Post: #1 Title: سنة أولى بورد .. بوست في شكل عيد ميلاد Author: حمور زيادة Date: 08-31-2009, 10:16 PM Parent: #0
Post: #2 Title: Re: سنة أولى بورد .. بوست في شكل عيد ميلاد Author: حمور زيادة Date: 08-31-2009, 10:20 PM Parent: #1
في مثل هذه الايام كان دخولي الى هذا العالم الاسفيري. الحقيقة أني حين اتذكر ذلك و أحب أن ارويه أجد نفسي اتذكر مسرحية " الزعيم " لـ "عادل امام ". تحديدا مشهده الافتتاحي حين يقف مخاطبا و يقول : " لماذا قمنا بالثورة ؟ في الحقيقة انا لا ادري لماذا قمنا بالثورة .. أنا كنت في الحمام ساعتها ". دخولي الى عالم سودانيز اون لاين لم يكن مميزا و لا حدث ارخت له. طبعا لم اكن في الحمام " ساعتها " لكنه كان دخولا عاديا لا سبب له. دخلت لمجرد الدخول. سأحاول ان احكي لك عن دخولي عالم البورداب .. و عن هذا العام الاسفيري.
Post: #3 Title: Re: سنة أولى بورد .. بوست في شكل عيد ميلاد Author: ALazhary2 Date: 08-31-2009, 10:25 PM Parent: #2
. .
حمور زيادة كل سنة وإنت طيب ياجميل .
أنت من الذين يحركون السكون .
إنضمامك للبورد أضاف إليه الكثير من البهاء والفائدة .
أشهد الخلائق أنني أحبك في الله وأتمنى أن أتشرف بمقابلتك يوماً ما .
خالص التحية والتقدير
. .
Post: #4 Title: Re: سنة أولى بورد .. بوست في شكل عيد ميلاد Author: حمور زيادة Date: 08-31-2009, 10:26 PM Parent: #2
فليغضب بكري ابو بكر او لا يغضب لكني لم اسمع بموقع سودانيز اون لاين منذ وقت طويل. و حتى حين صادفني في احدى حومات البحث لم اعرف انه اكبر موقع سوداني و لم اهتم به. بل انه اضجرني. الأخ الفاضل " جوجل " قادني الى بوست في مكتبة للاستاذة تماضر شيخ الدين. موضوع البوست (الذي نسيته الان ) كان جميلا ، لكنه كعادة البورد كان رأس خيط ينتظر من المتداخلين ان يكملوه. بقية الخيط لم يكملها احد. كان البوست مليئا بـ " الرائعة تماضر فلق الصباح يغازل خط قرينتش حين تبلور احاسيس بصات الكلاكلة بما تعانيه " .. " استاذة تماضر مرور للتحية " و " up " و مزيد من الـ " up " و كثير من الـ "up " . طبعا لم أفهم ان up تعني up قط. فلم اكن اعرف ان البوستات ترتفع و تهبط بالمداخلات. ناهيك عن ان البوست كان في مكتبة الاستاذة تماضر فلم افهم اين هو بقية سودانيز اون لاين الذي ظهر اسمه في " جوجل ". هذه كانت تجربتي الاولى مع سودانيز و كانت مخيبة نوعا ما.
Post: #5 Title: Re: سنة أولى بورد .. بوست في شكل عيد ميلاد Author: حمور زيادة Date: 08-31-2009, 10:31 PM Parent: #4
بعد أيام قادني " جوجل " مرة اخرى الى سودانيز .. ان لـ "جوجل " فضلا كبيرا على بكري ابو بكر. هذه المرة قادني الى المنبر العام. يا لهول ما رأيت. "ألناس دي وهم وله شنو ؟؟ " هذا هو تلخيص كل ما فكرت فيه. كمية من التطاحن .. كمية من الحروب .. كمية من الشتائم .. الكثير من الـ "up ". في الحقيقة يا صاحبي انا لم اكن معتادا على النقاش بهذه الاساليب. لم اكن افهم كيف يتجاوز متداخل رأيا قويا طرح فقتل له كل الفرضيات التي بنى عليها بوسته .. و لا كنت افهم كيف يمكن ان يشتم "زول كبير و واعي " أحدا بهذا الاسلوب الذي رأيته و قرأته. يع ع ع ع .. التجربة الثانية لم تكن مرضية ايضا.
Post: #6 Title: Re: سنة أولى بورد .. بوست في شكل عيد ميلاد Author: محمد أبوالعزائم أبوالريش Date: 08-31-2009, 10:49 PM Parent: #5
يا حمور يا زيادة ....
أقدر أقول إنك بوردابي (إتولد) بسنونو ..... وأذكر كمان إنو أول بوست أقراهو ليك كان (لماذا لم يتزوّج بطوط زيزي) .. وكان لي فيهو مداخلة دون أعرف إنك (برلوم).
Quote: الكثير من الـ "up ".
كويس إنك ما لقيت - وقتها - (over).
Post: #7 Title: Re: سنة أولى بورد .. بوست في شكل عيد ميلاد Author: حمور زيادة Date: 08-31-2009, 11:07 PM Parent: #5
التجربة الثالثة لم تكن عبر "جوجل " .. كانت عن سبق اصرار و ترصد .. كتبت عنوان المنبر أكثر من مرة حتى توصلت الى العنوان الصحيح. اكتشفت ان للمنبر صفحة مقالات جميلة جدا. غصت فيها و قرأت منها الكثير. هذه التجربة كانت جميلة جعلتني اسأل بعض من يفهم هذه الامور فقال لي ان سودانيز اون لاين هو اكبر المواقع السودانية. اممم .. بالله ؟ كويس. حصل لينا الشرف.
Post: #8 Title: Re: سنة أولى بورد .. بوست في شكل عيد ميلاد Author: naeem ali Date: 08-31-2009, 11:11 PM Parent: #7
كل سنه وانت طيب يا صديق
______________________ بوست بدايته ب (نانسي).. يدل علي تفضيلك (للتحليه) قبل الطعام ده حاتختموا بشنو يا صديق؟؟؟
Post: #9 Title: Re: سنة أولى بورد .. بوست في شكل عيد ميلاد Author: حمور زيادة Date: 08-31-2009, 11:13 PM Parent: #7
نسيت الموقع و ما به و من به و شغلتني الدنيا ام بنايا قش. بعدها بأشهر كنت قد بدأت انشر بعض مقالات في صحيفة "الصحافة " متوقعا ان تجعلني هذه المقالات في شهرة "محمد حسنين هيكل " .. لكنها طبعا مرت بهدوء الا من استحسان من الاستاذ " حيدر المكاشفي " و تقدير من الاستاذة " امل هباني ". نزل بي شيطاني فجأة يذكرني موقع سودانيز اون لاين. فتحته و قمت بارسال ثلاثة مقالات لامين الموقع مع رسالة ترجو النشر ان راقت له المقالات. اغلقت الجهاز ( و كنت ادخل بهاتف كنار عادي ) و قمت الى مائدة الغداء. في الحقيقة يظهر انه كان غداء مباركا جدا .. فحين عدت الى الانترنت وجدت رسالة من بكري ابو بكر. من هو هذا الرجل ؟ و بأي حق يراسلني ؟ ثم ان اسمه يبدو مفتعلا مصنوعا.. بكري ؟ و ابو بكر ؟ يبدو كاسم بطل رواية. فتحت الايميل لاجد كلمة مرور لموقع سودانيز اون لاين. تخيل ؟ بهذه البساطة. يظهر ان رسالتي صادفت ساعة اجابة. كان هذا الحدث الغير هام في لحظتها في 28 /3/ 2007 كما لابد انك رأيت اسفل صورتي التي على يمين هذا الكلام. تسأل طبعا كيف يكون هذا عامي الأول ؟ لا تعجل .. انا احسن الحساب بعض الشئ. سأخبرك كيف هو عامي الاول.
Post: #10 Title: Re: سنة أولى بورد .. بوست في شكل عيد ميلاد Author: حمور زيادة Date: 08-31-2009, 11:18 PM Parent: #9
الحبيب الأزهري .. احبك الذي احببتني فيه. و انا في انتظار عودتك الى وطن القماري لأسعد بلقياك.
Post: #12 Title: Re: سنة أولى بورد .. بوست في شكل عيد ميلاد Author: حمور زيادة Date: 08-31-2009, 11:20 PM Parent: #10
محمد ابو العزايم .. تسلم .. بوست "لماذا لا يتزوج بطوط زيزي " ده كان بداية المرحلة الذهبية. بجيهو في الحكي. تصدق البوست ده اساسا ما اتكتب لسودانيز ؟
Post: #13 Title: Re: سنة أولى بورد .. بوست في شكل عيد ميلاد Author: حمور زيادة Date: 08-31-2009, 11:22 PM Parent: #12
نعيم يا انسان .. اضحكك ؟ قعدت افكر في بدايتو نانسي دي شنو ؟ قلت نعيم ده قاصد بوست "نانسي عجاج كأنها نانسي عجاج " وله شنو ؟ نسيت ليك كلو كلو اني خاتي اغنية للرائعة نانسي فوق. الواحد بدت تظهر عليو اثار العمر خلاص.
Post: #11 Title: Re: سنة أولى بورد .. بوست في شكل عيد ميلاد Author: حيدر حسن ميرغني Date: 08-31-2009, 11:20 PM Parent: #9
وجود أمثالكم من فضائل هذا المكان
Post: #14 Title: Re: سنة أولى بورد .. بوست في شكل عيد ميلاد Author: حمور زيادة Date: 08-31-2009, 11:25 PM Parent: #11
الله يسامحك يا حيدر أماخدعي أنت عن نفسي ؟
Post: #15 Title: Re: سنة أولى بورد .. بوست في شكل عيد ميلاد Author: طارق جبريل Date: 08-31-2009, 11:28 PM Parent: #11
شقي الحال كيفنك وحاتك يا ود زيادة نا زيك كدي جاني المتصفح حاليا البوردابي الجهبوز حاتم ابراهيم وقال لي ياخي قريت اسمك في مداخلة في بوست الزقازيق اجدع ناس انا كنت قايسل البورد كله الزقازيق دي وقدر ما اجي ارد منبر الجن دة يحرن قمت كلمت اخونا نزار عثمان (السمندل) الله يطراه بالخير قام كلم بكري وبعد يومين ادوني كلمة المرور وحاتك لي في زول رحب لي ولا في زول هببو لي بقيت محل ما اداقش مافي زولا ساعل فيني قمت قلبت المنبر شايقي كله ومن ديك وعييييييييييييييك
وحاتك يا الحبيب انا واحد من الناس البيفتشوا لي بوستاتك وحقيقي بخاف اكتب مداخلة عندك عشان ما اكوجنلك البوست
Post: #16 Title: Re: سنة أولى بورد .. بوست في شكل عيد ميلاد Author: عمر التوم Date: 08-31-2009, 11:45 PM Parent: #15
الأديب الأريب /حمور
رمضان كريم
قراءة المدلوق من مداد كيبوردك متعة لاتدانيها متعة , فأنتم من القلائل الذين يمنحون هذا المكان شاهق الألق.
تحياتي
Post: #17 Title: Re: سنة أولى بورد .. بوست في شكل عيد ميلاد Author: عبدالوهاب علي الحاج Date: 08-31-2009, 11:46 PM Parent: #15
اتلومت يا قوقل
Post: #18 Title: Re: سنة أولى بورد .. بوست في شكل عيد ميلاد Author: حمور زيادة Date: 08-31-2009, 11:47 PM Parent: #15
أأالمبروك ود جبرين .. كيفنك ياخ ؟ مونصيح ؟ عافيي ؟ باقيلي "شقي الحال " دي الت سيدنا الطيب ود صالح كان بقولا للحردلو مو كدي ؟
يا زول قوالتك الت البوردي ده كلو الزقازيق دي كان ساوها واحداً اخونا هني دا .. غاتس لعضنى في بوستي إليل تايتنك .. ينومبو و يقومبو. أكان مره بالغلط مرق منو لقالك الدنيا وسيعي خلاس. اخونا داك ذاتو شايقي .. باقيلي انتو البلد التخشوها جديد محل يقعدوكم ما بتتلفتو .. مو شوايقي عاد.
يا زول قصة ما يشتغلوبك دي انا ضقتها لامن شلاليفي اتظلطن. بحكيها ليك آآالمبروك. ابقى طيب.
Post: #20 Title: Re: سنة أولى بورد .. بوست في شكل عيد ميلاد Author: حمور زيادة Date: 08-31-2009, 11:50 PM Parent: #18
دلفت الى البورد و قمت بضبط بروفايلي الشخصي (بمعنى اني تركت كل المعلومات فارغة كالعادة ) و ذهبت اتداخل. حسنا .. بدون ذكر اسماء و لن اقول بشاشا او تراجي لكني تداخلت في بوست كله "جلابة " و " كاره ذاتك " و اشياء من هذا القبيل. لا احب ان اخوض في ذكريات مؤلمة لكني حملت حمل بعير شتائم و ذهبت. اغلقت الموقع و المتصفح و الكمبيوتر و اغلقت باب البيت خلفي و ذهبت لالعب كوتشينه في الموردة. و لم ارجع (الى البورد طبعا ) الا بعد ذلك بشهور. اعادني خليل ابراهيم و غزوة ام درمان.
Post: #22 Title: Re: سنة أولى بورد .. بوست في شكل عيد ميلاد Author: حمور زيادة Date: 09-01-2009, 00:00 AM Parent: #20
كنت في مدينة ود مدني انوي العودة صباحا الى الخرطوم محل الرئيس بنوم و الطيارة بتقوم. كنت في برج الجزيرة في ضيافة قريبي و صديقي الدكتور أحمد حمور نقلب سويا في قنوات التلفزيون حين مر شريط اخباري عن اخبار تتحدث عن قتال شمال ام درمان. فزعنا الى التلفزيون السوداني .. كان التلفزيون طبعا على قدر الحدث .. كان يذيع برنامجا من داخل الاستديو مع احد الضيوف الرائعين الذين يضحكون كثيرا قبل ان يتحدثوا فلا تفهم ما قالوا و لا تستسيغ الضحكة ايضا. الجزيرة .. العربية .. البي بي سي (حتى الان اجد فكرة مشاهدة البي بي سي غريبة. هذه مؤسسة وجدت لنسمعها لا لنراها ) .. كلها تتحدث بابهام لكن لا تفاصيل. تذكرت سودانيز اون لاين و كيف انهم يقولون عنها ان الاخبار و الشمارات بها اولا فأول. فتحت الكمبيوتر ( كنت قد اقتنيت لابتوب و ام دي اس ال منذ اشهر قريبة فلم يكن يفارقني في حل او ترحال. حتى اني سافرت بالـ ام دي اس ال الى القاهرة من شدة سعادتي به ) .. ولجت الى المنبر فوجدت ان المعركة تدور فيه. القائدة تراجي و الكمنضال ابراهيم بقال يوشكان على دخول الاذاعة. قواتنا الباسلة ( كما قال التلفزيون بعد ذلك ) كانت تصر على ان المتمردين قد ماتوا على اسوار ام درمان. في الحقيقة كان ممتعا جدا ان اقرأ المعركة و هي تدور في المنبر و انسى ان خالاتي في ام درمان و ان امي وحدها في الحلفايا. لكن المنبر لم يشر لهن قط. في المعارك يصبح من الترف ان تتذكر ان خالتك قد تسقط قتيلة لمجرد ان زوجها اسكنها منذ ثلاثين عاما بالقرب من شارع الموردة.
Post: #24 Title: Re: سنة أولى بورد .. بوست في شكل عيد ميلاد Author: حمور زيادة Date: 09-01-2009, 00:04 AM Parent: #22
عدت الى الخرطوم في اليوم الثاني .. و لم اترك متابعة المنبر قط . العودة كانت رحلة مغامرة لطيفة ذكرني ان احكيها لك في يوم من الايام. فقد اوشك عسكري ان يرديني قتيلا في تفتيش سوبا لمجرد اني سألته هل يمكننا العبور راجلين ؟ يبدو ان القانون العسكري يمنع الاسئلة لأن شكل الكلاش الذي وضع على عنقي لم يكن مرحبا بالسؤال. بعد يوم اخر كانت المعركة قد ماتت في البورد و على ارض الواقع و انتى كل شئ. فففتحت بوستا اتكلم فيه عن معركة ام درمان التي دارت هنا. وجد ردا او اثنين و انتهى. بعدها كتبت بوستا عن العنصرية ( كمظهر من مظاهر ما حدث في ام درمان ) و اسميته " كلنا عنصريون ". تداخل معي الاخ محمد سليمان و كال لي ما كتب الله لي. قال لي من ضمن ما قال : انها عنصرية مقيتة ما عارف عملت شنو كده جواك فقئتها في هذا الكلام. و ذهب.
Post: #26 Title: Re: سنة أولى بورد .. بوست في شكل عيد ميلاد Author: حمور زيادة Date: 09-01-2009, 00:08 AM Parent: #24
ذهبت انا ايضا و غبت زمانا لا ادري لماذا. ثم جئت لا ادري لماذا اتيت. او كما قال عمنا ابو ماضي. كتبت بوستا اسمه " سانا بانا برتكانه ". تداخل فيه العوض المسلمي و سلمى الشيخ سلامة و هارون دياب. و نزل ايضا و لم اعرف كيف ارفعه. و كتبت اكثر من مئة مداخلة في عدة بوستات لم يعبأ بها احد و لم يكلف احدهم خاطره بالرد . كان ينبغي ان اذهب اليس كذلك ؟ لكني هذه المرة كنت قد جئت لابقى. كان رمضان قد اوشك و انا اعاني من حالة عدم الموضوع فقررت ان ابقى. انا هنا باقون.
Post: #28 Title: Re: سنة أولى بورد .. بوست في شكل عيد ميلاد Author: حمور زيادة Date: 09-01-2009, 00:14 AM Parent: #26
جاء الاعلان عن افطار البورداب السنوي في رمضان. كنت قد كتبت ثلاثة او اربعة بوستات و اشتكيت في بوست للطيب شيقوق من ان بوستاتي بايرة لا تجد من ينش ضبانها. لكني كنت قد بدأت اكون معرفة او اثنين. دخلت بوست الافطار متوكلا على الله و مارست نوعا من الشغب. و بحاسة الاقلية تضامنت مع الشباب و اثرتهم فتجاوب معي امجد فريد و سامي صلاح ( و كان بيننا تعارف أولي في الفيس بوك ). لكني استطعت ان اذهب الى الافطار و انا اعرف بعض الاسماء و يعرفني ثلاثة او اربعة. في الحقيقة ان الميزة الرئيسية في الافطار كانت اني اعرف شذى بلة حيها الغمام في بلاد العم سام. من الصعب ان يتجاوزك احد و انت جالس مع الغجرية الماتعة شذى. هذه حقيقة علمية.
Post: #29 Title: Re: سنة أولى بورد .. بوست في شكل عيد ميلاد Author: حمور زيادة Date: 09-01-2009, 00:15 AM Parent: #28
بعدها اتتني الفرصة الكبرى تطرق بابي. انا من هذا البوست التوثيقي ابعث التحايا للاخ الهكر اينما كان. فله مني جزيل الشكر على فعلته الشنعاء التي فعلها في البورد. و انما مصائب بكري عند حمور فوائد. و ساخبرك كيف كان التهكير فائدة لي.
Post: #19 Title: Re: سنة أولى بورد .. بوست في شكل عيد ميلاد Author: مؤيد شريف Date: 08-31-2009, 11:50 PM Parent: #15
ألف مبروك وعقبال المائة
وشهادتي فيك مجروحة
ولكن يكفي ان اختلافك لا شطط فيه
احترامى
Post: #23 Title: Re: سنة أولى بورد .. بوست في شكل عيد ميلاد Author: AnwarKing Date: 09-01-2009, 00:01 AM Parent: #19
والله الليهو فضل على بكري لا قوقل ولا حاجة...ياهو الناس الكتّابين والفقريين الزييك ديل...سُب عليكم !
الزول فينا يلاقط في ضُلو ...ومستعد يقوّم ليهو مليون شكلة في اليوم من كوريا البعيدة دي... عشان يجي يقرا لناس تماضر وسابقاً ندى وندى وإيمان وإشراقة والجندرية وبكري الجاك وعبد العاطي ، ونصّار وحسن ستّة وملامح وناس فعلاً أتعلمتا منهم الكتير ود.حيدر بدوي ود.عباس مصطفى صادق، ولاحقاً للمنصور جعفر... أو أبو آمنة وآخرين لا يمكن حصرهم هنا...لهم جميعاً المحبة والتجلة والإحترام...
أها عشان كدة وقت نلقى الهتر والشكل...ما بنتلفت...الواحد في بطنو بطيخة صيفي أنو حا يعتر ليهو في عضم جاوره اللحم عبر بوست طيّب الأخلاق وكدة...
شفتا إستراتيجية الدمار الشامل بتكون كيف؟
حتى أنو هواياتنا بقت تتغير يا (حمّور = قيلي) ، عارف ولا لا؟
هواية صديقي الحبيب أحمد عبد الله هي: مناكفة ذوي العاهات الفكرية...لوولز
وعلى ذلك قس...
تقبّل إحتراماتي وحبي لك لله في لله...تغشاك رحمة الأوسط...
أخوك أنور
Post: #25 Title: Re: سنة أولى بورد .. بوست في شكل عيد ميلاد Author: محمد عبد الماجد الصايم Date: 09-01-2009, 00:05 AM Parent: #19
وصادف هذا البوست إني مولع شيشة وبسمع في محمد مرغني والشباب الحلوين
حمور إنت مشكلة ياخ شايل ليك حتة في قلبي كبيرة يا معلم داير ليكـ قلب إكستيرنل وكــدا
Post: #21 Title: Re: سنة أولى بورد .. بوست في شكل عيد ميلاد Author: وجن Date: 08-31-2009, 11:53 PM Parent: #15
كل سنة وانت طيب يا أستاذ يا قدير وعقبال مئة شمعة وربنا ما يحرمنا من ابداعاتك
Post: #27 Title: Re: سنة أولى بورد .. بوست في شكل عيد ميلاد Author: Muna Khugali Date: 09-01-2009, 00:14 AM Parent: #21
وانت فخرنا يا شاب يا حلو الاخلاق..
كل سنة وانت طيب..
Post: #30 Title: Re: سنة أولى بورد .. بوست في شكل عيد ميلاد Author: ناصر احمد الامين Date: 09-01-2009, 00:21 AM Parent: #27
حمور .. انت ليه كدا ياخي ؟؟؟؟
Post: #31 Title: Re: سنة أولى بورد .. بوست في شكل عيد ميلاد Author: حمور زيادة Date: 09-01-2009, 00:34 AM Parent: #30
شكرا يا عمر التوم. كتر خيرك اخوي.
Post: #32 Title: Re: سنة أولى بورد .. بوست في شكل عيد ميلاد Author: حمور زيادة Date: 09-01-2009, 00:36 AM Parent: #31
Quote: اتلومت يا قوقل
يا وهبة انا لو فتحت بوست سميتو قصتي مع وهبة بدي العدو فيك فرصة .. خليك حنين يا عمك. كتر خير المسلمي و احمد موسى.
ـــــــــــ عزيزي القارئ انا ماسك على وهبة ذلة في المذكرات دي.
Post: #33 Title: Re: سنة أولى بورد .. بوست في شكل عيد ميلاد Author: حمور زيادة Date: 09-01-2009, 00:37 AM Parent: #32
Quote: ألف مبروك وعقبال المائة
وشهادتي فيك مجروحة
مؤيد الرجل الطيب الدواخل .. شكرا لك .. تحياتي و احترامي يا اخي
Post: #34 Title: Re: سنة أولى بورد .. بوست في شكل عيد ميلاد Author: حمور زيادة Date: 09-01-2009, 00:41 AM Parent: #33
أنور كنج .. تعرف انا اتجاوزت في بداية التوثيق ده اني احكي علاقتي بالانترنت قبل البورد عشان ما اقول انو كنت بسمع بديناصورات النت انور كنج و علي سعد علي. يا زول انا لمن لقيتك بتكتب هنا ده حسيت ليك نو الموقع ده مهم خلاص. زي واحد من الاعضاء مرة خش لنادية عثمان بوست و سألا انتي نادية المذيعة ؟ لمن قالت ليو ايوه . الزول قال هذا المنبر العظيم يجمعنا بشخصيات رائعة.
Post: #35 Title: Re: سنة أولى بورد .. بوست في شكل عيد ميلاد Author: حمور زيادة Date: 09-01-2009, 00:43 AM Parent: #34
يا انور .. نسيت اقول ليك قيلي دي اساسا هي "قيلا " .. بعد داك اللسان السوداني غيرا. و الباقي انت عارفو اكيد.
Post: #36 Title: Re: سنة أولى بورد .. بوست في شكل عيد ميلاد Author: حمور زيادة Date: 09-01-2009, 00:47 AM Parent: #35
Quote: وصادف هذا البوست إني مولع شيشة وبسمع في محمد مرغني والشباب الحلوين
يادوب ؟ انت مشيت المكسيك وله شنو ؟ الموضوع ده مش كان بعد الفطور طوالي يا عمك ؟ انتو بتفطرو الساعة كم ؟
Post: #37 Title: Re: سنة أولى بورد .. بوست في شكل عيد ميلاد Author: حمور زيادة Date: 09-01-2009, 00:49 AM Parent: #36
شكرا يا وجن .. مية شمعة اسفيرية دي اكون عجوز خرفان و ما عندي موضوع .. و الله ابراكم جنس بري. هو هسه انا ما مقصر.
Post: #38 Title: Re: سنة أولى بورد .. بوست في شكل عيد ميلاد Author: حمور زيادة Date: 09-01-2009, 00:50 AM Parent: #37
الرائعة منى خوجلي .. أحمد لبكري و موقعه أن عرفني بك و منال. ان لم يكن له الا هذا لكفاه.
Post: #39 Title: Re: سنة أولى بورد .. بوست في شكل عيد ميلاد Author: حمور زيادة Date: 09-01-2009, 00:51 AM Parent: #38
Quote: حمور .. انت ليه كدا ياخي ؟؟؟؟
ما هو انا يا ناصر صحيت الصباح الساعة تسعة بليل كده .. و الفرن كان قافل و التلفزيون شغال .. فعشان كده يعني. ما بيدي و الله.
Post: #41 Title: Re: سنة أولى بورد .. بوست في شكل عيد ميلاد Author: Haydar Badawi Sadig Date: 09-01-2009, 01:02 AM Parent: #38
دخولك، يا أستاذ حمور، كان إضافة نوعية للمنبر. كل عام وأنت بخير، ونحن، بوجودك مستأنسين بشخص يفكر قبل أن يكتب، ويجمل الحرف بالمواقف والمواقف بالحرف. تناولك لقضية لبنى، وغيرها من القضايا الآنية ذات الدلالات التاريخية الكبيرة، نبهني لك بأكثر من كل مساهماتك الأخرى القيمة.
ومثلك يسعد المرء أن يراه خصماً فكرياً، فالخصومة مع من يفكرون ليست إلا خصباً إنسانياً، يدرك من يتعاطاه أن الفكر الحر نفسه ليس إلا وسيلة للحياة الإنسانية الخصيبة.
ولا يجب أن تهزم الغاية بالوسيلة، وإن كانت تلك الوسيلة التفكير الحر.
كثر الله من أمثالك، يا عزيزي.
Post: #40 Title: Re: سنة أولى بورد .. بوست في شكل عيد ميلاد Author: AnwarKing Date: 09-01-2009, 00:52 AM Parent: #35
Quote: و الباقي انت عارفو اكيد.
أها كدة بقى بترفع لي ضغطي...وضغط مليون شخص آخرين بيكونوا متابعين للكلام ده...والشمار مفطّسهم يا حمّور...
أكرر وأكرر وأكرر...
Every Tiny bit of Information, Counts
فلا تستهون الموضوع...
حا تجي إنتا زاتك يوم تقوقل روحك عشان تلقى المعلومة، "بعد عمر طويل " وزهايمر متأخر... فأكتب المعلومات كما تحب أن تجدها في المستقبل...
دي النظرية بتاعتي الماشي بيها يا حمّور...بعد مرات بيجيني ملل من روحي زاتا...لكن خايف ناس إقبال بتي ديل بعدين يغشوهم شفوت النت عبر الويكي بيديا وكدة...لوولز
فعشان كدة بالذات المعلومات السودانية دي أسهب فيها قدر ما تقدر يا حمّور...
بعد المقدمة الطويلة دي...أها ما عارف قيلي أصلها قيلا... جد جد والله...
أنا قيلي دي زاتها لافحها من بروف جعفر ميرغني...هي والأبوابي وأسماء مشتركة تاني بين القبائل السودانية المختلفة...
كامل إحترامي يا حمّور...وأنتم سنايرنا وديناصورات علينا ونحن تلاميذ صغار جداً في دروب هنا وهناك...
منكم نستفيد
Post: #42 Title: Re: سنة أولى بورد .. بوست في شكل عيد ميلاد Author: محمد البشرى الخضر Date: 09-01-2009, 06:04 AM Parent: #40
Quote: يا وهبة انا لو فتحت بوست سميتو قصتي مع وهبة بدي العدو فيك فرصة ..
النبي ... الرسول باصيها بالمسنجر إن شاالله و أنا بتكفل بالباقي إذ لا اخاف ولا ارعى في وهبة عهدا أو ذمة
مبروك الشمعة الاسفيرية و عقبال السادسة *
___________________________________________ * ستة سنة للبورد افتكر مور ذان إنف
Post: #43 Title: Re: سنة أولى بورد .. بوست في شكل عيد ميلاد Author: زينب بدر الدين Date: 09-01-2009, 07:17 AM Parent: #42
الابن الفاضل حمو لك التحية والاحترام تصدق أنا احترمتك من كتاباتك ومن الناس الى الزول بفتح بوستاتم دون تردد فى ناس كدا تفكر مائة مرة قبل ماتقرى ليم خلى ترد الموقع دا بكشف حاجات كتيرة فى ناس بتكون عارفم من فترة وخاتيهم كدى فى حتت ناس مهمين وبفكروا تتابع تلقاهم العرفتو داك كان حاجات كدى من الكراس ساى والله أنا سعيدة بكل ما تكتب لكين سعيدة بان هناك شباب يحملون هذه الأخلاق أكتر من الكتابة
Post: #44 Title: Re: سنة أولى بورد .. بوست في شكل عيد ميلاد Author: Hussein Mallasi Date: 09-01-2009, 07:53 AM Parent: #43
Quote: كان البوست مليئا بـ " الرائعة تماضر فلق الصباح يغازل خط قرينتش حين تبلور احاسيس بصات الكلاكلة بما تعانيه "
اتيت لاهثة لاستمتع باناقة الحرف واينما وجد الرائعون اكون انا .......
Post: #47 Title: Re: سنة أولى بورد .. بوست في شكل عيد ميلاد Author: جعفر محي الدين Date: 09-01-2009, 08:20 AM Parent: #44
الأخ/ حمور زيادة سلام وصبحك الله بكل خير وعقبال تكمل الأساس بالجد أنت من القلائل الذين يعبرون عن سودانيتنا الأصيلة تصور أنا كنت متخيل إنك قديم قدم التعريفة في هذا الموقع مرات كتيرة أدخل بوست عشان أعلق أجدك سبقتني وكفيتني شر التعليق
Post: #45 Title: Re: سنة أولى بورد .. بوست في شكل عيد ميلاد Author: العوض المسلمي Date: 09-01-2009, 08:04 AM Parent: #43
اووووووو المبدع الذي عرفناه عن قرب ,, ويشهد الله ان بعد انضمام حمور للمنبر صار للمنبر طعم ورائحه ولون ,, ويكفي عندما يكتب حمور يسكت الاخرين ,, سعدت جدا اخي حمور باني احسب نفسي صديقا لك ,,
Post: #48 Title: Re: سنة أولى بورد .. بوست في شكل عيد ميلاد Author: الصادق عوض Date: 09-01-2009, 08:26 AM Parent: #43
تعريف يا حمور أنا قاعد بقشر بيك .....بقول "صحبي حمور قال ...و صحبي حمور كتب " ....
....over
Post: #49 Title: Re: سنة أولى بورد .. بوست في شكل عيد ميلاد Author: عفاف الصادق بابكر Date: 09-01-2009, 09:28 AM Parent: #48
حمور زيادة - كيفنك وكل سنةوانت طيب .. وتصوم تفطر على خير .. تعرف مما دخلته في المنبر ده وانا منتظره لي فرصة فيك ... يأخ انت إبداع عديييل كده .. ويشهد الله بفتش على بوستاتك بس (ابحث عن فضولي) .. وبعرفك جنس عرفه سبحان الله ... وحكمة الله لا بتعرفني ولا بتعرفني .. بس بارك الله فى الشيء ده .. يا سيدي وأصل إبداعك وربنا لا يحرمنا من مداخلاتك حتى .. ولك كل الود
ما رحبته بي .. لكن كيتن فيك بدخل بوستاتك ..
بت الصادق
Post: #50 Title: Re: سنة أولى بورد .. بوست في شكل عيد ميلاد Author: Siham Elmugammar Date: 09-01-2009, 09:52 AM Parent: #49
بس (بكسر الباء)
Post: #51 Title: Re: سنة أولى بورد .. بوست في شكل عيد ميلاد Author: وليد محمد المبارك Date: 09-01-2009, 10:04 AM Parent: #50
حلاتي يا ناس
Post: #55 Title: Re: سنة أولى بورد .. بوست في شكل عيد ميلاد Author: nadus2000 Date: 09-01-2009, 11:01 AM Parent: #51
Happy MinberDay, Hamoooooor
من خلال وجود (منذ الأزل)، في هذا المنبر، ومراقبة لدورات صعوده وهبوطه، والقادمين والمغادرين، فألاحظ أن هناك دورة خاصة وموازية لأخريات، وان كان مسارها مختلف نوعياً،وهي أن أن كل فترة يظهر في سماء المنبر كاتب/ة، متميز، ويشكل إضافة حقيقية، متميزة، ويحضرني هنا عدد كبير من الأخوة والأخوات أعتقد أن ذكرهم/ن قد يحتاج إلى بوست خاص، ولكن يقيني أن حمور زيادة، أحد هذه الإضافات المهمة...
دايماً ما أجد نفسي في حالة مقاربة بين حمور وعصام عبدالحفيظ، فكل منهما يختار الزاوية التي لن تخطر ببال الناس العاديين الزينا.
Post: #52 Title: Re: سنة أولى بورد .. بوست في شكل عيد ميلاد Author: قيقراوي Date: 09-01-2009, 10:39 AM Parent: #50
Up
Post: #53 Title: Re: سنة أولى بورد .. بوست في شكل عيد ميلاد Author: Hani Arabi Mohamed Date: 09-01-2009, 10:46 AM Parent: #52
كل سنة وإنت طيب
Post: #54 Title: Re: سنة أولى بورد .. بوست في شكل عيد ميلاد Author: عزاز شامي Date: 09-01-2009, 10:47 AM Parent: #1
كل سنة و انت طيب و عقبال ما تذوب السيرفرات في عرق الكتابة ..
______
تلـــــــــــــــــج مؤســـــس
Post: #56 Title: Re: سنة أولى بورد .. بوست في شكل عيد ميلاد Author: Tabaldina Date: 09-01-2009, 11:30 AM Parent: #54
.. . قلنا نبرد جوفنا فى رمضان السخن دا عبر بوست الروائع دا .. ( ملاسي يو ار نوت انكلودت ) ______
كل عام وانتم بخير للجميع
Post: #57 Title: Re: سنة أولى بورد .. بوست في شكل عيد ميلاد Author: محمد عبدالله مختار Date: 09-01-2009, 11:59 AM Parent: #56
الرائع حمور ..
متابعة لصيقة.
واااااااااااااااصل .
تقبل تحياتي
Post: #59 Title: Re: سنة أولى بورد .. بوست في شكل عيد ميلاد Author: مهيرة Date: 09-01-2009, 12:59 PM Parent: #57
والله انا كنت قايلاك من عجايز البورد!
على أى حال انت من حكماء البورد
كل سنة وانت طيب.......يارائع
تحياتى
Post: #58 Title: Re: سنة أولى بورد .. بوست في شكل عيد ميلاد Author: Amjed Date: 09-01-2009, 12:45 PM Parent: #54
ما قالو ليك بيـــس يا حمور
Post: #60 Title: Re: سنة أولى بورد .. بوست في شكل عيد ميلاد Author: الطيب رحمه قريمان Date: 09-01-2009, 01:17 PM Parent: #58
Post: #61 Title: Re: سنة أولى بورد .. بوست في شكل عيد ميلاد Author: جعفر محي الدين Date: 09-01-2009, 10:35 PM Parent: #60
الحفلة انتهت يا حمور ولا شنو ؟
وين الكيكة وباقي الحاجات
Post: #62 Title: Re: سنة أولى بورد .. بوست في شكل عيد ميلاد Author: أيزابيلا Date: 09-01-2009, 11:29 PM Parent: #61
شايفاك ما جبت سيرة البسبوسة ؟؟
ـــــــــــــ سلام وشوق يا صاحب
Post: #63 Title: Re: سنة أولى بورد .. بوست في شكل عيد ميلاد Author: حمور زيادة Date: 09-02-2009, 01:01 AM Parent: #62
شكرا لكلماتك يا دكتور حيدر
Post: #64 Title: Re: سنة أولى بورد .. بوست في شكل عيد ميلاد Author: حمور زيادة Date: 09-02-2009, 01:04 AM Parent: #63
انور .. "قيلا " تعني " الأحمر " في لغة "النوبة " . و منها جاء الاسم " قيلي " و هو اسم معروف في شمال السودان.
Post: #65 Title: Re: سنة أولى بورد .. بوست في شكل عيد ميلاد Author: حمور زيادة Date: 09-02-2009, 01:05 AM Parent: #64
Quote: النبي ... الرسول باصيها بالمسنجر إن شاالله و أنا بتكفل بالباقي إذ لا اخاف ولا ارعى في وهبة عهدا أو ذمة
يا ود البشرى ياخ خليني كاسر بيها عينو كدي ده .. ما شايفو عمل رايح ؟
Post: #66 Title: Re: سنة أولى بورد .. بوست في شكل عيد ميلاد Author: حمور زيادة Date: 09-02-2009, 01:07 AM Parent: #65
الاستاذ زينب .. شكرا ليك .. كثير من التحايا و الود
Post: #67 Title: Re: سنة أولى بورد .. بوست في شكل عيد ميلاد Author: حمور زيادة Date: 09-02-2009, 01:09 AM Parent: #66
Quote:
حسين .. اهلنا قالوا ما يتحير الا مغّيَر .. مالك متحير ؟ نعلو خير أخوي !!
Post: #68 Title: Re: سنة أولى بورد .. بوست في شكل عيد ميلاد Author: حمور زيادة Date: 09-02-2009, 01:10 AM Parent: #67
منال .. و هل الروعة إلا بهاء حضورك ؟
Post: #69 Title: Re: سنة أولى بورد .. بوست في شكل عيد ميلاد Author: حمور زيادة Date: 09-02-2009, 01:12 AM Parent: #68
جعفر .. تسلم ..
Quote: وعقبال تكمل الأساس
و بعدها بكتب ليكم بوست "تجربتي في الكتابة البوردية في الاساس " .. و يجوني ناس الازهري يشبكو لي البوست over .. over لامن يتكلوهو في المانشتات.
Post: #70 Title: Re: سنة أولى بورد .. بوست في شكل عيد ميلاد Author: حمور زيادة Date: 09-02-2009, 01:14 AM Parent: #69
Quote: سعدت جدا اخي حمور باني احسب نفسي صديقا لك ,,
أخي و صديقي العوض المسلمي .. من كان له اخ مثلك لم يندم .. رجل ظاهره كباطنه خير و طيب معشر.
Post: #71 Title: Re: سنة أولى بورد .. بوست في شكل عيد ميلاد Author: حمور زيادة Date: 09-02-2009, 01:17 AM Parent: #70
الصادق يا سلاطين .. مشتاقين ياخ .. متين العودة تاني يا عمك ؟ فارقتنا شذى .. تورّط أمجد .. لكنك ستأتي لتجدني على العهد .. تماما كما تركتني. أبقى مارق بس.
Post: #72 Title: Re: سنة أولى بورد .. بوست في شكل عيد ميلاد Author: حمور زيادة Date: 09-02-2009, 01:19 AM Parent: #71
عفاف يا برلومة .. ياخ حبابك و مرحب بيك .. مكتوب جمب اسمك انك عندك 112 مداخلة .. سويتيهن وين يا زولة ديل ؟ وحات" كندي مر " ما شفت بوست الترحيب حقك. معليش ياخ العتب على النظر و عامل السن.
Post: #73 Title: Re: سنة أولى بورد .. بوست في شكل عيد ميلاد Author: حمور زيادة Date: 09-02-2009, 01:20 AM Parent: #72
Quote: بس (بكسر الباء)
سهام المجمر .. هو الكديس ده إلا يقولو ليو بِس ؟
Post: #74 Title: Re: سنة أولى بورد .. بوست في شكل عيد ميلاد Author: حمور زيادة Date: 09-02-2009, 01:22 AM Parent: #73
Quote: حلاتي يا ناس
عمو وليد الشفت .. أنا عاوز عجلة
Post: #75 Title: Re: سنة أولى بورد .. بوست في شكل عيد ميلاد Author: حمور زيادة Date: 09-02-2009, 01:23 AM Parent: #74
الاستاذ نادوس .. لك الشكر .
Quote: دايماً ما أجد نفسي في حالة مقاربة بين حمور وعصام عبدالحفيظ، فكل منهما يختار الزاوية التي لن تخطر ببال الناس العاديين الزينا.
سيسرني أن أكون شاهد اتهام اذا فكر الصديق المبدع عصام عبد الحفيظ في مقاضاتك بتهمة مقارنة ابداعه بما اخطه.
Post: #76 Title: Re: سنة أولى بورد .. بوست في شكل عيد ميلاد Author: حمور زيادة Date: 09-02-2009, 01:25 AM Parent: #75
Quote: Up
قيقا يا صديق .. أبّك ما بناباها .. و فيك عارفنها و عاجبنا. دمت يا صاحب.
Post: #77 Title: Re: سنة أولى بورد .. بوست في شكل عيد ميلاد Author: حمور زيادة Date: 09-02-2009, 01:25 AM Parent: #76
و انت طيب يا هاني.
Post: #78 Title: Re: سنة أولى بورد .. بوست في شكل عيد ميلاد Author: حمور زيادة Date: 09-02-2009, 01:29 AM Parent: #77
عزاز .. يا نجمة الشمال الضواية .. مثلها انتِ .. حولك تدور النجمات الاخرى .. و ضوء فجرك يزعج المخلوقات البرية فتهتاج اذا طلع.
Quote: تلـــــــــــــــــج مؤســـــس
لقيتي تلجي كيف ؟
Post: #79 Title: Re: سنة أولى بورد .. بوست في شكل عيد ميلاد Author: حمور زيادة Date: 09-02-2009, 01:31 AM Parent: #78
صالح تبلدينا .. اتلومت .. انا قلت صالح ده يجي شايل ليو مقطع حقيبة من المجنن بيهم ناس "الفاس بوك " بهناك. اتاريك جيت تبرد جوفك ملح ؟
Post: #80 Title: Re: سنة أولى بورد .. بوست في شكل عيد ميلاد Author: حمور زيادة Date: 09-02-2009, 01:32 AM Parent: #79
محمد عبد الله مختار .. تسلم .. شكرا ليك و تقبل تحاياي.
Post: #81 Title: Re: سنة أولى بورد .. بوست في شكل عيد ميلاد Author: حمور زيادة Date: 09-02-2009, 01:34 AM Parent: #80
مهيرة .. عجايز البورد دي ما بتتحسب بالصلعة مش ؟
Post: #82 Title: Re: سنة أولى بورد .. بوست في شكل عيد ميلاد Author: حمور زيادة Date: 09-02-2009, 01:36 AM Parent: #81
Quote: ما قالو ليك بيـــس يا حمور
يا أمجد .. القالوا لي هين .. كعب لقالوا فيكم ناس رابطة العلماء.
Post: #83 Title: Re: سنة أولى بورد .. بوست في شكل عيد ميلاد Author: حمور زيادة Date: 09-02-2009, 01:37 AM Parent: #82
الطيب رحمة .. حبابك .. أكون حضورا باذن الله.
Post: #84 Title: Re: سنة أولى بورد .. بوست في شكل عيد ميلاد Author: حمور زيادة Date: 09-02-2009, 01:39 AM Parent: #83
جعفر .. الحفلة ما انتهت و الله .. بس مشغول حبة .. و يوم الليلة ده كان يوم طويل لدرجة اني اتوقعت القى اخبار عاجلة عنو في المنبر . الحاصل شنو كان الليلة ؟ يوم اسبوع عديل. اضافة الى السخانة و المطرة و الكتاحة و قطع الكهربا و قطع الموية.
Post: #85 Title: Re: سنة أولى بورد .. بوست في شكل عيد ميلاد Author: حمور زيادة Date: 09-02-2009, 01:43 AM Parent: #84
Quote: شايفاك ما جبت سيرة البسبوسة ؟؟
أنساني ذكرها حلاوة غيرها .. ( .. )
مشتاقين يا شذى ياخ.
Post: #86 Title: Re: سنة أولى بورد .. بوست في شكل عيد ميلاد Author: حمور زيادة Date: 09-02-2009, 01:47 AM Parent: #85
وثيقة رقم (1) صورة من افطار البورداب العام الماضي ...
يظهر في الصورة : حمور زيادة على يمين شذى بلة - أمجد فريد على يسار شذى بلة - كباية في يد شذى بلة
Post: #87 Title: Re: سنة أولى بورد .. بوست في شكل عيد ميلاد Author: ombadda Date: 09-02-2009, 01:51 AM Parent: #79
مبروك...وعقبال 50 شمعة فى سودانيزأونلاين...
---
Post: #88 Title: Re: سنة أولى بورد .. بوست في شكل عيد ميلاد Author: heba Elmahi Date: 09-02-2009, 02:05 AM Parent: #87
Quote: يظهر في الصورة : حمور زيادة على يمين شذى بلة - أمجد فريد على يسار شذى بلة
كل كنز حارسو جان ..
_______________________ هبة الماحي مركبة مكنة حسين ملاسي
Post: #89 Title: Re: سنة أولى بورد .. بوست في شكل عيد ميلاد Author: Alsa7afa_30 Date: 09-02-2009, 02:07 AM Parent: #87
عيد ميلاد اسفيري سعيد أ.حمور
مزيداً من الإبداع و الكتابة الممتعة ..
رمضان كريم
Post: #90 Title: Re: سنة أولى بورد .. بوست في شكل عيد ميلاد Author: omer osman Date: 09-02-2009, 07:28 AM Parent: #89
Quote: سنة أولى بورد
انشاء الله تقطع الكيبيورد بي عرق العافية.
Post: #91 Title: Re: سنة أولى بورد .. بوست في شكل عيد ميلاد Author: عفاف الصادق بابكر Date: 09-02-2009, 08:03 AM Parent: #90
يا زول قول يا لطيييييف الجديد شديد وكده .. الحاله ما بقينا داخل ..
Quote: وحات" كندي مر " ما شفت بوست الترحيب حقك.
فتشوا بتلاقى ... " كندي مر " ده شنو ده .. أفصح أكثر ...
Quote: معليش ياخ العتب على النظر و عامل السن.
ياخ طخ .. ده عذر شنو ده .. قال العتبى على النظر قال ... وعامل سن ده شنو كمان ده يا أخوي لسه بدري .. وفي انتظار البترول ...
مودتي
بت الصادق
Post: #92 Title: Re: سنة أولى بورد .. بوست في شكل عيد ميلاد Author: هند محمد Date: 09-02-2009, 08:17 AM Parent: #91
رمضان كريم ياحمور وكل عام وانت بيننا شمسا من الابداع لايغيب نورها كل سنة وانت وحرفك بخير
Post: #93 Title: Re: سنة أولى بورد .. بوست في شكل عيد ميلاد Author: ابراهيم الرشيد عبدالرحمن وراق Date: 09-02-2009, 08:32 AM Parent: #92
الاخ حمور
رمضان كريم
اشهد الله اننى استمتع بكل كلمة تخطها على صفحات المنبر
دمت بخير
Post: #94 Title: Re: سنة أولى بورد .. بوست في شكل عيد ميلاد Author: معتصم دفع الله Date: 09-02-2009, 09:42 AM Parent: #93
يا حمور .. ياخي إنت إن شاء الله لا تفوت لا تموت .. زول سمح .. وكتاااب ..
كل الأمنيات الطيبة لك .. ولك محبة لا حدود لها ..
Post: #95 Title: Re: سنة أولى بورد .. بوست في شكل عيد ميلاد Author: ibrahim alnimma Date: 09-02-2009, 11:04 AM Parent: #94
حمور كل سنة وانت بخير : من المقلوب سوف احكي عن تجاربي في الدخول الي بوستاتك، إبتدأت معرفتي بكتاباتك من خلال قصة جميلة وان كنت قد نسيت العنوان ولكن كانت تحكي عن سفر لك مع امك الي شيخ (صوفي ) المهم هذه القصة اعجبتني جداً لدرجة اني عملت ليك distribution سوف اطالبك بحقي نقداً000 حق الدعاية القوية خارج المنبر وداخله...
Post: #96 Title: Re: سنة أولى بورد .. بوست في شكل عيد ميلاد Author: حمور زيادة Date: 09-02-2009, 12:57 PM Parent: #95
Quote: مبروك...وعقبال 50 شمعة فى سودانيزأونلاين...
شكرا يا دكتور امبده .. الف شكر
Post: #98 Title: Re: سنة أولى بورد .. بوست في شكل عيد ميلاد Author: حمور زيادة Date: 09-02-2009, 01:00 PM Parent: #96
Quote: كل كنز حارسو جان ..
اتفاقنا على الكنز أهم من اختلافنا على موضوع الجان يا هبة
Post: #99 Title: Re: سنة أولى بورد .. بوست في شكل عيد ميلاد Author: حمور زيادة Date: 09-02-2009, 01:05 PM Parent: #98
Quote: عيد ميلاد اسفيري سعيد أ.حمور
تسلم يا الصحافة 30 شكرا اخوي
Post: #100 Title: Re: سنة أولى بورد .. بوست في شكل عيد ميلاد Author: حمور زيادة Date: 09-02-2009, 01:07 PM
Quote: انشاء الله تقطع الكيبيورد بي عرق العافية.
جنابو عمر .. اسمك جايي في رحلة العام دي يا جنابو
Post: #101 Title: Re: سنة أولى بورد .. بوست في شكل عيد ميلاد Author: حمور زيادة Date: 09-02-2009, 01:10 PM Parent: #100
Quote: ياخ طخ
عفاف البرلومة .. ياخ طخ .. وله ياخ تخ ؟؟ لأنها تفرق .
Post: #103 Title: Re: سنة أولى بورد .. بوست في شكل عيد ميلاد Author: حمور زيادة Date: 09-02-2009, 01:13 PM Parent: #101
الشاعرة الرائعة هند محمد .. نورتي البوست و الله .. شكرا لطلتك البهية و حضورك الجميل
Post: #104 Title: Re: سنة أولى بورد .. بوست في شكل عيد ميلاد Author: حمور زيادة Date: 09-02-2009, 01:15 PM Parent: #103
شكرا يا ابراهيم دم بألف خير
Post: #105 Title: Re: سنة أولى بورد .. بوست في شكل عيد ميلاد Author: حمور زيادة Date: 09-02-2009, 01:18 PM Parent: #104
Quote: كل الأمنيات الطيبة لك .. ولك محبة لا حدود لها ..
معتصم دفع الله .. تسلم ياخ و ربنا يديم المودة
Post: #106 Title: Re: سنة أولى بورد .. بوست في شكل عيد ميلاد Author: حمور زيادة Date: 09-02-2009, 01:29 PM Parent: #105
ابراهيم النعمة .. شكرا ليك يا سيدي .. اظنك تقصد قصة "مسيد أبارو " .. تجدها هنا :
Post: #113 Title: Re: سنة أولى بورد .. بوست في شكل عيد ميلاد Author: حمور زيادة Date: 09-04-2009, 09:37 AM Parent: #112
ود الخليفة .. الله اكرم .. تحياتي الكتيرة ياخ
Post: #114 Title: Re: سنة أولى بورد .. بوست في شكل عيد ميلاد Author: حمور زيادة Date: 09-04-2009, 09:39 AM Parent: #113
استاذ جمال .. حبابك و الله .. مرحب بيك
Post: #115 Title: Re: سنة أولى بورد .. بوست في شكل عيد ميلاد Author: حمور زيادة Date: 09-05-2009, 01:01 AM Parent: #114
اتتني الفرصة على طبق من ذهب في ايام هجمة الهكر. كان البورد قد اجتاحته حمى ادانة النظام و جهاز الامن الوغد الذي هكر الموقع. حسنا .. انا لا احمل ودا للنظام و لا اكن لجهاز الامن محبة .. لكن ما معنى ان اتعامل مع الاشياء بمنطق انها معلوم من الواقع بالضرورة ؟ ان كان معرفة ان من هكر الموقع هو جهاز الامن فما فائدة البوستات الالف التي فتحت تدين و تشجب و تستنكر و تشتم جهاز الامن ؟ هل سيؤذي هذا شعور جهاز الامن الحساس الرقيق فيكف عن التهكير ؟ ان اغراق المنبر بالاف البوستات التي تتكلم عن التهكير ( كأنه أمر حدث في غفلة رغم انه شهده اكثر من اثنين مليون متصفح و عضو ) هو احب ما يتمناه الهكر. و انا بطبعي سخيف ممل لا اهوي القفز الى النتائج و احب تمحيص و عرض المقدمات باعتبار ان النتائج قد تخطئ لأي سبب .. فيلزمك ان تشرك القارئ في كيف وصلت الى النتيجة ليحكم هو عليها. هو اسلوب كاساليب حصة الرياضيات في المدرسة .. لا يكفي ان تقول ان طول وتر المثلث هو كذا .. يجب ان توضح الخطوات التي اتبعتها للوصول الى هذا الحل. عليه كتبت عن الهكر .. لكني كتبت عن كيف فكرت انا في شخصية الهكر. و كعادتي لا اعطي ما اكتب قيمة كبيرة .. لكن فجأة اصبح بوست " هذا هو ميكافيلي الذي هكر الموقع " من أعلى البوستات مشاهدة و جذب مئات المداخلات.
Post: #116 Title: Re: سنة أولى بورد .. بوست في شكل عيد ميلاد Author: حمور زيادة Date: 09-05-2009, 01:07 AM Parent: #115
المخضرمون يعرفون أن بكري لا يجد وقتا ليقرأ ما يكتب في هذا المنبر .. لكنه اعترف انه كان يتابع هذا البوست بعناية .. اعتقد انه احس انه لم يخطئ حين بعث لي بالباسويرد الصدقة. استنتاجاتي في ذلك البوست ربما لا تعني شيئا و ربما كانت خاطئة تماما .. لكنها جلبت لي مداخلات كثيرة و جعلت لي بعد ذلك زبائن دائمين. و لم يكتف جنابو عمر عثمان بذلك فذهب يفتح بوستا اسماه " حمور زيادة باحث ام بتاع مباحث ؟؟ " يمكنني ان اقول انه حين كان ود الصايم و صلاح الدين نادر يلهثان خلف الهكر من بوست الى بوست استفدت انا من هجومه ببوست واحد في انتهازية واضحة مني .. و كان البوست ناجحا لدرجة ان الاخ الهكر نفسه شارك فيه و بمداخلة. تخيل ؟؟
Post: #117 Title: Re: سنة أولى بورد .. بوست في شكل عيد ميلاد Author: حمور زيادة Date: 09-05-2009, 01:14 AM Parent: #116
في فترة التهكير كنت قد شاركت في منتدى الراكوبة. منتدى جميل و لطيف و هادئ. الغريب ان به عدد من اعضاء سودانيز اون لاين .. لكنهم لا يتشاجرون كما يحدث هنا. حتى خلافهم الحاد يبدو كمداعبة اصدقاء قدامى ان قارنته بالحروب الدائرة هنا. اظن ان للون الاصفر تأثيره على النفوس هنا. في الراكوبة كتبت بوست " لماذا لا يتزوج بطوط زيزي ؟؟ " .. بوست خفيف مبني على ملاحظات لعدة كتاب و ادباء عن عالم والت ديزني. استخرجت من العالم المتشابك ذاك واحدة من اشهر علاقات الحب الابدية التي لا تنتهي .. حب بطوط لزيزي .. و بعد عودة المنبر من أسر الهكر قمت بنشرها هنا حسنا.. انا لا اعتقد اني جئت بشئ عبقري او متفرد في ذلك البوست .. لكنه رسخ في اذهان كثيرين لازالوا يسألونني " هل عرفت لماذا لم يتزوج بطوط زيزي بعد ام لا ؟؟ ". منها احسست اني دخلت عالم سودانيز اون لاين فقد اصبح عندي زبائن.
Post: #118 Title: Re: سنة أولى بورد .. بوست في شكل عيد ميلاد Author: حمور زيادة Date: 09-05-2009, 01:22 AM Parent: #117
اعتقد انها نصيحة مجانية يقدمها ابن العام في هذاالمنبر للكتاب الجدد .. تحتاج أن "تربي زبائن " هنا .. لا اقصد شلة .. الشلة تحتاجها في الشجارات و المناكفات .. اما ان اردت ان تكتب ليقرأك الناس فعليك ان تربي زبائن. لا اعرف كيف يمكن ان تفعل ذلك .. يقال ان تقنية توجد صورة تجذب الناسس مثلا .. و ان اكثر البوستات نجاحا هي التي تحمل اسم عضو في عنوانها .. و يفضل ان يكون عن قضية تناولها المنبر .. يقال هذا .. لكني لا اعرفه بدقة. لا استطيع ان انصحك بكتابة بوست باسم "وهبة يقابل الصمرق .. توجد صور ". انه موضوع من الصعب ان تكتب عنه. اترك لك معرفة الكيفية التي تربي بها الزبائن .. ان تكون مرحا .. ان تكون لماحا .. ان تكون خفيف الظل و لك حضور .. ان تكون سمجا سخيفا يدخل الناس اليك ليمارسوا نوعا من الساونا الفكرية و يتعذبوا بما كتبت و يخرجوا و قد احسوا انهم احباب الله الذين اجتباهم فلم يكونوا مثلك .. انت حر في ذلك .. المهم ان تصل الى النتيجة المرجوه .. ان يكون لديك زبائن محددين تعرف انهم اعتادوا اسلوبك و فهموا طريقتك و ادمنوا بوستاتك .. ان هذا الاحساس مريح جدا .. صدقني انا .. فقد اراحني.
Post: #121 Title: Re: سنة أولى بورد .. بوست في شكل عيد ميلاد Author: Yassir Tayfour Date: 09-05-2009, 04:14 AM Parent: #118
الشقيق حمور! إنت يا صاحب وُلدت إسفيرياً بسنونّك تامات ومعاهِن ضُرس العقل؛ أنا غايتو من شفتّك شفتّك كبير، فترة برلمتّك دي أصلاً ما مرّت عليّ؛ حقيقة يا صاحب إضافتّك للمكان ظاهرة، وباقي رأيِّ فيك إنت عارفو.. ____ ذِلّة وهبة دي يفترّض إنّك تكون أمين مع القاريء العزيز وتفتها، لأنو القاريء العزيز يحب الصراحة، ونحن كذلك..
Post: #119 Title: Re: سنة أولى بورد .. بوست في شكل عيد ميلاد Author: علاء الدين صالح Date: 09-05-2009, 02:03 AM Parent: #116
الجميل الرائع حمور ما إن أرى حروف إسمك تتلألأ على كتف بوست أو متواريةً خلف مشاركة متواضعة.. إلا ويسبقني مؤشر الماوس إلى حيث كلماتك دون أن يدع لي مجالاً لفرض حقي في التريُّث والاختيار.. وكأنه يلقنني ضِمناً لازِمة إعلانية slogan تقول (مع حمور إنت مسيَّر وماك مخيَّر). لك ودي الصافي وعميق الاحترام وكل سنة وإنتَ جميل ورائع ودوماً طيِّب
برلوم لكن من أولاد فريق ريد..(شِفِت صاح؟)
Post: #120 Title: Re: سنة أولى بورد .. بوست في شكل عيد ميلاد Author: ماضي ابو العزائم Date: 09-05-2009, 02:59 AM Parent: #119
حمور سلام و رمضان كريم لفت نظرى حمور في بوست (لبنى) متابعة دقيفة فى الجلسة الاولى بغيدا عن الحماس الذى (ربما) يغطى على منهجية نقل الخبر ثم الانسحاب و ترك المجال لمن شاهد الجلسة الثانية دون إدعاء بطولات زائفة... و هذا يحسب لك تصوم و تفطر بالعافية
Post: #122 Title: Re: سنة أولى بورد .. بوست في شكل عيد ميلاد Author: حمور زيادة Date: 09-05-2009, 05:28 PM Parent: #120
أب تفه .. الشقيق طيفور .. تسلم.
ــــــــــــ خلينا نشد القارئ العزيز بغموض ذلة وهبة لحدي ما نكشفا ليو في الحلقة الاخيرة.
Post: #123 Title: Re: سنة أولى بورد .. بوست في شكل عيد ميلاد Author: حمور زيادة Date: 09-05-2009, 05:31 PM Parent: #122
علاء الدين .. حبابك .. اولاد فريق ريد حاشاهم ما بيكونوا برالمة .. دايما سناير حتى لو جو في الاخر ..
Post: #124 Title: Re: سنة أولى بورد .. بوست في شكل عيد ميلاد Author: حمور زيادة Date: 09-05-2009, 05:33 PM Parent: #123
تحياتي يا ماضي .. شكرا ليك. تصوم و تفطر على خير.
Post: #125 Title: Re: سنة أولى بورد .. بوست في شكل عيد ميلاد Author: lana mahdi Date: 09-05-2009, 11:49 PM Parent: #124
على المستوى الشخصي كسبت وأسرتناحمور زيادة كشقيق كأنه مولود لأمي وأبي أو مولودة أنا لأمه وأبيه (طبعاً دكتور ريفئت حسة بيكون لاوي بوزو وصاري عينوالشمال وبيقرا بآخر نفس كأنو تلببناهو(:(:(:(:(:) المنبر كسب؟ نعم وبدون تحيز عقبال مية سنة يا حبيب وأهديك باقةالورد هذه:
Post: #126 Title: Re: سنة أولى بورد .. بوست في شكل عيد ميلاد Author: حمور زيادة Date: 09-06-2009, 03:58 AM Parent: #125
اختي العزيزة لنا .. شكرا ليك كتير يا حبيبه
Post: #127 Title: Re: سنة أولى بورد .. بوست في شكل عيد ميلاد Author: محمد عبد الماجد الصايم Date: 09-17-2009, 01:37 AM Parent: #126