السيناريو الأسوأ ...

السيناريو الأسوأ ...


07-01-2012, 12:48 PM


  » http://sudaneseonline.com/cgi-bin/sdb/2bb.cgi?seq=msg&board=390&msg=1341143332&rn=7


Post: #1
Title: السيناريو الأسوأ ...
Author: محمد البشرى الخضر
Date: 07-01-2012, 12:48 PM
Parent: #0

ديسكليمر:
ما تخذيل ولا إنهزامية ولا دياولو عشان ما يجيني واحد عايش الثورة في تويتر يملاني فقر, براي ما ناقص

Post: #2
Title: Re: السيناريو الأسوأ ...
Author: فايزودالقاضي
Date: 07-01-2012, 12:56 PM
Parent: #1



شنو ترد على نفسك قبل تقول رايك !!!

دي انهزامية منك في الراى ..

Post: #3
Title: Re: السيناريو الأسوأ ...
Author: محمد عمر الفكي
Date: 07-01-2012, 01:07 PM
Parent: #2

كدى قبل انهزاميتك دي ممكن تسال لينا تنظير منو الحيفوز اليوم
والله كلو منك طيرتو من التنظير طيرة ابريش من الدريش
بالمناسبة عندي احساس قريب لاحساسك

Post: #5
Title: Re: السيناريو الأسوأ ...
Author: osman righeem
Date: 07-01-2012, 01:13 PM
Parent: #3

انسي الموضوع


و اعملينا بوست من شاكلة في النادي مع عباس أو كما حاء في البورد

Post: #7
Title: Re: السيناريو الأسوأ ...
Author: محمد البشرى الخضر
Date: 07-01-2012, 01:45 PM
Parent: #5

يا ود القاضي قلنا دسكليمر, يعني تقراه أول وتعمل بما جاء فيه

يا ود الفكي تنظير في السودان تلقاه اسي مالي ليك ناس البلد فقر و تنظير لامن حيرهم
بالنسبة للكورة تنظير ح يقول ليك اسبانيا بدون تفكير اصلها صدقت معاه مرّة فح يمسك فيها

روغيم يا عمك
كدي خليني من عباس, إنتو مولانا دا ما ببغر من سيدي الإمام شوية
إن شا الله (يستضيف) ضيافة الله و الرسول دي

Post: #4
Title: Re: السيناريو الأسوأ ...
Author: محمد البشرى الخضر
Date: 07-01-2012, 01:11 PM
Parent: #1

بأمانة كدا
لا الإنقاذ هي مايو في أواخر ايامها أو نوفمبر في عزلتها ولا المعارضة الآن هي المعارضة أيامها بنقاباتها و اتحاداتها واتفاقها على الهدف و قدرتها على تحريك الشارع و قيادة العصيان و الإضاربات
من المهم ان تقدر خصمك حق قدره ولا تستهين بيه وتعد استراتيجيتك على اساس قوته الحقيقية

للإنقاذ- تقرأ المؤتمر الوطني - سند وسند كبير لايمكن تجاهله سميهم انتهازيين أرزقية معرّصين لا فرق
المهم انهم مؤيدين أو مستفيدين موجودين ومتغلغلين في مفاصل ومسامات الدولة لن ينجح اضراب أو اعتصام في تجاوزهم
إذن موضوع العصيان المدني خيار صعب ومؤجل إلى حين

يبقى الخيار الآخر استمرار التظاهر و الإحتجاج
السؤال غض النظر عن ثورات الفيس بووك وتويتر و سائر الاسافير ناس تشتعل و بكرة ابيها
هل وصلنا مرحلة ثورة؟
قبل الإجابة على التساؤل دا في اسئلة تانية؟
ماهي استراتيجية الحكومة في مواجهة التظاهرات؟
ليه ما اتكررت هبة الديم والعباسية العنيفة في الايام التي تلت كتاحة الجمعة؟
قرار رفع الدعم عن المحروقات اشبه بالإنتحار في الظروف المعيشية الخانقة بالبلد
هل اتخذت الإنقاذ قرار بالخطورة دي دون التحسب لردود الأفعال المتوقعة عليه؟ أم انهم استهانوا بالشعب و تجاهلوا امكانية الإنفجار؟
أم ان التوقعات قادت لهذه النتيجة لكن ليس بيدهم خيار آخر
إن كانت الإجابة الأخيرة هي ما حدث إذن فقد اعدت الإنقاذ استراتيجية معينة لمواجهة ما يحدث
وهي بين خيارين إما قمع عنيف يصل لدرجة القتل و إزهاق الأرواح وإرهاب الشعب
أو قمع ذكي باتاحة فرصة للتنفيس الغضب و خلق احساس بالرضا و الإنتصار مع توجيه ضربات مؤثرة و اعتقال النشطاء
وفي الحالتين اللعب على عامل الزمن و الطبيعة الملولة للشعب و اقتراب رمضان


نواصل ..



Post: #6
Title: Re: السيناريو الأسوأ ...
Author: فايزودالقاضي
Date: 07-01-2012, 01:22 PM
Parent: #4

محمد ..سلام ..
Quote: للإنقاذ- تقرأ المؤتمر الوطني - سند وسند كبير لايمكن تجاهله سميهم انتهازيين أرزقية معرّصين لا فرق
المهم انهم مؤيدين أو مستفيدين موجودين ومتغلغلين في مفاصل ومسامات الدولة لن ينجح اضراب أو اعتصام في تجاوزهم
إذن موضوع العصيان المدني خيار صعب ومؤجل إلى حين

كلام مقبول الى حد ما ودعني اضف اليه حتى القوات النظامية من جيش وشرطة وامن هم في اغلبيتهم ان لم يكن جميعهم جزء من النظام لذلك ليس من السهل عمل انقلاب عبرهما او وقوف مع الثورة في هذه المرحلة المبكرة من عمر الثورة ..وكمان ماتنسى ان مآلات هذا النظام اذا سقط في حد ذاتها سبب مقنع لصمود هؤلاء بكل مااوتوا من قوة لحماية النظام الذى هو حاميهم من المحاسبة التى هي هاجس الجميع ..
لكن يامحمد النظام لم يكن باقوى من كل الانظمة الدكتاتورية التى سقطت في ليبيا ومصر وغيرها وليس من الاعجاز سقوطه رغم كل الصعوبات التى ذكرتها ..

والثورة مازالت في بواكيرها ولن نستطيع الحكم على شكل نهاياتها ..


تحياتي ..


Post: #8
Title: Re: السيناريو الأسوأ ...
Author: محمد البشرى الخضر
Date: 07-01-2012, 01:51 PM
Parent: #6

ود القاضي شيل الصبر كلامي ما كمل
بعدين المقارنات يا قريبك مع العرب ديل ما في صالحنا
أقل جمعة في التحرير كانت ما بترضى ليها بي خمسين ستين الف, اما ليبيا فياخي الله يجنبنا السيناريو الليبي
ما عندنا المليون برميل يوميا ولا احتياطي الكمين مليار دولار البتجيب لينا الناتو
موقفنا للأسف أقرب للحالة اليمنية و السيناريو - الأقل سوءا من الأسوأ موضوع البوست - ح يكون اقرب للسيناريو اليمني

Post: #9
Title: Re: السيناريو الأسوأ ...
Author: اساسي
Date: 07-01-2012, 02:03 PM
Parent: #8

يادوب صحيت انت وفقت من السكرة ^_^

ما قلنا زمااان كدا

Re: الكلام الحار الما بندار

Post: #10
Title: Re: السيناريو الأسوأ ...
Author: Asim Fageary
Date: 07-01-2012, 02:06 PM
Parent: #9

Quote: يادوب صحيت انت وفقت من السكرة ^_^


سلام يا محمد البشري و ود القاضي وأساسي والجميع


إنت يا أساسي محمد البشري دا بسكر ؟

حرام عليك

الزول دا أنا سمعت إنه سجارة ما بشربها

Post: #11
Title: Re: السيناريو الأسوأ ...
Author: اساسي
Date: 07-01-2012, 02:14 PM
Parent: #10

الزول دا اظنه موية النار زاتها كان لقاها بشربها

Post: #12
Title: Re: السيناريو الأسوأ ...
Author: aydaroos
Date: 07-01-2012, 02:18 PM
Parent: #9

سلام ود البشري والمتداخلين
القوي المؤثرة علي الأحداث هي في العموم كالتالي:
1- قوي نظام الإنقاذ ودي حا تتحرك في إتجاه القمع ومزيدا" من القمع للمحتجين
2- قوي نظام المركز(الدولة السودانية) بما فيها كل الأحزاب،ودي بي تتحرك لإستلام
السلطة من نظام لإنقاذ لإنقاذ الدولة ونظام المركز من تغيير قد يطيح لا بالإنقاذ فقط
ولكن ربما حتي بالدولة السودانية كما نعرفها،حركة هذه القوي تشمل حتي
المفاوضات والمساومات مع قوي الهامش والسلطة القائمة حتي يخرج المركز(الدولة السودانية)
بأقل الخسائر الممكنة.
3- قوي الهامش (الجبهة الثورية) وهذه تتحرك لتحقيق تغيير يقلب الطاولة علي
التوزيع الإقتصادي/الإجتماعي/السياسي/الثقافي القديم للحصص في إتجاه تقاسم السلطات
والثروات.

حسب توازنات هذه القوي أو تغلب واحدة من القوي أخري سيكون السيناريو
مع ملاحظة أن موقف قوي نظام المركز به درجة من التذبذب وقد يدعم لدرجة معينة
نظام الإنقاذ ،إذا رضي نظام الإنقاذ بالتسويات والمساومات.

Post: #13
Title: Re: السيناريو الأسوأ ...
Author: ABUHUSSEIN
Date: 07-01-2012, 02:55 PM
Parent: #12

واصل يا ود البشرى

مرات كدا أقول إخليك كاتبي المفضل .....

كدي واصل علشان تقول كلامك كولو و بعدين نشوف ...

و إزيك

Post: #14
Title: Re: السيناريو الأسوأ ...
Author: رشا احمد
Date: 07-01-2012, 03:39 PM
Parent: #13

Quote: أم ان التوقعات قادت لهذه النتيجة لكن ليس بيدهم خيار آخر
إن كانت الإجابة الأخيرة هي ما حدث إذن فقد اعدت الإنقاذ استراتيجية معينة لمواجهة ما يحدث
وهي بين خيارين إما قمع عنيف يصل لدرجة القتل و إزهاق الأرواح وإرهاب الشعب
أو قمع ذكي باتاحة فرصة للتنفيس الغضب و خلق احساس بالرضا و الإنتصار مع توجيه ضربات مؤثرة و اعتقال النشطاء

ً
ود البشري (ابو حتوت) أزيك و أزي حتوت و حتوتة ..

ممكن جداً ما يكون بيدهم خيار آخر فعلاً .... لكن أشك انهم فكروا في النتائج المترتبة على القرار دا و اعدوا لها ....

آل كوز اللانقاذيين ما بيعدوا .. بيرتجلوا و بس .... فما تديهم اكبر من حقهم و تعظم أجرهم عليك الله ...


Quote: وفي الحالتين اللعب على عامل الزمن و الطبيعة الملولة للشعب و اقتراب رمضان


أما في دي ... معاكـ حق مية في المية ...

احنا ورمضان ..واحد فينا اتلوم مع التاني

Post: #15
Title: Re: السيناريو الأسوأ ...
Author: أحمد الشايقي
Date: 07-01-2012, 04:06 PM
Parent: #14

سلام يا إخوان

كل هذه السيناريوهات ممكنة, لكن الشعب في رمضان أكثر معاناة واحتياجات رمضان يصعب على النظام توفيرها,
الحقيقة هي أن الشعب ليس لديه ما يخسره واعتقال النشطاء لن يؤدي إلا للمزيد من توجيه الأضواء على قمع النظام للشعب والمزيد من المظاهرات الشعبية والاحتجاجات المطالبة بإطلاق سراح المعتقلين,

لكن الفلس هو أكبر عنصر معزز للثورة .. فلس الشعب وفلس الحكومة, فالحكومة مفلسة إقتصادياً ولن تجد من يدعمها في ظل التظاهرات التي تهبط إزاءها رغبة المستثمرين والممولين في التمويل والاستثمار... إذن فالرواتب والاستعدادت لا بد أن تدفع من جنيهات مطبوعة مما يؤدي للمزيد من رفع الأسعار وهكذا دواليك إلى مظاهرات جديدة

خليكم مع الشاعر : على مهلي على مهلي ... وأتقن حرفة النمـل

وأهم ما في هذه الهبة أن فاتورة تصريح خروج المظاهرات قد تم ... تمزيقها ... وعرف الشعب السوداني درب الشارع .. وتم لحس الكوع ... وتوقفت ثقافة .. المساخة ... في مخاطبة الشعب ...

الشارع هو الحل الوحيد بالنسبة للشعب وما يكسبه الشعب من الخروج والتعبير لساعات لا تكسبه المعارضة بالعمل السياسي لسنوات

أحمد الشايقي

Post: #16
Title: Re: السيناريو الأسوأ ...
Author: smart_ana2001
Date: 07-01-2012, 04:23 PM
Parent: #15

لسه بدري يا ود البشرى. الشعب ما جاع كويس عشان يطلع بالالاف.
و الناس اللي قلتا عليهم منتفعين و قاعدين و شغالين في الحكومة و ح يفشلوا اي عصيان مدني ديل ذاتهم بعد شوية ح يجوعوا
الحكومة باين انه بتقليل عدد الدستورية و الوزراء و كل الحجات دي ح تقلل الصرف علي شراء الضمائر برضو. ما في الان قروش للفوضى الزمان ديك.

Post: #19
Title: Re: السيناريو الأسوأ ...
Author: د. ياسر عبد القادر
Date: 07-01-2012, 04:53 PM
Parent: #16

ود البشري سلام

لعن الله السياسة الفوتت علينا كورتنا

-مؤيدو النظام يا ود البشري زي لعبة الملاهي...بتشتغل لحدي ما قروشك تخلص...وكان ما كبيت فيها تاني ما بتدور...يعني مافي زول فيهم شغال عن قناعة...

-الظاهر الان ناس الحكومة إضطروا للإجراءات دي إضطرار...يعني ما كانوا واضعين ليها حساب..والدليل التخبط في الصريحات...وزير المالية يقول كلام...يجي علي عثمان يقول كلام...يجي غندور كلام تالت...ودا ما كان ديدنهم...كلامهم كلو كان متفق عليه و محسوب بدقة.

-الشعب إبتدأ يطلع و هو عارف نوع القمع الحيلاقيهو في معتقلات الامن ..لكن إبتدأ يطلع لأنو بقت مافارقة...كدا ميت وكدا ميت. (ومن لم يمت بالجوع مات بغيره).

-ما يخشاه بقية الشعب الماطلع...هو الرؤية الضبابية للثورات من حولنا...مازالت لا توجد نتائج واضحة...وأيضا الخوف عندنا من إستغلال بعض الاقليات للثورة و الصعود علي حساب الشعب أو كما قال جيفارا الثورة يصنعها الشعب و يستغلها المتسلقون.

-أخيرا..أرجو أن لاتبخس دور الانترنت ووسائل التواصل الحديثة..فهي لها مفعول السحر ودعني أقول لك أن الحكومة عملت حساب كل حاجة إلا الانترنت ...فهو لها بمثابة طاقة جهنم(وخت تلاتة خطوط علي طاقة جهنم دي) التي إنفتحت وهي لا تستطيع سدها مهما عملت...

أتمني أن نعود كتاب رياضة ياخي...السياسة دي أخر إهتمامنا...الله يجازي اللي كان السبب


تحياتي

Post: #18
Title: Re: السيناريو الأسوأ ...
Author: محمد حيدر المشرف
Date: 07-01-2012, 04:40 PM
Parent: #14

واصل يا صديقى ..
وقطعا يمثل الحراك الجماهيري معطى مهم جدا من معطيات التغيير الأخرى..
وأهم تلك المعطيات الاخرى هو المشروع البديل وتوازنات القوة الجديدة التى ستدخل فى الحسابات ما بين الحركات المسلحة من جهة و الاجهزة الامنية و مليشيات النظام من جهة ثانية
وهى التوازنات التى لا يمكنها عبور محطة الجيش السودانى مرورا عابرا كما يحلم الودعاء الطيبون والدراويش أهلنا فى هذه الاسافير الممتدة ..
وعمر البشير كان يعنى رسالته جيدا عندما أشار لمجاهديه (مليشياته) ..

ولكن وبترك المشروع السياسي البديل وتناول بوادر الحراك الجماهيري الكبير الذى حدث وسيتواصل ..
فإن مده الحقيقي سيصل فى خلال هذا الشهر عندما ينضم القطاع العريض لموظفى الدولة للاحتجاجات ..
وهو الأمر التقديري الذى يمكن أن يمتد لشهر آخر أو يزيد قليلا فى حالة استعمال أموال التجنيب بصورة مباشرة لتفادى سخط الناس..
بيد أن هذا قرار شديد الصعوبة عند النظر للاهمية المطلقة لقطاعات الجيش والامن والشرطة فى أوليات النظام ..
وأكاد أجزم أن الموازنات عندهم تكاد تكون بذات كيفية رزق اليوم باليوم ..
ولعل من أهم الآثار المترتبة على هذه الاحتجاجات الواسعة ستكون امتناع دول الخليج عن تقديم المنح الاسعافية الشهرية للنظام (ادعوها بالدربات)
وبذلك يفقد هذا النظام هذا الفتات الاخير بعدما فقد قدرة تقديم الحلول ..
عموما يمكن تلخيص المشهد بالآتى ..
ظل هذا النظام يحكم بمشروع سياسي وسيطرة اقتصادية وقبضة أمنية ..
والآن يحكم بالقبضة الأمنية فقط ..
فالى أى حد يمكن أن يستمر بهذه القبضة الأمنية فى ظل الافلاس المالى ..

Post: #17
Title: Re: السيناريو الأسوأ ...
Author: Nasir Ahmed Elmustafa
Date: 07-01-2012, 04:37 PM
Parent: #8

ود البشرى سلام وتحياتي لكل المتداخلين
كلامك عين العقل يا خوي
أضيف انو ثورات الربيع العربي دعمتها الحركات الاسلامية في تلك الدول مصر تونس ليبيا
لكن هنا من البدعما السادة الكبار أولادهم مساعدين رئيس وأحزابهم اتقسمت لعشرات الاحزاب
باقي أحزاب المعارضة حدث ولا حرج
أواصل

Post: #20
Title: Re: السيناريو الأسوأ ...
Author: حمزه بابكر الكوبي
Date: 07-01-2012, 07:00 PM
Parent: #17

Quote: مرات كدا أقول إخليك كاتبي المفضل .....


ابوحسين بالانجليزي
المابخليه كاتبك المفضل شنو ؟؟؟

ودالبشرى
تحليل منطقي وعقلاني ..... واصل

تحياتي لكم

Post: #21
Title: Re: السيناريو الأسوأ ...
Author: محمد البشرى الخضر
Date: 07-01-2012, 07:57 PM
Parent: #20

السيناريو الأسوأ ...
كيف تم قمع المظاهرات الأخيرة وتحجيمها.

معذرة يا شباب احس بإحباط شديد, لم اعرف عن نفسي طيلة عمري اني انتهازي
لكني احسها اليوم بل و اراها راي العين
اكثر من الف معتقل اين هم الآن وما ذا حل بهم يا ترى أين البوشي وخالد بحر وغيرهم وغيرهم
الثورة التي هي بالنسبة لي تنظير و اسفيري و اسفيرك هي نار و جحيم لهم
انتهازي ومن منفاي البارد اطالبهم بالاستمرار في مواجهة الوحش بأيدي عارية و انظّر لهم ان افعلوا دا واتركوا دا
انتهازي وانا ابحث عن شهيد منهم يؤجج غضب الباقين ليسقط المزيد ثم المزيد
انتهازي وانا اراهن على دماء الانصار و على السيد الصادق
انتهازي وانا استنكر على ابناء الديم والعباسية عدم خروجهم و قد أصبحوا وعلى رأس كل منهم شرطي

طفل يقضي 3 أيام في حراسة بحري دون طعام ..!!

Post: #22
Title: Re: السيناريو الأسوأ ...
Author: ABUHUSSEIN
Date: 07-01-2012, 11:09 PM
Parent: #21

Quote: المابخليه كاتبك المفضل شنو ؟؟؟


هلاليته التي يعرفها القاصي و الداني

تحياتي و إحترامي

Post: #23
Title: Re: السيناريو الأسوأ ...
Author: jini
Date: 07-01-2012, 11:57 PM
Parent: #22

دخلت الانقاذ فى دائرة مغلقة
تمضى حثيثا نحو الهاوية لا تملك الا ان ترفع الاسعار وتزيد الضرائب وتزيد الصرف الامنى وتطبع العملة ويزداد التضخم بلهاثها خلف الدولار لمقابلة احتياجات الدولة فترتفع الاسعر مرة اخرى فضلا عنالنزاعات المسلحة وخلافات الشمال الجنوب والضغوط الدولية والاقليمية
الانهيار اكيد ووشيك
النظام ثقته الزائدة ناتجة عن ثقته فىامكانياته الامنية الباطشة وليس فى اجتراح الحلول
الشعب اما ان يموت فى بيوته جوعا او فى الشوارع دفاعه عن حقه فى العيش الكريم
جنى