بنحبك اكتر كل مرة!

بنحبك اكتر كل مرة..محمد وردي

فتش فى ترابك ..قلبو ذرة ذره..
تلقانا بنحبك أكتر كل مرة..
نحن أولاد كفاحك.. رغم وجودنا بره..
رغم الخطوة تاهت.. رغم الغربة مُرة..

نشد في سبيلك عرفانا وجميلك
ونرحل في هتافك يا عشق إستمر
فتش في ترابك ..قلبو ذرة ذرة ..

بى عينيك نعاين عبر الضلمة باكر..
بكرة الجايى باين فى عودة مسافر..
أمن قلبو عندك....طاف الريح مهاجر..
أنفاسك تنومو لما الحزن جاسر..
وأجراسك تقومو ..يصحى معاك يساهر..
يصحى الحلم دايماً شعب ضراعو وافر ...
فى الأرض التزغرد فى أفق الحناجر...
والشمس البتطلع فى أعلى المنابر..
وزى فى كل مرة أحلى وأغلى ثورة..
يا وطن الأمانى وشعب إرادتو حرة...
فتش فى ترابك ..قَلِبوُ ذرة ذره..

ياما الضفة تشهد يوم غنيت مكانا..
يوم الغابة شافت فى عينيك زمانا..
لما الكلمة تطلع منك برتكانه..
زيك نحن نعشق شرط تكون معانا..
فى توب البنية وفى لمسات حنانا.
فى كل الأماكن وين ماتروح خطانا..
هو العيد نشيدك.واللا الفجر عيدك..
نحن الفى بعيدك أقرب من وريدك..
فى ايدينا جمرة... طول الوكت حرى ..
ياوطن الأمانى وشعبو إرادتو حرة.
. فتش فى ترابك .. قَلِبوُ ذرة ذره..

زرعو خصام جنوبنا ..بى سبب الديانة ..
الأديان سماحة وروح الدين أمانة..
طول تاريخنا عايشين فى السودان ضرانا..
فينا لسانو عربى وفينا لسان رطانه..
مختلفين ثقافة ومختلفين ديانه..
من كل التباين وحدنا إنتمانا ..
ومتفقين فى حبك يا عالى المكانة..