كلـــــــوا مــــدون

كلو مدون
جوة عيونا اطفالنا
اتكوم
حزنا كالح زاد واتكون
من يوم جيتنا
وحتى الحين
و كلو معنون
للاجيال الجاية
انو سوادك خيم
فوق بلداتنا وما بننساها
لما كلاب الجوع في بطننا عون
وانت السادر في افراحك
تجمع فيهم
مال ونسون
كلو مدون
ناسن كانت جد مجهولة
لا تعليم لا وارثة نقود
لا طين لاضل
صارت مالكة
وناسن من ما قامت
كان في عز
صارت مجهولة
وكلو مدون
اليتمت عيالهم
يوم العيد
والافقرت عيالهم بالتشريد
والخليت الحسرة بتكبر
جوة قلوب قاست تنهيد
وجوة قلوبنا كلو مجون

عشرين سنة
وانت بتمص من دمنا
لا يوم يصحيك الضمير
لاهز قلبك جوع جنا
عشرين سنة
والحالة تتراجع ورا
وانت بتزيد فيه الغنى
حواليك حارقين البخور
حنة وغنا
عشرين سنة
شرذمت اجزاء الوطن
شردت ابناء الوطن
لامن ضهر نيلنا انتنى

*

كنت براهن
انك فرس اللفة الحارة
يا شعبا بتعرف الحارة
وكنت براهن
انو ضميرك ما بيموت
وانك اذكى
وانك عرف كيف بتسوس الدارة
وانا يا شعبا
عارف اوصافك
بيك بباهي
انو دقون الويف
دايما تتلون
وانت اصيل ماكك بتتلون
ولمن جات اخبارا سارة
ما استغربت
اصلك شعب الحوبة
ومابتخاف
اللون الاحمر
وانت بتسمو
رغم الفقر
انت الاغنى
وانت الفيمة الشايلة منانا
وماك الريح الدايما ضارة

شكل الجمعة ولون الشارع بيك
اتلون

كلو مدون
من يوم جيتو
وحتى اللحظة
لحظة غبن الناس اللاحسة الكوع
لحظة فيها
لون
الشارع بينا اتلون