على عثمان محمد طه: فك آخرو !!

Quote: دعا الأستاذ علي عثمان محمد طه النائب الأول لرئيس الجمهورية المواطنين بالتمسك بالصبر حتى يتحقق النصر والسلام، وقال إن الأرزاق لا ينقصها ولا يزيدها انخفاض الدولار لأنها مكتوبة من عند الله الذي لا تنفد خزائنه

بالله !!

انتو يا "شيخ" على ..
الانقاذ دى ما وعدت الناس بى الدنيا القاعدين فوقها دى ؟!
مش قلتو لينا كلام كتير عن النفرة الزراعية ؟!
أها المعنى كان يعنى نفرة زراعية فى الآخرة ولا شنو ؟!

الدولار ده !!
الدولار الوااااحد ده !!
مش قلتو انو الانقاذ جات عشان ما يحصل عشرين جنيه ؟!

فلنقل كما قلت الآن ..
طيب !
الكلام داك كان مقياس خاطىء للارزاق ..
FALSE INDICATOR ولا كيف ؟!
يا كده يا كمان مسألة انو الارزاق من الله دى مسألة جديدة لنج !!

ونعم بالله
رزق السودانيين على الله ورزق البشير وعلي عصمان على السودانيين
جنى

ونعم بالله يا جنى ..
أها ..
مسألة فلنأكل مما نزرع ديك كنتو قاصدين بيها الزراعة وين بالتحديد ؟؟
فى أرض السودان ولا المجاز الغيبى ؟!..
وين الكلام بتاع من لا يملك قوته لا يملك قراره ..
طيب ..
ما دام القوت من الله .. ولا نملك من أمره شيئا .. ونؤمن بذلك ونصدق
فكيف من لا يملك قوته لا يملك قراره ؟!!

كويس !!
مادام الارزاق من الله .. ونؤمن بذلك ونصدق
ففيم تكالبكم على الدولارات والشركات والعقارات والبيوت والعربات والفارهات مثنى وثلاث ورباع ؟!
أما كان من باب أولى أن تقدموا للشعب السودانى نموذجا صحيحا لهذه التقوى, هذا الورع ؟!
طيب كان ما تقدموا لينا نموذجا صحيحا ولا حاجه ولكن .. بالحلال

طيب !!

ما دام الارزاق بيد الله .. فالسلطه كذلك بيد الله
فلماذا فصلتم الناس من أعمالهم اذن ؟!!..
لماذا منعتم عنهم ما أحله الله من رزق حلال ؟!..
لماذا اعتقلتم الناس وقتلتم الناس وشردتم الناس وعذبتموهم فى بيوت الاشباح والمعتقلات ومعسكرات النزوح ؟!
اليس الأمر بيد ىالله ؟!
اما كان الاولى ان تتوكلوا عليه ؟!
ففيم الظلم الانسانى هذا العظيم ؟!

كاروري جاك بالنجيضة يا مشرف

نجى لى كلام الآخرة يا عزيزى محمد ابراهيم ..
هل يعلم على عثمان عدد ارواح الشعب السودانى والتى قد يكون مسؤولا عنها مسؤولية مباشرة ؟!
عدد الاطفال الذين ماتوا من الجوع والمرض خلال فترة حكمه للسودان ؟..
عدد النساء اللائي فقدن أطفالهن وازواجهن فى حروبات دولته؟ ..
عدد الرجال الذين بكوا الرجال القتلى فى الشساع السودانى الكبير ؟!
عدد الذين تعذبوا فى المعتقلات ؟؟
عدد الذين هم الآن فى معسكرات النزوح ؟!
عدد الذين هم الآن فى معتقلاته ؟!
عدد الدعوات الصادقات عليه وكل من يشاركه جريمة الوطن الكبيره ؟!

Quote: ما دام القوت من الله .. ولا نملك من أمره شيئا .. ونؤمن بذلك ونصدق فكيف من لا يملك قوته لا يملك قراره ؟!!

----------------

سلام يا دكتور و رمضان كريم

يا مشرف
مساء الخير

Quote: دعا الأستاذ علي عثمان محمد طه النائب الأول لرئيس الجمهورية المواطنين بالتمسك بالصبر حتى يتحقق النصر والسلام، وقال إن الأرزاق لا ينقصها ولا يزيدها انخفاض الدولار لأنها مكتوبة من عند الله الذي لا تنفد خزائنه

عشان تعرف الناس ديل تايه ليهم القبلة، القبلة الواحدي دي..
يا خي لمن الارزاق علي الله، نان في شنو مسوين ليهم (مجلس تخطيط استراتيجي) و (نهضة ز راعية)ومن اساسو جايين ينقذونا ليه، ما يخلونا لي ربنا ورزقو، ادانا ما ادانا، ما شغلوم.
غايتو انا باقي لي، الزول ده غلبو البيسوية، والنهضة الزراعية راحت ليه، عشان كدي قال ليك اديهم من الأخر..
يعني بالبلدي كدي،، موضوع النهضة ، والبرنامج الاسعافي الثلاثي، والخطة من واحد لحدي عشرين.. انسوها يا جماعة..

كسرة:
واحدة في نشرة الساعة التاسعة في قناة الشروق سألوها عن الغلا الحاصل قالت ليهم (غايتو رمضان النسة دي الا نشرب ليهو موية ساكت)
مع مؤونة خطة عشرينية من المودة (الحقوق محفوظة لسد الاسم)

جمال المننصورى ..
تحية طيبة ..

أن تخدع شعبا ..
أن تخادع الله ..

هذا بالتحديد ما قفز لذهنى وأنا أقرأ كلماتك عنهم ..

أن تخدع شعبا ..
و ..
أن تخادع الله !!

Quote: واحدة في نشرة الساعة التاسعة في قناة الشروق سألوها عن الغلا الحاصل قالت ليهم (غايتو رمضان النسة دي الا نشرب ليهو موية ساكت)

دة طبعاً إذا الموية ما قطعت !!!

يا دكتور سلامات

بأمانة مجرد نقاش هؤلاء صار مقرف , والتناقض اضحى متلازمة الكيزان
المضحك المبكي ان علي كضبان دا في تفاصيل راتبه ذكر بدل المعيشة ولم
يعتمدها من الله بل من الدولة ومن اموال الشعب وقال 3500 بدل معيشة
شوف حد الكذب والنفاق واللعب على البسطاء هؤلاء لصوص ليس إلا
وبإسم الدين .







..................................................................................................حجر.

يا رفاعى ..

لا نناقشهم, بل نطرح ما يدعون من الإفك العظيم للنقاش يا عزيزي ..
ولقد شهدت تمثيلية الراتب ..
هؤلاء استهانوا بالشعب السودانى لدرجة مهينه ..
وفى هذا نهايتهم ..

دمت بخير ..

رمضان كريم يا عزيزي عوض ..
والله أكرم من هذا العبث الممارس باسمه فى تلك البلاد الظالم حكامها..
ثم !! الا يعلمون معنى الله أكبر ..
اللايعلمون كونه أكبر من أن ينسب اليه هذا الظلم الانسانى الماحق ..
يااا سبحانه المنتقم الجبار ..

Quote: دعا الأستاذ علي عثمان محمد طه النائب الأول لرئيس الجمهورية المواطنين بالتمسك بالصبر حتى يتحقق النصر والسلام، وقال إن الأرزاق لا ينقصها ولا يزيدها انخفاض الدولار لأنها مكتوبة من عند الله الذي لا تنفد خزائنه

الله غالب ... ده كلام شنو يا شيخ علي ؟
في ضمتك يا شبخ عليا كان الناس كانت عارفه ليها سكة صبرا يبل الابري مو صبرا فات صبر ايوب علي البلا ... دحين ما كان اتحزمو واتجزمو ... ؟
وهو منو القال مشكلة الناس انخفاض واللا زيادة الدولار ...؟
المشكلة يا شيخ علي انو الناس الغلابا الربيع قال ليهم دخل الواحد فيكم 1800 دولار الغالبيه منهم ماشافو الدولار بي عينهم شكلو كيفن ؟ والعارفين بتلفتو كايسين دولار الجن ده ...الاختفي بي صمة خشمو ... راح وين .. العليم الله
وما فينا زولا مشكك في خزائن الحق عز وجل ولا في قسمة الارزاق واللا في رفعه لمن يشاء ووضعه لمن يشاء
لكن المحيرنا ....انو مادام ناس الانقاذ عارفين الحكاية كلها من عندالله سبحانه وتعالي ...
مالهم خايفين من شوية شذاذ افاق ... وشراذم
ومالكم طالقين علي الناس الغلبهم الصبر ناسا لا بخافو الله ولا بعرفو شرعو بلملمو في اولاد الناس وبناتهم وواقعين فيهم سجون وبمبان واعتقالات وجلد في شان شنو يا شبخ علي ؟

ما تصحي معانا شوية يا شيخ علي
وتقعد ناس حمبره وغناما ديل يشوفو الكوك الغلب المداوي .... حدو وين

وباكر فيها المناكر

نان يا ود المشرف الشهيد مجدي داك كتلوهو في شنو ؟

غايتو عندنا مثل بقول اللئيم بغلبك بي الله !!

علا والله يا ود المشرف الله منّا ما سمعنا ومن خيره ما قنعنا !!

بحيراوي

حالتو دا قالوا الفيهم!!
.
.
من العايدين يا دكتور.

سلام يا المشرف

تابعت ما كتبت وتذكرت حدث طريف اسمح لي بكتابته

عندماقامت السلطة الانقلابية بتزوير انتخابات جامعة الخرطوم 1994 وكان تزويرا فاضحا تدخل احد الكيزان في ركن نقاش يفضح عملية التزوير وذكر انه لا يوجد تزوير وان البطاقات الزائدة نصر رباني للطلاب الاسلاميين وانه لا يستبعد ان تكون الملائكة قد صوتت لتنصرهم .. كان رد صاحب الركن منطقيا وجميلا حيث قال ( الملائكة ليس لها الحق لتصوت لأنها ليست ضمن الجمعية العمومية لطلاب جامعة الخرطوموحديثك دا يثبت عدم قانونية الانتخابات ) ...

العزيز محمد الملك ..
رمضان كريم وثورة مباركه ..

تعرف !
للساسة صلف عجيب فى الضد من العسكر ..
وبحيث يكون العسكر ودوما هموا الجهلاء فى ذاكرة الساسة والناس ..
ولم يحدث قط أن خيب العسكر ظن الساسة فى هذا الامر ..
بيد ان للامر منطوق آخر ..
أن للساسة رسوخهم المعرفى ..
الامر الذى خيب فيه الساسة فى السودان ظن الناس جميعا ..
وبالقياس .. يعتلى على عثمان هذا الهرم السياسي
فى الواقع ..
كلامو ده !!
شاويش انقلابى ما يقولو !!

العزيز بحيراوى ..
كيفك وكيف كيفك ؟!!

Quote: اللئيم بغلبك بي الله !!

إسترعى انتباهى فى هذه الحكمة البليغة أمر أدهشنى جدا ..
أن لمثل هؤلاء وجود فى المجتمعات السودانية وحتى ترصدتهم الذاكرة الشعبية بإحدى أمثالها العبقرية ..

مدهش جدا أن يكون لهذا النهج المذموم آباء تاريخيين ..
وكنت أظنهم نبتا شيطانيا بارض السودان !!

الاخ الكريم محمد مصطفى مجذوب
تحية طيبه

Quote: الله غالب ... ده كلام شنو يا شيخ علي ؟

يعلم على عثمان فداحة ما يقول ..
ويعلم تماما حجم المتاجرة باسم الله وبهذه الاقوال ..
ويعلم تماما الثمن القليل الذى قد يقبضه جراءها ..
ولا أخال أن هناك ما يغيب عنه ولكن ..
وكما قلت يا عزيزي ..
الله غالب ..
وهذا الشعب غالب جلاديه فى نهاية المطاف ..

اذا كانت الارزاق من الله
طيب ما تخلوا الناس في حالم يشوفوا ارزاق الله
مع حكومة تانية
و لا ارزاق الله مرتبطة بوجود علي عثمان في الحكم

هل اعطي الله "المتعافي" كل هذه الثروة اما اعتطها له المناصب التي شغلها و نهب منها
هل اعطي الله اخوان و ابناء عمومة البشير من سكان كافوري ( حوش بانقا) او اعطاه اياها فساد الدولة
و الله لو ربنا بيدي بالاسلوب دي تكون حكمة بالغة
يعني الجماعة ديل لو قعدوا في بيوتم كان ح يغنوا كدا
انتو علي عثمان قايل الشعب السوداني كلوا كيزان و لا ايه
و لا قرود في جنينة الحيوان التي يحرس بابها والده عليه رحمة الله