يابشة "اليخت الرئاسى تبيع"

يبدو ان البشير يريد التقشف للاخرين ولكن هو يبحث عن التنعم والترفه ورغد العيش فى بلد يموت الناس فيه جوعا وبشة يمتلك يخت رئاسة كلف شرائه اكثر من ثلاثة ملايين ونصف المليون دولار امريكى وهذا غير المنصرفات الاخرى خاصة تكاليف نقل هذا اليخت الذى عبر اراضى ومساكن اناس فقراء وتم هدم بوابات كثيرة ليمر هذه اليخت سالما الى مياه النيل وقد صادف شراء اليخت طبعا صدفة زواج بشة الثانى "الله هونينى"
واليوم هل من ضمن سياسات التقشف بيع هذا اليخت الذى استفز شراءه مشاعر كل فقراء السودان؟
يابشة كان تبيع نشترى

Quote: يبدو ان البشير يريد التقشف للاخرين ولكن هو يبحث عن التنعم والترفه ورغد العيش فى بلد يموت الناس فيه جوعا وبشة يمتلك يخت رئاسة كلف شرائه اكثر من ثلاثة ملايين ونصف المليون دولار امريكى وهذا غير المنصرفات الاخرى خاصة تكاليف نقل هذا اليخت الذى عبر اراضى ومساكن اناس فقراء وتم هدم بوابات كثيرة ليمر هذه اليخت سالما الى مياه النيل وقد صادف شراء اليخت طبعا صدفة زواج بشة الثانى "الله هونينى" واليوم هل من ضمن سياسات التقشف بيع هذا اليخت الذى استفز شراءه مشاعر كل فقراء السودان؟ يابشة كان تبيع نشترى

يا هاشم اذا اتباع فى اليومين ديل حيبيعوه لواحد من حرامية التمكين
وحيكون ثمنه دريهمات قليله

من الافضل انه يتباع فى عهد ثانى


الله هونينى


.

هاشم نوريت
دة اسمو بيع الغبن انت عارف بشة دة مزنوق وبتعرض علية انك تشتري ( املاكو ) في قت زنقته
لكن كمان لو بيعرضوا علينا فلة كافوري او مزرعة السليت ممكن نتغاضي ونجيب ليك فتوي واليخت حلال عليك

الزبير اخوى انا هذااليخت مزعلنى وحارق روحى بالله عليك اين الاخلاق فى ان يدفع رئيس دولة السودان التى يعيش مواطنيها فى معسكرات الفقر والاخرين لايملكون مايدفعونه لوجبة واحد والبشير يدفع هذه الملايين ليخت عشان يتباهى به وسط النيل مع عروسته
قبحهم الله ديل ملة ليست لهم اخلاق فكيف يدعون انهم اهل دين؟
والرسول صلى الله عليه وسلم يقول لادخل الجنة من بات شبعانا وجاره جائع "الحديث بالمعنى" وهذا البشير يشق كل مدن واحياء وارياف الفقراء بيخت ثمنه ثلاث ملاين ونصف

هاشم يا صديقي
احقاقا للحق اليخت دة في ناس زينو للبشير انو يجيبو يقشر بيه امام
الرؤساء ايام مؤتمر القمة الافريقية ويمكن صادف ايام زواجو الثاني لكن الغرض كان يلحق يستعرض بية قدام الرؤساء ولكن الله ما أراد ووصل اليخت بعد انفضاض المولد ( هكذا أتذكر ) لكن البشير وهو يشتري هذا اليخت تناسي الجوعي والمحرومين من رعيته وقبل هذا وذاك نسي أنة ما في مكان يبحر فيه هذا اليخت فكل الشواطئ في الخرطوم لا يسرك ان يراها اجنبي من العفن الفيها وريحة الطوب المحروق والقاذورات ، كدة أخد ليك لفه في شواطئ الخرطوم وعندها حا يقع ليك كلامي دة
اليخت دة اشتروة زمن الدولارات كانت كابة عندهم وهسي لمن لقوا الدولار عزيز وعشان يلقوة لازم صادرات ( ما زي امريكا البيكلفهم بس حق الطباعة كما قال البشير قدس الله سر معلوماته الاقتصادية الباتعه الناجعة) أحسن ليهم يبيعوة يمكن يسد ليهم جزء من خرم الميزانية المقدودة دي

Quote: ما زي امريكا البيكلفهم بس حق الطباعة كما قال البشير قدس الله سر معلوماته الاقتصادية الباعة الناجعة

أحلي نكتة ......متين بشبش قال الكلام ده
ده أخطر من أي كلام خطرف بيه

مصطفي مختار
يا راجل انت ما سمعت بالكلام دة
الأسافير مليانه شي فديوهات وشي صوت ساكت وأوعز تكون ما سمعت انو البشير قال في واحدة من خطبة العجيبة ديك
وهو زي العاوز يعلن انه ما بخاف من شباب الفيس بوك انو وجه بدعم الفيس بوك مساعدة منه للشباب السوداني
البشير قال الكلام دة ( بتاع تكلفة الطباعة ) علي ما اعتقد امام المجلس الوطني الاسبوع الفات وهو يبرر الإجراءات التقشفية الاخيرة
هو متخيل أوباما لمن يكون عاوز قروش يكورك لبان بركي ( يا ربي بيكتبوها كدة صاح ) وعمك دة طوالي يكلم بتاع مصنع
سك العملة بتاعوا ألفي شارع الغابة الورا الصناعية القديمة ألفي واشنطون ويطبعوا ليهم كم مليار كدة وكلها ما بتكلفهم غير الحبر
ومرات كدة عشان يقللوا التكلفة بيعملوة ابيض واسود بس ولمن يقبضوهم يقولوا دة ما حقنا دة دولار مزور
لا اعلم كيف حكم البشير هذا الشعب ثلاث وعشرون عاما حسوما