سمارتي أنا ومريوم بنت الحسين..بس عيبن لي البلاك بيري ^___^

طبعاً متعنصرات لبتاع أبل
أنا متعلقة بالبلاك بيري
لاكين نضميكن حول الآي فون زوغ عيني أو كادت(:(:(:(:
إشمعنى يعني الآي فون؟؟
عليكن الله شوية شوية عشان التقانة دي علاقتي بيها زي علاقة الكيزان بالنزاهة أو كما قال(:(:(:
في بوستات سابقة الحاجة الوحيدة اللي طلعتا بيها منها أن الآي فون أجمل فقط لأنه بنكهة التفاح (:(::::::::::(: ^^____^^

اذيك يا لنا يا اختى??
كيفك? كيف ابوكم ? كيف بامبى??(احمم.... قصدى دود الوعر))
مشتاقين والله....يا حليلك و حليل زمن بوستات الطبيخ و الاطفال

لنا يا بنت امى موضوع (احسن البلاكبرى ام ال اى فون ?)ده بقي ما سؤال اصلا....
و الله جد.
ما اظن فى زول نصيح بيشترى بلاكبرى الان. الشركة ذاتها فى عضمها ح تفلس بعد كم شهر كده (اذا ما حصلت معجزة)


السؤال الان بقي ال اى فون ام الاندرويد قلاقسي (او حاجه قريبة منو)????

و لو عاوزه تسمعى كلامى اتوكلى و استنى ال اى فون 5 ...ح يطلع نهاية السنة.

الاندرويد فيه مشاكل عربى...و مشاكل اختراقات وكده
ال اى فون ساااهل و ظريف و قيافة

Quote: الاندرويد فيه مشاكل عربى...و مشاكل اختراقات وكده ال اى فون ساااهل و ظريف و قيافة

يا أسمارت .. في دي ما إسمارت ودكتور House حيزعل منك..
إنحيازك لتفاحة إستيف جوب سيفقدك روعة تقنية أندرويد جلاكسي
الجهاز ده منتشر إنتشار الجراد في العيش .. بلغ سعره في السودان
6 مليون بالتمام وغير متواجد .. ليست لديه أي مشاكل عربي أهو معظم الناس بكتبوا بيهو في الفيسبوك والأون لاين عادي .. بالمناسبة أنا أندرويتي .. وجنني وجن منتجات جوب التفاحية دي .. تحياتي يا إسمارت ورمضان كريم وبهديكم دي إنت ولنا مهدي ..

العرب و الشيشه ^_^

يا عادل نجيلة ، رمضان كريم.
تعرف، جيتني بعد ما بقيت ما بقدر علي الغلاط. لي عشر سنوات و نص بغالط هنا..... تعبتا
يا زول حلال عليك الاندرويد، استمتع بيه. أكيد تلفوناته سمحة. لو ما سمحة ما كانت بقت تنافس ال اي فون ^_*
لكن و انت بتنزل في تطبيقات الاندرويد اعمل حسابك و فتح عينك. لانه في كتير جداً منها لما ينزل في تلفونك بيسرق معلوماتك الشخصية.
و لو بقيت في امريكا او أوربا ممكن يسرق معلومات حسابات البنوك
و لو عندك طريقة اشرح لاخونا النصري امين يشغل العربي كيف. جننا جن بان العربي في الاندرويد بتاعه ما شغال.
و good luck تحاول تجدد نظام التشغيل في تلفونات الاندرويد. عادي ممكن قوقل ما تنزل المشغل الجديد لتلفونك اللي ممكن تكون اشتريته قبل شهر.
و معليش، لازم تصبر علي اي تطبيق جديد لشهور لحدي ما ينزل في اندرويد. لان كل التطبيقات بتنزل في اي فون الاول و بعد شهور حتي تنزل في اندرويد.
و معليش ما ح تقدر تستمتع بiTunes U و هي كمية مهولة من المحاضرات ( فيديو) من اكبر الجامعات في امريكا. ستانفرد، هارفرد، ام اي تي، و عشرات الجامعات?

يا عادل نجيلة يا اخوي انا ما بتكلم ساي.

لنا مهدي.. ما تخليني اغير رأيي فيك ... بلاك بيري! انت عارفه ناس RIM زاااااتهم في كندا اعترفوا انه Apple هدّت حيلهم!!

لنا وسمارت ومريومة وعادل نجيلة
رمضان كريم

قرأتكم وتذكرت صديقي ودفعتي في الدراسة الجامعية ( ع )

كنا ذات يوم نتمشى في قهوة النشاط فإذا بسيارة إبن دفعتنا ( أ ) المرسيدس تمر قربنا وبتلقائية علق ( ع )

" نحن لينا الله وعيشة السوق مع ناس ( أ ) دا "
تملكتني الدهشة من التعليق فـ ( ع ) نفسه لا يقل ( طبقياً ) كثيراً عن ( أ ) إذ يملك هو الآخر سيارة وهو الطالب فسارعته بالقول

" ليه يا خوي الناقصك شنو ؟؟ "
فرد على جاداً

" تخيل ( أ ) دا عشان عربيتو بلوحات دبلوماسية ما بيقيف في أى صف بتاع بنزين وبيكبوا ليهو الكمية العاوزا دون أى نقاش ، ناس نحن ننتظر إسبوع بحالو عشان يكبوا لينا 4 جالون "

فضحكت حتى إعتبرني الطلاب مجنوناً وأردفته بالقول

" يا ( ع ) ياخ إنتا هسع ليك الله وعيشة السوق عشان ( ا ) بيكبوا ليهو بنزين أكتر منك ... أها أنا الما عندي عربية كلو كلو ولا مفكر مجرد فكرة أمتلكها حتى بعد التخرج أقبل وين ؟؟ "

الاستاذة اسمارت وبقية المُتُداخلين
سؤال فنى
ماهى الاسباب المحتملة لخروج الاى باد من الشبكة بفترات متقاربة , غالبا المشكلة ليست فى مزود الخدمة لانو لمن اعمل ليهو rsset بعدها بيشتغل على طول ...

Quote: ماهى الاسباب المحتملة لخروج الاى باد من الشبكة بفترات متقاربة

غايتو يا راشد البعرفو إنو الجيلبريكـ بعمل الحركة دي!
حصلت معاي في الآيفـون العادي وطوالي (رجعتو السجن)!!

Quote: لنا يا بنت امى موضوع (احسن البلاكبرى ام ال اى فون ?) ده بقي ما سؤال اصلا.... و الله جد. ما اظن فى زول نصيح بيشترى بلاكبرى الان

النجيضة في أسهل طرقها!!


إنتي جادة يا لنا؟



بالمناسبة دي .. نستغل سمارتنا شوية!
اسمعي ياااا اللخت .. أنا لسع في الـ 4
نحوّل لـ 4S ولّ ننتظر شوية نشوف قصة الـ 5؟

_
طبعا لنا ح تشوف الكلام دا كلام طير في الباقير

حتى أنت يا ود الصايم ؟؟؟

عاطف يا عمكـ .. سـؤالكـ دا
بالنسبة للبلاك بيري ولّ البنزين؟



البلاكـ بيري أجبرونا عليهو ناس الشغل في فترة من الفترات
واتعصرت عليهو شديد .. أول ما الأمور مشت طوالي اتخارجت منو!

حاليا الجهاز شغال منبّه زي الترتيب
وفي أحسن حالاتو بكون من ألعاب (جوان ـ أصغر بناتي)!!

تشكُرات باود الصايم على الاستجابةالسريعة
انا مفكر انى ارجعو السجن لكين عندى شوية اسئلة
- لو عملتة update هلال البرامج اللى نزلتها من ابل بى الدرب بتطش ولا بتقعد
- هل من الممكن اعمل لى الجهاز جيل بريك تانى

تحياتي يا راشد
البرامج لو نزلتها من الأبل ستور ح تكون زي ما هي
بعد ما تعمل الأبديت .. أما الجبتها من السيديا والإنستولس
ح تروح شمار في مرقة!!


_
حاليا يوجد جيل بريكـ لجميع إصدارات الآيفون

يعنى اتوكل واعمل up date لى الاى باد
عشان نحل مشكل الشبكة وربنا يحل قصة البرامج ولا شنو !
شكلو كدة دة الخيار الامثل لانو الاى باد دة ماعملتةليهو تحديث من مااشتريتو
طيب ماتشرح لى طريقة التحديث وينوبك ثواب

يا لنا القصة على حسب الاستخدام
لو الفهم إيميلات محتاجة تقريها و تردي عليها طول اليوم يبقى البلاك بيري هي الخيار الأفضل و في البال الباقات المطروحة من اتصالات و سهولة الطباعة بكيباد البلاك بيري عموما
اما لو كان الفكرة التطبيقات و الآي تيون و القيامة الرابطة دي فدا شي تاني
لكن راعي للتكلفة برضو

اذيكم يا شباب ؟؟
ود الصائم ، وينك يا رجل؟؟
قبل ما ارد عليكم كلكم خلوني أبدا بود البشر(ى)
طلعتا قديييييييم. يا اخي الكلام ده كان قبل سنة كده. هسي ما في اي فرق بين البلاك بري و ال اي فون في الايميل
بالعكس ال اي فون و ال الاندرويد بقوا أحسن منه حتي في موضوع إيميلات الشغل
الاسبوع الفات الشركة اللي انا شغالة فيها( شركة هندسية فيها حوالي 6 الف موظف، 2 الف منهم عندهم تلفونات من الشركة) حولت كل تلفونات الموظفين ل اي فون
و ده الاتجاه الان من الشركات الكبيرة او what they call enterprise

انتهي عهد ( ال اي فون للعب و البلاك بري للشغل)البلاك بري في طريقه للقبر اذا ما حصلت للشركة RIM معجزة خلال ال 18 شهر الجايين. ليه 18 شهر؟ الكاش العندهم بيكفي الشركة للمدة دي
بعدها ممكن يعلنوا افلاسهم.

بالمناسبة، ماكيروسفت دخلت المنافسة و بقوة. رغم ان تلفونهم لسه نص نص، لكن دي طريقتهم، بيخشوا السوق بحاجه معقولة و بعد كده بيشتغلوا فيها لحدي ما تمسك السوق تمااااام. و المثال ال Xbox

سمارت انا تعليقي لي لنا قلت فيه ( و في البال الباقات المطروحة من اتصالات و سهولة الطباعة بكيباد ) حسب الباقات المتوفرة هنا البلاك بيري ارخص لزول ما عايزو غير للشغل
بعدين الآي فون بعولق اي ايميل من الآوت لووك ووبهدل الأتاشمنتس بهدلة السنين

كلام مريوم صح. RIM عينا طلعت بسبب ابل و قوقل و الان مايكروسفت.

سلامات راشد. ود الصائم الخبير الأجنبي ما قصر معاك كلو كلو.

عاطف عمر، كيفك؟
انت بس جرب واحد و ما ح تقدر تسيبهم تاني.
ح يبقي من الأساسيات ذي الأكل موش الكماليات ذي العربية.
انا مثلا زولة ( ما عارفه ذاتو كلمة مناسبة) لكن بروح كتير. اقرب مثال قبل اسبوع مشيت لصحبتي جابت بيبي في المستشفي.
المستشفي دي بكون مشيت ليها ذي 20 مرة كده. و بعد ده رحتا. لقيت روحي في نص حلة كده مخيفة. و الدنيا ليل حوالي 9 مسا و كان يوم عيد الاستقلال الامريكي. و الناس بتشرب كتير اليوم داك
المهم حقيقي خفتا. و بدون ما أوقف العربية طلعت الطريق للبيت. و من غير ما أعاين للشاشة بدا صوت من التلفون يوريني الطريق خطوة خطوة لحدي ما طلعتا من الحلة ديك و بعدها وقفته.

ود الصائم شكرًا يا اخي. بقيت خطر و الله
عن التلفون، استني 5. الفرق بين 4 و 4 اس كبير في الكاميرا و السرعة. و طبعا في اختنا سيري
لكن الفرق في 5 ح يكون في الشكل الخارجي برضو. ح ينزل غالبا في امريكا في شهر 10. بنهاية السنة بيكون في السعودية.
4 تلفون جميل جداً و ممكن تنتظر بيه سنة كاملة.
انا مثلا بديت ب 3GS بعدها فطيت 4 . جبتا 4S. ح افط 5 ( او علي حسب التسمية الجديدة). و غالبا ح أجيب اللي بعده( لو بقينا لسه مع ابل) ؛)



كلامك أكيد صح يا ود البشري لو بتتكلم عن التكاليف في بلدكم دي( انا ال ح يعرفني شنو؟)
عن الايميل لو ح تفتحه في المتصفح أكيد ح يتبشتن. لكن لو فتحته من الايميل بتاع الاكسجينج بيتفتح تمام تمام و ما فيه اي مشاكل.
طبعا ده بيعتمد علي ان الجهة اللي انت شغال فيها تسمح ليك بانك تفتح الايميل في الاكسجينج في تلفونك

تشكرات يااسمارت
قلنا نرفع البوست قبل الإفطار يمكن يجو ناس يختو ليهم كلمة كلمتين

سمارت يا سمارت
رمضان كريم
وتشكرات كثيرات على النصيحة التي أحسها مخلصة وصادقة

Quote: عاطف عمر، كيفك؟ انت بس جرب واحد و ما ح تقدر تسيبهم تاني. ح يبقي من الأساسيات ذي الأكل موش الكماليات ذي العربية. انا مثلا زولة ( ما عارفه ذاتو كلمة مناسبة) لكن بروح كتير. اقرب مثال قبل اسبوع مشيت لصحبتي جابت بيبي في المستشفي. المستشفي دي بكون مشيت ليها ذي 20 مرة كده. و بعد ده رحتا. لقيت روحي في نص حلة كده مخيفة. و الدنيا ليل حوالي 9 مسا و كان يوم عيد الاستقلال الامريكي. و الناس بتشرب كتير اليوم داك المهم حقيقي خفتا. و بدون ما أوقف العربية طلعت الطريق للبيت. و من غير ما أعاين للشاشة بدا صوت من التلفون يوريني الطريق خطوة خطوة لحدي ما طلعتا من الحلة ديك و بعدها وقفته.

أصدقك القول
حقيقة لا أدري هل هو الركون لما ألفنا وتعودنا ؟؟
أم هل هو الوقت الممحوق حيث كل نصيبنا ( الترفيهي ) من الـ 24 ساعة هو مالا يزيد عن 1 ساعة نحتار أين نضعها ؟؟
لذلك
أضحى حظنا من التكنولوجيا هو أن نوفرها ونشتريها للأنجال ..

داعبتني كريمتي الصغرى ذات يوم بأنني رجل ( تراثي ) ، أشيائي كلها ( قديمة ) وأنها سوف تقود حملة مع شقيقاتها وشقيقها لتغيير كل ( حاجاتي القديمة )
أجبتها لامانع لدى من تغيير كل ( حاجاتي القديمة ) بشرط أن تبدأوا بـ ( أقدم حاجة عندي ) وهى زوجتي ... أمهم

أنقري تاني جابو سيرة للموضوع ؟؟؟


________________

ومع ذلك
سوف أجرب
حالما أستلمه ( هدية ) من أحد صديقاتي المهندسات

يا صديقات بشمهندس عاطف المهندسات ....عووووك ^_^
اها يا بشمهندس...كوركتا لصديقاتك المهندسات.

كلامك صح...انا لو ما كنت انشبكت فى التلفونات دى بدري ما اظن كان يكون عندى ليها زمن.
اما ام الاولاد فانا اضمن للاولاد انك لو حنسوك حنيس ما ح ترضى بالتغيير.

يا بشمهندس...رسل العنوان ...نرسل التلفون طوالى...لكن
ذي ما قلتا لاساسي زمان : يا ناس الخليج...ممكن ارسل ليكم...لكن بجى بعد شوية اقول عاوزه سرامس شاى و قهوة و صوانى و عبايات و قايمة طووووويلة>و بيقوم الموضوع ما يعجبكم

يا ودالبشرى سلامات


إنشاء الله تكون أستلمت

شفت يا ودالبشرى طبعا كل الجماعة البلاكبرياب والاي فوناب اتجلكسو وبقو اندروبياب

هسع الصين دخلت بالتقيل الصنين كان عندهم مشكلة أسمها نظام التشغيل ناس قوقل حلوها ليهم بالاندرويد كدي امشي سوق التنين شوف الناس ديل سوو شنو مبالغة

ناس قوقل همهم الارباح من الاعلانات عاوزين اي زول يخش النت وانظمة التشغيل ياها الماك والويندوز ناس أبل خطو للمستقبل بسرعة في الايباد وارتادو الاجهزة اللوحية في حين اخفقت مايكروسوفت حتى الان نظام تشغيلهم اللوحي ما جاهز ناس الابل حراميه استغلوا ريادتهم ورافعين اسعار الاي باد وانظمة تشغليهم لي اجهزتهم بس وما أي زول بقدر يشتري الايباد وناس القوقل عاوزين الناس تخش النت طوالي قامو طوروا اليونكس للأندرويد وفكوه مجانا اتلقفوه ناس السامسونج بذكاء وتبعتهم بقية الشركات منها سوني وغيرها هسع الموضوع وقع في يد الصنين الأجمل والأحلى أنه شركات البرامج والمطورين أبدعوا في البرامج للأندرويد وشوف براك مئات الاف من البرامج المذهلة في قوقل بلاي واغلبها مجاناً لانها دعاية للشركات دي
https://play.google.com/store
جربت البلاك بيري خمسة يوم وفكيته طوالي عمل لي دوشه مبالغة وحجمه الكبير زاتو زهجني فكرت في الموضوع ودخلت طوالي من الاخر بي ارخص الاسعار التلفون ياهو ارخص نوكيا يرد ويستقبل ومع التابلت بقيت مرتاح مظبطه مع كل الوايرليس في الاماكن البتردد عليها وبجيب لي ميلي في اي لحظة افتحه ومافي اي مشاكل غير دا مستفيد من البرامج وكمان بعمل ابد ديت براه ومجانا لنظام التشغيل والبرامج



جهازي كان ايس كريم ساندويش هسع بقى النظام الجديد براه
Android 4.1, Jelly Bean

ياخ احب الاندرويد

لنا،،،،،،،،وينك يا زولة؟
تكوني هسي بتلعبي في ال اى فون بتاعك، صح؟؟؟
؛)

Quote: يا صديقات بشمهندس عاطف المهندسات ....عووووك ^_^

_
تحياتي يا راشــد
لو مشيت أي محل اتصالات الموضوع ما بياخد رُبع ساعة!
بس ما تخليهو ينزل ليكـ أي برامج من الأبل ستور لأنها
ح تكون باليوزر بتاعو وبعدين ما ح تقدر تعمل ليها أبديت!!
تولع ليكـ في الشاشة زي الإشارة الحمرا أو إشارة الحزام في الطبلون


بالنسبة للسوفت وير أدخل في السيسم ح تلاقي أبقريت جاهزة!!
دوس وتوكـل على الله .. وخلي بالكـ طويل

ياجماعة اصالة عن نفسي ونيابة عن شقيقتي لنا ابلغكم انسحابها من البوست
وصراحة هي قالت مافاهمة اى شي في كلام الاخوان والاخوات الفوق لذلك خجلانة تخش
عشان ماتقعد زي الاطرش في الزفة ..
وقالت لي قول لود الصايم البوست ده حقك وحق ناس بيتكم خد راحتك واتجدع ..

التقول إنت فاهم حاجة ياااا أب تلاتين عشرة!!
بوستكـ تخلي بوست الناس تشيل!!

البوست دا جاب لي مغس عديل كدا

ياخ ما ممكن تذكروني الآي فون .!
جبتو بعد تعب ما تم شهر اتسرق في الجامع
وفي وسط الخرطوم ... خلاني أحرد
التلفونات ذاتو .. لكن صراحة الآي فون
حاجة تتحب ..

يا اسمارتي عندنا عدة وعبايات تبدلي؟

يا فايز ودالقاضي

شفت قررت واتوكلت أني اعمل مشروع محو الامية التكنولوجيه في جده وعندي مشروع رائد مستهدفكم بيه إن شاء الله خلال هذا الشهر ولا نرجوا سوى الثواب من الله

Quote: يا فايز ودالقاضي شفت قررت واتوكلت أني اعمل مشروع محو الامية التكنولوجيه في جده وعندي مشروع رائد مستهدفكم بيه إن شاء الله خلال هذا الشهر ولا نرجوا سوى الثواب من الله

اى عليك الله ..انا اكبر امي وابي وخالتي في جدة
رسل لي اى جهاز متطور ومعاه كتلوج بالرطانية اوشرح بالصور ..
الكتلوج اهم من الجهاز الله يرضى عليك ..


نشوفك صادق ولا زي ماقال عنك ولدنا ايمن الطيب لمن اتصل على تلفونيا ..

تلات أرباع الكلام الإتسح حبره هنا ما فاهماه...مافي ترجمة على الشريط يا عالم؟)::::::::):):

إنا لله!!
لنا .. Apple نزّلت Iphone 5 في الأسواق ياخ!!