هل هذه الكلمة تستخدم فقط في (غرب السودان)؟

النطار

أذكر أنني عندما كنت صغيرآ كان يقال لي:

يا ولد أدخل جوه من النطار
يا ولد ما تلعب في النطار

وكنت عندما أذهب لبعض أقاربي في أمدرمان أذكر الكلمة ولكن أجدهم لا يعرفونها

تذكرت الكلمة مرة أخرى قبل فترة قصيرة وسألت عنها بعض السودانيين ولكنني لم أجد من يعرفها

فهل هي كلمة خرطومية شائعة, أم غربية صرفةخصوصآ في مناطق (الأبيض وبارا)؟

طبعا النطار أو ساعة النطار هي الفترة الفي عز الحر أو عز الظهرية والجو مولع نار

معقولة ولا زول ما سمع بيها؟؟؟


الله!!!!!!!!!!!!!!!!!!!!

الأخ أشرف مصطفى

تحياتي - يبدو أن غرب السودان ذاتو خشوم بيوت - يعلم الله الكلمة دي أول مرة أسمع بيها !!!
نطار ساعة قايلة في نص النهار بالذات في الصيف وقت الحر تحمى بالحيل داك نسمى هذه الفترة ( قايلة) ودي فيها أبو جندي بعيط من الحر ، يعني الكل بكون مقيل في الضل إلا العيال الصغار يمكن أن يلعبوا في كافة الأوقات !!!

بحيراوي

البحيرواي حبابك ألف

Quote: الأخ أشرف مصطفى تحياتي - يبدو أن غرب السودان ذاتو خشوم بيوت - يعلم الله الكلمة دي أول مرة أسمع بيها !!! نطار ساعة قايلة في نص النهار بالذات في الصيف وقت الحر تحمى بالحيل داك نسمى هذه الفترة ( قايلة) ودي فيها أبو جندي بعيط من الحر ، يعني الكل بكون مقيل في الضل إلا العيال الصغار يمكن أن يلعبوا في كافة الأوقات !!!

أنا حسي قلت الناس حا تضحك انو ما عارف معلومات كافية عن الكلمة ولا امكن يجي واحد ناطي فيني جوز
لكن بالجد طمنتني وانا لأني ما سمعتها عند زول منذ 20 سنة لكن كل ما اذكرها لزول يقول ما عارفها
حسي مافي زول في القراء ديل كلهم يدينا النجيضة؟؟؟ وين ناس الابيض وبارا؟

هسي كان نكرنا تقولو حناكيش,,, انا يا اشرف اهلى بديرية دهمشية من شمال كردفان تحديدا الابيض- حي القبة وفلسطين-و شوية في النهود وشوية في بارا
لكن -للاسف- اتولدنا واتربينا في الخرطوم ,,لكن ظلت الصلات بالوالد والوالدة-خريجة الابيض الثانوية- ربنا يرحما ويغفر ليها متصلة بالاهل هناك ,,,لكن والله اول مرة في حياتى اسمع بالكلمة دى رغم انو قبل اسبوع بس حبوبة كانت معانا وما سمعتها يوم طوال حياتى بتقول الكلمة دى,,,,منكم نستفيد

د:سلافا العاقب

Quote: أنا حسي قلت الناس حا تضحك انو ما عارف معلومات كافية عن الكلمة ولا امكن يجي واحد ناطي فيني جوز لكن بالجد طمنتني وانا لأني ما سمعتها عند زول منذ 20 سنة لكن كل ما اذكرها لزول يقول ما عارفها حسي مافي زول في القراء ديل كلهم يدينا النجيضة؟؟؟ وين ناس الابيض وبارا؟

كلام الاخ البحيراوى



أنت يا أشرف أصلك ما سمعت صديق عباس حراية القايلة


أى حاجة غريبة تنسب الى الغرابة

دا من ولاد البسكويت والكلمة دي بتشبه لهجة الشوام وناطرني عندالشوام انتظرني لكن في كردفان لاوجودلهذه المفرده والبحيراوي نازل تقيل حرايه القايله وابو الجندي ديل وليدات بحر والغرب دا عنده اللبيض وبارا ما بعرفوا الشغلات دي

الأفاضل اشرف ود. سلافة وآدم عمر وسعدان

تحياتي - يا جماعة الكلمة دي غايتو إلا يجينا أخونا صهيب حامد ويفتئ فيها !!

لكن يا أشرف ربما يكون هناك حرف فات عليك ودي ما نطة جوز زي ما خفت لكن الكلمة دي دت ما مرت علينا !!

يا سعدان تحية وسلام يا زول مالو عيال البحر بتعلموا شوية شوية . يا زول حرم في ناس منهم تلخبطوا معانا نسب وبقينا ليهم عين شمس وبقوا لينا عين شمس كمان !!
واحد صاحبنا من الهلالية كان يسكن معانا بالخوي وطبعن الخوي كانت أكبر منطقة هاجر ليها ناس الهلالية في القرن الماضي ( حيث ميلاد دكتور محمد أحمد عمر . ود العالم ) كان بالخوي ودكتور عبد الله ود الهجوا . جينا في حفلة ودقينا كنداية بعد ما العريس دخل بيت البرزة !! لمينا بنغني ( وجبتونا وبتابونا عشان شنو -وجبتونا وبتابونا عشان شنو ) قام بغني معان جبتونا وبتابونا لأي - بعد ما شرحنا ليه المفردة .

بحيراوي

Quote: نطار ساعة قايلة في نص النهار بالذات في الصيف وقت الحر تحمى بالحيل داك نسمى هذه الفترة ( قايلة) ودي فيها أبو جندي بعيط من الحر ، يعني الكل بكون مقيل في الضل إلا العيال الصغار يمكن أن يلعبوا في كافة الأوقات !!!

أولاً .... لاني من كردفان ولا دارفور ... وطبعا كلمة (نطار) ما سمعت بيها.
لكن حسب معلوماتي أهل كردفان، وبعض من أهل دارفور يستخدموا كلمة (الحر) بمعنى (الشمس).

Quote: أنت يا أشرف أصلك ما سمعت صديق عباس حراية القايلة

أظن القائل هو أبراهيم موسى أبا عليه رحمة الله، في أغنية (عيني عليك باردة .... يا السمحة يا الواردة). ففيها يقول: وقلبي كان شفتيه .. حرّاية القايلة.

سلام يا أهلنا.

سلامات يا شباب وشكرآ ليكم كتير على اثراء الموضوع وبجيكم واحد واحد إنشاء الله

لكن لمن قريت ردودكم والله لمن شكيت في الكلمة وامبارح قلبت النت ده قلب ما لقيت الكلمة

وقلت اجي انزل ايميلي هنا لكل القراء في السودان والخارج عشان يساعدوني

لكن حسي فتشت النت تاني ولقيتها هنا:

http://www.rufaaonline.com/vb/showthread.php?t=24102

والله يا جماعة أنا الغرب دا حدي فيه تندلتي لكن كلمة النطار دي كنت بسمعا بشكل يومي واولادي المولودين في أمريكا بعرفوها وهي كلمة شايعة في الوسط أو على الاقل وسطنا

أنا من الأبيض يا أشرف لكن كلمتكـ دي يوم ما سمعت بيها والحر دي ياها الحر بس ما بنعرف ليها إسم تاني

الأخ أشرف مصطفى

تحياتي - بعد سؤال لشخص عاش في كل مناطق السودان . أداني الأكيدة أن كلمة النطار تُستخدم في وسط السودان وتحديدأً الجزيرة وشمال الخرطوم . وقال يقولوا ليك ماش وين في النطار دي ( الحرة الشديدة )

بحيراوي

البجيراوي

Quote: الأخ أشرف مصطفى تحياتي - بعد سؤال لشخص عاش في كل مناطق السودان . أداني الأكيدة أن كلمة النطار تُستخدم في وسط السودان وتحديدأً الجزيرة وشمال الخرطوم . وقال يقولوا ليك ماش وين في النطار دي ( الحرة الشديدة )

شكرآ يا حبيب على الجهد المقدر لكن كما ذكرت سايقآ فإن هذه الكلمة كانت تقال لي من قبل والدتي
وخالاتي, كما اذكر ان اهلنا من بارا دائما يأتون الى الخرطوم ولذلك لم اسمع اي شخص اخر يستخدم الكلمة
او ربما هي طول المدة التي فارقت فيها السودان ولكني لم انس الكلمة واتوق الى استخدامها عند الحوجة.

Faris Mohamed

Quote: أنا من الأبيض يا أشرف لكن كلمتكـ دي يوم ما سمعت بيها والحر دي ياها الحر بس ما بنعرف ليها إسم تاني

هلا بفارس ويا هلا بناس الابيض الكرام
الكلمة لقيتها في منتديات رفاعة لكن هم >كروا انهم جمعوا كلمات عامية من جميع انحاء السودان

Afraa Sanad

Quote: والله يا جماعة أنا الغرب دا حدي فيه تندلتي لكن كلمة النطار دي كنت بسمعا بشكل يومي واولادي المولودين في أمريكا بعرفوها وهي كلمة شايعة في الوسط أو على الاقل وسطنا

اخيرآ لقيت زول بعرف الكلمة وياله من خبر مفرح جدا بالنسبة لي
شكرا عفراء

محمد أبوالعزائم أبوالريش

Quote: أولاً .... لاني من كردفان ولا دارفور ... وطبعا كلمة (نطار) ما سمعت بيها. لكن حسب معلوماتي أهل كردفان، وبعض من أهل دارفور يستخدموا كلمة (الحر) بمعنى (الشمس). سلام يا أهلنا.

شكرآ يا ابو العزائم والكلمة اصلها من بارا وربما الأبيض كلها او اجزاء منها
والحمد لله اتوجدت
ويا سلام على اهلنا الحنان في المنبر ده

Quote: تحياتي - يا جماعة الكلمة دي غايتو إلا يجينا أخونا صهيب حامد ويفتئ فيها !! لكن يا أشرف ربما يكون هناك حرف فات عليك ودي ما نطة جوز زي ما خفت لكن الكلمة دي دت ما مرت علينا !!

الحمد لله يا بحيراوي اتلقت الكلمة واستخدامها جميل وسهل ويا ريت الناس تتذكرها

Saadan Ibrahim

Quote: دا من ولاد البسكويت والكلمة دي بتشبه لهجة الشوام وناطرني عندالشوام انتظرني لكن في كردفان لاوجودلهذه المفرده والبحيراوي نازل تقيل حرايه القايله وابو الجندي ديل وليدات بحر والغرب دا عنده اللبيض وبارا ما بعرفوا الشغلات دي

سعد سلامات
هههههه ما في بسكويت ولا حاجة وكلمة الشوام دي واضحة لكن الفيك اتعرفت ههههه

Adam Omer

Quote: أنت يا أشرف أصلك ما سمعت صديق عباس حراية القايلة أى حاجة غريبة تنسب الى الغرابة

هلا بآدم
ما سمعتها والله لكن فعلا هي منسوبة للغرب
بالتحديد منطقة بارا ويمكن الابيض او اجزاء منها

سلام يا أشرف و المتداخلين الأفاضل ..

أنا أتولدت و تبيت و ربيت و شبيت و كبرت في الأبيض ..

و أهل أمي في الأبيض أسياد بلد و جدودنا أولاد البرد ..

و بعرف الحراية و البُقلة و القايلة ..

إلا النطار دي أول يوم أسمع بيها في بوستيك دة ..


خليك من النطار دي أنتا بتعرف ( أبو ليلى ) ..

النشوف عرفتك دي قدريشنا ؟؟

سلام مولانا عصام دهب

Quote: سلام يا أشرف و المتداخلين الأفاضل .. أنا أتولدت و تبيت و ربيت و شبيت و كبرت في الأبيض .. و أهل أمي في الأبيض أسياد بلد و جدودنا أولاد البرد .. و بعرف الحراية و البُقلة و القايلة .. إلا النطار دي أول يوم أسمع بيها في بوستيك دة .. خليك من النطار دي أنتا بتعرف ( أبو ليلى ) .. النشوف عرفتك دي قدريشنا ؟؟

هههههه ما قدر ده كمان
أبو ليلى ده الا تكون انتا هههههههه
انا زمان يا مولانا كنت شاطر شديد في العربي وبقفله عادي
وكنت مهتم جدا بكلام الحبوبات والتعرف على جميع الاهل والانساب
ودائما اقعد مع حبوباتي يوروني الاهل والناس والفروع والاحاجي وكده
وعندي حبوبتي ام امي الله يرحمها بت اسحق شداد الناس كانول بقولوا لي
حبوبتك دي السودان كله اهلها...ولمن كبرت وعرفت الشربكات في الاسر والنسب
عرفت فعلا السودان كله اهلها. ما كان كلام ساي
كلمتك دي ما سمعت بيها الا زي ما قلت ليك تكون بتتكلم عن نفسك
لكن انا لي عشرين سنة في الغرب ما كتر خيري بعرف عربي وبكتب مقالات كمان هههه
انا لو اتذكرت ليكم العربي المخزنوا في راسي ده انتوا حا تتخلعوا
عربي نضيف وبالصور والتوريات والاشارات والتلميحات لكن مافي داعي
ما تنسونا الانجليزي حقنا ده ياخ هههههههههههههه

*

Solafa Alagib

Quote: هسي كان نكرنا تقولو حناكيش,,, انا يا اشرف اهلى بديرية دهمشية من شمال كردفان تحديدا الابيض- حي القبة وفلسطين- و شوية في النهود وشوية في بارا لكن -للاسف- اتولدنا واتربينا في الخرطوم ,,لكن ظلت الصلات بالوالد والوالدة- خريجة الابيض الثانوية- ربنا يرحما ويغفر ليها متصلة بالاهل هناك ,,,لكن والله اول مرة في حياتى اسمع بالكلمة دى رغم انو قبل اسبوع بس حبوبة كانت معانا وما سمعتها يوم طوال حياتى بتقول الكلمة دى,,,,منكم نستفيد

سلام يا دكتورة
معناها طلعنا اهل برغم انني لم ازر تلك المناطق من قبل ولكن اهلنا الكرام اهل بارا والابيض دوما معنا في المنزل
الكلمة دي رغم سماعها لآخر مرة اكثر من عشرين سنة الا انني لم انسها وبل بالعكس كانت تشغل بالي
لانني كل ما اسأل زول عنها يطلع ما سمع بيها فقلت في الاخر افتح بوست امكن القى النجيضة في المنبر ده