Post: #1
Title: يوميات جبوره جابر ...والمنطق المشاتر
Author: طاهر بدر
Date: 07-11-2012, 10:48 AM
جبوره جابر .الاغبش المبتعث لديار اولاد جون الما شافا قبال كدا زمن البلد كانت بي خيرا ما لفت انتباهه الا موضوع الاعمار البكتبوها الخواجات في شواهد قبورم ... فلان الفلاني 8 سنين وتلقى النعش طويل وعريض !!! وتاني واحد 24 وهو مات وعمرو 80 وقدر ما هرش راسو ما قدر يفهم الحاصل ... قامو قالو ليهو (الخواجات ديل بختو وصية قبل يموتو بانو يكتبو ليهم عدد السنين الهنية وسعيدة العاشوها) وانت دحين ضروري ولازماً برضو تكتب الوصية بتاعتك عشان يكتبو ليك السنين السعيدة العشتها ... ما اتردد وقال انا اكان مت اكتبو لي في الشاهد بتاع الرخام السمح دا (جبوره جابر من بطن امو للمقابر) ... من الطرفة الشهيرة دي نسوي يوميات عن جبوره جابر كشخصية سودانية بحاول يمنطق الحاجات ...
|
Post: #2
Title: Re: يوميات جبوره جابر ...والمنطق المشاتر
Author: Asim Fageary
Date: 07-11-2012, 10:52 AM
Parent: #1
| Quote: (جبوره جابر من بطن امو للمقابر) |
سلام يا طاهر بدر
أعتقد أني سمعت هذه النكتة ولكن يبدو أنك أكثر تهذيباً من الذي حكاها لي
\
حيث أنها تختلف في أحرف الكلمة الثالثة ولكن بنفس المعنى
_____________________
طبعاً ود القاضي بكون عارفها وعارف ياتو رواية هي الأصل
|
Post: #3
Title: يوميات جبورة
Author: العوض المسلمي
Date: 07-11-2012, 11:43 AM
Parent: #2
يعني يا عاصم الزول لو قال النكتة بشكل مؤدب ترفض الا وتذكرنا بالنص الفاحش منها ؟!
سلام صاحب البوست
|
Post: #4
Title: Re: يوميات جبورة
Author: Asim Fageary
Date: 07-11-2012, 11:52 AM
Parent: #3
| Quote: يعني يا عاصم الزول لو قال النكتة بشكل مؤدب ترفض الا وتذكرنا بالنص الفاحش منها ؟! |
العوض إزيك
هو النص التاني فاحش ؟
لا أعتقد أنه فاحش بل فيه شيء من الجرأة فقط
وكان مكضبني أسأل ود القاضي برضو
|
Post: #5
Title: Re: يوميات جبوره جابر ...والمنطق المشاتر
Author: طاهر بدر
Date: 07-11-2012, 12:01 PM
Parent: #2
عاصم ... الفكرة ما في النكتة ورواياتا ... النسج حول شخصية جبورة الحنخليهو يعلق على الاحداث ...صبراً يبل الآبري
|
Post: #6
Title: Re: يوميات جبوره جابر ...والمنطق المشاتر
Author: طاهر بدر
Date: 07-11-2012, 12:14 PM
Parent: #5
جبوره في رمضان مرق بي صحن عصيدة وجك حلو مر ومشي يزحف على صينية مجيهة فيها من ريحة اللحوم شي وشويات ... قام سمع انو قالو ليك قبل شهر اتقشف لانو (النمط الاستهلاكي) بتاعك اصلاً فيهو رفاهية !!! جبوره يقوم يسل ليهو قشة من البرش وينكش اللحمة البين سنونو ويقول التقشف وعرفناهو من القشف بتاع الشتا يا ربي (نمط) دي يعني شنو ؟؟ تكون عندها علاقة بي (مط الكلام) !!!
|
Post: #7
Title: Re: يوميات جبوره جابر ...والمنطق المشاتر
Author: طاهر بدر
Date: 07-11-2012, 12:31 PM
Parent: #6
متوسط دخل الفرد السوداني 1800 دولار
.
.جبوره: الكترااااااااااااااابه اللا خلت عمار لا خرابه. .
|
Post: #8
Title: Re: يوميات جبوره جابر ...والمنطق المشاتر
Author: طاهر بدر
Date: 07-11-2012, 12:44 PM
Parent: #7
200 الف دولار ثمن إعارة بشه للوحدة السعودي تنقذ الهلال لدفع المتأخرات ...
جبوره : يعني الازيرقاب بعد دا هتافم بدل (بشه بشه بشه اوووو بشه) يبقى (زنقة زنقة زنقه اوووو زنقه
|
Post: #9
Title: Re: يوميات جبوره جابر ...والمنطق المشاتر
Author: طاهر بدر
Date: 07-11-2012, 12:56 PM
Parent: #8
فنانة مشهورة تغني (يجو عايدين) داخل مسيد بطلب من شيخ المسيد
.
.
.
.
.
.
جبورة ...جدييييييييدة دي يعني نقول بعد دا (مجبور خادم الفكي على .....الغنا)
|
Post: #10
Title: Re: يوميات جبوره جابر ...والمنطق المشاتر
Author: طاهر بدر
Date: 07-14-2012, 12:56 PM
Parent: #9
شاب في الثلاثين من عمره تسلق شجرة مرتفعة تقع بالقرب من قهوة ام الحفر الشهيرة بداخل سوق مدينة كسلا الكبير وهدد الشاب بالانتحار مالم تتحقق مطالبه المتمثلة في عربة جديدة ومبلغ 40 مليون جنيه وعروسة حسناء
.
.
.
جبوره: ما كان بالمره كمان من ضمن المطالب تطلب يعينوك والي وتكمل الناقصة على راي اولاد بمبة (مكنش حد غلب) ...ولو كان طلبو اتلبى كنت تلاقي الناس اتشعلقت زي القرود والله ما كتر غير النيم في البلد ... وكل ما كانت الشجرة عالية كلما المطالب تزيد يعني ناس الدليب ديل اقل شي مفروض مليار وهمر ونائب والا ناس النخل بزيدو علي المطالب اسانسير يسقفو بيهو التمر.... اما الداير الحتة الكبيرة خاااالص عليهو بي برج خليفة في دبي واهم شي يوري كل القنوات عشان الحيتنازلو عن المناصب يمكن يحنو ويقولو ما دام جابت ليها طلوع ابراج وفضايح خلاص فكيناها ..
|
Post: #11
Title: Re: يوميات جبوره جابر ...والمنطق المشاتر
Author: طاهر بدر
Date: 07-23-2012, 11:52 AM
Parent: #10
تمت زيادة تعرفة الكهرباء بنسبة فلكية تتراوح ما بين 150% و 207% ابتداء من مساء السبت ، ودون اعلان مسبق حيث فوجئ المواطنون بهذه الزيادة عند ذهابهم للشراء
.
.
.
.
جبوره: ما قالوا عن سد مروي هو مشروع (نهاية) الفقر في السودان ...امممممممم بكونو قاصدين (منتهى) ..
|
|