Post: #1 Title: رسالة لعمر البشير قبل صلاة الجمعة اليوم ..... فيديو Author: Medhat Osman Date: 06-22-2012, 02:17 AM Parent: #0
عفوا سيدي الحجاج كلابك والأفاعى الحايمة من روتانا لى امواج كاورت البلد بى حالها ماخلت فضل فى حاجه .. لى محتاج ولا لقت البقول لها "جــر" فى ناس جعانة ما قلبت حرف فى صاج فى ناس عريانة مالفحت هدم فى الزيفة ماطالت ايديها رغيفة والسبب المعكر كيفها دق بنوتها بالكرباج ناس غلبانة بس دغرية مابتعرف تخت طاقية فى طاقية والدين الحنيف فى شرعها الحرية زدتها فى الحرج إحراج وزدتها فى الدجل دجال عوج شفناهو ماسمعناهو فى قولة قال بنات دقوها دق العيش ولاد ما اندقو فى شبال وبقت فى غصة الأيام قيم غنيتها ياقدال قيم شلناها عِمة وتاج رقيص الشامة بت حمدين وخت الحنه ليات من حضور ضفرين ونمّات العديل والزين ورقصة جون مع اوهاج مشينا نقدم البنوت على ضو الرتاين خفت وهج الغناء الوهاج رحل صوت المغنى حزين رطن سوط العنج هرّاج سقط فى غفلة نون النسوة اخوان البنات والنخوة ستّار العروض أب رسوة شيال الحمول أب عاج فيا حجاج .. أُكل نارك و اتلفح بشاكيرك مع طلعة شهر ذو الحجة احرم حاج .. وطوف فوق الجثث طاوؤس وشعبك لا أكِـل لا علاج وحاج فى شنو !! إذا كل البلد هاصت و فار نحل الجباية و هَاج فيا فالق نواة الحبة يــــا فراج و ياباسط عجائب الاسراء والمعراج ويــــا خالق الخلايا الحية أمشاج ابتلت أمشاج طحنتنا طاحونة الفقر دهستنا سنواتها العجاف يــااا الله تلهمنا الصبر ، السُترة ، والعيش الكفاف وترحمنا من صَرة وشِي فى وش وليداتنا الضعاف غرقان ويرقص منتشي ووطنا مقطوع من خلاف بسم الله ماخلانا شي و فَضَلنا فى آخر المطاف ياناسي أقدار الرجال ماتخشى غضب الله وتخاف ! كتر عوج الكلام والميل وتحت الجزمة مليون ميل تحت الازمة طاحونة حوافر الخيل سقط تلت البلد عفواً سقط نص البلد لهواً سقط كل البلد سهواً فهل صحاك ضمير الأمة فى هجعة هوايد الليل على زبد الغناء الممحوق شنو الخّلاك تنوم تحلم على خرطة وطن فى السوق وطن مسروووق وطن اشتر مرق من ذمة التاريخ على ذمة كلاب الحر ينوم بجبة الدرويش يقوم ببدلة العسكر فيـــاااا ويلك فى يوم الويل تقوم تحتك قيامة الناس أفواج الضحايا يجوك ستات الكجيك والشاى والناس البعرفو شليل حشود الطلبة والعمال وبنوت الغياب والليل طفوله مشردة ونازحين وكم حجاج يجيك من ديل وديل اولاد شوارع عوووووك المعدَّمة ومعدومه من كل فجه يجوك يومها التسوِّد يومها قطامة وقرضمة وراندوك لماضة وطرّقت حلقومة ناسات حكومة الجن ناس جنها الحيكومة ماطال الشوارع فِي فى ولاد بعرفو القومة اولاد الحلال راقديين اولاد اسمها المايقوما ديل اولاد شريعة قوش المستضعفين فى الارض يبنو ويهدو عروش لا الكل بخون البعض لابتشتريها قروش فى كل حتة وراك تمرق تلاقى جيوش اصدق لسان الحال من نضمك المهبوش نفس الولاد جايين من طين حضاره كوش حافظين شعر حميد فاهمين قصايد الدوش ماتمشى يامحجوب عاوزين نظبط بوش ياداااب عرفنا الصاح دخل الكلام الحوش وشكرا سيدى الحجاج
أزهرى محمد على ..
Post: #2 Title: Re: رسالة لعمر البشير قبل صلاة الجمعة اليوم ..... فيديو Author: Medhat Osman Date: 06-22-2012, 09:43 AM Parent: #1
أُكل نارك و اتلفح بشاكيرك
Post: #3 Title: Re: رسالة لعمر البشير قبل صلاة الجمعة اليوم ..... فيديو Author: هشام عباس Date: 06-22-2012, 10:00 AM Parent: #2
ليبقى عاليا
شكرا مدحت
Post: #4 Title: Re: رسالة لعمر البشير قبل صلاة الجمعة اليوم ..... فيديو Author: ماجد عبدالجليل فضل Date: 06-22-2012, 10:45 AM Parent: #3
سوداننا فوق و ثورة حتى النصــر وصلاة الجمعة في القصـــــــــر
Post: #5 Title: Re: رسالة لعمر البشير قبل صلاة الجمعة اليوم ..... فيديو Author: محمد حيدر المشرف Date: 06-22-2012, 10:51 AM Parent: #4
وديل اولاد شوارع عوووووك المعدَّمة ومعدومه من كل فجه يجوك يومها التسوِّد يومها قطامة وقرضمة وراندوك لماضة وطرّقت حلقومة ناسات حكومة الجن ناس جنها الحيكومة ماطال الشوارع فِي فى ولاد بعرفو القومة اولاد الحلال راقديين اولاد اسمها المايقوما ديل اولاد شريعة قوش المستضعفين فى الارض يبنو ويهدو عروش لا الكل بخون البعض لابتشتريها قروش فى كل حتة وراك تمرق تلاقى جيوش اصدق لسان الحال من نضمك المهبوش نفس الولاد جايين من طين حضاره كوش حافظين شعر حميد فاهمين قصايد الدوش ماتمشى يامحجوب عاوزين نظبط بوش ياداااب عرفنا الصاح دخل الكلام الحوش وشكرا سيدى الحجاج
Post: #6 Title: Re: رسالة لعمر البشير قبل صلاة الجمعة اليوم ..... فيديو Author: Medhat Osman Date: 06-22-2012, 11:24 AM Parent: #5
Post: #7 Title: Re: رسالة لعمر البشير قبل صلاة الجمعة اليوم ..... فيديو Author: Kabar Date: 06-22-2012, 11:27 AM Parent: #5
يا مدحت.. أي شجن يا هذا؟..مكي ولا العملاق حمزة علاء الدين..ولا الجن الجنن الجن..المدعو ازهرى؟.. ما اقساها لحظة الخضرمة اياها؟.. ماعارف عمرك كم يا مدحت.. لكن لو بتصدق.. اقولها ليك و لكل الشباب و الشبابات,,في سنة 1984 ضربت دار ام سودان مجاعة (و منها سقط نظام طاغية و حجاج اسمو جعفر نميري) زي مجاعة اليوم..و قام واحد حريف جدا..وثق لتلك اللحظة الحزينة..عارف قال شنو؟.. قال: الصباح الباهي لونك.. وضاحة يا فجر المشارق.. غابة الأبنوس عيونك..با بنية من خبز الفنادق...!!!!
اها لو حصل يا مدحت حضرت تلك اللحظة (مجاعة 1984/1985) كنت فهمت حكاية (يا بنية من خبز الفنادق..و كان حار، لدن ،و نادر..و بيعني حاجة لي زول جيعان)..!!!!!!! هدية لصديقتنا التي تكتب في هذا المنبر باسم وضاحة..و هدية لأستاذنا الجميل ازهري.. نموت نحن..و لتبقى انت لتقول كلمة في وجه الحجاج..
و نحن مع ثورة الشباب بنقول: حركت بيك عصب السكون..و لي قدام..!!! و تاني نحن مع : لا السكة بيك بتنتهي..ولا معاك مليت طواف..!!! و ياريتني لو اقدر اكونك ياااااااااااااااااخ..!!!!
عزاؤنا: في السودان ده سمعنا..شفنا..عرفنا .. عشنا ..حاجات كتيرة..و اقساها جميعا وضاحة فجر المشارق دي..!!!! و لي قدام..!!!
كبر
Post: #8 Title: Re: رسالة لعمر البشير قبل صلاة الجمعة اليوم ..... فيديو Author: Medhat Osman Date: 06-22-2012, 02:39 PM Parent: #7
Post: #9 Title: Re: رسالة لعمر البشير قبل صلاة الجمعة اليوم ..... فيديو Author: Medhat Osman Date: 06-22-2012, 06:26 PM
Post: #10 Title: Re: رسالة لعمر البشير قبل صلاة الجمعة اليوم ..... فيديو Author: Medhat Osman Date: 06-22-2012, 07:01 PM Parent: #9
حي الديوم قبل قليل
Post: #11 Title: Re: رسالة لعمر البشير قبل صلاة الجمعة اليوم ..... فيديو Author: Medhat Osman Date: 06-22-2012, 08:06 PM Parent: #10
Post: #12 Title: Re: رسالة لعمر البشير قبل صلاة الجمعة اليوم ..... فيديو Author: Medhat Osman Date: 06-22-2012, 08:22 PM Parent: #10