Post: #1
Title: ماذا حدث لنا ..؟؟
Author: حمور زيادة
Date: 11-01-2008, 04:16 PM
Parent: #0
قبل البدء ..
هذا موضوع كتبته ايام النكبة في نزوحي الى منتديات الراكوبة الجميلة
انقل نصه من هناك
ح.زين
|
Post: #2
Title: Re: ماذا حدث لنا ..؟؟
Author: حمور زيادة
Date: 11-01-2008, 04:18 PM
Parent: #1
مشهد أول
ليل خارجي
الزمن : منتصف الثمانينيات
التوقيت : الواحدة صباحا
ضجيج و صوت عويل نساء يأتى من الخلفية و اصوات رجالية بعضها يبكي و بعضها يردد " الفاتحة " و بعضها يطلق أوامر التجهيز
حاج علي : يا جماعة زول يمشي يجيب الكفن بسرعة من توتو ترزي
استاذ معاوية : الكفن جاهز .. المرحوم محتفظ بكفن و حنوط في البيت من بدري
مدثر : ايوه فعلا .. من ما رجع من الحج قبل سبعة سنة هو شايل كفنو في الدولاب
حاج على : ما شايف ناس الثورة ؟ مافي زول مشى كلمم ؟
ابراهيم :مشى ليهم عاصم و مجدي بتكسي .. لكن حيتأخرو و كمان قالو الثورة كهربتا قاطعه ليها كم يوم و فيها مظاهرات
استاذ معاوية : حننتظرم .. عيب الجنازه تطلع و اولاد عمو ما يحضرو
مدثر : هو بالله ناس خالد الفي الثورة ديل اولاد عم المرحوم ؟
حاج علي : ديل ياخي اقرباو من البلد و علاقتم قوية شديد .. اساسا ابهاتم اولاد عم .. لكن ياهم ولاد عمو
ابراهيم : هسه المشكلة بالليل ده زول يصل الاذاعة كيف ؟
حاج علي : كيف يعني يصل الاذاعة كيف ؟ ناس عاصم ما حيغشو الاذاعة ؟
مدثر : لا و الله يا حاج ديل حيمشوا الثورة طوالي لانو المشوار طويل .. في بتاع تكسي جار المرحوم هنا حيمشي الاذاعة بعد شوية .. هسه اليغسل المرحوم منو ؟
استاذ معاوية : خلي يخشو حاج علي و الجماعة الكبار ديل .. مافي داعي للزحمة في الغسيل
يتعالى صوت النساء من الخلفية :
" الليله ووووووووب "
" يا توب غتانا البرد جانا "
" احي .. احي .. احي .. احي "
" خلوني اشوفو .. ما تمسكوني .. خلوني اشوفو .. وااااي "
cut
|
Post: #3
Title: Re: ماذا حدث لنا ..؟؟
Author: حمور زيادة
Date: 11-01-2008, 04:20 PM
Parent: #2
مشهد ثاني
ليل داخلي
الزمن : اول الالفينيات
التوقيت : الواحدة صباحا
همس و تنهيدات نسائية تأتي من الخلفية .. ضحكات مكتومة تنبعث من اكثر من ركن .. صوت " ِشششش " منبه و حوار خافت حول الاستثمار في سندات تجارية
ابو بكر : هسه مفروض يحصل شنو ؟
لؤي : انا رسلت ولدي محمد يجيب كفن من واحد في ام درمان و حيجيبو معاو عشان الغسيل
ابو بكر : الجماعة ديل ما فيهم زول بيغسل ؟
منصور : و الله ياخ ما سألناهم لكن بس قلنا ما نتعب الناس ساي .. في زول كويس بيغسل بخمسين الف
ابو بكر : بالله زمان الناس براها كانت بتغسل امواتا هسه بالقروش ؟
حامد : هسه انت بتعرف تغسل ؟
ابو بكر ( ضاحكا ) : انا بغسل اموال
( يضحكون و يغيرون الموضوع )
حامد : ما شايف اخو المرحوم الكبير
منصور : اسمو منو هو ؟
ابو بكر : كيف ياخ ما بتعرف اسمو ؟ ده حافظ سلطان مدير بنك اياكس الجديد
منصور : بالله ؟ حافظ سلطان بتاع اياكس ده اخو المرحوم ؟
ابو بكر : امال انت قايل عبد الرحمن ود المرحوم اشتغل هناك كيف ؟
منصور : طيب هو وينو ؟
ابو بكر : و الله ما عارف كدي نسأل عبد الرحمن
( ينادي عبد الرحمن فيأتي في جلباب ابيض ناصح و الحزن يكمل مشهد وسامته مع اللحيه الخفيفة )
ابو بكر : عمك حافظ وين يا عبد الرحمن ؟
عبد الرحمن : و الله ضربنا ليو في موابيلو كم مره ما رد .. رسلت ليو مسج
منصور : طيب كان تشوف زول تاني من ناس بيتو !!
عبد الرحمن : ضربت لهشام ولدو لقيتو في اوفر نايت و ما سامعني كويس .. قلت ليو لما تمرق اضرب لي
حامد :يا زول خلاص عملت العليك .. نحن اول ما الجنازه تجهز بنمشي المقابر .. اللحق لحق
ابو بكر : فعلا .. تأخير الدفن ده ما صاح
يخفت صوتهم رويدا و يتعالي همس نسائي من الخلفيه
" اهئ .. اهئ .. اهئ "
" هويدااستغفر البكا ده ما كويس .. انتي عاوزه تضري نفسك ؟ خلاص "
" منى !! عليك الله املي لي الكبايه دي مويه "
" عايني ليها قاعده كيف .. ما بتخجل المره دي ؟ "
cut
|
Post: #4
Title: Re: ماذا حدث لنا ..؟؟
Author: حمور زيادة
Date: 11-01-2008, 04:21 PM
ماالذي حدث لنا ؟
ثورة الاتصالات جعلتنا ابعد من بعضنا
ما الذي حدث لنا ؟
النعمه التي نكتسبها تفقد علاقاتنا حميميتها
ما الذي حدث لنا ؟
هل نحن نحن ؟ ام تم استبدالنا باخرين يوافقون العصر ؟
.
.
.
.
.
.
.
؟
؟
؟
ماذا حدث لنا ؟
|
Post: #5
Title: Re: ماذا حدث لنا ..؟؟
Author: حمور زيادة
Date: 11-01-2008, 08:11 PM
Parent: #4
لقد نسينا انفسنا و دفءالعلاقات في غمرة الزخم التكنلوجي
و نحن فخورون بذلك كديك رومي منفوش
ماذا حدث لنا ؟
|
Post: #6
Title: Re: ماذا حدث لنا ..؟؟
Author: Amira Elsheikh
Date: 11-01-2008, 09:34 PM
Parent: #5
Quote: النعمه التي نكتسبها تفقد علاقاتنا حميميتها
ما الذي حدث لنا ؟ |
تعرف ياحيمور السؤال دا واسئلة تانية كتيرة مرتبطة بيهو مدورة فى راسى
وفى احايين كتيرة ما بلقى نفسى مستمتعة بمايسمى نعمة التكنولجيا...
منها مثلا القنوات الففضائية دى تلقى الناس كلها مسمرة قدام التلفزيون لا ونسة ولا حوار ولاحتى تعليق
وممكن كل زول يكون خاتى اكلو قدامو ولا شايل ليهو ساندويتش ومتلش فى التلفزيون
بجيك راجعة...
|
Post: #7
Title: Re: ماذا حدث لنا ..؟؟
Author: فوزى عبد الفتاح
Date: 11-01-2008, 10:18 PM
Parent: #1
تعرف ياحمور قصة الموبايلات دى الناس بقت تتكلم عنها كتير
يعني الناس مثلا بقو مامنتبهين انهم اتلاقو فى العيد والا لا
لانهم بكونو اتكلمو مع بعض والحكاية اذا مشت كدا تاني الناس
ما حيتلاقو ابدا
|
Post: #8
Title: Re: ماذا حدث لنا ..؟؟
Author: Amira Elsheikh
Date: 11-01-2008, 11:14 PM
Parent: #7
احكى ليك القصة دى....
زواج اخوى كان قبل السنة الفاتت... وكان اول زواج لينا فى البيت
بقينا فى نعزم منو وكيف.... وخصوصا اهلنا اغلبهم برة الخرطوم..
امى حلفت اننا ما نعزم زول بالتلفون مهما كان السبب ..لانو بتفتكر انو عزومة
التلفون دى ما مقنعة على الاطلاق وفى المناسابات الزى دى تحديدا
امى سافرت بنفسها وعزمت اهلنا.......شفت كيف...
|
Post: #9
Title: Re: ماذا حدث لنا ..؟؟
Author: حمور زيادة
Date: 11-02-2008, 01:23 PM
Parent: #7
فوزي ..
بعد شوية شركات الاتصالات حتعمل خدمات تعازي و تهاني
اتصل بالرقم 777 لارسال تهاني .. من القائمة اختار المناسبة
اتصل بالرقم 999 لارسال التعازي .. من القايمة اختار المناسبة
اصبح العالم سريرا صغيرا في غرفة ضيقة .. لكن كل منا يجلس على رجل سرير و يبعث بتحاياه عبر الهاتف
اتذكر اغنية عبد القيوم الشريف :
جاني سؤالك عبر الهاتف ياني بدير وله اسا عقلت
|
Post: #10
Title: Re: ماذا حدث لنا ..؟؟
Author: حمور زيادة
Date: 11-02-2008, 01:29 PM
Parent: #9
تعرفي يا اميرة والدتك دي تاريخ صلاحية افكارا الجميلة دي للاسف انتهى
في اللحظه دي عندي تلاته رسائل في تلفوني بتدعوني لحضور حفل زفاف بتنا فلانه على فلان و ابننا فلان على فلانه
بمسج
SMS
اتخيلي
و لو ما مشيت حيلوموني
يقولو لي رسلنا ليك في تلفونك .. انت غيرت نمرتك ؟
|
Post: #11
Title: Re: ماذا حدث لنا ..؟؟
Author: Salahaldeen Nadir
Date: 11-04-2008, 08:59 PM
Parent: #10
حمور العزيز
ثورة الاتصالات المسيكنة ذنبها شنو؟؟
قول تعقيد حياتنا اليومية و إنشغالنا الزايد
deadlines لازم نحصلها
وobjectives كسر رقبة نصلها
و
و
انا ما بلاقي أصحابي إلا في المناسبات
ربنا يجعل أكترها مناسبات سعيده
ولما نتلاقى ما بيكون في وقت لمعرفة التفاصيل
بنكتفى بالوجوه البشوشة القديمة
الحاصل؟
والله الحمد لله
يللا يامان
نتلاقى
نتلاقى
وما بيحصل إلا في المناسبة البعدها
|
Post: #13
Title: Re: ماذا حدث لنا ..؟؟
Author: حمور زيادة
Date: 11-05-2008, 11:01 AM
Parent: #11
صلاح الغالي
ما الذي استجد ؟
قبل ثورة الاتصالات هل كان الناس عطالة بلا عمل ؟
ألم يكونو موظفين و منتجين ؟
اليوم كم ألف موظف يعملون في كم الف وظيفة لكن ما هو الناتج الخاص او القومي ؟
ما هي الاضافة ؟
لاتدعنا ندخل في جدلية تفكيك العمل اليوم
فقط لنقول باختصار كان من قبلنا يعملون و لهم مشاغل و لم يكونو خالين هم
لكن العلاقات كانت اقرب و اكثر حميمية
شكرا لمرورك اخي
|
Post: #12
Title: Re: ماذا حدث لنا ..؟؟
Author: Sana Khalid
Date: 11-05-2008, 02:52 AM
Parent: #1
Quote: بعد شوية شركات الاتصالات حتعمل خدمات تعازي و تهاني
اتصل بالرقم 777 لارسال تهاني .. من القائمة اختار المناسبة
اتصل بالرقم 999 لارسال التعازي .. من القايمة اختار المناسبة
|
Please, 7ammor, don't put ideas in thier #########
!
|
Post: #14
Title: Re: ماذا حدث لنا ..؟؟
Author: حمور زيادة
Date: 11-05-2008, 11:03 AM
Parent: #12
سناء ..
حاضر ما حاقول كده عشان ما يفكروا فيها
اسف ..
لكن انتي كتبتي شنو الموقع شخبتو يا زوله ؟
تحياتي
|
|