Post: #1
Title: القوات الدولية في دارفور ....رائك مهم جدا
Author: haroon diyab
Date: 06-26-2007, 03:21 PM
--------------------------------------------------------------------------------
طبعا يااخوانا اليومين دي الكلام كتر عن امكانية دخول قوات دولية في دارفور واصبحت دارفور هي الشغل الشاغل لجميع المنابر الاعلامية .
المهم بدون فلسفة وزيادات انا اعتقد انو الاعضاء في منتدي سودانيز اولاين بعد ان اصبح هذا المنتدي صوت مسموع ومؤثر خاصة في مايخص الشأن السوداني يجب ان يكون ليهم رائ علما بان اختلاف الاراء لايفسد للود قضية , فالرجاء الاجابة مع التعليق :
طبعا نحن عارفين الحصل في افغانستان ومن قبل في الصومال والعراق ومايحدث الان في اقليم كوسوفو بعد ان قررت الامم المتحدة وضعة تحت وصايتها مع ملاحظة الوضع الحساس في السودان والعقلية السودانية تجاه
كل دخيل في الشان السوداني ودي ما ايحاءات للاجابة لكن قراءة لما بين السطور , السؤال ببساطة
هل تؤيد ام ترفض دخول قوات اممية الي دارفور ؟ولماذا ؟
تحياتي
|
Post: #2
Title: Re: القوات الدولية في دارفور ....رائك مهم جدا
Author: nazar hussien
Date: 06-26-2007, 03:46 PM
Parent: #1
عزيزنا ود دياب...هسي امانة في ذمتك بخلوك تراهن علي الخيل الاصيلة بعد ما تأخد لفتها..
يا راجل الدكلالة قائمة والغبار فوق سماء...والطيارات تئز وتزن...والناس تلبس في قاشاتها
وطواقيها اللبنية...وواحدين يطعموا فيهم ضد الزهج...دحين الوضع ما بستحمل رأي...
خليهم يجربوا وبعدها نشوف...غايتو الضامنا ليك...ناس الامم المتحدة ديل حا يغلوا
علينا الصعوط...ومن هسي العايز يدكن ...صعوط ناشف فليفعل اليوم قبل الغد.
دارفور ما كان بتشبه التدخل الدولي لكن نقول شنو؟ الله غالب
|
Post: #3
Title: Re: القوات الدولية في دارفور ....رائك مهم جدا
Author: bayan
Date: 06-26-2007, 04:02 PM
Parent: #2
أرفض دخول القوات الاجنبية لما حدث في افغانستان حيث تضرر منها المدنيين
وصارت حياتهم اكثر صعوبة..
مع الضغط على الحكومة من كل الاحزاب الوطنية للوصول الى تسوية
كاملة شاملة عادلة تحفظ للمدنين حياتهم..
ويرجعوا الى مدنهم وقراهم لتبدأ حملة البناء والتعمير...
التي يجب ان توفر الحكومة اموالا كافية لها..
الحرب لا تعالج بحرب واي نقطة دم غالية جدا
كما انني ارى ان البعض يريدون استغلال مشكلة دارفور لتغير النظام
دون وضع بدائل..
الاستعداد للانتخابات والتغير السلمي الى الديمقراطية افضل كثير
من الانقلابات او الاراجيز الذي يضعهم النظام الدولي
عند دخوله البلاد...
الديمقراطية والتنمية المتوزاية واحترام حق المواطنة
والحرية هي المطلب وهذا لن ياتي ابدا عن طريق قوات دولية...
واللهم احفظ بلادنا من الفتن ما ظهر منها وما بطن..
وشكرا لك..
|
Post: #4
Title: Re: القوات الدولية في دارفور ....رائك مهم جدا
Author: Tragie Mustafa
Date: 06-26-2007, 04:13 PM
Parent: #3
هارون دياب
اولا مرحب بك برلوم ومسخن وكمان من بورتسودان ومقيم في الدوحه!!وعايز تفتي في دارفور??
ثانيا:
انت نفسك لم تصوت بشكل واضح رغم يبدو انك ضدها.
ثالثا:
هل يمثل هذا المنبر نسب حقيقيه للعشب السوداني؟؟؟الاجابه لا.
هذا المنبر غالبيته من اهل الوسط و الشمال.
اذن:
اولا هم غير متضررين بشكل مباشر مما يحدث في دارفور.
اذن لا يحق لهم من اساه التصويت حول هذا الشأن.
خلينا لو عايز ننقل المعركه للخطرطوم بعدين نسألهم يصوتوا
عشان تشوف فعلا يعني ايه لما الناس بتقول اليده في المويه مش زي اليده في النار.
وانت يدك في المويه.
نعم لدخول القوات الدوليه اليوم قبل غدا لحماية المدنين.
|
Post: #5
Title: Re: القوات الدولية في دارفور ....رائك مهم جدا
Author: haroon diyab
Date: 06-26-2007, 06:34 PM
Parent: #4
Quote: خليهم يجربوا وبعدها نشوف...غايتو الضامنا ليك...ناس الامم المتحدة ديل حا يغلوا
علينا الصعوط...ومن هسي العايز يدكن ...صعوط ناشف فليفعل اليوم قبل الغد. |
الغالي /نزار
ماياهو ده المخوفنا انهم يجربوا والحكاية تعجبم وبعدين نبقي في اليحلنا الحلا بله , المهم عندي رطلين تمباك ناشف ماحاانساك ياقريبك .
Quote: كما انني ارى ان البعض يريدون استغلال مشكلة دارفور لتغير النظام
دون وضع بدائل..
الاستعداد للانتخابات والتغير السلمي الى الديمقراطية افضل كثير
من الانقلابات او الاراجيز الذي يضعهم النظام الدولي
عند دخوله البلاد...
الديمقراطية والتنمية المتوزاية واحترام حق المواطنة
والحرية هي المطلب وهذا لن ياتي ابدا عن طريق قوات دولية... |
الاستاذة / بيان
ونعم الرأي , لكن ذي مابقولوا ( نحن قبيل شن قلنا ....!)الخوف ما من الطير لكن من القادم والقادم الله يستر منو....!
الاستاذة / تراجي
كدي نمسكك واحدة واحدة
| Quote: اولا مرحب بك برلوم ومسخن وكمان من بورتسودان ومقيم في الدوحه!!وعايز تفتي في دارفور?? |
اولا برلوم دي حلوه لكن من بورسودان دي واقامتي في الدوحه مااظن تمنعني اني افتي في دارفور..!
| Quote: هل يمثل هذا المنبر نسب حقيقيه للعشب السوداني؟؟؟الاجابه لا. |
المنتدي لا يمثل نسب حقيقة للسودالنيين لكن اعتقد انوا اصبح منبر مهم واعتقد عندما تقوم المؤسسات المتخصصة في كندا بعمل استبيان فانه تعتمد علي عينات عشوائية وهذا ماقصدته .
Quote: هذا المنبر غالبيته من اهل الوسط و الشمال.
اذن:
اولا هم غير متضررين بشكل مباشر مما يحدث في دارفور.
اذن لا يحق لهم من اساه التصويت حول هذا الشأن.
خلينا لو عايز ننقل المعركه للخطرطوم بعدين نسألهم يصوتوا |
والله اهل الشمال والوسط مكتوين بنار مايحدث لاهلهم في دارفور .
وبعدين الله مايسمع منك ...! وباذن الله المعركة ماتصل الخرطوم وتنتهي ازمة دارفور بدون اي تفتيت لهذا الوطن الجميل وتعود دارفور سيرتها الاولي واحسن ويظل السودان بالف خير ... قولي آميييييييييييييييييين.
Quote: عشان تشوف فعلا يعني ايه لما الناس بتقول اليده في المويه مش زي اليده في النار.
وانت يدك في المويه.
نعم لدخول القوات الدوليه اليوم قبل غدا لحماية المدنين. |
صدقيني نحن ايدنا مافي المويه .. نحن ايدينا بقوا حطب النار القائمة كل يوم في ركن من اركان بلدنا الحبيبة .. كفاية علينا غربة ومرمطه .. الحاصل في البلد خله نصها مهاجرين والنص التاني في قائمة انتظار الهجرة ... كفاية انوا الواحد ينزل السودان عشان يدفن اخوه ويرجع مرة اخري عشان يدفن ابوه ويرجع مرة اخري ليدفن امه والخوف انوا المره الجايه يمشي في صندوق عشان يدفنوه في السودان وتبقي يااستاذتي العزيزة ميته وخراب ديار ... وده كله بسبب الحروب والمشاكل والفقر والظلم الحاصل في البلد وهذا غيض من فيض ... برضو تجي تقولي يدنا في الموية .
وانا معك مرحبا بالقوات الدولية اذا كانت هي الحل ...!
لكي عاطر تحياتي
|
Post: #8
Title: Re: القوات الدولية في دارفور ....رائك مهم جدا
Author: Mohamed Suleiman
Date: 06-26-2007, 07:08 PM
Parent: #5
الأخ هارون دياب
لك التحية و الإحترام
| Quote: المهم بدون فلسفة وزيادات |
نعم ... القوات الأممية في دارفور اليوم قبل الغد .
| Quote: فالرجاء الاجابة مع التعليق |
دايرين أي واحد و واحدة يورونا رأيهم بالواضح ...
بعدين ... الأفغان قصتهم واضحة ...
و أي واحد يقتل الإعلام العالمي قبل المحل ينشروا خبر موته .
السودانيين في دارفور كتلوهم سودانيين ... بالطيارات و المليشيات و المروحيات ...
في تعتيم إعلامي كامل ..
و الغرض كان الإبادة .... بالتمام و الكامل .
ناس دارفور شافوا و جربوا ...
و لا هم ما ناس ؟؟؟
Quote: مع ملاحظة الوضع الحساس في السودان والعقلية السودانية تجاه
كل دخيل في الشان السوداني ودي ما ايحاءات للاجابة لكن قراءة لما بين السطور |
يا راجل !!!
عندك في بلادك أكثر من مليونين مشرورين تحت الشمس من فعل التطهير العرقي .... و برضو تقول لي الوضع الحساس و العقلية السودانية و و ...
ديل المليونين و نصف المكدسين في الخيام بطول دارفور و عرضها هم من سيفضح العقلية السودانية هذه ..
ألم تسمع قول ساركوزي : الصمت يقتل ؟؟
هنا انت تتجاهل أحاسيس و مشاعر كل أهل دارفور ....
لذا ... هم أيضا لا يهمهم أن رحتوا إنتو كلكم في ستين داهية .
.
|
Post: #6
Title: Re: القوات الدولية في دارفور ....رائك مهم جدا
Author: ابوالقاسم ابراهيم الحاج
Date: 06-26-2007, 07:02 PM
Parent: #1
أخونا ود دياب.
مرحبا بك أولا.
ثانيا.
الموضوع نوقش وقيلت الأراء حوله, أحيلك إلى الإرشيف والمواضيع الغاطسة وراء.
ثالثا;
ما فهمت شغلك دا إستبيان للدراسة ولا لك فيه موقف محدد وعايز تعرف مين معك ومين مخالفك??.
وفى كل الحالات القصة مش يخشوا ولا مايخشوا?!.
القصة ليه وصلت لحد ما يحمى المواطن من جيش وشرطة ونظام بلده?!.
إفريقى أسيوى أوربى أميركى ليس الخيار بل الخيار الحماية!!.
خواجة ما عايزينو!!دا كلام!!!
|
Post: #7
Title: Re: القوات الدولية في دارفور ....رائك مهم جدا
Author: Khalid Kodi
Date: 06-26-2007, 07:04 PM
Parent: #1
الاستاذ هارون دياب،
تحية.
القوات الدولية ستدخل السودان.
فأمرها فد تم حسمه ولارجوع عن ذلك من أى جهة ولأى من الاسباب.
مايهم الان هو ربما تبدأ بإستبيانات للإجابة على اسئلة مثل :
ماهى مهام هذه القوات وألياتها...الخ...
وأيضا ربما تبدأ فى تجهيز أسئلة حول هل أدت القوات الدولية هذه المهام كما ينبغى ؟؟
تحياتى مرة أخرى.
|
Post: #9
Title: Re: القوات الدولية في دارفور ....رائك مهم جدا
Author: Atif Makkawi
Date: 06-26-2007, 07:19 PM
Parent: #1
| Quote: هل تؤيد ام ترفض دخول قوات اممية الي دارفور ؟ولماذا ؟ |
أنا مع الريس البشير
يعني أوافق دخول القوات الأممية
لأن البشير ذات نفسه وباعتباره
القائد العام للقوات المسلحة
أقر ضمنيا بعدم مقدرته علي حماية
أهلنا بدارفور وبالمناسبة أنا من
وسط السودان......
تاني أنا مع البشير... فهل أنت ضد البشير ؟
|
Post: #10
Title: Re: القوات الدولية في دارفور ....رائك مهم جدا
Author: kamalabas
Date: 06-26-2007, 07:25 PM
Parent: #1
الاخ هارون دياب
تحياتي
دخول القوات الدولية في دارفور أصبح أمرا واقعا وأصبحت رصيدا أضافيا
للقوات الدولية الموجودةأصلا -وبعلم وموافقة الانقاذ- الموجودة أصلا
في دارفور وجبال النوبة.......
........القوات الدولية خيار مر ولكنه الخيارالوحيد المتاح في ظل
تعنت الانقاذ...وأعني الخيار الوحيد المتاح لمراقبة الوضع والمساعدة
في أرساء سلام,
...... نعم هناك حل يجنبنا كل هذا ويسرع بسحب القوات الدولية
ماهو ذلك الحل?
..أن تتخلي الانقاذ عن الكنكشة وأحتكار السلطة والتحكم في مصائر البلاد
وأنسانها وأن تجلس مع الاخريين لصياغة حل عادل وشامل للمشكل السوداني
وهذا لايتأتي الاأذا أرتضت الانقاذ بالقبول بالتعامل بوزنها الحقيقي
بعيدا عن التورم الناتج من تأثير وهج السلطة وبريق الثروة.....
علي الانقاذ أن تركن للحلول الداخلية العادلة وأن تنبذ عادةأدمان
الموافقة علي الحل الا تحت وطاة عصاة الضغوط وعين الخارج الحمراء
عليها الاستجابة لصوت العقل....
......أذا أردنا علاج معضلة فعلينا أزالة المسبب ومعرفة أس الداء
فلاعلاج بلا تشخيص سليم ولافاعلية لعلاج يتعاطي مع الاعراض و يغفل جوهر
المشكلة.... القوات الدولية عرض ومظهر لأزمة متفاعلة يجب معالجتها
كمال
|
Post: #11
Title: Re: القوات الدولية في دارفور ....رائك مهم جدا
Author: Haitham Elsiddiq
Date: 06-26-2007, 08:22 PM
Parent: #1
ألأخ هارون
لقد عجزت الحكومة السودانية في الدفاع عن أهل دارفور....
وفي خلال الأعوام السابقة ساهمت في أن ينتقل الوضع من سيئ لأسوأ...
وبغض النظر عن الأسباب والأعزار يبقى إنسان المخيمات وأطفال الجوع ونساء الخوف هم الأهم و المحور وضمان الأمن و الخبز لهم هو الأولوية
العالم لا يمكن أن يقف مكتوف ألأيدي تجاة الفظائع التي نراها كل يوم
سؤالك هذا مكانة المعسكرات القابعة في أعماق الصحراء...أسأل الواطئون الجمر الراقدون القرفصاء يبحلقون في رضيع يموت ويموت قلب أمة كل ساعة
هؤلاء يا صديقي من لهم الحق في رفض و قبول المساعدة و النجدة
أما نحن فنقدم كرامتنا ورفض التدخل و وحدة الوطن وإلي آخرة علي بقاء إنسان دارفور...ونحن بعيدون عن الخوف والجوع والمرض والجنجويد...
أتفق مع الأخوين كمال وخالد أن دخول القوات قد حسم...وقد حزر العقلاء منة لسنين ولكن لاحياة لمن تنادي...
ما أستغرب لة إن الذين يرفضون تدخل الأمم المتحدة في دارفور هم نفس الذين كانوا يهتفون للتدخل في البوسنة و كسوفو
إذا كنا نتبرع لحماس بعشرة ملايين دولار ونقف نتفرج علي أطفال دارفور لا نحرك ساكنا لنجدتهم فالنترك غيرنا ليحميهم...فياصديقي ما أتفة أن تكون لاجيئا في عقر دارك....
فيا إنسان دارفور ....أضعناك وفشلنا في إنقاذك...فاليأت غيرنا...ربما يؤدي مافشلنا لسنين في أدآءة...
|
Post: #12
Title: Re: القوات الدولية في دارفور ....رائك مهم جدا
Author: يحي ابن عوف
Date: 06-26-2007, 08:36 PM
Parent: #11
القوات الدولية ستدخل السودان ستدخل.
فأمرها قد تم حسمه ولارجوع عن ذلك من أى جهة ولأى من الاسباب.
|
Post: #13
Title: Re: القوات الدولية في دارفور مسألة ضرورية لهذه الأسباب....
Author: Yasir Elsharif
Date: 06-26-2007, 09:10 PM
Parent: #1
الأخ هارون دياب،
تحية طيبة ومرحبا بك في المنبر..
السؤال:
هل تؤيد ام ترفض دخول قوات اممية الي دارفور ؟ولماذا ؟
نعم أؤيد دخول قوات الأمم المتحدة إلى دارفور..
وذلك للأسباب التالية:
1/ لحماية الأهالي من بطش حكومة البشير التي تقوم بالقصف الجوي للقرى الآمنة والمواطنين العزل، وكذلك من ترويع الجنجويد.
2/ المساعدة في نزع السلاح من الجنجويد..
3/ لحماية الأهالي من أعمال الحركات المسلحة في دارفور وخاصة المنفلتة منها، وكذلك نزع السلاح من هذه الحركات..
4/ التمكين من تنفيذ قرارات الأمم المتحدة 1590 و 1593 وتمهيد الطريق للمفاوضات بين الحكومة والحركات المسلحة على غرار ما حدث بين الحكومة والحركة الشعبية لتحرير السودان، ثم التمهيد للتحول الديمقراطي الذي نصت عليه إتفاقية السلام الشامل ودستور الفترة الإنتقالية والدفع نحو جعل خيار الوحدة خيارا جاذبا لبقاء جنوب السودان داخل القطر الموحد..
5/ منع الأوضاع من الإنزلاق نحو الفوضى عند سقوط هذه الحكومة وهو أمر صار قاب قوسين أو أدنى..
|
Post: #14
Title: Re: القوات الدولية في دارفور ....رائك مهم جدا
Author: kamalabas
Date: 06-27-2007, 12:38 PM
Parent: #1
??????????
|
|