تلفزيون السودان وفقع المرارة ما بين ياسر المساعد وياسر مختار (امبيلي)

السلام عليكم ورحمة الله وبركاته

طبعا أنا مقاطع تلفزيون السودان من زمان، بس أيام هجليج دي القلب طاوعني تاني وقلت أرجع للمشاهدة، أها في مراسل كده ما عارفو وللا معلق فاقع مرارتي فقعة شديدة المراسل الهمام ده اسمه ياسر المساعد، الرجل ده لا يصلح مراسلا ولا حتى قارئ تقارير .. صوته مزعج وليس فيه أي جماليات ولا يستطيع التحكم في طبقات صوته، فيرسله كالجرس أو الصليل!! الشي التاني بقرا بي سرعة شديدة جدا زي الألفا البذيع ليهو في أسامي مهرجلين، أما مخارج الحروف ونهايات الجمل فحدث ولا حرج!! أما ختام التقرير فده حاجة تانية خالص: يااااااااااااااااااااااسر اللللللللمسااااااااااااااااااااااااااااعد تلفزيون السـُدان ( بياكل الواو) آآآآآآآآآآآآآآآآلخرطوووم!!

آآآآآخ أنا مرة قرأ تقرير كده ما قدرت أسجل منه إلا نهايته لكنها تكفي:



وهذا الأخ نفسه يذكرني بمعلق رياضي لا يقل عنه إزعاجا ولا بعدا عن الموهبة، وهو المعلق ياسر مختار والذي يغنيك عنه تعليقه في مباراة الهلال وأول أغسطس الانقولي والتي عندما أحرز الهلال هدفه الثاني بواسطة امبيلي أخذ يصرخ: امبيلي امبيلي امبيلي امبيلي امبيلي امبيلي امبيلي امبيلي والكورة خلاص دخلت قون وهو لسة بصرخ: امبيلي امبيلي امبيلي امبيلي امبيلي و امبيلي جرى للمدرجات وقلع فنيلتو وهو امبيلي امبيلي امبيلي امبيلي امبيلي لحدي في النهاية قال قووووووووووووووووووووووووووووووووووووون مشاترة كده وطويلة وحسو قطع في النص زي صوت الرادي لمن يشخشخ ويرجع تاني ووووووووووووووونننننن .. أنا ما عارف الناس ديل بجيبوهم من وين وبعينوهم كيف؟ وهل تجرى لهم اختبارات؟

فقع مرارة شديد ^__^