Post: #1
Title: ما سألت الجنزوري من حلايب يا د. مصطفي اسماعيل؟
Author: عمر الفاروق عبد الله الشيخ
Date: 06-06-2012, 01:30 PM
جاء في الأنباء بأن الدكتور مصطفي عثمان اسماعيل مستشار رئيس الجمهورية للشئون الخارجية "وزير الخارجية الخفي" للإنقاذ إلتقي رئيس الوزراء المصري الدكتور الجنزوري وبعد تبادل التحايا والذي منه، تطرق الإجتماع لسبل تنمية العلاقات الأزلية بين دولتي حوض النيل ومن بينها توفير سبل الإستثمار للمصريين في السودان وخلافه وخلافه سعوالي هنا نحن السودانيين ما بنعرف نستثمر في مصر ولا شنو؟ ولا استثمارنا في مصر مالوش لازمة ولايضيف للخزينة الفاضية شيئاً .. وأكيد الإجتماع بحث قضايا أخري ليس من بينها بأي حال من الأحوال قضية حلايب وشلاتين السودانيتين لحماً ودماً والله الواحد لما يطالع النشرة الجوية في الأخبار المصرية والمذيع يطلع المتابعين علي درجات الحرارة بدءً من القاهرة والأسكندرية وحلوان وو ثم يأتي ل حلايب 38، 22 .. شلاتين 39، 23 ويختمها بأسوان لأنها قريبة من السودان 42، 33. تمسكوا أم هلا هلا وباقي دمه النشفان ده يفور!! ويقرب يطلع ميدان التحرير هاتفاً الشعب يريد ارجاع حلايب .. الشعب يريد استعادة شلاتين!!
يا دكتور مصطفي مش عيب عليك وعينك علي الخريطة المصرية متضمنة حلايب وشلاتين وتقعد تتبسم وتتنح مادي شلاضيمك زي الما حصل حاجة ! ليه ماتطرقت لهذا الموضوع ولو من ناحية السؤال "يا اخوانا عملتوا لينا شنو في موضوع حلايب وشلاتين"؟!!!!!
أظنك أتكلمت واخدت راحتك في انه السودان مهدد من قبل العدو الإسرائيلي ودولة الجنوب الوليدة ونحن ولاد النيل وبعدين الجماعة ديل حيحبسوا علينا المية ويخلونا نشرب من بحر المالح البعيد داك!!
وليه ما خدت ليك غشوة لدار جماعة الأخوان المسلمين يمكن يساعدوك في مهمتك بخصوص القرعة الممدودة بإسم الإستثمار وهي قرعة يمكن مدها لناس الشاطر وغيرهم من كبار رجال الدولارات في مصر من الأخوان عشان يساعدوكم في عمل دريب للجنيه السوداني بعد فقدانه للكثير من السوائل الدولارية!!
ما قلت نحن كنا شحاتين يورينا فيكم يوم شحدت ربي عليك!! هسي البتسووا فيه ده شنو واحد مشي الصين والتاني قطر والتالت السعودية وسعادتك بمصر لافين تعملوا شنو؟ سياحة يعني ولا تجارة؟ وداير اسألك ما قالوا ناس قطر عملوا طناش والسعودية صهينت وكيزان مصر كان ادوكم ماظنيته شي كتير فهم محتاجين المصاريف في جولة الإعادة مع شفيق يا راجل!
سؤالي جبتوا الدولارات الضخيتوها في الصرافات دي من وين واحدين قالوا نور بمعني بعتوا المصفاة لقطر وواحدين قالوا مشتركين في صناديق دولارية اختوا الصرفة الاولي فيها حاجة تجنن وتحنن!
حرقتوا دمنا اكتر مما هو محروق بالجايين تسوا برفع الدعم عن المحروقات وليه المحروقات بالذات ما ترفعوا الخم من المصروفات وترفعوا يديكم من الاختلاسات واللحسات وليه ما ترفعوا مؤخراتكم من كراسي الحكم وحينها يتوقف الصرف علي الحروب وتغلق ملفات الفساد ويعود الجنوب ونغني مثل ما غني الخليل عازة في هواك.
|
Post: #2
Title: Re: ما سألت الجنزوري من حلايب يا د. مصطفي اسماعيل؟
Author: عمر الفاروق عبد الله الشيخ
Date: 06-06-2012, 02:10 PM
Parent: #1
بعد ما ترجعوا شلاتين ممكن تسموها "شحاتين" عادي زي مابقول ولدي عثمان
|
Post: #3
Title: Re: ما سألت الجنزوري من حلايب يا د. مصطفي اسماعيل؟
Author: عمر الفاروق عبد الله الشيخ
Date: 06-06-2012, 05:26 PM
Parent: #2
| Quote: حرقتوا دمنا اكتر مما هو محروق بالجايين تسوا برفع الدعم عن المحروقات وليه المحروقات بالذات ما ترفعوا الخم من المصروفات وترفعوا يديكم من الاختلاسات واللحسات وليه ما ترفعوا مؤخراتكم من كراسي الحكم وحينها يتوقف الصرف علي الحروب وتغلق ملفات الفساد ويعود الجنوب ونغني مثل ما غني الخليل عازة في هواك. |
وجاء في الانباء بأن الدكتور بيطري عبد الرحمن الخضر قد صرح بأن هناك قرار سياسي صادر برفع الدم عن المحروقات يعني قطعت جهينة قول كل خطيب
ولا عزاء لل........
|
Post: #4
Title: Re: ما سألت الجنزوري من حلايب يا د. مصطفي اسماعيل؟
Author: صلاح غريبة
Date: 06-07-2012, 02:33 AM
Parent: #3
ما تخاف انا بكرة حاقابل د. مصطفى اسماعيل وحاساله ليك
|
Post: #5
Title: Re: ما سألت الجنزوري من حلايب يا د. مصطفي اسماعيل؟
Author: عمر الفاروق عبد الله الشيخ
Date: 06-07-2012, 04:55 PM
Parent: #4
| Quote: ما تخاف انا بكرة حاقابل د. مصطفى اسماعيل وحاساله ليك |
شكرا ليك غريبة ماتتعب نفسك ممكن تديني رقم الموبايل ولا ايميله يكون احسن
|
|