شوية مشاكل صغيرة... وكان يحدث الناس عن سيلفيا وكيف كانت رائعة وعن أشياء أخرى : ).

عندما استقلت من قوات التحالف السودانية إستقالة معلنة عام 2004... أتصل أحدهم منتحلآ شخصيتي " (محمد جمال) يخبر ثلة صغيرة منتقاة من أهلي وأصدقائي أنني أصبحت إسلامي وأنضممت للمؤتمر الوطني "الحزب الحاكم" وفق صفقة سرية رتبها أحد أقربائي في جهاز الأمن وإسمه "محمد أحمد الطاهر". ثم أتصل أحدهم بأخي الأصغر المحامي بجبل أولياء فتح الرحمن جمال الدين يؤكد له الخبر ويأمره بكتم السر كون الأمر سري جدآ خوفآ علي "محمد جمال" من تربص المعارضة الإجرامية بي ممثلة في التجمع والحركة الشعبية كوني أملك أسرار عسكرية وأشياء أخرى خطيرة.

وهناك المزيد! ... شفت كيف يا محمد جمال أنا ممكن أكون معذور... عشان كدا تعذرني في البوست دا... مع إحترامي الشديد ليك... وأتمنى إن كنت تقرأ سودانيزأونلاين وأظنك تفعل كونك نشرت مقالك المعني بها... فأرجوك كاتبني على الإميل التالي:
[email protected]

وستجدني ممتنآ جدآ لك... وسأبقى سعيدآ بمعرفة رجل في قامتك... وإنه لشرف كبير لي... شكرآ لك مقدمآ.


تحياتي يا محمد جمال.

محمد جمال

وحيات عشرتكم الاسفيرية دي
انا كنت قايل البوست ده اتقفل زمااان وكل قرد رجع غابته.. والله والله وما طالبني حليفة
ما عرفت انكم مواصلين الا هسي وبالصدفة اثناء تفتيشة لي بوست طاشي.. :)
اها نقول واحد

عزيزي هيثم
تحياتي
حقيقة لقد قمت ببحث طويل حتى لا تتهمني بالبراءة :) :) اقراء هنا "الاستهبال" لأنو والله ما كنت عارف قطع شك أخلفت وعدي وين! لأنو الإخلاف في هذا الزمن قد صار ديدن
وآخيرا عرفت
لعلك تقصد هنا
الأستاذ محمد سليمان بين الشقاء الأيدلوجي والقوى الجديدة
ولك الحق كله فيما قلت لكن وحاتك ما عندي سبب غير انقراض البشرية :)
احب ان اعيد على مباصرك قولي هناك:

Quote: وهي أشد ما تكون مؤسفة لشخص مثلي يأخذ الأمور على محمل الشخصي والجد، لا لمجرد الكلام واللغو، ولأن حبي للرجل قد كان ولا زال عظيما فإن فعائله الآخيرة ترجعني دوما لتمني أمنية "مايا" التي افتتحنا بها مقالتنا هذه.. فحقا وعندما اقرأ ما خطه الأستاذ محمد سليمان في آخر الشهور فإن قلبي يهفو الى رصاصة تريحه من سقوط العظماء.

ولقد توالت اخفاقات نخبنا بعد ذلك بصورة متسارعة، كما اصبح الموت يفجعني في كل يوم فاصحو على نعي حبيب او صديق او قريب
لك العذر كله والعتبى حتى ترضى
وعسى ان تنفعنا نصائح محمد جمال الدين أن : الأمل الأمل

نعم قصي مجدي سليم... العزيز... هناك أمل!.

---
كبير

فوق

لعناية الاخ هيثم طه
عشان ما يقول بعدين اتجاهلناه
:)
بي براءة :)

Quote: لعناية الاخ هيثم طه عشان ما يقول بعدين اتجاهلناه :) بي براءة :)

ههه
برضو ما بحلك !
تلك كانت من انواع الجرائم التي لا تسقط بالتقادم :)
---
هل تصدق يا قصي انا لا متذكر البوست ولا الكلام زاتو شنو -وانا زاتي كنت غبت من المنبر فترة
يعني ما عارف زاتو انت جيت راجع للبوست ولة لأ --
لكن اعتمدت علي فكرة " الشعب السوداني قاعد علي الهبشة "-- !
اتخيل بس المتذكرو انك في مداخلة اثنيت علي المشاركات بشدة ووعدت بالعودة بايحاء جاد للرد برواقة ---!
وقلت في نفسي دي حركات زول ما داير يرجع --هههه
وبعد داك نسيت البوست
مش مصطفي سعيد لامن جا راجع قال : يبالغون في السلام بالاحضان لكي لا تشعر بانهم قد نسوك (ولة حاجة زي دي ! )

بس دي القصة كلها وانت طلعت مرتكب الجريمة:)

وعموما مش بقولوا لو داير تصاحب زول شاكلو شكلة خفيفة كدة !

و طيب ياخ ! ليه خليتني اشرح واحتمال الخطة تفشل حسع :)

--

بالمناسبة موضوع محمد جمال "الاخر" استفحل و جاب ليهو محمد جمال "المتخيل" !!

Quote: بالمناسبة موضوع محمد جمال "الاخر" استفحل و جاب ليهو محمد جمال "المتخيل" !!

لسه ربما ازدادت الأمور إستفحالآ وظهر "محمد جمال" الحقيقي واللهو ليس أنا ولا الآخر ولا المتخيل... بل الخيال في ذات رقبتو !!.

وعليه ربما أصبح الأمر واضحآ بالنسبة لي... وبحسب السوابق!... يتم إغلاق الفايل الصغير.
شكرآ لصبركم... وكل عام وأنتم بخير.

محمد جمال

أصحاب حلوين
..
ويلا معاكـ منتظرين هذا الآخــر