الموقِع الرّسمي لنائب الرّئيس د. الحاج آدم للتّواصُل مع الجُّمْهور

إضغط لدُخول موقِع نائب الرّئيس د. الحاج آم يُوسُف

Quote: سوداني نت: في خُطوة تُعد الأُولى من نوعها لمسئول سُوداني رفيع، أطلق الدّكتور/ الحاج آدم يُوسُف نائب رئيس الجُمْهوريّة، موقعه الإلكتروني الخاص، كنافِذة يُطل من خلالها على الجُّمهور ويتواصل معه بشكل مُباشِر. وقد جاء في تقدِمة موقع السيِّد النّائب ما يلي: بسم الله الرحمن الرحيم والصلاة والسلام على رسول الله الأمين ، وعلى آله وصحبه أجمعين ، ومن سار على سنته إلى يوم الدين ، أما بعد .. الإخوة والأخوات : السلام عليكم ورحمة الله وبركاته ، فإنني وبعد تكليفي نائباً لرئيس جمهورية السودان وامتثالاً لقول الله سبحانه وتعالى : ( وَالْعَصْرِ (1) إِنَّ الْإِنْسَانَ لَفِي خُسْرٍ (2) إِلَّا الَّذِينَ آمَنُوا وَعَمِلُوا الصَّالِحَاتِ وَتَوَاصَوْا بِالْحَقِّ وَتَوَاصَوْا بِالصَّبْرِ (3)) وبقول رسول الله صلى الله عليه وسلم :" الدين النصيحة" قلنا : لمن يا رسول الله ؟ قال:" لله ، ولكتابه ، ولرسوله ، ولأئمة المسلمين ، وعامتهم " . أفتح هذه النافذة للتواصل مع الأخوة والأخوات والأصدقاء والمعارف من السودان وخارجه والتي قد تحول الظروف المكانية والزمانية عن التواصل الذي نُريد ، وأتمنى أن يكون تواصلنا هذا براً وتقوي ونصحاً وإعانة وسأبذل غاية الجهد لإحترام الحق وغاية العمل للغير بإذن الله . والسلام عليكم ورحمة الله وبركاته هذا ويحتوي الموقع على عُدّة أبواب كالسّيرة الذّاتيّة للدكتور الحاج آدم إضافة للتغطية الإعلامية لأنشطته اليوميّة ومُقابلاته وتصريحاته و خطاباته بالإضافة لمُدوّنته الشخصيّة. وبالموقع صندوق للتّراسُل ما بين النّائب والجُّمهور بالإضافة إلى نافة للشّكاوى و المُقترحات.

ازيك يا علاء
رمضان كريم
دا مصلحجي وبس ما عندو موضوع
عايزين تواصل مع المعلم الكبير
في حاجات كتيرة عايزين نوصلها ليهو
الزول دا نيته كويسة لكن اشتر وفاهم غلط
والله فاهم حاجات كتيرة في البلد دي غلط
ماتستغرب بن علي فهم بعد 23 سنة

هلا يا معاذ ورمضان كريم عليك
تصوم و تفطر على خير

يااخي خطوة موفقة وكبيرة عسى
ان تسمعوا اصواتنا ما دام اصم الله آذانكم عن الشارع
برجاء عمل صفحة للسيد بشة
وآخر للسيد علي عثمان محمد طه .










.................................................حجر.

شكرا ياباشمهندس

مرحب أستاذ عمر
تصوم و تفطر على خير

تحياتي يا عــلاء ورمضان كريم ..

فقط ملاحظة :

عند زيارتي لصفحة (إتصل بالنائب) من خلال البريد الإلكتروني .. يظهر أدناه:

يسري اخواني واخواتي زوار الموقع للتواصل معكم عبر موقعي الالكتروني وسوف ارد علي الشكاوي والاستفسارات في اقرب فرصة ممكنه عبر البريد الاكتروني ، نهيب بأهميةالجدية في الطرح لتكون الفائدة إيجابية بإذن الله تعالى

يجب أن تعالج الأخطاء (ده نائب رئيس يا فرده

فلازم كله يكون تمام ..

تضاف النون الى يسري حتى تصبح (يسرني)

إلغاء لام من(للتواصل) وإضافة ألف فتصبح التواصل ..

سلامات يا دكتور أحمد
رمضان كريم عليك
وأتمنى أن ينتبهوا لهذه الأخطاء
لك الشكُر

علاء رمضان كريم



خطوة موفقة......


بس يا ريت يفتح مكتبو للجمهور.....وقبالو يفتح تلفوناتو.....والناس الفي النص ديل يزحو بعيد .....

مرحبتين دُكتور عادل سي جي مان
رمضان كريم يا حبيب
مُشوار الألأف ميل يبدأ بخُطوة
وهي خُطوة في الإتِّجاه الصّحيح

سي جي
مافي زول في النص
الزول دة قاعد امفكو سااااااااااااااااااااي
يعني زي صورة بشة
لايهش ولا نيش

حجر شُكراً للمرور

رمضان كريم يا علاء
زول ك الحاج ادم دا ذا تو مختاج لى ايميل البشير وعلى عصمان وتلفوناتهم عشان يتواصل معاهم
جنى

علاء
رمضان كريم
غايتو عندكم حاجات تسعد القلب المعنى وتضحك الثكالى
الدكتور الحاج أدم دا مش القال عن المتظاهرين انهم اجانب؟
وصراحة كدا يا علاء وما انا براي ناس كتار عندهم احساس انه الرجل منصبه شرفي يعني مشكلة واحدة مابقدر يحلها من دون الرجوع للنائب الاول والرئيس تحياتي
كسرة
والله ما محتاجين لتواصل عبر صفحات رسمية‏'‏ شيلك مليون وطق السوق دا بتعرف الشعب دا مشكلتو شنو

سلاام يا علاء
رمضان كريم

Quote: ازيك يا علاء رمضان كريم دا مصلحجي وبس ما عندو موضوع عايزين تواصل مع المعلم الكبير في حاجات كتيرة عايزين نوصلها ليهو الزول دا نيته كويسة لكن اشتر وفاهم غلط والله فاهم حاجات كتيرة في البلد دي غلط ماتستغرب بن علي فهم بعد 23 سنة

الكلام دا مهم جدا
وايضا

Quote: علاء رمضان كريم غايتو عندكم حاجات تسعد القلب المعنى وتضحك الثكالى الدكتور الحاج أدم دا مش القال عن المتظاهرين انهم اجانب؟ وصراحة كدا يا علاء وما انا براي ناس كتار عندهم احساس انه الرجل منصبه شرفي يعني مشكلة واحدة مابقدر يحلها من دون الرجوع للنائب الاول والرئيس تحياتي كسرة والله ما محتاجين لتواصل عبر صفحات رسمية‏'‏ شيلك مليون وطق السوق دا بتعرف الشعب دا مشكلتو شنو

وايضا كذلك
الحاج ادم مجرد ( بو) ساكت


قاسم المهداوى

رمضان كريم يا علاء
الحاج ادم فعلا ليس له سلطة او نفوذ في الحكومة وهو رسالة سالبة جدا لاهل دارفور وتذكير يومي لهم بمقدار سلطتهم في حكومة السودان
زملاءه في المحاولة الانقلابية المزعومة بتاعة الشعبي ليوم الليلة في سجن كوبر وهو بمنصب نائب رئيس الجمهورية ما قدر يعمل ليهم غير انو في عيد الضحية الفات رسل لاهلهم خرفان رجعوها ليهو مع المرسال وقالو ليهو عايزين اولادنا ما عايزين خرفان
فدحين الزول ده راكوبة في الخريف يعني احتمال لو صدق لمواطن بشوال سكر ناس عبدالرحمن الخدر يقولو ليهو بل تصديقك واشرب مويتو او امشي للحاج يديك ليهو

التلميع في شنو؟
اوعك يكون ده البديل

يا علاء ياخ الجمهور دا يتواصل كيف مع العيشه الصعبه دي ....

خليهو هو يتواصل معانا في مواقعنا وصفحاتنا ،، يمكن نلقى ليهو وقت نرد عليهو انشاء الله ....

إتز تو ليييت ....... ( إنجليزي يا مُرسي ) ...

سؤال : هو الدكتوراه جقتو دي في شنو كانت ؟؟؟؟؟ شكلها كدا في الإستنجاء ، لأنو فتّح يادوب على الصفحات ...

دا الضحك علي الدقون ليس الا..
يعني حضرة النائب دا مشكلة واحدة لي اهلو ما حلاها. واهلوا ذاتهم شايفنو بتاجر بي قضيتهم الي هي واحدة من اهم مشاكل السودان كوطن.
فماذا يُرتجي من مثل هذه الدُمية.

أها محتاجين لبروكسي للتواصل معه ولا لع؟

الخطوة دي مضرة ليهو ولمستقبلو..
والقطط السمان ممكن تخربشو عشانا!

أتمنى إنه ما ينسى إنه مجرد ديكور..
وبعبارة أخرى.. هو نايب تاني!

لو شاطر، يلعبها صاح...




ورمضان كريم يا علاء!

الاخوة السلام عليكم ورحمة الله وبركاته
رمضان كريم تصوموا وتفطروا علي خير انشاء الله
في الحقيقة ما قام به سعادة الشيخ / الحاج ادم نائب الرئيس الجمهورية خطوة لم يسبقه احد من السياسيين
السودانيين من قبل وهذا يحمد له و نشكره عليه و نامل من الله العلي القدير ان يوفقه لخدمه اهله جميعاً
علي امتداد السودان وخارجه ونقول للذين يستنكرون الخطوة ( اذا كان ليس لك حاجة هنالك الالاف
لديهم حاجات لا تحرم هولاء )
مرة اخري نشكر نائب الرئيس للتواصل الراعي والرعية و سدد الله خطاك وربنا يجعله في ميزان حسناتك
في هذا الشهر الكريم

حاجة زي دي ياريت يعملها البشير على تويتر