عصيان مدني بتاع مين؟؟

العصيان المدني العصيان المدني العصيان المدني


هل الناس فعلا مغيبة للدرجة دي عشان تكون ماعارفة انوا جل لو ماكل المنتسبين للمؤسسات الحكومية ومؤسسات القطاع الخاص هم يا ام مؤتمر وطني ولا دخلوا بواسطة واحد مؤتمر وطني للعمل في تلك المؤسسات وبالتالي لا يملكون الجرأة علي تنفيذ عصيان مدني ناجح خاصة مع تدجين النقابات أو تغييبها .

لكي تطاع أطلب المستطاع

محمد الطيب ...سلام ..


إما ثورة شعبيه ناجحة تسقط النظام
او مواجهة مسلحة ..

غير كده كله ضياع زمن..

كوز مندس

الاخ محمد الطيب

كلامك سليم فيما يخص العصيان المدني لموظفي الحكومة التي تقوده في الغالب النقابات.

لكن مفهوم العصيان المدني ممكن يكون اوسع من كده ويشمل قطاعات تانية لا دخل للحكومة بها ولكنها تؤثر
في اداء الحكومة.

مثلا

الموسم الصيفي جاء ازرعوا ... يقوم يتفق مزارعوا الجزيرة على انهم ما يزرعوا

صدروا الماشية عن طريق بورتسودان يقوم يهربوها عن طريق الحبشة او تشاد

اركبوا باصات الوالي، الناس تقوم ما تركب باصات الوالي

ود القاضي سلام
ثورة شعبية كاسحة
ولا ثورة شعبية كاسحة

أرضا سلاح




ـــــــــــــــــــــــــــــــــ
كل سونكي احسن يبقى مصطرينة

Quote: العصيان المدني العصيان المدني العصيان المدني هل الناس فعلا مغيبة للدرجة دي عشان تكون ماعارفة انوا جل لو ماكل المنتسبين للمؤسسات الحكومية ومؤسسات القطاع الخاص هم يا ام مؤتمر وطني ولا دخلوا بواسطة واحد مؤتمر وطني للعمل في تلك المؤسسات وبالتالي لا يملكون الجرأة علي تنفيذ عصيان مدني ناجح خاصة مع تدجين النقابات أو تغييبها . لكي تطاع أطلب المستطاع

يعنى كل الشغالين فى الحكومة مؤتمر وطنى وكلهم مرتباتهم مكفياهم وكل ناس المؤتمر الوطنى دارسين طب وهندسة وتقانة!

واللله العصيان المدنى يسقط حجرهم كمان بس خلى الناس يصرفوا الماهية ويشتتوا !
جنى

أي طريق يؤدي إلى إزالة هذاالنظام البغيض
هو طريق طيب

لا تغلق باباً برأي يا عمك



محبتي الأكيدة

Quote: لكن مفهوم العصيان المدني ممكن يكون اوسع من كده ويشمل قطاعات تانية لا دخل للحكومة بها ولكنها تؤثر في اداء الحكومة. مثلا الموسم الصيفي جاء ازرعوا ... يقوم يتفق مزارعوا الجزيرة على انهم ما يزرعوا صدروا الماشية عن طريق بورتسودان يقوم يهربوها عن طريق الحبشة او تشاد اركبوا باصات الوالي، الناس تقوم ما تركب باصات الوالي

هسي عليك الله يا احمد أبنعوف اقول ليك شنو بس

تحياتى لصاحب البوست ولود القاضى ،،

Quote: او مواجهة مسلحة ..

ياخى استهدأ بالله .. مواجهة مسلحة دى مش ليها 23 سنة وما جابت نتيجة ..!!
والله كنت قايلك من دعاة السلام والعصيان المدنى زينا كده .. لكن لقيتك دموى عديل كده.. لو الشعب ده كله مرق مرقه واحده وفى وقت واحد لابنحتاج لى سلاح ولا بنحتاج لدفيق دم ..!!

Quote: هسي عليك الله يا احمد أبنعوف اقول ليك شنو بس

؟؟؟؟؟؟؟؟؟؟؟؟؟؟

Quote: الموسم الصيفي جاء ازرعوا ... يقوم يتفق مزارعوا الجزيرة على انهم ما يزرعوا

محمد الطيب يقصد يقول ليك كيف المزارع يجوع نفسه ويسقطهاعشان يجوع ويسقط حكومة مابتأكل من زراعته ياابن عوف ؟!!!!

Quote: يعنى كل الشغالين فى الحكومة مؤتمر وطنى وكلهم مرتباتهم مكفياهم وكل ناس المؤتمر الوطنى دارسين طب وهندسة وتقانة! واللله العصيان المدنى يسقط حجرهم كمان بس خلى الناس يصرفوا الماهية ويشتتوا ! جنى

يا جني معظم الناس الشغالة هسي في القطاع الخاص ولا الحكومي شغالة بالواسطة ولا بسبب الموالاة للتنظيم الحاكم يعني ما لجدارتهم بالوظائف البأدوا فيها وعندهم احساس انو لو الحكومة دي مشت تاني ما بشتغلوا عديل لعدم أهليتهم فبالتالي هم أكتر ناس بصبروا علي الحكومة دي

Quote: محمد الطيب يقصد يقول ليك كيف المزارع يجوع نفسه ويسقطهاعشان يجوع ويسقط حكومة مابتأكل من زراعته ياابن عوف ؟!!!!

سلام يا ود القاضي
انا ضربت مثل، ممكن يكون خطأ ممكن يكون صاح، لكن اليناقشني في فكرتي الاساسية، الا وهو ان مفهوم
العصيان المدني اوسع من دائرة الفهم السوداني القديم المرتبط بالخدمة المدنية

سواقين الكوندرانات في فرنسا لمن جنهم يقوم بقفلوا شوارع فرنسا جت، وبشلوا ليك اي حاجة في البلد
لمن الحكومة تفهم حاجة.

اها، دا اسمه عصيان مدني، الاضراب عن الطعام عصيان مدني، الامتناع عن دخول المحاضرات او الحصص اسمه عصيان مدني

اي انت كمواطن عادي، عندك حقوق مدنية، كأنك تركب بصات الوالي مثلا، مافي زول ح يمنعهوه صاح، ومن حقك برضو
انك ما تركب باصات الوالي ملفي زول ح يجبرك تركبو صاح، هنا انت بتستخدم حقوق المدنية في انك تمارس حقك او ما تمارسه
من غير ما تكون مساءل قانونيا من قبل الدولة.

نرجع لموضوع الزراعة

وانت سيد العارفين يا ود القاضي، اي زول ح يزرع السنة دي ح يمشي السجن في نهاية الموسم، يا في افضل مديون

طيب زارعين لييه؟؟

أحمد ازيك

ياخ ما ممكن تقول لي العصيان المدني انو الناس ماتزرع عشان الحكومة ماتستفيد ,,,, ولا الناس ماتركب بصات الوالي لانو بصات الوالي دي حقت الحكومة والناس مظلومة ,,,, بي نفس مبدأك ده ممكن يجيك واحد يقول ليك ما تشتري الكهرباء من ناس الحكومة وماتشتري الموية .... والغاز ده زاتو جق ناس الحكومة ما تشتري الغاز بعدين مزارع البيض دي كلها حقت ناس متنفدين في الحكومة فما تشتري بيض ,,,, والفول بتاع السليت ده بكون جايي من مزرعة البشير فما نشتري الفول ,,,, بعدين ياخي طول ماانت حي وبتصرف الحكومة بتستفيد فبالتالي افضل تموت عشان ناس الحكومة ديل يشوفوا شعاع


ــــــــــــــــــــــــــــــ

ده منطق ده هسي

على ..سلامات

Quote: ياخى استهدأ بالله .. مواجهة مسلحة دى مش ليها 23 سنة وما جابت نتيجة ..!!

كيف ماجابت نتيجة ؟!!

نبدا من شرقنا ..

- تم سلام مع الاسود الحرة بعد ان حملت السلاح ( ضمن جبهة الشرق ) ..
- وقعت سلام مع مؤتمر البجا بعد حاربها بالسلاح (ضمن جبهة الشرق ).
- قضية دافور دي في عز عنفوان الانقاذ ابت تحلها ولمن حملوا السلاح بقت في اتفاقيات وبعدد الحركات .
الحكومة تحتقر شعبها وكل من يعارضها سلماًً تزج به في السجون والمعتقلات وتريه كل اصناف العذاب ومن حمل السلاح وجد الاحترام والقبول ..
ومازالت تمارس كل انواع التعذيب وتعتقل الكثير من المعارضين دون محاكمات ودون ذنب ..
ده غير تاريخها الدموى الذي تعلم.
وغير انهم مازالوا يسيطرون على الجيش والشرطة والامن وكل القوة وادوات الغطرسة التى تمنع اى تغيير سلمى او هادئ لمواطنين عزل..

Quote: أي طريق يؤدي إلى إزالة هذاالنظام البغيض هو طريق طيب لا تغلق باباً برأي يا عمك محبتي الأكيدة

بلة الجميل ازيك
لم أغلق بابا ولكن هذا الباب أغلقته الحكومة بالضبة والتمكين وما أتبع التمكين من واسطات ومعارف وأحدمني واخدمك وأخواتهم

أجيال بأكملها يا صاحبي متأثرة بوعيها أو دونه
بهذا النظام البغيض وأدواته الإعلامية التي تشبهه
فأي مدخل للقلوب أدخروهً
حرباً وسلما؟

أرجوا ألا تُحيد مكاناً أو فئة
قد يأتي على أيديهم النصر



محبتي الأكيدة

Quote: يا جني معظم الناس الشغالة هسي في القطاع الخاص ولا الحكومي شغالة بالواسطة ولا بسبب الموالاة للتنظيم الحاكم يعني ما لجدارتهم بالوظائف البأدوا فيها وعندهم احساس انو لو الحكومة دي مشت تاني ما بشتغلوا عديل لعدم أهليتهم فبالتالي هم أكتر ناس بصبروا علي الحكومة دي

بعد تواجد بالسودان لاربعة سنوات متتاليه (سافرت منه يوم 17 الفات) تجدني اتفق معك ولكن ليس كلهم ولكن
نقول اكثر من 85 % منهم..

ولكم مودتي