Post: #1 Title: إثيوبيا قاربت العبور من عنق الزجاجة !!! Author: عبد الناصر الخطيب Date: 06-15-2012, 06:53 PM
.
يبدؤ انهم اختاروا الزجاجات الاقصر عنقا من زجاجاتهم ذات الاعناق الطويلة .... وزجاجاتهم التقليدية لمن لا يعرفها تشبه زجاج المرطبات بالسكة الحديد قديما بعنقها الطويل فتكاد أن تكون عنق أكثر من أن تكون زجاجة !!!!!!
لكن في المحصلة يبدؤ أنهم أقتربوا كثيرا من العبور المرجوا...
Quote: عبر نائب المدير الإدارى لصندوق النقد الدولى ناويوكى شينوهارا عن تقديره وإعجابه بالجهود الكبيرة التى يبذلها المسؤولون الإثيوبيون لنقل بلادهم من فئة "الدول الأقل نموا" إلى فئة الدول ذات الاقتصاديات المتوسطة الدخل، وقال إن السلطات الإثيوبية تبدى عزما وإرادة قوية لتحقيق هذا الهدف.
وقال شينوهارا فى تصريحات للصحفيين بأديس أبابا فى ختام زيارة لوفد على مستوى عال من صندوق النقد الدولى استمرت ثلاثة أيام، إن السلطات الإثيوبية رحبت بمشاركة صندوق النقد الدولى فى دعم جهود الحكومة فى التعامل مع التحديات التى مازالت تواجه الاقتصاد الكلى فى البلاد، وكذلك فى تطبيق الإصلاحات الاقتصادية وبرامج الحد من الفقر فى إثيوبيا.
وأشار إلى أن البلاد حققت تقدما كبيرا خلال السنوات العشر الماضية باتجاه تطبيق سياسات اقتصادية سليمة لتحقيق نمو قوى، موضحا أن البلاد تبنت فى الآونة الأخيرة تدابير مالية وإصلاحات ضريبية بدأت توتى بثمارها بينما تراجع التضخم وتزايدت العائدات المالية.
زيارة وفد صندوق النقد الدولي مارس 2012 م
إذا المسألة ربما تكون تخطيط سليم وإرادة حقيقية أكثر منها توافر موارد غير محدودة وتدفقات نقدية من البترول ... الجيران لم يكن لديهم تدفقات نقدية مع ذلك اكملوا كثير من بنيتهم التحتية ويبنون مشاريعهم الاستراتيجية, ومع ذلك لم يزالوا قادرين حتي مع موجة الغلاء التي لم يعتادوها أن تكون الحياة في بلادهم ممكنه لكل من له دخل ويجد عمل مناسب
عقبالنا يا ناصر اتوقع تكون اول خطواتهمفي طريق النجاح هي محاربة الفساد و تسهيل العقبات البيروقراطية امام المستثمرين الأجانب السعوديين المشوا اثيوبيا ديل جونا هنا في الأول و شردوا عديل لمن غلبهن يستمروا مع جماعتنا الفاتحين خشومن من الوزير لغاية اصغر موظف
Post: #4 Title: Re: إثيوبيا قاربت العبور من عنق الزجاجة !!! Author: عبد الناصر الخطيب Date: 06-15-2012, 07:57 PM Parent: #2
محمد البشرى الخضر تحية وتقدير ,,,
Quote: عقبالنا يا ناصر اتوقع تكون اول خطواتهمفي طريق النجاح هي محاربة الفساد و تسهيل العقبات البيروقراطية امام المستثمرين الأجانب السعوديين المشوا اثيوبيا ديل جونا هنا في الأول و شردوا عديل لمن غلبهن يستمروا مع جماعتنا الفاتحين خشومن من الوزير لغاية اصغر موظف
البوست ده من وحي غداء وجبنة الجمعة الكان عند ( صالح ) ... الجاء المملكة يصفي شغالوا ويرجع هو وأسرتوا يستقر ويشتغل في بلدوا ...فكانوا بتكلموا عن بلدهم رغم موجة الغلاء والجفاف أنو لي هسه موسم الزراعه مهدد وووووو مع كده كان صالح ومصطفي وإبراهيم عندهم أمل .... يرجعوا ويستقروا في بلدهم في المستقبل المنظور ... أمل بعيد المنال لسودانيين كتار
فكان جواي تساؤل ليه الناس ديل قربو من النجاح في الشي الفشلنا فيهوا مع أنو أتوفرت لينا كبلد موارد أفضل ... بس الشغلانه الظاهر ما موارد وبس
المستثمرين المشوا ليهم قدروا يستمروا لانوا لقوا قانون إستثمار مشجع وواضح يقدر يحميهم ويحمي إستثماراتهم , ويمكن ده الشي الفقدوا عندنا ده غير أنو الناس ديل مجتهدين عارف زمان لما كان السودان عندوا حصة قوية في سوق اللحوم في المملكة الناس ديل كان عروضهم البقدموها للشركات بتتحفظ في الادارج ... وبرضهم أستمروا لحدي ما الليلة بقي عندهم نسبة في السوق ده وده على سبيل المثال ... ولكل مجتهد نصيب
يارب قّصر عنق زجاجتنا
Post: #6 Title: Re: إثيوبيا قاربت العبور من عنق الزجاجة !!! Author: ناذر محمد الخليفة Date: 06-15-2012, 08:34 PM Parent: #2
سلام عبد الناصر ..
Quote: لمن لا يعرفها تشبه زجاج المرطبات بالسكة الحديد قديما بعنقها الطويل فتكاد أن تكون عنق أكثر من أن تكون زجاجة !!!!!!
مالك خجلان لمن ما داير تقول انو الزجاجة المقصودة هي زجاجة أديس (dray jin )..!
ما في داعي لي اللفة الطويلة بتاعت مرطبات السكة حديد والليمونادة والبطيخ مش ؟!!
Post: #3 Title: Re: إثيوبيا قاربت العبور من عنق الزجاجة !!! Author: كمال ادريس Date: 06-15-2012, 07:56 PM Parent: #1
كلام صحيح 100%
Post: #5 Title: Re: إثيوبيا قاربت العبور من عنق الزجاجة !!! Author: عبد الناصر الخطيب Date: 06-15-2012, 08:26 PM Parent: #3
أستاذنا / كمال ادريس مساء الخير ,,,
Quote: كلام صحيح 100%
والبعرفوا عن إقتصاد الدولة الجارة إنوا كان من الافتصادديات الأفضل أداء في أفريقيا والكلام ده بشملنا طبعا لانوا السودان برضوا في الفترة الكان فيها إقتصاد إثيوبيا مزدهر كان أقتصادنا جيد للغاية , هم فترة ما بعد سقوط الامبراطور 1974 م بدأ نظام الدرك في أتجاهه الاشتركي الغوض أساس الاقتصاد الاثيوبي وأدي لانسحاب رؤوس الاموال والشركات الكبري القام عليها فبدأت الضائقة لحدي ما بداءت عوامل الجفاف والفجوات الغذائية المتتالية تخرج قطاعات زراعية كتيرة منتجة خارج دائرة الانتاج ....... وشي فشي بقي اقتصاد أزمة ....
في النهاية يبدؤ إن الجيران وإن لم يحققوا نهضتهم التي يتمنوها لكنهم في الطريق الصحيح
تحياتي ,,
Post: #7 Title: Re: إثيوبيا قاربت العبور من عنق الزجاجة !!! Author: عبد الناصر الخطيب Date: 06-15-2012, 08:49 PM Parent: #5
ناذر خليفة
مساء الورد ,,,
Quote: مالك خجلان لمن ما داير تقول انو الزجاجة المقصودة هي زجاجة أديس (dray jin )..!
ما في داعي لي اللفة الطويلة بتاعت مرطبات السكة حديد والليمونادة والبطيخ مش ؟!!
بالله الزجاجة المقصودة طلعت معروفة !!!!!!!! أنا غايتو بعّرفة بالشي الممكن يكون معروف عندنا فالقيت زجاجات الجنجر واليمونادة بتاعات زمان الماظنهم هسه موجودات ممكن يكونوا الشي الاقرب ليهم ...
دي غنية تقليدية بتتغني في الزواج عند التجراى ( الحبش ) حتلقي فيها الزجاجة الكنت في بالى لما كتبته................. والجن ود عم ( السًوه )
أسمع غنيتك واتخارج البوست ده إقتصادي
تحياتي
Post: #8 Title: Re: إثيوبيا قاربت العبور من عنق الزجاجة !!! Author: ناذر محمد الخليفة Date: 06-15-2012, 09:04 PM Parent: #7
سلام عبد الناصر ..
Quote: دي غنية تقليدية بتتغني في الزواج عند التجراى ( الحبش ) حتلقي فيها الزجاجة الكنت في بالى لما كتبته..
بس في الفيديو مالينها منقة ولا عصير تانج ولا موية كستر ما عارف ..!!
داير أقول شنو ...
في فيديوك دا يا عبد الناصر لو ركزت كويس في الغنية بتلقى فيها زي نفس غنيتنا البتقول (حننوه حننوهو حننوهو بنات أمو جوهو) ..!!
تقريبا نفس الموال والمنوال .. ركز كويس !!
Quote: أسمع غنيتك واتخارج البوست ده إقتصادي
اقتصادي كيفن عاد مع حنة العريس وتعليمة العروس وقزايز المنقة دي هههههه
لكن يا عبد الناصر صراحة الغنية الأولى في الفيديو الأول (ناس عقد الجلاد ديلاك) رهيبة ..!!
Post: #9 Title: Re: إثيوبيا قاربت العبور من عنق الزجاجة !!! Author: عبد الناصر الخطيب Date: 06-15-2012, 10:11 PM Parent: #8
ناذر خليفة
مساء الجمال ,,,
طيب نوقف الكلام في الاقتصاد ونتكلم في المًًرعي / الزواج عند جيرنا شوية وياناذر عند التجراى ( الحبش ) بالذات التقاطعات الفيها شبه بينا وبينهم كتيرة مافي غني الزواج وعادته وبس حتي شكل الحياة في بلدهم ما مختلفين كتير في الحياة وعاداته
مافي تعليم عروس بس في حنة عروس بحفلته , العريس بره الموضوع ده لانوا ما بتحنن أصلا في تجراى ( الرايا ) ديل بحفرة دخانهم في طقوس تانية ممكن تكون جرتق عديل بس مختلفة في جزئات صغيرة , مافي عصير منقة في سّوه ( مشروب تقليدي )
Quote: لكن يا عبد الناصر صراحة الغنية الأولى في الفيديو الأول (ناس عقد الجلاد ديلاك) رهيبة ..!!]
الغنية الأولي لاطشة من صفحة زوجتي في الفيس والشباب ديل ما فرقة فنانين شباب القاعد مرات أسمع ليهوا منهم أمير دوؤد
دي واحدة من اغنياتوا
أها البرجعنا للأقتصاد شنو !!!!
Post: #10 Title: Re: إثيوبيا قاربت العبور من عنق الزجاجة !!! Author: ناذر محمد الخليفة Date: 06-16-2012, 09:11 AM Parent: #9
سلام عبد الناصر ..
والله اشكرك حتى تستغيث .. في جهدك وتعريفك لي وللقاري بعض عادات وموروثات الدول التي تجاورنا ..
حقيقة أول مرة أعرف عاداتم الفي الزواج الأنت كتبتها وشكرا على الفيديوهات الرائعة ..
Quote: أها البرجعنا للأقتصاد شنو !!!!
خلاص أرجعاكا مع بعض أنا لحدي هنا كفاي هههههه
Post: #11 Title: Re: إثيوبيا قاربت العبور من عنق الزجاجة !!! Author: walid taha Date: 06-16-2012, 09:22 AM Parent: #1
نعم ويعد الإقتصاد الأثيوبي من الإقتصاديات الأسرع نموا فى القارة حيث حقق الناتج المحلي الإجمالي نموا يقدر بـ 11%
ان شاء الله يعبرو من عنق الزجاجة عشان نحن هنا برضوا نرتاح شوية من الهجرة المبالغ فيها ...بعد صلاة الصبح في شارع الستين تتمني انو تشوف سوداني كل الناس الفي الشارع اثيوبيين و ارتريين ...............
Quote: مررت السلطات الإثيوبية قانوناً يجرّم استخدام برمجيات نقل الصوت عبر بروتوكول الإنترنت VoIP، بما في ذلك تطبيقي "سكايب" و"جوجل فويس"، وقد قامت السلطات بتركيب معدات خاصة لتصفية وحجب هذه الأنواع من الاتصالات منذ مايو/أيار الماضي.
Post: #14 Title: Re: إثيوبيا قاربت العبور من عنق الزجاجة !!! Author: صلاح عباس فقير Date: 06-16-2012, 02:24 PM Parent: #13
حيا الله عبد الناصر الخطيب! لا يهمني موضوع إثيوبيا، ولا عنق زجاجتها! دخلت فقط للسلام عليك! بالمناسبة قبل حوالي أسبوع، افتقدتك في البورد واتصلت بيك لقيت جواك مغلق، يبدو أنك كنت مسافر، حمد الله على السلامة
Post: #15 Title: Re: إثيوبيا قاربت العبور من عنق الزجاجة !!! Author: ناذر محمد الخليفة Date: 06-16-2012, 03:01 PM Parent: #14
سلام صلاح ..
Quote: لا يهمني موضوع إثيوبيا، ولا عنق زجاجتها! دخلت فقط للسلام عليك!
طيب مش كان ترسل تسلم عليو في الماسنجر أحسن !!
Post: #16 Title: Re: إثيوبيا قاربت العبور من عنق الزجاجة !!! Author: صلاح عباس فقير Date: 06-16-2012, 06:36 PM Parent: #15
حياك الله يا ناذر، والله الماسنجر قبل كدة جربتو مرتين، ما اشتغل معاي! ومع ذلك بنعتذر، بس أوعى تكون فهمت أنو عندي موقف من إثيوبيا، أو كدة! هههههههههه
موضوعكم محل احترامي الكامل! لكن ...
Post: #17 Title: Re: إثيوبيا قاربت العبور من عنق الزجاجة !!! Author: ناذر محمد الخليفة Date: 06-17-2012, 08:56 AM Parent: #16
سلام صلاح ..
Quote: بس أوعى تكون فهمت أنو عندي موقف من إثيوبيا، أو كدة! هههههههههه
يا راجل انا كنت خايق يكون عندك موقف من قزايزا هههههه
Post: #18 Title: Re: إثيوبيا قاربت العبور من عنق الزجاجة !!! Author: عبد الناصر الخطيب Date: 06-17-2012, 10:46 AM Parent: #17
.
وليد طه تحية وتقدير ,,,
الناس ديل بتذكر لاربعة سنوات متالية حققوا نسب نمؤ ممتازة , حسب تقديرات وزير المالية سفيان أحمد الوضع شوية أختلف في 2011 حققوا نسبة نمؤ أقل لعامل التضخم , ما عارف نسبة النمو الجديدة كم _ 7 % _ زي ما قريت مرة أو أقل أو أكتر لكين التباطو في النسب في السنتين الاخيرات ما مؤثر كتير على الاداء الكلي لاقتصادهم
في المحصلة تقيمهم كويس جدا لدي صندوق النقد الدولي وكتير من الدول المانحة ومؤهلين لتلقي مزيد من القروض والمنح , البتأكيد لو أستفادوا منها في حتته حيصلوا لهدفهم المعلن يبقوا من الدول ذات الدخل المتوسط
------------------------------------------------------------ ود الخليفة وصلاح عباس فقير ومدثر صديق منورين البوست ونجيكم بمهّلة معانا الاغنيات والصور ولو أستدعي الامر القزاز كمان
تحياتي ,,
Post: #19 Title: Re: إثيوبيا قاربت العبور من عنق الزجاجة !!! Author: على محمد على بشير Date: 06-17-2012, 11:05 AM Parent: #18
Quote: افتقدتك في البورد واتصلت بيك لقيت جواك مغلق،
لييه كدا يا حبشى !! افتح ياخ .. افتح
تصدق انا كنت قايل الجواك بطل .. اتارى الجواك مغلق
وعليك الله يا حبشى مع الفتحان دا افتح لينا بوست منفصل عن عادات وتقاليد الزواج عند اهلنا السمحين ديل
وتحياتى للحبيب عباس فقير
Post: #20 Title: Re: إثيوبيا قاربت العبور من عنق الزجاجة !!! Author: عبد الناصر الخطيب Date: 06-22-2012, 12:09 PM Parent: #19
ود الخليفة محزّاي / صاحبي تحية وتقدير ,,,
ونبدأ من عندك بالاعتذار لعدم متابعة البوست المافي وقت متاح ليهوا إلا نهاية الأسبوع ...... وجوك أدي البوست جمال ورونق وتعليق على مداخلتك الأخيرة , بالتأكيد ما حتهتم تعرف عن الناس حاجة لو ما عندك صلة بيهم , ومرات صلتك بالأخر _ البتكون معتقد كده جازم _ بتخليك تعرف عنو البلغي من اعتقادك فكرة الاختلاف الكبير بينك وبينوا , وممكن العادات دي ترجع ليها بتوسع في بوست قديم هنا :
أتكلم عن التجراى بتركيز في بعض جوانب حياتهم وموروثاتهم وتقاليدهم ممكن تلقي فيها الكلام عن العادات في الزواج بصورة أفضل وده موصول لعلي محمد على الطلب كده في مداخلتوا الأخيرة
-------------
*كان غرض البوست الاساس في المقارنة بين نظام يعتمد عى موارده الذاتية وعلاقاته الجيدة في فعل كل ما يمكن لتطوير بلاده وتنميتها الاقتصادية ونظام توفرت له الموارد ليفعل ومع ذلك بددها دون فائدة
تحياتي
Post: #21 Title: Re: إثيوبيا قاربت العبور من عنق الزجاجة !!! Author: عبد الناصر الخطيب Date: 06-22-2012, 01:45 PM Parent: #20
العزيز/ صلاح عباس فقير
تحية وتقدير ,,,
شاكر ليك سؤالك مع الاعتذار للتقصير في السؤال ويمكن لدواعي العمل بيكون التلفون مقفول لأوقات طويلة خلال اليوم
أكيد الموضوع ما حيكون في إهتمام كتار بس في البهتم وفي البتابع من المعنيين , فبكون عارف انا في المواضيع الزي دى بكتب لمنو ومنو البقع في دائرة إهتماموا
فليك التحية والتقدير على المرور والسلام
*****
وللقوم سيرة تشرف كل من عرفهم وتجعله يتمني لهم التوفيق ,,,
