Post: #18 Title: Re: اختراق وتهكير موقع وزارة الداخلية السودانية على الانترنت! Author: ABUHUSSEIN Date: 06-01-2012, 01:14 PM Parent: #16
البشاري أبو ريالة دا وزير الدفاع و ل وزير الداخلية....؟؟؟
و ل الإتنين ريالتهم سايلة و ل تكون أنا سكرة أمبارح لسه ما فكت مني ..؟؟؟
Post: #22 Title: Re: اختراق وتهكير موقع وزارة الداخلية السودانية على الانترنت! Author: الامين موسى البشاري Date: 06-01-2012, 01:40 PM Parent: #18
Quote: و ل الإتنين ريالتهم سايلة و ل تكون أنا سكرة أمبارح لسه ما فكت مني ..؟؟؟
كلهم ريالتهم سايلة يا ابو حسين
بالنسبة للسكره ممكن تقول كه كه عشان نشيف :)))))))
الوزارة دي الكان وزيرها منو؟
أي حته مسكها الزول كوجنها ومشى خلاها خرابه .. ..
__ ابراهيم محمود حامد ببقى ليكـ شنو؟ ابو حسين بطل تتذاكى علينا سيرفر وزارة الداخلية الخاص بموقع الوزارة موجود في أمريكا برغم كل الامكانيات المتاحة للوزارة من جبايات وغيره تم انشاء هذا الموقع في عهد ابو ريالة ........ شفته كيف؟! كل سيرفرات وزارات الداخلية في العالم موجودة في نفس الدولة دي معلومة لله ساي ............ اقول قولي هذا واستغفر الله لي ولكم
Post: #17 Title: Re: اختراق وتهكير موقع وزارة الداخلية السودانية على الانترنت! Author: هجو الأقرع Date: 06-01-2012, 01:12 PM Parent: #15
يا ضفوة سلام و جمعة مباركة
كيف يا ود البشارى ، مـــا
اعتقد ان تكون المعلومــات
المهمة على موقع الــوزارة
الخدمى ، بس تهكير موقـــع
الوزارة امر فى غاية الخطورة
Post: #19 Title: Re: اختراق وتهكير موقع وزارة الداخلية السودانية على الانترنت! Author: عبد الحميد حسين Date: 06-01-2012, 01:28 PM Parent: #17
Quote: لحساسية الموقع واهميته بما يحتويه من معلومات
المعلومات الامنية الخاصة بالبلد
معلومات الهويات الوطنية " الرقم الوطني"
وغيرها من المعلومات الدقيقة التي تهدد الامن الوطني
وقد تهكم الهكر بالوزير الذي لم بتأمين الموقع تأميناً جيدا
جمعة مباركة ... والله لو الحاجات دي قاعده فى الموقع دا ..تبقا مسأله السودان دا دايرة سواطة من اول وجديد ..
Post: #28 Title: Re: اختراق وتهكير موقع وزارة الداخلية السودانية على الانترنت! Author: الامين موسى البشاري Date: 06-01-2012, 11:13 PM Parent: #19
Quote: جمعة مباركة ... والله لو الحاجات دي قاعده فى الموقع دا ..تبقا مسأله السودان دا دايرة سواطة من اول وجديد ..
وحتى لو لم تكن يا عبد الحميد
اختراق الموقع يعني أنه غير مؤمن بالدرجة الكافية
ويرسل اشارات سالبة عن امن المعلومات في السودان
وله رمزية ودلالة كبيرة
__
الأخ أمجد الزين
الهكر جاء بالنهار والشمش حيه يا زول
__
Quote: بس إن شاء الله قريبنا وزير الداخلية ماجاتو حاجة ؟!!!
يا فايز قريبكـ لا لوم عليه قاعد ساي وبقضي في زمن معين
يعني كمبارس والوزارة خربانه من زمن اللمبي
Post: #20 Title: Re: اختراق وتهكير موقع وزارة الداخلية السودانية على الانترنت! Author: أمجد الزين Date: 06-01-2012, 01:28 PM Parent: #17
Quote: عزيزي الهكرت موقع وزارة الداخلية : . إنت قدرت هكرت الموقع ده لأنك جيت بالليل وشكلك كنت طافي الأنوار , لاكين لو جيت بالصباح كان اتنفخت , نحتفظ بحق الرد , كان لمينا فيك والله نفرمت ليك جهازك وتاني الفولدر بتاع أغاني وأغاني كان جا الجن الأحمر مابتلم فيهو.
Post: #21 Title: Re: اختراق وتهكير موقع وزارة الداخلية السودانية على الانترنت! Author: Abdlaziz Eisa Date: 06-01-2012, 01:34 PM Parent: #17
Quote:
مع الاسف نعم يا عبد العزيز عيسى
سماءنا مفتوحة وأرضنا محتلة وفضاءنا مخترق
شكرا لرفد البوست يا حبيب
عزيز الصفوي ود البشاري
الناس ديل عاملين ضوضاء وهوس هم فاكرين نحن ننسى حلايب ولا انتهاك السيادة المتواصل!! حيكومة تعيسة وخائبة رجاء.. زوبعة وهيلمانة عشان هجليج .. ويتبجحون عنها وطنية وسيادة.. جبنـــــــــــاء يا تعســـــــــــــــــــاء.. حلايب محتلة أعلنوا تعبئة لاسترداد حلايب ستجدون الرضيع يحمل سلاحا الشعب مستعد لحرب مصر في سنتمتر مربع... ناس ما قادرين يحموا أي شئ
تحياتي
Post: #23 Title: Re: اختراق وتهكير موقع وزارة الداخلية السودانية على الانترنت! Author: فايزودالقاضي Date: 06-01-2012, 01:43 PM Parent: #17
Quote: اختراق وتهكير موقع وزارة الداخلية السودانية على الانترنت!
بس إن شاء الله قريبنا وزير الداخلية ماجاتو حاجة ؟!!!
Post: #24 Title: Re: اختراق وتهكير موقع وزارة الداخلية السودانية على الانترنت! Author: الامين موسى البشاري Date: 06-01-2012, 01:59 PM Parent: #17
بكلامكـ دا معناهو الوزارة شغالة يدويا ولم يتم حوسبة هذه المعلومات
ودي لوحدها مصيبة ولا شنو؟
آخر موقع يجب اختراقه هو وزارتي الداخلية والدفاع في اي بلد
تحياتي
Post: #25 Title: Re: اختراق وتهكير موقع وزارة الداخلية السودانية على الانترنت! Author: Dr.Mohammed Ali Elmusharaf Date: 06-01-2012, 02:23 PM Parent: #24
الاخ الامين تحياتي
Quote: طيب اسماء وارقام الهويات الوطنية محفوظة وين؟
هون عليك يا صديقي انت اظنك قاصد بالكلام الفوق ده اسكتلنديارد
صدقني موقع وزارة الداخلية ما فيه اي شئ مما ذكرت اللهم الا صفحة عشان يقولوا نحنا دخلنا عالم الحواسيب ولا يقدم اي خدمات للجمهور حتى الان ضباط الشرطة ما عندهم اميل داخلي خاص بالعمل
Post: #26 Title: Re: اختراق وتهكير موقع وزارة الداخلية السودانية على الانترنت! Author: الامين موسى البشاري Date: 06-01-2012, 03:30 PM Parent: #25
اظن الهنود قروا البوست دا
الآن كاتبين الموقع تحت الصيانة ههههههههههه
الظاهر كدا ما كانوا عارفين انو مهكر ظااااااااااطو
Post: #27 Title: Re: اختراق وتهكير موقع وزارة الداخلية السودانية على الانترنت! Author: عماد حسين Date: 06-01-2012, 03:45 PM Parent: #26
Quote: بس إن شاء الله قريبنا وزير الداخلية ماجاتو حاجة ؟!!!
العوجة جاتو تب!!
Quote: اخترق هكر سوداني موقع وزارة الداخلية السودانية
وسيطر عليه سيطرة تامة وترك عدة رسائل
للبشير ولـوزير الداخلية ابو رياله
هو في عوجة أكتر من الريالة السواها ليهو الامين دي :)
الامين.. يا أخي لاباس عليك
إن شاء ما تشوف شر يا أخي :)
________________________ غايتو البوست ده ذكرني نكتة: عبود ده جنّا ولّ شنو :)
Post: #30 Title: Re: اختراق وتهكير موقع وزارة الداخلية السودانية على الانترنت! Author: الامين موسى البشاري Date: 06-01-2012, 11:23 PM Parent: #27
عماد حسين
العوجة والريالة جات معاكم
وكان ختيتونا الحبه ما بتجينا ...... والله صحي
من الخبر دا كلو دا الطلعت بيهو مش كدا؟
ما بتفرق كتير ابو ريالة ولا ابو نخامة كلهم زي بعض
الله يحلنا منكم ........ قول آميييييييييييييين
Post: #42 Title: Re: اختراق وتهكير موقع وزارة الداخلية السودانية على الانترنت! Author: عماد حسين Date: 06-02-2012, 12:56 PM Parent: #30
Quote: عماد حسين
العوجة والريالة جات معاكم
وكان ختيتونا الحبه ما بتجينا ...... والله صحي
من الخبر دا كلو دا الطلعت بيهو مش كدا؟
ما بتفرق كتير ابو ريالة ولا ابو نخامة كلهم زي بعض
الله يحلنا منكم ........ قول آميييييييييييييين
انت زاتو الجاري وراك منو؟
ما تفكها في روحك ساي وتقوم تصدق :)
نحنا ناس الجبجبة ديل ما ناسنا ولا بندورم
المشتهي الحنيطير يطير :)
___________________
خلي روحك رياضية وخلونا نشوتكم زي ما شتونا زمان
الصبر جبر... والله صحي :)
Post: #29 Title: Re: اختراق وتهكير موقع وزارة الداخلية السودانية على الانترنت! Author: الامين موسى البشاري Date: 06-01-2012, 11:18 PM Parent: #25
Quote: صدقني موقع وزارة الداخلية ما فيه اي شئ مما ذكرت اللهم الا صفحة عشان يقولوا نحنا دخلنا عالم الحواسيب ولا يقدم اي خدمات للجمهور حتى الان ضباط الشرطة ما عندهم اميل داخلي خاص بالعمل
د. محمد المشرف
سلام .........
أختراق الموقع نفسه له دلاله ورمزية كبيرة
وعبره أراد الهكر ايصال رسالة معينة وهي
اذا كان موقع وزارة بمثل هذه الحساسية قاعد امفكو في السهلة
فعلى السودان السلام ، هناكـ عدة اختراقات تمت لعدد من مواقع الوزارات الهامة
ومن ضمنها وزارة النفط ، الموقع مستضاف على سيرفر خارجي وليس به أي تحصينات
كن بخير
Post: #31 Title: Re: اختراق وتهكير موقع وزارة الداخلية السودانية على الانترنت! Author: abdelrahim abayazid Date: 06-01-2012, 11:58 PM Parent: #29
تصرف حكومة المؤتمر الوطني مبالغ طائلة للحفاظ علي المظهر العام للدولة ووجود الحكومة في الشبكة العنكبوتية احد هذه المظاهر
اضافة الي الصرف اللا محدود في الحوسبة وما تم فيه من عمولات حتي يرسي عطاء الحكومة الالكترونية.
لا احد يدري ان كان السيرفر الذي يوجد به الويب التعريفي هو نفس السيرفر الذي توجد به الخدمات والمعلومات عن المواطنين من تفاصيل جوزات وتاشيرات وقوائم الحظر وسوف يظهر ذلك اذا تاخر العمل في مواني الدخول او الخروج.
وان غدا لناظره غريب عندما تصدر وزارة الداحلية بيان لها علي ما اعتقد بعد المؤتمر الصحفي الذي من المفترض ان تعقده لجسامة الحدث
Post: #32 Title: Re: اختراق وتهكير موقع وزارة الداخلية السودانية على الانترنت! Author: ABUHUSSEIN Date: 06-02-2012, 00:09 AM Parent: #31
Quote: وان غدا لناظره غريب
و الله فعلاً غريب ... و غريب شديد كمان
Post: #33 Title: Re: اختراق وتهكير موقع وزارة الداخلية السودانية على الانترنت! Author: abdelrahim abayazid Date: 06-02-2012, 00:38 AM Parent: #32
Quote: Quote: وان غدا لناظره غريب
و الله فعلاً غريب ... و غريب شديد كمان
كويس انك عرفت انو غريب وما قريب
Post: #34 Title: Re: اختراق وتهكير موقع وزارة الداخلية السودانية على الانترنت! Author: بريمة محمد Date: 06-02-2012, 08:37 AM Parent: #33
ول أبا الأمين البشارى
سلامات .. أظن يا ول أبا، مسألة التهكير لا تعنى إتلاف الموقع. الهكرز دائماً يعملون التهكير لأسباب .. كهواية، تسلية، وأثبات مهارات .. الهكرز الذى ينوى سرقة المعلومات لا يعلن عن نفسه .. فهو يدخل ويجمع المعلومات التى يريدها ثم يمسح أثره فى الموقع .. لا يترك أثر ويخلى الجماعة خشومهم ملح ملح ..
من خلال الصورة المرفقة، أن الهكر أخترق السيرفر وقام بتغيير ال host فايل لكى يعمل تحويل redirection لصفحته ..
من وجهة نظرك كيف أخترق الهكر السيرفر ..؟ مثل هذا السيرفر يجب أن يكون لديه Firewall تعمل على فلترة أى IP .. غايتو يا ول أبا الأمين يبدو الهكر كان مرابط فى الصفحة وسرق ال session id بتاعت زول ..
وأظن باقى الوزارات تتبع نفس الطريقة فى الأسماء ... ودا يعنى أن الهكرز الأن سايط فى كل هذه الوزارات ..
أحسن الجماعة يلحقوا ويشوفوا لهم صرفه ..
هل ممكن يكون الشغلانة دى قايمين بيها الجنوبين .. لو ثبت كده يفكوا فيهم الهكرز بتاعين الشمال وتكون جنت براقش على نفسها؟
بريمة
Post: #36 Title: Re: اختراق وتهكير موقع وزارة الداخلية السودانية على الانترنت! Author: مناهل عبد الله مصطفي Date: 06-02-2012, 09:28 AM Parent: #35
دي عوجه كبيره
أها الامور مشت كيف
Post: #41 Title: Re: اختراق وتهكير موقع وزارة الداخلية السودانية على الانترنت! Author: الامين موسى البشاري Date: 06-02-2012, 11:43 AM Parent: #36
Quote: دي عوجه كبيره
أها الامور مشت كيف
مناهل ازيك
الموقع متوقف حتى هذه اللحظة
Post: #37 Title: Re: اختراق وتهكير موقع وزارة الداخلية السودانية على الانترنت! Author: مناهل عبد الله مصطفي Date: 06-02-2012, 09:28 AM Parent: #35
دي عوجه كبيره
أها الامور مشت كيف
Post: #40 Title: Re: اختراق وتهكير موقع وزارة الداخلية السودانية على الانترنت! Author: الامين موسى البشاري Date: 06-02-2012, 11:29 AM Parent: #35
ول ابا بريمة حبابكـ تاني
Quote: وأظن باقى الوزارات تتبع نفس الطريقة فى الأسماء ... ودا يعنى أن الهكرز الأن سايط فى كل هذه الوزارات ..
أحسن الجماعة يلحقوا ويشوفوا لهم صرفه ..
لا مشكلة في التسمية اطلاقاً فهناكـ شبه اجماع
على تسمية هذه الوزارات بهذا الشكل في الكثير من الدول
المصيبة في أن تكون كلها مستضافة على نفس السيرفر
ويكون الهكر اخترق السيرفر وليس موقع وزارة الداخلية فقط
فلو تمكن من اختراق السيرفر بامكانه الحاق اي ضرر ببقية الوزارات
اما لو اخترق موقع وزارة الداخلية فقط سيكون الاثر محدود
Quote: هل ممكن يكون الشغلانة دى قايمين بيها الجنوبين .. لو ثبت كده يفكوا فيهم الهكرز بتاعين الشمال وتكون جنت براقش على نفسها؟
بريمة
لا اتوقع أن للجنوبيين دور في هذا
الهكر سوداني وطالب حديث التخرج
لكن يجب تأمين مواقع هذه الوزارات جيداً تحسباً للظروف
كن بخير
Post: #44 Title: Re: اختراق وتهكير موقع وزارة الداخلية السودانية على الانترنت! Author: Elfadil Sabeil Date: 06-02-2012, 03:47 PM Parent: #40
يا الامين إزيك و اخبارك
Quote: الهكر سوداني وطالب حديث التخرج
ها ها ها و الله ده بالغت و اتقطعت فيهو شديد و مسحت بهم الارض فكلامك زكرني بنظرية زمان اهلنا بيحكوها لينا لتعرفينا بقدرة حفظة القرآن عند احد القبائل، و بالاخص الذين هاجروا و نالوا التشريف بحفظ المصحف الشريف. فعند العودة عليهم تقديم رسالة تشريفهم بيان بالعمل. فواحد برهانه اعطي جميع ذكور قريتهم اجازة حتي الديكة حرمهم من الصياح و الكلاب من النباح و و . فالصباح ناس القرية سالوا عن الواصل الجديد، ليباركوا له التخرج.
فالزول رسالتو وصلت تب.
فهكذا كانت تًجاز الرسالة عند بعض .............
---------------------------------------------------------------- يازول اسكايبك ده ما شوفت اخضر ولا مره
Post: #45 Title: Re: اختراق وتهكير موقع وزارة الداخلية السودانية على الانترنت! Author: الامين موسى البشاري Date: 06-02-2012, 09:57 PM Parent: #44
أوووووووو سنيرنا الفاضل سبيل
كيف حالكـ اها الجماعة جوك في ملعبكـ ياخ
ادينا الرأي العلمي لكيفية تأمين المواقع الحكومية دي باللاي
Quote: ها ها ها و الله ده بالغت و اتقطعت فيهو شديد و مسحت بهم الارض
تحياتي
Post: #39 Title: Re: اختراق وتهكير موقع وزارة الداخلية السودانية على الانترنت! Author: الامين موسى البشاري Date: 06-02-2012, 11:14 AM Parent: #34
ول ابا بريمة ........ تحياتي
Quote: سلامات .. أظن يا ول أبا، مسألة التهكير لا تعنى إتلاف الموقع. الهكرز دائماً يعملون التهكير لأسباب .. كهواية، تسلية، وأثبات مهارات .. الهكرز الذى ينوى سرقة المعلومات لا يعلن عن نفسه .. فهو يدخل ويجمع المعلومات التى يريدها ثم يمسح أثره فى الموقع .. لا يترك أثر ويخلى الجماعة خشومهم ملح ملح ..
هذا ليس حكماً مطلقاً فبعض الهكر يتملكه جنون العظمة
وينشرون ما يشير الى شخصياتهم كالهكر السعودي الذي دوخ اسرائيل
قبل فترة واخترق عدة بنوك وسرق معلومات البطاقات الائتمانية
من هكر موقع وزارة الداخلية طالب سوداني حانق على النظام
ويعاني من الظلم والفساد وقد اراد فقط توصيل رسالة معينة للحكومة
Quote: من وجهة نظرك كيف أخترق الهكر السيرفر ..؟ مثل هذا السيرفر يجب أن يكون لديه Firewall تعمل على فلترة أى IP .. غايتو يا ول أبا الأمين يبدو الهكر كان مرابط فى الصفحة وسرق ال session id بتاعت زول ..
صحيح مفروض يكون هناك تأمين عالي لهذا الموقع لحساسية
المعلومات التي يحتويها .........
كل الحكومات في الدنيا تستأجر سيرفر خاص بها
وهي من تديره وتعمل على تأمينه بوسائل حماية قوية
موقع الوزارة مستضاف كأي موقع عادي والسيرفر في امريكا
وقد طرح هذا الموضوع من قبل ولكن لا حياة لمن تنادي
مع الاسف من اخترق السيرفر طالب حديث التخرج وربما يكون ذو امكانات متواضعة
وهذا يبين سهولة اختراق الموقع فكيف اذا هاجمهم هكر خبير او تعرضوا لهجمة من قراصنة
اسرائيل او دول شرق اسيا؟
Post: #38 Title: Re: اختراق وتهكير موقع وزارة الداخلية السودانية على الانترنت! Author: الامين موسى البشاري Date: 06-02-2012, 10:59 AM Parent: #31
Quote: وان غدا لناظره غريب عندما تصدر وزارة الداحلية بيان لها علي ما اعتقد بعد المؤتمر الصحفي الذي من المفترض ان تعقده لجسامة الحدث
لا أتوقع أن تصدر الوزارة تصريح او حتى تقوم بمؤتمر صحفي
هذه المهنية لا يعرفونها اخي عبد الرحيم
وسيمر الأمر مرور الكرام دون محاسبة
Post: #43 Title: Re: اختراق وتهكير موقع وزارة الداخلية السودانية على الانترنت! Author: محمد البشرى الخضر Date: 06-02-2012, 01:13 PM Parent: #38
لا حظت يا ود البشاري لرسالة الهاكر و لإسم المجموعة "سودان سيكيوريتي تيم" نفس الاسم دا كان اخترق مواقع معارضة - ما متذكر الاسماء بالضبط - و الراسلة لو ملاحظ بتخاطب البشير بنوع من الإحترام شكلهم ديل جماعتن زاتهم و اتاخروا عليهم في المرتبات و الحوافز فنظام ادوهن قرصة هههههههههههههههههه
Post: #46 Title: Re: اختراق وتهكير موقع وزارة الداخلية السودانية على الانترنت! Author: الامين موسى البشاري Date: 06-02-2012, 10:06 PM Parent: #43
Quote: شكلهم ديل جماعتن زاتهم و اتاخروا عليهم في المرتبات و الحوافز فنظام ادوهن قرصة هههههههههههههههههه
ابو حتحوت دي قرصة تودي القبر ياخ
سودان سيكورتي تيم هو تجمع لمجموعة هكر سودانيين
بقيادة الجوكر المعروف لديكم في سودانيز اونلاين هنا
وعندهم موقع جميل لا انصح بدخوله لغير المختصين
لكن برضو احتمال كلامك وارد
زي ديل يا ود البشــرى مفروض الحكومة تتبناهم وتمنحهم رواتب عالية جدا