Post: #1 Title: عطاء توريد و تشغيل "ضل" كبير... Author: محمد البشرى الخضر Date: 04-21-2012, 09:53 AM Parent: #0
نسبة للإزدياد المفاجئ و المضطرد منذ إعلان تحرير هجليلج لأعداد المحتاجين يمشوا الضل في سودانيز ولأن الضل الحالي لا يكفي لتغطية الحوجة الحالية و المستقبلية, تعلن الهيئة القومية لـ " وديه الضل" عن رغبتها في طرح العطاء التالي :
توريد و تركيب و تنفيذ و صيانة و تشغيل عدد واحد "ضل" كبير - بالمواصفات المذكورة في الملحق
- على المقاولين المؤهلين الراغبين بالتقديم استلام كراسة المواصفات من مقر الهيئة خلال ساعات العمل الرسمية بعد دفع الرسوم (لا ترد) - على المقاول الالتزام بالتاريخ المذكور لتسليم العرض. - الهيئة غير مقيدة بقبول أقل أو أي عطاء آخر .
شروط عامة: 1- على المقاول الراغب في التقديم ابراز شهادة السجل التجاري و شهادة تصنيف المقاولين عند استلام كراسة المواصفات. 2- على المقاول ارفاق تفاصيل مشاريع مشابهة قام بتنفيذها مع العرض. 3- يمكن التقديم لعرض التشغيل فقط شريط الإلتزام بشروط التشغيل الواردة في الملحق 1 - ب .
ملحق 1- أ :التوريد والتركيب و التنفيذ و الصيانة 1- الضل المطلوب يجب ان لا يقل عن سعة 500 مناضل/شريف يوميا. 2- يجب مراعاة أن يكون الضل مقسم لدرجات حسب التصانيف التالية : أ - فئة بانطاو طاو طاو - جنوبية ب - فئة هجليلج gone with the wind ج - فئة انسحبنا بغطاء امريكي د - فئة لسة ما انسحبنا وحاليا نحن لازلنا في هجليج هـ- فئة انسحبنا و اسي ممكن نرجع لو دايرين و - فئة المؤمنين بالفقرا المقاتلين في صفوف جيش السودان.
3- مطلوب انشاء منطقة خاصة بسعة 100 مناضل / شريف يوميا داخل حرم الضل و تخصيصها لناس : وين حلايب وين الفشقة؟ 4- مطلوب انشاء منطقة خاصة بسعة 50 وصيفابي يوميا داخل حرم الضل وتخصيصها لضحايا شبحة بشة 5- مطلوب انشاء منطقة خاصة بسعة واحد بشاشا يوميا تخصص لـ : بشاشا .
ملحق 1 - ب:التشغيل 1- يلتزم المشغل بتوفير الوجبات الثلاث و الشاي و القهوة لنزلاء الضل على مدار الأربعة وعشرين ساعة. 2- يلتزم المشغل بتوفير انترنت بسعة عالية وأجهزة كمبيوتر متوفر بها سكاي بي مع معينات التواصل من اجهزة بصرية وسمعية على مدار الأربعة و عشرين ساعة. 3- يلتزم المشغل بتوفير حبوب اسهال وإمساك و مضادات الإكتئاب على مدار الأربعة وعشرين ساعة. 4- يلتزم المشغل بقياس الضغط ومستوى سكر الدم للنزلاء على مدى الأربعة وعشرين ساعة.
أبو حتوت ع/ الهيئة القومية لـ "وديه الضل" 21-نيسان-2012
Post: #2 Title: Re: عطاء توريد و تشغيل "ضل" كبير... Author: بشير أحمد Date: 04-21-2012, 10:10 AM Parent: #1
ابوحتوت تحياتي؛؛؛
اها المظاريف نشمّعها بالشمع الاحمر ولاّ كيري ساي اي واحد يجدع ورقو؛
بس ما شايف فقرة وفِقرة : الهيعة غير مقيدة بقبول شنو كده اقل او اعلي عطاء!!!
غايتو انا متبرع بالموية الباردة ودي خارج عقد العطاء.
Post: #3 Title: Re: عطاء توريد و تشغيل "ضل" كبير... Author: العوض المسلمي Date: 04-21-2012, 10:20 AM Parent: #1
ابو حتوت طالما وقعت عن اللجنة فاتمني ان تعرض اسمء اللجنة او علي الاقل المكتب التنفيذي وقد علمت مصادر الشمارات ان لجنتكم تتكون من 1- هشام هباني وكوستاري للرئاسة 2- تراجي مقرر عام 3- محمد سليمان للاعلام ولا يوجد امين خزينة لعدم توفر كفاءة في باقي العضوية فهل ما جاء اعلاه صحيحا ؟
Post: #4 Title: Re: عطاء توريد و تشغيل "ضل" كبير... Author: عبدالوهاب علي الحاج Date: 04-21-2012, 10:30 AM Parent: #3
Post: #6 Title: Re: عطاء توريد و تشغيل "ضل" كبير... Author: محمد البشرى الخضر Date: 04-21-2012, 10:38 AM Parent: #4
يا بشير كيف ما كتبتها دي اهم جملة فياي عطاء حكومي , أمال الناس دي تاكل كيف هههههههههههه مشكور على الموية الباردة - محتاجنها والله النزلاء ريقهن ناشف
حاج العوض دا شنو الاسماء الدخلتها اللجنة أمال النزلاء منو طيب ؟
تضحك يا وهبة هههههههههههههههه ايامك
Post: #5 Title: Re: عطاء توريد و تشغيل "ضل" كبير... Author: حمد عبد الغفار عمر Date: 04-21-2012, 10:31 AM Parent: #3
يا محمد
عمك سلفاكير انشبح هسة في قناة العربية وقال ما طلعنا ولا حاجة وبتحدى يجيبوا صور من هجليج لو مغالطنو
أها لو كلامو دا طلع صاح العطاء بتاعك دا من هسة اعتبرو فاشل ولازم تغيرو بواحد تاني لناس الصقرية وهيع وهنا الأمر بطلب منك تغير نوعية المواد والمقاسات لأنو الصقرية دي عايزة ارتفاع اطول وأرضية أصلب للبرتبة ولازم تضيف سيطان عنج
ولو طلع غلط أعمل عطاء تاني مخصص لسلفاكير ودا لازم تراعي فيهو الأبعاد وبالطبع لازم يكون VIP والمقاولين لازم يكونوا تصنيف درجة أولى
Post: #7 Title: Re: عطاء توريد و تشغيل "ضل" كبير... Author: الامين موسى البشاري Date: 04-21-2012, 10:39 AM Parent: #3
Quote: مطلوب انشاء منطقة خاصة بسعة 50 وصيفابي يوميا داخل حرم الضل وتخصيصها لضحايا شبحة بشة
غايتو يا ود البشـــرى في أي محل جايب سيرتنا وبعدين نسيت فقرة وهي:
6. عدد واحد ضل ل 100 صفيرابي من المتضررين من بيضة كلتشي لعمر بخيت
Post: #8 Title: Re: عطاء توريد و تشغيل "ضل" كبير... Author: tmbis Date: 04-21-2012, 10:46 AM Parent: #3
يا معلم .. عليك الله البفضل من العطاء بتاعك دا والمظاريف حقتو ما تجيب حقها .. عليك الله لزوو لي بي غادي. واللا اقوليك حاجة ..؟ عندي عرض اسعار انا ذاتي .. بس اديني صنة
Post: #9 Title: Re: عطاء توريد و تشغيل "ضل" كبير... Author: محمد عبد الماجد الصايم Date: 04-21-2012, 11:09 AM Parent: #8
أنا غايتو داير الأمور المالية في الموضوع دا!! لأنو القصة دي ح تكون (وارررة)!!
Post: #10 Title: Re: عطاء توريد و تشغيل "ضل" كبير... Author: محمد البشرى الخضر Date: 04-21-2012, 11:32 AM Parent: #9
يا حمدنا لو طلع كلام سيلفاكير صاح وناس الحكومة بايعين لينا ماسورة ما مشكلة ح نضيف فئة ناس دخلناها وصقيرها حام وناسم ناتوا مات الضأن وناس عنوة واقتدارا
يا ود البشاري .. بالله في عمود كتبو ابو شيبةبعد الكورة بيومين كتب فيه " لك الله يا عنكبة" عارف بتكلم عن شنو؟ عنكبة دا مهاجم الخرطوم تلاتة اخد انذار بسبب احتفاله مع الجمهور بعد هدف احرزه في مباراة دورية صدف ان تسبب هذا الانذار في ايقافه من كورة فريقه قدام الهلال فأبوشيبة اعتبر الامر امتداد للمؤامرة الأممية ضد المريخ !! تخيّل .. كلو ما اقرا ترهات المريخاب و نظريات مؤامرتن و الإستهداف و بلا بلا بلا ...بجيني احساس انهن مناضلي يكبورد ساي هسي شوف انت فرحان ليك بي بيضة في كورة انت مضروب فيها - مريخابي نموذجي ههههههههههههه
تمبس ياخي قلنا العطاءات لإدارة الضل بقصد توفير خدمة للنزلاء يعني ما ممكن انت تتسيبب في وديهن الضل وجاي تكمل الناقصة كمان
حموودي .. ياخي دي هيئة بتقدم خدمة مجتمعية غير ربحية , يعني الضل و الشاي و السكاي بي و قياس الضغط وحبوب الاسهال بتتقدم للنزيل مجاني
Post: #13 Title: Re: عطاء توريد و تشغيل "ضل" كبير... Author: محمد عبد الماجد الصايم Date: 04-21-2012, 12:13 PM Parent: #10
Quote: ياخي دي هيئة بتقدم خدمة مجتمعية غير ربحية , يعني الضل و الشاي و السكاي بي و قياس الضغط وحبوب الاسهال بتتقدم للنزيل مجاني
عليكم الله عاينو ود البشرى دا! مثال للمواطن السوداني المغيّب والمستلب!!
يا معلم! ومنظمات المجتمع المدني وحقوق الإنسان والطفل وهلمّ جرا؟
_ ( )
Post: #11 Title: Re: عطاء توريد و تشغيل "ضل" كبير... Author: tmbis Date: 04-21-2012, 11:34 AM Parent: #9
Quote: لأنو القصة دي ح تكون (وارررة)!!
والله يا معلم (أورر) من كدا مافي الايامات دي إلا الأغنية بتاعت ( وررا .. وراا ورااا ) إلخ .. ياخ شدت ما واره .. اساسي بقى محلل عسكري .. ومراسل ميداني .. وجلال نعمــان البعاتي أو أي كان اسمـه .. بيفتي في خروج مرتزقة الحركة من هجليج.
Post: #12 Title: Re: عطاء توريد و تشغيل "ضل" كبير... Author: حافظ انقابو Date: 04-21-2012, 11:49 AM Parent: #11
شكيت محنك يا ود البشرى أها الضل دا بخلص متين؟؟؟ أنا قاعد في السهلة خلصو لينا الموضوع دا سريع وأبعد محمد الصايم من الامور المالية لأنو ذي المتعافي
ضروري تحجرز لي محل بين تمبس وبشاشة وأبو حسين بالا نجليزي ما دايرنو في الضل دا
Post: #14 Title: Re: عطاء توريد و تشغيل "ضل" كبير... Author: العوض المسلمي Date: 04-21-2012, 12:23 PM Parent: #12
الفكرة يا ودالبشري انه ناس الضل ديل كونوا لجنتهم من المذكورين اعلاه لترتيب شئونهم الداخلية:)
Post: #15 Title: Re: عطاء توريد و تشغيل "ضل" كبير... Author: محمد البشرى الخضر Date: 04-21-2012, 05:10 PM Parent: #14
حموودي مصر تتلايق ما تفهمها بقى الأمور المالية محجوزة ياخ ههههههههههه
اوووو انقابو الأمنجي مقرر اجتماع الشنو كدا ياخ والله كامل تضامني معاك خلاص انت عمدت امنجي في البورد تاني ما بتتحل من اللقب دا باخوي واخوك
هههههههههه ايوة كدا معقولة يا العوض يا عمك, المذكورين كبار النزلاء فأكيد الإختيار لن يتخطاهم للجنة التنفيذية واضيف ليهن جادات و برقو كمان
Post: #16 Title: Re: عطاء توريد و تشغيل "ضل" كبير... Author: محمد البشرى الخضر Date: 04-22-2012, 06:47 PM Parent: #15
