رؤية عن حكامنا...أبحث لها عن تفسير ؟

رأيت فى النوم عقب صلاة الفجر الرئيس البشير نائماً على بطنه بميلان على جانبه الايسر وكان مستدبراً للقبله وذراعه الايسر تحت رأسه وهو يرتدى بدلة سفارى بكم قصير بيجية اللون وكأن المكان حديقة القصر الجمهورى وكانت أرضها خضراء (نجيله) وكأن هناك قوة حراسه بسيطة العدد لم أتبين ملامحها فى الظلام وكأنها تهمهم بصوت خافت على موقع البوابه الجنوبيه للقصر من الداخل واستيقظ الرجل من النوم وكان مرهقاً ونظر الينا أنا وزوجتى وقال لنا (أها ودعتكم لله ) وعاد مرة أخرى لنومه

اليس بينكم يا قراء هذا المنبر من يملك كتاب تفسير الاحلام لابن سيرين او غيره من كتب تفسير الاحلام؟؟؟

يا دكتور تحياتي

يا أخي رؤيتك دي مفسرة جاهزة...
الزول قال ليكم ودعناكم الله..
تاني شنو؟؟

Quote: رأيت فى النوم عقب صلاة الفجر الرئيس البشير نائماً على بطنه بميلان على جانبه الايسر وكان مستدبراً للقبله وذراعه الايسر تحت رأسه وهو يرتدى بدلة سفارى بكم قصير بيجية اللون وكأن المكان حديقة القصر الجمهورى وكانت أرضها خضراء (نجيله) وكأن هناك قوة حراسه بسيطة العدد لم أتبين ملامحها فى الظلام وكأنها تهمهم بصوت خافت على موقع البوابه الجنوبيه للقصر من الداخل واستيقظ الرجل من النوم وكان مرهقاً ونظر الينا أنا وزوجتى وقال لنا (أها ودعتكم لله ) وعاد مرة أخرى لنومه

اللهم أجعله خير

لا أدعي تفسير الأحلام لكن أحببت المشاركة بملاحظة، وهي أن الأوضاع التي رأيتها في نوم البشير كلها تخالف النوم في السنة النبوية.

حيث من المعروف أنه يجوز للمسلم أن ينام على ظهره أو جنبه ولكن لا ينام على بطنه، ويستحب للمسلم أن ينام على جنبه الأيمن متوسداً يده اليمنى ومتوجهاً إلى القبلة إن تيسر ذلك.

فربما في ذلك إشارة واضحة لمخالفة السنة النبوية الشريفة.

والله أعلم.

بعيدا عن السياسة

رأيت السلطان في المنام يعنى قضاء أمر هام لك ,
اذا عندك شغلة متعلقة بالحكومة او الدوائر الحكومية
فهذه اشارة بان المهمه ستنجز ,, والله العالم ,,

(ما شرط يكون الامر متعلق بحكومة السودان) والله العالم ,

اخونا سوركتي
ان شاء الله تكون بخير..
الحقيقة رؤيتك دي عجيبة شديد، فيها صور متداخلة بصورة كبيرة، وتحتاج لأكثر من تأويل، بعض التأويل يقول:

Quote: عقب صلاة الفجر

معروف ان الفجر هو الفاصلة الزمنية بين الليل (المظلم) والشمس المشرقة.. الظلم من الظلام، وشروق الشمس يعني النور وفي النور تتضح الاشياء والاحياء، والشمس المشرقة تعني الحرية... والفجر هو لحظة الامساك (حيث يتبين الخيط الابيض من الحيط الاسود) يعني تتمايز الصفوف، ويختفي اللون الرمادي، بصورة اخري (الصورة بقت واضحة جدا للشعب) يعني نحن علي اعتاب الحرية، اجتزنا الظلام الدامس متوجهين تجاه الحرية..

Quote: الرئيس البشير نائماً على بطنه

راقد علي بطنو يعني (مقلوب) من الانقلاب، يعني صاحبك ده في الباي باي.. مقلوب.. مقلوب.

Quote: بميلان على جانبه الايسر

طبعا البشير عندو جنبين (الوطني( يمين) و الشعبي (يسار) بيملان علي اليسار بحكم تخالفاتو يبدو كأنو يسار..

Quote: وكان مستدبراً للقبله وذراعه الايسر تحت رأسه

دي اجيب ليك فيها فتوي جاهزة من بعض العلماء

Quote: (ويَحْرُمُ استِقْبَالُ القِبْلَةِ واستِدْبَارُهَا) حَالَ قَضَاءِ الحَاجَةِ (في غَيْرِ بُنْيَانٍ) لخَبَرِ أَبِي أَيُّوبَ مَرْفُوعاً : ((إِذَا أَتَيْتُمُ الغَائِطَ فَلاَ تَسْتَقْبِلُوا القِبْلَةَ ولا تَسْتَدْبِرُوهَا، ولَكِنْ شَرِّقُوا أَوْ غَرِّبُوا)) مُتَّفَقٌ عليه، ويَكْفِي انحِرَافُه عَن جِهَةِ القِبْلَةِ وحَائِلٌ ولو كمُؤَخِّرَةِ رَحْلٍ، ولا يُعْتَبَرُ القُرْبُ مِن الحَائِلِ، ويُكْرَهُ استِقْبَالُهَا حالَ الاستِنْجَاءِ

من الروض المربع للشيخ: منصور بن يونس البهوتي

Quote: يرتدى بدلة سفارى بكم قصير بيجية اللون

هني ناخد وقفة طويلة جدا، ونأول الموضوع لعدة وجوه:
اولا: بدلة = حلة و سفاري: رحلة نهارية او ليلية للمناطق الصحراوية او الغابات.، وهي غالبا ما تكون مليئة بالمغامرات.
اللون البيجي= لون غير محدد الملامح..
كم قصير= يعني نص كم.
التأويل الأول يقول: انو الحركة الاسلامية جناح الترابي، حتقوم بحركة نص كم، وتقلب البشير،ويبدوا من ظاهر الانقلاب انو يساري، للتمويه باللون البيجي، وانو صاحبنا ح يسافر في رحلة مجهولة العواقب والمصير.

التأويل التاني:
بدلة نص كم: عضلات بارزة، يعني ثورة:
سفاري: لاعب دفاع المريخ..
لون بيجي: مصير غامض.

يعني صاحبك نمر من ورق. لأنو كل الناس لو عملت احصائية لأداء (سفاري) في المريخ خلال هذا العام.. حتصل لي نتيجة واحدة..انو علي اقل تقدير، كان ثغرة في الدفاع، اها بما انو ثغرة ، الجماعة المعاهو ح يقوموا بتغييرو.. وده واضح من نصفه الشمال..

Quote: وكأن المكان حديقة القصر الجمهورى وكانت أرضها خضراء (نجيله) وكأن هناك قوة حراسه بسيطة العدد لم أتبين ملامحها

الحتة الحلوة وخضراء دي، مافي مكان زي ده اللهم الا .. لا (هاي)
الجزو الباقي كلو بصب في خانة انو (لا مفر من الاستسلام)
مودتي

غايتو بدلة سفاري دي معناها الزول دة خلاص ح يتبدّل وسفاري هنا من المخارجة - في لغة العامة سفري -
وان شاء الله سفر الدخان بالطاقة
آمين

Quote: غايتو بدلة سفاري دي معناها الزول دة خلاص ح يتبدّل وسفاري هنا من المخارجة - في لغة العامة سفري - وان شاء الله سفر الدخان بالطاقة آمين

الحبيب / عبد الله

الأحوال كيف..
طبعا يا شيخي، القصر الجمهوري والجنينة المعاه في رؤيا اخونا سوركتي ، ديل معناتو : قصر العدالة في لا هاي،، مش برضوا الرؤساء زي- ميلسوفتش، تيلور نازلين هناك.. خصوصا ثلة العساكر الظاهرين في الصورة .. وحكاية راقد علي بطنو دي برضوا واضحة شديد، لأنو المعدة (البطن) بيت الداء، قال عنها النبي الاكرم، (ماملآ ابن ادم وعاءا شرا من بطنه..) او كما قال: والشر الفي البطن، يسمي اذي مش الواحد لمن يمشي بيت الادب (علي فكرة الادب دي احلي تعبير، لأنو الزنقة بتأدب صاحبها ادب المدائح) ويرتاح بيقول: (الحمد لله الذي اذهب عنا الأذي وعافانا).. عشان كدي البني ادم مننا لمن بطنو توجعوا بقولو عليه مبطون.. يعني مزنوق،، اها نختهن الاتنين مع بعض يبقوا:

Quote: سفر .. الي قصر العدالة بلا .. هاي

اها رئك شنو بتمشي مع بعضها ولا ..لا

غايتو يا شيخي سوركتي ده راجلا صالح تب..

تفسير حلمك ، والله أعلم.


أن الرجل غافل عن أحوال البلاد والعباد. وأنه لا يدرك ما يدور حوله.

ونومه في حديقة القصر الجنوبي إشارة واضحة إلى طول مكوثه في الحكم لسنوات قادمة

أما ودعتكم الله فهي تعني أنك وزوجتك المصون وباقي الشعب السوداني العظيم - بعد عمر طويل - سنفارق الدنيا ونترك البشير ما زال حاكماً ونائماً في القصر الجمهوري.


أما يا رعاك الله فورود البوابة الجنوبية في الحلم فيشير إلى انفصال أقاليم أخرى في الدولة.