(سيرة أمدرمانية) .... حمور محمد زيادة حمور ..... ملاحظات قارئ

استمتعت في الفترة الماضية بقراءة ، وإعادة قراءة، مجموعة القصص القصيرة باسم (سيرة أمدرمانية) ،
(باكورة إنتاج – مش بيسموها كده؟) صديقنا حمور محمد زيادة حمور .... صاحب الإسم الفني (حمور زيادة).

ولست مبالغاً حين أقرر أن متعتي بقراءة هذا الكتاب – المجموعة القصصية – هي من المتع النادرة التي تتمناها ولا تدركها كثيراً ،
كتابة تبقى في الذاكرة وتستحق الإحتفاء.

أردت أن أشرككم معي في بعض ما عن ّ لي حول الكتاب،
وأرغب في أن أسمع من الذين حظوا بمتعة قراءته،
وأن أحفز الذين لم يتمكنوا من ذلك.
دعاية مجانية - مستحقة - يا حمور !!

لست ناقداً أدبياً - أو فنياً - ولا ينبغي لي. وربما كانت علاقتي بفنون الأدب أضعف مما ينبغي.
لكنني أزعم أنني قارئ جيد.
فإن أصابت خواطري توفيقاً ... فبها، وإن ضلت طريقها ...... فهي في النهاية .... مجرد ملاحظات قارئ .....

ملاحظات على الهامش (1)
العنوان: (سيرة أم درمانية) .... روى حمور في أحد البوستات السابقة
أنه في بادئ الأمر اختار للكتاب اسم القصة الرئيسية به (حكايات أولاد الحلة)،
لكن دار النشر اعترضت لأن الإسم غير مفهوم في الدول العربية. مما أدى
لتغيير اسم المجموعة القصصية وبالتالي القصة نفسها إلى (سيرة أم درمانية).

ومع تقديري للناحية (التسويقية) التي أوجبت تغيير الإسم ، إلا أنني أرى أن الخيار البديل غير موفق (بالنسبة لي)،
لما سببه (أولاد أم درمان) من (وهمة) سواءً على صعيد الثقافة السودانية أو حتى في (ونسات) الأصدقاء
(لمن الواحد فيهم ينفخ صدرو ، ويقول ليك : أنا ود أم درمان)، وكأنها (أي ود أم درمان) عبارة شافية وصفة كافية لحسم أي نقاش !!

هل فكرنا في (سيرة سودانية)، أو (سير سودانية)، كعنوان أقرب لمجموعة القصص التي شرقت وغربت بنا في السودان،
وذهبت بنا إلى أماكن وتواريخ مختلفة؟ ألا تشكل قصة (حكاوي أولاد الحلة) ، مجموعة (سير سودانية)؟

ملاحظة جانبية: ألا تذكركم (حكاوي أولاد الحلة) ب (حكايات حارتنا) أو (أولاد حارتنا) لنجيب محفوظ ؟
عموماً .... لنجيب محفوظ فقرة كاملة سنأتيها لاحقاً .

ملاحظات على الهامش (2):
غلاف الكتاب، أراه موفقاً لحد كبير، ويتفق معي في الرأي عدد من ذوي الخبرة في مثل هذه المسائل، كما يتفق معنا صاحب الكتاب .... إذن ... فلنتأمل هذا الغلاف الجميل....

ملاحظات على الهامش (3) .... (على الهامش شديد)
الخط الذي طبع به الكتاب ... خط مقروء وواضح، لكنه (غير جميل)،
أعتقد أنه ما يسميه الكمبيوتر Simplified Arabic ،
وفي الكمبيوتر متسع من الخطوط الأخرى.



هي ملاحظات لا تعيب الكتاب، أو الكاتب ... لكننا بالتأكيد نطمح في الأفضل لعزيزنا حمور.



ندخل في الكتاب .... شوية .... شوية

يحوي الكتاب 16 قصة قصيرة، هي بالترتيب الذي وردت به:

1- ليالي القبة النشوانة

2- عندما هاجرت الداية

3- اسمها ربلى

4- تفاصيل زيارة البق بق

5- صباحك سلمى

6- البرسيم

7- رسائل مروان وشمس

8- بديع آخر الزمان

9- مسيد أبارو

10- الخواء

11- سندريلا تبيع حذاءها

12- حجيني يا جدتي

13- الشيخ عطاية الله

14- سيرة أم درمانية

15- شيء لأجل عينيك يا ملاذ

16- غداً يعود حبيبي

............................

أغلب عناوين القصص كانت من النوع المثير ... الموحي ... المحفز للقراءة
وأعتقد أن هذا مطلوب وبشدة ... أن تجد في زحمة الحياة اليوماتي ...
عنوان يستوقفك ... ويجر أناملك لتقلب الصفحة ... وتبدأ ...

فمن منا يقاوم قراءة قصة إسمها:
عندما هاجرت الداية

أو........
تفاصيل زيارة البق بق

أو .........
رسائل مروان وشمس

والعجيبة تماماً ...
سندريلا تبيع حذاءها!!

غير أني أضمن لك أن حافز العنوان لن يتلاشى .... إذ سرعان ما تندمج في القصة
ولن تشعر بالندم لأنك قلبت الصفحة !!

والله شوقتنى شديد وأنا
بحب مثل هذه الكتب التى
تعود علينا بالفائدة مثل
معرفة اهلنا فى الماضى و
وكيف كانو يعيشون وكيف
رغم الحياة القاسية ظلت
البسمة والتسامح شعار ملازم
وجوه الجميع ،،،
أرى ان صورة الغلاف كانت
معبرة كفاية عن الهوية
شكرا اليك هذا الجمال و
الشكر للكاتب حمور على هذا
الالق والى ان أقرأ الكتاب
لنا عودة000


التحية والود00

سبق وان قلت للأديب حمور فى مداخلة لى معه:
كلما تفقدت طير القوافى لا اجدك من الغائبين ,,
وبالفعل حمور يسير فى درب العمالقة وربما يصل قبلهم ,,
لا أدرى كيف احصل على نسخة من هذا الكتاب?

هذا الشبل من زاك الاسد
بن القانوني الضليع المرحوم محمد زيادة حمور

لي قدام اخي حمور

بعض الردود:
- الأستاذ ياسر تمتام:

Quote: والله شوقتنى شديد وأنا بحب مثل هذه الكتب التى تعود علينا بالفائدة

أقرا ...وتعال لينا برايك
غايتو أخدها مني ... ما بتندم

- الأستاذ عبد العزيز الفاضلابي:

Quote: حمور يسير فى درب العمالقة وربما يصل قبلهم

أثق بهذا كما تثق به .... أكيد

- الأستاذ السموأل:

Quote: إبن القانوني الضليع المرحوم محمد زيادة حمور

للوالد محمد زيادة أفضال كثيرة على حمور ... لا يعدها ولا يحصيها

للجميع ... نعود غداً لندخل في (متن) الكتاب
لنقرأ طرفاً من القصص ... ونتحدث حولها...

..... والنوم سلطان

الاخ معتز احمد

تحياتي


الاخ حمور كاتب واديب ومفكر ورخم حداثة سنه الا انه كما قال الحاردلو فات الكبار والقدرو

وقد اهداني نسخة من كتابه عندما زرته في منزله العامر في الحلفايا بعدما وصف لي

الاخ حاج العوض المسلمي مكتبة المبدع حمور وهي بحق تستحق ان تكون مزارا لكل البورداب



----------------------------------
ويا حمور الاستاذ عبد اله عبيد يبلغك تحياته ويتسول من جنابك نسخة من هذا الكتاب

شم

إزيك ياخ لاحولتن
بتغتس وين إنت جابدنا بي جاي وجاي ومالمينا سكة (توصلنا)


ياخ ما تجدع لي أخوك السيرة دي !!
وحاتك دقشت مشوار يقطع الضهر عشان ألم في الكتاب دة
وكأن ياخدر ما غزيت !


المهم أنشاء الله ترسلو لي سي دي
أنا طالما وصلك بقعد مرتاح
وحق الكتاب بديهو لي حمور في اقرب فرصة
عشان ما نملح أولاد أمدرمان ديل



ضحكتني بي وهمة اولاد أمدرمان!!
ههه

يا جماعة زولة يتكرم ويرسل لينا الكتاب دة
يمين في المعرب دي سلقط ملقط ما تلقاهو
اكسبوا فينا ثواب

دكتور طارق يا مبدع
تحياتي


انا علي اقوم بذلك وبشيل الكتاب من حمور وكان ما لقيتو عندو برسل ليك نسختي دي وباخد العنوان من صاحبي ناصر


وكان ما الظروف اقوم اجيبو ليك في المغرب

لا أتجاهل الردود .... لكني أواصل أولاً في إستعراض الكتاب ... وقصصه الممتعه

مع بعض ملاحظات .....

نجيب محفوظ !!!
فلنتمعن قليلاً في هذه الفقرة:

Quote: ثم غلب أهل الخير غضب والده فعفا عنه.. وسعى بعض الأفاضل لدى تجار السوق فقبله أحدهم في دكانه .. انتظمت حياته الجديدة وبدت عليه مخايل المسئولية .. وصار يخالطنا مخالطة كبار التجار لصغار الطلبة .. ولم يبخل علينا بمال أحوجنا إليه طارئ من نزق غانية أو صبوة إلى دار الرياضة . ولما استطالت قاماتنا وأعلن الزغب في وجوهنا استحقاقنا للقب الأفندية جنباً إلى جنب مع شهاداتنا عبرنا الطريق إلى بار الحرية مترفعين عن مخالطة عوام الشعب في انداية ندّو، وجدنا للبديع مجلساً دائماً هناك .. عرفنا أن استقامته لم تفسد نزقه .. وأنه حافظ على صلته بالشيطان حفاظه على صلاته في المسجد.

وهذه:

Quote: انقضت شهور حبسه سريعاً فانطلق يطلب الجنون من جديد.. زار والده غير هيّاب .. ووقف أمام نظراته النارية ليطلب منه مالاً يبدأ به حياة جديدة .. بعد لأي وغليظ مواثيق نقده الشيخ خليفة مبلغاً كفلنا به البديع في بار سان جيمس أسبوعاً .. ولم يوجه منه لخاصة أمره سوى جزءاً يسيراً اكترى به حجرة حقيرة في أطراف أم درمان . وتلطف له أحد الأصدقاء فألحقه بعمل يدوي في إحدى الوزارات .. وقبل البديع الوظيفة بترفع كملك نُزع عن عرشه.. لكنه كان أحوج ما يكون إليها .. فانتفع بها وجادت عليه بدخل ثابت .. لكنه ظل دائم الجهر بمجنون رأيه شديد الاعتزاز بنفسه فاكتسب عدد لا يستهان به من الأعداء ذوي الخطورة ..

هل أحسست أنك تقرأ في قصة كتبها نجيب محفوظ (تحديداً آخر كتاباته ذات الجنون المختلط بالفلسفة والمتعة اللانهائية)؟

إذن أحيلك إلى قول الكاتب (إنداية ندو) في المقتطف الأول و(بار سان جيمس) في المقتطف الثاني ، لتعرف أنك تقرأ في قصة:
(بديع آخر الزمان)
وأن مؤلفها هو حمور زيادة بتاعنا ده

نواصل بين نجيب وحمور ....

لسنا في حل من أن (تتسرب) إلينا (لغة) من نقرأ لهم بكثافة ، من نعجب بهم
كما أن المتعة لا تنتهي لتشابه اللغة... مع إختلاف الموضوع والملابسات .... والمعالجات

لكني لست من أنصار أن يبدأ الكاتب متأثراً بلغة آخرين ....
فكم من مرة أرمي بكتاب لأن كاتبه يصر على ألا يتجاوز العقدة السودانية .... الطيب صالح
فمن الأفضل لي في هذه الحالة أن أقرأ الأصل .... الطيب صالح

لا أعتقد أن حمور قد قصد إلى ذلك ....
فبهذه الموهبة العظيمة التي تتدفق .... أثق أنه بقليل من الإجتهاد والتركيز
سيصل إلى ما يضعه في مصاف النجوم ....
ولنتذكر مرة أخرى قول الأستاذ الفاضلابي:

Quote: وبالفعل حمور يسير فى درب العمالقة وربما يصل قبلهم ,,

فقط ... لتركيز الفكرة ... هاكم هذا المقتطف من القصة الإفتتاحية(ليالي القبة النشوانة):

Quote: لثوان زاره الأمل .. في زحمة المنشدين تسلل إلى دواخله .. أشرقت به نفسه ثم مضى .. بثه جنون الحلم .. عبث وتولى .. هز إيمانه ذي القوائم الهشة وذهب . دنيا واسعة تاقت نفسه إليها فتحفّز لينالها .. صرخ إيمانه المصروع تحت وطأة الحلم : - ستجوع خارجاً كما تجوع هنا . لكنه انتهره : - عندها سأسرق قطعة شواء لأشبع . - ويلك ! تصبح سارقاً وتأثم . - أعود حينها إلى الحوش لأنشد حتى أتصبب عرقاً فيغفر لي الله . قال له محاولاً : - والشيخ صبير ؟! - سينساني . - هو مسئول عنك أمام الله فلن ينساك . لكنه قال بحسم : - في المريدات من يشغلنه حتى ينسى الله .

نخرج من نجيب محفوظ .... لنواصل فيما فعله فينا .... حمور

قبل ذلك ... فلنراجع المداخلات السابقة

سؤال جادي يا حمور:
هل هناك مشكلة في توزيع هذا الكتاب؟
فقد أفادعمر صديق من السودان أنه تحصل على الكتاب منك
كما أن :

Quote: الاستاذ عبد الله عبيد يبلغك تحياته ويتسول من جنابك نسخة من هذا الكتاب

أما صديقنا خضر حسين من السعودية فيقول لك أنه:

Quote: وحاتك دقشت مشوار يقطع الضهر عشان ألم في الكتاب دة وكأن ياخدر ما غزيت !

أما طارق جبريل من المغرب (دي الشياطين التلاطاشر عديل) فيفتح باب الأجر والثواب لمن يمده بنسخة من الكتاب !!

إنت المصريين ديل (ملحوك) ولا شنو ؟

عزيزي خضر:
أنا موجود ... بتاوق في عشمك الممتد للإصلاح ... إصلاح المنبر ... والبلد
ومشتاق ليك ياخ
الكتاب بيصلك بطريقة (سرية) مني ... خلي باقي الشياطين التلاطاشر يفتشوا براهم !!

تحياتي لجميع المتداخلين

العزيز معتز ..
كيفنك يا زول ..
لساتك تحليلي و قارئ مخيف ..
يسترنا الله معاك
حاضر و مع شكري ليك و للجميع اعلق ليك على حتات عاوزه تعليق

الاسم بين حكايات اولاد الحلة و سيرة ام درمانية

اعتراض الناشر كان منطقي بالنسبة لي ..
خصوصا لو قرأ القارئ العربي العنوان على انه اولاد الحَلّة ( بفتح الحاء المهملة و تشديد اللام ) كان حيعتبرو كتاب هزلي
خيار السيرة السودانية كان غير وارد لأنه فضاء القصة صاحبة العنوان كان ام درمان ..
و الام درمانية غلبت على المجموعة الا في بعض قصص
حتى الاماكن التي لم اصرح بامدرمانيتها كان النفس الامدرماني حاضرا فيها

Quote: ومع تقديري للناحية (التسويقية) التي أوجبت تغيير الإسم ، إلا أنني أرى أن الخيار البديل غير موفق (بالنسبة لي)، لما سببه (أولاد أم درمان) من (وهمة) سواءً على صعيد الثقافة السودانية أو حتى في (ونسات) الأصدقاء (لمن الواحد فيهم ينفخ صدرو ، ويقول ليك : أنا ود أم درمان)، وكأنها (أي ود أم درمان) عبارة شافية وصفة كافية لحسم أي نقاش !!

هم كده اولاد ام درمان .. من زمن الترماي و الاذاعة المن مبنى البوسته ..
و ده تحيز ما اخفيتو في الكتاب ..
ما لاقتك عبارة : حب ام درمان حقيقة كونية ؟
اعمالي حتى الان هي موشحات حب ام درمانية و رسائل اسف لقريتي في الشمال و علامات تعجب من تحولات البشر .. و للحب في ما بين ذلك مكان
لومني يا معتز على اي شي ..
الا ان تلومني على تمجيد ام درمان
و البريد ام در انا بريدو ..
و هذا مني لك للتحذير و القمع

Quote: لكني لست من أنصار أن يبدأ الكاتب متأثراً بلغة آخرين ....

و ازيدك من الشعر بيت يا معتز في التأثر ..
ده اظنو ما ظهر ليك شديد ..
انا تأثرت بثلاثة في كتابة القصة ..
محفوظ
ماركيز
صنع الله
البيخلي محفوظ يجي على بال القارئ هو تفرد محفوظ بالواقعية الاشتراكية و التوصيف المتفرد للمكان و النقلة البارعة بين الحدث و المنلوج الداخلي
دي مهارة حاولت شديد اكتسبا منو
خايفك تكون وقعت في النمطية انت زاتك يا معتز ..
كتابة عن الشمال اذن هو طيب صالح اخر .. أووف .. مقلد
كتابة عن الحي الشعبي و الزقاقات و عبق الماضي اذن هو نسخه من محفوظ ... اووف .. حاكاي
كتابة عن الواقعية السحرية و مدن خيالية و سيرة اسرة اذن انت تنقل مئة عام من العزلة .. اوووف .. حرامي

هل فكرت يوم في التشابه بين مئة عام من العزلة و الحرافيش ؟
لو قارنت حتندهش


المهم .. كترت ليك الكلام
التأثر ( انت ما قلت تقليد مش ؟ ) بمحفوظ و ماركيز و صنع الله لا انكره
و حتى اشعار اخر انا ابن هذا الادب
ما مطلوب من كل اديب جديد يكون ديستوفيسكي و يصنع ادب جديد
ربما اتطور بمثل هذه القراءة
و ربما .. لا قدر الله .. اظل مكاني
لكني بفخر انو قارئ حصيف زيك يقول انو رغم وجود تشابه في بعض القصص مع اسلوب شيخنا محفوظ لكن ده ما خلاهو يمل القصة
اسم اللعبة بالنسبة لي هو المتعة
و طالما انها تحققت فما مهم اسلوبي ذكر القارئ بمنو
فلحدي ما حمور زيادة يختط اسلوبو حقو براو المهم انو المتعة ما تقيف
وله كيف ؟

ماشة افتش الكتاب

معتز

لك التحايا

بالله اعرف لى الكتاب ده موجود وين فى السودان

ولو مطبوع فى مصر , مين الناشر

الظاهر حمور مطنشنا

واصل

متابعين

بالنسبة لأسئلة الشياطين التلتاشر
فالكتاب منشور في مصر .. و التوزيع الاساسي داخلي في مصر
و في الوطن العربي عبر معارض الكتب
مشى الجائر كده
و جا السودان كده ( و سبحان الله هنا كانت المشاركة ضعيفة لاسباب ليها علاقة بوزارة التربية )
و مشا الدوحة كده
و حيلف الامارات و غيرا
هل في توزيع مباشر ؟
ما اظن
العارفو انو بيحومو بكتبم المعارض و يبيعوا للجمهور
و بعد داك اذا في دار محلية عاوزه طلبية بعد تشوفا في المعرض بتطلبا
عموما انا ما قلقان
لأنو الكتاب اطبع اخر شهر تمنية
و بدا نزول متقطع اختباري في القاهرة و في معرض الجائر لغاية اخر شهر عشرة
فتسويقيا هو يادوب ليو تلاتة شهور في السوق


الاسئلة دي كانت حافز اني اتجه لطباعة الكتاب التاني في بيروت
اللبنانيين بيمتازوا بقوة توزيع خارجية عالية
لكن ..
بعد رسلت المسودة جاني ناس زيك كده نصحوني
قالوا لي يا مجنون اصبر حبة
خلي الكتاب الاول يعمل حاجه
شخصيا كانت خطتي القديمة كتاب كل ستة شهور ( بخطة مجموعتين - رواية- مجموعتين )
و اظنك عارف اني محتفظ بحاجات تمشيني كم سنة
لكن تم تأجيل الخطة الى حين اشعار اخر

اي خدمات تانية يا عزيزي معتز ؟
اها تعال استلم بوستك
بمشي اخد لي لفة و اجي
بالله ركز لي على "مسيد أبارو " و " صباحك سلمى " و "سندريلا " عاوز اشوفك طلعت منهم بشنو ديل بالذات

عزيزي حمور ....
شاكر ومقدر ردودك الشافية ......
بالجمبة كده : غالباً بعد عشرة سنين لمن تنشر كتابك الخامس (بمعدل الكسل بتاعك ده) ما حتهببوا لينا ذاتو !!

ويا زول ما عندي اعتراض على كلامك
إتأثر بنجيب محفوظ (في قصتين تلاته من 16 ما بيناتنا)... أو صنع الله إبراهيم (ده زول كتاب ياخ) ....
غير إسم القصة .... أي حاجة
إلا أم درمان .... دي ما بقدر عليها
والله يا حمور عقدة نفسية بالدرب
ما علينا .....

بالنسبة لموضوع التوزيع ....
بعرف ناس بكتبوا .... وبطبعوا عند المصريين (لأسباب كتبرة)
لكن بيتدخلوا في التوزيع بشدة ...
لأنو زي ما إنت قلت :

Quote: التوزيع الاساسي داخلي في مصر

ودي ما حاجة كويسة لكتاب سوداني

يعني ... لو جبت ليك خمسمية نسخة وختيتهم في عزة والشريف .... إلخ
يبقى كل ما زول يسأل ، حيعرف إنو الكتاب في عزة
كده ببساطة طارق جبريل بيرسل زول يشتريهو ليهو
و .... و..... ، لما يخلصوا الخمسمية (بأسرع مما تتخيل)
تاني عزة والشريف براهم بيمشوا يجيبوا غيرهم
وحيتفقوا معاك على التاني والتالت براهم برضو ....
فكرة .... شوفها ......

وخليني أواصل في ملاحظاتي لأنو جايينا ويك إند ....
ومهما كان الكتاب عاجبني ، ما ممكن أقضي ويك إند بقرا في كتابك !!!

Quote: بالله ركز لي على "مسيد أبارو " و " صباحك سلمى " و "سندريلا " عاوز اشوفك طلعت منهم بشنو ديل بالذات

حاضر يا أخينا ... بس أنا هسي داخل على "الخواء"

سيرة أم درمانية .... سياحة الزمان والمكان

أذكر أن حمور كان قد ناقش في أحد البوستات مدى ارتباط (شخص) الكاتب بما يكتب (كموضوع) في ذهن القاريء.
وهل تصح محاكمة الكاتب الذي يكتب قصة عن إنداية على أنه شخص سكير ..... إلخ

لم أتمالك نفسي من الإبتسام وأنا أطالع مجموعة القصص (سيرة أم درمانية) عندما تذكرت هذا النقاش.
فمجموعة القصص هذه قد طافت بنا في عوالم مختلفة من حيث الزمان والمكان.
أوقات سابقة لو إفترضنا أن الكاتب عاشها فمعنى هذا أنه ينافس نوحاً في طول العمر.
وأماكن مختلفة لو طافها حمور كلها لأفنى عمره السابق واللاحق.

عزيزي حمور ....
هو بإختصار ... الفرق بين من كان مثلك (يقدم رؤية مختلفة)، والبشر العاديين (من أمثالي).
قد أقرأ كتاباً عن معركة كرري، فأنهمك في تحديد مواقع الجيوش. وربط الواقعة التاريخية بما سبقها وأنظر لأثرها في تاريخ السودان. بينما تقرأها أنت فتكتب لنا قطعة مبدعة مثل (الخواء) ....

مقتطف:

Quote: رائحة العفن تفوح من كل صوب ، وأنين من الأجساد المتكدسة يسمعه الآن .. الذين اعتادوا لسعات الشمس علي جراحهم طوال النهار يفتقدونها مع الآلام التي تزحف عليهم . امرأة تصرخ في مكان ما .. لابد أن رجلها مات بين ليلة الأمس وهذه الليلة .. بطرف عينه يبصر الأشباح السوداء تتجمع في مجال رؤيته .. ربما كانوا رسل ملك الموت .. كان ملك الموت يأتي الناس عياناً حتى فقأ موسى عينه .. هو لم يمت بعد .. لكنه لا يعرف إن كان لا يزال حياً . الألم لم يعد موجوداً .. جراحه لم تلتئم بعد لكنه لا يشعر بالألم .. ربما تعوّده .. رجله اليسرى لا يحس فيها ألماً رغم أن خديجة قالت أن إصابتها بالغة .. هو في الحقيقة لا يحس رجله نفسها .. في النهار كانت الرمال تسلخ جلده علي مهل وثقة .. العرق الذي يكسوه كان ناراً تكوى جراحه وجلده المتسلخ . الآن ! والأرض تختلط بالسماء .. لم يعد يحس ألماً .

متعة جد ....

Quote: سيرة أم درمانية .... سياحة الزمان والمكان

Quote: متعة جد ....

اها الحندكة دي حدها وين ؟

السعودية ما جبتا سيرتا يا حمور
خدر حليتو مشكلتو يا معتز
اها بقية اولاد ماما - و ما اظنهم تلطاشر بس - الفي السعودية ديل حلهم كيف ؟



فتحي من جدة

اخي مبروك باكوره الانتاج وتعيش وتنتج
لك التحيه.

Quote: هم كده اولاد ام درمان .. من زمن الترماي و الاذاعة المن مبنى البوسته .. و ده تحيز ما اخفيتو في الكتاب .. ما لاقتك عبارة : حب ام درمان حقيقة كونية ؟

عزيزي Motaz Ahmed لاداعي للحساسيه تجاه الدره امدرمان ,
فالعاصمه الوطـنيه للجميع وبالجميـع

وشكرا للكونيه ياحيمور.

_______________________________________________

ليتهم يعلمون ان عمر اللحظـه في بعـدك يا خـرطـوم سنين طـوال.
د شهـاب الفاتح ـ كـوالالمبور

حباب السيره الامدرمانيــه ..
حبابكم في العاصمه الوطـنيه..


بانوراما امدرمان ( فيديو ) ابداع وقلوب وحب واكثر.. حباب...في العاصمه الوطـنيه.

شكرا معتز

فهكذا قد اضفت الي قائمتنا لما يستحق ان يقرأ جديدا

حمور ومن خلال متابعة كتاباته بالمنبر كاتب مبدع وملتزم

ويبقي ان نطارد نسخة من السيرة الامدرمانية ولا ننتظر المفلسين يعرضوها عند كمال وداعة

غايتو موعودين بمتعة

علي الجمبة كدة:
بالله وقف سيرة اولاد امدرمان وما ادراك تقوم تديهم الفرصة ويجي يفلقونا

Quote: حمور يا صديقى اقترح عمل تدشين للمجموعة باحتفالية مبسطة وتعريفية قرات جزءا منها وانا على يقين انها تستحتق ربما وضعًت طوبة فى بناء السرد القصصي القصير خاصة وان صاحبها متمكن تماما من اللغة العربية -(بتذكرنى الناس القرو فى المعهد العلمى زمان) يا زمان المعهد العلمى!! حمور يا صديقي انت وردت ماء اهلك بسقط اللوى واظنك قرضت قرضهم وبالذات فيما يتعلق ب"نسخة البرقوقي" وما شاكلها رغم ايمانى بالحداثة الا اننى اؤمن باللغة..وحالة كونها تمارين مستمرة لم تكتمل بعد ولن تكتمل ما دامت التجربة تسعى - ربما اتحدث من واقع ايمانى بمدرسة مختلفة فى الكتابة لكن يا حمور يا صديقى انا مثلك اؤمن ان العبور بعوالم الكتابة القديمة منحى ضروريا لتنضج الثمرة التى فى يدينا ولنقر بان خيارنا كان صحيحا او لنرتد عنه... فى اللحظة التى تكون فيها الاداة(اللغة) كائنا مستقلا لا يعنيه فقط ان يعبر عن فكرتك بل لا تكاد فكرتك ان تكون سوى جزءا يسيرا من المفردة...اعنى ان هالة المعنى تفوق ما اعددته لها وذاك حديث اخر ــــــــــــــــــ دعنا ندشن هذه المجموعة اقترح مركز الخاتم عدلان لنقرا أجزاءا منها على ملأ ربما نحن موعودون بسيرة كاتب عظيم تتخلق ونحن شهود ربما يا صاحبي

كتبت هذا الحديث قبل عدة شهور يا معتز

فى بوست يتحدث عن ذات المجموعة








* ومشتاقين
على جنب كدة

بعد غيبة ....

فتحي قيقراوي (من جدة) :

Quote: السعودية ما جبتا سيرتا يا حمور خدر حليتو مشكلتو يا معتز اها بقية اولاد ماما - و ما اظنهم تلطاشر بس - الفي السعودية ديل حلهم كيف ؟

حلي قلتو فوق ... يتوفر الكتاب في السودان ... والباقي هين
أما خضر ... فلا تلمني في ود تجاه إنسان متميز

الأعزاء شهاب الفاتح وعبد الله عيدروس:
في إنتظار أن يجمعكم الله بالكتاب ... ونسمع رايكم
أما أم درمان ... فده طرفي منها ... أفرحوا بيها
البوست جميل يا شهاب (في حدود طبعا ... لأنو عن أم درمان !!)

الدكتورة إيزابيلا:

Quote: كتبت هذا الحديث قبل عدة شهور يا معتز فى بوست يتحدث عن ذات المجموعة * ومشتاقين على جنب كدة

قرأت مقترحك بتدشين الكتاب في مركز الخاتم عدلان
وبرغم (تحفظي العقائدي) على المركز و(سيد الإسم) !!
إلا أنه مركز متطور ... ونشاطه محضور
أتمنى جدية (منكم) في التحضير لمثل هذا التدشين

وعدييييل كده : بالأكتر

يا معتز ..
بعد تخلصو انت و شذى من السلام و الشوق احب اقول ليك الاتي :
اليوم 15 يناير تسلمت مكتبة دار عزة نسخا للبيع من كتاب سيرة ام درمانية
دار عزة للنشر و التوزيع بالخرطوم شارع الجامعة مقابل كلية الهندسة و العمارة
اها يا حبيبنا .. قصرت معاكم ؟
تاني مطلوب مني شي ؟
ياخ نألف و نوزع و نعلن .. ما نقراو برانا كتابنا ده ؟ ( وش زهجان )

Quote: ياخ نألف و نوزع و نعلن .. ما نقراو برانا كتابنا ده ؟

السعودية كيف؟
في الانتظار
التحية للاستاذ ولكل من مر من هنا.

من اليوم 19/2 كتاب اخونا حمور موجود في دار جامعه الخرطوم للنشر في منافذ بيعها الخمسة في انحاء العاصمة الخرطوم

Quote: ما سببه (أولاد أم درمان) من (وهمة) سواءً على صعيد الثقافة السودانية أو حتى في (ونسات) الأصدقاء (لمن الواحد فيهم ينفخ صدرو ، ويقول ليك : أنا ود أم درمان)، وكأنها (أي ود أم درمان) عبارة شافية وصفة كافية لحسم أي نقاش !!

دي حقيقة ..
عبارة انا ود امدرمان عبارة شافية و كافية لحسم اي نقاش ..
ما توفر لابناء امدرمان من ثقافة و فن و رياضة ..
لم يتوفر لغيرهم ..

اديك ( خط سير ) سريع كدا ..
تطلع من بيتكم في حي العرب تلقى ( ابراهيم عوض ) في ناصية الشارع بتونس مع ( عمر الجزلي ) و عم ( عمر ادريس مختار ) ..
تتجاوز شارع الزلط .. تسلم علي ناس الزريبة ( التجار ) .. توزع ضحكاتك بين الصناعية .. تدخل من السور الي استاد الهلال .. تجوط و تفور و تتشاكل مع الادارة ..
تطلع منهم زعلان .. تلقى المعهد العلمي في وشك .. وشيخ مبارك ماسك سبحته و قاعد علي الكنبة قدام الباب ..
تتجاوزه سريعا لانه ممكن يدعوك للصلاة في اي لحظة ( انشاء الله صلاة الضحى ) ..
تشاغل بنات ( امدرمان الاسلامية ) و تنبذهم في اغلب الاحيان .. علي أمل انه ( ريم ) بت الاحفاد منتظراك في ناصية الشارع ..
تمشي تشيل قروش الصيوان من عم ( قاسم بدري ) .. عشان كورال الاحفاد عنده حفلة بالليل و لازم ندق ليهم الصيوان ( عشان كلهم نسوان ) ..
تقطع الشارع تنبذ ( المريخاب ) واحد واحد .. و تفضل تكورك و تجوط لحدي ما تعبر كامل الاستاد ..
في الناصية في دكان برقاوي .. تتكل انت و ريم تشربوا ( بزيانوس ) ..

..
..

ديل شارعين بس يا حبة ..

سيرة أم درمانية لزميلنا حمور زيادة مجموعة قصصية شيقة جدا لم اقراء منها غير عندما هاجرت الداية
اعجبني اسلوبه برغم انه منفتح جدا ولم نتعود ان نرا في كتاباتنا هذا الانفتاح
فله اسلوب جميل يشدك لمتابعة القصة بكل حواسك

وان شاء الله لمن اخلص قراءة القصص سوف ادلي براي في الكتاب

لكن الكتاب من غلافة جميل جدا وصورة معبرة وجميلة جدا

شكرا يا عمو العوض على التنبيه..
كده الكتاب متوفر في السودان في دار عزة و دار جامعة الخرطوم للنشر (K.U.P)
بعد ده يا معتز ما عندك معاي حجه ..
كده تمام يا زول ؟
بالمناسبة انت طفشت وين ؟
بعد الخامس ادسيت شديد
مالك ؟





ــــ

تعرفي يا حميدة الناس الما من ام درمان ديل بيذكروني كلمة شافع الشوايقة القال لابوهو : انا يا ابوي لمن القى زول ما شايقي قاعد يحنني خلاص
اها انا لمن القى زول ما من ام درمان و ما بيحب ام درمان بيحنني خلاص
لكن معتز معذور
زول جا العاصمة من بورتسودان و سكن الخرطوم .. طبيعي يكون ما فاهم ناس ام درمان ديل مالم




ــــــــ
سالي و الله قصة منفتح دي حيرتني .. و كمان ختيتي عليها " جدا " .. يا زولة اقول ليك .. ما بيناتنا ..
بس اقول زي ما قال سيدي الطيب رحمه الله ..
"المتدينون يعتبرونني ماجنا.. والمعربدون يحسبونني متدينا"

حمور ازيك

موضوع منفتح دي امكن تكون مدح ما زم ودليل علي الانفراد والخروج من المعتاد
يعني انا لم انعتك بالمجون ولا غيروا

كل مافي الامر اني ابديت راي في قصة عندما هاجرت الداية
وسوف ادي راي في الكتاب كله عندما اخلص منه .



فلك كل الود والتقدير

سالي