معشر السودانيين في امريكا..هل لازم تكونوا عملاء؟

الأخوة بني كجة كما يحلو لتاج الملك أن يسميكم
ارجو أن يتطوع بعضكم و يكتب تجربته الامريكية في هذا البوست خصوصا فيما يتصل بالاجابة على هذه الاسئلة:
- هل تم الربط بأي شكل من الاشكال بين منحك تأشيرة دخول للولايات المتحدة و بين ضرورة أن تتبنى مواقف سياسية معينة؟
- هل تم الاشتراط عليك بتأييد السياسة الامريكية تأييدا مطلقا قبل منحك أي مساعدة حكومية من أي نوع؟
- هل صادفك اثناء اقامتك في الولايات المتحدة أن هناك سودانيون مطلوب منهم معارضة حكومة الانقاذ مقابل اموال تدفعها لهم الحكومة الامريكية؟
- هل هنالك أي جهة في الولايات المتحدة تقوم بمتابعة نشاطك السياسي -القانوني- و تقوم بسؤالك عن مواقفك او تملي عليك مواقفا معينة؟
- هل هناك شئ اسمه "ولفير" في الولايات المتحدة بحيث يجلس الواحد بدون عمل آكلا شاربا معارضا طيلة حياته؟

اعتقد أن الاجابة على هذه الأسئلة مهم و ضروري لمواجهة الأساطير المؤسسة التي تروج في هذا المنبر
عن طبيعة الوجود السوداني في امريكا -و غيرها من المهاجر- و عن مصداقية مواقف الناس هناك مع او ضد المواقف الامريكية
او مع أو ضد النظام القائم في السودان، و عن الاتهامات بالعمالة أو التكسب من مواقف بعينها!

اسئلة عجيبة
ما حصل وطوال عقد كامل عشته هنا
ان تم ما تساءلت عنه
المناسبة شنو لكل هذه الاسئلة ؟
تحياتى وسلامى ولو عندك تلفون رسلو فى الخاص

Quote: الأخوة بني كجة كما يحلو لتاج الملك أن يسميكم ارجو أن يتطوع بعضكم و يكتب تجربته الامريكية في هذا البوست خصوصا فيما يتصل بالاجابة على هذه الاسئلة: - هل تم الربط بأي شكل من الاشكال بين منحك تأشيرة دخول للولايات المتحدة و بين ضرورة أن تتبنى مواقف سياسية معينة؟ - هل تم الاشتراط عليك بتأييد السياسة الامريكية تأييدا مطلقا قبل منحك أي مساعدة حكومية من أي نوع؟ - هل صادفك اثناء اقامتك في الولايات المتحدة أن هناك سودانيون مطلوب منهم معارضة حكومة الانقاذ مقابل اموال تدفعها لهم الحكومة الامريكية؟ - هل هنالك أي جهة في الولايات المتحدة تقوم بمتابعة نشاطك السياسي -القانوني- و تقوم بسؤالك عن مواقفك او تملي عليك مواقفا معينة؟ - هل هناك شئ اسمه "ولفير" في الولايات المتحدة بحيث يجلس الواحد بدون عمل آكلا شاربا معارضا طيلة حياته؟

المحترم سيف
انتا جادي في الاسئلة
لاكن اجيك من الاخر ولا حا تلقي اجابه

الأخت سلمى و الأخ محمد

Quote: اعتقد أن الاجابة على هذه الأسئلة مهم و ضروري لمواجهة الأساطير المؤسسة التي تروج في هذا المنبر عن طبيعة الوجود السوداني في امريكا -و غيرها من المهاجر- و عن مصداقية مواقف الناس هناك مع او ضد المواقف الامريكية او مع أو ضد النظام القائم في السودان، و عن الاتهامات بالعمالة أو التكسب من مواقف بعينها!

Quote: الأخوة بني كجة كما يحلو لتاج الملك أن يسميكم ارجو أن يتطوع بعضكم و يكتب تجربته الامريكية في هذا البوست خصوصا فيما يتصل بالاجابة على هذه الاسئلة: - هل تم الربط بأي شكل من الاشكال بين منحك تأشيرة دخول للولايات المتحدة و بين ضرورة أن تتبنى مواقف سياسية معينة؟ - هل تم الاشتراط عليك بتأييد السياسة الامريكية تأييدا مطلقا قبل منحك أي مساعدة حكومية من أي نوع؟ - هل صادفك اثناء اقامتك في الولايات المتحدة أن هناك سودانيون مطلوب منهم معارضة حكومة الانقاذ مقابل اموال تدفعها لهم الحكومة الامريكية؟ - هل هنالك أي جهة في الولايات المتحدة تقوم بمتابعة نشاطك السياسي -القانوني- و تقوم بسؤالك عن مواقفك او تملي عليك مواقفا معينة؟ - هل هناك شئ اسمه "ولفير" في الولايات المتحدة بحيث يجلس الواحد بدون عمل آكلا شاربا معارضا طيلة حياته؟

قطعا الاجابة لا
ولكن
للاسف الكثيرين يتصرفون وكانه ردا للجميل
جنى

سلام يا دكتور.. القدامك دا أنتقدت السياسة الامريكية فى هذا المنبر وانا فى طريقى للسفارة للتاشيرة، واحدين هنا دا قالوا لى اقنع وخليك قبلك!!! بل حديث حاد بالإيميل اثناء المراسلات،
وفى المقابلة كان كل الترحيب وأخذت الاقامة والتاشيرة. الامريكان يعرفون المطبلين ولا يحترمونهم.

Quote: قطعا الاجابة لا ولكن للاسف الكثيرين يتصرفون وكانه ردا للجميل

سلامات يا جني
افترض أنو اجابتك الأولى بما انها اجابة قاطعة لا تدع معنى للجزء الثاني.
الا يمكن مثلا أن يكون الشخص مقتنعا فعلا بالمواقف الامريكية تجاه قضايا معينة و دفاعه عنها يتأسس على قناعته تلك؟
فلماذا افتراض المجاملة او النفاق في مثل هذه المواقف؟

Quote: سلام يا دكتور.. القدامك دا أنتقدت السياسة الامريكية فى هذا المنبر وانا فى طريقى للسفارة للتاشيرة، واحدين هنا دا قالوا لى اقنع وخليك قبلك!!! بل حديث حاد بالإيميل اثناء المراسلات، وفى المقابلة كان كل الترحيب وأخذت الاقامة والتاشيرة. الامريكان يعرفون المطبلين ولا يحترمونهم.

سلامات يا ابو الريش
كلامك ده كلام "نجيض" و يوضح أن ما يقال عن أن السودانيين في امريكا ينافقون في مواقفهم خوفا و طمعا هو كلام
لا أساس له من الصحة و بعيد تماما عن الحقيقة.

الأخ سيف.

سلام وتحية.

أنا أدري جيدا سبب فتحك لهذا البوست. وهو كرد عل بعض الأكاذيب والمعلومات المضللة التي يتم نشرها هنا عن أمريكا وعن السودانين الأمريكان.

يا عزيزي سيف في أمريكا مافيها حاجة أصلا أسمها عميل أو أن تكون عميلا بمفهوم بعض أصحاب الغرض والمرض هنا. العملاء في أمريكا هم الذين يخدمون مصالح دول أجنبية أمام الحكومة الأمريكية بفرعيها التنفيذي والتشريعي. وهذه مهنة معروفة في أمريكا ويتم التسجيل لها في وزارة العدل الأمريكية بطريقة قانونية. ومعظم دول العالم لديهم مكاتب عملاء أمريكان يعملون لهم بصفة رسمية (لوبي) لكي يدافعون على مصالح بلادهم. وحتى مجرمي الحكومة السودانية هم أيضا لديهم مكتب محاماة يدافع على مصالحهم الأجرامية لدى الحكومة الأمريكية.

أما وصف الأمريكان من أصول سودانية بأنهم عملاء لأنهم قد ألتحقو بالقوات المسلحة الأمريكية أو بالعمل في الحكومة الأمريكية أو منظماتها وشركاتها المختلفة فذلك سخف وحقد من بعض الجهلاء، ولا أعتقد بأنه قد لا يستحق أن تفتح له بوست.
وللأسف الشديد هنالك بعض السودانين الأمريكان الحاصلين على الجنسية الامريكية وحالفين قسم على ذلك مثل غيرهم. نجدهم هنا هم من يساعدون على ترويج مثل هذه المعلومات المغلوطة. وذلك أنا أعتبره قمة النفاق.

Quote: أما وصف الأمريكان من أصول سودانية بأنهم عملاء لأنهم قد ألتحقو بالقوات المسلحة الأمريكية أو بالعمل في الحكومة الأمريكية أو منظماتها وشركاتها المختلفة فذلك سخف وحقد من بعض الجهلاء، ولا أعتقد بأنه قد لا يستحق أن تفتح له بوست.

سلامات يا دينق
اتهامات البعض هنا تتخطى من يعمل في الحكومة الامريكية او منظماتها -و هو أمر مشروع بالمناسبة بما أن الشخص المقصود هو مواطن كامل الأهلية-
اقول أنها تتخطى ذلك لتشمل كل المقيمين على الاراضي الامريكية و الاجنبية بوجه عام و تدمغهم بتهم العمالة و الاسترزاق و البحث عن "الويلفير"
و ما إلى ذلك. هنا يجب على الناس أن يتصدوا لمثل هذا الكلام و يفندوه من واقع تجربتهم الحياتية في المهجر.

Quote: الا يمكن مثلا أن يكون الشخص مقتنعا فعلا بالمواقف الامريكية تجاه قضايا معينة و دفاعه عنها يتأسس على قناعته تلك؟ فلماذا افتراض المجاملة او النفاق في مثل هذه المواقف؟

انا قلت البعض يا دكتور
ازدواجية المعايير عند الامريكان والكيل بمكيالين والبراجماتيةحيث تكون مصلحة امريكا وافتراض ان كل سياسات امريكا هى صجيحة وتصب فى مصلحة السودان
لمن تلقى واحد يسبح بحمد امريكا عمال على بطال تقول شنو!
انا شخصيا جنى احترم الشعب الامريكى
ولكن ارى الادارة الامريكية هى الشر المحض وانها عندما تدعم الديمقراطيات فى دول وتدعم الديكتاتوريات فى دول اخرى فان دافعها هو مصلحة امريكا فقط
انظر الى دعمها للبشير تحت الطاولة وتهديده فوق الطاولة!
انظر الى تصريح كلنتون بان البشير يقوض جوبا وسنضغط عليه شخصيا وتصريح الكونجرس بانهم قد صبروا كثيرا على البشير!
وانظر الى سرعة استجابة البشير وتغيير موقفه فى ملفات اساسية مثل المواطنة وترسيم الحدود والله يعلم ماذا سيتم فى جوبا بشان ابيي والنفط!
هذا ضرب مثل لسلوك امريكا خلال اسبوع وياتي كثيرون ليدافعوا عنه وكانه قران !
يا ابو الريش اين انتقاداتك لامريكا وكم عددها امريكا تعرف كيف تتفاعل مع سودانيزاونلاين!
تخيل بقال قدم لتاشيرة فى 2009 حيدوها لى بسرعة فلاش الكامير!
لو بقال بظهر اسمه فى تسريبات ويكليكس
امريكا ايضا يجب ان تستمع لاراء الكثيرين ومنهم جنى لان اى اتفاقية توقع غبنا على الشمال فانها لن تصمد مستقبلا لانها تمت تحت ضغوط امريكية غلى حاكم واقع تحت الابتزاز الامريكي!
جنى

سلام يا دكتور سيف
كلام جني و أبو الريش دا ما ترميه الواطة. متأكد إنه كتير من النصحوا أبو الريش و زعلوا من انتقاده للسياسة الأمريكية هم ناس مقيمون في أمريكا. هؤلاء لم يطلب منهم أحد أو يحاول إيهامهم بأن وجودهم في أمريكا يقتضي عدم نقد سياساتها لكن هذا هو فهمهم . يعني الحكاية مش حكاية إنهم عندهم قناعات معينة لكن المشكلة في كونهم ملكيين أكثر من الملك و لا يرضون بكلمة في أمريكا. مشكلتنا يا دكتور سيف أو في الحقيقة مشكلة بعضنا الظن بأن الانتقال إلى أرض جديدة سواءً كانت أمريكا أو غيرها يعني أن نخلع بعض المفاهيم و نلقي بها وراءنا. مرة واحد كلفني أن أتصل بقريب له هنا لأنه يحتاج منه بعض المستندات اتصلت بالرجل و حيرني رده عندما قال لي (والله الموضوع دا أنا ماشي فيه لكن براك عارف ناس دول العالم التالت ديل بفهموا الأمور كيف) فهذا الرجل خلع رداءه السوداني و لبس رداء الكنديين جاهلا أنه لا يمكن أن يقول كندي (أصلي!) مثل كلامه هذا. و مثله زميل لنا بالمنبر عاش في السعودية زمنا ثم هاجر إلى إحدى دول الغرب و طفق في هذا المنبر يعاير رفاق غربته في السعودية بالعمل مع الكفلاء و أكل الكبسة و العيش في دولة كالسعودية.

السيد سيف أرجو أن تكون كتابتك ،هذه ، دعابة لبعض أصحابك .

Quote: كلام جني و أبو الريش دا ما ترميه الواطة. متأكد إنه كتير من النصحوا أبو الريش و زعلوا من انتقاده للسياسة الأمريكية هم ناس مقيمون في أمريكا.

العوض سلامات
اعتقد أن من نصح ابو الريش فعل ذلك بحسن نية حتى لا تتعطل اجراءت منح التأشيرة، و لا أعتقد أنهم لا يفهمون مدى الحرية
الموجودة فعلا على أرض الواقع لكن لسان حالهم يقول فليؤجل ابو الريش معاركه تلك حتى يضمن التأشيرة ثم بعد داك يرش رشو.
تغير بعض الناس و عن(.........)تهم الفارغة موجود فعلا للأسف و اتفق معك في ما قلته.

السيد متوكل الحسين
هي فعلا كما قلت فطلع نفسك منها يا مان.

يا دوكـ .. إنت لسع مكتوب بقلم الرصاص ياخ!!

يا دكتور سيف

سلامات

المشكلة وكل المشكلة أنو فى أمريكتين

واحدة خيالية ما موجودة إلا فى أوهام بعض الناس بغض النظر عن مستواهم التعليمى أو وجودهم الجغرافى...

وأمريكا تانية ياها الواحدة المعروفة وما معروفة دى...

لو الناس كلهم ،خصوصا اللى بيفكوا الخط ،أتعاملوا بعد ما يبذلوا مجهود شوية ويعرفوا الحقيقية ما كان حيكون فى سوء فهم وبالتالى أسئلتك دى ما كان حا تخطر ببالك..

لكن طالما فى ناس مستفيدين من القصة الخيالية وهناك دول ومؤسسات وأفراد بيرسخوا ليها يبقى ما حتلقى أجابة لأنو مافى أصلا...

بالمناسبة يا دكتور هنا ذاتو حتلاحظ أنو فى ناس عايشين وماكلين خير الحقيقية وبتعاملوا بفهم الخيالية قولا وتصرفا وحتما حيلاقوك ،دا لو ما لاقوك already...

تحياتى
سيف مصطفى

Quote: كلام جني و أبو الريش دا ما ترميه الواطة. متأكد إنه كتير من النصحوا أبو الريش و زعلوا من انتقاده للسياسة الأمريكية هم ناس مقيمون في أمريكا.

الأخ العوض.

أنا شخصيا لم يصادفني اي مهاجر الى أمريكا أو أي أمريكي يؤيد قرارات الحكومة الأمريكية بطريقة مطلقة أو مية المية.
كما قال الأخ سيف مصطفى. هنالك فهم خاطئ وبطريقة متعمدة وغير متعمدة لأمريكا من البعض.

سلامات يا سيف و ماك طيب
في ظني عشان البوست يستعدل و يمشي لي اهدافو حقو نتفق علي مفردة " عميل " و ما المقصود بها !!

Quote: معنى عميل في قاموس المعاني. قاموس عربي عربي عميل . جمع : عملاء .: 1 - من يعامله الإنسان في التجارة وغيرها. 2 - وكيل التاجر أو الشركة في المناطق أو البلاد. 3 - جاسوس أو خادم لدولة أجنبية في بلده. المعجم: الرائد عَميل: جمع عُمَلاء: 1 - مَن يُعامل غيره في شأن من الشئون كالتِّجارة وغيرها "عميل دائم للشَّركة، - عميل متجر". 2 - جاسوس يعمل لصالح دولة أجنبيَّة "عميل استخبارات/ الاستعمار" • عميل سِرِّيّ: شخص يُعهَد إليه بجمع معلومات سريّة تتعلّق بدولة أجنبيّة. • عميل مُزدَوَج: جاسوس يعمل في وقت واحد لحساب دولتين عدوّتين. المعجم: اللغة العربية المعاصر عميل - عَمِيلٌ: جمع: عُمَلاَءُ، عَمِيلاَتٌ. [ع م ل]. (صِيغَةُ فَعِيل). 1."هُوَ أَحَدُ عُمَلاَئِي فِي التِّجَارَةِ" : مَنْ أَتَعَامَلُ مَعَهُ وَيُعَامِلُنِي فِي التِّجَارَةِ. 2."اِتَّخَذَهُ عَمِيلاً تِجَارِيّاً فِي الْخَارِجِ" : وَكِيلُ التَّاجِرِ فِي مِنْطَقَةٍ مَّا. 3."عَمِيلٌ فِي المُخَابَرَاتِ" : شَخْصٌ يَشْتَغِلُ لِجِهَةٍ مُعَيَّنَةٍ أَوْ يَتَجَسَّسُ لِفَائِدَةِ دَوْلَةٍ أَجْنَبِيَّةٍ. المعجم: الغني عَمِيلُ: العَمِيلُ : من يعامل غيرَه في شأْن من الشئون. والجمع : عُمَلاَءُ. المعجم: المعجم الوسيط

و هاك دي مساهمتي معاك في النقاش:
الاجابة العاطفية علي سؤالك لا طبعا . لكن اذا تفكرنا و تدبرنا قليلا سنجد ان دول العالم جميعا لا تشترط علي الوافدين اليها ان يصبحوا عملاء الا وفق تقديرات تخص تلك الدول و تدخل في نطاق سيادتها علي اراضيها و تصوراتها عن كيفية حمايتها . يعني موش امريكا بس، كل دول العالم لديها سياستها الامنيه اللي بالضروره ممكن تخليها تشترط علي بعض الوافدين اليها شروط من ضمنها التعاون معها امنيا. احكي ليك حاجة انا عاصرتها، في بيت الاشباح بتاع الخرطوم وسط الشهير و في عام 1993 ، كان معتقلين معانا شاب فلسطيني و شاب اخر جزائري حكو لي فيما حكوا و نحن في الزنزانة انو طلبوا منهم التعاون كشرط اقامة و امان . الفلسطيني كان تاجر اسماك " صيد بالسفن" و الجزائري كان متطرف اسلامي هارب من عدالة الجيش الجزائري بعد ان استولي علي السلطة و بطش بالاسلاميين. اذن التعاون " العمالة" لصالح دولة اخري امر طبيعي في سياسات دول العالم و يقع تحت بند امن البلد و تقوم به استخباراتها . فطالما حكومة الانقاذ العفينة دي اللسه ما بتعرف الف باء سياسة بتطلب من الاجئين اليها انهم يتعاونوا معها كشرط لحمايتهم بغرض جمع معلومات عن دولهم يبقي طبيعي و منطقي و شرعي انو امريكا تجند من تراه مناسبا للقيام بالعمالة لها وفق تقديراتها و هذا شآن خاص بها . " اذا حبيت بتلقي في في دراسات القانون الدولي و العلوم السياسية و حتي في طويل العمر قوقول ملايين التآكيدات لكلامي ده " ، يجب في تقديري انو نتعامل مع السياسة بعقلنا لا بعواطفنا .






ــــــــــــــــ
بالنسبة لاسئلتك لن تجد عليها اجابات لانها اسئلة "خاصة جدا " . يعني بالعربي مستحيل يكون في زول بقوم بالدور ده " عميل " و يجي يقول ليك ايوه انا اشترطوا علي و انا وافقت او رفضت.

Quote: يا دوكـ .. إنت لسع مكتوب بقلم الرصاص ياخ!!

ههه.. والله يا ود الصايم دكتورنا ده مكتوب بقلم كوبيا في البلد دي وإنت
ما عارف. أي صحيح شكلها كتابة بقلم رصاص.. ألع كدي نقط ليك شوية موية وشوف؟

خدر.. تعرف من جيت البلد دي نفسي ألاقي لي زولاً شغال في السي أي إييه دي..
أي زول، كان كان مولود في البلد دي.. ولا كان كان وافد ليها..
صحيح القانون بيحمي هوياتهم.. بس الناس ديل مدسوسين وين ما عارف؟!

أربعة سنوات شغال جوة مطار كيندي.. أشوف مرات ناس قيافة جنب الطيارات من غير
بطاقات هوية.. أها تسألهم يقولوا ليك شغالين في وزارة الخارجية..

مرة جابو واحد في السي إن إن إسمه بيير كتب كتاب عنهم وقال إنو كان شغال
معاهم.. أها مشيت إشتريت الكتاب داك.. فهل تصدق لقيتو مفلتر ومحزوفة منه
فقرات وجمل وأسماء لناس وأماكن.. عرفتا طوالي الناس ديل جد ما بيلعبوا.










__________

ســلامات يا دكتور، ووينك؟ شكلو الجماعة وصلولك!
قديماً قِيل: "هبشك الما ضراك!"

Quote: خدر.. تعرف من جيت البلد دي نفسي ألاقي لي زولاً شغال في السي أي إييه دي.. أي زول، كان كان مولود في البلد دي.. ولا كان كان وافد ليها.. صحيح القانون بيحمي هوياتهم.. بس الناس ديل مدسوسين وين ما عارف؟! أربعة سنوات شغال جوة مطار كيندي.. أشوف مرات ناس قيافة جنب الطيارات من غير بطاقات هوية.. أها تسألهم يقولوا ليك شغالين في وزارة الخارجية..

هههههههههههههههههههههههههههههههههههههه
انت بي صحك يا خليفة ؟ سي اي ايه مره واحده ؟
ياخ نحن يادوب في مرحلة بعضنا يتجسسوا علي مواطنيهم و ينقلوا اخبارهم و نشاطاتهم للسلطات و يقشروا بالقصة دي لاصحابهم القريبين :)
ديل العملاء البتكلم عنهم البوست .

Quote: مرة جابو واحد في السي إن إن إسمه بيير كتب كتاب عنهم وقال إنو كان شغال معاهم.. أها مشيت إشتريت الكتاب داك.. فهل تصدق لقيتو مفلتر ومحزوفة منه فقرات وجمل وأسماء لناس وأماكن.. عرفتا طوالي الناس ديل جد ما بيلعبوا.

يا خليفة بصراحة السودانيين في امريكا او في كل المهاجر حسب ملاحظتي بسبب سفري الكتير مضيعيين حقهم ساي بسبب سماعهم لي نوع كلامك بتاع " عرفتا طوالي الناس ديل جد ما بلعبوا " و ده لانو نحن كشعب جديدين في الهجرة و بالتالي لسه ما منتبهين جيدا لحقوقنا قدر ما نحن واعيين لواجباتنا . طبيعي انو اي مواطن مخلص لبلدو انو ما يلعب في شغلو و برضو طبيعي انو القضايا البتمس اي دولة لازم تكون محل اعتبار للجهات المختصة لكني للاسف لاحظت عندكم انو في حفنة من الاغبياء عاملين ارهاب لكثيرين بي جملتك اعلاه دي .. عارف يا محمد يسن خليفة انا خدر ده مقتنع جدا انو اي اتهام في الدنيا لاي شخص ، لحظة حسمو ما هي لحظة الاتهام ، لحظة حسمو الحقيقية هي لحظة التحقيق في الاتهام . امريكا دولة حريات و حقوق فيما يخص المواطن ، يعني بالسوداني " السوداني المقيم في امريكا حقوقو محفوظة بالقانون و المحاميين و جلسات المحاكم و القضاء النزيهين زيو و زي اي مهاجر اخر او مواطن امريكي اخر . لكن نوع كلامك ده " عرفتا طوالي الناس ديل جد ما بيلعبوا " و جمل اخري كتيره مهمتها الاساسية ارهاب الاخرين بقوي خفية تبطش بكل سوداني يعترض علي الخطاء و الارهاب و الابتزاز البتمارسوا جماعات تستتر خلف الجمل دي . المضحك انو الجمله دي بتم توظيفها في اي شي ، شكلة في دكان - عربية اوراقها ناقصة - طلاق .. الخ الخ :)

اذن يا محمد " الناس ديل جد ما بيلعبوا " فيما يخص من يستخدم الجملة دي لانتهاك حقوق اخرين بقطع رزقهم او تهديدهم حتي ولو بشكل غير مباشر او بالتنويه " بمناسبة او بدون مناسبة " بشغلو في جهاز امريكي حساس . اتمني انو البوست يمشي في الاتجاه ده يا سيف .. . اتجاه نقاش حقوق المهاجرين و كيفية حفاظهم علي حقوقهم عشان الصراع مع العميل البتجسس عليهم و بمارس عليهم ارهاب يكون متكافئ .

سلآمات يا قريبي،
ومرحب بيك في جارتنا بت حارتنا أمريكا.

أها يا السيف، ناس كندا دآخلين في الموضوع دا ولا إنت
ما قاصد امريكا الشمالية. أكان دآخلين قولنا عووووك.

العوض يا صديق.
خبرك ؟؟؟
إن شاء الله تبقى طيّب والوليدات ؟؟؟

يا أخوي ما تصبر لآمن يدوك تأشيرة. مالك جاي
داخل توووووش بلآ تابلت ؟؟؟



يا ود الصايم، أنا شاحد الله الكريم
القاك مكتوب بقلم الرصاص، وضارب
ولفير، وقاعد ترد علي مزآررة
سيف النصر دي...

Quote: يا دوكـ .. إنت لسع مكتوب بقلم الرصاص ياخ!!

عاد يا ود الصايم قلم الرصاص ده نتفك منو متين؟؟
في السعودية قلم رصاص و هنا قلم رصاص و في السودان ظااااطو قلم رصاص
رقم وطني و للا شنو داك ما عندنا فتأمل.

Quote: بالمناسبة يا دكتور هنا ذاتو حتلاحظ أنو فى ناس عايشين وماكلين خير الحقيقية وبتعاملوا بفهم الخيالية قولا وتصرفا وحتما حيلاقوك ،دا لو ما لاقوك already...

لاقوني يا ابو السيوف و استغربت جدا لناس عايشين في بلد و معلوماتهم عنها من الجزيرة الفضائية بل و مرات من الفضائية السودانية
عديل كده. لكن افتكر أنو لو الزول سأل نفسو أسئلتي الفوق ديك و جاوب عليها ممكن يغير مفاهيم كتيرة مغلوطة.

الأخ سيف النصر محي الدين

تشكر على البوست الهام
وقد كنت افترعت بوستا ذا علاقة ولكن واجهتني لعدم استكماله مشكلتان
الاولى مشغوليات الدنيا مع ضعف في التايبنق
الثانية وهذه مشكلة تلازمني مع معظم بوستاتي وهي انني لست بكاتب شباك في المنبر
ربما ما اكتبه لايستهوي الاعضاء
او ربما لعدم قدرتي على خلق شلة في المنبر بحكم ابتعادي القسري المستمر
والمشكلة هي انني اجد صعوبة في البحث عن البوست لاضافة مداخلات
ولضيق الوقت يصيبني الملل من البحث
وينزل البوست للقاع
اتمنى ان يظل هذا البوست في الصفحة الاولى
وللفائدة اليك الرابط

آكلي الويلفير

وتشكر

Quote: . اذن التعاون " العمالة" لصالح دولة اخري امر طبيعي في سياسات دول العالم و يقع تحت بند امن البلد و تقوم به استخباراتها . فطالما حكومة الانقاذ العفينة دي اللسه ما بتعرف الف باء سياسة بتطلب من الاجئين اليها انهم يتعاونوا معها كشرط لحمايتهم بغرض جمع معلومات عن دولهم يبقي طبيعي و منطقي و شرعي انو امريكا تجند من تراه مناسبا للقيام بالعمالة لها وفق تقديراتها و هذا شآن خاص بها . " اذا حبيت بتلقي في في دراسات القانون الدولي و العلوم السياسية و حتي في طويل العمر قوقول ملايين التآكيدات لكلامي ده " ، يجب في تقديري انو نتعامل مع السياسة بعقلنا لا بعواطفنا .

سلامات يا مولانا خدر
كلامك فيهو افكار تدعو فعلا للتأمل و اعادة النظر. و بناء عليهو اقول من المؤكد أن هناك تجنيد و تجنيد مضاد يتم من كل الاطراف
و لكن فكرتي الأساسية هنا هي أن ما يردده البعض هنا و في اجهزة اعلام النظام السوداني عن التجنيد بالجملة و رفع اصبع الاتهام
في وجه كل المقيمين في الغرب عموما و امريكا على وجه الخصوص بقبض ثمن ما يقومون على أساسه بالعمالة-العمالة وفق التعريف الكيزاني و ليس وفقا للمعاجم- و المعارضة
مدفوعة الثمن هو كلام يمكن ضحده بكل بساطة بعرض تجارب المهاجرين و اللاجئين و التي ستثبت أن معارضتهم -إن وجدت- هي مسألة تتعلق
بقناعاتهم الشخصية و لا علاقة لها بخدمات تقدم لهم و لا ويلفير و لا يحزنون.

Quote: و لكن فكرتي الأساسية هنا هي أن ما يردده البعض هنا و في اجهزة اعلام النظام السوداني عن التجنيد بالجملة و رفع اصبع الاتهام في وجه كل المقيمين في الغرب عموما و امريكا على وجه الخصوص بقبض ثمن ما يقومون على أساسه بالعمالة-العمالة وفق التعريف الكيزاني و ليس وفقا للمعاجم- و المعارضة مدفوعة الثمن هو كلام يمكن ضحده بكل بساطة بعرض تجارب المهاجرين و اللاجئين و التي ستثبت أن معارضتهم -إن وجدت- هي مسألة تتعلق بقناعاتهم الشخصية و لا علاقة لها بخدمات تقدم لهم و لا ويلفير و لا يحزنون.

سلامات يا سيف و شوق و تعازي حاره في رحيل المعلم ..
هرطقات الاسلامويين سواء علي شاشات الاعلام السوداني او علي الشبكة العنكبوتية اصبحت من المسليات للسودانيين ، السودانيين يا سيف هاجروا لي اسرائيل نفسها رغما عن انف الجملة الشهيره في الجواز السوداني " كل الاقطار عدا اسرئيل" . الناس الهاجرت لي اسرائيل دي هاجرت هربا من القتل المنظم و الشعب السوداني شعب ذكي و فاهم انو كل الاكليشيهات دي محض استهبال و تشوبه لصوره الاخر المختلف مع النظام السوداني او الهارب من القتل . ما اعتقد انو نحن كمعارضة مطالبين اننا نقدم ابراء ذمة من العمالة للشعب السوداني لمجرد انو الحكومة قالت اننا عملاء ، في ظني انو نحن يجب انو نمشي لي قدام و نعرف المهاجرين بحقوقهم عشان نقطع الطريق قدام البستغلوا جهل المهاجرين بالقوانيين " انت سميتهم بسمعوا الاخبار من الجزيرة " و تبصيرهم بحقوقهم و واجباتهم و تحويلهم لمواطنين فاعلين في المجتمع الامريكي .

خدر ســلامات والبركة فيكم مجدداً وفي الوطن!

يا أخي أنا إتكلمتا عن جهاز واحد ومحدد من 40 جهاز أمني في البلد دي، والأسمو "سي. أي. إييه." وده أشهر جهاز في العالم.. وأنا أديتك مثل لواحد منهم لأول مرة يكتب كتاب في بلد الحريات والكتب دي! الكتاب وحزوفة منه فقرات وجمل، ومخفية منو (مسودة) أسماء لأماكن وأشخاص بأمر الرقيب بتاع الجهاز ده. هل بتعرف ده معناتو شنو؟ وبالذات في بلد أي زول مسموح ليهو يكتب وينشر بكامل الحرية؟ وكلام ذي ده طبعاً ممكن نسمعه في دول تصادر الحريات.. بس ما في أمريكا.

ده يا سيدي العنيتو بأنهم ما بيلعبوا!

أيام بوش واحد من كبار المستشارين سرب إسم واحدة شغاله في الجهاز ده.. تعرف قبضوا عليهو وسحبوا الكليرنس بتاعو ودخلوهو السجن لغاية ما بوش عفى عنه في آخر يوم من رئاسته بعفو رئاسي مخجل. والباس دي فعلاً ما بيلعبوا وما بيفرطوا في تأمين روحهم. وصدقني لامن أقول ليك يدهم واصلة!

أما لو بتتكلم عن ناس تانين، فده أمر آخر. ولو في زول شغال بيرعب في الناس أو بيتفاخر بالعمالة مع أي جهاز أمني بقصد إرهابي أو حتى بالهظار... فده مخالف للقانون ولو سمعتا زول عمل كده، وعندك دليل ضده، فممكن تقاضيه في أقرب محكمة أو تتصل بأقرب سفارة أو قنصلية أمريكية.

أنا ضد شغل المخبرين الرخـيص ده، رغم أهميته، ولكني بكون سعيد لامن أشوف أولادنا وبناتنا ذي ما بقوا دكاترة ومحامين ومكنيكية.. بسعد أكتر لامن ألاقيهم ضباط شرطة وجيش وأمن ومخابرات وطيارين ورواد فضاء. وهم فعلاً كذلك، وحا تلقاهم ماسكين مناصب حساسة في ناسا وفي الشرطة الفدرالية والولائية والجيش. وبصراحة أنا ما شفتا واحد شغال في الأمن أو المخابرات العامة لغاية حسع... الله يكفينا شرهم!

بالمناسبة الحاجة دي حاصلة في كل دول العالم وأكيد هولندا ما حا تشذ منهم.. ولا شنو؟




________________

معانا لسع.. ولا إتخارجتا لبلدكم؟

الاجابة لك الاسئلة لا ..

لكن موضو الولفير دى كفالة إجتماعية بتتوفر للسودانين وغير السودانيين وليها شروط فى الحصول عليها

بعض الولايات لو إنت ما امريكى(ميلاد او مجنس ) ما بيدوك ليها او مقيم فى البلد لفترة زمنية محددة ...

كثير من السودانيين كانو بيرفضو أخذهالانو بعتبروها ذى الصدقة (مسألة كرامة) رغم إنه ده حق قانونى

لايشترط فيها توافر الحاجات الاستفسرته عنها..

مثلا الزول الجاى لوترى ما مسموح ليهو ياخد (البنفتس) ليه لانو بكون جايي (إسبونصر) او كفيل

مشش زى كفالة السعودية ..يعنى ده قريبك او معارفك تعهد قبل اخذك للفيزا بانه متكفل بمستلزماتك (لحين)

الجاي لجوء ممكن يكون عندى كفيل شخص او منظمة ..وغالبا بتكون منظمة وهى البتدفع ليك منصرفاتك

لحدى ما تقيف على حيلك ..كل الكلام ده موضوع مساعدة إنسانية ..والدول البتدعى حق اللجوء وإعادة

التوطين وقعت على معاهدة دولية والتزام بالكلام ده..

لكن السؤال نحن بلدانا دى حكوماتها محتاجة لعمالة ..ماهى الحكومة ذاتة العميلة (نسيت صلاح غوش)!!!!

يعنى انا لو بقيت ليهم عميل بكون أفيد ليهم من أبو الصلح!!!!!!!!!!!!!!!!


مافى سؤال قابلنى بتعلق بالسياسة لما أخذت اللجوء او إعادة التوطين ..إلا واح من ضمن الاسئلة البيدوك ليها

مكتوبة ..عندك علاقة مع الشيوعية..غايتو أنا كنت صريح معاهم

Quote: الأخوة بني كجة كما يحلو لتاج الملك أن يسميكم ارجو أن يتطوع بعضكم و يكتب تجربته الامريكية في هذا البوست خصوصا فيما يتصل بالاجابة على هذه الاسئلة: - هل تم الربط بأي شكل من الاشكال بين منحك تأشيرة دخول للولايات المتحدة و بين ضرورة أن تتبنى مواقف سياسية معينة؟ - هل تم الاشتراط عليك بتأييد السياسة الامريكية تأييدا مطلقا قبل منحك أي مساعدة حكومية من أي نوع؟ - هل صادفك اثناء اقامتك في الولايات المتحدة أن هناك سودانيون مطلوب منهم معارضة حكومة الانقاذ مقابل اموال تدفعها لهم الحكومة الامريكية؟ - هل هنالك أي جهة في الولايات المتحدة تقوم بمتابعة نشاطك السياسي -القانوني- و تقوم بسؤالك عن مواقفك او تملي عليك مواقفا معينة؟ - هل هناك شئ اسمه "ولفير" في الولايات المتحدة بحيث يجلس الواحد بدون عمل آكلا شاربا معارضا طيلة حياته؟

لا - لا - لا - لا - لا - لا - لا - لا - لا - لا

Quote: أها يا السيف، ناس كندا دآخلين في الموضوع دا ولا إنت ما قاصد امريكا الشمالية. أكان دآخلين قولنا عووووك.

افو يا ود المدير كيفن ما داخلين..داخلين بمزاج كمان. براك شايف الاتهامات لاحقاهم.

سلامات يا دكتور

Quote: - هل تم الربط بأي شكل من الاشكال بين منحك تأشيرة دخول للولايات المتحدة و بين ضرورة أن تتبنى مواقف سياسية معينة؟

في حالة اعادة التوطين واللجوء السياسي يجب ان تكتب مبررات كافية تثبت ان حياتك في وطنك الاصلي في خطر
وتقوم بكتابة كيس عادة تكون قصة تقطع نياط القلب وبها كثير من الاكاذيب حيث الغالبية اتت لاسباب اقتصادية ولكن حولت لاسباب سياسية

في اثناء ذكر هذه الكيس تكون قد كذبت عن وطنك وما يحدث فيه ( راجع فلم ترمنال عشان تشوف الفرق بين السودانين والناس البتحب وطنها)
حتى تحل مشاكلك الشخصية ومرقت وطنك في السهلة وف نا اسععاملين مناضلين خرجوا من بداية الثماينات ومن سمعو بقصة اعادة التوطين
مشو القاهرة . موضوع اعادة التوطين دا عايز ينفتح عن دور الاحزاب والرسائل التي كانت تكتب حتى ينال المعارف والاحبة اللجوء.
ودا واحد من ا حقر الادوار الذي لعبته المعارضة في حق الوطن..

Quote: - هل تم الاشتراط عليك بتأييد السياسة الامريكية تأييدا مطلقا قبل منحك أي مساعدة حكومية من أي نوع؟

دا سؤال تركي جدا
اطعم الفم تستحي العين حزنت مرة لما واحد من دارفور قال انه العرب ديل ظلمة جدا ونحنا حنحارب العرب مع اسرائيل
النوعية دي قاعدة كميات في امريكا .. المشكلة الناس متطوعة تمرق بلدها الام في السهلة ما محتاجة اصلا انه يسألوها
اسع امشي اكتب انك تايد القاعدة ولا ترى ان ما يفعلونه ارهاب وحتلقى نفسك في بلدك.ز

Quote: - هل صادفك اثناء اقامتك في الولايات المتحدة أن هناك سودانيون مطلوب منهم معارضة حكومة الانقاذ مقابل اموال تدفعها لهم الحكومة الامريكية؟

في ناس بتعمل حاجات كثيرة جدا عشان القروش وبتيبع ضميرها ودا في اي شعب موجود والبنو كجة دي ما استثناء
في ناس بعملو على التصنت على المكالمات ويترجموها مقابل قروش وفي ناس شغالة مع الجيش الامريكي وفي ناس بتعلم الجيش الامريكي اللغة العربية
مقابل قروش..وفي ناس بتكتب بحث وتقارير عشان تشتغل في منظمات مقابل قروش.. وفي ناس بغشو الامركيان الطير مثل من اعطو معلومة
مصنع الشفاء الموضوع كلو بقروشو وسؤالك المفرض يكون هل هناك ما يتعاطى مقابل خدماته التي ضد دينه وطنه اموال؟؟
وفي ظاهرة الانفورمارز والسودانين ناشطين جدا فيها خاصة المنظمات حقت حقوق الا نسان,,

Quote: هل هناك شئ اسمه "ولفير" في الولايات المتحدة بحيث يجلس الواحد بدون عمل آكلا شاربا معارضا طيلة حياته؟

بالحيل وفي ناس بتحايلو على الولفير دا وعلى التامين الصحي وفي ناس بسجلو في عدة ولايات ياخدو ولفير وفي ناس من مشو امريكا دي ما اشتغلو يوم واحد في حياتهم
وقاعدين على ضرائب الشعب الامريكي البشتغل بهمة ويترفع عن الولفير .في مليون حيلة وحيلة فيا لسستم بتخليك تعيش بس على الولفير..

Quote: وفي ناس بسجلو في عدة ولايات ياخدو ولفير

يوم بتصحي الصباح تلقي قام ليك ضنب
من كترة الكضب

لاحولتن ولا قوة الا بالله
مداخللتك دي كلها كضب
لكن حا امسك ليك الكوت دا واقول ليك
يابيان الكضابة
السودانيين عرفناك بتكرهيهم وصرحت بي كدا في الرسالة الشهيرة
طيب إحترمي عقول الامريكان (لي هسة ماعملوا )
ياست الفهم والراي حكاية الولفير دي معمولة في الكمبيوتر
وزي ماعارفة في حاجة اسمها نت ويرك وتبادل معلومات ومصالح
وناس الويلفير عندهم نتويرك ونظام انذار مع وزارة الهوملاند سيكيوريتي
و وزارة العمل
ووزارة المالية
والضرائب
والسوشيال سيكيوريتي
وفي حاجة في امريكا اسمها الرقم القومي كل زول عندو واحد براهو
عشان كدا لما تقدمي للولفير بيسالوك من الرقم القومي ويختوهو في السيستيم
وبعد تلاتة يوم بتجي كل المعلومات
هل كانت شغال؟ ووين؟ ولغاية متين؟ وعناوينك السكنتها في السبعة سنين الاخيرة ؟وعدد اطفالك وابهاتهم؟ ووين ساكنين؟ وهل كنت قبل كدا في السيستيم ؟ولا قدمت للسيستم في اي ولاية؟ وهل دخلت السجن ؟وباي تهمة؟ كوووولو بيظهر
تحسبي لعب؟
فيا كضابة مافي زول بيقدر يستفيد من الوليفير في اكتر من ولاية

_______
راوية
خبرة ويلفير ستة سنوات
ومستفيدة من البرامج البتقدمها الولايات المتحدة لمواطنيها والسكان بطريقة شرعية
والحمدلله
وقود بلس اميريكا

Quote: في ناس بعملو على التصنت على المكالمات ويترجموها مقابل قروش وفي ناس شغالة مع الجيش الامريكي وفي ناس بتعلم الجيش الامريكي اللغة العربية

هاك زيادة الدليب دا يا راوية ... الشيخة قالت ليك فى ناس بعملو على التصنت على المكالمات و يترجموها غغغغغغغ الخ... قادر الله

يادكتور سيف بحكم إقامتي في أمريكا12سنة وعملي لمدة ست سنوات في المساعدات العامة او الويلفير
ومامررت به كتجربة شخصية خلال مرض والدتي ممكن أفيدك في حكاية الويلفير
وظيفتي كان إسمهاIncome maintenance caseworker
وبإذن الله حاتكلم بتفصيل عن برنامج الويلفير
لكن الان خليني اوضح حاجة عن حالة والدتي
والدتي وعلى حسب وضعها الصحي إحتاجت لعمل سبعة عمليات وإعادة تأهيل -تكلفة العمليات والاقامة في المستشفيات واماكن اعادة التأهيل لمدة سبعة أشهربالتقدير حوالي 250الف دولار-
تم عمل كل العمليات ومنذ اول يوم من غير حتى وجود تأمين صحي لها
وبعد شهر تم عمل تأمين صحي شامل
يدفع بالكامل كل تكاليف علاجها بأثر رجعي
والان وبعد سنة وستة شهور
لازالت أمي تنعم بكل فوائد التأمين الصحي
ومن ضمنها
سيدة تحضر الساعة التاسعة صباحا لتهتم بكل امور والدتي من نظافة وغسل ملابس ونظافة المكان والطبخ ومرافقتها لمواعيد الدكتور والنزهة
لتخرج من المنزل الساعة السادسة مساء
لاندفع مليم لهذه السيدة ولاندفع مليم لكل الادوات والمواد المستعملة للنضافة التي تصل شهريا بالبريد المستعجل بالاضافة لكل المواد التي تساعد على قياس الدم , تصلنا وللمنزل ودون عناء شركة قامت بإحضار وتركيب السرير الخاص بالمستشفيات وزودتنا بكل الادوات التي يحتاجها مريض لا يستطيع الحركة وبالطبع الكرسي المتحرك وصيانته الدورية ضمن الخدمة
وهناك ممرضة تقوم بالزيارة والتقييم وشركة ترسل عربة مواصلات مجهزة يوم زيارة الطبيب . وكل أول شهر تتصل بنا الصيدلية للحضور وإستلام الحصة الشهرية من الدواء الذي تستعمله والدتي بصورة يومية وللمعلومية والدتي تتلقى معاش شهري مخصص لكبار السن الذين ليس لهم تاريخ عمل SSI ومؤهلة لبرنامج دفع الايجار بالكامل (لم نقدم له ولم نتلقاه للان)

تحية....عزيزنا دكتور سيف...مشتاقين...


الاسئلة المشار اليها تستطيع عبر تجربتك الذاتية الوقوف عليها...اي من يري ليس كمن يسمع...

الانشغال بالشان السياسي في تقديري يكون خصما علي مدي الاستفادة من معطيات مجتمع متقدم بكل المقاييس...الامريكان انفسهم ستجد ارتباطهم بالفعل السياسي ياتي بمقدار ما يتحقق لهم من مصلحة..ولهم توصيفات للسياسيين وللعمل السياسي...وستجد خلال مطالعاتك شكل من اشكال الامية السياسية لدي الكثيرين..يهمهم فقط تطوير وسائل الكسب والتحدي في الانجاز والاستفادة من التقنية بل صنعها....... فهل نحن مستفيدون؟

لك الاحترام...

الاخ/ سيف النصر
الاخوة والاخوات المتداخلين
تحياتى
الاسئلة المطروحة اتفق معكم جميعا ليس لها اجابة الا النفى ، مهما يكن فالعميل يجب ان يكون فى السر ، اما الافتراضات لوجود مطالبات امريكية علنا فهى غير موجودة اما سرا فهى موجودة ليس فى امريكا فحسب بل كل دول العالم، يعنى كل دولة بتبحث عن عملاء لتنفيذ اجندة او لجمع معلومات لبناء موقف معين .
الثابت فى الامر ان امريكا لها اطماع ومصالح فى المنطقة والسودان خصوصا فبالتالى بحثت وستظل تبحث عن عملاء لتحقيق مصالحها او لتنفيذ سياساتها او لتحقيق اطماع .
السودانيين المقمين او المتجنسين امريكيا معظمهم ناس معايش ، يعنى زينا كدا من العوام ، وحتى لو اكتسبوا اللجوء او الجنسية بحجة انهم مستضعفين فى السودان فاننى متأكد ان غالبيتهم فعلت ذلك فقط من اجل الحصول على اللجوء او الجنسية ،

ولأول مرة دينق يقول كلام صاح ، فالعمل فى مؤسسات الدولة الامريكية لا يعنى العمالة او الارتزاق فالفرق شاسع بين العمل الرسمى فى الدولة وبين العمالة والتخابر مع اجهزة معينة فى الدولة .

وبالتأكيد نحن معشر السودانيين نمتاز بالعفوية فيمكن استغلال عفويتنابسهولة من غير ان نعلم باهداف الطرف الاخر ، كما انه يمكن استغلال عواطفنا تجاه بعض القضايا حتى لو كان فعلنا يضر بمصالح الامة مستقبلا حيث اننا لا ندرس ولا نبحث بعمق بل نأخذ الامور على الفهم السطحى ولا نقرأ ما بين السطور. فنحن ليس استراتيجيون ولكن نردد كلمة الاستراتيجية فى احاديثنا حتى نفهم الطرف الاخر باننا استراتيجيون ونحن فى الواقع رزق اليوم باليوم

Quote: الاسئلة المطروحة اتفق معكم جميعا ليس لها اجابة الا النفى ، مهما يكن فالعميل يجب ان يكون فى السر ، اما الافتراضات لوجود مطالبات امريكية علنا فهى غير موجودة اما سرا فهى موجودة ليس فى امريكا فحسب بل كل دول العالم، يعنى كل دولة بتبحث عن عملاء لتنفيذ اجندة او لجمع معلومات لبناء موقف معين . الثابت فى الامر ان امريكا لها اطماع ومصالح فى المنطقة والسودان خصوصا فبالتالى بحثت وستظل تبحث عن عملاء لتحقيق مصالحها او لتنفيذ سياساتها او لتحقيق اطماع . السودانيين المقمين او المتجنسين امريكيا معظمهم ناس معايش ، يعنى زينا كدا من العوام ، وحتى لو اكتسبوا اللجوء او الجنسية بحجة انهم مستضعفين فى السودان فاننى متأكد ان غالبيتهم فعلت ذلك فقط من اجل الحصول على اللجوء او الجنسية ،

التحية ليك يا اخ صلاح علي الكلام المرتب و واضح ..
فيما يخص تعليقك علي قضية اللجؤ و عشان ما يتفهم كلامك في السياق التبريري خليني اسالك ، منو الما مستضعف في السودان خارج اسوار "كافوري + بطانة البشير" ؟ الاجابة لا احد ، كل السودان مستضعف و محارب في رزق اولادو .. بالتالي طبيعي انو كل الناس تهاجر و تلجاء في امريكا و الواق الواق بدون الحاجة لتفسير المفسر .

تحياتي

الاخ خدر
خالص المودة وعاطر السلام

Quote: التحية ليك يا اخ صلاح علي الكلام المرتب و واضح .. فيما يخص تعليقك علي قضية اللجؤ و عشان ما يتفهم كلامك في السياق التبريري خليني اسالك ، منو الما مستضعف في السودان خارج اسوار "كافوري + بطانة البشير" ؟ الاجابة لا احد ، كل السودان مستضعف و محارب في رزق اولادو .. بالتالي طبيعي انو كل الناس تهاجر و تلجاء في امريكا و الواق الواق بدون الحاجة لتفسير المفسر . تحياتي

انا لا انظر الى شغف العيش فى السودان فقط من خلال الحكومة ، لكن لدى معرفة عن اسباب ضعف الاقتصاد السودانى فى الفترات منذ منتصف السبعينيات وحتى نهاية التسعينيات وكذلك فى الفترة الحالية ما بعد الانفصال ، هذه الاسباب اهمها سياسة دول العالم الاول بعد احداث 11/9 ( القاعدة) حيث تغير الكثير فى التعامل مع العالم الاسلامى والسودان جزءا منه حيث نال نصيبا كبيرا من العداء الاقتصادى والسياسى ، كما ان نفس الاثر تسبب فى مقاطعة امريكية ثم حظر وعقوبات اقتصادية يعانى منها السودان اشد المعاناة وهى بالطبع عقوبات على الشعب السودانى ومقصودة ولا علاقة لها بنوع النظام الحاكم مهما تداخل البعض ونسبها الى الانقاذ ، وكذلك اثر 11 سبتمبر امتد الى الدول الاخرى خوفا من امريكا واوروبا مما جعل التعامل الاقتصادى الخارجى والتبادل السلعى فى اضيق حدود ولا ننسى خروج عائدات النفط من موازنة الدولة واندلاع الاضطرابات فى بعض اجزاء الوطن وخروجها من دائرة الانتاج الى دائرة الانفاق، وهناك الكثير من الاسباب التى ساهمت وتسهم فى ضعف الاقتصاد السودانى وبالتالى زيادة حدة الفقر مما يشجع على الهجرة والبحث عن مصادر دخول جيدة . فيجب علينا دراسة الامر المتعلق بالفقر وتدهور الاقتصاد بشكل واقعى وليس باهداف اخرى ليس من بينها معالجة الازمة الاقتصادية او التقليل من حدة الفقر.

Quote: الأخبار جرائم وحوادث مقتل (4) سودانيين أطلق عليهم شاب أمريكي النار بالولايات المتحدة مقتل (4) سودانيين أطلق عليهم شاب أمريكي النار بالولايات المتحدة 03-25-2012 10:36 AM لقي (7) أشخاص بينهم (4) سودانيين حتفهم رمياً بالرصاص بالولايات المتحدة الأمريكية عندما داهم شاب أمريكي يحمل بندقية رشاش وأطلق عليهم النار وكشفت مصادر أن الحادث كان بشعاً وقد وقعت أحداثه قرب محل لإصلاح إطارات السيارات حيث كان المجني عليهم يصلحون سياراتهم وبينهم (4) سودانيين وثلاثة أفارقة فنزل الشاب الذي كان على خلاف مع صاحب المحل وأطلق النار عشوائياً على الموجودين مما أدى لمصرع الضحايا وكشفت المعلومات أن أثنين من المتوفين سيتم نقل جثمانيهما وتسليمهما لذويهما بامدرمان . الأهرام اليوم

http://www.sudaneseonline.com/news-action-show-id-42794.htm
سيفنا المسلول في شارلوت
معشر السودانيين خليهم ....
شوف الصورة في مخيلة اعلام الاثارة !!!
المستنسل من اعلام الجبهة سابقا ( حسين خوجلي وتيتاوي ... وهلم جرا )..
انتبهه للصياغة التي تدهس تحت عجلات الغرض افئدة الوالدين والاحبة ...
رغم ان هناك سودانيين يقتلون سمبلة في جزيزة العرب تحت طائلة نظم (مجازا) لاتملك جهاز عدلي غير اهواء الافراد وامزجتهم . رغم ان الخبر (كما ورد اعلاه ) غير دقيق ومجافي للواقع ، وغير مقبول لانه صادر من جهة يفترض انها اعلامية وليس ونسة قهاوي .
http://www2.nbc17.com/news/2012/mar/24/killer...er-durha-ar-2084423/
امريكا ياسيف ليست كتلة صماء يهشهاء الحاكم برغباته ونزواته واعلامه، اوتتسيد فيها مؤسسة امنية اوجهاز حكومي ، ومعليش الزومة مضاييقي وبجيك صادي

Quote: مداخللتك دي كلها كضب

الكضب حق ناساعادة التوطين..ز


اذا كان اسمك مركب يمكن تطلع ليك كمية من السوشال سيكورتي نمبرز بعدد متواليات اسمك
في ولاية

واكيد في كراكز كتيرة ممكن اي زول اصلا دخل امريكا بلاستهبال واعادة توطين يمكن يعملها
البرتكب جريمة اولى بالدخول كذبا بيرتكب جرائم اخرى
اي زول عارف الالاعيب دي بتاعة التامين الصحي والفود ستامب
قال كمبويتر قال...

Quote: ترددت هذه العبارة في المنبر مرارا، ولذا رأيت أنها مسألة جديرة بالمناقشة، لأن استخدامها في المنبر غير دقيق، وينم عن عدم المام بما يعنيه الويلفير سيستم بالنسبة للبلدان الرأسمالية، وهذا بالطبع لا يعني بالضرورة جهل الذين يرددونها، بل يعني أننا بالمناقشة وايراد بعض المعلومات، لربما أجلينا بعض الحقائق التي تجعلنا نهضم ونفهم الموضوع مجال النقاش، فقد درج معظم من يرددونها على استخدامها كشيئ معيب ومخجل للتقليل من شأن الذين تمت اعادة توطينهم في بلدان مثل أمريكا وكندا وأستراليا وغيرها من البلدان الاوربية، وذلك فيه اجحاف عظيم في حق هؤلاء، اذ أنه منذ أن يطأ المعاد توطينه أراضي تلك البلدان يعامل معاملة المواطن وتنتفي منه صفة اللاجئ، وتصبح له نفس حقوق أهل البلد ومن بعد يمنح جنسيتها، هذا ببساطة يعني أنه لا يمنح مال الويلفير لخصوصية وضعه وحسب، بل لأنه يتساوى في الحقوق مع الآخرين دون تمييز لجذوره العرقية أو موطنه الأصل. أما الويلفير سيستم فهو عماد هذه الدول، اذ أنه معني بصرف موارد الضرائب والدولة من أجل رفاهية المواطنين، وتندرج تحته الخدمات الصحية والتعليمية وقضايا الأسرة والطفل، والشباب والمعاقين وكبار السن والمعاشيين والكوميونتي ديفلوبمنت وكافة أوجه الحياة الاجتماعية، وهذه الخدمات تكون في متناول المواطن من خلال وسائط حكومية وغير حكومية، وتتم مراجعة دائمة لهذه الخدمات والوسائط من أجل تطويرها.

سلامات يا بشرى
يا ريت تجي تواصل ما انقطع هنا في هذا البوست.