Post: #1
Title: لن يهزم الإنقاذ من عمل ضمنها ولو ليوم واحد فقط
Author: حمد عبد الغفار عمر
Date: 05-03-2012, 08:13 AM
Parent: #0
هكذا ببساطة
|
Post: #3
Title: Re: لن يهزم الإنقاذ من عمل ضمنها ولو ليوم واحد فقط
Author: حمد عبد الغفار عمر
Date: 05-03-2012, 08:54 AM
Parent: #2
أهلا يا الشايقي
| Quote: ببساطة برضو،، ما فهمنا حاجة؟؟ |
ولا أنا
انت ما عارف إنو المبادئ لا تتجزأ
دي ذكرتني حكاية د كامل حسن ابراهيم في كلية الزراعة
كان بشرح في درس بتاع Statistics
وبيني وبينك الدرس كان صعب جدا
شرح المرة الأولى قال فاهمين الناس كلهم سكتوا ما عدا واحد قال ليهو ما فاهم
مسح السبورة شرح تاني قال ليه فاهم قال ليهو ما فاهم
تاني مسح وشرح قال ليه فاهم قال ليهو لا
عاين ليه كدااا وقال ليه الدرس زي
بحبك زي عيوني لو سألوني ليه لأنك في عيوني وفي عيوني الألم فاهم حاجة ؟
قال ليهو لا
قال ليه أنا البشرح ليك فيهو دا ذاتي ما فاهمو
|
Post: #4
Title: Re: لن يهزم الإنقاذ من عمل ضمنها ولو ليوم واحد فقط
Author: بدر الدين اسحاق احمد
Date: 05-03-2012, 10:44 AM
Parent: #3
All of them كما قال السفير الروسى فى الخرطوم
علا بس عشان نحكى النكتة أفرز إنت قاصد وين وفى ياتو مؤسسة وفى ياتو مستوى
المجلس الوطنى
الحكومة الاتحادية
الحكومات الولائية
مؤتمر الخوار الوطنى
ندوات مشتركة
التوالى السياسي
الاقرار بمشروعية نيفاشا
الشراكة السياسية
حضور إفتتاح سد مروى
الاحتفال بإسترجاع هجيليج
.
.
.
.
.
.
.
.
.
حضور عقد قرأن الريس همسلف فى جامع الجيش
|
Post: #5
Title: Re: لن يهزم الإنقاذ من عمل ضمنها ولو ليوم واحد فقط
Author: مدثر صديق
Date: 05-03-2012, 11:06 AM
Parent: #3
قليل جدا الذين لم يعملوا مع الانقاذ
مني اركو مناوي مساعد الرئيس ...مبارك الفاضل كذلك ...عبدالرحمن الصادق ...ابن محمد عثمان الميرغني ...مالك عقار حاكم ولاية ...الترابي ...الدقير ...جبريل اخو خليل ابراهيم ...
|
Post: #6
Title: Re: لن يهزم الإنقاذ من عمل ضمنها ولو ليوم واحد فقط
Author: البحيراوي
Date: 05-03-2012, 11:17 AM
Parent: #5
الأخ حمد
تحياتي - غايتو عنوان بوستيك دا وااااااااااسع ويحتمل أي تفسير
بس أهلنا قالوا قديمك حمار أبوك بدون مؤاخذة
والجماعة الدخلوا ديل بقت عليهم حجوة : دخل القش وما قال تش :- طبعن دا الدخان .
يعني دخلوا بي هنا ومرقوا بهناك والحكومة مقيلة في شدرها .
بحيراوي
|
Post: #7
Title: Re: لن يهزم الإنقاذ من عمل ضمنها ولو ليوم واحد فقط
Author: بدر الدين اسحاق احمد
Date: 05-03-2012, 11:30 AM
Parent: #6
Quote: قليل جدا الذين لم يعملوا مع الانقاذ
مني اركو مناوي مساعد الرئيس ...مبارك الفاضل كذلك ...عبدالرحمن الصادق ...ابن محمد عثمان الميرغني ...مالك عقار حاكم ولاية ...الترابي ...الدقير ...جبريل اخو خليل ابراهيم ... |
لا لا لا لا
يذهب الاشخاص وتبقى الاحزاب والجهات ..
الحزب الشيوعى
حزب الامة (كل المتوالية الهندسية حقتو )
الحزب الاتحادى الديمقراطى ( بكل فروع الشجرة )
المؤتمر الشعبى
الحركة الشعبية
الحركات المسلحة ( من أ- ي )
جبهة الشرق
ناس عبد العزيز خالد
حتى التجمع الوطنى الديمقراطى ( ناس فاروق ابوعيســـى ) حال كونهم غير منتمين حزبياً .
..
..
..
..
وماشين فى القائمة نمـد ..
|
Post: #12
Title: Re: لن يهزم الإنقاذ من عمل ضمنها ولو ليوم واحد فقط
Author: حمد عبد الغفار عمر
Date: 05-03-2012, 01:30 PM
Parent: #6
أهلا بحيراوي
Quote: غايتو عنوان بوستيك دا وااااااااااسع ويحتمل أي تفسير
بس أهلنا قالوا قديمك حمار أبوك بدون مؤاخذة
والجماعة الدخلوا ديل بقت عليهم حجوة : دخل القش وما قال تش :- طبعن دا الدخان .
يعني دخلوا بي هنا ومرقوا بهناك والحكومة مقيلة في شدرها .
|
طبعا عنوان البوست واسع وأي زول يجي يفسر
بس يا بحيراوي
زول يقول الحاجة دي كويسة ويقدم دفوعاته وحيثياته ويدافع عنها ويطلع منها
وواحد تاني يقول ما كويسة وايضا يقدم دفوعاته وحيثياته ويحاربها وفجأة كدا يقوم يدخل فيها
ديل بالتأكيد خار عزمهم خليك من قصة القروش نمسك المسألة نزال بس والاستعداد لمواصلته
النصر دائما لمن يصمد حتى الرمق الأخير
|
Post: #8
Title: Re: لن يهزم الإنقاذ من عمل ضمنها ولو ليوم واحد فقط
Author: حمد عبد الغفار عمر
Date: 05-03-2012, 11:46 AM
Parent: #5
أهلا بدر الدين أحمد
Quote: All of them كما قال السفير الروسى فى الخرطوم
علا بس عشان نحكى النكتة أفرز إنت قاصد وين وفى ياتو مؤسسة وفى ياتو مستوى
المجلس الوطنى
الحكومة الاتحادية
الحكومات الولائية
مؤتمر الخوار الوطنى
ندوات مشتركة
التوالى السياسي
الاقرار بمشروعية نيفاشا
الشراكة السياسية |
زي ما قال ليك السفير الروسي : كل ما ذكر أعلاه
مش المثل بيقول : كل قرين بالمقارن يقتدي
|
Post: #9
Title: Re: لن يهزم الإنقاذ من عمل ضمنها ولو ليوم واحد فقط
Author: الزبير صالح الزبير
Date: 05-03-2012, 12:21 PM
Parent: #8
الاخ حمد تحياتي وتقديري
كنا نحضر نشرة الاخبار في احدي الفضائيات وكان الخبر قانون العزل السياسي المصري وبدأنا في مناقشة امكانية صدور مثل هكذا قانون بعد زوال الإنقاذ ومن هو الذي ينطبق علية القانون
وبدأنا في الحصر وبعد شويه انتبهنا الي اننا سكتنا فجاءة ونظرنا لبعض وضحكنا وقال احد الاخوان طيب الفضل منو
فقلت لهم بكل بساطة ان الثورات تفرز قادتها ورجال المرحلة ، فقبل ثورة مصر لم يكن هناك وائل غنيم او غيرة وقبل ثورة ابريل في السودان لم يكن هناك الجزولي دفع الله وغيرة ممن برزوا انذاك
وحتي حسن الترابي نفسة صنيعة ثورة اكتوبر وحواء السودان لن تعقر بعد ان ولدت من هادنوا او انخرطوا كاساسيين في الإنقاذ وقادرة علي انجاب قادة المرحله
بكل بساط لكل زمان دوله ورجال
لست مع الذي قال ان الاحزاب تبقي والأفراد الي زوال فكل الاحزاب السودانية القائمة التي انخرط أفرادها سواء باتفاق مع الحزب او بدون اتفاق ولم يفصل العضو المنخرط
تبقي مشاركته مشاركة أصيله
نحن نحتاج الي أحزاب جديدة علي أسس جديدة وهذا الذي سيحصل فالتاريخ لن يرجع للوراء وما حدث بعد اكتوبر وأبريل لن يعود لسبب بسيط وهو ان معدل الوعي قد إذداد والأحزاب الطائفية والعشائريه
وتلك المبنية علي الجهوية ستندثر بالتأكيد او علي الاقل لن تكن لها فاعلية
هذا موضوع مهم وحيوي وأرجو ان تتسع فيه المناقشة وان يدلوا الجميع بدلوهم فيه
|
Post: #10
Title: Re: لن يهزم الإنقاذ من عمل ضمنها ولو ليوم واحد فقط
Author: فايزودالقاضي
Date: 05-03-2012, 12:52 PM
Parent: #9
حمد ...سلام ..
| Quote: لن يهزم الإنقاذ من عمل ضمنها ولو ليوم واحد فقط |
بل لن يهزمها الا من عمل ضمنها ولو ليوم واحد فقط ..
ببساطة كده ..!!
|
Post: #11
Title: Re: لن يهزم الإنقاذ من عمل ضمنها ولو ليوم واحد فقط
Author: حمد عبد الغفار عمر
Date: 05-03-2012, 01:11 PM
Parent: #5
مدثر صديق
أهلا بيك
| Quote: قليل جدا الذين لم يعملوا مع الانقاذ |
بالعكس كتيرين جدا لم يعملوا مع الإنقاذ
ولكن بكل أسف كان صوت الذين عملوا هو الأعلى
|
Post: #13
Title: Re: لن يهزم الإنقاذ من عمل ضمنها ولو ليوم واحد فقط
Author: حمد عبد الغفار عمر
Date: 05-03-2012, 04:18 PM
Parent: #11
يا بدر
Quote: الحزب الشيوعى
حزب الامة (كل المتوالية الهندسية حقتو )
|
تعرف يا بدر انا عارف في القوائم حقتك دي الحزب الشيوعي دا ياهو غنيمتك البتفتش ليها وما صدقت لقيت العنوان الجامع دا
طيب حزب الأمة على مستوى الحزب قال أصلو ما إشترك رأيك شنو
والحزب الشيوعي على مستوى الحزب برضو ما أشترك رأيك شنو
الناس الإشتركوا ديل ما موفضين بالكامل من الحزب ولو قصدك اشتراك التجمع دا دي قصة ما جايبا تمنها بالنسبة ليك
وشفت الناس الكتيريييين ديلك الإشتركوا في تشييع نقد ما فيهم واحد اشترك معاكم
ياخي ما بتخجلوا تخافوا ليكم من ناس ماشين يدفنوا ليهم زول مات؟
بالغتو غايتو في نطيطة عينيكم ديك 
|
Post: #14
Title: Re: لن يهزم الإنقاذ من عمل ضمنها ولو ليوم واحد فقط
Author: حمد عبد الغفار عمر
Date: 05-03-2012, 07:44 PM
Parent: #13
أهلا فايز القاضي
.| Quote: بل لن يهزمها الا من عمل ضمنها ولو ليوم واحد فقط . |
انت كدا جيت بسكة غير اللاعب
ديل ممكن يقنطروها يخلوها في مرحلة الفنيشينق لكن ما بوصلوها نهايتها
هسة شوف شيخنا الترابي دا ،عارف جخانين الإنقاذ دي كلها ولي هسة واقف سلك ، قدر ما يباصر فيها غلبتو
لأنهم عارفين محل بعضوه وين
|
Post: #15
Title: Re: لن يهزم الإنقاذ من عمل ضمنها ولو ليوم واحد فقط
Author: عاطف عمر
Date: 05-03-2012, 08:09 PM
Parent: #1
سلامات حمد يا فنان
عارف لما أطاحت إنتفاضة مارس أبريل 1985 بالرئيس نميري تحدث الناس بحماس شديد عن محاكمة ( سدنة مايو )
إرتفع صوت اليساريين بمحاكمة الأخوان المسلمين باعتبارهم ( آخر ) من ساند مايو في أعتى فتراتها
ورد الأخوان بعنف بأن تتم محاكمة الشيوعين باعتبارهم ( أول ) من ساند مايو بل ومن أتى بها
وفي ( المدى السياسي ) بين الأخوان المسلمين والشيوعيين تم إتهام أطياف كثيرة شاركت ( ولو ليوم واحد فقط ) في مايو منهم الأنصاري ومنهم ( أحزاب ) الأمة ومنهم الإتحاديين والبعثيين والقوميين العرب والتكنوقراط
الشغلانية يا عمك جاطت حوجة شديدة خلاس
في النهاية ( لملموا الموضوع ) واكتفوا بمحاكمة ( الأحياء ) من الضباط الذين نفذوا ( الإنقلاب )
قلت لى الحاصل هسه شنو ؟؟؟؟
|
Post: #16
Title: Re: لن يهزم الإنقاذ من عمل ضمنها ولو ليوم واحد فقط
Author: حمد عبد الغفار عمر
Date: 05-05-2012, 11:13 AM
الأخ الزبير
مرحب
Quote: فقلت لهم بكل بساطة ان الثورات تفرز قادتها ورجال المرحلة ، فقبل ثورة مصر لم يكن هناك وائل غنيم او غيرة وقبل ثورة ابريل في السودان لم يكن هناك الجزولي دفع الله وغيرة ممن برزوا انذاك
وحتي حسن الترابي نفسة صنيعة ثورة اكتوبر وحواء السودان لن تعقر بعد ان ولدت من هادنوا او انخرطوا كاساسيين في الإنقاذ وقادرة علي انجاب قادة المرحله
بكل بساط لكل زمان دوله ورجال |
أنا غايتو حكاية لكل ثورة رجالها دي راجعت فيها نفسي شديد ووصلت إلى أنها قد تبدو حنك بيش أحيانا
فالسياسة تراكم خبرات وممارسات تحتاج للخبرة والدراية ومعرفة بتاريخ التحولات السياسية والإجتماعية وظروف حدوثها والربط بينها في تسلسل يقود أحيانا لمعرفة مواضع الخلل
وطبعا ما كل سياسينا القدامى اشتركوا بصورة فعلية في الإنقاذ هنالك أجيال متقدمة في هذه التنظيمات لها رؤية ومواقف ثابتة لم تتزحزح عنها
والمشاركة الأنا بقصدها هي لمن ساهم في تثبيت أركان النظام ودافع عنه وتبنى رؤاه لحل قضايا السودان في أي مرحلة من مراحل هذا النظام
|
Post: #17
Title: Re: لن يهزم الإنقاذ من عمل ضمنها ولو ليوم واحد فقط
Author: حمد عبد الغفار عمر
Date: 05-06-2012, 12:59 PM
Parent: #16
عاطف يا هندسة
أخبارك والأسرة عساكم بخير
Quote: ارتفع صوت اليساريين بمحاكمة الأخوان المسلمين باعتبارهم ( آخر ) من ساند مايو في أعتى فتراتها
ورد الأخوان بعنف بأن تتم محاكمة الشيوعين باعتبارهم ( أول ) من ساند مايو بل ومن أتى بها
وفي ( المدى السياسي ) بين الأخوان المسلمين والشيوعيين تم إتهام أطياف كثيرة شاركت ( ولو ليوم واحد فقط ) في مايو منهم الأنصاري ومنهم ( أحزاب ) الأمة ومنهم الإتحاديين والبعثيين والقوميين العرب والتكنوقراط
الشغلانية يا عمك جاطت حوجة شديدة خلاس
في النهاية ( لملموا الموضوع ) واكتفوا بمحاكمة ( الأحياء ) من الضباط الذين نفذوا ( الإنقلاب )
قلت لى الحاصل هسه شنو ؟؟؟؟ |
يا عاطف
يا ها عادة الأنظمة الشمولية لما تلقى نفسها مورطة بتحاول تشربك الناس كلهم عشان تلقى ليها بعدين طريقة مهرب
مايو بتختلف صحيح مايو شارك فيها الجميع لكنها كانت لحم رأس يعني أي زول بيشارك بلقى فرصتو بدون مضايقات وعصف
لكن الإنقاذ حكومة تنظيم يتفق جميع أعضاؤه ان زوال هذا النظام سيعرضهم لخطر ماحق لذلك رغم اختلافهم فهم متفقون على بقاء النظام لذلك البدخل وسطهم ما بلقى غير الفتات وفي النهاية المضايقات بعد أن يكشف نفسه تماما لهم ويصبح ممنون ليهم بذلة معروف إشراكه في الحكم
أنظر اليهم كيف يتساقطون ؟
وهسة قدامك في خبر القبض على أركو مناوي لوز صح الخبر مناوي حيكون في ورطة كبيرة وحيشوف الويل لأنو ماسكين عليهو معروف إنو بقوهوا مستشار الرئيس وتعال شوف التشفي حيكون كيف
|
Post: #18
Title: Re: لن يهزم الإنقاذ من عمل ضمنها ولو ليوم واحد فقط
Author: aydaroos
Date: 05-06-2012, 01:16 PM
Parent: #17
سلام لحمد عبدالغفار و المشاركين
| Quote: والمشاركة الأنا بقصدها هي لمن ساهم في تثبيت أركان النظام ودافع عنه وتبنى رؤاه لحل قضايا السودان في أي مرحلة من مراحل هذا النظام |
يا ديجانقو ما تفرز، رشهم كلهم :)
حتي الإشتركو بي رؤي مختلفة لتغيير الإنقاذ بعد نيفاشا كانت هناك أصوات عالية
ضد هذه المشاركة،أبرزها د. احمد عثمان(يا ريت يرجع للكتابة في سودانيز)
أها بعد شاركو و ثبت إنو موقفم خطأ،ليه ما جو و حللوا موقفم و ورو الناس
الغلط شنو و كان وين؟!
زي ما قال مظفر النواب ... لا إستثني أحدا" ،إلا من و ضح موقفه بالنقد الذاتي
و الوقوف في الخندق الصحيح، و دا ذاتو بي بعاين ليه كتر :)
|
Post: #19
Title: Re: لن يهزم الإنقاذ من عمل ضمنها ولو ليوم واحد فقط
Author: aydaroos
Date: 05-07-2012, 11:51 AM
Parent: #18
زي ما قال مظفر النواب ... لا إستثني أحدا" ،إلا من و ضح موقفه بالنقد الذاتي
و الوقوف في الخندق الصحيح، و دا ذاتو بي بعاين ليه كتر :)
|
Post: #20
Title: Re: لن يهزم الإنقاذ من عمل ضمنها ولو ليوم واحد فقط
Author: حمد عبد الغفار عمر
Date: 05-07-2012, 07:15 PM
Parent: #19
هلا يا عيدروس
أخوك اليومين دي ملخبط شوية
Quote: زي ما قال مظفر النواب ... لا إستثني أحدا" ،إلا من و ضح موقفه بالنقد الذاتي
و الوقوف في الخندق الصحيح، و دا ذاتو بي بعاين ليه كتر :) |
ياخ مظفر النواب دا حاد شوية لأنو من يعتذر (ينفض إيدوا) فلا إثم عليه
بس بيكون فقد الأهلية والقوة الدافعة لهزيمة الإنقاذ
مشكر يا حبيب
|
|