Post: #1 Title: مشاهداتي..... Author: مريم بنت الحسين Date: 06-25-2012, 09:20 AM Parent: #0
البوست ده حأنقل فيه الحاجات البشوفها خلال اليوم... ممكن تكون صورة او فيديو او حتى عبارة عجبتني.... وما بالضرورة تكون مرتبطة بشي معيّن.... اعتبروه blog ...
حأبدأ بالفيديو ده، لأنه بهيّج جواي حزن شديد.... الشباب ديل بعبّروا عنّه بقوة.. وبترجموا حزنهم على فقيدهم بزفّة ... اعتبرتها من يوم شفتها، ملحمة.....
Post: #2 Title: Re: مشاهداتي..... Author: Osama Mohammed Date: 06-25-2012, 11:45 AM Parent: #1
استاذة مريم تحية وسلام المقطع جميل ويا ريت لو تورينا التاريخ والمكان الاتصور فيهو المقطع ده ..
لك الود اسامة
Post: #3 Title: Re: مشاهداتي..... Author: مريم بنت الحسين Date: 06-25-2012, 11:56 AM Parent: #2
Quote: الشاعر محمد الحسن سالم حميد من حقى اغنى لشعبى
من حقي أغني .. أغني لشعبي .. ومن حق الشعب عليّ لا بي إيدك تمنع قلبي .. ولا قلبي كما بايديا علمني أغني .. الطين .. المخرطه .. والطورية الناس الصابرة .. سنين بالحالة .. الما دغرية القابضة الجمرة في إيدا .. والجمرة تلهلب حية لا قادرة الجمرة تقيدا .. لا قادرة تولع هيّ يا قلبي بلاش نستعجل .. في الدرب شوية شوية واصلين الما بتأجل .. لليوم الشمشو قوية علمني الشوق نترجل .. نستحمل وجع الجية لا القش بيهاب المنجل .. لاطب .. النار .. الكيه يا صقر الآه يا ريح .. لا تنفض عش قمرية من حقو يغني صريح .. ذرية ورا ذرية ومن حقي أغني العالم .. إبداع وعلم حرية إنساني شعوب تنسالم .. تنسالم بي حنية على نخب الود نتنادم .. لا جنس ولا لونية لا عِرق لا آه نتقادم .. سكتنا بياض النية مش كلنا جينا من آدم .. مش آدم ابو البشرية السجن إذاً يترايم .. نبنيها قلاع ثورية عقبال الخير يترادم .. والدنيا تمش دغرية مد كفك يا بني آدم .. حرية سلام حرية
الاخ اسامة، اتوقعت الفيديو مشهور... عشان كده ما وضّحته...
الفيديو من تشييع الراحل حمّيد، الناس من وسط نواحها بتنشد قصيدته....
Post: #12 Title: Re: مشاهداتي..... Author: مريم بنت الحسين Date: 06-25-2012, 09:22 PM Parent: #11
شوفوا أولاد المرحوم بكّار، وهم ماسكين ايدين بعض... وبستقووا بي بعض...
جزء منّي بعتقد انه جرعات الاحزان الأخدناها خلال الشهور الفاتت هي محرّك الشباب في الايام دي...
واحده عزيزة علي، قالت لي.. بشير بكّار مات بالفرح بالثورة!.... اذا كان يرى بشريات ما كان ينتظهره سنيناً عدداً.... اتمنى تكتمل فرحته، وان يعرنا من عليائه....
Post: #15 Title: Re: مشاهداتي..... Author: مريم بنت الحسين Date: 06-25-2012, 09:31 PM Parent: #11
نازك.... غايته بوستي ده ينطبق عليه "مرّه أضحك، ومرّه أبكي... ومرّه تغلبني القراية".....
Post: #13 Title: Re: مشاهداتي..... Author: مريم بنت الحسين Date: 06-25-2012, 09:25 PM Parent: #9
ياخ انا مشتاقة ليك جداً يا رحاب... وقبل يومين اكتشفتك في الفايبر، قلت أطق حنك معاك... بس الاولاد لخموني لحدي ما الوقت اتأخر....
شكرا على رفعت الراس (بتاعت العُمر)... ورفعت البوست... :)
محبتي
Post: #16 Title: Re: مشاهداتي..... Author: مريم بنت الحسين Date: 06-25-2012, 09:35 PM Parent: #13
من الحاجات الأثرت فيني جداً وفاة مايكل جاكسون.. يمكن لأنه شكل جزء من فترة مراهقتي ... وكنت ولا أزال احفظ أغانيه...
اكثر ما عبّر عن حزني ده وساعدني فيه... العزف الرائع ده على الجيتار... رغم انها اول مره اسمع الاغنية في اليوم داك... بس شوفوا الجيتار ده قرّب ينطق! رغم اني ما من الناس البحبوا الجيتار الكهربائي كتير.... لكن هنا، رائع!
الاحتفال بالحزن....
Post: #17 Title: Re: مشاهداتي..... Author: مريم بنت الحسين Date: 06-25-2012, 11:00 PM Parent: #16
يظل هذا الموقف البطولي من الحاجات البتخليني أفكر اتعلم "أزغرد"!
Post: #18 Title: Re: مشاهداتي..... Author: د.محمد حسن Date: 06-26-2012, 00:54 AM Parent: #17
يا طاهرة يا مريم انا ما بشيل مال الحرام وابني انا زول بشيل الهم زي شعبنا المقهور شعبا نذر بالدم القصة ما بنزين الغصة جوة حلوق عاشت سنين الغم لكن صبرنا نفد بس تاني وين حتروح يا ما كل الاموال حقت دوا الاطفال يلاك يا بن العم وجار ويا جارة خلينا نكشف حال ناسن نست ربا سواها من نطفة كنزو الدهب والمال وحلفنا ما ننجم لابد نعدل الحال يا طاهرة يا مريم
Post: #19 Title: Re: مشاهداتي..... Author: محمد عبد الماجد الصايم Date: 06-26-2012, 07:55 AM Parent: #18
قبيل بقرا في مقولات في تويتر، لقيت واحد كاتب، للعظيم قلبان، قلب يتامل و قلب يتامل. ++++++++++++++ قصدت: قلب يتامل و قلب يتالم بركة المافي زول جا قال لي انتي ما تقولي قاصدة ملاسي ب يتامل مرتين دي ^_^
Post: #23 Title: Re: مشاهداتي..... Author: مريم بنت الحسين Date: 06-26-2012, 10:20 AM Parent: #18
د.محمد... ألف شكر على القصيدة الجميلة... خليني أكرمك ما دمت أكرمتني في بوستي....
بس أرجع من محاضرتي...
Post: #22 Title: Re: مشاهداتي..... Author: محمد كابيلا Date: 06-26-2012, 09:21 AM Parent: #17
Quote: يظل هذا الموقف البطولي من الحاجات البتخليني أفكر اتعلم "أزغرد"!
Post: #24 Title: Re: مشاهداتي..... Author: مريم بنت الحسين Date: 06-26-2012, 02:07 PM Parent: #22
جيت من شويه من الجامعة...
ود الصايم، والله قبل يومين كنت بفكر، قلت يا ربي عملنا حاجه زعّلاناك؟ واتهمته امير اب لسان طويل، قلت أمشي اكتب ليه موشّح في البوست اشاكله ليك... عشان طفّشك مننا....
شكرا على الLike، لكن قصة ميسون ما فهمتها....
يا سلااااااااام.... انا طولته ما شفته اخونا السنجك، والله افتقداك بي جاي... والله شرفتني تشريف كبير الليلة... شكرا على التشجيع...
رحاب الخليفة، اتصوري انا فهمتك... بس ما تجيبي لينا سيرة هناي ده... انا وهو متشاكلين من زمان وانا بغمّض لما يكتب لي تعليق في اي بوست....
محمد كابيلا، ما فهمته استغرابك أو سؤالك عن شنو....
النجيب اكرام د.محمد زي ما وعدته
Post: #25 Title: Re: مشاهداتي..... Author: مريم بنت الحسين Date: 06-26-2012, 02:44 PM Parent: #24
بعيد عن الاجواء الثورية، ونمشي على هوسي الدائم............... الطبيخ!
البيض من الحاجات الاساسية جداً في المطبخ، ودايما كنت بستغرب كيف انه ممكن يكون في اشكال كتيره جداً... ويبقى اي شي..... ممكن يبقى حلو او يبقى مالح...
لقيت موقع حلو، فيه 100 وصفة لطبخ البيض! اشاركم بالصور...
Post: #26 Title: Re: مشاهداتي..... Author: مريم بنت الحسين Date: 06-26-2012, 07:26 PM Parent: #25
Post: #28 Title: Re: مشاهداتي..... Author: مريم بنت الحسين Date: 06-27-2012, 00:00 AM Parent: #27
سامع حبوبة البتكوريك وتقول "يمين رجال"، ده بالضبط قرايتي للفيديو....
في محورين أساسيين هنا، اولهم انه الشباب ده احترم الحكم الظالم الصدر ضدهم واحتملوا تنفيذه، وبكده كسبوا تأييد إضافي وتعاطف، شوف الناس الملمومه دي قدر كيف والزغاريد دي... المحور التاني هو إحساس بعض الشرفاء من رجال الشرطة تجاه الظلم الوقع، وهل هم راضيين بيهو؟ اعتقد ده حيبذر جواهم شي...
شكرا ود البشري علي المشاركة
Post: #29 Title: Re: مشاهداتي..... Author: د.أحمد الحسين Date: 06-27-2012, 04:32 AM Parent: #28
مريومة انت مبدعة تكتبي أي شئ يخشوا ليك الاف تعليقات. أنا اكتب شئ زول واحد يهببوا لي مافي...حتى لو دخلت بوست علقت عليهو صاحب البوست ما يجيب لي خبر والبوست خلاص يقيف. يبدو اول ما يشوفو اسمي يعرفو انو في بياخة. يجوز بوستاتي مسيخة ما عارف. غايتو البركة فيك.الله يستر على بوستك ده بعد يظهر اسمي معلقا.هههههههههههههههه تحياتي لنادر وحمودي وليلى
Post: #30 Title: Re: مشاهداتي..... Author: مريم بنت الحسين Date: 06-27-2012, 10:09 AM Parent: #29
هههههههههههه، الجاح... والله حبابك في البوست... ضحكتني ضحك...
ما للدرجة دي والله... حسي تشوف البوست بعد دخلتك يجري جري ....
خليني اكرمك بمناسبة دخولك للبوست
في موضوع قريته في Yahoo! عن منتجات سببت ثورة في الرأي العام، جايبين كم مثال... عجبوني ديل منهم
الدمية بتاعت باربي دي اتسحبت من الاسواق، بسبب اعتراض مجموعة الجمعية الأمريكية للنساء في الجامعات AAUW لانها بتقول عبارة "الرياضيات صعبة"... الشركة المصنّعة حذفت العبارة تماماً من اللعبة وخلت الناس الاشتروا الدمية يرجعوها ويدوهم بدلها واحده تانية....
شركة أديداس دقست وعملت التصميم ده لواحده من احذيتها
المشكلة وين؟ اعتقد واضحة، فيها اشارة لعهد العبودية وتلميع ليه، وكمان بالألوان! اتخيلوا دي سعرها 350$!... والغريبة انه التصميم عملوه باسم شاكيل اونيل، اللاعب الأسود
القصص دي وغيرها كانت مقال اسمه What Were They Thinking، بتلقوه هنا
Post: #31 Title: Re: مشاهداتي..... Author: عاطف عمر Date: 06-27-2012, 10:53 AM Parent: #1
Quote: مريومة انت مبدعة تكتبي أي شئ يخشوا ليك الاف تعليقات. أنا اكتب شئ زول واحد يهببوا لي مافي...حتى لو دخلت بوست علقت عليهو صاحب البوست ما يجيب لي خبر والبوست خلاص يقيف. يبدو اول ما يشوفو اسمي يعرفو انو في بياخة. يجوز بوستاتي مسيخة ما عارف. غايتو البركة فيك.الله يستر على بوستك ده بعد يظهر اسمي معلقا.هههههههههههههههه تحياتي لنادر وحمودي وليلى
الله يسألني الضحك الضحكتو في مداخلة أخونا الأكبر د. أحمد دي ما ضحكتو في ستة أشهر وحتى أشرك الإخوة والأخوات المتابعين للبوست في ( السبب الحقيقي ) لضحكي ولضحك الأخت مريم
أوضح أن كاتب المداخلة أعلاه هو الدكتور أحمد مصطفى الحسين وهو والد صاحبة البوست العزيزة مريم بت الحسين
عليه أرشح هذه المداخلة كـ
أجمل مداخلة بين أب وإبنته في تاريخ سودانيزأونلاين منذ إنشائه حتى الآن
Post: #32 Title: Re: مشاهداتي..... Author: عاطف عمر Date: 06-27-2012, 10:55 AM Parent: #31
من كترة الضحك نسيت أسلم
تحياتي وسلامات العزيزة مريم تحياتي وسلامات أخي الأكبر د. أحمد
Post: #33 Title: Re: مشاهداتي..... Author: د.أحمد الحسين Date: 06-27-2012, 11:02 AM Parent: #32
عاطف ازيك وينك وين زمنك شكرا على رفع المعنويات وشكرا انك هببتو لي ان شاء الله انت واولادك بخير
Post: #34 Title: Re: مشاهداتي..... Author: Ali bas Date: 06-27-2012, 11:41 AM Parent: #33
مريم.. وصفات الطبيخ بتاعت البيض دي "مستفزة" للشعب السوداني فى ظروفه الحالية! ارجو أن تسحبي منها الشئ البشبه "الحلو" بضم الحاء أو الكاستر أو "الهضيم" كما يسميه عرب أب قوتة من الكواهلة ومن شايعهم.. طبق البيض فى السودان خاصة عاصمتها تجاوز سعره الكم وعشرين جنيه! وقريب جدا والله كان بتباع بـ10 و12 وقعد فى 13 مدة ولمان بقى بـ14 قلنا القيامة خلاص دايرة تقوم.. ثم قفز كما قفز كل شئ! بعدين مش السعر بس.. البيض ذاتو يا بتي بقى صغييييييييييير! والله مرات، زى ما قال الفلاتي، "تشيفي.. ومرات ما تشيفي!".. والله كثير جدا عندما اشترى واحد أقول للبائع: ياخى إنت متأكد أنه ما بيض حمام!". العبارة دي بتغضب البائع الذى يرد دائما بأنني أبالغ! وقد وجدت كاريكاتيرا فى احدى الصحف يقول البائع للمشترية أنه بكم وعشرين.. تقول ليه: ليه اصلو الجدادة ولدتو فى مستوصف؟! تحياتي.. لك ولوالدك الدكتور احمد الحسين وتعليقه! الغريبة يا مريم.. السودانيون لحدي عهد ما بعيد.. كانوا بشوفوا أكل البيض عيب! وده يمكن يكون حتى الثلاثينات أو الأربعينات من القرن الماضي!
Post: #35 Title: Re: مشاهداتي..... Author: مريم بنت الحسين Date: 06-27-2012, 10:52 PM Parent: #34
Quote: الله يسألني الضحك الضحكتو في مداخلة أخونا الأكبر د. أحمد دي ما ضحكتو في ستة أشهر
طبعا يا استاذ عاطف ليك ان تتخيل انه الوالد بكتب وهو بضحك زي ضحكك ده... نادر قبل شويه بتكلم معاي عن الموضوع، قال لي لما قريت كلامه، اتخيلته وهو بقوله كيف...
Post: #36 Title: Re: مشاهداتي..... Author: مريم بنت الحسين Date: 06-27-2012, 11:03 PM Parent: #34
Quote: الغريبة يا مريم.. السودانيون لحدي عهد ما بعيد.. كانوا بشوفوا أكل البيض عيب! وده يمكن يكون حتى الثلاثينات أو الأربعينات من القرن الماضي!
قاعدين نضحك انا واخواني لما الوالد يقول لينا: "انتو قايلين اينشتاين ده مات زمان، مات حسسسسسسسي في الستينات"... طبعا انا اكبرهم ومولوده سنة 80! حسي ما عارفه نقول ليك يا جدّو ولا كيف.... لكن شدت انتباهي النقطة دي جداً، يا ريت تشرح لينا عنها وتورينا اسبابها! حاجه غريبه والله.. البيض ده اكل اهل الجنة عدييييييل كده....
اما السودانيين فأي شي أكل في ايامهم دي، حيستفزّهم... الله يعينهم على الحال... وبالمناسبة دي، أهديكم طريقة عمل السخينة بالصور من موقع الطباخة السودانية والblogger الرائعة سمسماية... عندها موقع متميّز لوصفات سودانية من كل الانواع.. اخترت السخينة باعتبارها كانت (زمان) اكل الناس الظروفهم تعبانه... حسي حيكون بقى أكل مترفين!
Quote: مريومة انت مبدعة تكتبي أي شئ يخشوا ليك الاف تعليقات. أنا اكتب شئ زول واحد يهببوا لي مافي...حتى لو دخلت بوست علقت عليهو صاحب البوست ما يجيب لي خبر والبوست خلاص يقيف. يبدو اول ما يشوفو اسمي يعرفو انو في بياخة. يجوز بوستاتي مسيخة ما عارف. غايتو البركة فيك.الله يستر على بوستك ده بعد يظهر اسمي معلقا.هههههههههههههههه تحياتي لنادر وحمودي وليلى
أحمد عمي حسة أنا دخلتني إنتا بوست مريوم صحبتي دة الما هببتو ليها هههههههههههه إتذكرتا ونستنا في بيتكم العامر في العين حول النقطة دي^___^
