و هكذا عامل المؤتمر الوطني الأسرى من قبل..!!!

اول بالتبادي.. الف حمد لله بسلامة الأسرى الذي افرجت عنهم دولة السودان الجنوب..و مجرد وصولهم احياء فهذا مكسب..
ازعجني الإبتزاز الذي فعله و يفعله الإخوة و الأخوات من اهل المؤتمر الوطني و المدافعين عنه.. في المنبر و محاولة تسويقهم لتصريح السيد خالد حسن..و انه دليل على سوء معاملة الأسرى..و هذا ان دل انما يدل على ان اهل المؤتمر الوطني و اصدقائهم ينسون انفسهم و فعائلهم..
معاملة الأسرى يجب ان تكون وفقا للمواثيق..و طالما المؤتمر الوطني لا يعرف هذه المواثيق الإ حينما يصيبه الأذى.. فهذا نفاق اخلاقي بالباب العديل..
و هنا ما فعل المؤتمر الوطني بالأسرى حينما وقعوا في يده.. !!!



كبر

Quote: و محاولة تسويقهم لتصريح السيد خالد حسن..و انه دليل على سوء معاملة الأسرى..

كبر يا أخوي أشك في صحة تصريح الطبيب، والدليل هيئته ومجموعة الأسرى في كل المراحل التي ظهرت صورهم فيها...
تصريحه هذا يناقض تصريحه لقناة الجزيرة بحسن المعاملة، وبالتالي هناك كذب فهل كذب في جوبا أم الخرطوم؟؟؟؟
إما هو كذاب أو أملي عليه أحد الحديثين (جوبا/الخرطوم) ولا خيار أمامه إلا أن يردده خوفاً وطمعاً....

آمل أن يقول الحقيقة


الشايقي

http://www.youtube.com/watch?v=WjNosdjuv7s

فاوضني بلا زعل

[email protected]
http://alkatwah.com

.

سلام يا صديقي و أستاذنا / كبر ..

رغم أن ضرب الأسرى عمل مستهجن و مدان و قد قمت ـ أنا ـ بإدانته و إستهجانه في وقته ..

فهو لا يعدل قتلهم بأي حال ..

و إذ ا{دت القياس يا أستاذ فلا تجعله قياساً مع الفارق ..

فليس من مقارنة بين ضرب الأسرى و قتل و تصفية الجرحى ..

ليس من مقارنة فهون عليك .. فلا تبرر هذي بتلك

الشايقي..حبابك يا صديقي
كتر خيرك على المرور من هنا..

انا شخصيا متضامن تماما مع اخونا خالد..و تصريحاتو ابدا لا ارى فيها تناقض.. عملا بمثل كانت بتقولو لي حبوبتي ام سماح ام عسكرية (و هي علمتني الكثير في هذه الحياة) و المثل بيقول: الراجل في ايد الرجال زي الطويرة في ايد العيال..!!!
فلا ارادة لأسير يا صديقي..عشان كده قلت الحرب ما عندها اخلاق..!!

كبر

صديقي عصام..حبابك
داير النصيحة ولا الجمبها؟..

المعاملة السيئة للأسرى مسالة مرفوضة و ما دايرة غــــلاط..!
لكن السؤال: ماذا يريد المؤتمر الوطني بالضبط من خلق هذه الهلولة؟..

مش ياهو الخم بالباب العديل..؟..
احداث هجليج خلقت اوضاع مغايرة تماما لحد المقارقة..و المؤتمر الوطني الليلة لو كوركنا ولا سكتنا السلطة في يدو..فدحين اخير يبقى جادي ولا يقعد يشحد التضامن بمساءل لا تسمن ولا تغني من جوع؟..

اها السودان (مش المؤتمر الوطني) لمن طرد جيش الجنوب من هجليج ..برضك وقعوا في يدو اسرى..اها باقي ديل لمن باكر نفكهم و نسلمهم للمصرين..باقي ليك ح يرجعوا يقولوا شنو في جوبا؟..
ناهيك عن واقعة احتمال يكون لازال عندنا اسرى معاهم..!!
الواقع يا قريبي.. كل السودان الليلة بيطالب بمراجعات كبيرة و كتيرة..و ضرورة محاسبة وزارة الدفاع فيما يخص هجليج..و مثل هذه المساءل لن تخمدها حكاية خطاب اساؤا معاملة اسرانا..و يا الشعب السوداني تعال شوف الناس دي بتعاملنا كيف؟..لو المؤتمر الوطني كايس تعاطف زي ده الضحك شرطو..!!

غايتو يا اخوي انتو (ناس المؤتمر الوطني) حقارين خلاص..كلما تلقوا ليكم شوية هبوب بتضروا عيشكم..!
كبر