يراودني إحساس عجيب بشأن المريخ والهلال

برغم نتائجهما المخيبة تماما بالنسبة للهلال المتعادل بأرضه ووسط جمهوره
ونوعا ما بالنسبة للمريخ المهزوم بهدفين خارج قواعده إلا أن إمكانية تأهلهما
معا أو واحد منهما على الأقل واردة بشدة شديدة.
بالنسبة للأمل والأهلي فتأهل أي منهما يحتاج لمعجزة حقيقية (بتاعت الأنبياء).
حاشية:
الإحساس العجيب الذي يراودني بخصوص المريخ والهلال نابع من كون أنني لم يحدث
من وقت بعيد أن تفاءلت بأحدهما خيرا حتى وهما في أوج قوتهما كما يزعم ناس
الجرايد .
يتبع ......

أتمني ان يصدق حلمك المريخي وهو الاقرب للواقعية والتحقيق
بالنسبة لحلمك الهلالي لا أظنه اكثر من أضغاث أحلام وكابوس اعقب عشاءً ثقيلا

Quote: أتمني ان يصدق حلمك المريخي وهو الاقرب للواقعية والتحقيق بالنسبة لحلمك الهلالي لا أظنه اكثر من أضغاث أحلام وكابوس اعقب عشاءً ثقيلا

بالعكس أرى فرص تحقق الحلم الهلالي أكبر من الحلم المريخي!!
خبرة مازيمبي الكبيرة تجعل عودة المريخ في العرضة جنوب شبه مستحيلة..

تحياتي يا طلحه وأساسي

طال عمرك
كيف حالك
المريخ ان شاء الله حيتأهل والهلال دا الا يمشى ينجدع في السرير ويصنقع للسماء ويحلم

المريخيان المتعصبان أساسي وعمر وود الفكي
اخشي أن إمكانية تأهل أبو الهل أرجح كفة.
.............
عليكم الطلاق ملاسي ذات سيلف ما يقدر يوجز المفيد زيي كدا .

أعيد ما كتبته في بوست سابق لأخونا رعاه الله اساسي

Quote: تعرف يا اساسي هسي المشكلة وين مع مازيمبي ده و نتيجتكم التي لا بأس بها ! لمن تجو الخرطوم عندكم واحد من حلين يا تخندقو يا تفتحو اللعب ! حلو الكلام ؟ خندقتو مازيمبي بيتأهل بي هدفينو ديل فتحتو اللعب طيارتكم قامت بالخمسات ! بالتالي ممكن نقول ليكم من هسي .. _ زووووووووووووووووووووط

اوووووووو صاحبنا زمان فيصل نوبي
يا راجل إتا لسه ما خليت زوطاطك ديك
إذا لم يتأهل المريخ فصدقني سيخرج بنتيجة جيدة.
وإتا عامل إيه يا نوبي بيه ؟

للتحيه فقط ... ليك وللمعاك ياطلحه

Quote: اخشي أن إمكانية تأهل أبو الهل أرجح كفة.

فال الله ولا فالك يا أخـ طلحةـبوط
ياخي إن شاء الله ما نتأهل، عشان نمشي البطولة الممكن تتجازف
ذا جازفبل شامبيونشيب

سلامات يا كابتن وليد
ويا أشرف الحبيب الحال من بعضو بالنسبة للهلال والمريخ لأنو تاهلهما أو عدمو
سيان فكالعادة سيكونان تمامة عدد سواء في الأبطال أو الكونفدرالية.

طيب هسه لو اعبرنا انو الهلال فاز على فريق الشلاليف الجزائري؟ والمريخ إنهزم من مازيمبي الكنغولي؟

اها بعداك حيحصل شنو؟؟؟

يا فايز ممكن نحلف بي شنبك الغالي



تحياتي

هوي يا تنظير ما تشبكنا احساس و يراودني وبتاع
خت توقعاتك واضحة وقاطعة عشان لما تجلّي تشوف ليك حتة تتضاير فيها

جرجير المتألم مني
أها لو صدقت كالعادة ( خت خطين تحت كالعادة دي) ؟

هي شنو الماش تصدق!! عشان كدا سألتك خت توقّعات راسها عديل عشان نشوفها ح تجلّي كيف - كالعادة




___________________

يازول ما داير كتابك دا انت

طلحه كلامو واضح ياودالبشرى ..فى رايو انو الهلال اقرب
للتاهل من المريخ ..وكتب هذا ضمنيا حتى لايغضب اهله
المريخاب ...هو طبعا الكلام دا ماعشان الهلال افضل من المريخ..
لا طبعا ..فقط لانو الشلف اقل مستوى من مازمبى ..والهلال
افضل نتيجة فى المباراة الاولى ...فالمريخ يحتاج لثلاثة اهداف
لكى يتاهل ..وقطعا ثلاثة اهداف يصعب احرازها فى الدورى
العام دعك عن البطولة الافريقية ...اما الهلال يكفيه الانتصار
بهدف ...او التعادل بهدفين ...

حاتم المهدي الإتنين فرصتهما قائمة لكنها صعبة .
عبدالعزيز عبدالله ح تحدث طرطشة كبيرة أوي .
جرجير التجاهل التجاهل التجاهل
محمد عبدالرحمن يا حبيب ما تشتغل كتير بالمجرجراتي دا.

يا طويل العمر
المريخ ان شاء الله سيفوز بضربات الترجيح
الهلال اقل حاجة مهزوم تلاتة صفر
خت الاسبوتنج بتاعك زي ما قال ود البشرى وبطل لولوة
اركز

ود الفكي يا طيب
قلتا ليك أكتر من مرة أنو الاخطبوط العظيم طلحة عبدالله طال عمرو عندو مقاييس
ومعطيات بعينا لازم تتوفر عشان يجىء يتوقع أو يرشح، لأنو الشغلانية ما ضربو رمي
ساي زي ما قاعدين تعملوا هنا.
ومع دا برضو عندو إحساس حساس جدا نادر ما يخيب، وعليه فالبوست دا قائم على
الإحساس وحده، أما الأسبوتنج والتوقعات فدي حاجة تانية بعرف متين يجىء الاخطبوط
يختها واضحة زي الشمس الساطعة بعد المطرة مباشرة.

العظيم طويل العمر
مقاييس ومعطيات زي تعامد زحل على الهرم الاكبر مثلا؟ او جفاف البحر الميت لتعبر النملة الى الضفة الاخرى؟ود البشرى كلامه واضح خت التوقع بتاعك وبطل الزوغان
ابعد من توقعاتي الانا قلتها عشان ما تتم مقارنة طال عمره مع حتة فكي (وش مدور زي وش عفاف شعيب‏)‏

ود الفكي يا مواطن فيلسوف كالهر ادولف.
الاخطبوط العظيم طال عمرو لو عايز اتوقع كان كتب (أتوقع، أرشح)
زي ما عمل قبل كدا أكتر من مرة.
لشنو يعني إتا وجرجير عايزنو يعمل ليكم الحاجة العلى مزاجكم؟؟ إتوا قايلين التوقع
دا هبلتي في سوق بصل واللا الفهم شنو؟
البوست واضح وضحان شديد جدا، (يرادوني إحساس) فما تحاول منك له.

سلام يا طلحه

الي الكونفدراية .. ايضا الخروج المبكر منها !!
ثم ...

نستمتمع بالدوري المحلي


ـــــــــــــــ

Quote: البوست واضح وضحان شديد جدا، (يرادوني إحساس) فما تحاول منك له.

يا زول قول غلبني بس
وما تملانا فقر

سلام للجميع
بالله شوف الطموحات بقت وين
كل مناصري الهلاريخ يتمنى الهزيمة العادية(لا الخمسات ولا السبعات)
علشان الكونفدرالية بتتجازف
اتجازفي
على قولة الرشيد

يا اخوانا والله حالنا لا بيسر عدو ولا صليح
الاتيام الفي الابطال بتوقع ال... قلب - ما حاجة تانية
علشان كدي اخير لينا المجازفات دي يمكن تصدف عشان نتطلع من المحلية دي

سلام للجميع

يا ود البشرى
شفت المراودة دي انا حدي معاها نهاية المباراتين ان شاء الله

جرجير بالله كان اتا أصلك ملآن فقر فما تعملا فيني ساي ( حييي أنا.. عدلت شنو؟)
ود الفكي يا رفيع الشأن ياخ أنا ما عايز أتوقع مش على كيفي ؟

شخصيا اتمنى ان يهبط المريخ للكونفدرالية بفارق هدف او بركلات الترجيح


السنة دي مجموعات الابطال حا يكون فيها زعمطة شديدة والفريقين ما بقدروا عليها

ان شاء الله الهلال يصعد .. عشان عينك ما تشوف الا النور
ففي حالة انو يصعد ما زمبي حا يكون في همسة فرق تتلتل

مازمبي
الاهلي
الزمالك
الترجي
والنجم الساحلي

اتني من ديل بقعوا معاك

يا طلاحة سلام... يا مان انا قاعد أتابع بوستاتك و أجد فيها بهجة عظيمة فشكراً على الابداع ياخي.
على صعيد أخر، ما تسمع كلام المغرضين ديل ود البشرى و ود الفكي، قصدهم يخرّبوا نجاحاتك الباهرة
فى التوقعات.

يا جماعة طلحة بخت توقعات للكورة العالمية لانها مبنية على اسس علمية و تخطط و كده
أما الكورة السودانية دي فحالها من الحال العام للبلد، ماشة بالبركة مما يصعب توقعاتها
أنتو قايلين توقعات الخبراء الرياضيين دي ضرب رمل ساااكت؟

الاخ طلحة سلام

بين اليقظة والاحلام


بصراحة الفرق الاربعة دي مامقنعة

الخروج المبكر بالكرامة افضل

التمني دا ياطلحة شي والواقع شي اخر

وربنا يكضب الشينة .

تعريجة:

المرة دي شنب اخونا ود القاضي (خارج الشبكة)

يا ود البشرى
الزول مافي ناس خربو طبعه إير ناس ابوبكر صالح ديل
يا ابوبكر الزول دا لينا يومين دايرين منو كلمة نمسكو بيها بقي لينا زي ود الباوقة لما يجي يزوغ برمي الفرمالة حقتو
اركز
تحين شوف انا تعبت من طويل العمر الاخطبوط ود الموية دا فشوف لك معاه حل

يا عاصم حسين سلامات وشكر للمرور والإضافة وعذرا للفط
ويا وليد المبارك تحياتي وصدقت القول لكن صدقني حتى في الكونفدرالية فمريخك إلى خروج .
أبوبكر صالح ياخ أنا متشكر جدا للإطراء والتقدير لكن كلامك دا عمل للجماعة ديل إشقدي في
الحجاب الحاجز وخصوصا المدعو جرجير الملقب بمحمد البشري الخدر .
ود الفكي أركز ما تبلبط .

مجدي القرشي سلامات
الكورة السودانية دي ما ممكن تراهن على واقعا إلا بالتمنيات والأحلام والصدف.

الاخ طلحة،

قالو السلام أمان ،

اولا فرصة المريخ للتأهل مع مازيمبي قد تكون واردة وقد لا تكون ولكن الأرجح خروج المريخ بحكم نتيجة مبارة الذهاب بغض النظر عن قوة المازيمبي ، 2/ صفر ليست كواحد صفر ولا حتي كتعادل إيجابي او سلبي،
سوف تبدأ مبارة المريخ مع المازيمبي بعد ان يحقق المريخ 2/صفر قبل كل شي، وهذا يتوقف الي اي زمن من المبارة ان يصل المريخ لذلك،
ثانيا: المازيمبي سوف يلعب من البداية لتحقيق هدف لتعقيد حسابات المريخ مع حسبان انو المريخ سوف يهاجم ويدافع بمستوي متوازن في نفس الوقت، ودي ممكن تكون صعبة حبة اذا قارنا امكانية خامة لعيبة الفريقين
التفوق بكل أمانة لمصلحة لاعبي المازيمبي مقارنة بخبرة لاعبي الأحمر .

الهلال والشلف، الكفة مرجحة لصالح الشلف بحكم نتيجة الخرطوم ولكن 1/1 ماهي النتيجة الضامنة للشلف للصعود، الهلال اكثر خبرة ودراية من الشلف، يمكن للهلال ان ان يسجل قون او قونيين خارج امدرمان وهذا يتوقف علي خطة الشلف في مبارة الإياب ، الشلف ليس بقوة مازيمبي ولم نسمع بة قبلا، إذن الرعب من الاسماء غير وارد عند لعيبة الهلال كمازيمبي او الترجي او حتي الاهلي المصري وتاني حاجة الاعلام الرياضي غير مركز علي الهلال كتركيزة علي المريخ ومازيمبي وهذة فرصة جيدة لإزالة اي ضغط نفسي علي لعبية الهلال،

احتمال تخطي الهلال للشلف اقرب من ان يتخطي المريخ المازيمبي، علي اقلها انو الهلال لم يخسر بل تعادل اما المريخ قد خسر تلاتة نقاط وبهدفين، مع متابعتي للمازيمبي لمبارياتة خارج الارض آري أنة لم يفشل في إحراز هدف خارج استادة بل احيانا يستاسد غريمة باكثر من اربعة كما حدث للهلال وقتها ولا استبعد ان يكرر اقلها هدفين في المريخ مع الضغط العالي للمريخ من كل جهة.