طه: الأرزاق لاينقصها أو يزيدها ارتفاع وانخفاض الدولار

Quote: قال النائب الأول للرئيس السوداني، علي عثمان طه، إن الأرزاق لا ينقصها ولا يزيدها انخفاض وارتفاع الدولار لأنها مكتوبة عند الله الذي لا تنفد خزائنه، ووصف افتتاح مسجد كادقلي العتيق بأنه يمثل حسرة على الذين أحرقوه العام الماضي. ودعا طه المصلين بمسجد كادقلي العتيق، عقب افتتاحه يوم الجمعة، للتمسك بقيم الدين والعقيدة والثقة بالله حتى لا يدخل عليهم باب من الشرك ولا يجزعوا من ارتفاع الأسعار والإجراءات الاقتصادية.

المصدر : موقع الشروق على النت

كلام جميل جداً

عندي سؤالين للأخ على عثمان طه النائب الاول لرئيس الجمهورية حفظه الله ورعاه

لماذا قامت ثورة الانقاذ ؟ أليس لإنقاذ الشعب من الغلاء وصفوف الرغيف وصفوف البنزين وارتفاع الاسعار ؟

أين كانت هذه القيم _(الثقة بالله ، التمسك بتعاليم الدين ، الارزاق بيد الله ،..... الخ)_ قبل اندلاع ثورة الانقاذ؟

Quote: ودعا طه المصلين بمسجد كادقلي العتيق، عقب افتتاحه يوم الجمعة، للتمسك بقيم الدين والعقيدة والثقة بالله حتى لا يدخل عليهم باب من الشرك ولا يجزعوا من ارتفاع الأسعار والإجراءات الاقتصادية.

فعلا "التجي من السما تتلقاها الواطة"
طالما علي عثمان ذاتو بقى يلجأ للدين معناتو الإنقاذ دي كورتها فكت للدين

Quote: ولا يجزعوا من ارتفاع الأسعار والإجراءات الاقتصادية

والله يا أشرف في دي ما فهمت علي عثمان قاصد شنو: ارتفاع الأسعار دا يا اما الواحد عنده قروش وبكون قادر يشتري عيش أو كسرة عشان يكون على قيد الحياة....أو ما عنده!
طيب شنو الدخل التمسك بقيم الدين والعقيدة هنا؟
التمسك بقيم الدين والعقيدة أمر له علاقة بصلاح الفرد وصلاح أخلاقه وأعماله في الدنيا والآخرة، لكنه عندما يجوع وتكون معدته خاوية يكون في حاجة إلى (أكل)!
الإنقاذ أصلاً ما كان عندها كورة!

تحية...


يحاول ويستميت في المحاولة في نثر الاوهام والالتفاف حول الازمات الخانقة التي هي نتيجة طبيعية لنهجهم البائر وحكمهم الجائر..


انتهي زمان الكذب بعد ان انكشف الغطاء عن اوهامكم وفسادكم الذي ليس له نظير في تاريخ السودان...


ال الارزاق لا يزيدها او يينقصها ارتفاع او انخافض الدولار ال... ينقصها كذبكم الصريح وفسادكم الذي عم القري والحضر..(جاتكم داهية)

المظاهرات والاحتجاجات وكل الاختلافات السياسية والمعارك السياسية .......ليست بسبب الارزاق يا سيوبيه الانقاذ، انما هي حول طريقة تقسيم الثورة ........علي عثمان يحاول ان يمسك باصابع المحتجين والمتظاهرين ،ليمدها الي السماء ليقول اذا كان لكم حق ، فاسالوا من بالسماء واتركونا نحن نحكم ..........نحن لا علاقة لنا بافقاركم ولا علاقة لنا بثراكم ........وكان الضرائب والاتواءات ورفع تكاليف الانتاج ورفع الدعم وبيع مؤسسات الدولة وتوظيف منسوبي الحزب ، كلها لا علاقة لهم بها ؟
ياخوي دي مسؤلية الدولة ........وبيان رغم واحد قال لو نحن ماجينا كان الدولار اصبح ب20 جنيهاً ........اذن لماذا لا يقول ساعتذٍ ان ارتفاع الدولار لا علاقة له بالارزاق ؟؟؟؟؟؟؟؟؟
هذه محاولة فارغة لتوجيه الغضب الي السماء .......حيث لا اجابة .......ومحاولة لتنصل عن المسؤلية ........ارتفاع الدولار = انهيار الاقتصاد السوداني = ارتفاع تكاليف المعيشة = ضعف الانتاج ومحاربته من قبل الحكومة = ودي كلها اليست مسؤلية الانقاذ؟
طيب ليه منسوبي النظام تنتفخ جيوبهم والاخرين يموتون جوعاً ومرضا؟ هل لان الانقاذين بمن فيه القتلة والمغتصبين بحبهم الاله؟
هذا قمة الافلاس السياسي وبيع الكلام ........
مسجد شنو الذي غيظ اهل السودان ؟ هذه محاولة فارغة للتنصل من المسئولية

والله قصص
نضحك ولا نبكي
طيب لمن الإنقاذ جات تنقذنا ما خلت الامور لله ما لها
الفساد ثم الفساد ثم الفساد هو من أوصلنا لهذا الدرك

Quote: لماذا قامت ثورة الانقاذ ؟ أليس لإنقاذ الشعب من الغلاء وصفوف الرغيف وصفوف البنزين وارتفاع الاسعار ؟

جاءوا ووجدوا عشرة خبزات بجنيه ونصف (جنيه قديم) يعني 15 قرش جديد ...يعني الخبزة وجدوها بـ 15 قرش قديم
يعني 13 خبزة بمليم جديد...
ثم منذ مجيئهم وخاصة العشر الأوائل من ذي الحجوة كل صباح جديد سعر جديد

الإنقاذ كان رجعتنا محل ما جابتنا ،،،، تور الله الأنطح دا برجع جنينة الحيوانات ....




لسه في غيهم يعمهون .... ( كفى )

علي عثمان عايز يكفر أي زول يقول إنو الإنقاذ سبب الفقر والغلاء
وإنو ده من ربنا - ما من الكيزان

بمعنى آخر إنو نحن (الكيزان) بنحاول نغنيكم ونوصل دخلكم لي أكتر من 1800 دولار. لكن ربنا ما كاتب ليكم الغنى

فإستغفروا ربكم من أفعالكم لأنها هي سبب الغلاء.. ولذلك تسمعون عن حملة النظام للإستغفار
وطبعا الإستغفار عايز توبة والتوبة عايزة إرجاع الحقوق لأهليها - وهذا لا يجوز في حق الكيزان
لكن يجوز في حق شذاذ الآفاق والأجانب

وكما قال البشير الكيزان خيار من خيار وما فيهم زول فاسد

إذا يكون الشعب هو الفاسد

تاني شنو؟


وربنا سبحانه وتعالى ما كاتب لي الشعب غير الفقر والفاقه
23 سنة الكيزان ديل شغالين إنجازات لكن ربنا ما أراد




قوموا إلى ثورتكم يرحمكم الله.

الفهمتو من كلام شيخ علي يا عادل، بما إنو الشيخ من أصحاب البأس والبطش، إنو حتي في البأس الإنقاذ ماشية بعجل الحديد
لدلك بقت تهدد ببطش الله

بالله شوف كمية الدجل دي!!


اها عرفنا انو ما بنقصها ارتفاع الدولار البنقصها شنو؟ اذا عارفين ليه بتخلوها تنقص؟ واذا ماعارفين قاعدين 23 سنة ليه؟ واذا الموضع بيد الله انتو جيتو تنقذونا من الله؟

لعنة الله على الكيزان في الدارين..


شيخ المكاشفي سلام..

Quote: واذا الموضع بيد الله انتو جيتو تنقذونا من الله؟

تلك كانت أيام جاهلية يا نوباتيا
نحن الآن في عهد الولاية الثانية