بحمد الله وتوفيقه وبالمثابرة أكملت بناء فيلتي الجميلة بالخرطوم (صورة)!

اللهم لك الحمد والشكر :

إقتنعت تماماً أنه موضوع البنيان حاجة , والتشطيب حاجة تانية خااااااالص!!!

أما ممطالة الصنايعية والمقاولين فذاك أمر آخر وحديث ((ظوووو) شجون , سيأتي تباعاً , فكونوا معنا................

أما تقلبات أسعار السيخ والأسمنت وأدوات الكهرباء والمعدات الصحية , فده كوم براااه عايز ليه مجلدات ..............

ووسط كل هذا الزخم , إقتنعت - وبفخر - بمقدرات المهندسة والمهندس السوداني...........

الأخ محمد عبد المطلب

تحياتي ومبروك إكمال الفيلا وألف حمداً لله على السلامة

إنشاء الله ربنا يهنيك بيها وسط الأهل والجيران الطيبين

بحيراوي

هذا البوست بوست تثقيفي يعلمك كيف تبني فيلا في السودان From da scratch , من الألف للياء دون أن تصاب بخمسة من الأمراض المزمنة وعلى رأسها (الدغت)!!!

Quote: الأخ محمد عبد المطلب تحياتي ومبروك إكمال الفيلا وألف حمداً لله على السلامة إنشاء الله ربنا يهنيك بيها وسط الأهل والجيران الطيبين بحيراوي

شكراً الأخ بحيراوي,,,

كنت في شوق لمعرفة أول المهنئين , فكنت أنت , فلك التحية
والتجلة , وشاكر على الدعوات الطيبات.

آآآآمييين.

الف الف مبروك اخي محمد

وربنا يسعدكم فيه

يا رب

تشكراتي

مبروك يا محمد
تصدق بعد رحلتك الشهيرة الى القرين فالي ووقوفك على الترس البارليفي اياه
افتكرناك طبقة بوليتاريا زينا..طلعت برجوازي معفن
ربنا يهنيك ..وألف مبروك

منزل مبارك وتقعد فيهو بالعافية..
منتظرين التفاصيل..

ودى كلها فيلا واحدة يا مرسي!
امال الكومباوند والكومبلكس والفلل الرئاسية كيف
مبروك للطيش
تاجر بي 1000 دولار عشان اجرها لى واحد بى الفين دولار يا بخت من نفع واستنفع
جنى

Quote: مبروك يا محمد تصدق بعد رحلتك الشهيرة الى القرين فالي ووقوفك على الترس البارليفي اياه افتكرناك طبقة بوليتاريا زينا..طلعت برجوازي معفن ربنا يهنيك ..وألف مبروك

آآآآخ لكن يا عمك

بالله عفانة البرجوازية مش أخير من الغضب والأكل الكعب وعيشة السوق؟

الله يبرجزك معانا وتتمتع بالبرجزة والعافية والدوررراررات الكافية.

تسلم يا معاذ على التهنئة وإنت نمرة 2 في المهنئين.

شكراً معاذ.

يا معاذ :



تجي تتبرجز معان؟ والله إسمك الأول ده فيه حلاة برجزة , مية مية والله , ولا فراخ القمعية!!

شكراً معاذ.

الف مبروك الفيلا وحمدلله علي السلامة.

الأخ محمد عبدالمطلب

سلام ..

ماشاء الله ....والف مبروك يارجل .

مررت بنفس التجربة في منطقة كافوري لجمال المنزل ناس التلفزيون
مرة جو مارين بالمنطقة وعملوا لقاء مع والدتي وقاموا صوروا
البيت كلو ....الشكر لله سبحانه وتعالى ....
بالمثابرة والاجتهاد كلو شئ بيتم .
أمنياتنا للجميع بالتوفيق ....

تسلم يا عمر يا باوقاوي يا ود الباوقة يا هميم.

تحياتي وإحترامي.

Quote: منزل مبارك وتقعد فيهو بالعافية.. منتظرين التفاصيل..

تشكر , والله يبارك فيك وأمنيات الصحة العافية لك أيضاً.

التفاصيل آتية.

Quote: ودى كلها فيلا واحدة يا مرسي! امال الكومباوند والومبلكس والفلل الرئاسية كيف مبروك للطيش تاجر بي 1000 دولار عشان اجرها لى واحد بى الفين دولار يا بخت من نفع واستنفع جنى

هههههه.

إنت جيب الزول البي ألفين دولار بقنعوا ليك يأجر بي خسمة ألف وبديك إنت الألفين؟

؟Deal

Quote: الأخ محمد عبدالمطلب سلام .. ماشاء الله ....والف مبروك يارجل . مررت بنفس التجربة في منطقة كافوري لجمال المنزل ناس التلفزيون مرة جو مارين بالمنطقة وعملوا لقاء مع والدتي وقاموا صوروا البيت كلو ....الشكر لله سبحانه وتعالى .... بالمثابرة والاجتهاد كلو شئ بيتم . أمنياتنا للجميع بالتوفيق ....

أخونا الأمير جداً رضا :

سلام وتحية ومحبة وإحترام.

تسلم ياخي , ومبروك بيت كافوري وبالعافية إن شاء الله.

والأمنيات الصادقة أيضاً لك وللجميع بالتوفيق دائماً.

Quote: الف مبروك الفيلا وحمدلله علي السلامة.

ياسر مصظفى ...

تحية وسلام.

الله يبارك فيك يا حبيب.

وقفت كتير جداً على عبارتك القلت
فيها : (حمد لله على السلامة) عبارة
مختصرة جواها معاني كتيرة ومليانة.

فعلاً شكلك عايش معاناة البنيان وعارف
خباياها.

الأخ محمد عبدالمطلب

أحذر من سماسرة الأراضي ...حايجوا جاريين ويغروك أن تبيع .
أنا عملوا معاي نفس الشئ آخر اغراءات ومبالغ خرافية يسيل لها
اللعاب .ولكن صمدت ولدرجة انو كنت عاوز أكتب يافطة كبيرة
( أحذر هذا المنزل غير معروض للبيع ) ...

تحياتي

الف مبروك


اعمل لينا حفلة كبيرة مشتهين لينا (حت صاح

Quote: ( أحذر هذا المنزل غير معروض للبيع ) ...

يا رضا "امك تبيع؟"

Quote: يا رضا "امك تبيع؟"

الأخت منال

سلام ..

حكاية " تبيع " دي بتجيب لي نفسيات عديل ...
كان فيها شد وجذب ولكن الحمدلله تجاوزتها ..

تحياتي ..

أولا ألف مبروك وتمنياتي بإقامه سعيده
ثانيا الفيلا هي الفيها النجيله واللا القداما واللا الطويله الهناك ديك ؟؟؟

هذه الفيلا بنيت بعرق جبين احدى الشرفاء
الذي لم يسرق مليماُ واحد من قوت هذا الشعب
فلا تقدح في مجهود هذاالمواطن الشريف

الف مبروك
نشد من ازركم
ونحن من خلفكم علي الدرب سائرون

الا بس نفسنا انقطع

مبروك ... تسكن فيها بالعافية

ربنا يديك خيرها ويبعد منك شرّها

وتعيش فيها سعيد بصحة وعافية


وعقبال كل ساعي للرزق بالحلال

الف مبروك

وقروشك ما وقعت واطة

الفيلا مبرووووووووووووووووووووووكه

بس مالك داير تقلب علينا مواجع البناء تاني

محمد

بسم الله ما شاء الله

حرستك بالخرسانة من عين ناس السجانه

وبخرتك بالفولاذ من عين الجاز والانقاذ

ويخت ليك في يمينك شذاذ افاق وفي شمالك شذاذ افاق
من عين كل والي أفاق

وبي امشير وطوبه من كل معطوبة

شاحد ربي عليك يديك الاسمنت بالطن ويكفيك شر قشرة المحن

اكيد امك داعيه ليك

بنيان تمام

يا سلام

ماشاء اللة
ولاحول ولا قوة
الا باللة
الف الف مبروك
بس عايزنك تكتب
لنا عن معاناتك
اثناء التشطيب
لقد مررت بهذة
التجربة القاسة
قبلك
خرجت منها بسكرى
بس نحمد اللة
على كل شى

ياسلام ياسلام ياسلام
لاغم انها جات متاخره التهاني ياولدنا
ربنا يديك خيرها وكيفيك شرها
..
.
.
تحياتنا للاسره يا محمد

ماشاءالله ... الف مبرووك يا زول .. و الله دا انجاز ما ساهل و شغل رائع و كمان الحديقة جميلة و راايقة

تقول لي هونولولو!(:

بسم الله ماشاء الله ..

بيت السعادة ..

عمر مديد وهانىء ... قادر اتخيل والله حجم المعاناة ..

ربنا يزيدك ..

العاطي حي لا يموت

ما شاء الله وتبارك الله
الصلاة على النبي
مبروك والله يجعله دار خير وبركة
وعامراً وارزق اهله من الثمرات
يا ولدي ما في داعي للتفاصيل
العين قوي
امشي اعمل كرامتك وفرح اهلك

مالى لا أرى الهدهد الهباني ؟!!!!

طيب الزول ده يشركوا ليهو كيف اكتر من كده ؟!!!

ربنا يجعلها ليك ولزريتك بركة ..


تحياتي ،،

الف مبرووووووووووووووووووووك
وتسكن فيها بي العافية والزيادة

ألف مبروك وأسأل الله أن يبنى لك داراً فى الحنة ..وهذه من أسباب السعادة فى الدنيا ونسأل الله أن يكملها لك ويمتعك بالصحة والعافية وتسعد بها.

الراجل قالو عندو قروش وسأل المقاول قال ليهو أصعب شىء فى البنيان شنو؟؟قال ليهو التشطيب..قال ليهو خلاص أبتدى لى بيهو.

تقديرى وإحترامى.

لف مبروك وشعور امتلاك مسكن مريح وجميل شعور لايوصف وراحة نفسية كبيرة..في انتظار الوصايا الخمسة لبناء مسكن من دون الاصابة( بالدغت)

الف مبرررررررررررررررروك يا ابوحميد

وحمدالله على السلامة

الف مبروووووك وحمد الله على السلامه

ما شاء الله تبارك الله والف مبروك
العمل والعمالة في السودان امر شاق كتبت عنه في احدى مذكراتي:

Quote: نعود للعمل والعمالة السودانية: الكثير من المقاولين وأصحاب الشركات يشتكون من تدني إنتاجية العامل السوداني مقارنة بالجنسيات الأخرى ، في الخليج رأيت عمال السراميك ينسجون الأرض مد البصر بالسراميك في لحظات ، منهم الباكستاني والهندي والتركي وكل واحد أجود واسرع وأرخص من الآخر ، لا يسألك عن مصاريف وحق فطور ، ولا يحادثك قبل تمام العمل ، ينجز ما تطلبه منه كما هو ويزيد من الإبداع ، وفوق كل ذلك الإنضباط المنقطع النظير في موعده. في السودان شأن في الفطر وشأن في الصوم ، في الفطر نصف اليوم فطور وشاي والباقي يا عم حق العصير ، أما في رمضان فشأن غريب ، طبعا أول يوم كلهم مصدعين ، وكلهم تعبانين ، الحضور في العاشرة صباحا ، ويبدأ العمل بعد ساعة من الحضور لزوم تحضير الملابس والمعدات وإعادة تقييم العمل والتأكد من توفر المواد ، ولاحظ التأكد من توفر المواد قبل بدأ العمل بثوان ، ليتصل عليك مخبرا بعدم وجود أسمنت أو رملة ، حسنا يا أخي لماذا لم تخبر عن هذا النقص من الأمس ؟؟؟ لماذا لا تقييم المواد يوميا وتطلب ما تريد قبل زمن كاف ؟؟؟ كل هذا لا يحدث لأن التخطيط من عمل الشيطان وضرب من علم الغيب والنبش في ما لا نقدر عليه ، ثم انها فرصة للنوم حتى حضور المواد والتى هي بدورها تتطلب وقتا قاتلا من البحث والتقصي فكل شئ في رمضان عسير ، والكل عينه على السرير . رأيت مجموعة من العمال نائمون في اول يوم من رمضان ، العدد الكلي للنائمين يفوق الخمسة عشرة ، علما بأن المنظر في الشارع العام وليس داخل حوش او سور . ماذا بقى من النهار لو نمنا حتى الحادية عشرة صباحا ، علما بأن مثل هذا النائم يحتاج لساعة أخرى حتى يغادر السرير ؟؟؟ هل شرع رمضان للعبادة ام للنوم والكسل والخمول ؟؟؟ كيف يعتبر نفسه صائما من يقضي جل يومه نائما ؟؟؟ النبي الكريم وصحابته كانوا يقضون نهارهم تلاوة وعبادة وليلهم تهجدا وسجودا و لم يعرفوا مثل هذا الخمول . كانت أغلب غزوات المسلمين وإنتصاراتهم في رمضان ولم يعرفوا لهذا الثبات طريقا . كيف تنهض أمة تنوم نصف اليوم وتقضى النصف الآخر في التخبط وسوء التخطيط ؟؟؟

مبروك يا محمد والله سعيد انه القى زول اتخلص من الهاجس الاكبر الزمن دا

ربنا يجعله منزل مبارك ويجعله دار رحمه وبركة وكرم وإن شاء الله يديك العافية ونزوك فيه

تجربة كلنا خايفيين منها ؟؟؟ قطعنا ربعها بالارض الباقي المعمعه بتاعت البنيان الخايفين منها سنين وعاوزة ربط احزمه ودين وشحده الواحد يكتفي ليه بي بيت صغير كدا ودا أظن الباقين عليه لكن شغله طوب واسمنت ومماطله دا ما عاجبني فكرت في حكاية البيوت الجاهزة لكن برضه مكلفه والمهندسين نصحوني ابعد منها
خليني استغل بوستك واطل النصيحة والافكار من اصحاب التجارب والمهندسين يساعدوني كيف ابني بيت صغير بي أقل تكلفه

مبروك .

مبروك البيت يا محمد وربنا يجعله منزل مبروك

موضوع البيت بكون هم كبير ومشروع العمر للمغترب والمهاجر لكن الواحد وبعد كل الشقاء والتعب والحرمان حتي يبني البيت للأسف يواصل في غربته ولا يجد الوقت للإستمتاع ببيته

فيصبح البيت مجرد مشروع إيجار وزيادة دخل ويستمتع به شخص آخر هذا إذا لم يتسلبط فيهو زول من الأقارب وسكن فيهو ملح بينما المغترب الشقيان لا يزال هو وأولاده محشورين في شقة ضيقة في إحدي المنافي.

لكن نصيحة ليك وكل المتغربين في مشارق الأرض ومغاربها الواحد يجد الوقت ليستمتع بمشروع عمره . طبعا صعب الزول يقول للناس بعد ما تبني البيت أرجع وأستقر (خاصة لو صرف الوراهو والقدامو علي البيت) لأنو بيت زي دا بتترتب عليهو مصاريف شهرية باهظة وفي نفس الوقت أصعب منها الزول يبني البيت وما يقدر يستمتع بيهو.

نسأل الله أن تنصلح أحوال البلد ويعود الناس يستقروا ويتهنوا وسط أهلهم وفي بلدهم

ألف مبروك
ونتمنى لك طيب الاقامة فيها

Quote: مبروك البيت يا محمد وربنا يجعله منزل مبروك

Quote: إقتنعت تماماً أنه موضوع البنيان حاجة , والتشطيب حاجة تانية خااااااالص!!!

>>
اولا مبروك إكمال البيت يا محمد.. ونا في شك ان الفيلا جميلة بالجد وبتشبة الفلل البنشوفها في الأفلام السينمائية.. ونقول ليك ما شاء الله وتبارك الله..
ثانيا فسر لينا الموضوع الفوق ده قاصد بيه شنو؟ يعني التشطيب بيكلف أكثر من البنيان نفسه ولا شنو؟؟ لأنه في واحد من اقربائي في السودان نصحني اشتري بيت مبني جاهز بدل ما اشتري قطعة ارض وابنيها لأن البنيان والتشطيب غالي جدا.. وانا عندي قطعة ارض في المعمورة مساحتها 300 متر مربع فقط ولكن واقعة بن جيران من مليارديرات السودان ...والله صحي!!

وبعدين نحن ما بنعتبرك برجوازي اذا انت بنيت الفيلا بعرقك وجهدك وتكون مغترب وكفحت في الغربة سنين عددا... ولكن اذا كنت شغال في السودان طوالي حنسألك:" من اين لك هذا"

ومرة ثانية نقول ليك مبروك والله يديك العافية

[حذف للتكرار)

مبروك الفيلا يا هونولولو ..!!

وأرجو أن يتم إفتتاحها على انغام مدائح الجيلي الصافي ودلوكة أخونا عوض كبوشية ..


وعن التشطيب ومشاكله فقد تحدثت عنه وعن أسبابه بالتفصيل في هذا المقال :


المنافسة على سوق العمل بين العمالة المصرية والسودانية .. من سيربح ؟؟!!

يا ناذر قرأت موضوع المنافسة على سوق العمل..." ولكن يبدو ان الموضوع ما كان منشور في المنبر العام هنا ومنشور في احدى الصحف وحاولت ان ان انقله هنا عن طريق (الكوبي اند بيست) ولكني فشلت فشلا ذريعا ... ويا ريت تنقله لينا هنا.. لأنه موضوع جيد بل ممتاز.. والله يديك العافية

الف مبروك يامحمد

Quote: مالى لا أرى الهدهد الهباني ؟!!!! طيب الزول ده يشركوا ليهو كيف اكتر من كده ؟!!! ربنا يجعلها ليك ولزريتك بركة .. تحياتي ،،

يا شياب سلام,,
جاييكم واحد واحد والله , بس عليكم الله خلوني أرد لي ود القاضي ده
وأخرب الترتيب.


ههههههه.

إنت مفروض من الليلة تغير إسمك لي فايز ود قاضي وقارئ فنجان.

يمين تجيب لي الشحط ده هنا , نص الفيلا دي ليك , والنص التاني ليك
فيه خمسين في المية من إيجارها.

أغنى أغنى يا حبيب.

تحياتي وإحترامات وتشكر على الكلام الجميل!!!

Quote: الأخ محمد عبدالمطلب أحذر من سماسرة الأراضي ...حايجوا جاريين ويغروك أن تبيع . أنا عملوا معاي نفس الشئ آخر اغراءات ومبالغ خرافية يسيل لها اللعاب .ولكن صمدت ولدرجة انو كنت عاوز أكتب يافطة كبيرة ( أحذر هذا المنزل غير معروض للبيع ) ... تحياتي

حبيبنا رضا,,,
سلام وتحية,,,,,


السماسرة ديل أخوك طبعاً خبير في فن التعامل معاهم من أيام المحاماة
والجرجرة , والله قصة يافطتك دي فعلاً تدعو للضحك والحزن
في آن واحد, حقو تضيف لليافطة : أحذر هذا المنزل غير معروض
للبيع , يوجد كـــلـــب وأسدين بالداخل وبتاع ضرايب.

تسلم على التحايا يا رضا.

Quote: الف مبروك اعمل لينا حفلة كبيرة مشتهين لينا (حت صاح

الله يبارك فيك وتحية وتقدير,,,

رقيص تااااني؟ والله تاني ما أظنك ترجع النهود بي هين!!!

بالله لو لابد من الهشتكة فيا حبذا لو كانت : إبرة ودرت , وبالعدم

كتاحة خستقت!!

ويييييييييييييو!!!

Quote: أولا ألف مبروك وتمنياتي بإقامه سعيده ثانيا الفيلا هي الفيها النجيله واللا القداما واللا الطويله الهناك ديك ؟؟؟

تحياتي يا دوك
وتسلم على المباركة.

إنت كلك نظر ومفهومية يا دوك.

Quote: هذه الفيلا بنيت بعرق جبين احدى الشرفاء

والله التقسيمات العجيبة دي تحير السمبر ظاااطو , شنو شرفاء وما شرفاء , ياخي
كل إبن آدم شريف ياخي , والإنت شايفه شريف ده في غيرك ممكن يخالفك الرأي.



على العموم : الله يبارك فيك ياخي.

Quote: الف مبروك نشد من ازركم ونحن من خلفكم علي الدرب سائرون الا بس نفسنا انقطع

سلام يازنجي يا أمير,,,

تسلم على المؤازرة , أكيد ما بتقصر والله , وإن شاء الله تقصر الدروب
وتصل للمنى , وربنا ما يقطع نفس , أكيد حتصل , أنا متأكد من كده!!!

فعلاً وصفك جميل : درب فعلاً!!!

Quote: مبروك ... تسكن فيها بالعافية ربنا يديك خيرها ويبعد منك شرّها وتعيش فيها سعيد بصحة وعافية وعقبال كل ساعي للرزق بالحلال

يا سلام عليك يا هاني اخي ,,,

والله دعاء بليغ كلنا في أمس الحاجة ليه اليوم وكل يوم.

شكراً يا هاني.

منزل مبارك بإذن الله

ربنا يديك خيرو وخير جيرانو

ما شاء الله

الف مبروك يا اخي
اسأل الله ان يسعدكم فيها - يمد و يبارك في اعماركم



الواحد الحاجات السمحة دي بحبها لله كده

ما شاء الله تبارك الله مبروكه عليك وعلي ناس بيتك

وتسكنو فيها بالعافية والسلامة واما بنعمة ربك فحدث

ويكيفيكم شر العين ومن شر حاسدا اذا حسد

واما بنعمة ربك فحدث
بارك الله في جهدك وسكنك ورزقك الجيران الطيبين

سلام اميرة ..

المقال قديم قبل ثلاثة او اربعة أعوام تقريبا وقد نشرته حينها في هذا المنبر وبعد ذلك نشرته في عدة صحف وتناقلته عدة منابر الكترونية لأهميته ..

وهذا هو رابط النشر في المنبر :

المنافسة على سوق العمل في مجال البناء بين العمالة...ية ، من سيربح السوق؟

Quote: الف مبرووووووووووووووووووووك وتسكن فيها بي العافية والزيادة

الله يبارك فيك يا أستاذنا , كلك ذوق والله , وشكراً
على الدعوات الصادقة.


تسلم.

Quote: الف مبروك وقروشك ما وقعت واطة

الله يبارك فيك يا أستاذ , كلام جميل وعبارة مليانة.

سلامي وتحياتي!!!

Quote: الفيلا مبرووووووووووووووووووووووكه بس مالك داير تقلب علينا مواجع البناء تاني

الله يبارك فيك يا إستاذه , فعلاً مواجع والله , صدقتي وإني على
ذلك لمن الشاهدين.

شاكر جداً.

Quote: محمد بسم الله ما شاء الله حرستك بالخرسانة من عين ناس السجانه وبخرتك بالفولاذ من عين الجاز والانقاذ ويخت ليك في يمينك شذاذ افاق وفي شمالك شذاذ افاق من عين كل والي أفاق وبي امشير وطوبه من كل معطوبة شاحد ربي عليك يديك الاسمنت بالطن ويكفيك شر قشرة المحن اكيد امك داعيه ليك بنيان تمام يا سلام

سلام يا محمد,,,

أيوة كده ياخي , دعوة كاااربة لكن , أسمنت بالطن
دي عجبتني شديد والله.

تمام والله.

شكراً ليك يا أستاذ.

Quote: ماشاء اللة ولاحول ولا قوة الا باللة الف الف مبروك بس عايزنك تكتب لنا عن معاناتك اثناء التشطيب لقد مررت بهذة التجربة القاسة قبلك خرجت منها بسكرى بس نحمد اللة على كل شى

نصرالدين طه,,,,

تسلم من كل عين يا رب , الله يعوضك خير على صبرك والحمدلله من
قبل ومن بعد , المعاناة تحتاج كلام كثير وإن شاء الله دي تكون فرصة
لتبادل التجارب لفائدة السائرين في نفس الدرب!!

شكراً.

سلام يا محمد عبد المطلب،

يا محمد مثابرة في شنو؟!
يا جماعة محمد عبد المطلب دا موش كوز في سودانيز أون لاين
وللأ أنا غلطان؟!

أفيدونا أفادكم الله

علشان نعرف مثابرة في شنو؟

Quote: ياسلام ياسلام ياسلام لاغم انها جات متاخره التهاني ياولدنا ربنا يديك خيرها وكيفيك شرها .. . . تحياتنا للاسره يا محمد

يا سلام عليك إنت يا وليد,,

ولا يهمك يا حبيب المهم إنك هنا , تسلم يا وليد والتحايا للمعاك كلهم وللأعزاء
بالسودان , الزين , عيسى , عزالدين , وسيف اليزل , ولجميع الأهل والأصدقاء.

Quote: ماشاءالله ... الف مبرووك يا زول .. و الله دا انجاز ما ساهل و شغل رائع و كمان الحديقة جميلة و راايقة تقول لي هونولولو!(:

تسلم يا حبيبنا , والله جميل وجودك معانا هنا يا حبيب , وصدقني
لو شفت هونولولو مرة تمنى تاني تشوفها مرة , هي ساحرة المدائن
وفاتنة شواطئ الكون ويالها من لحظات إذا ما أسعدك الحظ وتجولت
ذات مساء على شواطئ "واكيكي بيتش" أو في شارع "كاميها ميها"
المعطر بجمال الطبيعة وألقها الأخاذ.

هونولولو غير.

شكراً يا مازن.

Quote: بسم الله ماشاء الله .. بيت السعادة .. عمر مديد وهانىء ... قادر اتخيل والله حجم المعاناة .. ربنا يزيدك

يا سلالالام عليك يا الشاذلي ياخ , أحلى دعوة , وكم هو
جميل أن تشعر بمعاناة الغير , هي من أكبر القيم الإنسانية
ومعناها السامي.

سلمت وحفظ الله.

Quote: العاطي حي لا يموت

ونعم بالله , صدقت والله صدقت.

Quote: ما شاء الله وتبارك الله الصلاة على النبي مبروك والله يجعله دار خير وبركة وعامراً وارزق اهله من الثمرات يا ولدي ما في داعي للتفاصيل العين قوي امشي اعمل كرامتك وفرح اهلك

أوووووو حمزاوي ,,,

مسكاقمي ياخي.

على العين والراس دايماً كلامك.

الله يبارك فيك.

Quote: الراجل قالو عندو قروش وسأل المقاول قال ليهو أصعب شىء فى البنيان شنو؟؟قال ليهو التشطيب..قال ليهو خلاص أبتدى لى بيهو. تقديرى وإحترامى.

الله , والله تفتيحة لكن عمك , ياها "أزقف" على كده زاتها , والله
فعلاً الراجل نظرته بعيدة , لكن لابد مما ليس منه بد.

تسلم يا حبيب ودائماً سعيد بوجود هنا.

تحياتي وعميق شكري!!!

Quote: الف مبروك وشعور امتلاك مسكن مريح وجميل شعور لايوصف وراحة نفسية كبيرة..في انتظار الوصايا الخمسة لبناء مسكن من دون الاصابة( بالدغت)

فعلاً يا حبيب شعور جميل جداً , وأول الوصايا الخمسة : لازم يكون
معاك ديب ديب ديب فريزر في كل الأوقات عشان تحفظ فيها أعصابك
كل ثانيتن وتشيلها تاني , وتاني حاجة : لازم تعمل كل حاجة بي نفسك
مهما كانت التضحيات.

Quote: الف مبرررررررررررررررروك يا ابوحميد وحمدالله على السلامة

أوووووه حبيبنا حسن سنادة,,


وين أراضيك يا رجل؟ الله يبارك فيك يا حبيب , كنت
متأكد إنك حتشرفنا بي طلتك يا حبيب.


لكن عندي سؤال طفاشي كده ليك إنت وحبيبنا هارون دياب : -










ياسين ده مالو؟
ههههه!!!

Quote: الف مبروووووك وحمد الله على السلامه

الله يبارك فيك يا شيخ الدين.

فعلاً سلامة بحق.

شكراً جزيلاً.

Quote: ما شاء الله تبارك الله والف مبروك العمل والعمالة في السودان امر شاق كتبت عنه في احدى مذكراتي:

تسلم يا محمود , فعلاً المسألة بالغة التعقيد والصعوبة , بصفة خاصة في
أمر المواعيد ودقة التنفيذ.

الله يكون في العون.

Quote: مبروك يا محمد والله سعيد انه القى زول اتخلص من الهاجس الاكبر الزمن دا ربنا يجعله منزل مبارك ويجعله دار رحمه وبركة وكرم وإن شاء الله يديك العافية ونزوك فيه تجربة كلنا خايفيين منها ؟؟؟ قطعنا ربعها بالارض الباقي المعمعه بتاعت البنيان الخايفين منها سنين وعاوزة ربط احزمه ودين وشحده الواحد يكتفي ليه بي بيت صغير كدا ودا أظن الباقين عليه لكن شغله طوب واسمنت ومماطله دا ما عاجبني فكرت في حكاية البيوت الجاهزة لكن برضه مكلفه والمهندسين نصحوني ابعد منها خليني استغل بوستك واطل النصيحة والافكار من اصحاب التجارب والمهندسين يساعدوني كيف ابني بيت صغير بي أقل تكلفه

تسلم يا عبد العزيز,,,

فعلاً تجربة كبيرة جداً وشاقة ولكنها ليست مستحيلة , أبدأ يا عبد العزيز شوية شوية , والبداية بتكون بي أول قروش توفرها طوالي إشترى بيها قطعة (عارفك إشتريت القطعة) وأرجع إشتغل ولم قروشك ولما ترجع تاني تبيع ديك وعلى قروشك المعاك تبدأ طوالي بدون تردد , صدقني حتلقى الطريقة دي مشجعة جداً لأنه حتشوف إنجاز قدامك وشوط إتقطع وبعد داك بتقدر تعمل الباقي , بس المهم في الأول تكسر حاجز الخوف والرهبة بالطريقة دي.


موفق يا حبيب.

وشكراً ليك با عبد العزيز على المباركة.

Quote: مبروك .

الله يبارك فيك يا حبيب.

شاكر جداً والله.

Quote: مبروك البيت يا محمد وربنا يجعله منزل مبروك موضوع البيت بكون هم كبير ومشروع العمر للمغترب والمهاجر لكن الواحد وبعد كل الشقاء والتعب والحرمان حتي يبني البيت للأسف يواصل في غربته ولا يجد الوقت للإستمتاع ببيته

الله يبارك فيك يا أسامة ويسعدك,,,

حقيقة فعلاً كل ما ذكرته , خاصة لينا كسودانيين موزعين بين هم الإلتزامات الكبيرة , وبين تحقيق الطموحات الشخصية وبين هذا وذاك يتسرب العمر من بين الأيادي لتكون المحصلة أن يحمل المغترب على آلة حدباء دون أن يقضى يوماً واحداً في منزل أحلامه , فعلاً شعور قاسي جداً وقصص نسمعها كل يوم , والسعيد من إتعظ بغيره.

والحمدلله على كل حال.

شكراً يا أسامه.

Quote: ألف مبروك ونتمنى لك طيب الاقامة فيها

آمييين يا رب.

الله يبارك فيك يا أستاذ ويسعدك إنت برضو ويحقق كل الأمنبات.

Quote: مبروك البيت يا محمد وربنا يجعله منزل مبروك

شكراً يا ود خيري يا مزمل , وعقبالك لو لسه في السكة يا حبيب.

تسلم.

Quote: >> اولا مبروك إكمال البيت يا محمد.. لأن البنيان والتشطيب غالي جدا!!

الله يبارك فيك يا أميرة ,,,


فعلاً قريبك نصحك نصيحة غالية جداً بشأن التشطيب وصعوبته , أما مسألة شراء منزل جاهز فــ It depends يعني مرات فعلاً بتكون في بيوت "لقطة" بس عايزه كاش جاهز في التو واللحظة ودي فعلاً حاجة بتحصل وعايزه شوية شغل بتاع إتصالات مستمرة بالسودان مثلاً بالزملاء المحامين البيكونوا في المحاكم بإستمرار وعلى إطلاع على لوحة إعلانات المحكمة بشأن العقارات المراد بيعها في مزادات وممكن جداً يقدموا ليكي معلومات قيمة جداً تحل ليكي المشكلة من أساسها.

Quote: . وانا عندي قطعة ارض في المعمورة مساحتها 300 متر مربع فقط ولكن واقعة بن جيران من مليارديرات السودان ...والله صحي!!

إنت قاصداني إنا مش؟

ههههه.

قطعتك بتاعة المعمورة نصيحتي خالص خالص ما تبيعها مهما كانت الظروف , ثانياً لو قررتي تبنيها عليك بالخطة الستية "ست سنوات" كالآتي :

السنتين الأوائل : تشتغل وتلمي الضورراررات وتمشي السودان وتشتري قطعة أو قطعتين , السنتين التاليات تشتغلي "دبل شفت" وتشيلي الضورررارات وتمشي تبيعي القطعتين ديلاك وتشتري قطعة غاااالية , والسنتين الأخيراات تشتغلي دبل شفت مع سياسة تقشفية حادة وقاسة جداً , وتوقفي أي رسيل بتاع قروش للسودان وتسكني مع قروب (زي ستة لي سبعة تنفار كده) وتوقفي النت والتلفون وتبيعي عربيتك السمحة وتشتري هكرة وتوفري الفرق , ومافي أي شوبينق بتاع هدوم ولاجزم ,ولا مكياج ولا أي حاجة تانية مدة سنتين وتشيلي ضووووراراتك وتتوكلي على البنيات وفي ستة شهور فيلتك تقول يا ليل. يعني القصة دي كلها راس مالها ست سنوات وستة أشهر فقط لا غير.

ما تنسي تعزمينا للكرامة.

شكراً أميرة على المباركة.

Quote: مبروك الفيلا يا هونولولو ..!! وأرجو أن يتم إفتتاحها على انغام مدائح الجيلي الصافي ودلوكة أخونا عوض كبوشية .. وعن التشطيب ومشاكله فقد تحدثت عنه وعن أسبابه بالتفصيل في هذا المقال :

أوووووو أبو النيز يا عزيز و وينك يا أمير؟

شكراً على التهنئة , والجماعة الفوق ديل من بودراب وين بالله؟

بوست التشطيب ده بجيهو بي مززززاج كده ونشوف الفيهو.

يا أبو النيز : ياخي ما منتظرين باقي صور بيت الشقلة ياخي.

سلامي.

Quote: سلام يا محمد عبد المطلب، يا محمد مثابرة في شنو؟! يا جماعة محمد عبد المطلب دا موش كوز في سودانيز أون لاين وللأ أنا غلطان؟! أفيدونا أفادكم الله علشان نعرف مثابرة في شنو؟

وعليكم السلام يا النذير يا حجازي.

ـــــــــــــــــــ

المداخلة الجاية لي العفن : ياسر طيفور :

إنت يا ياسر بقيت تفك فاراتك ودقوساتك لي في بوستاتي
ولاشنو يعني؟ حقار إنت لكن يا عمك , لو أصلاً ما بتقدر
تنجض شغلك سلم باسوووردك ده وشوف ليك شغلة تانية.

البورد ده بقى فوضى الظاهر!!!!

Quote: الف مبروك يامحمد

أووووه هارون يا عجيب ياخي,,

والله الكلمتين ديل بالدنيا يا حبيب , تسلم ياخي وتحياتي للمريخابية
الصاقعة أمنية برضو , ومدعويين لي رحلة سياحية لي هونولولو/ هاواي.


سألتك قبيل مع حبينا سنادة سؤال طفاشي كده :
.
.
.
.
.
.
.
ياسين ده مالو ياخي؟؟

Quote: منزل مبارك بإذن الله ربنا يديك خيرو وخير جيرانو

الله يبارك فيك يا عماد حسين :

فعلاً الجار قبل الدار.

شكراً.

ونواصل................

Quote: السنتين الأوائل : تشتغل وتلمي الضورراررات وتمشي السودان وتشتري قطعة أو قطعتين , السنتين التاليات تشتغلي "دبل شفت" وتشيلي الضورررارات وتمشي تبيعي القطعتين ديلاك وتشتري قطعة غاااالية , والسنتين الأخيراات تشتغلي دبل شفت مع سياسة تقشفية حادة وقاسة جداً , وتوقفي أي رسيل بتاع قروش للسودان وتسكني مع قروب (زي ستة لي سبعة تنفار كده) وتوقفي النت والتلفون وتبيعي عربيتك السمحة وتشتري هكرة وتوفري الفرق , ومافي أي شوبينق بتاع هدوم ولاجزم ,ولا مكياج ولا أي حاجة تانية مدة سنتين وتشيلي ضووووراراتك وتتوكلي على البنيات وفي ستة شهور فيلتك تقول يا ليل. يعني القصة دي كلها راس مالها ست سنوات وستة أشهر فقط لا غير.

,,,,,,,,,,,,,,,,
بالله يا محمد البنيان صعب كده في السودان،،، هسع انا مفتكرة انك عاوزني ابني بيت بحديقة في قلب منهاتن في نيويورك محل بيبيعوا قطعة الأرض بالبوصة ومش بالمتر...يعني اذا وقفت النت والتلفون وبعت العربية ووقفت الشوبنق .. حنعيش كيفن يعني؟؟ وكمان خطة ستية ( ست سنوات) وما ثلاثية...
وفعلا اذا البنيان بالصعوبة دي لازم نبارك ليك مرة ثانية وثالثة وانت تستاهل جائزة نوبل للسلام والرخاء ما دام استطعت ان تنجز هذا الانجاز الهائل وان شاء الله الله يديك خير هذا الصرح الجميل ويكفيك اي شر ... والله يديك العافية

Quote: بالله يا محمد البنيان صعب كده في السودان،

يا أميرة,,,

البنيان مكلف شديد , لكن غالبية الناس بتجي من برة بتكون شغالة بتاخد بالدولار , ودخلها في نفس الوقت عالي , فلو ده بنطبق على أي زول , البنيان ببقى في منتهى السهولة , يعني ما صعب للدرجة القلتها ليك فوق دي , بس أنا زدتها حبة دراما من عندي ساكت , فما تشيلي هم.

Quote: ما شاء الله الف مبروك يا اخي اسأل الله ان يسعدكم فيها - يمد و يبارك في اعماركم الواحد الحاجات السمحة دي بحبها لله كده

حامد برقو,,,,

الله يبارك فيك يا حبيب.

شكراً على المرور والمباركة.

انا عارفة الحاصل كله يا محمد .. واخوي لمن تم البيت عاوز يبكي من الفرحة... وانا كتبت كلامي بس نسيت ارسم وجه ضاحك بين قوسين) عشان تعرفوا ان كلامي كان هظار ساكت.. وانا كل اجازة بمشي السودان ولمن اشوف ناطحات السحاب استغرب واقول الناس دي بتجيب القروش دي كلها من وين؟؟؟ وبصراحة شفت بيوت في الخرطوم وامدرمان مافي زيها في امريكا..
والحمد لله انا دخلي بالدولار الأمريكي الأخضر الصحي صحي والقال عنها عمر البشير ان الدولار في امريكا طباعتها ما بتكلف اي شئ... وعندي طبعا عروض مغرية من جيراني المليارديرات عشان يشتروا قطعتي الصغيرة دي عشان يعملوها حديقة لبيتهم الكبير... واحتمال افكر في العروض المغرية دي في المستقبل ان شاء الله
والله يديك العافية

الأخ الحبيب محمد
ألف مبروك المنزل ، أسأل المولى عز وجل يسعدك والأسرة فيه

ماشاء الله

الف مبرووووك

فتح الله لكم فيه ابواب الخير ... وجعله الله من منازل الصالحين

وكفاكم همزات الشياطين .. وعيون الحاسدين

جعل الله عماده الذكر والعبادة .. ومفاتيحه الرزق والسعادة

وعتبته البركة والزيادة

عالم غتيتة

تبني وما تكلمنا

الاستشارة كانت بلاش يا محمد


مبروك

Quote: ما شاء الله تبارك الله مبروكه عليك وعلي ناس بيتك وتسكنو فيها بالعافية والسلامة واما بنعمة ربك فحدث ويكيفيكم شر العين ومن شر حاسدا اذا حسد

تسلمي يا ستي,,,

وعاجز عن الشكر والله , جميلة دعوتك وربنا يحقق كل
أمنياتك , وأمنيات الصحة والعافية لك ولأسرتك وللجميع.

شكراً كتير , وسعيد بوجودك هنا جداً.

Quote: واما بنعمة ربك فحدث بارك الله في جهدك وسكنك ورزقك الجيران الطيبين

الله يبارك فيك يا حبيب وشاكر على الدعوات الصادقة.

ألف شكر وتحية , وفعلاً الجار قبل الدار.

Quote: الأخ الحبيب محمد ألف مبروك المنزل ، أسأل المولى عز وجل يسعدك والأسرة فيه

العزيز جداً المهذب : جعفر إسماعيل

ألله يبارك فيك ويهنيك يا أستاذ , عاجز عن الشكر ورينا يمتعك بالصحة والعافية وتحياتي لأسرتك الكريمة.


سلام.

Quote: ماشاء الله الف مبرووووك فتح الله لكم فيه ابواب الخير ... وجعله الله من منازل الصالحين وكفاكم همزات الشياطين .. وعيون الحاسدين جعل الله عماده الذكر والعبادة .. ومفاتيحه الرزق والسعادة وعتبته البركة والزيادة

يا سلالالالام عليك يا عاطف ,, والله كلام يشرح الصدر ويبعث
في النفس الراحة والطمأنيية , والله ما عارف أقول ليك شكراً كيف.


تسلم يا حبيب , وبالله كتر لينا من هذه الأدعية الجميلة والمؤثرة جداً

سلام.

Quote: انا عارفة الحاصل كله يا محمد .. واخوي لمن تم البيت عاوز يبكي من الفرحة... . ... وعندي طبعا عروض مغرية من جيراني المليارديرات عشان يشتروا قطعتي الصغيرة دي عشان يعملوها حديقة لبيتهم الكبير... واحتمال افكر في العروض المغرية دي في المستقبل ان شاء الله والله يديك العافية

ههههههه.

تمام والله يا أميرة ومبروك ليه وعقبالك يارب.

بالله لو فكرتي في العروض دي فأهل البورد
أولى بقطع أهلها , قولي لينا عوووووووك
وما تخاف حتاخدي نفس السعر العارضنوا ليكي.

Quote: عالم غتيتة تبني وما تكلمنا الاستشارة كانت بلاش يا محمد مبروك

هههههههه,,,

أوووو أبو الخل يا رائع,,,,

شفت الغتاتة دي بالله كيف؟ لكن أقول ليك حاجة ما حتصدقها يا خليل : إنا فعلاً
إستشرتك لكن شكك نسيت , لو متذكر موضوع التلفون داك؟ الموضوع
داك كان جزء رئيس في العملية كلها , لأنه لولا المعلومات القيمة اللي
إتفضلت بيها على يا خليل كنت قبلت العرض واللي إكتشفت بعد معلوماتك
إنه لم يكن بالعرض المناسب.

فحق إستشارتك محفوظ.

بختك يا عم : رزقاً تكوسه , ورزقاً يكوسك.

حظك ده غايتو لو الهلال لقى ربعه كان بقى سعيد.

ههههههه.

ألف مبروك يا محمد .. خبر مفرح والله وما شاءالله تبارك الله
ربنا يحفظ من العين ويبارك .. وعقبال التاني كمان للإستثمار
وكمان عقبال كل البورداب يبنوا و يبقوا جيران وأحباب أو ليتناكفوا
عبر الحيط والحدائق والأبواب ..

وشكرآ للتبس وللمشاركة ولجعلنا في قلب أو جزء من الحدث الخاص

وما شاءالله تبارك الله ..!



.

Quote: ألف مبروك يا محمد .. خبر مفرح والله وما شاءالله تبارك الله ربنا يحفظ من العين ويبارك .. وعقبال التاني كمان للإستثمار وكمان عقبال كل البورداب يبنوا و يبقوا جيران وأحباب أو ليتناكفوا عبر الحيط والحدائق والأبواب .. وشكرآ للتبس وللمشاركة ولجعلنا في قلب أو جزء من الحدث الخاص وما شاءالله تبارك الله ..!

شكراً يا هدير وإن شاء الله دائماً فرحانة ومبسوطة , وآمين يارب للتاني وعقبالك
وعقبال الكل بورداب وقراء وغير البورداب ولكل سوداني خارج وداخل الوطن.

شاكر جداً مشاركتك يا هدير.

الف مبروك الفيلا........وعقبالنا..

Quote: الف مبروك الفيلا........وعقبالنا..

الله يبارك فيكي , عقبالك والجميع.

شكراً.

يا محمد يا أخوي أولا ألف مبروك

وإن شاء الله تتهنا بيهو زي ما بيقول أهلنا

ثانيا بما أنك من ناس بحري وأنا برضو من بحري يا أخي عايز منك خدمة...

عايز لي تلفون سابك تمام بيعرف يتعامل مع الأدوات الصحية الحديثة..

وذو خبرة بالتوصيلات وأعمال التصريف.. لأنو مندوبي له في الخرطوم

أكثر من أسبوعين بيحاول وما قادر يتحصل علي أحد.. ولو لقى واحد يشتغل يوم

ويمشي ونحن فلوسنا جاهزة وكذلك موادنا جاهزة والله حاجة عجيبة جدا

ممكن ترسل لي في ايميلي وهو:
[email protected]
و/ أو
[email protected]

وأكون شاكر على وجه السرعة وجعل الله ذلك في ميزان حسناتك

ألف مبروك يا محمد ..
ربنا يهنيكم بيه ويسعدكم فيه ..

تحياتي ..

Quote: يا محمد يا أخوي أولا ألف مبروك وإن شاء الله تتهنا بيهو زي ما بيقول أهلنا ثانيا بما أنك من ناس بحري وأنا برضو من بحري يا أخي عايز منك خدمة... عايز لي تلفون سابك تمام بيعرف يتعامل مع الأدوات الصحية الحديثة.. وذو خبرة بالتوصيلات وأعمال التصريف.. لأنو مندوبي له في الخرطوم أكثر من أسبوعين بيحاول وما قادر يتحصل علي أحد.. ولو لقى واحد يشتغل يوم ويمشي ونحن فلوسنا جاهزة وكذلك موادنا جاهزة والله حاجة عجيبة جدا

الله يبارك فيك يا كمال , وتسلم وتسلم بحري وناس بحري يا أمير , طلات البحراويين
أكيد محل تقدير كبير وكذلك كل الأخوان.

السباكة فعلاً هاجس كبير جداً يا كمال , وبصراحة عليك بالمصريين المقيمين في الخرطوم
ومتخصصين سباكة , سأوافيك بتفاصيل أكثر على الإيميل قريباً.



سلام وتحية يا بحراوي يا عريق!!

شكراً كمال على المباركة.

Quote: ألف مبروك يا محمد .. ربنا يهنيكم بيه ويسعدكم فيه .. تحياتي ..

يا سلام عليك يا معتصم يا نقي السريرة يا رائع : بجد سعيد جداً
إنك هنا وعاجز عن الشكر على المباركة وعلى تشريفك البوست.

عقبالك يا معتصم وكل أمنياتي لك بالتوفيق في كل خطاك يا أمير.

شكراً كتير يا معتصم يا صاحب الذوق كله.

شكرا يا محمد..

وفي إنتظار المعلومات على أحر من الجمر..

لأنو أيام الإجازة تتأكل

الأخ محمد

ماشاء الله الف مبرووووك وجعله الله من منازل الصالحين.

لكن كلامك عن وايكيكي بيتش ما كان فيهو مبالغة شوية... أنا زرتها قبل سنوات مضت جميلة جدا

لكن شواطئ لوس أنجلوس (سانتا مونيكا بيتش..لونغ بيتش..منهاتن بيتش) هي الأجمل

Quote: الأخ محمد ماشاء الله الف مبرووووك وجعله الله من منازل الصالحين. لكن كلامك عن وايكيكي بيتش ما كان فيهو مبالغة شوية... أنا زرتها قبل سنوات مضت جميلة جدا لكن شواطئ لوس أنجلوس (سانتا مونيكا بيتش..لونغ بيتش..منهاتن بيتش) هي الأجمل

سلام يا شريف نصرالدين,,,

ألله يبارك فيك يا حبيب , شكلك ما مشيت واكيكي بيتش
قريب , على كل حال لوس أنجلوس جميلة لكن زحمتها
خانقة , هههههه. (ما يجونا طايرين ناس لوس إنجلوس).

بختك إنت الشفتهن الإتنين.

تشكر يا حبيب.

Quote: شكرا يا محمد.. وفي إنتظار المعلومات على أحر من الجمر.. لأنو أيام الإجازة تتأكل

تسلم يا كمال,,,
زي ما عارف حال السودان ومواعيده , يومي على إتصال
وكل مرة مواعيد.

Quote: , ثانياً لو قررتي تبنيها عليك بالخطة الستية "ست سنوات" كالآتي : السنتين الأوائل : تشتغل وتلمي الضورراررات وتمشي السودان وتشتري قطعة أو قطعتين , السنتين التاليات تشتغلي "دبل شفت" وتشيلي الضورررارات وتمشي تبيعي القطعتين ديلاك وتشتري قطعة غاااالية , والسنتين الأخيراات تشتغلي دبل شفت مع سياسة تقشفية حادة وقاسة جداً , وتوقفي أي رسيل بتاع قروش للسودان وتسكني مع قروب (زي ستة لي سبعة تنفار كده) وتوقفي النت والتلفون وتبيعي عربيتك السمحة وتشتري هكرة وتوفري الفرق , ومافي أي شوبينق بتاع هدوم ولاجزم ,ولا مكياج ولا أي حاجة تانية مدة سنتين وتشيلي ضووووراراتك وتتوكلي على البنيات وفي ستة شهور فيلتك تقول يا ليل. يعني القصة دي كلها راس مالها ست سنوات وستة أشهر فقط لا غير.

مشكور لتجاوبك ونصائحك لإخوتك المهاجرين

وتعمل فينا معروف

لو حددت الفئات التي يمكن أن تستفيد من هذه الخبرات وهذه النصائح

الواضح أن الخطة الستية أعلاه ربما تخص المبتعثين أو ذوي الرواتب الدولارية كما ذكرت بنتنا أعلاه

ولكن ليس عامة المغتربين ( صابر محمد صابر من بيت أمو للمقابر )

ولأن جهيزة لم تظهر ... وقولها السابق لم يغب عن ظهرانينا

فلماذا لا تجهر بخطبتك عالياً فعسى أن تعود إلينا بقولها القاطع

Quote: مشكور لتجاوبك ونصائحك لإخوتك المهاجرين وتعمل فينا معروف لو حددت الفئات التي يمكن أن تستفيد من هذه الخبرات وهذه النصائح

تسلم يا حبيب ومشكور على المرور , وأكيد الخطة عايزة مصابرة
ومدافرة ومعافرة , والنصائح دي للكل , يمكن للجميع الإستفادة من
الفكرة بصورة عامة فقط قد تتغير المدة من ستية إلى سبعية أو قد
تنقض إلى خمسة ....وإلخ , مع أمنيات التوفيق للجميع.

Up

ماشاء الله

والف الف مبروك

وبالتوفيق والعافية

Quote: ماشاء الله والف الف مبروك وبالتوفيق والعافية

شكراً يا حبيب.


تحياتي

أحسن الواحد يكسر ركبة في الفيلا بتاعته بدل الويلفير وهلم جرا..........

ويييييييييييييو!!!

Quote: بالله لو فكرتي في العروض دي فأهل البورد أولى بقطع أهلها , قولي لينا عوووووووك وما تخاف حتاخدي نفس السعر العارضنوا ليكي.

<<<<<<<<<<<<
هسع اذا عاوزين نبقى في الجد.. كم بالتقريب ثمن قطعة ارض في المعمورة مساحتها 300 متر مربع؟ والقطعة ما ناصية ولكن بين اثنين من الجيران المليونيرات اللذان يشار اليهما بالبنان انهما من اغنى اغنياء الخرطوم.. وقدام القطعة شارغ زلط.. الثمن بالتقريب كم؟.. عشان نقدر نضرب الرقم في 3 اذا في واحد من الإغنياء ديل عاوز يشتري القطعة عشان يعملها حديقة لبيتهم الكبير..
لكن اذا انت عاوز تدفع زيهم.. فده معناه انت ذاتك ملياردير .. وطبعا شكل الفيلا بيوحي بكده..
والله يديك العافية

Quote: <<<<<<<<<<<< هسع اذا عاوزين نبقى في الجد.. كم بالتقريب ثمن قطعة ارض في المعمورة مساحتها 300 متر مربع؟

السعر حسب المربع , يعني مثلاً قطعة في مربع 81 مساحتها 361 بمبلغ سبعمية وعشرين مليون ج (يعني زي مية ألف ضووررار) بالتقريب , لكن قطعتك لأنها على زلط بتكون أكتر من كده , لكن في النهاية تعتمد كتير على المربع , وهل تفتح شرق ...إلخ , لكن لا أنصحك بذكر المربع لأنه ممكن يسبب ليكي مشاكل كتيرة خاصة إنك بتكتبي بي إسمك الحقيقي فقط قيسي على كده.

Quote: والقطعة ما ناصية ولكن بين اثنين من الجيران المليونيرات اللذان يشار اليهما بالبنان انهما من اغنى اغنياء الخرطوم.

معناها ناصية!!!


ويديك العافية والضورررارات الكافية برضو.

رمضان كريم.

الأخ / محمد

ألف مبروك وإن شاء الله سكن العمر بالعافية والهنا لكم ولأنجالكم .

حقيقة أعرف شعوركم لأنني مررت بتجربة البناء في إجازة 2008/2009 مع الفارق بين فيلتكم وبين منزلي المتواضع ( حوش + غرفتين مطبخ وحمام) بمنطقة جبرة مربع 19 ، وقد وقفت بنفسي طيلة فترة الاجازة على هذا العمل وقد إكتسبت خبرة لا بأس بها في التعامل مع الموردين والصناعية ، وفي العام 2010م تم تأجير المنزل بمبلغ بسيط جداً ( كنت فيه من الزاهدين) .

أحلى مثابرة في البناء أن تقوم بنفسك على الأشراف وأن تكون ملماً بكل التفاصيل .

Quote: الأخ محمد عبدالمطلب سلام .. ماشاء الله ....والف مبروك يارجل . مررت بنفس التجربة في منطقة كافوري لجمال المنزل ناس التلفزيون مرة جو مارين بالمنطقة وعملوا لقاء مع والدتي وقاموا صوروا البيت كلو ....الشكر لله سبحانه وتعالى .... بالمثابرة والاجتهاد كلو شئ بيتم . أمنياتنا للجميع بالتوفيق ....

مع التحية للأخ رضا

قبل أن أقرأ هذا الخبر زارني في المنزل صديقنا ( دغيم ) وأثناء الحديث عن السودان والأراضي والمنازل ذكر لي بأنكم شيدتم منزلا جميلا في الخرطوم وقد علم تفاصيل هذا الخبر من النت .

وقد سررت لهذا الخبر يا رضا ، ألف مبروك وتستاهل كل خير وربنا يوفقك .

Quote: الأخ / محمد ألف مبروك وإن شاء الله سكن العمر بالعافية والهنا لكم ولأنجالكم . حقيقة أعرف شعوركم لأنني مررت بتجربة البناء في إجازة 2008/2009 مع الفارق بين فيلتكم وبين منزلي المتواضع ( حوش + غرفتين مطبخ وحمام) بمنطقة جبرة مربع 19 ، وقد وقفت بنفسي طيلة فترة الاجازة على هذا العمل وقد إكتسبت خبرة لا بأس بها في التعامل مع الموردين والصناعية ، وفي العام 2010م تم تأجير المنزل بمبلغ بسيط جداً ( كنت فيه من الزاهدين) .

رمضان كريم الأخ العزيز ولياب ,,,

شاكر جداً ومقدر حضورك ومباركتك , وكما قلت الأمر يحتاج للمثابرة والإشراف الشخصي.

دمت يا عزيزي الفاضل.

الف مبروك واحلي شي في الدنيا عندما يري الانسان ثمرة كفاحه

انا الايام في حالة تفكير شديد هل اعمل لي بيت في السودان بس يكون مقفول
ام اعمل بيت هنا في الغربة دي واستمتع بيه بعد تعبي وشقاي


تحياتي