Post: #1
Title: لا حاو لا هش لا تك لا جر لاعي
Author: عبدالله ود البوش
Date: 04-25-2012, 02:45 PM
ضربة الديك اللولاني صحوا كلهن وعركة عينهم من النوم ائ واحد افقد التاني
اللبو افقد الشافع العيان واللم تفقد اللدايات تسوي الشاهي وجابنو تتفقد جرقاس اللسع ما فتح عيونو علي الدنيا
كلنا نعرف بعض حيواناتنا علي بني ادمننا والضحوة باكرية الحمارة في بربنديها عارفا شغلا والسعية جاهزة للرواح وعارفا مشهادا والراعي والصوط والخروف والكنان والعشار وكل في فلك يسبحون
ونصت نهار سكة عمي يعودون ويهمهمون ويتهامسون الشافع يونس ابوهو والدحشة تعفض جنب امها والعبور تنقز تتباهى بجمالها ورشاقتها والكلـــب الضكر العجوز يجرجر كرعي وينقنق تاني اصلو ما بمشي معاكم وهو انا البوديني الخلا شنو كان ما ساهي دق الوتد على الوطا
وداخل البيوت والرواكيب الصغيرة كلهم يتونسون ويقهقهون ويفكرون في يوم بكرة كنيش كنيش تجيب المطر والعيش وهمهم كلو في المسور وعرس الخزين وريحة السلات وملاح الرز وجابنو همها في ابو البعار والسوسيو الداب ولد خوفو من الحدية تختفو يوم العرس تخلي اماتو اسون كاك كاك ويقطع لهم سيد البيت افكارهم بهس كفا الجنا دا عيان عندو اسمتاريا نعالجو كيفن وروني كيفن الدبارة يا البخات بالله حبوبتو توصف الببسيكولا الفيها الدواشات وكان قلتو خير ببيع غزلي الكيفة هدي تجيب قرش ونص وباكر الناير اكبر لي واجيب لي السمح فتقاطعها الكـلبــة جابنو المنتكية فوق العتبة بسخرية بنت كـلـب حبوبة دي بتبالغ غزل شنو قالوا ليك الجنا عندو استماريا تقولي قرش ونص تضحك وتخت يدها فوق خشما قبل ان يلهاها ود ابزهانا بالمركوب فتطفر العتبة وتمشي ترطب تحت الزير بعدما تطرد كل القعونجات التحتو كل واحدة تشوف دلالا وين ان شاء الله اجي عاير فوقن حمار ود الكريل افجخن واريحنا من غاغ غوغ دي بركة من صلى وقال يا الله راجية ربي ما راجية زول وناس البيت ديل نزلة ومنعزلة اتغالتو كدي في علاج الشافع دا لمن الحق اهلي الفاتو
كتر خيرك يمة على قرش ونصك لكن انا بعد الوطا تبرد بطيع الدحش دا وببيعو فتصيح الدجاجة الصغيرة الحمراء كاك كاك وي دحيشك دا ما بجيب عمار وي ما بجيب عمار بعدما اطمئنت على ان المطلوب اغلى من سعرا الذي لا يتجاوز خمسطاشر قرش وبالكتير طمنطاشر قرش باقي الليام دي الغوغ مرخس الجداد رخسة شديدة خلاس
مجتمع لو عطس حاج احمد في طرف الحلة احمد اقوليهو الله ارحمك يا عمي حاج احمد .. نعرف عطسة بعض ويعرفون حتى ريحة ريح بعض كان مخمرة ولا كان فطيرة كان قلت حاو ما بقيف ليك الا حمارك وكان قلت تك ما تجري الا عنزك البتعرفك وتعرفا
ونبحب بعض
وينك ما مراتع الصبا
وين الميضة والدغلوب
وين الفرنغيتة والبرجوبة
وين اهلي وين بلدي
يا الشيخ بدوي تمسكي من اضاني وتدويني لبكاني
طاحونة ومرة مجنونة
|
Post: #2
Title: Re: لا حاو لا هش لا تك لا جر لاعي
Author: عبدالله ود البوش
Date: 04-25-2012, 03:28 PM
Parent: #1
الخربشة الفوق دي نتيجة احباط من الصورة التحت دي
|
Post: #3
Title: Re: لا حاو لا هش لا تك لا جر لاعي
Author: محمد قسم الله محمد
Date: 04-25-2012, 06:46 PM
Parent: #1
| Quote: لا حاو لا هش لا تك لا جر لاعي |
ود البوش ..
ها زول ها ..
الليله مسعلتك خترية تب ..
جنس النضمي الليلك ده مي هيّج علينا المصران اللعور ..
وشيتاً من كلامك دايرلو ترجمه خسوساً عي ..
عي دي علا كان يكوسوها في قاموس منير البعلبكي ..
يا أخي ذكرتني حاجات حلتنا زماااااااااااااااااااااان..
جبرين الراعي ..
وحمارتنا (وحرارة ) حمارتنا الحميرا ..
وحمار الباهي المكادي ..
######يلات ناس الفريق ..
وغنماية حاجة مكه البعامية ..
و التقانت والشلابي والنواكيس والسربه أنصاص الليالي ..
يا أخي طلّعتا عينا زاتو ..
|
Post: #4
Title: Re: لا حاو لا هش لا تك لا جر لاعي
Author: عبدالله ود البوش
Date: 04-26-2012, 06:42 AM
Parent: #3
Quote: عي دي علا كان يكوسوها في قاموس منير البعلبكي ..
|
محمد قسم الله سلام وعوافي
كنت عايز اكتب في اخر الكلام ( في زول فهم حاجة ؟) لكني تراجعت عن كلامي
واهو انت فهمت كل الحاصل وزيادة
طبعا الكلام الزي كلامي دا لايمكن ترجمته وهو ذاتو اترجمو بشنو
وهو كلام فارغ للذين ناطقين بغيرنا ومن ينطق بنطقنا فهو عز الطلب
Quote: وغنماية حاجة مكه البعامية ..
|
اعوذ بالله من العنز البعامية دي ياخي لمن تغتس راسا في صفيحة الدقيق حمالتك علي تنوموا القوا
.
.
.
شكرا اخوي امحمد ود قسم الله
|
Post: #5
Title: Re: لا حاو لا هش لا تك لا جر لاعي
Author: aydaroos
Date: 04-26-2012, 07:35 AM
Parent: #4
-"زين العابدين ... من وين في الأهل؟"
-"من السيالة ... أنا جنوبي من السيالة"
-"مي نا السيالة؟! السيالة دي مي حقت الرباطاب؟"
-"هاهاها ... و إنت قايل شنو أنا رباطابي من منازلهم"
بيتر جا من الجنوب و عمره كان 14 كان 15 سنة و إشتغل غسال في الحلة
و شوية شوية بقي يلعب الدافوري مع الوليدات، طيبتو و إخلاقو دخلنو
القلوب و البيوت.
نفاجات السيالة ولفت عليهو، شايل حزمة برسيم لي الخالة فلانة
يكسر في الحطب لي العمة فلانة، شايل طوريتو يسد في لبقة معانا
و لا يساعد في بناء كرنق.
بيتر شاف الناس بي يروحو الخلوة ،سال أصحابو ولما أتيقن
مشي لي سيدنا براهو و قال"أنا داير أسلم" وسيدنا أداهو أسم
"زين العابدين".
زين العابدين كبر مع أعمامنا و أخوالنا، حضر معاهم لقيط الدفيق
العوم للرملة ، جية نميري في راس القطر، قطع التوتو كورة و خسر كم مرة
و لمن فاز إتقاودو لي مطعم السمك في السوق الكبير.
زين العابدين بيقا عامل في السكة حديد
و خش اللجنة بتاعة النادي، ولما النادي خش الدرجة
رقصنا معاهو جنوبي و عرضة
زين العابدين أديناهو مننا عرس بنية رباطابية
و جابلو وليدات
"الحال يا عابدين؟"
"كويسين.. علا البنية مورودة شوية"
الحال يا عابدين ؟
و الله تمام بس الحافز إتاخر علينا
الحال يا عابدين
و الله تمام بس البلد فصلوه علينا ... و ما عارفين الناس
شمال و جنوب هم زين العابدين
_______________________
الشخصية و الأحداث حقيقية
سلام ليك و شوق يا عبدالله ود البوش
|
Post: #6
Title: Re: لا حاو لا هش لا تك لا جر لاعي
Author: Nazik Eltayeb
Date: 04-26-2012, 07:58 AM
Parent: #5
الله يغفر ليكم يا ود البوش انت و عيدروس
ما قطعتو قلبناعاد خليناكم لي الله
-------------
الليلة يا ود البوش مرقت جابنو من نومتها في كليلة و دمنة
قطعة ادبية راقية بدون شك.....واصل
|
Post: #9
Title: Re: لا حاو لا هش لا تك لا جر لاعي
Author: aydaroos
Date: 04-26-2012, 08:15 AM
Parent: #6
| Quote: مجتمع لو عطس حاج احمد في طرف الحلة احمد اقوليهو الله ارحمك يا عمي حاج احمد .. نعرف عطسة بعض ويعرفون حتى ريحة ريح بعض كان مخمرة ولا كان فطيرة كان قلت حاو ما بقيف ليك الا حمارك وكان قلت تك ما تجري الا عنزك البتعرفك وتعرفا |
هو عاد يا نازك قطيع قلوب و يس
الحبيب بقا غريب، و الرواكيب الفايحة بريحة البن نكرتنا
زير المزيرة حلقو يهاتي بالعطش و مكسور
و الشوارع بقت تودي لي بكانات نحنا ما بنعرفا
|
Post: #10
Title: Re: لا حاو لا هش لا تك لا جر لاعي
Author: عبدالله ود البوش
Date: 04-26-2012, 08:23 AM
Parent: #6
Quote: الله يغفر ليكم يا ود البوش انت و عيدروس
ما قطعتو قلبناعاد خليناكم لي الله
|
نازك الطيب الفنجرية سلام
نان انا ما الصورة الفوق دي قطعت قلبي قبلك
مريم بت خالي الخالق الناظر دخل فيها رعبا مافي قلما بوصفو الا الحسرة
كانت معانا ومشت مع امها وتاني ما شفتها الا في الصورة دي
قلبي قال لي اياها زاتا يا نازك
Quote: الليلة يا ود البوش مرقت جابنو من نومتها في كليلة و دمنة
قطعة ادبية راقية بدون شك.....واصل |
يا نازك ما تسوي للعنابر قنابر انا زول الله ساهي بشخبت البحس بيهو في لحظتو
وماك طالباني حليفة على الليمان كليلة ودمنة دي كان سمعت بالعنوان سمع
.
.
شكرا يا الفنجرية بت عمي الطيب
|
Post: #7
Title: Re: لا حاو لا هش لا تك لا جر لاعي
Author: ismeil abbas
Date: 04-26-2012, 08:01 AM
Parent: #5
ألأخ/ودالبوش..................سلام عليك.
| Quote: وهمهم كلو في المسور وعرس الخزين وريحة السلات وملاح الرز وجابنو همها في ابو البعار والسوسيو الداب ولد خوفو من الحدية تختفو يوم |
بعجبنى جنس الحديث ده..لأنو بطلع بسيط من ناس بسطاء ماعايزين فى الحياة دى إلا السترة والعيشة فى سماحة.
كلمة المسور دى فى هذا الشهر مرت على أكثر من مرة وعرفتها بعمق من ألأخ/صلاح شتات..وسرده لى بمعنى كل زول يكون عرف مسورو..يعنى عرف نتاج زراعته أو نهاية المحصول.
مغرم بالجد بمعانىى هذه الكلمات وبحس بحنين دفاق حين سماعها..لك التحية وأنت تنتهج هذا النهج فى الكتابة.
تقديرى وتحياتى..
|
Post: #12
Title: Re: لا حاو لا هش لا تك لا جر لاعي
Author: عبدالله ود البوش
Date: 04-26-2012, 08:41 AM
Parent: #7
Quote: بعجبنى جنس الحديث ده..لأنو بطلع بسيط من ناس بسطاء ماعايزين فى الحياة دى إلا السترة والعيشة فى سماحة.
|
العزيز سماعين اخوي سلام
ات اخونا بالرضاعة في الخلا والصي لكن ود بندر بالمعايش ساهي
.
.
ناسنا يا سماعين بساطة ورضا البيت كلو كتانتو واحدة ( حلة مصنوعة من الحديد الخردة )
وقدحا واحد ونفس واحدة على الليمان الواحد اتنفس في خشم التاني
والتاني اقوليهو ادن جاي عشان اسمع حديسك سمح
.
.
كااااااااااااااااااااااااااااااااااااان
.
.
شكرا يا سماعين واريتك طيب
|
Post: #8
Title: Re: لا حاو لا هش لا تك لا جر لاعي
Author: عبدالله ود البوش
Date: 04-26-2012, 08:09 AM
Parent: #5
Quote: زين العابدين أديناهو مننا عرس بنية رباطابية
و جابلو وليدات
|
الوليدات اسع وين يا عايد الروس ؟
لا تكونو خليتوا جنياتكن طشوا مع الطاشين
الدم مو موية يا عايد الروس
.
اخخخخخخخخخخ فرق تسد !!!!!!!!!!!!!
.
.
.
مريم ( ميري ) بت خالي لازم تعود
الدم مو موية يا عايد الروس
.
.
.
وشوقي ليك تضاعف يا عايد الروس سلام وامان
|
Post: #11
Title: Re: لا حاو لا هش لا تك لا جر لاعي
Author: معاوية المدير
Date: 04-26-2012, 08:36 AM
Parent: #8
Quote: الشخصية و الأحداث حقيقية
سلام ليك و شوق يا عبدالله ود البوش |
سلآم هوووي.
زين العابدين من أعزّ وأحبّ الأهل إلي نفسي.
لي معه صولآت وجولآت. سيف الدين أخوي في
التلفون قال لي زين العابدين دايرين يرجعوهو الجنوب!!!
قُتلو يا سيف أخوي عاد الكلآم دا بيبقى ؟؟؟ زين العابدين
أكان مرقوهو من الحِلة يبقى زي العِز بن عبد السلآم. الحِلّة
ست تمرق معاهو. قال لي يا زول تب ما بنكرم وراهو.
زين العابدين يا عيدروس هو السماني المليجي ولي يومك دا
وكت أروح البلد يسالمني بهذا اللقب ويقعد يجُر معاي شريط
الذكريات. عندي معاهو مُساجلآت كتيييرة عِلآ الأيام ديل
مشغول بالحيل.
إن فضيت بجيكم صاد إن شاء الله...
|
Post: #13
Title: Re: لا حاو لا هش لا تك لا جر لاعي
Author: عبدالله ود البوش
Date: 04-26-2012, 08:51 AM
Parent: #11
Quote: التلفون قال لي زين العابدين دايرين يرجعوهو الجنوب!!!
|
زين العابدين اسع وين يا معاوية ؟
من دربك دا تتصل وتشوف صاحبك وين يامعاوية ... الله بسعلك منو
لو فرطوا في زين العابدين حرم ما عندكن دين
.
.
سلام يا ود المدير ياخي ومشتاقين
|
Post: #14
Title: Re: لا حاو لا هش لا تك لا جر لاعي
Author: aydaroos
Date: 04-26-2012, 09:42 AM
Parent: #13
حبوبتي نفيسة و حبوبتي أم الحسن
عندهن دكة نخل أمهن تناغم الغيم
تعاين لامن رقيبتك تطقطق حتي تشوف سعفا
و طلاعا الخزين غيرو ما بخبر دروب كمروعا
و التمرة إسمها سبق الجوع
عشان بي تنجض قبال أخواتا
يوم قطع التمر يتقاودن
معاهن كسرة و ملاح روب و جردل مويه
و عدة جبنة بي فناجينا و شرقرقا
و صاحباتن حتي أم حقين تجي بي ودعا
و نحنا معاهن بنوت و ولاد
يضربنا هواء البحر و نجاري قدامهن
ساكين القمري و الزرازير و السحالي
و جنب الدكة نلاقي الخزين و معاهو هدندويات
لي لقيط التمر ،متحزمات بالفوط و السماحة
و يشيلن حقهن من المحصول
و يشاركن حبوباتنا فنجان فنجان من قهوة الزمان السمح.
ماتن حبوباتي الله يرحمن
و ماتت دكة النخل
و فضلو جوانا بنيات و وليدات يتجارو
ورا القماري و السحالي
و مهارة الخزين في طلوع النخل
و طعم ملاح الروب و ريحة القهوة
و سماحة الهدندويات
____________________________________
يا ود البوش السيالة ما بتجدع جناها
زين العابدين و وليداتو مننا وفينا
علا تقول شنو في البلد البياكل بعضو دا يا ود البوش
|
Post: #15
Title: Re: لا حاو لا هش لا تك لا جر لاعي
Author: فيصل محمد خليل
Date: 04-26-2012, 10:09 AM
Parent: #14
هاهي الارض تغطت بالتعب ..
والبحار اتخذت شكل الفراغ ..
أنجبتني مريم الأخرى قِطاراً وحقيبةْ أرضعتني مريم الأخرى قوافي ثم أهدتني المنافي هكذا قد خبّروني ثم قالوا لي ترجل
وأنا لست أدري ما الذي يدفعني دفعاً إليك ؟؟
ما الذي يجعلني ابدو حزينا
لا عليكْ
نحن شكلنا التآلف في انفعالات الأجنة ..
وأحتوانا البحر والمد اليقاوم والشراع .
|
Post: #16
Title: Re: لا حاو لا هش لا تك لا جر لاعي
Author: عبدالله ود البوش
Date: 04-26-2012, 10:24 AM
Parent: #15
فيصل خليل يا جميل
مرورك دائما زي ريحة الدعاش ريحة المطر
فيك حاجة فينا تقطع نفس خيلا بجن فازعات
|
Post: #17
Title: Re: لا حاو لا هش لا تك لا جر لاعي
Author: aydaroos
Date: 04-26-2012, 11:33 AM
Parent: #16
Quote: كلنا نعرف بعض حيواناتنا علي بني ادمننا
والضحوة باكرية، الحمارة في بربنديها عارفا شغلا
والسعية جاهزة للرواح وعارفا مشهادا
والراعي والصوط والخروف والكنان والعشار
وكل في فلك يسبحون |
ياخي دي خريطة مكان ولا خريطة قلب ... جننتا الكتابة يا ود البوش
|
Post: #18
Title: Re: لا حاو لا هش لا تك لا جر لاعي
Author: عبدالله ود البوش
Date: 04-26-2012, 11:35 AM
Parent: #14
Quote: يا ود البوش السيالة ما بتجدع جناها
زين العابدين و وليداتو مننا وفينا
|
السيالة صحي ما بتجدع جناها
كيفن السيالة بتجدع جناها
وجنياتا رضعوا من حبوبتك نفيسة وحبوبتك ام الحسن
رضعوا الطبع السمح وطيبة العشرة واتغتوا بكرم النخل
واتوسدوا الطين اللخ متل عرق اللبخ
تماسكا وتكاتفا وتعاضدا
انعل ابو الشعر المابطاعني اكتب الفي القلب
متفاعل متفاعل متفاعل
.
.
لكن يا عيدروس من اين اتى هولاء الذين يجدعون جناهم ؟
|
Post: #19
Title: Re: لا حاو لا هش لا تك لا جر لاعي
Author: aydaroos
Date: 04-26-2012, 12:02 PM
Parent: #18
| Quote: لكن يا عيدروس من اين اتى هولاء الذين يجدعون جناهم ؟ |
هم مننا يا ود البوش علا ما شاورونا .. و بيت الشورة ما خرب
كنا قلنا ليهم
"الأرض عشان الجنا ... و الجنا حقنا ... و ولدك إن كبر خاويهو"
و الأرض البور كان عندك كان عن ود عمك بور
و الكترة بي تعجب و تغيز العدا
و الأرض بطن ... جابتنا بطن واحدة
لكن با ود البوش يا ود أعمي قالوا :البشوف القلب ... العين ما بتشوف
|
Post: #20
Title: Re: لا حاو لا هش لا تك لا جر لاعي
Author: عبدالله ود البوش
Date: 04-26-2012, 12:26 PM
Parent: #19
Quote: البشوف القلب ... العين ما بتشوف
|
صحي تربية حبوبات يا جنا
امي الله اطول عمرا واديها العافية دائما تقول
البشوف القلب .... العين ما بتشوف
وذلك حين يدقش ائ واحد مننا فنجان الجبنة ويترتر هناك
ولا كان رسلتنا لغرض ونلوس جنبو ونقول وينو ما شايفو
.
.
النظرة الضيقة تحت الكراسي هي السبب
تقع الواقعة ونبقى في حاو وهش
|
Post: #21
Title: Re: لا حاو لا هش لا تك لا جر لاعي
Author: محمد قسم الله محمد
Date: 04-27-2012, 05:38 PM
Parent: #20
ود البوش أختِر بي وشك ..
سَوْ ... ما تقيف طب آزول
|
Post: #22
Title: Re: لا حاو لا هش لا تك لا جر لاعي
Author: aydaroos
Date: 04-28-2012, 06:57 AM
Parent: #21
| Quote: تقع الواقعة ونبقى في حاو وهش |
عايرة و يدوها سوط
|
Post: #23
Title: Re: لا حاو لا هش لا تك لا جر لاعي
Author: aydaroos
Date: 04-29-2012, 08:46 AM
Parent: #22
Quote: انعل ابو الشعر المابطاعني اكتب الفي القلب
متفاعل متفاعل متفاعل |
و تقول لي الشعر ما مطاوعك ياود البوش ، عليك الله ما تشعر، بس أكتب زي دا
طيب دا شنو ؟!!!
Quote: ضربة الديك اللولاني صحوا كلهن وعركة عينهم من النوم ائ واحد افقد التاني
اللبو افقد الشافع العيان واللم تفقد اللدايات تسوي الشاهي وجابنو تتفقد جرقاس اللسع ما فتح عيونو علي الدنيا |
|
Post: #24
Title: Re: لا حاو لا هش لا تك لا جر لاعي
Author: عبدالله ود البوش
Date: 04-29-2012, 03:03 PM
Parent: #23
كلامك دا على كلام ناس الشعر الحر ابقى ائ زول حر في كلامو
زمان في الثانوي العام عندي صاحبي قال لي داير االف ديوان شعر
اسمو الحب حفرة
وكل ما اكتب كلام انا اشكر فيهو واقوليهو دا احسن شعر
حتى ملا منو كراس الحساب المربعات داك
اختار كراس الحساب ابو مربعات عشان كل بيت شعر اكون قدر بيت الشعر التاني بالظبط والربط
ياخي الزول دا كان بتعب تعب وانا سبب تعبوا وبصراحة قصدت اشغلو عشان هو دايما اللول
قايلو بعمل شنو اول حاجة اختار الكلمات الاخيرة في بيت الشعر عشان تكون متشابهة
وتاني اقوم الصق ائ كلام في النص
وبذكر مقدمة الديوان كانت ظريفة جدا
الحب حفرة
الحب زي الحفرة الكبييييييييرة وترابا فرنغيتة هذه الحفرة لو كنت بعيد منها ما عندها معاك شغلة
لكن كان قدرت وقربت منها ساهي سوف تقع في هذه الحفرة غصبا عنك وتاني وتاني كان قلت الروب ما بتمرق منها
تفرفر قبلك لحدي ما تموت في الحب عشان كدا الواحد بقول للبت سنة ولا اموت انا يعني كان وقعت في هذه
الحفرة سنة ما بتمرق منها ولا كمان تموت قبلك
في ذلك الوقت كنت افكر في كتابة الشعر ولكني اتعظت بصديقي وعرفت انه ليس بتلصيق الكلمات وحدها يكتب الشعر
وجاء الفرج اخيرا مع الشعر الحديس الحر فتكتب ما تشاء ويصير شعر حر
فتمعن هذه القصيدة الحرة اخي عيدروس
رايتها تدفر سعيتها قدامها ولا خساها تغني و تقدل ساهي
وفي يدها بصلة وسعينا ملان بقنية فقرا كان دارت تجغم تجغم وكان دارت تقرم تقرم
عرقا نازل فوق ضهرا مش زي بت المدن البتلمع المابتشيل دقيق من الطاحونة ولا بتعرف توسر العنقريب
القصيدة طويلة اخي عيدروس كان عجبت كلمني بجيب ليك الباقي وكان ما عجبتك بجيب ليك قصيدة الفرطوق
بتعرف الفرطوق يا عيدروس
الفرطوق ياخي البنسويهو بالطين كان قال طق والطين طرشق يكون الضاربه ولد اب زرد
وكان قال طق ساهي برا طرشقة الطين في الهواء يكون الضاربه ولد
وكان كرس ساهي بدون طق يكون ولد اطرش
ولا كمان الفضيحة تباريك للخريف الجاي كان طلع بت
القصيدة دي ممتازة من الشعر الحر الذي يهتم بجوهر الحديس يعني اقوليك كدايا من كدايا
طوالي بدون ائ لولوة واخليك تستمع استماع حر
|
Post: #25
Title: Re: لا حاو لا هش لا تك لا جر لاعي
Author: aydaroos
Date: 05-06-2012, 07:29 AM
Parent: #24
| Quote: بتعرف الفرطوق يا عيدروس |
يا فرطوق صنقع فوق
شن بي تشوف ..بشوف القوم
قوم منو ...قوم عدلان
يا عدلان سل السيف
ختو لي في الكتيف
الكتيف درا الدم
شالني بنات العم
ختني في الإبريق
الإبريق ملان حجبات
أهرس الشوك بلا نعلات
أنط البير بلا عتبات
بابور كوستي أم رقبة عدت و جات
|
Post: #26
Title: Re: لا حاو لا هش لا تك لا جر لاعي
Author: عبدالله ود البوش
Date: 05-16-2012, 10:08 AM
Parent: #25
Quote: يا فرطوق صنقع فوق
شن بي تشوف ..بشوف القوم
قوم منو ...قوم عدلان
يا عدلان سل السيف
ختو لي في الكتيف
الكتيف درا الدم
شالني بنات العم
ختني في الإبريق
الإبريق ملان حجبات
أهرس الشوك بلا نعلات
أنط البير بلا عتبات
بابور كوستي أم رقبة عدت و جات |
وحولب لب وكم في الخط
وعمي حسبو شتت قصبو
والسنبرية ام قدوم عيش ابوي بقوم متين
وعية عية
وآآآآآآآآه يا وطن
|
Post: #27
Title: Re: لا حاو لا هش لا تك لا جر لاعي
Author: aydaroos
Date: 05-16-2012, 10:27 AM
Parent: #26
يا ود البوش كيف أصبحت و كيف أمسيت
أهلنا الضرائب كتلتهم ... و الجاز و السماد بقو في السماء
خلو الزراعة و النجيض قلب الجروف كماين
و لا هدهد ولا قراشة و لا دنان و لا ود ابرق و لا قمرية
بس دخان علالتو في السماء .. و نار الكماين تولع في قلوبنا
عاد شفع يتربو وسط الطوب، ثقافتهم حا تكون شنو غير الفلِيع
|
Post: #28
Title: Re: لا حاو لا هش لا تك لا جر لاعي
Author: نورالدين بابكر بدري
Date: 05-16-2012, 11:31 AM
Parent: #27
سلام آ ناس هوي
يا ود البوش والله زكرتنا حاجات أصلها ما بتكرر تاني
تعرف زمان كنا بندقق في طابت
بعدبن من أصعب المواقف إنو الحمار يرميك بي دقيقك ويعير
أو تظبك ليك مطرة شعفوفة -- لا تعرف تضاري رقبتك -- ولا تعرف تغتي الدقيق
وبعد تصل كان لقوا الدقيق مبلول إلا تمشي تبيت برا البيت
بعدين في الخريف لما يقولولك أطلع صلح السبلوقة -- والمطره شالة
أو يقولولك دخل القصب ما ينبل --عشان سيادة البهايم ما بياكن القصب المبلول
وانت تدخل يديك عشان تشيل الكلوقة -- كان ختيت العقري -- تظبتك الشوكة في أصبعك
تخيل
لك ودي وإحترامي
|
Post: #32
Title: Re: لا حاو لا هش لا تك لا جر لاعي
Author: عبدالله ود البوش
Date: 05-16-2012, 02:30 PM
Parent: #28
أخونا نورالدين بابكر ود بلدنا الجميل
سلام واشتياق
Quote: تعرف زمان كنا بندقق في طابت
|
والله كنت بخيت وسعيد البدقق في طابت وتاكل الباسطة وتشرب الجوافة وتدلى بالدقاق
مافي داعي اوريك نحن بندقق وين ؟
عليك الله حصلت الحمار عار ورمى الدقيق وظبتك المطرة
اكون دا يوم سجم ورماد
اصلوا ما شفت لي زول شايل ليهو عجين في شوال فوق ضهرو 
.
.
| Quote: كان ختيت العقري -- تظبتك الشوكة في أصبعك |
ولايوجد ما يمنع الاثنين معا
اقوليك حاجة يا نورالدين بابكر علي بابكر ( زنقار ) اظنك بتعرفو
مرة طول لحمارتو عشان ترعى بقيدا
وداير اقعد جنبها مكتيييييف والدنيا خريف شبع روى ومافي حيوان ببيت القوى
جنبو بعر بقر قديم يابس ياخي داك البتلقا تحتو ابو الدرداق ما اظن اسمو كدي نسيتو
عليك الله يا نور الدين كان اذكرتو اكتبو لي
ياخي الحشرات ديك البتقعد تحت بعر البقر وتعمل جحور صغار تقيل فيها
( الله اجازي الكان السبب وابعدنا من بعر بقرنا لمن نسينا التحتو)
وطبعا الحتة التحت البعر دي تكون بااااااردة
قام زنقار دفرا وقعد فيها طق عقرب مراضعة ابو الدرداق لووووووول
في منطقة طريقة القبوها ليهو مافي تنتح قبلا والزم الصبر
|
Post: #30
Title: Re: لا حاو لا هش لا تك لا جر لاعي
Author: موسي الراجل
Date: 05-16-2012, 12:07 PM
Parent: #27
ود البوش سلام
سماحه النضمى وكتين يطروا فوقه المسور وام مساير وتور الشيل القدام الضعينه ساير
نبدا الحديث من وين كل عين السنه سمحات خليها من الرشاش وبكره التريه بتقع وقد الصعيد بجيب الهبوب البارده لكن ريحه الدعاش بقت بارود وام بشار طارت وصعدت ودقشت الصى مغبونه مع الخاترين الما مرادهم الفراق و السعيه الشختوا ليها خت كان اتعدت تبقى خائنه الا الجوع كافر و المحتاج ما عاقل الدباره كيف ؟
حليل الطرفه البكايه وام حريبات البيضا رزيه ام سيدا بقى ركاب زراير للترزيه كل المرحات بقت تويانه رزيه وسيدها كان ماكتلو الوهم ما بمرق من السدريه وكان سلم ياهو الدقش البنادر وتفين بنابر لشاهى فوزيه والحاله البقت كجم وجزريه
مالك آ عبدالله متاور على الوجع حسسه ما بروح الا متناسى ماك مقاسم معاى المقاسى شايل الشينه مع الفاصدين قلبى ومفصلين جبه ود الكمس على مقاسى سوو فى الليلهو وضربوا له راى راى تقول مانى زولهم ولا هم ناسى العمر بالمغايس ناقص و الجليد من العمايل حاسى
|
Post: #36
Title: Re: لا حاو لا هش لا تك لا جر لاعي
Author: عبدالله ود البوش
Date: 05-16-2012, 03:15 PM
Parent: #30
.
.
اوووووو موسى عوافي
العصي التتنين الناشفة والرويانة
الرشاش
لكن آ موسى الرشاش دا فيهو كتمة حارة خلاس
اماتنا بختن توبن فوق نص راسن واهببن ويطلب من الله الهبوب
يا المحبوب تدينا هبوب
وبعدما ما تتسرب الهبيبة
احمدنو واشكرنو
هبوبك ما دوبك
النتدرة نترة اللسد الفيها ام رويق
الجهة جبهة اللسد
الخرصان البقول الحيطة الما بوقعا انا بتصبح
عوي البلقب الخريف صبي
السماك يا سما كفاك ويا وطا امسكي ماك
كلوووووووو رااااااااح يا موسى والله العظيم بكيت كررررررر يا موسى
بجيكن باكر كان الله هون باكر قبل العساكر
|
Post: #31
Title: Re: لا حاو لا هش لا تك لا جر لاعي
Author: عبدالله ود البوش
Date: 05-16-2012, 02:01 PM
Parent: #27
| Quote: عاد شفع يتربو وسط الطوب، ثقافتهم حا تكون شنو غير الفلِيع |
وتكون على نفسها جنت جابنو
.
.
عيدروس سلام يا أخوي وعوافي
انت ما لاحظت ان السنبر خلا الرواكيب من عشرين سنة وتزيد شوية
كل شي راح
لاحاو لا هش لاكر لاجر لاعي
المطر بجي والسنبر بعود
|
Post: #29
Title: Re: لا حاو لا هش لا تك لا جر لاعي
Author: walid taha
Date: 05-16-2012, 12:04 PM
Parent: #4
Quote[QUOTE]: عي دي علا كان يكوسوها في قاموس منير البعلبكي .. |
دقيقة
عي أعتقد تقال للبقرة
اما تك فاللغنماية
حاو للحمار
جر للـ ك ل ب
هش : ماعارفها والله
أرجوان تكون هذه المداخلة قد أثرت البوست :)
تحياتي يا ود البوش
|