غـايـتـو نـفـر سـمـاحـتـا !!! يـعـمِـيـنِـي ...

يا قول حبوبتي : غايتو نفر سماحتا !!! ... يعميني ...
سوآقة التكسي في بلآد بنات الأصفر توريك العجب والصيام في رجب..
السماحة القاطعة شفناها، والشنا المخالفة برضو شفناها.
والله صحي ...

سلّمت علي: هآي .
رديت عليها : هآي .
قالت كدي إنفجخت في المقعد، وقالت لي : بس خمسة دقايق، نغشاها نشيلآ معانا، ونمشي.
نشيل منو ؟؟؟ الله أعلم.
نمشي وين ؟؟؟ برضو الله أعلم.
فوووووووو، دورنا.
قالت لي: بسسسس، قبلك. أديني دقيقتين، وقااالت كدي لكعت شعرها الأشقر، فسال منه الذهب وتدلى وما انسكب.
بعد دقيقتين جات مارقة وهي معاها. عيني وقعت عليها، ويا سابل الستر !!!
نان هي سماحة نصاح !!!. قبل اليوم الشفتها فيهو سماحتا دي في بنات جنسها يعميني أصِلآ ما لآقتني، يا قول حبوبتي.
بيني وبينكم. عيني تب غلبني أرفعا منها، وفضلت فاتح خشمي ومقهي فيها.
صاحبتا لآحظت إندهاشي قالت لي: جميلة مُش كدي ؟؟؟
قلت ليها: غايتو بس، نقول يا لطيّف، وعيني بآردة. لكن أنا قبل الليلة نفر جمالآ دا تب ما لآقاني.
إبتسمت إبتسامة رِضى، وظللت أنا مبحلق فيها...

الشقراوات بنات الأصفر قهرتهن بالقاهر والنبي الطاهر. صاحبات هوايل ومِحن، وكان قِليبك رهيف و ما بيقدر علي
الهبباي في عِز الصيف لا تهوّب ناحيتِن، وابعد بعيييد، وكذلك الغير شقراوات منهن، دروبهن دروب التِيّه، ومافي خبير بِشق التيّه علي دروب الخوابي.
غايتو هِن سمحات، لكن في سماحتِن يكمن الشر كلّ الشر. والله صحي.
قلت ليها: لكن حبسة الكيس دي ما بتكتُم نفسا !!!
قالت لي: مسألة الكيس دي مؤقتة. لحدي ما نصل البيت، وما بتأثِر بشئ.
بيني وبين نفسي قلت، سبحان الله !!! نحن كيس النايلون دا عندنا بنشيل فيهو الصعوط، والـnative drinks،
وأخيراً أصبح خير معين علي حمل الزيت من البقالآت.
سألتها: إشتريتيها من المحل دا ؟؟؟
قالت لي: لا... هي عايشة معايا من زمن طويل، وأنا مشيت إجازة لمُدة إسبوع، وجبتها المحل دا عشان يعملوا
ليها babysitting لحدي ما أرجع.
حِضانة !!!!!!.
عيوني كادن يخرجن من محاجرهن، وخشمي إنفتح زي خشم القرنتيّة من الدهشة. حِضانة !!! حِضانة لي سمكة !!!!!!
بعد فُقت من دهشتي. سألتها: وكنتِ بتدفعي كم في اليوم للحضانة دي ؟؟؟
قالت لي: كنت بدفع 11 دولآر في اليوم.
حِدآشر دولآر في اليوم !!!؟؟؟. رمقتها بنظرة حادة من زآوية حادة، وهي تجلبِق في كيس النايلون مزهوّة بجمالها،
وقلت: الله حي...
سبحان الله، السمكة في قمّة الجمال. الوانها زآهية، وتبلغ من الطُوّل حوالى ثلآث بُوصات. تجيد السباحة. لكن
كلّ هذا لا يعصمها من القلي في صاج حاااااااار إن قُدِرَ لها العيش في غير هذه البلآد.
والله صحي...

تُرى هل سنصل يوماً ما إلي ما وصلت إليه هذه المجتمعات ؟؟؟، ونحن
ما زلنا يقتل بعضنا البعض ؟؟؟
تُرى هل ستصير المدارس المؤهلة، والمستشفيات المؤهلة، ودُور الحِضانة المُهيئة
مُتاحة لأطفالنا يوماً ما ؟؟؟

الله انعل شيطانك يا ود المدير
طبعا بعد التحية والسلام
.
.
عملية محبطة زي دي تاني ما تعملا سمح ؟
ومن هذا المنطلق اطلب منك يوميات تكاسي في بلاد الفرنج واكيد سوف يكون بوست ممتع والله صحي
.
.
عاين جاي دي قصة حقيقة حصلت في حلتنا والله صحي
متوكل ود الجيمو بشرك في لفة الترعة قال للنو اخوه عاين للجبداة دي انا ماش اقبض القبور
كان غتست كورك لي
اها متوكل تررررررر من الترعة للنزل علي القبور وشايل عصاتو احاحي في القبور
قبورة واحدة ما قبضا تقوم يا النو تكورك ليهو
تكل تكل ( يقصد متوكل كان صغير وعجمي ) عطست ( يقصد غتست ( كان صغير وعجمي )
ات يا متوكل جدع عصاتو وفوووووووو جا جاري لقيها ما غتست
فرد عليهو بزهج شديد اعتس دينك

سلام يا ود المدير
والله بديت أقرا قلت الزول دا أولاده ما جو ولا شنو؟ تطلع سمكة؟
كيف أخبارك؟

Quote: متوكل ود الجيمو بشرك في لفة الترعة قال للنو اخوه عاين للجبداة دي انا ماش اقبض القبور كان غتست كورك لي

ود البوش،
سلآمات.

زولك كتال القبور دا كان لمّ في سمكة المفعوصة دي
كان نجما نجام قبورة.
والله صحي.


باقي المدآخلة بجيهو كان
الله هوّن.

مودتي...

قالت آيه، حضانة لسمكة !!!

هُم عندهم حكومة، فهل نحن عندنا حيكومة ؟؟؟

والله يا ود البوش ضحكتني جنس ضحك قلت لي قاليهو
يعطس دينك
هههههههههههههههههههههههه
ود المدير ازيك
يازول انا تجربتي مع تربية الحيوانات دي كانت جريو جربان كدي وطفش
لكن سمكة جنس سمكتك دي قطع شك كنت لهمتها الصاج

Quote: سلام يا ود المدير والله بديت أقرا قلت الزول دا أولاده ما جو ولا شنو؟ تطلع سمكة؟ كيف أخبارك؟

سلآمات يا العوض.

الأخبار تمام التمام، والوليدآت وصلوا طب.
نان هي سمكة نصاح يا العوض !!! كلها قدر
الأصبع و مسويلها توّم وشمار. هسع أكان لمّ
فيها أخونا محمد الطيّب دا كان وراها التوم
والشمار البلجد جد .


تحياتي...

Quote: ود المدير ازيك يازول انا تجربتي مع تربية الحيوانات دي كانت جريو جربان كدي وطفش لكن سمكة جنس سمكتك دي قطع شك كنت لهمتها الصاج

سلآمات يا محمد الطيب.

يا محمد السميكة دي كان أكلتها براها بتتتلصق لك في سنونك ساكت
دحين إلا تمشي ترعة ود البوش تلملم رفاقتا وتسويهن قاورما.


مودتي...

ممكن أهدي البوست السمح ده لعوضية سمك

ولصاحبي ورفيق الدرب كحيل الخلي مكيفات الخرطوم ورزاز أوزون وهمبريب نادي الزوارق وبقى ساكي السمك ورا السد.

ولكل أكياس النايلون الطايرة والعالقة في بحثها الأبدي عن سمك ما ملون تأويه ويأويها.

Quote: ممكن أهدي البوست السمح ده لعوضية سمك ولصاحبي ورفيق الدرب كحيل الخلي مكيفات الخرطوم ورزاز أوزون وهمبريب نادي الزوارق وبقى ساكي السمك ورا السد. ولكل أكياس النايلون الطايرة والعالقة في بحثها الأبدي عن سمك ما ملون تأويه ويأويها.

سلآمات أخي العوض.

إتفضل أهدي، والبوست حقك.
كل الذين ذكرت يستحقون الإهداء، عوضية سمك أصبحت ماركة مسجلة، وصديقك كحيل قطعاً
يحاول جاههداً أن ينثر ذخات المكيفات الباردة في زمن التصحُر والجفاف في بعض نفوس مُتعبة
أرهقها زمن الحفا. رزاز اوزون حُبيبات مياه من أحد أنهار الجنّة تنفحك بإكسير الحياة وأنت
تتسكع فوق أرصفة الوطن الحبيب. همبريب نادي الزوارق نسمة من الوطن كان يشتاق إليها الراحل
المُقيم وردي وهو في البعيد، وكذلك نحن نشتاقها.

أكياس النايلون الطايرة والعالقة في بحثها الأبدي عن سمك ما ملون تأويه ويأويها نأمل أن تأوي إلي
جبل يعصمها من التحليق اللولبي مع أعاصير الصحاري، والهبوط الإضطراري فوق الأسلآك
الشائكة، وأشجار الصحاري ذات الأشواك الحادة، فقد صبرت كثيراً علي حمل المُباح والمُحرّم في
أحشاءها.

سمكة تُحظى بكل هذا الإهتمام، وإنسان بلآدنا أصبح حُلمة أن يستمتع بشوربة قراقير خالية من
البهارات أو خبز رغيف ناشف من باقي موائد من نهبوا حصيلة خدمة يمينوا وعرق جبينوا !!!


مودتي...

Quote: عملية محبطة زي دي تاني ما تعملا سمح ؟ ومن هذا المنطلق اطلب منك يوميات تكاسي في بلاد الفرنج واكيد سوف يكون بوست ممتع والله صحي .

سمح يا ود البوش.

حكاية يوميات تكاسي في بلآد الفرنجة دي بتدورلها قعدة طويلة،
وكدي إستشير لنا فيها شيخنا هباني قبل نبدأ...

قُبلة سجيمان...