وحــدي..اطفــأت شمعــة عيــد ميــلاد (تـــــواد)..للجميـع فقـط!!

ربما كان من الغرابة بمكان ان اقضي وقتي اليوم متجولة ما بين الخرطوم وام درمان وبحري..ووجه الغرابة لان اليوم يصادف يوم مولد ابنتي الصغري (تواد) وقد فكرت منذ شهرين او يذيد قليلا _لو ربنا مد في عمرنا_ ان احتفل بعيد ميلاد (تواد) او (تٌـٌتا)كما يحلو لاخيها الاكبر (احمدالخاتم) ان يناديهاعلى ان يكون الاحتفال بسيطا وفي جو عائلي افتقدته في الفترة الاخيرة..
لكن هاهي الرياح تاتي بما لا تشتهي السفن,فقد وجدت نفسي مضطرة للذهاب الي سوق ليبيا منتصف نهار اليوم لاستلام(رسالة) من شخص بعيد_عن العين وليس عن القلب_ لانه محل احترام وتقدير كل الاسرة(الصغيرة والكبيرة)..
ولكم ان تتخيلوا التعب والرهق وبعد المسافة من(الجريف شرق) وحتي سوق ليبيا والعكس
وبالطبع كان اكثر ما بعث في الاسي هو اضطراري لاصطحاب (احمد) و(وتواد) في نهار غائظ الحرارة مثل نهار هذا اليوم في رحلة طويلة متعبة وبـ(المواصلات العامة)..
من (الجريف شرق) بـ(الحافلة) الي السوق العربي ومن هناك بـ(بص الوالي) الي سوق ليبياورغم(الكندشة) فان (تواد) لم تتوقف عن البكاء منذ لحظة صعودنا (البص)وهي تبكي ولم تنفع معها كل محاولاتي لاسترضائها وجعلها تكف عن البكاء الذي قوبل بامتعاض عدد كبير من الركاب وكأنهم لم يروا طفلا يبكي من قبل..
انا نفسي كنت منزعجة ليس من بكاء الصغيرة فحسب لكن من اضطراري للخروج في مثل هذا الوقت وللظروف التي حكمت هذا الموقف..

وبالطبع كانت لـ(الظروف ) في حياتى احكامها كما كان لـ(الضرورة) احكامها ايضا..
وربما كانت واحدة من احكام هذه الظروف هو اضطراري للرضوخ لها شئنا ام ابينا..فالعين ظلت علي الدوام بصيرة بينما اكنت اليد قصيرة للدرجة التي عجزت فيها عن تحقيق الكثير من الاحلام والطموحات وفي النهاية اصبح (المقام عالي والجيب خالي) كما تقول امي _الله يديها الصحة والعافية_
فلاكثر من عشرة سنوات قضيتها في بلاط السيدة صاحبة الجلالة (الصحافة) ظللت (محلك سر),لم يتغير شئ في حياتي انعم بحياة عادية في كل الاتجاهات ولم تعد امامي فرصة كبيرة لتحقيق شئ احبه وكل ما ادركته _خاصة اليوم_ انني كنت اقتل نفسي واجتهد في العمل لقاء اجر زهيد لم يعد حتى (المتدرب) يقبل به..!!
فقد كانت _وربما لا زالت_القضية بالنسبة لي غير متعلقة بـ(القروش) بقدر ما كانت محاولة لاثبات الذات ,لكن اليوم كانت النتيجة صفرا كبير..
(الكضب)..
(اللف والدوران)...
(اللولوة).....
و(الواسطة)..
و...
(الدهنسة)..
كلها اشياء لم اكن اتقنها..بقدر ما كنت اتقن عملي الذي احسب انه كان مقبولا بالنسبة لي ومعقولا
(المكوث الطويل) انتظارا لحدوث تغيير او حصول معجزة تجعل الامور تستقيم اصبح عادة في بعض الاحيان
وبالطبع ..انه ليس زمن المعجزات ..
يا الله... كم ارهقني جنون الانتظار ..فقد كنت ولسنوات عديدة كمن ينتظر (عودة احدهم من الموت)..
_في احاجي حبوبتي كان مثل هذا الاعتقاد موجودا_

احيانا _وقد اكون مخطئة في هذا_اشعر انها ليست (القسمة والنصيب) او (الشطارة) من عدمها انما (الحظ) الذي بت اعتقد انه سمة جافت (البعض) ولازمت (البعض) في مجال الصحافة والان ..(ديل وين ونحنا وين)؟!!..
(بعد السما من الواطة)
واظن _وبعض الظن ربما كان اثما هنا بالتحديد_ ان هذا الاعتقاد هو الذي جعلني اليوم عاجزة عن الدفاع حتى عن فرص سعادتي وسعادة صغيري (احمد) و(تواد)..

عموما..
كل سنة وانت طيبة صغيرتي وربنا يديك الصحة والعافية وطولة العمر ويكبرك وينجحك ويحفظك

والبنات سكر نبات وعقبال تطفي الشمعة المية...!
وواحدة من شمعاتها المية ديل نجيها ونطفيها معاها كمان
الأخت صباح: ربنا يخليها ليك ويبارك ليك فيها وأخوها ..
وهدية لـ (تواد) مني .. بس هي ما تكون زعلانة..:)

عفوا...حذف لفشل في رفع الصور

كل عام وهي طيبه وانت طيبه

كل عام و أنتم جميعا بألف خير

!

عقبال مية شمعة.
بصات الوالى: خط سوق ليبيا -الحاج يوسف
عذاب عديل كدة رغم التكييف والسبب الحمولة الزأئدة

مثال للكتابة بصدق وواقعية بعيد عن الزيف والكذب ولبس الاقنعة.
شكرا صباح

سلامات يا صباح
كل عام و تواد ( ذات الاسم الجميل) بالف خير. يا رب تكبر و تتوفق و تستمعي بشوفة أولادها و اولاد أولادها.

انا ام ذيك و حاسه بيك. و عارفه الشعور بقلة الحيلة لما الموضوع يكون متعلق باطفالنا بيكون صعب قدر شنو
لسه قدامك مشوار طويل، ما تقنعي، و أعرفي ان الأرزاق بيد الله و ان التوفيق و الصحة و العافية و كل أمورنا بأمره.
ربنا يحقق كل طموحاتك المهنية و يوفقك تعملي لاولادك كل العاوزاه.

_
الباقين فى السكة ياصباح .. النت كعب شديد

__
كل عام وتواد بالف خير ..

Quote: كل عام و تواد ( ذات الاسم الجميل) بالف خير. يا رب تكبر و تتوفق و تستمعي بشوفة أولادها و اولاد أولادها.

يارب تسلمي ياsmart_ana2001
وربنا يخلي ليك اولادك
من وقت مبكر من حملي بـ(تواد)وحتى قبل ما اعرف انو الفي بطني بنت قلت لو ولدت ولد حاسميه
ولو بنت يا تواد يا تُقي ووافقني زواجي علي ذلك واتحمس لاسم تواد اكتر من تقي
وبعد الولادة جات بت وصراحة كنت ناوية اسميها تقي ولمن ابوي _ربنا يطول لينا في عمره ويخليه لينا_ سألني اها اخترته ليها يا تو اسم قفز اسم تواد طوالي لكن ابوي اتردد في البداية وقال لي احسن تختاري ليها اسم يتفهم طوالي وما يكون صعب قلت ليه ما شايفة احسن من اسم تواد وهو واضح ومفهوم وعندو مدلول ديني وانساني واضح(مثل المؤمنون في توادهم وتراحمهم وتعاطفهم مثل الجسد الواحد اذا اشتكي منه عضو تداعي له سائر الجسد بالسهر والحمي) صدق رسولناالكريم
ولا اظن ان هناك صورة اخري يمكن ان اعبر بها عن التعاون الجماعي الذي أامل فيه اكثر من (تواد)هنا

ombadda

Quote: مثال للكتابة بصدق وواقعية بعيد عن الزيف والكذب ولبس الاقنعة.

الشكر اجزله لك انت

لكن الا تتفق معي ياصديقي ان المسافة بين الحلم والواقع لاتزال شاسعة وان كلماتنا في غالب الاحيان هي مجرد حوار متطاير في الهواء ؟!!

Quote: كل عام وهي طيبه وانت طيبه

السيد ياسر
تسلم يارب

بالتأكيد الوردة الهدية حقتك مختلفة تماما عن وردة اهديت الينا منذ زمن يبدو بعيد الان وخاصة لونها

اهداها زهرة بيضاء..
فرحت..
استنشقت عبيرها..
سقطت ارضا.
كانت الزهرة معطرة بالسم

rummana


شكرا علي الِغِنية _باللهجة اللبانية_ الجميلة وعلي التهنئة الحلوة دي

Quote: بس هي ما تكون زعلانة

ابدا هي مازعلانة بت ضحاكة خلاص لكن انا الزعلانة

الاخ صلاح الدين

تشكر كتير علي المرور والتهنئة الجميلة

مزمل خيري
تشكر كتير علي ارفاق الصور للموضوع ودة الفرق بين ناس اركويت واي مكان تاني
وشين ضاحكات
ولو ما هنيت البنية مقبولة منك وكفاية عليك الصور ياذوق

Quote: ولو ما هنيت البنية مقبولة منك وكفاية عليك الصور ياذوق

Quote: كل عام وتواد بالف خير ..

....
ركزى معانا شوية ياصباح عليكى الله
التهنئة تحت الصورة الاخيرة

هابي بيرثداي لتواد
ويالهما وسيمان
ما شاء الله..

وبلاش جرسة ياصباح
(بكرة أجمل)...
كلها بقي ليك خمسة وعشرين سنة وشويتين،
وفيها ينحلوا من رقبتك وفيها يفضلوا مشعلقين
وأبشرك...ان الشعلقة أفضل...




حفظكم الله.

ضحكت وانا اقول بعد فترة قصيرة على ولادتي لـ(تواد) للاستاذ الكبير حسين خوجلي _ربنا يديه الصحة والعافية_ كتير من الناس بدل ما يحمدوا لي سلامة الوضوع بسألوني (تواد) يعني شنو؟!! والماعارفين بعد ما يسألووني سميتي البنية شنو بيظلوا يرددو السؤال بعد كل مرة انطق فيها اسم بتي..
منو؟؟
شنو؟!!
اها.. بفكر جادة اغير ليها اسمها عشان ما يعمل ليها لخبطة رغم سهولته وجماله لكن اسميها منو؟!!.. الاسامي بقت مكررة شديد..بعدين اسم (تواد) دة عاجبني كتير ومتأكدة انه حيعجبها لمن تكبر وتوعي وتفهم.
فضحك الاستاذ حسين خوجلي وقال لي اقول ليك اعملي تعديل بسيط في الاسم بدل (تواد) سميها (وداد)..وبي كدة تكسبي وتتكسبي..
ضحكت بدوري وقلت ليه: الا (وداد) والله حتى لو وزنوها باسمها دهب ما حاسميها عليها..
بتصدق يا استاذ حسين اليوم القابلت فيه (الست وداد) كانت رجلها علينا مكوة بس لانو بعد اقل من ساعة صدر القرار بفصل زوجي الصحفي الهادي محمد الامين من الشغل ..وبعد دة كلو اسمي بتي عليها؟!! ابدا والله دة ما بحصل ولا حيحصل..
فضحك مرة تانية وقال لي: يادوووووب بيكون في سبب وصدقيني المرة دي حيتغير الوضع ويمكن يرجعوا ابوها الشغل..

كل سنة و أنت طيبة يا تواد يا عسل

و عقبال مية شمعة إن شاء الله

كل سنة وتواد بألف خير والعمر كلو انشاءالله

ربنا يخليهم ليك ويخليك ليهم ,,,,آميييييييين يارب ,,,

Quote: كل سنة وتواد بألف خير والعمر كلو انشاءالله

الغالية منال تسلمي يا ستي


[B]اتصل بي (...) _لاداعي لذكر اسمه_قال انه وجد رقمي في البروفايل ليحاضرني _اعتذر لي لاحقا_فيما اكتب ويسألني عن رأي زوجي فيما اكتب اويُكُتب هنا؟؟
انا مسؤولة فقط عما اكتبه ولا اعتبر انه يسئ للذوق العام او يسئ لاحد علي وجه الخصوص او هكذا اظن وقد اكون مخطئة في هذا لكن هذا ما احسبه اما زوجي فهو مقتنع تماما بقيمة علاقاتي الانسانية مع عدد كبير من الاخوة والاخوات هنا ومقتنع ايضا بقيمة صداقتي مع كثير منهم تلك العلاقة التي لا يمكن للخلاف او الاختلاف في وجهات النظر ان يؤثر فيها او يفسد ودها..
تلك الصداقة او الاخوة _سمها ماشئت_ هى التي تجعلني اعتز بمشاعر طيبة اكنها لكثير من الاخوان او الاصدقاء دون غرض
يبدو ان القهر السياسي ليس وحده من يغتال مشاعرنا فهناك القهر الاجتماعي ايضا..
وشاكرة لك الاتصال رغم قساوة كلماتك

تشكر يا خالد علي الامنيات النواضر

بالغتي يا عشة يا اختي 25 سنة الشوية دي ؟!!
وش ضاحك



ياستي اهو صابرين ..ربنا يديهم ويدي الجميع الصحة والعافية ويقدرنا على تربيتهم بالطريقة الصحيحة

كل عام وتواد بخير وتكبر أمامك وتشوفيها فى أعلى المراتب ، شكرا الفاضلة صباح لمشاركتنا فرحة تواد ولو باليد كنا شاركناك حضورا للإحتفال بإطفاء شمعة الوديعة تواد

كوني بخير

الأخت العزيزة صباح أحمد (كنت عايز أقول ليك الخردة صباح لكن خفت الجميلة تواد تقوم تحنبق) بختك لقيتي ليك دروع بشرية لصد سهام الكرمبا الخردة.

أولا عيد ميلاد سعيد للإبنة تواد ( دا إسم جميل جدا يا أم تواد...و نرجو أن لا تفكري في تغيريه)

ثانيا شكرا ليك على الكتابة الجميلة في مقدمة البوست.
و شكرا لك كأم تريد الخير لأسرتها, تكدح و تعمل من أجل ذلك

قلتي لي سوق ليبيا?
و كمان بص مكندش!

يا بت أمي نحن كنا بنركب كارو عم حسن الشايقي في نص الشمس الحارقة من وسط أم درمان لسوق ليبيا....لمن كانت ليبيا, ليبيا.

و المركبات العامة مالا ,عيبيها لي?
و أنت بقيتي صحفية كيف لو ما بتركبي المركبات العامة!
و كان حا تكتبي لينا عن شنو و لمنو!

الصحفي الحقيقي هو البشيل عكازو_قلمو_ و بنزل السوق عشان يقعد مع الناس و يتعلم منهم. المركبات العامة دي بالذات فيها الكلام عن السياسة و سعر الطماطم و الدولار و كلام خال الرئيس الفارغ و أخبار الربيع العربي و ميشيل أوباما و أوكامبو و آخر رقصة للبشير...و فيها الشمار.

المهم دا موضوع كبير {عاوزلو) بوست....

تعليق على صورة السيد الصادق و تواد:
أحضنون و رجعون

شكرا ليك يا أم تواد
و سلامي لك و لأبو عيالك و كل الأسرة
و أبقوا عافية

الف مبروك لتواد
بالفعل اسم جميل جدا

يا سلام يا صباح ياخ!
كل سنة وتواد وأحمد بألف خير!
شكرا على الكتابة الطاعمة رغم المأساة!!

Quote: كل سنة وانت طيبة صغيرتي وربنا يديك الصحة والعافية وطولة العمر ويكبرك وينجحك ويحفظك

اللهم امين يا رب
كل سنة وانتم بالف خير

قلتى لى عيد ميلاد فى بص الوالى
برضو كويس ما بطال اخير من قعاد البيت

كل سنة وانتم ب1000 خير و عقبال 100 عام

ياسلاااام عليكم




يبدو اني ما كنت موفقة في اختيار عنوان البوست دة




بجيكم بي رواااقة بعد اعشي الشفع وانومهم

اجاهد واجتهد الان كيما ادس الفرح حتى لايظهر في عباراتي..
ولا اعرف هل نجحت في هذا ام ان كلماتي جاءت معبقة بالسعادة لتفضح دواخلي وتعلن فشلي في اخفاء ما يجيش بصدري؟!!
بـ(الجد) سعدت كثيرا لمرور كثير من الاصدقاء الاعزاء واعرف بعضهم جيدا ..كانوا ولازالوا شمسا تشع ولا تفرق في دفئها بين الناس و(خريفا هطولا لا يسأل اي الناس واي الاراضي يسقي)..

واعتذر بسبب تأخري في الرد علي بعض ما كتب في هذا البوست وبسبب الغياب القسري بسبب مرض صاحبة البوست الست تواد وبعدها السيد حمودي وايضا اضطراري للذهاب الي البيت الكبير لان الوالد _ربنا يديه الصحة والعافية وطولة العمر_ مريض ايضا ..
المهم
يا...
مها
ويا كوستاوي
ويا بكري
ويا خالد العبيد
ويا ود الصايم
ويا بت المجمر
شكرا علي المرور الانيق مثلكم
وشيلوا الصبر معاي
برجع و بالـ...تفصيل الممل

التقطت الصورة أدناه ظهر اليوم حوالى الساعة الثالثة ظهرا. وجهة البص سوق ليبا.
بص مكندش وكوستاوى يقع البحر بس.