Post: #1
Title: أهازيج للثوره....العزيز بكري جابر..... ومسدارالغضب
Author: Magdi Is'hag
Date: 06-29-2012, 07:54 AM
رباعيات عمر(ابوعرّام)
الخوف انهدم حاجزه السميك خرسانة و الشارع هدر دوّى الهتاف جبخانة ياساكن القصر الليلة شوفلك خانة ما بينفع رقيصك و ما بتحرسك دانة
***********
الشارع مرق شايل مواجعو اغانى حالف ما يصد يرجع يتر ورّانى صبرو الكان زمان حبلاً طويل متّانى اتقطّع خلاص كيفن ترجعو تانى
**********
موجات الهتاف كسرت سدود ارهابك و صرخات الغضب الليلة هزّت بابك ياكا الغشيم ضاقت عليك يا جنابك شعباً جاك عديل عاوز يجردو حسابك
*********
(اجراءات تقشّف) صرّح جنابو الأهوج شايفنا غرقانين فوق النعيم و البهرج!!!! شوفو عوارتو، ما بعرف العديل من أعوج ساعة الضيق يجييك اوعك تقوم تتلهوج
*********
أركز يا مشير سيب الرقيص و الهزّة دا الشعب انتفض تحتو الارض تتهزّة نار الثورة قامت، قادوها اولاد عزّة ما دايرين تِحِرّش، ما بكوسو اللّكزة
*********
(نافع) معاك كيفن تكون زول نافع ما دام الحُكُم عندك لقف و منافع جوعت العباد، قسمتو بلداً شاسع راعيت الفساد ربيتو من كان شافع
********
(شذّاذ اَفاق) هناك شوف الأفق سادّنو مليانين عزيمة و نخوة ديل حبل الثبات شادّنو ساعة الكوع حِما و الشعب طلّع جنو كوعك ألحسو، و القصر أمرق منو
*******
(أكتوبر) هداك شايفنو جانا عديل و (أبريل) السمح ضوّت كهاربو الليل (يونيو) الكان لعين ،الليلة أضحى عديل بى صرخات غضب ادفّقت كالسيل
بكرى جابر .....سيدنى 29 يونيو
|
Post: #2
Title: Re: أهازيج للثوره....العزيز بكري جابر..... ومسدارالغضب
Author: Magdi Is'hag
Date: 06-30-2012, 06:36 AM
Parent: #1
Quote: الخوف انهدم حاجزه السميك خرسانة و الشارع هدر دوّى الهتاف جبخانة ياساكن القصر الليلة شوفلك خانة ما بينفع رقيصك و ما بتحرسك دانة
|
|
Post: #3
Title: Re: أهازيج للثوره....العزيز بكري جابر..... ومسدارالغضب
Author: Magdi Is'hag
Date: 06-30-2012, 01:23 PM
Parent: #2
Quote: الشارع مرق شايل مواجعو اغانى حالف ما يصد يرجع يتر ورّانى صبرو الكان زمان حبلاً طويل متّانى اتقطّع خلاص كيفن ترجعو تانى
|
|
|