كتبتا عنوان البوست (اختزال مظهر الفتاه السودانيه ..الخ) ومن ثم قررت سحب كلمه (مظهر) ! لانو للاسف الشديد .. التكلف الواضح في تفتيح اللون وزياده الوزن أصبحت هي البضاعه الرائجه بين الفتيات .. تقليدا لمن يعتبرن (وجه السودان الجميل) ! وبين هذا وذاك .. ضاع الجوهر .. وبقى المظهر وحده لا شريك له هو بوصله الاهتمام لدى الكثيرات !
كريمات رخيصه الثمن , وحبوب من ماركه (أبو نجمه) و أبو أربعه وأربعين تغزو الاسواق بشده ! بل أن (الدلاليات) يحضرن اليك ما تشاء منها (دليفري) وحتى باب بيتك ! لا رقابه ولا حظر وأحد يستمع للاصوات التي تنادي بفرض عقوبات على المستوردين والمهربين لهذه السموم !
البيع على عينك يا تاجر ! سعد قشره .. سوق امدرمان .. بل أن كل حي من أحياء العاصمه أو الاقاليم يتضمن (بوتيك) صغير يحوي معدات (التبييض) و (التسمين) بنوعيه (الموضعي ) و (العام) .. ولا ننسى طبعا معدات (التنحيف) كلها تحمل اسماء وهميه , وعلب رخيصه الانتاج , لا روشته ولا قائمه بالمحتويات ..!
تناقلت وسائل الأعلام على مدى فترات متعددة , أخبارا عن قرارات (حكوميه) تقضي بمنع (استيراد) مواد التجميل التي لا تحوي (قائمة بالمحتويات) أو تحتوي على (مواد مسرطنة) أو تلك التي لم تحصل على تصريح من ادراة السموم والصيدله .. وفي مقدمة تلك المواد (كريمات تبييض البشرة) ..وقد استبشرنا خيرا بهذا القرار الذي سيحد (الى مدى بعيد) من تداول هذه المواد ..
ما تعارض ما تلك القرارات .. ويجعلني دوما استغرق في تفكير عميق .. هي تلك (اليافطة الاعلانيه) هائله الحجم التي تتوسط (اشارة النفق) (بجانب البركس .. مواصلات بري سابقا) .. الاعلان لأحد كريمات التبييض (ديانا) ! وقد تناقلت الاوساط الطبيه والدوائيه عما أن كان الكريم يحتوي على مادة (الزئبق) (لم يثبت ذلك معمليا) بجانب احتوائه على مواد مبيضه للبشرة ومفتحه للون ..
التعارض الواضح مابين قرارات منع الاستيراد وبين توافر تلك المستحضرات بكثافه في مناطق التجمعات (مواصلات الاستاد .. سعد قشرة ..الخ) هو مايوقع المواطن (شريحه النساء في الأغلب) في حيرة شديده بين ما هو كائن وبين ما يجب أن يكون ..
هذه المستحضرات يتم تدولها في الاسواق جهارا نهارا وعلى (عينك يا تاجر) , تمتلىء بها (طبليات السوق العربي) ويفترشها الباعه على مرأى ومسمع من الجميع .. دون أن يتخوفوا حتى من (كشات مفاجئه) أو حتى مسائله قانونيه .. بل ان بعض الباعه يمتلكون (محلات /بوتيكات) خاصه بهم , لبيع تلك المستحضرات .. احدى التاجرات بسوق سعد قشره (بحري) تمتلك (كشكا) لـ (خلط الكريمات) وبيعها للجمهور .. المدهش انها تقوم بخلط تلك المستحضرات دون أي خلفيه علميه , بل وأنها تعطي ارشادات بالاستعمال (ما سائله في أي صيدلاني .. يا حليلك يا المشرف) .. المدهش (أكتر وأكتر) أن الكشك الذي تمتلكه مجاور (الهيته بالهيته) لكشك (بسط الامن الشامل) بالسوق !
Post: #33 Title: Re: اختزال الفتاة السودانيه في (البياض) و(الجضوم) (حرم النور مثالا)! Author: Ahmed Yousif Abu Harira Date: 05-31-2012, 10:32 AM Parent: #2
طالما تتغزلن وانتن جميلات فما الذي يمنعني ان اوصف هذه الرقبة كقزازة عصير وان الحلق اصبح مشرشر باقراط داسر ما يدور وبس
اما عن الفنانة حرم النور فقد كانت جميلة عندما كانت طبيعية وغير صناعية (حلوة صناعية دي) وزاد الجضوم تورما مما افقدها واحتفظت ببياضها الطبيعي ولكن اعيب عليها كثرة التلوين في شعرها التي كانت كالليل تتموج
والعنوووووووووان دا ما مننا ولكن من بنات افكار البنات (( داليا الكباشي مثالا))
Quote: كريمات رخيصه الثمن , وحبوب من ماركه (أبو نجمه) و أبو أربعه وأربعين تغزو الاسواق بشده !
ابونجمة ده أكيد جابوه الوالى ابو اربعة واربعين ده البخلى البنت تبقى فور درافير المشكلة يشترك فيها ايضا الرجالة وذلك بأعجاب البعض بما يغير حال البنات من كضوم وما شابه ذلك.... بينى بينك الجمال تختلف مقايسه ولكن بشرط ان يكون طبيعى امل ان تلتفت بعض الشابات الى ذلك تحياتى
الموضوع ده شائك و احسب انه داير ليه فريز كيمان عشان الناس تعرف تشوت علي الاتجاهات المحتاجة شغل جد
موضوع الكريمات و التفتيح الكيميائي ده اكيد واضح الموقف العام فيه، حاجة بتضر بصحة الزول، كريمات، سجاير، سعوط، سودانيز اونلاين، الخ الخ، لازمتها شنو؟ و خصوصا لو كان الزول شخصية عامة قد يتخذها البعض قدوة
انا لا اعرف صاحبة الصورة، و لكن بصورة عامة موضوع الانسان يختار يبقي شنو ولا شكلو كيف ده يستحسن نقاشة في حدود حق الانسان في الاختيار، و ان كان بنظرنا الزول بقي شين بعد التغيير، زول داير يبقي لونه فاتح بطريقة لا تضر بالصحة، من حقه و زول داير يبقي غامق بطريقة صحية، علي كيفه، زول داير يبقي نحيف او سمين من غير افراط و ضرر بصحته، علي كيفه في نظري
بالنسبة للون في الصورتين و بالذات في اليدين، انا ما شايفة فرق شديييد كده بصراحة، اما في الوجه دي احتمال تكون بودرة و مرات الضوء الجاهر في التصوير بيفتح البشرة بصورة مختلفة عن الحقيقة و مرات السمنة و الراحة بتفتح اللون و مرات و مرات، احنا ليه نطينا مباشرة لافتراض انها مستعملة كريمات و ما ادراك؟ حتي لو كانت هناك شائعات تقول بكده، ما لم ست الحق تصرح بمعلومة زي دي الكلام ده بيظل في نظري ظن، و بعضه اثم يا دلوش، ولا شنو؟
حكاية انه بقي عندها جضوم ولا ازدادت وزنا دي، برضك ليها تفسيرات كتيرة، يمكن حصلت ليها حاجة في حياتها و بقت كده؟ الكثير من السودانيات و غير السودانيات مع تقدم السن و الزواج و عدم الحركة بيزيدو وزن و لونهم يفتح طبيعي كمان، يمكن عندها مشكلة بغددها و يمكن و يمكن و يمكن
يا دلوش ياخ انا دايرة اسال، نتاكد من وين انه الزولة دي مستعملة كريمات ولا سمنانة بطريقة ما طبيعية؟ و ما دخل الجوهر بالمنظر ليضيع؟
بعدين الرجال ديل مالكم ما بتفتحو ليهم بوستات بتفتيح اللون و السمن؟ لووول الواو دي راجعة لناس سودانيز ديل، ما انتي تحديدا
قلت ما دام البوست كله شايت شمال، النجرب نشوت يمين، و لو من باب التمس لاخيك سبعين عذرا :)
ــــــــــــ من زمن الروعة مشتاقين يا بنية وينك؟
Post: #15 Title: Re: اختزال الفتاة السودانيه في (البياض) و(الجضوم) (حرم النور مثالا)! Author: أمين محمد سليمان Date: 05-30-2012, 03:41 PM Parent: #13
يا دوك ... كيف الحال و لعلك و بعلوبة في أتم صحة و عافية ...
Quote: انا لا اعرف صاحبة الصورة، و لكن بصورة عامة موضوع الانسان يختار يبقي شنو ولا شكلو كيف ده يستحسن نقاشة في حدود حق الانسان في الاختيار، و ان كان بنظرنا الزول بقي شين بعد التغيير، زول داير يبقي لونه فاتح بطريقة لا تضر بالصحة، من حقه و زول داير يبقي غامق بطريقة صحية، علي كيفه، زول داير يبقي نحيف او سمين من غير افراط و ضرر بصحته، علي كيفه في نظري
شفتي كلام ( رحاب ساي) ده... امسكي فيه قوي ... يا اخوانا منو العندو الحق يقول لزول ما تفتح لونك و ما تعمل ليك جضوم ... حتي لو لشخصية عامة ؟ و نعرف كيف ذاتو إنو الزوله دي عملت الحاجات دي intentionally ولا حصلت نتيجة بلع حبوب بتاعة أي حاجة تانية و أدت للتغيير ده ... كلام ( رحاب ساي) الفوق ده لو في إعتراض عليهو بكون في حتة تضر بالصحة و ما تضر بالصحة دي ... ياخي افرضي أنا عايز أعمل لي جضوم بطريقة تضر بالصحة ... هل في زول عندو حق منعي من الخيار ده ؟ مشكلة البوست ده في رايي إنو بتكلم عن زول محدد ... ما كلام عام بتاع إنو يا جكس الكريمات دي بتكتلكم و البتاعت البتنفخ الجضوم دي بتلحقكم الزينين ...
سؤالك عن حدود الحرية وجية يا امين (يا بروف)، و ارجو ان يكون ضمن النقاط البتتناقش في البوست ده
لكن يا امين النفرق بين: 1.حقك في اختيار انك تعمل جضوم بطريقة ضارة، طبعا مكفول ليك و انت و ربك و نفسك 2. و بين حق الناس الحوليك انهم ينصحوك، دي من حق اي زول و باللتي هي احسن و بطريقة تسهل ليك انك ترتضي النصح ده
انا شخصيا، اري انه اي زول، خصوصا لو كان هناك من يقتدي به من صغار او حتي كبار، و من عدة ابواب، انه علي الاقل يجب تذكيره بضرورة الاقلاع عن العادات الضارة باب الحرية ده كبييير، اذا ربنا كفل للعباد حق حرية اختيار دينهم، و ده اكبر من اي موضوع تاني، تفتكر ممكن زول يقول ليك ما عندك حق تختار انك تكون سمين؟ ولا ابو جضوم؟
طيب رائك شنو في اصحاب البشره البيضاء االلاتي يبحثن عن السمره تحت شمس الاستواء وتخصيص الوزن مع الجضوم طبعا ؟ وحتي اللذين يغيرون اجناسهم ( التحول الجنسي )...
يمكن يا دكتورة داليا أن تتناولي ظاهرة استخدام كريمات تفتيح البشرة وأثرها السلبي على الفتيات بصورة عامة دون الحوجة لتقديم حرم النور كمثال لهذه الظاهرة لأن في ذلك إساءة لها وتدخل غير كريم في أمورها الشخصية.. أنت وأنا وغيرنا هنا نعرف حرم النور كمغنية سودانية، لذلك يجب أن يقتصر نقدنا لها في ما تقدمه من أعمال فنية، أما شكلها ولونها وتسريحتها وما إلى ذلك فهو أمر يخصها وحدها.. هذا بوست مهين لحرم النور كإنسانة ولو كنت مكانك لطالبت بحذفه.. بالجد ده بوست غريب..!!!
Post: #19 Title: Re: اختزال الفتاة السودانيه في (البياض) و(الجضوم) (حرم النور مثالا)! Author: كمال مبارك Date: 05-30-2012, 05:53 PM Parent: #18
Quote: هذا بوست مهين لحرم النور كإنسانة ولو كنت مكانك لطالبت بحذفه.. بالجد ده بوست غريب..!!!
Quote: يمكن يا دكتورة داليا أن تتناولي ظاهرة استخدام كريمات تفتيح البشرة وأثرها السلبي على الفتيات بصورة عامة دون الحوجة لتقديم حرم النور كمثال لهذه الظاهرة لأن في ذلك إساءة لها وتدخل غير كريم في أمورها الشخصية.. أنت وأنا وغيرنا هنا نعرف حرم النور كمغنية سودانية، لذلك يجب أن يقتصر نقدنا لها في ما تقدمه من أعمال فنية، أما شكلها ولونها وتسريحتها وما إلى ذلك فهو أمر يخصها وحدها.. هذا بوست مهين لحرم النور كإنسانة ولو كنت مكانك لطالبت بحذفه.. بالجد ده بوست غريب..!!!
%100
Post: #21 Title: Re: اختزال الفتاة السودانيه في (البياض) و(الجضوم) (حرم النور مثالا)! Author: Abd Alla Elhabib Date: 05-30-2012, 09:17 PM Parent: #20
سلام د. داليا أمسكي قوي في كلام أخونا نصر الدين مع إعتذار مـنك لحـرم النور.
Post: #22 Title: Re: اختزال الفتاة السودانيه في (البياض) و(الجضوم) (حرم النور مثالا)! Author: محمد قسم الله محمد Date: 05-30-2012, 09:40 PM Parent: #21
Quote: (حرم النور مثالا)!
أنا مع مناقشة الظاهرة من ناحية عامة .. ولكنني ضد التخصيص والنمذجة التي قد تصيب شخصاً بعينه ببعض الرشاش والإساءة.
Quote: يمكن يا دكتورة داليا أن تتناولي ظاهرة استخدام كريمات تفتيح البشرة وأثرها السلبي على الفتيات بصورة عامة دون الحوجة لتقديم حرم النور كمثال لهذه الظاهرة لأن في ذلك إساءة لها وتدخل غير كريم في أمورها الشخصية.. أنت وأنا وغيرنا هنا نعرف حرم النور كمغنية سودانية، لذلك يجب أن يقتصر نقدنا لها في ما تقدمه من أعمال فنية، أما شكلها ولونها وتسريحتها وما إلى ذلك فهو أمر يخصها وحدها.. هذا بوست مهين لحرم النور كإنسانة ولو كنت مكانك لطالبت بحذفه.. بالجد ده بوست غريب..!!!
بالعكس فضرب المثل بحرم النور افيد لانو الناس دي بقت مناظرها قبيحه وبشعه بعد مايتلونو ... ومادايرين يقتنعو بانو ده مرض وغير كده ... هم متلونين لمنو ؟ ماهو نحن لونا زيهم ... والله شي مقرف.
ماشفتو مايكل جاكسون بعد ما غير لونو بقى كيف؟ قرد بس.
صباحكم خير بي توقيتنا .. وعشان أقدر أواصل في البوست بطريقه ممنهجه ,, حا أرد على بعض المداخلات .. والبقيه متروكه لفطنه القارىء
صاحبه الصوره الفنانه (حرم النور) , وشكرا لاساسي لرفد البوست بصورتها (قبل) و (بعد) التغيير الواضح في شكلها وملامحها وطريقه مكياجها , وما أظن في أي (بكان) من (بكانات) البوست أنا كتبتا عباره صريحه (بانو حرم النور بتستعمل كريمات) أو (نفخت وشها) أو (بلعت حبوب) والا لكنت أجبت على سؤال فدوى الشريف الذي لا أعرف له أجابه أو كنت رديت على تساؤل (منال) أعلاه اللي ما عندي عنو أي فكره !
وعشان نكون ماشين في نفس الاتجاه , حقو نتفق على انو شكل الفنان , ملابسه , عطرة ..الخ هي من أكثر الامور التي تثير أهتمام الجمهور , (أحتمال أكتر من الماده اللي بيقدمها نفسها) , وفي ذلك تقام مسابقات (أجمل فستان لاوسكار عام كذا) ( أقبح بدله لغرامي عام كذا) (أحلى تسريحه لحفل توزيع جوائز كذا) ...الخ الخ , وما يتبع ذلك من تعليقات تترواح بين الساخره , والمضحكه واللاذعه أحيانا !
بل وأن ما يأكله الفنان وما يشربه وما يستحم به .. يعد في بعض الاحيان عاملا مؤثرا في اختيارات الجمهور .. ولذا تلجأ شركات الدعايه والاعلان الى استخدام الفنانين للتسويق للكثير من المنتجات بطرق مختلفه .. وهو أمر محلي .. أقليمي .. بل وعالمي ..
النقطه دي بتقودنا الى حته مهمه جدا (وهي جزء مهم لاحداثيات سيتم ذكرها في معرض البوست) , وهي أنو الانسان (خصوصاالفنان) الواعي , هو الذي يقود التغيير (أو يشارك في حدوثه على الاقل) , ويحافظ على القيم والمفاهيم السليمه للبيئه التي يعيش فيها , كما أنه يسعى لتطوير مجتمعه ودفعه نحو الأفضل ! المغزى من ذلك , أن الفنان يجب أن يدرك تماما أن فئات كثيره من المجتمع (ان لم تكن معظمها) تسعى الى تقليده بشتى الطرق , وعليه , يجب أستخدام أداة التأثير هذه فيما يحدث التغيير الأفضل السابق ذكره ..
الموضوع ما حرم النور بس (في العنوان أنا كتبتا مثالا) لكن حقيقه , وجدت الصوره مرفقه بأحد الاخبار عن حفلاتها بأحدى الدول الشقيقه فقفز في ذهني مظهر الكثير من الفتيات في العاصمه والاقاليم , والذي أصبح يميل بشكل كبير الى نفس هذا المظهر (كوبي بيست) ..
أما التدخل في حياتها الشخصيه فهو ما فعله الزميل أعلاه بوضع صوره ابنتها في هذا البوست ! (طلبت من بكري حذف المداخله وآمل بسرعه استجابته) ! أتذكر اني كنت أتالم جدا لمنظر ابنه الفنانه (برتني سبيرز) متبوعه بالكثير من الصحفيين وفلاشات الكاميرات , لا أعتقد ان الطفله يجب أن تكون محور اهتمام الصحافه (على الرغم من جنون والدتها) (أقصد برتني سبيرز ) ..
البوست لسه بدري عليهو شديد .. سأحاول التطرق للنقاط بموضوعيه ..وأعذروني على البطء في الطرح وطولوا بالكم .. أختكم معصوره في قرايه حبتين :)
Quote: قلت ما دام البوست كله شايت شمال، النجرب نشوت يمين، و لو من باب التمس لاخيك سبعين عذرا :)
أكان كدي خلا :)
ياسر طيفور أطلع برره :)
لكل من مر من هنانصر الدين وكمال وبركات شكرا لمروركم والحمدلله أنو دا بوستي (أنا) عشان كدا بحذفو لمن أكون دايره أحذفوا (أنا) .. وعبدالله الحبيب (معليش أعتذر أو لا دي حاجه بتخصني .. أفتح بوست لي روحك وأعتذر فيهو .. تحياتي) بقيه المتداخلين شكرا على المرور وساحاول الرد بشكل منفصل ما أمكنني ذلك شرط أن لا يتعارض ذلك مع سير البوست :) تحياتي :)
من حق اي إنسان أن يتناول الشخصيات العامة (ومنهم الفنانين طبعا) تناول الخارجي من حياتهم (فنهم - لبسهم - تصرفاتهم ـ الخ ...) أما العائلي أو الشخصي في البيوت فلا علاقة لنا به
بس هنا ما بتفق معاك لأنو كلامك دا تقولي لما يكون موضوع البوست (فنان)
Quote: وهي أنو الانسان (خصوصاالفنان) الواعي , هو الذي يقود التغيير (أو يشارك في حدوثه على الاقل) , ويحافظ على القيم والمفاهيم السليمه للبيئه التي يعيش فيها , كما أنه يسعى لتطوير مجتمعه ودفعه نحو الأفضل !
Quote: تواجه النجمة الأمريكية ليندسي لوهان مشاكل جديدة مع القانون، ولكن هذه المرة بسبب تسمير بشرتها (جعلها سمرة)، إذ يتهمها صالون تجميل في لاس فيغاس بالتهرب من دفع مبلغ 40 ألف دولار ثمن فاتورة التسمير، كما جاء في جريدة "الأنباء" الكويتية.
وكان الصالون رفع دعوى على لوهان (25 عاما) في نيفادا بسبب عدم دفع الفاتورة المترتبة عليها يسعى لنقل دعوته إلى كاليفورنيا بسبب عدم التزام الممثلة بحكم المحكمة الأولى والصادر منذ 9 أشهر.
يذكر أن الفاتورة تراكمت على لوهان بين عامي 2007 و2009.
يشار إلى أن الممثلة عانت من مشاكل مع الإدمان ومشاكل مع القانون لسنوات، وكان دخلها قد توقف بسبب ابتعادها عن التمثيل ولم تعرض عليها أدوار كثيرة في السنوات الماضية.
وكانت لوهان جنت في الأشهر الماضية مليون دولار بعد نشر صورها عارية في «بلاي بوي»، وتطل قريبا في دور «إليزبيث تايلر»، ما يشير إلى عودة النجمة إلى الأضواء بعيدا عن المشاكل مع القانون.
سلام صاحبة البوست وضيوفها وعيناك إن أبدت إليك معايباً فدعها وقل يا عين للناس أعين
بوست غير موفق خالص
Post: #34 Title: Re: اختزال الفتاة السودانيه في (البياض) و(الجضوم) (حرم النور مثالا)! Author: الامين موسى البشاري Date: 05-31-2012, 10:54 AM Parent: #32
البشاري حاضر عن حرم النور والجضيمات عموماً .. ..
__ من حق كل انسان الاحتفاء بجسده بالطريقة التي تعبر عنه يا ريت لو كان بوستكـ عن أثر هذه الكريمات بحكم أنك طبيبه بدون أخذ الصفوة حرم النور نموذجاً الظاهرة عامة ويجب محاربتها في اطارها دون شخصنتها
Post: #35 Title: Re: اختزال الفتاة السودانيه في (البياض) و(الجضوم) (حرم النور مثالا)! Author: محمد سنى دفع الله Date: 05-31-2012, 11:10 AM Parent: #34
تحديد الزول يكتب شنو وفي شنو برضو تعدي على الحرية وحرية التعبير بالتحديد مش؟ البوست بالطريقة دي جميل وفيهو نماذج لم يتعدي على خصوصيته احد لانها نماذج عامة وكثيرون بيروا عكس داليا انو دي مقايس جمال بتخصهم منها اللون الفاتح والجسم الممتلئ والطول والشعر الملون حتى في ناس بشوفو الملابس الكلها رقشو حاجة جميلة البوست ده بطريقتو دي بستحمل كل القلتوه ده ممكن نتكلم فيهو عن دور الفنان في نشر الجمال والموضة والفهم والاستنارة وعن اثر المبيضات وعن الادوية الكيماوية والاغاني الهابطة والحاقدين العايزين كل الناس تبقى بيضاء من فوق ومن تحت سودة عشان بعدين يسخروا منك ويقولوا ليك يا خاتف لونين مش؟ مودتي
Quote: أو كنت رديت على تساؤل (منال) أعلاه اللي ما عندي عنو أي فكره !
لماانتي ما عارفه جضوم حرم النور طبيعيات والا صناعيات وماعندك فكرة عن لونها شنو يا داليا جايباها نموذج لشنو؟ المفروض يكون المثال حقك مطابق لي موضوعك !!!!!
كلام الدكتورة داليا صاح وما عليهو أي غبار بل بالعكس إيراد النموذج ذاتو فيهو نوع من الذكاء لأن الأخت حرم النور وبما أنها طارحة نفسها فنانة فهي إذا صاحبة رسالة عامة وتاليا عليها التقيد بالقيم التى يمكن أن تكون قدوة لجمهور المتلقين لهذه الرسالة، وبما أن (الجضوم) و( البياض) صناعة تدخل فيها مواد مضرة ومهلكة فهذه قدوة سيئة من حرم النور لجمهورها، فضلا عن أن التمرد على الطبيعة وخلقة ربنا حاجة ما كريمة.
Quote: كلام الدكتورة داليا صاح وما عليهو أي غبار بل بالعكس إيراد النموذج ذاتو فيهو نوع من الذكاء لأن الأخت حرم النور وبما أنها طارحة نفسها فنانة فهي إذا صاحبة رسالة عامة وتاليا عليها التقيد بالقيم التى يمكن أن تكون قدوة لجمهور المتلقين لهذه الرسالة، وبما أن (الجضوم) و( البياض) صناعة تدخل فيها مواد مضرة ومهلكة فهذه قدوة سيئة من حرم النور لجمهورها، فضلا عن أن التمرد على الطبيعة وخلقة ربنا حاجة ما كريمة
يا طلحة البعرفو انا عن حرم النور انو لونها اصلا فاتح و حكاية الجضوم دي افتكر انها طبيعية جداً و ما اظن في زول عندو دليل على انو جضومها ولا لونها صناعي ...
انت عندك دليل على انها بتستخدم اى مواد صناعية ؟؟؟
تحياتى استاذى ,,
Post: #39 Title: Re: اختزال الفتاة السودانيه في (البياض) و(الجضوم) (حرم النور مثالا)! Author: أحمد محمد عمر Date: 05-31-2012, 02:07 PM Parent: #38
Quote: وحبوب من ماركه (أبو نجمه) و أبو أربعه وأربعين تغزو الاسواق بشده !
Quote: يتضمن (بوتيك) صغير يحوي معدات (التبييض) و (التسمين) بنوعيه (الموضعي ) و (العام)
Quote: أن (الجضوم) و( البياض) صناعة تدخل فيها مواد مضرة ومهلكة فهذه قدوة سيئة من حرم النور لجمهورها، فضلا عن أن التمرد على الطبيعة وخلقة ربنا حاجة ما كريمة.
يعني هسة خلاص موضوع إنه حرم سمنت بي حبوب دة اتحسم؟
Post: #40 Title: Re: اختزال الفتاة السودانيه في (البياض) و(الجضوم) (حرم النور مثالا)! Author: أحمد محمد عمر Date: 06-01-2012, 04:22 PM Parent: #39
محمد السني يا فنان سلامات
Quote: تحديد الزول يكتب شنو وفي شنو برضو تعدي على الحرية وحرية التعبير بالتحديد مش؟
طيب هل في حرية اتهام؟ يعني ممكن أنا أجي اتكلم عن الفنان محمد السني وأقول بيتعاطى حبوب منشطة أو أياً كان تحت بند حرية التعبير؟
Quote: البوست بالطريقة دي جميل
جميل لو كان بوست عام بيتكلم عن ما تتصوره الدكتورة مشكلة من وجهة نظرها الشخصية لكن انظر معي لسيناريو البوست المهين البوست اسمه اختزال الفتاة السودانيه في (البياض) و(الجضوم) (حرم النور مثالا)! وبدايته بي صورة حرم النور وتعليق الدكتورة أدناها أزمة حقيقة وبي صراحة أشنى قبل ما تلتمس للدكتورة العذر حول ما تراه أزمة حقيقية طوالي بتخش ليك في ملامح الأزمة وتشرح ليك فيها تتكلم بي وضوح تحت صورة حرم عن كريمات رخيصة الثمن وحبوب تسمين موضعي وكامل ومعدات تبييض وحاجات رخيصة الانتاج مع ملاحظة صورة حرم القاعدة فوق واللي أثبتت الدكتورة إنها المثال القايم عليه البوست .. وتحت الكلام عن حبوب التسمين الموضعي والكامل وأدوات التبييض رخيصة الثمن تكتب ليك (منو القال ليكي كدا سمحه يا حرم .. خســارة !)
هل بتقدر يا فنان تقول لي إنه الدكتورة بعد الكلام دة كلو ما متهمة حرم النور بي إنها بتستخدم الحاجات دي؟ لو كانت متهماها صراحة وعندها دفوعاتها الطبية كان بيبقى موضوع نقاش عادي في أخذ ورد لكن تجي بي بساطة تقول ليك ((وما أظن في أي (بكان) من (بكانات) البوست أنا كتبتا عباره صريحه (بانو حرم النور بتستعمل كريمات) أو (نفخت وشها) أو (بلعت حبوب) )) عليك الله في استغفال أكتر من كدة؟ بعد الصورة المالية البوست وحرم الفي العنوان والفي نهاية كل مداخلاتها تجي تقول ليك موضوع البوست ما عندو علاقة بي حرم !!!!!!!
Post: #41 Title: Re: اختزال الفتاة السودانيه في (البياض) و(الجضوم) (حرم النور مثالا)! Author: أحمد محمد عمر Date: 06-01-2012, 04:34 PM Parent: #40
طارق جبرين يا شايقي يا مسلط حرم الليمونة كانت طالبة أساس من أسرة على قدر حالها ساكنة قرية الضقالة وبتدرس في مدينة الحصاحيصا يعني شمس وجري ومواصلات كل يوم وأحيانا كداري حرم الحالية متخمة بالمال حفلاتها بالملايين العديدة ورحلاتها الخارجية مدورة طول العام وكمان ساكنة الخرطوم مع زوجها تحت مكيفات الاسبليت وما أظنها بتشوف الشمس ذاتو
Quote: بالغتي شديد يا داليا والبالغ أكتر منك بتاع (المشتري) دة
اخ احمد عمر كنت اقصد بالمشتري الرجل . الرجل يتحمل المسؤولية بالدرجة الاولى طالما النساء يفعلن ذلك ارضاءاً لذوقه . و كذلك وسائل الاعلام و الدولة عليها مسؤولية كبيرة و لتتأكد من ذلك شاهد قنواتنا الفضائية لتجد كمية البودرة و االكريمات المستخدمة و الادهى و الامر لا تجد مذيعة واحدة سمراء البشرة او قل داكنة السمرة و هذه هي سياسة الدولة .
اما اذا فهمت غير ما قصدته ارجو شاكراً توضيحه .
Post: #43 Title: Re: اختزال الفتاة السودانيه في (البياض) و(الجضوم) (حرم النور مثالا)! Author: سيف النصر محي الدين Date: 06-01-2012, 04:53 PM Parent: #42
داليا، راجعة لبعض النقاط في ردك و مداخلات بعض الاخوة و لكن ان شاء الله القي فرقة وكت قريب ----------------- الاخ الكريم احمد محمد
المواضيع الطرحت دي كلها قابلة للنقاش و بشوية صبر و نفس بارد الناس علي الاقل قد تتعلم من بعض..الكلام ده برضه ليك يا داليا لو سمحتي، طولي لينا بالك شوية يا ستي :)
Quote: هل بتقدر يا فنان تقول لي إنه الدكتورة بعد الكلام دة كلو ما متهمة حرم النور بي إنها بتستخدم الحاجات دي؟ لو كانت متهماها صراحة وعندها دفوعاتها الطبية كان بيبقى موضوع نقاش عادي في أخذ ورد لكن تجي بي بساطة تقول ليك ((وما أظن في أي (بكان) من (بكانات) البوست أنا كتبتا عباره صريحه (بانو حرم النور بتستعمل كريمات) أو (نفخت وشها) أو (بلعت حبوب) )) عليك الله في استغفال أكتر من كدة؟ بعد الصورة المالية البوست وحرم الفي العنوان والفي نهاية كل مداخلاتها تجي تقول ليك موضوع البوست ما عندو علاقة بي حرم !!!!!!! احمد محمد
الاخت داليا من المهتمات و كتبت من قبل في مواضيع تهم المراة و في نظري حتي و ان فهمنا من البوست انها تقصد حرم النور بكلام الكريمات و التسمين ده، الا ان قولها كتابة انه ده ما القصد بالنسبة لي يكفي و يفي غرضي في التداخل في النقطة دي. و ممكن نقاشي بعد كده احصره معاها في انه طريقة العرض قد تؤدي لفهم مغلوط، و لكن لا احبذ باي حال من الاحوال الدخول في قصة اني اشكك في نيتها ما دام الانسان قال صراحة ده القصد، حتي و ان بان ما صرح به عكس ما استطعنا استقرائه من الكتابه...علي العموم، من النقاط البتهمني و اثيرت من قبل المشاركين في البوست و قبلك:
ماهية حرية التعبير؟ و علاقتها بحرية الاخرين؟ ما هي حدود حرية الفرد؟ و في وجود الجماعة؟
Post: #47 Title: Re: اختزال الفتاة السودانيه في (البياض) و(الجضوم) (حرم النور مثالا)! Author: أحمد محمد عمر Date: 06-01-2012, 10:21 PM Parent: #44
رحاب خليفة سلامات وبعتذر ليك ولي الجميع عن نفسي الحار رغم إني شايف الموضوع بيستحق
Quote: في نظري حتي و ان فهمنا من البوست انها تقصد حرم النور بكلام الكريمات و التسمين ده، الا ان قولها كتابة انه ده ما القصد بالنسبة لي يكفي و يفي غرضي في التداخل في النقطة دي. و ممكن نقاشي بعد كده احصره معاها في انه طريقة العرض قد تؤدي لفهم مغلوط، و لكن لا احبذ باي حال من الاحوال الدخول في قصة اني اشكك في نيتها ما دام الانسان قال صراحة ده القصد، حتي و ان بان ما صرح به عكس ما استطعنا استقرائه من الكتابه
طيب يا رحاب ما دام الدكتورة قالت إنها ما اتهمت حرم بي تناول حبوب التسمين أو الكريمات أو غيره والبوست عن الحاجات دي تقدري تقولي لي علاقة حرم النور بالبوست شنو؟ أنا ما عاوز أبقى ممل وأعيد كلام اتقال هنا كم مرة .. بس اسم حرم في العنوان وصورتها في بداية البوست ومعاها تعلقات الدكتورة على (شكل) حرم أسفل كل مداخلة .. هل بعد دة كلو أنا ممكن أصدق إنه البوست ما عن حرم .. طيب لزوم الصورة والتعليقات شنو؟
أنا باختصار عاوز أعرف حرم موقعها من البوست شنو؟ ما دام أصلاً الدكتورة ما عارفة إنها بتتناول حبوب ولا لأ مالية بيها بوست الحبوب الرخيصة ليه؟
Post: #46 Title: Re: اختزال الفتاة السودانيه في (البياض) و(الجضوم) (حرم النور مثالا)! Author: أحمد محمد عمر Date: 06-01-2012, 10:04 PM Parent: #42
الصادق ضرار ولا يهمك يا حبوب شكل البوست والتناول الشخصي خلى نفسي حار شوية لك العتبى
Post: #48 Title: Re: اختزال الفتاة السودانيه في (البياض) و(الجضوم) (حرم النور مثالا)! Author: Abd Alla Elhabib Date: 06-02-2012, 00:12 AM Parent: #46
سلام د. داليا ( وعبدالله الحبيب (معليش أعتذر أو لا دي حاجه بتخصني .. أفتح بوست لي روحك وأعتذر فيهو .. تحياتي) ------------------------------------------- أنا لم أثبت صورة حرم النور وتحتها التعليق : (بصـــراحة أشنــى) ! ولم ألمّـح للون بشـرتها المُـفتّح ولا لجضومها المنفخّات !! غنيٌ عن القول أن تقويم ظواهـر المجتمع السالبة من خلال رصد سلوك أفراده نجوماً كانوا أو عاديين يقتضي التعامل بقليلٍ من الذوق وكثيرٍ من الحكمة ومراعاة شعور أولئك الأفراد ! وعافية المجتمـع من عافية أفراده البدنية والنفسية يا دكتورة داليا إذن لماذا يفتح عبد الله الحبيب بوستاً لروحه ويعتذرفيه ?! حقيقة : تعتذري أو لا دي حاجـة بتخصـك .
Post: #49 Title: Re: اختزال الفتاة السودانيه في (البياض) و(الجضوم) (حرم النور مثالا)! Author: أيمن مبارك أبو الحسن Date: 06-02-2012, 05:57 AM Parent: #48
سلامات د. داليا الموضوع أصبح ظاهرة فعلاً. من الصدف أنني كتبت أمس عن نفس الموضوع هنا
(1) تناقلت وسائل الأعلام على مدى فترات متعددة , أخبارا عن قرارات (حكوميه) تقضي بمنع (استيراد) مواد التجميل التي لا تحوي (قائمة بالمحتويات) أو تحتوي على (مواد مسرطنة) أو تلك التي لم تحصل على تصريح من ادراة السموم والصيدله .. وفي مقدمة تلك المواد (كريمات تبييض البشرة) ..وقد استبشرنا خيرا بهذا القرار الذي سيحد (الى مدى بعيد) من تداول هذه المواد ..
ما تعارض ما تلك القرارات .. ويجعلني دوما استغرق في تفكير عميق .. هي تلك (اليافطة الاعلانيه) هائله الحجم التي تتوسط (اشارة النفق) (بجانب البركس .. مواصلات بري سابقا) .. الاعلان لأحد كريمات التبييض (ديانا) ! وقد تناقلت الاوساط الطبيه والدوائيه عما أن كان الكريم يحتوي على مادة (الزئبق) (لم يثبت ذلك معمليا) بجانب احتوائه على مواد مبيضه للبشرة ومفتحه للون ..
التعارض الواضح مابين قرارات منع الاستيراد وبين توافر تلك المستحضرات بكثافه في مناطق التجمعات (مواصلات الاستاد .. سعد قشرة ..الخ) هو مايوقع المواطن (شريحه النساء في الأغلب) في حيرة شديده بين ما هو كائن وبين ما يجب أن يكون ..
هذه المستحضرات يتم تدولها في الاسواق جهارا نهارا وعلى (عينك يا تاجر) , تمتلىء بها (طبليات السوق العربي) ويفترشها الباعه على مرأى ومسمع من الجميع .. دون أن يتخوفوا حتى من (كشات مفاجئه) أو حتى مسائله قانونيه .. بل ان بعض الباعه يمتلكون (محلات /بوتيكات) خاصه بهم , لبيع تلك المستحضرات .. احدى التاجرات بسوق سعد قشره (بحري) تمتلك (كشكا) لـ (خلط الكريمات) وبيعها للجمهور .. المدهش انها تقوم بخلط تلك المستحضرات دون أي خلفيه علميه , بل وأنها تعطي ارشادات بالاستعمال (ما سائله في أي صيدلاني .. يا حليلك يا المشرف) .. المدهش (أكتر وأكتر) أن الكشك الذي تمتلكه مجاور (الهيته بالهيته) لكشك (بسط الامن الشامل) بالسوق !
في سنتي الدراسيه الاخيره بكليه الطب , ذهبنا في أحد (الراوندس) لنتدرب في عيادة (الجلديه) الملحقه بالمستشفى الجامعي وتصادف ذلك تواجد استشاريه طب الجلديه القادمة من دولة مصر الشقيقة .. لتكون ضمن طاقم الامتحانات النهائيه لاختصاصي طب الجلديه بالسودان .. الدكتوره (ايمان) سيدة لطيفه جدا و تولى اهتماما خاصا لـ طلاب السودان في جولاتها الخارجيه لانها (حسب قولها) تزور الخرطوم من وقت لاخر منذ أن كانت طالبه , ولديها محبة وعشق خاص للسودان والسودانيين ..
أول ما سئلنا عنه في اثناء (الراوند) لم يكن متوقعا ابدا ! فاجئتنا الدكتورة ايمان بقولها (كل واحدة - كان اغلب قروبنا من العنصر الانثوي - تئول لي هي بتستعمل كريم ايه ؟) .. نظرنا الى بعضنا البعض ووجوهنا تعلوها الحيرة ! فواصلت الدكتورة : انا بجي السودان من زماااان .. واكتر حاجتين كانوا بيعجبوني هما : اللون الأسمر للفتيات , وأجساد السودانيين الصحيه بسبب حرصهم على قطع أغلب المسافات على أقدامهم ..!! للأسف دلوقتي أغلب البنات بقوا يبيضوا بشرتهم , والعربيات كترت في الخرطوم!
علق هذا الحديث بذاكرتي لأمد بعيد , وما زلت حتى اليوم أقرأ قائمه المحتويات في أي (كريم / لوشن ..الخ) بناء على نصيحه الدكتورة لانها كانت دوما تقول : أتحدى حد يجيب لي قائمه المحتويات لأي كريم مبيض للبشره ! وكانت تردف : ما بتلاحظوش أنو الصوره الموجوده على علبه الكريم هي دايما لـ (بنت سمراء) !!
من ضمن ما تحدثت عنه ايضا أنها (تعتقد جازمة) أن تلك المستحضرات يتم أدخالها الى الخرطوم مهربه من دول الجوار , وانها تصنع في معامل مملوكه لاشخاص لا يحملون أي شهادات علميه أو خلفيه طبيه , وأن المعمل لا يعدو أن يكون غرفه في سطح بنايه أو ملحقا في حديقه خلفيه لأحد المنازل !
لم تنس الدكتورة أن تعتذر عن سؤالها لنا , واضافت : انتوا كدا حلوين .. اوعوا تعملوا اي حاجه .. انا بس كنت (بسخن) الراوند :)
Post: #54 Title: Re: اختزال الفتاة السودانيه في (البياض) و(الجضوم) (حرم النور مثالا)! Author: وليد عبد اللطيف Date: 06-03-2012, 07:01 AM Parent: #53
Quote: من حق كل انسان الاحتفاء بجسده بالطريقة التي تعبر عنه يا ريت لو كان بوستكـ عن أثر هذه الكريمات بحكم أنك طبيبه بدون أخذ الصفوة حرم النور نموذجاً الظاهرة عامة ويجب محاربتها في اطارها دون شخصنتها
غايتو يا البشاري عملتها ظاهره دفاع مستميت مان تومان طبعا في راي انا شي طبيعي نجم المجتمع يتطلع الى الافضل ومن حقه تعديل مايمكن تعديله حتى يظهر بصوره جميله يعني انا امس بشاهد في الفنانه شيرين المصريه كانت فين وبقت فين مشكلتنا بناتنا لايعرفون كيف يستخدمون المكياج ومتين غايتو مرات الواحد بطنو تطم جلبطه شديده حرم النور كانت بنت صغيره عندما غنت الليمونه كانت ملفته للانتباه بجمالها الطبيعي ومن غير رتوش وعندما اصبحت نجمة مجتمع برضو من حقها ان تظهر بمظهر جميل وهذا حق اي انثى واكيد تغير حرم كان الى الافضل وشي طبيعي تغيرها من دور البنت الصغيره الى متزوجه وتفعل مايفعله النساء حسب متابعتنا لي الفنان حرم النور هذه الصوره بالاخص تم تداولها في كثير من المنتديات وكان التعليق كله في شكلها ومظهرها وليه وليه .. في مره فنانا الكبير الراحل المقيم خضر بشير قالو ليهو فنلتك ######انه ليه قال ليهم انتو عايزين فنلتي ولا فني . .
تحيه خاصة للدكتوره رحاب وكل التحيات للاخت داليا وضيوفها
Post: #55 Title: Re: اختزال الفتاة السودانيه في (البياض) و(الجضوم) (حرم النور مثالا)! Author: nazar hussien Date: 06-03-2012, 07:10 AM Parent: #54
وبقت تمثلكن حرم النور يا دكتورة؟؟؟
مخيّر الله.....
بقت تشبه الممثلة المصرية العذّبت خادمتا
اظن اسمها ....شنو كده مكي
Post: #56 Title: Re: اختزال الفتاة السودانيه في (البياض) و(الجضوم) (حرم النور مثالا)! Author: محمد سنى دفع الله Date: 06-03-2012, 07:18 AM Parent: #55
اخوي احمد محمد عمر التحيات يا اخوزي كل الاسئلة دي لي انا دييييييييييشااااااك احبك
Post: #57 Title: Re: اختزال الفتاة السودانيه في (البياض) و(الجضوم) (حرم النور مثالا)! Author: nazar hussien Date: 06-03-2012, 08:32 AM Parent: #56
Quote: طيب ما دام الدكتورة قالت إنها ما اتهمت حرم\ بي تناول حبوب التسمين أو الكريمات أو غيره والبوست عن الحاجات دي تقدر تقولي لي علاقة حرم النور بالبوست شنو؟
العلاقة:
التحول من الليمونه الي المنقة...
وهل نظام التطعيم في الزراعة يصلح مع الانسان؟؟؟
Post: #58 Title: Re: اختزال الفتاة السودانيه في (البياض) و(الجضوم) (حرم النور مثالا)! Author: عثمان دغيس Date: 06-03-2012, 08:37 AM Parent: #56
الأخت داليا ... بوست جميل ومفيد للغاية والله ... ويا أخوانا الزول يجيب ليكم بوست غني بالصورة دي تقوموا تكرهوه ...وتنطوا ليهو في حلقو ...! صحيح إنو مسألة أخذ حرم النور مثالاً وصورتها و و و شوية أخلت بمسألة إخراج البوست ... لكن بصراحة أرى أن نقد هذه النقطة من قبل معظم المتداخلينجاء متحاملاً ويفتقد لحن النية وإفتراض حسن النية ... يا أخوانا إنتو طالبين الزولة دي تار ولا شنو ... إبداء الملاحظات ما فيهو حاجة بس كمان لازم الناس تركز على الموضوع الأساسي ومن بعد ذلك تنبه للمسائل الإخراجية دي .....
التحيه لكل المتداخلين .. وسأحاول الرد على المداخلات (المثمرة) ما أمكنني حرصا على تسلسل البوست .. علما بأن التطرق الى حياة الفنانين الشخصيه(وهو مالم أفعله هنا) سبق أن أثيرت في هذا المنبر بعدة أشكال (مخجله أحيانا) وللأسف لم تخرج (قوات الدفاع الشعبي عن خصوصيات الفنانين) بأي علامات استهجان أو أمتعاض !
بل أن بعض البوستات (ذات الثلاث والاربع صفحات) كان تتحدث بطولها وعرضها عن (تفاصيل جسديه لاحدى الفنانات) ولم يخرج حراس الفضيله لاشهار سيوفهم في وجه صاحب البوست أو المتداخلين فيه ..
Quote: لكن ياخوي الشافعة دي شافعة نصاح!
Quote: حواجب شيطان بس
Quote: ووب وووووووب وووووووب وووووووب،،،،،
Quote: كماااااان بقت سمينة وحاجة عدييييل كدا
Quote: ممتلئة حد الترهل الانف , وااااااااااااااااااااااااع شنى شديدة بس جاهركم اللون
Quote: خلفيه ثقافيه
المقتطفات اعلاه من بورديكم المنبري العام داا .. والبوستات الاصليه قاعدة في الارشيف .. ومتروكة لفطنة القارىء برضو
----------- شكرا لكل من خط حرفا من الجمال .. استاذ السني ونزار وعثمان دغيس ووليد وأيمن .. وكل من مر من هنا .. سأحاول الرد بالتفصيل لاحقا :) أفتكر بعد داا ممكن نرجع لي موضوعنا الأساسي :)
التحية للجميع سلام د. داليا حقيقي البوست نال اعجابي بصراحه ودخل في الصميم بإحلال صوره ايضاحية للتدليل على النموذج المفضل في السودان وما دام المغنية حرم النور صارت شخصية عامة بهذا تكون وسيلة ايضاح اقرب للناس ومادة للتناول بغض النظر عن معجبيها ورأيهم مقابل الرأي الناقد ... كنت انتوي تعليق بسيط وساخر بخصوص اعلانها في دعاية الارز (ياهو يا بيت ابوي) ولعل ما يخوضه الشخص العام من تجارب يدلل على شخصيته وثقافته ومدى رساليته مما لاشك فيه ان حرم النور لها معجبات ومعجبون وهي في النهاية لها من يتمثلونها بغض النظر عن ثقافتهم ووعيهم لكنها صارت شخصية عامة ... بالتالي هي عُرضة للنقد قادح ومادح ومما يؤخذ عليها انها كانت في بدايتها تمثل صوت قوي لاقى تشجيع كثيف ومناصرين ولعلها لو عملت استطلاع خاص بها ممن هم حولها سترى الحقيقة الناقدة وفي ظل مجتمعنا السماعي الشفاهي ستلاقي الكثير من العنت . عموما في موضوع البوست الرئيس وهو اختزال الفتاة في البياض والجضوم اعتقد ان ذلك ملفت ويحتاج الى توعية من قطاعات كبيرة ونشر ثقافة ليس للفتيات فقط انما للذين يستهويهم اللون الابيض والاحساس بالدونية تجاه السمرة او السواد من شبابنا الذين لا يزال تعليقهم ( عروس بيضاء وشعرهاطويل) ثقافة مجتمع كامل تحتاج الى هزة عظيمة للإلتفات الى موروثنا وعاداتنا وواقعنا الجغرافي والمناخي ولعل الموضوع له ابعاد اكبر في الجانب الاستقبالي للثقافات الفضائية وابعد في الاحساس بالألون كذلك ... هذه الثقافة الرائجة تحتاج الى وقفات وسعدت بأن خطاب للإمام الصادق المهدي تناول الظاهرة بشيئ من النقد في عجالة وكم كنت اتمنى لو اسهب في ذلك ومضى الى ابعد ووضع المبضع في الجرح للعلاج النهائي وهو الكي في صميم ثقافة الابيض ضميرك وليس الابيض شكلك . شكراً دكتورة وقد مسستي عصب الموضوعات التي تقود شبابنا وشاباتنا الى هاوية سحيقة لها ما بعدها .
. . . داليا الدكتوره كورتك فكت عديييل هسي الناس بتاعين الدفاع المستميت ديل ماقادره تخيهم في الحيطه وتصلبيهم على فطير طرحهم الي لايتعدى قناعاتهم هم الينا
داليا الدكتوره الناس دي في ناس تمشي تجيبي كلاموا بي ضبانتو وناس ترشيهم نقه (قال حريه شخصيه قال ) حرم النور هنا لاتمثل نفسها ولم تصنع نفسها لا دفعها الى المقدمه صوتها فقط لا بل اصوات المعجبين المدفوعه من حر مالهم رسائل موبايل لترشيحها في البرنامج اعلاه ...
عليه حرم النور هي صناعه جماهيريه والجمهور له الحق في ابداء الراي في منتوجه الفني الذي ارتضاه ذات يوم وسط عدد من المنتجات الفنية الاخرى لبرنامج نجوم الغد
ثم ان حرم النور قدمت نفسها فنانه ..نجمه .. صاحبة رساله او صاحبت صوت فقط لاغير او حتى صوت وصوره لاباس بهما يحققان لاصحاب الراسمال بعض الربحية من خلال الاعلانات على شاكلة ( ...يابيت ابوي )
ولا اعتقد ان داليا الدكتوره تناولت نموذج حرم النور من فراغ لكن حرم النور في نظرها تستحق ان تصوب لها سهام النقد لسبب واحد ان حرم النور قررت ان تكون ( قدوه ) نعم ( قدوه ) للكثيرات من اليافعات اللائي يرين في كل ماتتزيا به وتمارسه حرم النور هو اقرب الطرق للنجوميه لهذا يستوجب الامر تصويب سهام النقد
وحتى متى هذه الحساسية المفرطة تجاه تناول الحياة الشخصية او الفنية او السياسية للشخصيات العامة لان ذلك ضريبة من جعل من نفسه شخصية عامه
داليا الكتوره باين عليك نسيتي هذا المكان ياترشيهم رش الجن يا تبلعي اتحزمي وامرقي لايبدو انك طارحه فكره فطيره
هذه ليست أسماء أغاني (هابطه) , ولكنها أسماء (حركيه) لكريمات تبييض يتم تداولها بي الاوساط النسائيه بكثره , وكل أسم يشير الى مدى (فاعليه) الكريم في (تفتيح) لون البشره في (أقل) عدد من الأيام ! معظم هذه الكريمات تحتوي على مواد مسرطنه للجلد , كما أن معظمها يحتوي على ماده (الهيدروكينون والهيدروكورتيزون) بتركيز عال مما يتسبب بصوره مباشره بالكثير من الأمراض , والأعراض قصيره المدى (كـ احتراق الجلد , تغير اللون بصوره غير منتظمه , توسع الشعيرات الدمويه خاصه في المناطق الحساسه , ظهور الحبوب والبقع السوداء , كما وأن بعضها بؤدي الى ظهور بقع حريق على الجلد بصوره مؤلمه) أما الأعراض طويله المدى فهي تعتمد في ظهورها على كميه الماده التى تخترق الجلد وتتركز في أنحاء مختلفه من الجسم , مما يسبب في (الكوشينويد فيس)(الوجه القمري), ضعف المناعه في الجسم (على المدى الطويل) , تساقط الشعر , تقرحات المعده , عدم انتظام في الدوره الشهريه , قصور الكلى (على المدى الطويل) ,قصور الكبد , ارتفاع ضغط الدم , وبعض الاثار النفسيه والعصبيه الأخرى ..
تناول المستحضرات المفتحه للون البشرة , أصبح متداولا بشتى الطرق , ولا يتوقف فقط في نقطه (الكريم المسوح) بل أن الكثيرات يستعملن (حبوبا بالفم) لتفتيح اللون دون أي وصفه أو اشراف طبي .. وهو ماقد يؤدي الى كوارث محققه !
------------------- لزم الترقيم للحرص على تسلسل المداخلات .. شكرا لكل من مر من هنا .. وانشالله سأحاول الرد ما أمكنني ذلك دون أن أخل بتتابع المادة ..
سعيدة بردود الأفعال المتباينه حول مضمون البوست , وسعيدة اكثر بتجاوب الجميع هنا .. سأحاول الرد على بعض المداخلات هنا , على أن أكمل الرود لاحقا .. تحياتي ..
Ahmed Yousif Abu Harira : شكرا لمروركـ وانشالله البوست يكون فعلا بوست (تبادل فكري) و (برين ستورمينق) .. تحياتي
Quote: براهن وعدم وعيهن بسوق ليهن المفاهيم دى
ماما تيسير نورتي البوست , فعلا نقص الوعي بأضرار هذه المستحضرات يمكن ان يكون أحد العوامل الهامه في التسويق لها .. لكن موش أنتي معاي في أنو في (توجه عام) لـ (تنميط) صوره الجمال في (اللون الابيض , الشفاه المكتنزه ..الخ) وأنو الفتاه السودانيه (كغيرها من فتيات الدنيا) قد لا تقوى على مقاومه اغراءات السوق بهذا الخصوص .. كدي النتباحث في النقطه دي وجودك مهم جدا هنا لايقاد شموع التفاكر حول اختزال دور المرأه في (المظهر .. الملبس .. استخدامها كأداة أعلانيه .. الخ) .. تحياتي :)
Quote: دلوية مشتاقييييييييييييييييين
العجب رجب يا نوجا يا نوجا يا حرف الأس :)
Quote: المشكلة يشترك فيها ايضا الرجالة وذلك بأعجاب البعض بما يغير حال البنات من كضوم وما شابه ذلك
هام جدا وعاجل ..!! دور الرجل في ظاهره التبييض والتسمين ؟ ترقبوا المبحث قريبا على هذا البوست .. أوعى تغير المحطه :)
Quote: ( التحول الجنسي )...
الاستاذ أسامه , أعتقد أن البوست بعيد قليلا عن هذا التوبيك لكن لا مانع من التعريج عليه في أثناء النقاش .. شكرا لاثراء البوست .. تحياتي :)
Quote: يا ريت لو كان بوستكـ عن أثر هذه الكريمات بحكم أنك طبيبه بدون أخذ الصفوة حرم النور نموذجاً
البشاري , آخر زول كنتا أتوقع يجي يقول لي (أكتب شنو وما أكتب شنو) ! أعتقد أنو الفتره الفاتت , وجعتوا راسنا (أنت وبعض الزملاء هنا) و(صجيتونا) بي حريه التعبير وحريه الكتابه وحريه الـ ...الخ الخ وكل يوم نصحى الصباح نلقى البورد مليان (طوال البورد .. قصار البورد .. خشب البورد .. براميل البورد .. لمن جهجهتونا وجهجهتو البورد)! ولا تنه عن (خلق) وتكون قبل كدا (آت) بمثله .. كما وأحب أضيف أنو صوره البروفايل ظريفه :)
سعيدة بردود الأفعال المتباينه حول مضمون البوست , وسعيدة اكثر بتجاوب الجميع هنا .. سأحاول الرد على بعض المداخلات هنا , على أن أكمل الرود لاحقا .. تحياتي ..
Ahmed Yousif Abu Harira : شكرا لمروركـ وانشالله البوست يكون فعلا بوست (تبادل فكري) و (برين ستورمينق) .. تحياتي
Quote: براهن وعدم وعيهن بسوق ليهن المفاهيم دى
ماما تيسير نورتي البوست , فعلا نقص الوعي بأضرار هذه المستحضرات يمكن ان يكون أحد العوامل الهامه في التسويق لها .. لكن موش أنتي معاي في أنو في (توجه عام) لـ (تنميط) صوره الجمال في (اللون الابيض , الشفاه المكتنزه ..الخ) وأنو الفتاه السودانيه (كغيرها من فتيات الدنيا) قد لا تقوى على مقاومه اغراءات السوق بهذا الخصوص .. كدي النتباحث في النقطه دي وجودك مهم جدا هنا لايقاد شموع التفاكر حول اختزال دور المرأه في (المظهر .. الملبس .. استخدامها كأداة أعلانيه .. الخ) .. تحياتي :)
Quote: دلوية مشتاقييييييييييييييييين
العجب رجب يا نوجا يا نوجا يا حرف الأس :)
Quote: المشكلة يشترك فيها ايضا الرجالة وذلك بأعجاب البعض بما يغير حال البنات من كضوم وما شابه ذلك
هام جدا وعاجل ..!! دور الرجل في ظاهره التبييض والتسمين ؟ ترقبوا المبحث قريبا على هذا البوست .. أوعى تغير المحطه :)
Quote: ( التحول الجنسي )...
الاستاذ أسامه , أعتقد أن البوست بعيد قليلا عن هذا التوبيك لكن لا مانع من التعريج عليه في أثناء النقاش .. شكرا لاثراء البوست .. تحياتي :)
Quote: يا ريت لو كان بوستكـ عن أثر هذه الكريمات بحكم أنك طبيبه بدون أخذ الصفوة حرم النور نموذجاً
البشاري , آخر زول كنتا أتوقع يجي يقول لي (أكتب شنو وما أكتب شنو) ! أعتقد أنو الفتره الفاتت , وجعتوا راسنا (أنت وبعض الزملاء هنا) و(صجيتونا) بي حريه التعبير وحريه الكتابه وحريه الـ ...الخ الخ وكل يوم نصحى الصباح نلقى البورد مليان (طوال البورد .. قصار البورد .. خشب البورد .. براميل البورد .. لمن جهجهتونا وجهجهتو البورد)! ولا تنه عن (خلق) وتكون قبل كدا (آت) بمثله .. كما وأحب أضيف أنو صوره البروفايل ظريفه :)
Post: #71 Title: Re: اختزال الفتاة السودانيه في (البياض) و(الجضوم) (حرم النور مثالا)! Author: وليد عبد اللطيف Date: 06-04-2012, 11:11 AM Parent: #70
Quote: البوست ده فيه بلع بسلاسة
يعني معللللمة حتي في البلع يا صاحبتي
الحبيب حبيب نوره مشتاقين ياحلو ياخي بوست الدكتوره بذكرني واحد اسمو (عمر لمبه ) قالو بخلي البت تبقى لمبه في سوق سعد قشره ياخي دا انت عارفه بعد اسبوع عادي لو مجكس ليك واحده ومشت ليهو بعد يومين تقول دي اختها ما هي اها الموضوع بتاع البوست يعتبر كامل الدسم عشان الناس تناقش بكل شفافيه هذه الظاهره السالبه وكيفية دخول بعض المنتجات الى السوق ومن غير رقابه وحتى بيعها بطريقة غير سليمة في بكاسي ومعرضه الى الشمس وسبق اخونا عبد الوهاب احضر لنا عينات هنا من بعض كريمات التفتيح والكريمات الاخرى وكمان ياخي بناتنا ديل عايزين زول يعلمهم كيفية المكياج ياخي برنامج افراح افراح دا بورينا اشياء غريبه انا مرات بقول الحفله دي مسكونه ولا شنو .. اشكال عجيبه وجلبطه شديدة ..
Post: #72 Title: Re: اختزال الفتاة السودانيه في (البياض) و(الجضوم) (حرم النور مثالا)! Author: أحمد محمد عمر Date: 06-04-2012, 02:34 PM Parent: #71
يعني هسة خلاص البوست بقى طبي وما فيه حرم النور ؟
طيب ما كان من البداية ؟
Quote: (قوات الدفاع الشعبي عن خصوصيات الفنانين)
فتشي الناس الاتكلموا بالطريقة القلتيها في البوست الجبتي منو مقتبسات لو لقيتيني واحد منهم تعالي قولي لي انت متناقض لكن كوني اعترض على حاجة ما معناها لازم أكون اعترضت على حاجة مشابهة قبل كدة وما كل الناس بتقرأ كل البوستات
لكن أنا في منطق إنه في خطأ حصل قبل كدة معناها من حقك تكرريه !!
لسة بقول وبكرر رغم كل مداخلاتك الأخيرة إنك مفترض تجاوبي على سؤالنا حول علاقة حرم بي حبوب التسمين الموضعي والكامل والحاجات الخاتة صورتها فوق ليها وحاشرة إسمها عدة مرات بيناتها
تلخيص وجهة نظري كالآتي حق إبداء الرأي مكفول لي أي زول كرأي ما كإتهام .. رغم إنه حرم طارحة لينا صوتها وفنها لكن التعليق على تسريحتها لبسها وغيره من التفاصيل البتحتمل تباين الأذواق ما مدان عندي المدان عندي هو اتهام حرم بي إنها بتستعمل الكريمات الرخيصة وحبوب التسمين الموضعي والكامل بي وضع صورتها وإقحام التعليقات على شكلها أسفل كل مداخلة
Post: #73 Title: Re: اختزال الفتاة السودانيه في (البياض) و(الجضوم) (حرم النور مثالا)! Author: أحمد محمد عمر Date: 06-04-2012, 02:38 PM Parent: #72
Post: #75 Title: Re: اختزال الفتاة السودانيه في (البياض) و(الجضوم) (حرم النور مثالا)! Author: تبارك شيخ الدين جبريل Date: 06-04-2012, 03:35 PM Parent: #73
صحيًا ... العين بتتأثر سلبًا بالمناظر دي ... دايمًا لامن اشوف ليّ زولة ضاربة وش "ديانا" بفكر في انها عندها عقدة نقص جمالية معلنة وروح مجازفة ولا تحسب حساب للأخطار ... يعني كلمتين غزل في صميم عقدة النقص وممكن تستفرد بيها وقّافي ورا اقرب ضروة ... ابدًا ما بيخطر على ذهني انها ممكن تكون جميلة ... الجمال صياغة كلية ... طول وعرض وهيئة وملامح ولون وحركة ... أيّ واحدة في ديل تكون شترا من الباقيات بتأثر في جمال الزولة طوالي ... التناسق بين عناصر الجمال هو البيصنع الجمال ...
الديانا والميسيقور بيثبتوا عنصرين للتعامل مع عناصر ملامح وهيئات وأطوال وأوزان ولغات حركة بتختلف من بت لى بت ... وغالبًا النتيجة بتكون سالبة ...
اللون الفاتح والجضوم براهم ما محاسن ولا عيوب .... لاكين ما بيركبوا في أي فورمة ... ولامن يكونن ما راكبات؛ ياهو الإنطباع أعلاه ... ولامؤاخذة ...
... المهم ....
Post: #76 Title: Re: اختزال الفتاة السودانيه في (البياض) و(الجضوم) (حرم النور مثالا)! Author: صلاح عباس فقير Date: 06-04-2012, 04:15 PM Parent: #75
والله بوست كان حيكون متميّز ورائع جداً، لولا ما ورد فيه من تشخيص، أرجو من الدكتورة داليا أن تبادر إلى الاعتراف بوجود هذا الخلل، ومن ثم: أن تعيد افتتاح البوست الجميل!
Post: #77 Title: Re: اختزال الفتاة السودانيه في (البياض) و(الجضوم) (حرم النور مثالا)! Author: محمد الامين احمد Date: 06-05-2012, 11:32 AM Parent: #76
Post: #78 Title: Re: اختزال الفتاة السودانيه في (البياض) و(الجضوم) (حرم النور مثالا)! Author: وليد عبد اللطيف Date: 06-06-2012, 07:49 AM Parent: #77
Quote: والله بوست كان حيكون متميّز ورائع جداً، لولا ما ورد فيه من تشخيص، أرجو من الدكتورة داليا أن تبادر إلى الاعتراف بوجود هذا الخلل، ومن ثم: أن تعيد افتتاح البوست الجميل!