( جدو ) عبد الله ينور بيت صلاح عبد الله ....الف مبروك

وسط زغاريد الفرح

استقبل اخونا وحبيبنا

عضو المنبر الجميل

الاستاذ الفنان / صلاح عبد الله ( ابو شنب....!!!)

مولوده الاول عبد الله ( جدو )

ليكون يدا له في حياته وسندا

لاخواته البنات .

الف مبرووووووووك ياابو صلاح

انبته الله النبات الحسن وجعله من

ابناء المستقبل البارين بوالديهم

والعطوفين علي اخوانهم .

وجعله قرة عين لكم ولتسعدو به.

الف حمد الله علي سلامة والدته

والاف التبريكات لعمه الحبيب الاخ

عماد عبد الله .

ألف ألف ألف مبروكـ يا عمّكـ
وحمد لله على سلامة أم العيال













عنيف والله يا أب شنب

مبروك جدو, إربى في حضنكم الوريف

فهي إطلالة سعيدة, بس يا صلاح أورث
جدو حاجات تانية غير الشنب, ما بيأكل
عيش ياخ... ههههههه.

أها ... عرفنا الإسم, السماية كيف؟


شكرا يا دياب ... بس كمان ما تقوم
تهوش إنت كمان وتزلق ليك واحد جنى.

... وكونوا بخير

ألف مبروك لأستاذنا أبو صلاح يا دياب
يتربى في عز والديه
وإن شاء الله يطلع غناي زي أبوه

ألف مبروك لأستاذنا أبو صلاح يا دياب
يتربى في عز والديه
وإن شاء الله يطلع غناي زي أبو

التهاني كلها للأخ العزيز صلاح وحرمه وجعله الله من أبناء الوطن الصالحين
والتهنيئة موصولة للأسرة الكريمة ولصديقنا عماد





شكراً للاخبار الجميلة دي ياهرون

مليون مبروك ,, وحمد لله على السلامه ,,






( عبد الله صلاح عبد الله ) إسم بروفيسرات ,,

تهانينا لصلاح وام عبد الله
ألف مبروك المولود









شكرا للحبيب هارون
هذا الخبر الحلو

الف الف مبروك أب شنب , يربى في عزكم إن شاء الله
حمدالله على سلامة والدته

مليون مبروك ,, وحمد لله على السلامه ,,

الف مبروك
مبروووووك جدووووو

الف مبروك يابو صلاح قدوم جدو عبد الله
وحمدا لله على سلامة والدته
والتبريكات تصل الى عمو عماد ووحيد
والاسرة كلها

مليون مبروك ,, وحمد لله على السلامه ,,

الف مبروك صديقي الفنان ابو صلاح

وان شاء الله افن من الوالد

مشكور اخي هارون دياب الزواغ....؟؟

الف الف الف مبروك المولود

يتربى في عزكم

مبروك جدو ويتربى فى عزكم

يا صلاح و عمو عماد

الف مبروك لحبيبنا صلاح
ويتربي في عز والديه

Quote: مولوده الاول عبد الله ( جدو ) ليكون يدا له في حياته وسندا لاخواته البنات

ده كلام شنو ياهارون
يلمو فيك الجندريه
يخلو ريحتك طير طير

الف مبروووك
وجعله المولى
من فرسان االمستقبل
ويتربى في عزكم
الف مبروك ولأمه الف حمدالله على السلامة

لكن يا هارون صلاح دا ما ببالغ ؟؟؟
مع كل نهاية ربع بيضع مولود !!!


وانت بالله بارك ساى بدون حقارات !

Quote: ليكون يدا له في حياته وسندالاخواته البنات .

والله صلاح عايزو يكون يدو ما قلنا حاجه بطريقتو ..

لكن الحقاره بى اخواته دى ما بنرضاها هن مالن بسنندوهن ؟؟ مايلاات ولا مايلات
يمينا بالله لو ما يسندنهم هو وصلاح وعماد ذاتوو تشوف عينك ؟؟











ــــــــــــــــــ
انت قايل القصة فى الشنب ؟؟؟ لوووووووب كان زمان !
القصة فى المخ والقراية والروقة وكدا !
ياخ الف مبروك للولد دا يادوب ضربوا الهواء
والف سلامة لوالدته ...

الف الف مبروك ابو عبد الله
وربنا يحفظه ويجعله من الأبناء البارين بآبائهم
وحمد الله الف على السلامة

مبروك يا ابو عبد الله قدوم عبد الله وسلامي لام عبد الله وحمد الله على السلامة

ألف مبروك يا صلاح عبدالله عبدالله .

Quote: الف مبروووك وجعله المولى من فرسان االمستقبل ويتربى في عزكم الف مبروك ولأمه الف حمدالله على السلامة

ألف مبروك صديقي صلاح

ويتربى في عزكم ودلالكم

وحمدا لله على سلامة أم عبد الله ..

مليون مبروك ,,
للعزيز صلاح عبدالله ,,

ويتربى في عزكم ,,,,,,,,,,,

العزيز صلاح
مليون مبروك , ويتربي في عزكم ,,,

الف مبروك و شايل اسمه

ألف مبروك يا صلاح .. يتربى في عزكم
وحمدا لله على سلامة الوالدة والمولود

مليون مبروك ويتربى فى عزكم


خالص التهانى لأم وأبو عبدالله.

يادينا خالد

سلام

Quote: لكن الحقاره بى اخواته دى ما بنرضاها هن مالن بسنندوهن ؟؟ مايلاات ولا مايلات يمينا بالله لو ما يسندنهم هو وصلاح وعماد ذاتوو تشوف عينك ؟؟

طبعا انا زول دقة قديمة.....!!!!!

لكن ملاحظ....كل ما اعمل فيها معلم واقول للولد :

انت حتكون سند لاخواتك البنات ولازم تشد حيلك....

اشوف البت قاعده تحدر لي....!!!!

ياربي حكاية الجندر تكون دخلت بيتنا......؟

سلام

حمدآ لله على سلامة بنت اخونا وجدان فهي أهم زول في الموضوع ده
ومرحبآ بالأخ عبدالله مع امل ان يكون من ابناء الوطن الأماجد
وتهنئة لشقيقتيه به فقد منحهم الله ( جرو ) حراسة
وتهنئة للوالد فقد ضمن ان يورث شاربه
وإن لم يكن فشارب عمه

والله ده أطول رد ( جمـاعي ) اتكتب في المحل ده

آسف جداً لتأخر ردي عليكم أجمعين ..
الواجب أن أرد عليكم فرداً فرداً ..
وهذا ما سأفعله ، فليس أقل من أن أرد على تهانيكم ومشاركتكم لي فرحتي بقدوم الوريث الشرعي ..
وأبدأ بصديقي وأخي السباّق دائماً لفعل الخيرات ، هرون دياب ( لسان حالنا وحال سوداني الدوحة)
يا هرون إن شاء الله يوم شكرك ما يجي .... وكفى ..

ودالصايم
ياخ الناس العندهم أولاد (ذكور) ديل كانوا غاشيننا ساي
القصة ساهلة خلاص يا (زُمُل) تسـدّق؟؟ ....

أدفع .... نرسل ليك ...
إن شاء نبارك ليك الوِليد .. قول آمين ..

حيدر (آسـم)
صدقت والله ..
كان الشنب بيأّكل عيش كان بقى إسمي صلاح إدريس عبدالله (وبالعكس)..
أما عن السماية ، فبجيب ليكم صينية هنا ده في مكانكم ده ..
شكراً على تهنئتكم لنا ، التي لا تخلو من طُرف الأدباء ..
الله يخليك ويحفظك وأهلك اجمعين ( آمين)..

أبوحليب ،، أشرف يا
أبشّرك ،، جهزت للكابتن العود من هسي ..
مشتاقين ، يعلم الله ..
وفرحانين بمشاركتكم لينا الفرحة دي ، وشاكرين مشاعركم الطيبة ..
شكراً يا أشرف ياخ..

طلحة السيد ،
الرجل الحاتمي .. صاحبنا الزمان ، والله ايام يا طلحة ..
شكراً على تهنئتكم الرقيقة ، وربنا يديم الأفراح ياخي ..

هِدِر هِسين هَليل
عُؤبال ما نبارك لك أريب ... آدِر يا كريم ..
أشكرك على تهنئتك بقدوم ( آبا دول ) بتاعي ..
شوق لكم ، وللكلاكلة (لاسيما القبة منها) وبحرها الذي طالما أسعدنا ، لما كان هناك سودان ..
شكراً تاني يا قريبي ، ودمت طيب أنت وآل بيتك ..

كيمو يا سالم
قلت لي إسم بروفيسورات ؟؟
بعد كلامك ده وكلام كمال الزين ،، حسيت فعلاً بصعوبة في التنفس بسبب زنقتي بين أبوي وولدي
ساندويتش بس ..
يا كمال ياخي شكراً على التهنئة ، وربنا يحفظك ، ونبارك ليك ونشاركك في الافراح ( آمين ) ..

عبود عبدالرحيم
شكراً كتير على التهنئة ،، وأسأل الله أن يسعدك ويهنيك
ويرزقك بنين وبنات كتاااار ، وقبل ذلك المال ، المقدم على البنين والبنات ..
قول آمين ..

(( يدي وجعتني من الكتابة والله))

أبوحتوت يا
الله خارجني من نادي ناس ابوساندرا ..
الخطة بعد (ليبيا الفتحت دي) ح تكون ، إتنين (Female) أربعة ، أربعة (Male) ثم أخيراً واحد (Female)
الوصفة رسلناها لحمودي ..
شكراً يا محمد ياخ على تهنئتكم الرقيقة ، وأسأل الله أن يديم عليكم الصحة والعافية ويحفظكم وأولادكم وأهلكم (آمين)..

خالد الأسترالي
شكراً ، وكتّر خيرك ياخي ..
نبارك ليك السمح والزين
والله انا فرحان بالولد ، وإنتو بمشاركتكم دي فرحتوني أكتر
شكراً لمشاركتكم لي فرحي ..

(اللون الأحمر ده ريّحك يا زُمُل).

السني ،، محمد
تهنئتك دي بعد التسجيل في قائمة الـ(VIP) واللا بعدها؟؟
شكراً يا زعيم على التهنئة ، وبنارك ليك السمح
تحية ليك ولأحلامكم ، حفظكم الله وإياها وأدام عليكم نعمة الصحة والعافية (آمين) ..

يا تـيـتـا، يا عامـر
شكراً على تهنئتكم بقدوم جـدو .
طبعاً جدو دي بيقولوها ناس البندر
هنااااااك تحت النخل ، زي عبدالله ده ده بينادوه ( آبا دول ) ..
شكراً تاني على التهنئة ، وتحياتي لك وللاسرة الكريمة هنا ، وهناك ..


بكري عباس
ياخي بلغني أنك ( دوحابي ) معقول نلاقيك (على الهوا) بس ، ومانلاقيك (فيستو فيستو) ؟؟
شكراً على المباركة ، وربنا يحفط ليك أولادك الحلوين ديل وأمهم ... آمين ..
نشوفك ( عينك - عينك ) ياخ ..

طارق ميرغني
صاحبي ( بتاع كلو)
هو الفن ده يفارقك يمشي وين ( ما شاء الله عليك )
أشكرك على التهنئة ، أيامك معنا ما زالت عالقة بتلافيف الذاكرة والقلب ..
كررها ياخ ..
شكراً تاني .

عماد(الدين) عبدالله
يا سَمِي أخوي
سَمِي أخوك .. أخوك ، لو بالـ(دين) واللا بدونها ،، برضك أخونا (ِشِعر ده)
وبرضو بلغني إنك ( دوحابي )
ياخ إنتو ما عايزين تتعرفوا على الناس واللا شنو؟
شكراً على التهنئة ، وشكراً على بوستاتك التي تجد هوىً في نفسي
الغنا ده برضو ما غذا للروح يا دكتور ، واللا كيف؟؟
أكرر شكري لك ، وأمنيات بصحة دائمة وفرح مقيم ..

فادية اليمني
أولاً ، والله يا فادية ريّحتيني بـ(عمو عماد) دي راحة مبالغة ..
عمك عماد ده بيحب الناس تناديو بعمـو
تانياً ، أنا شاكر جداً تهنئتك الرقيقة لنا ، وكتر خيرك
أسأل الله ان يحفظك ويغطيك ..

عصام علي بن علي أبودية
شكراً يا عصام على التهنئة ، وبالله سيب هرون ده في حالو
نحن الجندر ما بناباهم ،،، إلا الولد بندورو..
سلام للمدام والوليدات ..

ياخ والله الليلة أنا كتبت كترة كتابة

أحـلام
شكراً كتير على التهنئة ، وكتر خيرك
أمبارح بالليل لاقيت السني في المستشفى ، إن شاء الله بقيتي كويسة؟؟
ربنا يديم عليك الصحة والعافية ( آمين )..

ديـنا خـالد
ديني أنـا ..
هرشِك لحم كرشِك ...
قال كل نهاية ربع ،، أرانب ؟؟
البنات حنيناااااات ، ما قلنا شئ
لكن الولد أنا دايرو والله ..
بيترسل لي الدكان ياخ
وبعدين شنب شنو يا دينا ياخ ؟؟
والله أنا لو ما خايف اقع على وشي ، كان حلقتو زماااااان
كدي هسي اتخيلي ليك شكل زول صلعة ، وحالق شنبو (نسأل الله السلامة)
شكراً على التهنئة والله ، ونبارك ليك السمح يا دينا يا بت خالد (حسب علمي)..

معاذ السر
يا قريبي
ياخي شكراً على التهنئة ، وكتر خيرك
منتظرك قبل أو بعد ما ربنا يرجعك بالسلامة
شكر مكرر ، وربنا يحفظك وأسرتك ،، وسلام للأهل هناك ..

هـند ( الشبكة )
شكراً يا هندوية على التهنئة ، يا ديامية يا أصيلة ..
نبارك ليك السمح ..
مستمتع أنا بالاجازة وبالود عبدالله ..
تاني شكراً ليك ..

أحمد ود أستاذ معتصم
ياخي رقم تلفونك اتلحس مني ، وإنت ما إتصلت تاني ..
شكراً يا أحمد على التهنئة ، الله يحفظك ويحفظ اولادك وأمهم ..
تلفوني في البروفايل ( ضروري تتصل) ..

البـدري
شاكر جداً مشاركتك لي الفرحة ، وتهنئتك ..
الله يسلمك ويحفظك ياخ.

لقمــان صاحبي
( قنااااة الجـزيرة ،،، في قطـر ) نغمة بالغليظ طبعاً..
ياخي شكراً جزيلاً على التهنئة
وإن كنت أحبذ أن أسمعها على شاكلة النغمة أعلاه ، لكن ما في مشكلة ، كده كفاية ..
تقبل شكري ، وشكر عبدالله ، وأمه ، وأخواته ، ثم حبوبتو..
تحياتي للاسرة الكريمة ..

عمـر عبـداللـه
زميلي في الزمن الجميل ..
شكراً على التهنئة التي تشبهك يا راجل يا جميل..
أسأل الله أن يجعل أيامنا كلها أفراح
حفظك الله وأبناءك ، وأهلك أجمعين
أكرر شكري الجزيل لك ..

العزيز نصــّار
أشكرك على التهنئة
وأسأل الله أن يتقبل دعاءك ، وييشيل عبدالله إسمو
ويكون من عباد الله الصالحين
شكراً كتير يا نصـّار ..

معاوية الزبير
الرجل الهادئ ..
الله يبارك فيك يا معاوية
وشاكر جداً تهنئتكم ، والله يديم الافراح
تحية لك وللاسرة الكريمة ، وشكر مكرر..

نـدى عثمان ..
أنا شاكر جداً تهانيك لي ولعبدالله وأمو
وأسأل الله ان يحفظك ، وأن تنالي ما تتمنين ..(آمين)..

عمي أبو سـاندرا
فعلاً ( بنت أخوكم) اللي هي حرمنا ، أهم زول في القصة دي كلللللها ..
( الأخ ) عبدالله ُيقِرؤك السلام ويشكرك على تهنئتك له بمناسبة مولده
كما أن أختيه يشكرنك على تهنئتك الرقيقة لهن بمناسبة قدوم ( جـروهـم ) الجديد
عليكم الله دي حالة يا جماعة؟؟
وبعدين ياخي شارب أبيه هذا لا يُورّث ، اليبقى هو راجل ويكّون نفسو ، ويعمل له شنب زي الرجال ..

ياخي ضربت ليك ورسلت ليك رسالة ..
إنت قايل نفسك نازل انتخابات واللا شنو ؟؟
تحية لك ، ولأم ساندرا الرشيدة ، والبنيات النجيمات ..

Quote: والله يا فادية ريّحتيني بـ(عمو عماد) دي راحة

سمي سمايتك و بس , بلاش كلام فارغ معاك إنت كمان ... لله !!!
تكتر تقلل بقول الهناي داك .



.......
زح من قدام وشي ..
يا أم عبدالله .. مبروك عليكم أبوي ياخي ..
و الحمد لله قالوا كويييييس .. لا عندو صلعة و لا كُليقة تحت نخرتو , و أضانو استان في الغان ..
يتربى في عزكم .

شكراً يا هرون يا قريبي .

قال عم عبدالله ( ما تتحسس أنا قاصد أخو أبوه يعني)

Quote: الحمد لله قالوا كويييييس .. لا عندو صلعة و لا كُليقة تحت نخرتو , و أضانو استان في الغان ..

الكليقة التحت النخرة دي بحلقها ، وبحوّل مكانها الى الأعلى قليلاً لسد الفراغات العلوية ، وأقعد ليك ميطي بدون شنب ..

لكن إنت يا (أب سن) باقي النقة دي أحسن تخليها ، هبشتها حاااااارة ..










-----------------------
مع تحياتي اخوكم ( أب سنين ) ..

اولا الف الف مبروك المولود
وحمد لله علي السلامه

ثانيا الصوره الفي البروفايل ده انت
ولا انا غلطان وانت اخو وحيد عبد الله
ولا انا غلطان برضو
المهم الف مبروك وانشاء الله يتربي في عزكم اخي صلاح
------------

انا عاطف زميل وحيد في البوليس ( عاطف- عنتر) امريكا..
دى زكريات اكثر من 20 سنه...

راجيك

يا عاطف كيف حالك

معقول بس أكون ما عرفتك ياخ؟
وبعدين أنا رحبت بيك هنا ده وقلت ليك سلم لي على المدام زميلتنا في الجامعة...
والله يا عاطف أمريكا دي قامت بيكم عديل ..

صاحبك وحيد بقى من كبار موظفى الأمم المتحدة..


تحياتي لك وللاسرة الكريمة..




عدلت اسم اخوي البينى وبين عمو عماد..

Quote: والله يا عاطف أمريكا دي قامت بيكم عديل

قامت بينا جنس قومالكن انت الطرطيبه قامت بيك
لقايت شكلك ما اتغير ..
كنت في السودان العام الماضي وقابلت الاخ وحيد
وفطرنا مع بعض قراصه مدنكله في نمره 3 وكان
نيننا اكثر من لقاء..
تقبل تحيات المدام وتهانيها بمناسبه المولود الجديد

والشكر موصول للاخ هارون..
مودتي..

الاخ صلاح
أبو لمى
الف مبروووووك يابو صلاح ويتربى فى عزكم وحمد اللة على سلامة والدته
كدى نشوفك حتقدر تسميهو عبداللة مع الحكومات القوية بتاعة الزمن ده
والا بعد شوية حنسمع بيهو لؤي ولا تامر .
المهم مبرووك والحقوا باخوه عشان يلعب معه الكورة

أخونا معاوية

سلام ...

شكراَ على تهنئتكم ، معليش الرد اتأخر شوية
وبعدين حكومات شنو ،، نحن الريموت في يدنا يا زول
سميته عبدالله منذ أن كان فكرة ، تقول لي تامر
أصبر لي بلحقو ليك بأخو قريب ، بس مش عشان يلعبوا كورة
عشان يعزفوا ويغنوا مع بعض..

صلاح عبدالله ازيك ومبروك الوليد يتربي في عزكم وعز السودان

عليك الله الشنب ده رقع بيهو راسك وادي العود للحليو ..والله ياحليلك

صاحبك وحيد بقى من كبار موظفى الأمم المتحدة..

يعني بقي لواء في الامم المتحده ...عليك الله لمن تتصل بيهو سلم عليهو كتير وقول ليهو ...

الشرق لاح ...براه بفهم ...

تاني ربي يجعل من ابناءنا الخيريين ...

تسلم يااب شنب

الأخ صلاح
حمدا لله على سلامة أمه و يتربى في عز والديه إن شاء الله. بورك في الموهوب و شكرت الواهب و رزقت بره و بلغ أشده.
شكرا ليك يا هارون.

الاخ العزيز العوض

اشكركم جدا على تهنئتكم
وأسأل الله أن ىديم عليكم نعمة الصحة والعافية
وأن يحفظكم وأهلكم أجمعين.

الف مليون مبروك ابوصلاح بقدوم( دولا) وانشاء الله يتربى فى عزكم وتهانينا واصلة لعمو عماد.

تحياتى الاخ صلاح

الله يجل مولوده من مواليد السعادة

ويجعله قدوم خير على اهله

شكرا الاخ هارون على الخبر الجميل

مودتى

الاخ العزيز خالد درق

اشكرك على التهنئة
وسعيد جدا بمشاركتكم لنا الفرح بقدوم عبدالله
الله يديك العافية يا خالد ويحقق امنياتك..

الاخ خالد حاكم

مشكور على التهنئة بولدنا دولا
اتمنى ان يكون (آبا دول) زي جدو..

شكرا يا خالد ونبارك ليك السمح..

عماد شمت ..

اخونا بتاع الامتداد فرع جنيف ، كيفك ياخي؟
شكرا على التهنئة وكتر خيرك
شنب شنو البرقع بيهو الصلعة؟ دي ديرا ليها جلد خروف عدييييل
الغنا والعزف كيف مع تلجكم البيبس الاصابع ده؟؟ الله يعينكم
وبعدين صاحبك وحيد انا زاتي ما لامي فيهو , لكن برضو ح نلوح ليهو الشرق..

شكرا تاني يا عمدة..

ألف مبروك الفاضل صلاح عبدالله والأسرة الكريمة
والعم الكريم عماد عبدالله.
يتربى في عزّكم إن شاء الله.

صادق المودة لأم المولود والأسرة الكريمة.

العزيزة الدكتورة سعاد

كتر خيرك وشكراً جزيلاً على تهنئتكم لنا
أقبلي تحيات أم عبدالله وأخواته وعمه وأبوه..

ألف مبروووك يا ابو عبد الله ..


جعله الله من الصالحين

و حمد لله على سلامة أم عبد الله ..

كتب عماد عبدالله :

Quote: يا أم عبدالله

حتى انت يا اللخو ، ضيعت حق البنات

عبدالله متين ده العايز تسيدو على ستو

عاشت لمى وأختها

كتب معاوية محمد الحسن :

Quote: الاخ صلاح أبو لمى

أيوة كده يا زول يا عادل

عماد وأخوهو وبعض البنات
ضيعوا حق البنات

نحن حزب لمى

وما حا نكنيها إلا ب أم لمى

وهو ذاتو أبوها


عالم كلابات منحازة

اخونا صلاح كل التحيات المباركات ليك ولي ام العيال وكمان العيال


والف الف مبروك ويتربى في عز ابوه وامه


وانشاء الله متل ابوه - من شابه اباه فما ظلم -


والف حمدا لله على سلامة والدته ووالده


يخليك ليهم ويخليهم ليك يارب العالمين

أخونا محمد عثمان

شكراً يا كمبورة على التهنئة
الله يديم الافراح
ويحفظك وأهلك وعيالك أجمعين..
تقبل سلامي وأم عبدالله والبنيات ..

أبوساندرا

زميلي ( السابق ) ، تركت ناديكم الى غير رجعة.
لكن هذا لا يمنع حبي الشديد للبنات وانحيازي التام لهم
لكن الولد دايرنو ، وهو سيد العدة كللللللها





أخوك ( أبو عبدالله )

حسام يا قريبي

مشكور على التهنئة الرقيقة
وعقبالك يا راسي يا زين


يلا اتحرك..

صلاح عبدالله .. ابوعبدالله ..

والله عجبني ليك فارس الحوبه ..

ربنا يحفظه ويغطيهو وينجيهو ..

ويغر بيهو عينك وعين امه وعين اخواتو وعين عماد عمو زاتوووو ..

الف حمدالله على سلامة المدام ..

ويتربى في عز اهلو في شتى بقاع الدنيا ..

الاستاذ الفنان / صلاح عبد الله ( ابو شنب.)
ياخي مبروكـ وربنا يسعدكـ بي جدو
وعليكـ علموا يقول عمو من الشهر التالت خليهو يهري لي عمو ده