لكل بوليس سوداني نضيف وكل افراد القوات المسلحة البواسل

تذكر ان السودان مرصود وان العالم حاكم كثير من الضباط والعساكر في المانيا ورواندا وصربيا وانحاء اخرى من العالم..

تذكر ان بعض قادة المؤتمر الوطني مطلوبن للعدالة الدولية والبعض الاخر للعدالة المحلية..
تذكر انو من صالحهم انو قائمة المطلوبن للعدالة الدولية تكبر وتكون انتا فردا منها درءا لبلوتهم..

تذكر انك حتى الان نضيف اليد وبلا ثآرات..
وانك ممكن برضوا تظل هكذا نضيف وبلا ثارات..
تذكر ان الخارجين للتظاهر هم اهل بيتك والاقربين واولاد الحلة..
تذكر انهم برغم الفساد الذي مكث كم وعشرين سنة مامرقوا إلا بعد ان عدموا العندهم..
تذكر انهم باتوا لمدة كم وعشرين سنة على وعود واصبحوا على جوع..
تذكر اقرب مؤتمر وطني وعاين ليهو وعاين لي حالك ..
تذكر انو بينما انتا قاعد تداوس في الشارع وسط الحجار انو قادة الانقاذ والمؤتمر الوطني هسي بلملموا في اخرها وكل زول بقول ياروح مابعدك روح..

ماتتخيل الناس دي مرقت قلة ادب وسفاهة ساي..
ديل مرقوا لانو الحياة اضحت معفنة..والسودان بالضبط زي ما انتا شايفو..
فلا تكن سببا في تعاسة باقي ناس بيتكم..
ربما انتا العائل الوحيد..
وربما قدرك المعفن انتا تبقى بوليس في زمن الانقاذ..
بس خليك متاكد انو ما قدرك انو تورط نفسك في تشويه او كتل زول مابينك وبينو اي مسالة شخصية..


وخت في البال دعوة امك ليك والاعلان التالي:

Quote: نرجو من الراصدين والناشطين والثوار في جميع مدن السودان متابعة ورصد أسماء الضباط والأفراد التابعين للأمن والشرطة (والمليشيات) الذين يرتكبون الجرائم ضد الثوار كما نرجو من الوطنين داخل هذه الأجهزة أيضا مدنا الوثائق والمستندات الصوتية والمصورة والفيديو عبر العنوان البريدي أدناه : البريد الالكتروني [email protected]‏ [email protected] *مكتب رصد الانتهاكات وحماية الثوار الخرطوم _23 يونيو 2012______________________________ *مكتب رصد الانتهاكات وحماية الثوار هيئة تم تكوينها من قبل مجموعة من المحامين والناشطين وراصدي انتهاكات حقوق الإنسان بهدف رصد وتوثيق أسماء الضباط والأفراد والمسؤولين (والمليشيات) وكافة الأشخاص المتورطين في كافة الجرائم خاصة القتل والتعذيب والاغتصاب بهدف الأعداد لملاحقتهم عن هذه الجرائم وضمان عدم الإفلات من العقاب لأي فرد أو ضابط أو شخص يقوم بارتكاب هذه الجرائم ضد الثوار

.

ديل - لو صدق الاتقال حولهم- واتمنى مايكون صحيح.. الله قال بي قولهم من كل جنازة تمرق..
الناس ماحتلقى نافع ولا حتلقى قوش..
الناس حتلقاك انتا يالهوين يا ماليك وجيع..

كلام مهم شديد

النظام لا محالة زائل هذه المرة
ويوم الحساب حتما آت وقريب جدا جدا جدا
والرصد شغال وبدقة وكلو حا ياخد جزاهو

حكموا ضمائركم يا بوليس
انتم من هذا الشعب الغلبان