كان الشعب السوداني كالأعمى فلما جاء البشير ألقى قميصه عليه فارتد بصيرا

السلام عليكم ورحمة الله وبركاته

نحنا في شهر يونيو .. ويونيو ده طبعا شهر الجماعة 30 يونيو

قال ليك ناس المعارضة بعد ما يسقط النظام ده أول حاجة حيعملوها يخلو شهر يونيو 29 يوم بس ^__^

عشان تاني ما يتكرر 30 يونيو ده أبدا أبدا ^_____^

أذكر في أول احتفال بمرور عام على ثورة الإنقاذ ألقى السموءل خلف الله القريش وزير الثقافة السابق

ألقى كلمة بهذه المناسبة فقال:

كان الشعب السوداني كالأعمى، فلما أن جاء البشير ألقى قميصه على وجهه فارتد بصير ^____^

وهو اقتباس للآية الكريمة من سورة يوسف، والتي فيها أن يعقوب عليه السلام من كثرة بكائه على يوسف فقد بصره

فأرسل يوسف عليه السلام قميصه ليلقوه على وجه أبيه

( فَلَمَّا أَنْ جَاءَ الْبَشِيرُ أَلْقَاهُ عَلَى وَجْهِهِ فَارْتَدَّ بَصِيراً قَالَ أَلَمْ أَقُلْ لَكُمْ إِنِّي أَعْلَمُ مِنَ اللَّهِ مَا لا تَعْلَمُونَ) (يوسف:96)

لكن الشعب السوداني ده والله العظيم مش ارتد بصيرا .. إنتو ليستوهو كلو كلو عمى كباسة بس ^__^

طبعا السموأل وقتها ما كان وزير ولا حاجة

كان يا داب متخرج من الجماعة أظنو

وكان بقدم في رمضان كل سنة مسابقة رمضان

أها أظنو صاحبنا ده بس اختار الآية دي عشان اسم البشير بس

بش بش يا .. سلطات نيابات قال ليك

.


و السموأل دا شنوا هسى؟

و بنا ليو كم عمارة؟

و معرّس كم مرة؟


.

كذلك سمعت مهدي إبراهيم في خطاب منقول عبر الإذاعة السودانية
في أحد احتفالات الإنقاذ في سنيها الباكرة مستهلا خطابه بالعبارة التالية:
سيدي الرئيس ..
( هل أتى على السودان حين من الدهر لم يكن شيئا مذكورا )

Quote: و السموأل دا شنوا هسى؟ و بنا ليو كم عمارة؟ و معرّس كم مرة؟

يا بن عفان
الجماعة فتحوا هم وعمونا نحنا
أتاريهو القميص ده بشتغل شغلين
يعمي ناس ويفتح ناس
قادر الله ياخواننا حكمتو بالغة ^___^

Quote: يا بن عفان الجماعة فتحوا هم وعمونا نحنا أتاريهو القميص ده بشتغل شغلين يعمي ناس ويفتح ناس قادر الله ياخواننا حكمتو بالغة ^___^

تكون قاصد (القميص) البيركبوهو عشان (بستم) العربية

ده كان ألقوهو عليك، عيون زاتو ما بخلي ليك يا محمد :)

لأنو بفجخ الراس :)

Quote: كذلك سمعت مهدي إبراهيم في خطاب منقول عبر الإذاعة السودانية في أحد احتفالات الإنقاذ في سنيها الباكرة مستهلا خطابه بالعبارة التالية: سيدي الرئيس .. ( هل أتى على السودان حين من الدهر لم يكن شيئا مذكورا )

يا أخ طه .. تحية طيبة
والله الناس ديل ما شفت زول بلعب بالقرآن زيهم
ياخي ديل لما جوا يعملوا الإحصاء السكاني قالوا شنو:
( وكل شيء أحصيناه في إمام مبين )
طيب إنو ربنا عشان تقولوا كده؟؟؟؟
وأريتو السودان ده لو ما بقى مذكور .. شنها الذكرى بالله؟!

Quote: تكون قاصد (القميص) البيركبوهو عشان (بستم) العربية ده كان ألقوهو عليك، عيون زاتو ما بخلي ليك يا محمد :) لأنو بفجخ الراس :)

يا شيخنا ده ياتو ده والله أول مرة أسمع بيهو
وللا يكون اسمو تاني؟ قصدك القازقيت؟
غايتو جماعتك ديل القمصان عندهم ^__^

يا محمد
السمؤال دا بالذات الليلة عندو بكاء، والده اتوفى فياريت نخلي موضوعو لوقت لاحق
تلاعب الانقاذ بالدين يحتاج لمجلدات وليس بوست

هو طبعاً أخ زميلنا معتز القريش ..
لك التحايا من قبل ومن بعد ..

المعذرة اناالموضوع ده كتبته قبل ما اطلع على موضوع التعزية
وعليه احتراما لجميع المشاعر ارجو عدم رفعه
ورحم الله موتانا وموتى المسلمين