فكررها ثلاثا (حتى الرئيس .. حتى الرئيس .. حتى الرئيس ..)

يا جماعة اتو هايجين ومايجين مالكم .... أسي تلاتة وعشرين سنة دي بتكفي ليها إنقاذ بلد مفلسة وشعب جعان وشحاد.. اتو عشان ترطبوا لسع قدامكم كتير... أول حاجة العشرين سنة الأولى دي يا دوب رطبوا فيها ناس الإنقاذ والمؤتمر عشان التعب التعبو والسهر السهرو .. والجهاد الجاهدو والبترول الطلعوه... والله كدي قول لي البترول ده طلعتو اتو يا شذاذ يا شحادين والله البترول كان لحسة كوع بس والعشرين سنة البعديها لأبناء الإنقاذيين وبنات الإنقاذيين ... أقل ما يمكن نكافيهم بيه عشان يضمنوا مستقبل أولادهم وبناتهم وكده ، أها والعشرين البعديها للرباطية والمجاهدية عشان لزوم الإستقرار وكده ... لا كين العشرين سنة البعديها ما فيها نقاش تب حاتكون كلها للشعب ما حا يشم فيها واحد مسئول ولا دستوري جنيه أحمر .. على حسب تصريح السيد الرئيس وقد سأل الصحفيون في ذلك السيد الرئيس فقالوا له حتى الرئيس فكررها ثلاثا حتى الرئيس .. حتى الرئيس ... حتى الرئيس ...

بعدين شنو قصة الربيع العربي دي الواهمين بيها روحكم دي ... أتو ما بتستحوا قال ربيع عربي قال والله اتو ما تستاهلوا إلا ربيع عبد العاطي ده يزازيكم مزازاة النعام ويصقاركم من قناة لقناة ... وما حاتقدروا تغمدو عينيكم...

يا شذاذ ... يا شحادين أتو كنتوا شحادين وجعانين ... شبعناكم وسويناكم ناس .... تشتروا من السوبرماركتات وتتونسو بالموبايلات .. وتشوفو العالم بالديجتلات ... وتركبو العربات من كل صنف ونوع إشى كوري وإشي ياباني وتجروا بيها في شوارع الظلط الماهلة دي ... وتخشوا بكبري وتمرقو بكبري .. وتدخلوا في نفق وتمرقو من نفق ... إن شاء الله تدخلوا في نفق مظلم بركة شيوخ الإنقاذ ... الصايمين وقايمين ... أسع اتو كل واحدا فيكم بياخد ليه إن بطل تب التمنمية دولار أها المقوم نفسكم بعد ده شنو؟ جايين تتفصاحوا كمان ...... أسي إتخيل بس مجرد خيال نحن كان ماجينا جنيهكم ده ماكان لحق أمات طه...