سؤال لخريجي مدرسة حنتوب الثانوية

For cats and dogs

ـ

?????????????????????

ألا تتذكرون هذه العبارة ؟

طيلة فترة دراستي بمدرسة حنتوب في منتصف الثمانينات ـ كانت وجبتي الفطور والعشاء المقدمة لطلاب المدرسة وجميعهم يقيمون بالداخليات حسب النظام المعمول به بالمدرسة منذ إنشائها ، يقدم فيها حليب مع مأكولات أخرى

ولكن الملفت للنظر أن الغالبية العظمى من الطلاب كانوا يمتنعون عن شرب هذا الحليب ـ وظل عمال السفرة في كل يوم يعدون الحليب ويعبون صحون الألمونيوم المتوسطة الحجم ـ وولكن معظمه يترك في مكانه

بينما يقوم بعض الطلاب يدلقه على الترابيز

ليت سؤالي قد وضح لكم الأن

ود البصير سلام يا زول
في زمنا كان ناس دقنة يطلق عليهم الكدايس
لكن الكـــلاب ديل بكونوا جو بعدنا
هاك الهدية دي
يا ناس حنتوب 79 الى 1982 شوفو الصورة وورونا الناس ديل وين

ايوااااااا اذكرت الان صاح يقال في ذاك الزمان
ان هذا الحليب البودرة مكتوب على شوالو
for cats and dogs
عشان كدا ناس داخلية دقنة سموهم الكدايس كونهم يشربون هذا الحليب
.
.
ونحن ناس ضيف الله اهل العوض كنا بنلغفوا لغف لكن ما سمونا كدايس عشان الفينا مكفينا

Quote: ود البصير سلام يا زول في زمنا كان ناس دقنة يطلق عليهم الكدايس لكن الكـــلاب ديل بكونوا جو بعدنا هاك الهدية دي يا ناس حنتوب 79 الى 1982 شوفو الصورة وورونا الناس ديل وين

ود البوش ـ كيفك يا حبيب وكيف أهلنا في العتامنة

قبل ما أفتح الرابط بتاعك خليني أرد ليك


يا أخوي أنا من ناس دقنة ـ الكدايس هم ناس كيلك ـ نسيت ولا شنو

دقنة كانت دخلية الحناكيش رقم (2) بعد المك نمر

الظاهر يا ود البوش الميموري بتاعتك عاوزة فرمتة أو تركيب كارد ميموري جديدة بسعة أكبر

Quote: ايوااااااا اذكرت الان صاح يقال في ذاك الزمان ان هذا الحليب البودرة مكتوب على شوالو for cats and dogs عشان كدا ناس داخلية دقنة سموهم الكدايس كونهم يشربون هذا الحليب . . ونحن ناس ضيف الله اهل العوض كنا بنلغفوا لغف لكن ما سمونا كدايس عشان الفينا مكفينا

يا ود البوش ـ طيلة فترة دراستي كان عدد قليل جداً من الطلبة يشربون ذلك الحليب ـ والسبب الأول في تقديري هو أن الحليب كان طعمه غير مستساغ ، و رائحته منفرة جداً
السبب الثاني كانت هناك إشاعة متداولة وسط الطلاب على نطاق واسع أن هذا الحليب تقدمه منظمات دولية للسودان (حينما كان عضواً فاعلاً في المجتمع الدولي ويحظى بإحترام دولي واسع) ولكنه مخصص للقطط والكلاب

كما يزعمون أنه معبأة في جولات تحمل عبارة :

For cats and dogs

وهذا الموضوع هو مادة البوست ـ

ولي عودة

Quote: عشان كدا ناس داخلية دقنة سموهم الكدايس كونهم يشربون هذا الحليب .

الاقتباس اعلاه يا ود البوش به نوع من تحريف لحقائق تاريخية ثابتة لجميع من درس في حنتوب علي مر السنين ، فمنذ ان وطئت أقدامنا هذه المدرسة العريقة وجدنا ان من يطلقون عليهم عبارة (بس) هم طلاب داخلية كيلك وليس دقنة حيث كان الهتاف الشهير في السفرة او اثناء مباريات كاس الداخليات هو (كيلك بس ودقنة البص).
أرجو تصحيحي ان كنت مخطئا،،أو تصحيح تلك المعلومة في مداخلتك ان كان المخطئ انت.
علي العموم فان ما قيل بهذا الشان لا يعدو في كونه مداعبات جرت بين طلاب الداخليات ولا أساس له من الصحة.
مع شكري وتقديري

Quote: الاقتباس اعلاه يا ود البوش به نوع من تحريف لحقائق تاريخية ثابتة لجميع من درس في حنتوب علي مر السنين ، فمنذ ان وطئت أقدامنا هذه المدرسة العريقة وجدنا ان من يطلقون عليهم عبارة (بس) هم طلاب داخلية كيلك وليس دقنة حيث كان الهتاف الشهير في السفرة او اثناء مباريات كاس الداخليات هو (كيلك بس ودقنة البص). أرجو تصحيحي ان كنت مخطئا،،أو تصحيح تلك المعلومة في مداخلتك ان كان المخطئ انت. علي العموم فان ما قيل بهذا الشان لا يعدو في كونه مداعبات جرت بين طلاب الداخليات ولا أساس له من الصحة. مع شكري وتقديري

كلامك سليم بنسبة 100% أخي أبوبكر ـ وننتظر منك المزيد

أخونا ابوبكر قسومة
سلام وتحية

Quote: الاقتباس اعلاه يا ود البوش به نوع من تحريف لحقائق تاريخية ثابتة لجميع من درس في حنتوب علي مر السنين

يا قسومة ذكرتني المقولة البتقول( ما معناها ) عشان كمان برضو ما تقول لي غلت
يختلف السنة والشيعة في فرائض وسنن الوضؤ حتى جاء المستعمر وسرق الابريق
اين حنتوب الان ؟
اين خورطقت ؟
اين واين
.
.
.
.
.
.
كلامكم صاح كيلك الكدايس ودقنة البص وضيف الله الوطاويط
وادروب شيوعي
ياليت الغلتات زي غلتي دي وحنتوب لم تسرق

For dogs and little horses
كنا بنسميهو كدة بس بيطلع منو احسن زبادي في الدنيا
تجيب الصحن الالومنيوم قطر 20 سم وتملاهو حليب وتحلب فيهو ليمونة وتختو تحت السرير
واهم شي تغطيهو كويس وتحت فوق الغطاء طوبة عشان هوام الليل
تاني يوم الصباح تلقاهو زي الجروف لما يرجع منها الفيضان مع فارق اللون طبعا
الله على الزبادي بتاعو تقول لي المراعي ونادك وهلم جرا

Quote: For dogs and little horses كنا بنسميهو كدة بس بيطلع منو احسن زبادي في الدنيا تجيب الصحن الالومنيوم قطر 20 سم وتملاهو حليب وتحلب فيهو ليمونة وتختو تحت السرير واهم شي تغطيهو كويس وتحت فوق الغطاء طوبة عشان هوام الليل تاني يوم الصباح تلقاهو زي الجروف لما يرجع منها الفيضان مع فارق اللون طبعا الله على الزبادي بتاعو تقول لي المراعي ونادك وهلم جرا

مهندس محمد إبراهيم علي ـ لك تحية الود

طيب يا خ ليه ما روجتا للإكتشاف الرهيب دا ـ كان ثواب بس دخلناك الجنة

الجوع الدخل فينا من داخليات حنتوب (المنفى) لليوم لما اتذكروا أجوع

شكرا ليك انت ياخوي ود البصير،،،، بالمناسبة كل الأغذيةالتي كانت تقدم كوجبات لطلاب الداخليات في ذلك الوقت كانت تأتي من المعونات الخارجية مثل الفول والفاصوليا والعدس وحتي علب الساردين الذي كان يقدم في أيام الأحد والأربعاء -ان لم تخني الذاكرة- كان من بين تلك المعونات.
أما عبارة (For Cats &Dogs ) دي عمرو ما في حد شافا ولا قراها في الشوالات بتاعت لبن البودرة دي.
فاذا كان ده صحيح برضو شوالات الفول والعدس مفروض يكون مكتوب عليها(For Horses & Donkeys)

طيب نشوف ذاكرتكم مازالت بخير ام لا ؟
فى داخليه تسمى اسرائيل من هى ؟ ولماذا سميت بذلك؟

Quote: For dogs and little horses

Quote: For cats and dogs

اتفقوا عشان نحدد نوعنا
قال ميرري قال
بالله خليهم اتنين ممري وواحد فلاش






كل ما في الموضوع دعابات زي ما قال قسومة
لكن خلينا نرجع لموضوع الحليب الكارثة دا وناخد حقنا باثر رجعي

عنجة الدابي وجماع الدروة


دقنة كان فيها زول لعاب ياخ عادل حبشي

ويا سلام علي احسن ثيردباك في العالم مضر

ويا سلام علي العضة في الصفرة

وعمك المقلي


وحنتوب الجميلة بهديك تحياتي

عنجة الدابي وجماع الدروة


دقنة كان فيها زول لعاب ياخ عادل حبشي

ويا سلام علي احسن ثيردباك في العالم مضر

ويا سلام علي العضة في الصفرة

وعمك المقلي


وحنتوب الجميلة بهديك تحياتي

البصير ما سلمنا عليك ياخ


http://youtu.be/lmPNqZFJtGY

تحياتي صديق عيسى

Quote: فى داخليه تسمى اسرائيل من هى ؟ ولماذا سميت بذلك؟

طبعا اسرائيل هو الاسم الذي تعرف به داخلية دينار
وسميت بذلك لانها تبع الداخليات الغربية في التقسيم اللوائحي للمدرسة
وموقعها الجغرافي في وسط الداخليات الشرقية
لمن لم يدرس في حنتوب
الداخليات العشر مقسمة الى قسمين شرقية وغربية (5 و5)
الشرقية هي : المك نمر (الدايات) - الزبير (السفرة) ودقنة البص وكليك (الكدايس) وجماع (المنفى)
الغربية: عدلان (كلية المعلمات) - ضيف الله (الوطاويط) - عنجة (الدابي) النجومي (....) ودينار (اسرائيل)

قبل الشروع في الرد على مداخلات الإخوة (الحنتوباب) ( دي كيف يا ود البوش) ـ أود الرجوع لموضوع البوست :

فرغم مرور السنوات وتعاقب مراحل العمر ـ ظل الفضول ينازعني لمعرفة حقيقة ـ ما مدى صحة ما كان يشاع حول الحليب المشبوه بداخليات حنتوب

هل فعلاً أن ذلك الحليب صالح للإستعمال الأدمي ؟
ولكن طعمه ورائحته ينفيان ذلك
ولو كان فعلاً يصلح للإستعمال البشري ـ إلا أن الغالبية العظمى من الطلاب لا يرغبون في شربه ـ فلم تمادت إدارة المدرسة في تقديمه وهم يعلمون تمام العلم حقيقة عدم إستعماله وهذا يؤكد فرضية (الملح)

ولو تأكد صحة ما كان رائجاً وسط الطلاب أن ذلك الحليب (For cats and dogs)
فلم تصر الإدارت المتعاقبة على تقديم حليب مخصص للحيوانات لطلاب مدرسة ذات خصوصية وطلابها هم الأميز على نطاق السودان
ونضع في إعتبارنا أن حنتوب حتى ذلك الوقت كان منارة أكاديمية مرموقة تحظى بإهتمام الدولة وتجد رعاية خاصة من أرفع المسئولين
يضاف لذلك أن بعض طلاب المدرسة كانو من أبناء (الزوات) وأبناء معلمي ومديري المدرسة ـ وأذكر أن جاري بالفصل (أولى طارق) كان إبن وكيل المدرسية ـ المرحوم أسامة عباس الطيب ود الوكيل

يا ود البصير كان كدي انت ماك دفعتي عديل كدة،،، وجاري في الفصل(غاندي)
وفي الداخلية كمان ،،معقول أكون ما عرفتك؟بس حكاية منتصف الثمانينات دي
بالغت فوكا ،،،هي قبيل المنتصف بي شوية كده.
انت نسيت انو كان في لجنة طعام تشكل من عدد عشرة طلاب من كل داخلية ومهمتها
الاشراف علي نوعيةالأغذية التي كانت تقدم للطلاب ولا شنو؟

Quote: شكرا ليك انت ياخوي ود البصير،،،، بالمناسبة كل الأغذيةالتي كانت تقدم كوجبات لطلاب الداخليات في ذلك الوقت كانت تأتي من المعونات الخارجية مثل الفول والفاصوليا والعدس وحتي علب الساردين الذي كان يقدم في أيام الأحد والأربعاء -ان لم تخني الذاكرة- كان من بين تلك المعونات. أما عبارة (For Cats &Dogs ) دي عمرو ما في حد شافا ولا قراها في الشوالات بتاعت لبن البودرة دي. فاذا كان ده صحيح برضو شوالات الفول والعدس مفروض يكون مكتوب عليها(For Horses & Donkeys)

الأخ أبوبكر ـ لك تحية زمالة حنتوب

فعلاً في قرارة نفسي ينتابني شعور بعدم وجود جولات حليب تكتب عليها عبارة ( For cats and dogs ) وتقدم للطلاب ـ ولكن ما يدعو للريبة هو طعم ورائحة ذلك الحليب ـ وعجزنا عن إستعماله طيلة فترة الدراسة

Quote: ولكن ما يدعو للريبة هو طعم ورائحة ذلك الحليب ـ وعجزنا عن إستعماله طيلة فترة الدراسة

ظروف التخزين الغير سليم مع العوامل الطبيعيةهي السبب الرئيسي وراء تغير طعم ورائحة لبن البودرة
(ما تخاف كان شربت ليك منو جغيمة جغيمتين.... الحبة دي ما بتجيك).
بالجمبة كده..
في سفرتكم كنت بتطالب بانو تفتو الوجبات ولا كنتو بتاكلو غاموس؟

ود البصير يا دفعة

بهديك تحيات وبهديك أشواقي (حنتوب الجميلة)

التحيات النديات لك وللزملاء الأكارم ...

شجن وأي شجن يحمله هذا البوست الجميل ...

الحليب المفترى عليه بالمناسبة هو من أجود أنواع الحليب ... كان يعد تحت إشراف منظمات الأمم المتحدة ...

برنامج الغذاء العالمي تقريباً (وورلد فوود بروغرام) ... وأظن أن الرائحة التي كانت تفوح منه سببها

أن به إضافات تجعله أكثر تغذية وفائدة ... علمها من علمها (ناس كيلك) وجهلها من جهلها ...


تحياتي ولنا عودة ...

Quote: طيب نشوف ذاكرتكم مازالت بخير ام لا ؟ فى داخليه تسمى اسرائيل من هى ؟ ولماذا سميت بذلك؟

الأخ صديق لك تحية الود

والله الحقبة دي ما واكبناها ـ

بالنسبة لي ـ أول مرة أسمع في داخلية إسمها إسرائيل

بعد الأخ محمد إبراهيم أفاد أنها دينار ـ ياريت تورينا سر التسمية وفي أي عهد تم ذلك ـ ومن أطلق الإسم

ود البصير آخوي إنت اليومين ديل مالك ...

أخونا محمد إبراهيم كلامو واضح ...

قال ليك دينار سميت إسرائيل لأنها داخلية غربية لكنها موجودة ضمن الداخليات الشرقية

الكلام ده ما واضح يا ودالبصير ....؟؟؟

الأحباب الأشقاأبناء حنتوب الجميلة

حنتوب ليست مدرسة ،حنتوب وطن كل من ينتمي إلية وارتحل عنه ينازعة الشوق إليه ما بقي الدهرُ

لم تترك فيني أي مدرسة أو حتى جامعة الخرطوم صدى كالذي نحتته حنتوب في نفسي، أكاد

أبكي كلما مرت بمخيلتي ذكريات حنتوب.

حنتوب وصفها الشاعر الفذ أشرف محمد أحمد البشير (سقى الله أيامه)

حين قال:

فإن الحاءَ منك لهم حنان

والنون نور زائد اللمعان

والتاء تبرٌ في التراب معفرُ

والواو واها للزمان الفاني

والباء بدرُ ضاء في غسق الدجى

فأنار يا حنتوب كل مكانِ

وبالمناسبة هذا الرجل كتب قصيدته العصماء من تقريبا ستين بيتا وهو طالب

في الصف الأول وهو كان صديق شخصي لشخصي.

ومنها:

أعزّ الله دينار الرجال

وأورثها قيادات الجمال

سعت للمجد يوم يفرُ منه

رجالٌ فوق سادات الرجال

رؤساءها من جدِهم جعلوا لها

تلك الثريا أقرب الآمال

وقد ارتّقت حتى السماء لأنها

قد سيّرت بأوامر القدال*


----

واصلوا واتحفونا بذكريات حنتوب

سرقة المنقة من الجناين

الكسر(بكسر السين)

رمال حنتوب بعد إنحسار النيل

جوافة المشتل

المناكفات أمام أبواب السفرة

مسابقة المسرح
كرة القدم
السلة
الطائرة




__________
القدال كان هو الأستاذ المقيم

Quote: يا ود البصير كان كدي انت ماك دفعتي عديل كدة،،، وجاري في الفصل(غاندي) وفي الداخلية كمان ،،معقول أكون ما عرفتك؟بس حكاية منتصف الثمانينات دي بالغت فوكا ،،،هي قبيل المنتصف بي شوية كده. انت نسيت انو كان في لجنة طعام تشكل من عدد عشرة طلاب من كل داخلية ومهمتها الاشراف علي نوعيةالأغذية التي كانت تقدم للطلاب ولا شنو؟

الأخ أبوبكر ـ تحية الزمالة والزمن الجميل

حتماً الأقامة في داخلية واحدة يعمق الزمالة أكثر ـ بالنسبة لمنصف الثمانينات ـ أنا أرخت من نهاية الدراسة وليس بدايتها
داخلية دقنة كانت ممتعة ـ وكنا سعيدين بيها شديد لقربها من الفصول ، ومن السفرة نوعاً ما ـ وذاك الوقت كان الهاوماستر هو أستاذ حسن بتاع التاريخ ـ من أمدرمان ـ أشتهر بتشجيع نادي الزهرة
أما المشرف فكان أستاذ الأحمدي بتاع رياضيات مثلثات ـ أما رئيس الداخلية فكان سامي إبراهيم بشير (الحصاحيصا) ـ في العنبر (سرور تقريباً ) كان معانا ناس شلة الهزل العجيبة ناس أمين ضيف الله (أم درمان) محمد كمال عجوة (مدني) تاي الله وناصر (الحداد) أب ضنب (المناقل)
معتصم شمبانزي ( التبيب النافعاب) ـ وكان هشام العاقب وشقيقه جلال العاقب ـ ياسر أحمد صالح (فداسي ح) محمد زين العابدين (فداسي ح) محمد سيف الدولة (المدينة عرب) عصام وقريبه صلاح (فداسي العامراب) ياسر الزين ( الجنيد) ـ والقائمة تطول

لكن أنت أنا بديت أتذكرك ـ وهيئتك تقريباً في مخيلتي الأن

Quote: عنجة الدابي وجماع الدروة دقنة كان فيها زول لعاب ياخ عادل حبشي ويا سلام علي احسن ثيردباك في العالم مضر ويا سلام علي العضة في الصفرة وعمك المقلي وحنتوب الجميلة بهديك تحياتي

خلي ـ اهلاً بيك بالله سيد بلد ـ وحنتوبي كمان ـ شرفت البوست

الزول الكان لعاب هو عادل الحبشي ود الحصاحيصا ـ نجم دقنة المميز ولاعب منتخب المدرسة وحافظ مأمون (بورتبيل) كان أيضاً من أبرز لاعبي دقنة ـ وعصام باسطة (المسعودية) ـ وعبد الفادر عباس (العيكورة)

مضر تقريباً كان في الزبير ـ وكان في لاعب مميز برضو في الزبير تقريباً إسمو أبو السرة

يا لها من أيام

Quote: ود البصير يا دفعة بهديك تحيات وبهديك أشواقي (حنتوب الجميلة) التحيات النديات لك وللزملاء الأكارم ... شجن وأي شجن يحمله هذا البوست الجميل ... الحليب المفترى عليه بالمناسبة هو من أجود أنواع الحليب ... كان يعد تحت إشراف منظمات الأمم المتحدة ... برنامج الغذاء العالمي تقريباً (وورلد فوود بروغرام) ... وأظن أن الرائحة التي كانت تفوح منه سببها أن به إضافات تجعله أكثر تغذية وفائدة ... علمها من علمها (ناس كيلك) وجهلها من جهلها ... تحياتي ولنا عودة ...

أهلاً شاعربنا الرقيق عبد الباقي الجيلي

وأتاكم أبو الجيلي بالقول الفصل ـ

(علمها من علمها ، وجهلها من جهلها ) ـ حلوة شديدة العبارة

قلت لي الجماعة كنا مطلعنهم كداييس ـ لكن طلعونا نحن (فارات)

لكن بيني وبينك الحليب كان منفر

لليوم أنا لما أتذكرو أشعر بالغثيان

طبعا نحن آخر دفعة دخلت حنتوب
اللبن ده اصلا لقينا الكدسة كملتو
كان في فول فاصوليا فول وبالعكس
علي زمنها دينار كان اسمهم كلاب الصفرة
نحن غايتو كنا وطاويط والله زي ود البوش ده

هلا بالحلوين

عايز اشغل الذاكرة لو سمحت يا البصير واذكر بعض الناس في الداخليات


في عنجة كان عندنا ناس ظريفين

الهجا الاصفر والهجا المشلخ (T) وعندنا المشاي واللولاح وعادل الجاك وعندنا عمر الشريف العب زول كان

وعندنا عوض وادي شعير ثيردباك قاطع

الداخلية كانت برئاسة استاذ احمد بابكر ومقيم معانا استاذ محمد الشيخ من الجديد الثورة


جيرانا ناس نجومي

بعرف هاشم نكير وعمر قاسم والمغيرة يوسف

وعبدالباقي الجيلي كان صاحبي لكن بكون نساني

(يا عبدالباقي شعرك لسع لونو احمر )

في ضيف الله بعرف ابو دجانة وخالد السيمت افتكر

في عدلان عمر ميجر ويوسف فداسي وعثمان عبد الخالق وعبدالحي الكاملين

في المك نمر بعرف يوسف عروة واشرف وامجد ورستم وديدي

الزبير كان اصحابي كتار الجمعيعابي وسنادة وعادل عبدالجليل والرجوبة وطارق بخيت

من كلامكم ده كلكم بعد الكبري

منو بيتذكر الرفاس وعم محمد محمود الصول

هرمنا

في جماع

علي كمينة ومجدي عمو وعزالدين اكشن وعبدالمنعم مصطفي

في دينار نزار عبدالرحيم وعبدالاله نور الدائم ومحمد احمد القريقريب

في كيلك ناس مضر واحمد بقبقة وخالد موتر

وفي دقنة ناس امين ضيف الله

وكان الاخوة من جنوب السودان

كوزموس وديفيد

Quote: الأخ صديق لك تحية الود والله الحقبة دي ما واكبناها ـ بالنسبة لي ـ أول مرة أسمع في داخلية إسمها إسرائيل بعد الأخ محمد إبراهيم أفاد أنها دينار ـ ياريت تورينا سر التسمية وفي أي عهد تم ذلك ـ ومن أطلق الإسم

فعلا اجابة محمد ابراهيم صاح ميه الميه
طبعا دينار هى داخليتى 91/92/93

Quote: الأحباب الأشقاأبناء حنتوب الجميلة حنتوب ليست مدرسة ،حنتوب وطن كل من ينتمي إلية وارتحل عنه ينازعة الشوق إليه ما بقي الدهرُ لم تترك فيني أي مدرسة أو حتى جامعة الخرطوم صدى كالذي نحتته حنتوب في نفسي، أكاد أبكي كلما مرت بمخيلتي ذكريات حنتوب. حنتوب وصفها الشاعر الفذ أشرف محمد أحمد البشير (سقى الله أيامه) حين قال: فإن الحاءَ منك لهم حنان والنون نور زائد اللمعان والتاء تبرٌ في التراب معفرُ والواو واها للزمان الفاني والباء بدرُ ضاء في غسق الدجى فأنار يا حنتوب كل مكانِ وبالمناسبة هذا الرجل كتب قصيدته العصماء من تقريبا ستين بيتا وهو طالب في الصف الأول وهو كان صديق شخصي لشخصي. ومنها: أعزّ الله دينار الرجال وأورثها قيادات الجمال سعت للمجد يوم يفرُ منه رجالٌ فوق سادات الرجال رؤساءها من جدِهم جعلوا لها تلك الثريا أقرب الآمال وقد ارتّقت حتى السماء لأنها قد سيّرت بأوامر القدال* ---- واصلوا واتحفونا بذكريات حنتوب سرقة المنقة من الجناين الكسر(بكسر السين) رمال حنتوب بعد إنحسار النيل جوافة المشتل المناكفات أمام أبواب السفرة مسابقة المسرح كرة القدم السلة الطائرة __________ القدال كان هو الأستاذ المقيم

الأخ فيصل أهلاً بك في رحاب حنتوب الجميلة