تحروا عنها في العشرة الاواخر من كل شهر .. في امر الثورة

ابشركم بانها اتية لا محال وان تاخرت او تدحرجت عجلتها ببطء ... اسباب تاخرها كثيرة .. في مقدمتها هذا المنبر الذي اصبح يثقف سياسينا وناشطينا ثقافة خرقاء اساسها التنافس وليس التعاون .. وديدنها محاولة استباق الاخرين الى المجد

ما علينا ... فقد حجبت الحكومة البليـــــده المنبر من السودان .. وهذا لعمري لمصلحت الثورة
الان اقول لكم تحروها في العشرة الاواخر من كل شهر ... لانه وبعد الزيادة المهولة في اسعار كل الاشياء .. ولا زيادة في المرتبات ... لن يصمد اي مرتب بعد يوم 15 من كل شهر

واخبركم سرا لم تفهموه يا ناشطين .. الثورة في السودان ثورة جياع .. وليست ثورة رفاهية
السياسة رفااهية بالنسبة لهذا الشعب .. الان هو يبحث عن قوت يومه
ولان قوت يومه اصبح امرا عسير سيثور لاجله وليس لاجل شي غيره

افهموها كده


لو كنت تريدون تحريكه وتسريع امر ثورة ستاتي لا محالة

شوفوا ليكم شعارات تدغدع واقع هذا الشعب .. وليس اشواقكم انتم يا ناشطين


يعني خلونا من حياكيات السوريين دي وامور
لحس الكوح وقصقصت الاظافر وما اليه

يقال ان من اليوم 3 رغيفات بجنيه
وان عدد المعتقلين بلغ 2000

هذا هو ما سوف يحرك هذا الشعب
شعار للجوع
وشعار لحرية ابنائه

سلامات يا وليد

اي رأيك في شعار؟؟؟

"هم وطني قبل بطني"

حمد لله علي السلامه يا وليد
كنت بصدد فتح بوست للسؤال عنك اليوم
فقد ظننتك معتقلا او مهددا

مرحب عمر بوب
يسال منك الخير

احمد الله اني لست معتقلا ولت مهددا
والحرية لجميع المعتقلين والامان للمهددين


شرف الاعتقال هذا لم انله .. فانا دون ذلك يا صديقي
ما انا بمناضل حتى اعقل

لعل الحكومة تقول .. دعوه فهو نكره

ما منعني عن المنبر الحجب فالمنبر محجوب من السودان وانا ادخله الان بكاسر
ثم البحث عن الرزوق
ثم الدراسة

اما في امر الثور
فوالحمد لله
استنشق بنبانها كل جمعة
واركض في حواري ودنوباوي وحي العمده هربا من العسس

يا كمال
تحياتي


هذا شعار اقبله من شخص قاعد متحكر معانا في الواطة دي
استدان حتى يشتري ملابس العام الدراسي الجديد لابنائه
واستدان حتى يتمكن من توصيل ابنايه اليوم الى مدارسة في يومهم الاول

لكن اي زول بطنو شبعانه زيك كده وضارب لحوم وخيرات الالمان
واطفاله ياتيهم الترحيل للمدرسة في معاده .. وان عجر هو عن سداد القيمة تاتيه اعانه من الدولة
لا اقبله منه

الان الشعار هو
وطن يجوعني ويملا بطون الاخرين
هو وطنهم هم وليس وطني

كيف معاك الشعار ده ؟

____________
خالص التحايا يا فرانكلي

تحياتي يا وليد

خلاص ما تزعل

أنا فعلاً ضارب الترطيبة ودي حقيقة والجو هسّع دي في الخارج زخات مطرة حلوة ودرجة الحرارة بين 14 ل16 درجة فوق المئوية ودا صيفنا بالمناسبة وهسّع دي وأنا قاعد اكتب في الكلام دا واليوم أحد جالس في الصالون وبشرف في فينا ملاج Wiener Melange حاجة كدا ما تخلص بتشبه الكابوتشينو

أنا دا كلو ما ناكره والحمد والشكر لله صباح مساء

لكن الناس بتفدي أرواحها فداءً للأوطان ما بالك بالبطون

على كلٍ نغيير الشعار ليكون

"هم بطني قبل وطني"

تحياتي وتقديري

كمال

مافي زعل يا فرانكلي

انت الما تزعل

Quote: لكن الناس بتفدي أرواحها فداءً للأوطان ما بالك بالبطون

مافي شك
لكن هذا الامر يقوله شخص ضايق الحارة زي كده
ان اجوع فليست مشكلة كبيرة
لكن ان يجوع ابنائي .. فتبا للجميع

لن تفهم يا فرانكلي ... فانت في وادي ونحن في اخر
مثلك مثل الذي نجروا شعار جمعة لحس الكوع شعارا للثورة


بلا لحس الكوع بلا وهمة معاهم



مع الموده

Quote: يقال ان من اليوم 3 رغيفات بجنيه

سحقــا !

بل تبا لهم
اخرجوا عليهم شاهرين هتافكم مع ان الامام علي قال سيوفكم ولكنها مسألة زمن فقط

حمدالله ع السلامة يا ... شفت :)

داليا اخبارك ؟
لعلك بخير


محمد ابراهيم .. تحياتي
حسب المعطيات .. اتيه لا محالة .. الا ان وجدت الحكومة بترول في مربعاتها الجديدة
او قالت الحركة الشعبية الروب وفتحت الانبوب بالسعر الذي تريدده الحكومة


ود البشرى
للضرورة احكام
وهذا البوست ضرورة
تحياتي :)

اُشغرت الاماكن يا صاحب

لقيط الرزق حار يا اساسي
خاصة في السودان
والاخص في هذه الايام


لعلك بخير يا صاحب

هذه هي شعارات الشعب واشواقه
تسخر من الحكومة ومن المعارضة
مرقت في اغنيات البنات


غنية بنات جديدة
وووب البورة ما بتنطاق
عريس ان شاءالله شاذ آفاق
بس هو يجی

عريس ان شاءالله لو جربوع
وجرب مرة لحس الکووع
يعدی معای فد اسبوع
بس هو يجی

عریس ان شاءالله رباطی
او مضروب طلقة مطاطی
بس هو يجی

عریس ان شاءالله لو سجمان
ويومی يستنشق البمبان
بس هو يجی

المصدر الفيس بوك

Quote: حسب المعطيات .. اتيه لا محالة .. الا ان وجدت الحكومة بترول في مربعاتها الجديدة

حتى ولو وجدت الاستكشاف وتقدير الاحتياطات يحتاج الى زمن مابين 18-24 شهر لا الحكومة عندها البتشتري بيهو الزمن ده ولا الشعب فضل فيهو حيل لملاواة كضب الكيزان ده
الحركة الشعبية لا تستطيع القبول بالسعر الذي يعرضه الشمال ولعبة عض الاصابع شكلها عاصرة على الشمال اكتر

الناس الما كانت بتشكي بقت متجرسة عديل كدا
اهبش اي موظف في السودان اسه دي ،،
حا يسمعك العجب عن الحالة الصعبة


و كلامك سليم يا وليد
تحياتي

الحالة صعبة يا ناصر
وكل شي بقى في زيادة

وسيقفد المواطنين صبرهم تدريجيا

فعلا يا ود ابراهيم
ما فضل فينا اي حيل لا اي كضب

يا وليد .. سلامات
صدقت في ما قلت ..
على الناس الا يستعجلوا امر الثورة فهي قادمة .. قادمة
وزي ما قلت الشعارات المتعلقة باوضاع المعيشة وحال المواطنين هي التي ستحرك الناس.
اما الزينا نحنا ديل القاعدين بره ويدنا في الباردة، أحسن شىء نعمله اننا ندعم ما يراه الناس على
الارض، لا ان نقترح عليهم شعارات او نحدد لهم اتجاهات او حتى مواعيد للخروج
الى الشارع كما يفعل البعض.
والاهم ان يتوحد الناس بكل احزابهم وتوجهاتهم "دون عزل لاحد" خلف مطالب الشارع ، لا ان يعيقوا
تحركهم بانقساماتهم ومعاركهم الصغيرة والبائسة.
يحسن الناس هنا صنعا، لو انهم تركوا لعبة التصنيفات والاقصاء السخيفة التي يمارسونها ضد بعضهم.
ويحسنون صنعا ايضا، لو أصغوا الى صوت الشعب وما يطلبه منهم في هذه المرحلة.
لك مودتي

ستدخل الثانويات الثورة من الاسبوع القادم

واول من سيضرب من العاملين سيكون المعلمين .. لانهم اكثر المتضررين ان ثارت المدارس ثم عطلت

تحياتي البشاري

والشعب يطلب رزق اولاده وكرامتهم فقط

اما مجاراة نافع ومكاواته
فهذه اشواق الناشطين وطلباتهم

و مثل فرانكي من الجهة الاخرى
احدهم يستنكر ان يخرج هذا الشعب عندما يجوع ؟!

والمستنكر نفسه لم يخرج في شوارع الخرطوم لا للجوع او للاشياء الاخرى
بل خرج عن الخرطوم كلها ويريد ثورة بالوكالة تبحث عن ما يرجوه هو من ترف ورفاهية ، بعد ان غطى بصورة او باخرى كل احتياجاته الاساسية

يا عمي رووووووح

الاخ وليد سلام

Quote: استدان حتى يشتري ملابس العام الدراسي الجديد لابنائه واستدان حتى يتمكن من توصيل ابنايه اليوم الى مدارسة في يومهم الاول

ما قلت اعلاه برضوا بعتبر ترف بالنسبة للكم مليون العايشين في الخرطوم بس000 لانو الزول البقي يلقي البدينوا ده معناها في الايام دي ذو حظوا000 ناهيك عن باقي السودان00 اما امر الثورة ياوليد انا الشائفوا الان انو اولاد و شباب الاحزاب مجتهدين جدا في بس الحماس وسط الناس و لكن التجاوب معاهم ضعيف من عامة الشعب 0000و حسب ما اراي كل ما الايام مشت كلما فتر الحماس يعني ما اتوقع بعد العيد تاني تكون في مظاهرات الجمعة او غيرها 000اعتقد ان الحكومة قافلة على 10 الف برميل جديدة من النفط دخلت في الايام الفاتت تحل ليها شئ من مشكلة الدولار

سلامات مدثر

وانا ارى عكس ما ترى

اسالك سوال هل انت متزوج ؟
هل لديك اطفال ؟
لو الاتنين ديل معاك ستفهمني تماما

ارجو ان يوجه شباب الاحزاب جهدهم نحو الثانويات فهي ممن سيحرك دولاب الثورة قليلا

ولى حمدالله على السلامة

وكل سنة وانت طيب

رمضان القادم سودان بدون كيزان

سنادة ازيك ياخ
والله مشتاقين
تحياتي للمعاك كلهم

بالطريقة دي اكيد سيكون رمضان القادم بدون كيزان

بالمناسبة رمضان يتحول فيه السودان من اه نهارية لامه ليلية


وسيكون شكل الثورة مختلف ..... من التراويح وعلى الظلت طواللللللللللللللللللللي

الجمرة تحرق الواطيها يا قريبي. وغبنك كبير يا وليد حيث يبدو ذلك جلياً في كلامك.

توقفتُ كثيراً حول خواطرك وهمومك وتيقنتُ بأن صبر الناس في السودان قد نفذ وأن امر الثورة يمكن رؤيته في العشر الأواخر من كل شهر وهذا يدل على خواء الجيوب؛ حيث لا تكفي المرتبات لمقابلة الإحتياجات الأساسية. وأضيف أيضاً لما اوردته يا عزيزي بأن الظلم والقهر والإستبداد والغطرسة والفساد ايضا من الأسباب المساعدة أيضاً في تعجيل الثورة في السودان فقد بلغ السيل الزبى...

نحن في الخارج نحس بالآم أهلنا بالداخل ونحزن لحزنهم أشد الحزن والله على ما أقول شهيد...

مثلك كثيرين يا عبد الاله نصدقهم ونثق في نواياهم

اما ما نحن فيه الان من تعطل لعجلة الاقتصاد فاسبابه هي ما تفضلت به وهي الظلم والقهر والإستبداد والغطرسة والفساد ..
فكم من تاجر ناجح خرج من السوق للاسباب عاليه
وكم من مستثمر ناجح ترك البلاد للاسباب عاليه

وكم
وكم

وكم شفت من مجهول مصير


تحياتي يا قرابة

قال الرئيس
من خرج في الظاهرات هم الشماسة ..

وقد صدق

فمن هم الشماسة ؟
الشماسة هم من ضاقت احوالهم واحوال اسرهم فجعلوا الشمس لهم لحافا والشوارع مسكنا


الان وبنفس المعطيات جل الشعب السودان كاد او صل لنفس المرحلة

اذن فقد صدق الرئيس هي ثورة الشماسة
هي ثورة الشعب

اما الظلم والفساد يا قريبي فمثاله الحي احدثك به

قد علمت اليوم انه تم صرف حافز 750 جنيه للموظفين بالمكتب الوزاري ومكتب الامين العام وهو عبار عن حافز تغطية مصاريف بداية العام الدراسي

بقيت الوزارة حيث اعمل ...... لا اظن ان لهم اطفال يدرسون ؟؟؟
لذا لم يصرف لهم هذا الحافز

شفت كيف !!!!

وليد

Quote: لو الاتنين ديل معاك ستفهمني تماما

و مؤجر كمان 0000و فاهكم كويس 000 بس عاوز اقول انو السودانيين بالجد و بدون تحيز اصحاب تجربة اكبر اللبيين و المصريين في السياسية و تجارب اكتر من بقية شعوب المنطقة 000 و عارفيين انها لو جاططت الصومال حايكون بالنسبة لينا رحمة 000انت براك شائف المنبر ده مثلا كل يغني على ليلاه000 وبرضوا انت اكيد بتوافقني انوا التجاوب مع المظاهرات ضعيف و ماشي متراجع كمان 0000 شفوا مظاهرات الليلة في جامعة الخرطوم والله حتى ناشطين سياسين من الطلاب ما طلعوا 00000

نعم التجاوب مع المظاهرات ماشي ضعيف وانا قد بررت الكلام ده في السطر الاول من المداخلة الاولى وقلت انو المنبر ده ليه دور في الامر ده
والسبب انه نشر ثقافة مفادها التنافس بين المناضلين على المجد

هاك مثال من الخطأ القبول بمسجد الانصار مركزا لانطلاق المظاهرات

انا ما معول علي الناشطين وخصوصا نشاطي الخارج
ديل واديهم غير وادينا وطلباتهم غير طلباتنا
فيهم من ثورته ضد نافع وتصريحاته ... يريك ان يكسب بونت على نافع او البشير
فاحتياجاتهم الاساسية متوفر ومصانة


التعويل على اهل الداخل من اصبح امر شئونهم الاساسية وتصريفها من ضروب المحال
لذلك قلت تحرو عنها في العشرة الاواخر
وكت المرتب يقطع
وما تلقى من تستدين منه عشان مرتبوا قطع برضو

حينها سيخرج هذا الشعب جميعه

لكين يا وليد خلونا نكون واقعييين شوية .

ما تنسوا انه رمضان جااااااي وحا يهدي الناس شوية .
صيام وكده الا مظاهرات ليلية اوكي .

انا بشوف انه اضراب العمال و الاطباء وغيرهم هو الحاينجح الثورة .


الانقاذ نظام فاسد وواجب على اي سوداني شريف طرد هؤلاء الحرامية
وبعدها ما مشكلة حا نحمي الثورة من الاحزاب و انتهازيتهم

يا احمد محمد بشير
حا يضربوا يا احمد غصبا عهم حا يضربوا

وحا يجي وكت اخر الشهر ستجد العامل يجلس في منزله جبرا بسبب عدم توفر حق المواصلات لمكان العمل .. والموجود فطعام اولاده اولى به

اما الانقاذ فهي بتقفل في حساباتها الختامية

Quote: واخبرك سر لم تفهموه يا ناشطين .. الثورة في السودان ثورة جياع .. وليست ثورة رفاهية

لذلك فهي لا تشبه ثورات الربيع العربي.

سلآمات يا وليد.
إقترحنا الجمعة الجاية يسموها جمعة السخينة.
أضف إلي كل ما ذكرت يا وليد أنّ البلد أصبحت تحكمها عصابة وليست حكومة.
حتي حزب المؤتمر الوطني ما أصبح حاكم، وإنفضّ أعضاءه من حول هذه الفئة
الباغية. ضاق الحال بالشعب، والفئة المسيطرة علي الأمر لن تستطيع أن تقدم له
ما يسد الرمق، وكل يوم سوف ينفضّ من حولها من كانوا يقدمون لها يد العون
حتي تصبح يوم وقد وقعت في يد الشعب. هذه الفئة ليس لها مفر، وحتي القوات
النظامية ستنحاز إلي الشعب الذي هي جزء منه يصيبها ما يصيبه.
الشِرزمة الحاكمة ليس لها مفر، والمسألة مسألة زمن كما ذكرت.

مودتي...

يا مدير

تصدق انك جبت خلاصتها

Quote: البلد أصبحت تحكمها عصابة وليست حكومة.حتي حزب المؤتمر الوطني ما أصبح حاكم،

هذا صحيح ميه المية
هسع في الوزارة دي عندنا باين
وانا استفسرت عنه وعن اسبابه

في مجموعة صفوه عندنا في الوزارة هنا
سبب تميزهم ما معرف

صحيح هم مؤتمر وطني
لكن يوجد غيرهم كثر مؤتمر ووطني اصبحوا يشتكون

صحيح هم شوايقة
في شوايقة ومؤتمر وطني كتاااااااااااااااار متجرسين

ليسوا بالبناهة او الشطارة التي تميزهم
وما سمحين ولا انيقين ولا بتاعين حنك سنين او اجتماعيين

ليس هنالك ما يميزهم الا انهم
اصحاب اصحاب

الجرائد من منتصف هذا الاسبوع الجريده بي 2 جنيه

اتوقع ان يكون اضراب الصحفين يلي اضراب المعلمين وقد يكون قبلهم

لانو مافي زول حا يشتري جريده
الا ياكل الصحفيين ورق جرائدهم

يا وليد حيرتونا معاكم

نحن في ترطيبتنا دي عايزين الأكيدة

وظائف الدولة دي بدوها للكيزان بس ولا معاهم ناس تانيين

والتانيين ديل كم في المية

يعني لو الحكومة وكل الوظائف كما يقال في أيد الكيزان الح يضرب ليكم ديل كيزان الترابي؟؟؟

حكاية اضراب مدني حكاية بايظة

كلهم كيزان

حكاية تحرك الجيش إلى جانب الشعب حكاية بايظة

كلهم كيزان

حكاية عمال سكة حديد برضو بايظة

كلهم كيزان

بعدين ما تفتكر لو قامت ثورة نجحت وسلم السودان وإنسان السودان

أنّ الماهية ح تبقى بالدولار ولا اليورو والبنزين بقرش والسكر بلاش والايجار السنة بعشرة قروش

المشكلة يا وليد في موارد الدولة ودي فيها عجز كبير سواء جاءت ثورة أو بقي الكيزان

Quote: المشكلة يا وليد في موارد الدولة ودي فيها عجز كبير سواء جاءت ثورة أو بقي الكيزان

وموارد الدولة فيها عجز ليه
طالما انهم ما قادين يديروها بالموارد دي
او انهم يخلقوا موارد جديده

مفروض يخلوها لزول غيرهم يعرف يسوي موارد للدولة

23 سنة حكم وتقول لي موارد الدولة فيها عجز
وياتو دولة دي .. انها السودان
اكبر دولة في افريقيا
مساحات شاسعة للزراعة
ثروة حيوانية مهولة
ثروة مائية مهولة

دايرين شنو يعني الله ينزل ليهم قروش من السماء ؟!

Quote: الجرائد من منتصف هذا الاسبوع الجريده بي 2 جنيه

دي بسيطة يا وليد

الجريدة مفروض سعرها يكون صفر يعني بالمجان

بالجد كدا

يعني الصحيفة تتحصل على إيرادتاها من الإعلانات زي ما المحطات الفضائية الشروق والنيل الازرق وغيرها تتحصل على ايرادتها من الإعلانات

المهم أنّ مجلس الصحافة والمطبوعات أو اياً كان اسمه أن يعمل على قسمة اعلانات الدولة بالتساوي على الصحف

لأنّ اعلانات الدولة هي من أعلى الإعلانات دخلاً

والباقي البقاء للأكثر قرّاءاً والأكثر تلبية لرغبات القرّاء

يعني ما ضروري يكون عندنا 200 جريدة

بعدين الجرائد الإلكترونية ماشة في تسابق مع الجرايد الورقية التي اغلبها لا يحدث موقعه إلا مرة في اليوم

ولو عملوها صاح ممكن الجريدة الإلكترونية تكون مرود مالي ممتاز للإعلانات

Quote: هذا شعار اقبله من شخص قاعد متحكر معانا في الواطة دي استدان حتى يشتري ملابس العام الدراسي الجديد لابنائه واستدان حتى يتمكن من توصيل ابنايه اليوم الى مدارسة في يومهم الاول

وما بعد الضيق الا الفرج ياوليد اخوى

والظلم والمظالم العمت الوطن لابد تنقشع باذن واحد احد

تحياتى

يديك العافية يا مهيرة

الله في

تعرف يا شفت كلامك دا صاح للأسف
الإحتجاجات الأخيرة سببها الجوع و الفلس و انعدام الأمل في وجود حلول ناجعة أو حتى السعي لها
و المؤسف أكتر انو الحكومة بيدها تنهيها لو قدرت تحلحل مشاكلها الاقتصادية
أو حتى لو أبدت نية جادة لحلها ممكن تنطلي الحكاية على الشعب و الناس ترضى من الغنيمة بالإياب
أو على الأقل سيتراجع كل من ليست له غبينة أو لا يملك الوعي الكافي بالغبائن و المظالم الارتكبوها في غيره
وسيبقى على الساحة قلة من المنظمين و شباب قرفنا وغيرهم وح تستفردبيهم الحكومة وتعود اسطوانات ديل اولاد صعاليك و شيوعيين ومش عارف ايه
ويرجع الناس يخشوا الكورة عادي و يهججوا في حفلاتهم و ينشغلوا بمعايشهم

ح تقول لي الحكومة كيف تحل مشاكلها في شهرين تلاتة
الحلول في بس عايزة تنازلات جامدة و يمكن تغيير جلد ووجوه - ووجوه دي اعني بها وجوه كبيرة و سمينة قد تصل حتى البشير نفسه بضمانات أو بدون
والكيزان ديل عودونا لا حدود لإنتهازيتهم و ميكافيليتهم
و الببيع شيخو عادي ممكن يسلّم رئيسو و السيناريو اليمني في الأفق وعنده من يسوّقه
دا غير بعض القرارات الممكن تخم الناس اعلان حافز عيد هنا أو بدل شنو ما عارف هناك
دعم ترحيل للطلاب توفير سلعة ما - السكر مثلا - و المتاجرة بيها كأنهم دعموها المهم اي شي يحسس الناس انو الحكومة استجابت لإحتجاجاتهم
أما فعلا لو حصل البتتكلم عنو يا وليد والروح بلغت الحلقوم و الكيزان خلوها تصل المرحلة دي
فدا يكون يا غباء منهم يا كمان قنعوا منها وعايزين يتخارجوا ودايرنها تجي من غيرهم

تحياتي يا وليد
دايما تجيب من الاخر
الانقاذ وصلت طريق مسدود..المحطة الأخيرة.

Quote: وطن يجوعني ويملا بطون الاخرين هو وطنهم هم وليس وطني

إنها ثورة لإسترداد الوطن من الحرامية
الذين شبعوا وجوعوا الناس

لكم الله يا وليد وناس السودان جميعا
الواطين الجمرة وداسين عليها كمان
لا أحد يعدلكم
لا أحد يثور نيابة عنكم

الوطن وطنكم وستستردونهم من مخالب الديكتاتورية
وسنهني جميعا بوطن خير ديمقراطي

Quote: ان اجوع فليست مشكلة كبيرة لكن ان يجوع ابنائي .. فتبا للجميع

وليد ازيك .. والله العبارة دي قوووية شديد ... تباً لـ الجميــع .. و تباً لأهلي إن جاع طفلي .. أي حاجة ممكن الواحد يتحملها إلا الأطفال .. إلا الأطفال

قبل شوية كنت بحضر في أخبار المجاعة في الصومال ... الأمهات يحملن أطفالهن عظام و رب الكعبة ..منظر مميت ..منظر قاسي ..

منتظرين فعلاً دور طلاب المدارس والمعلمين .. فهم لهم دور مؤثر و فعّال في جميع الأصعدة ...

ازيك يا رشا

وصدقت حين قلتي
إلا الاطفال


وليتهم يفهمون

تحياتي .

يديك العافية يا نصر

لكل اجل كتاب
وكتاب الانقاذ في صفحة الاحالة والمراجع .. يعني اخر صفحة

مرحب معاذ

والغريبة ما عاوزين ينزلوا

ود البشرى ازيك ياخ

نعتذر فقد شغلتنا عنكم اموالنا ( نبحث عنها ) واهلينا


المهم

الكيزان يا ود البشرى افترو .. كل الذي يحدث الان سببه الافترا والغرور ..
والغرور غباء يا ود البشرى

وليد حمدا لله علي سلامة عودتك للمنبر :)

الله يعافيك يا العوض


;-)

وما سمحين ولا انيقين ولا بتاعين حنك سنين او اجتماعيين

عجبتنى وعجبنى الصيام فى رجب

جايينا متين ؟

عصام ازيك ياخ
كيف اخبارك والاولاد؟


الحلبي طردوه ولا لسع ؟
كالمعتاد شهر 1 من كل عام
لكن لو لقيتو لي شغل هسع دي بجي

يالمر حبابك والله


مع اني ما فاهم اي حاجة

للأسف .... رغم أنّه الوقت الصحيح للثورة .... إلا أن من حاولوا تحريك الثورة ضغطوا على الأزرار الخطأ. لذا جاءت ناقصة.

وأنتَ تعلم أن القيام بنصف ثورة. أسوأ من الاستكانة للظلم.

مرحب هاني

Quote: وأنتَ تعلم أن القيام بنصف ثورة. أسوأ من الاستكانة للظلم.

غير صحيح
نصف الثورة اكثر ضررا من الاستكانة للاتي

1. عنصر المفاجاة يضيع
2. العدو يدرس الاساليب ويتدرب عليها
3. يدخل الياس والرهبة في نفوس الثوار بسبب نصف الثورة
4. تتسبب في تاجيل الثورة الكاملة

تحياتى اخى وليد ،،

Quote: واخبركم سرا لم تفهموه يا ناشطين .. الثورة في السودان ثورة جياع .. وليست ثورة رفاهية السياسة رفااهية بالنسبة لهذا الشعب .. الان هو يبحث عن قوت يومه ولان قوت يومه اصبح امرا عسير سيثور لاجله وليس لاجل شي غيره

قد يختلف معك الكثيرون بان الشعب السودانى لم يخرج لانه جاع ( ما مرقنا عشان بنزين مرقنا عشان نزيل تجار الدين ) رغم ايمانى العميق بان الشعوب قد تصبر الى ان يصلها الاذى فى اللحم الحى وهو الجوع الذى اشرت اليه.. وصدقت بان السياسة عند الجياع هى قمة الرفاهية فلم يعد غالبية الناس يهتمون كثيرا لمن يحكم وكيف يحكم وانما قضيتهم ان من يحكم يجب ان لايفشل فى تامين ابسط اساسيات الحياة الضرورية .. وهاهم الكيزان يحكمون البلد طوال 23 عاما هى عمر النبوة رغم المصائب الكبرى التى حدثت طوال هذه الفترة الطويلة .. ولم نر حراكا للشارع مثل ما هو حادث اليوم رغم بطئه وانحساره وعدم اشتماله لكل الاصقاع .. ياترى اين الشعب !! ولماذا لم ينتفض مثلما انتفض من قبل وازاح اعتى الديكتاريات !! هذه اسئلة صعبه احترنا فى ان نجد لها اجابة شافية.. ام اى المقولتين ستصدق ( الشعب جعان لكنه ...)..ام ان ( الشعب جسور لكنه صبور).. ام انه الهدوء الذى يسبق العاصفة ..

مرحب علي محمد خير

الاختلاف حق مكفول للجميع .. والثورة نهر جارف ... فيها من يخرج للونسة وفيها من يخرج لبطنه .. وفيها من يخرج للشهرة وفها وفيها

لكن لكل نهر عرق هو اساس تياره
واساس تيار هذه الثورة هو تردي الاحوال المعيشية
هذا رائي وقد لا يكون صحيحا



تحياتي

تحرو جيدا
الان وفي هذه الايام
الروح بلغت الحلقوم والاخلاق في النخرة

الكهرباء على خط رفع الدعم

سلام اخى وليد ورمضان كريم

ان شاء الله أكتر من آخر الشهر دة الانقاذ ماتقعد تانى

قولوا آميين

يقال ان من اليوم 3 رغيفات بجنيه
وان عدد المعتقلين بلغ 2000

هذا هو ما سوف يحرك هذا الشعب
شعار للجوع
وشعار لحرية ابنائه

Quote: مرحب علي محمد خير الاختلاف حق مكفول للجميع .. والثورة نهر جارف ... فيها من يخرج للونسة وفيها من يخرج لبطنه .. وفيها من يخرج للشهرة وفها وفيها لكن لكل نهر عرق هو اساس تياره

شكرا ياوليد في الحقيقة عجبتني هذه الكلمات الجميلة ..........والتي كثيرا ما اتناولها .........بان اهداف من يخرج للثورة ، كثيرة ومتعددة ، فهناك من يخرج للنزهة وهناك من يخرج للفرجة وهناك من يخرج ليبيع سجائر وصعوط وهناك من يخرج بسبب الغبن السياسي وهناك من يخرج لاجل الغبن الشخصي وهناك من يخرج لاجل لقمة العيش وهناك من يخرج مجاملة وهناك من يخرج عشان يكيس وهناك من يخرج رجالة كدة مع الناس .......ومنهم من يخرج حماية لاولاد الحارة او بناتها . وهناك النشال واللص والمسطول .
ولكن الشي المهم ان الثورة تحركها دواعي سياسية طالما هي تحركت ضد منظومة سياسية ويتم دراستها من وجهة نظر سياسية واقتصادية واجتماعية .......ومن جهة الطرف الاخر يصورها بانها غضبة ضد زيادة الاسعار وبالتالي يقلل من اهميتها السياسية بغية التصفية .....واعداؤها لا يكتفون بهذه النعوت بل يصفون قادتها بالمخربين وشذاذ الافاق ........وهناك المغالين الذين يمضغون السنتهم ساعة الحديث عن الجوع ....ليقولو لنا بان الجوع لا يحرك الا البطيني .....فلماذا اذن لا يجعون منسوبي النظام مثل الشعب؟ وهل مسالة الجوع الذي نتشر والمرض والجهل والفقر والبطالة ليست قضايا وطنية ؟ هل هذه قضايا لا تحل سياسياً ؟ هي قضايا سياسية خليقتها تتم سياسياً والقضاء عليها يتم سياسياً