حميـد سلام و علي الوطن السلام | فاروق أبحُـوّه

إنفكَ جُبارك يا نورا
صوّح شِدرك و إتكّا
كم صحرا مرقت من طورا
قلدت للنيل تتبكّا
كم نخله أتيتم بابورا
من عطشك نايحه بتتشكّا
ما أنفك و حاتك ساجُورا
البلد الحائط مبكا
السُوس القابض في جذورا
السهم اللوّح و إنشكّا
في كبد الفقرا المغدوره
الدمع الدافق ما اتوكّا
ما حدّ بصيرتك طول سورا
البلد الوقعت فد نكّا
ما عكّم نيلك في بورا
و الحبل الماهل إنفكا
الحزن القابض في زورا
و الصبر إتطّين و إتلكّا
كيف عادك فايت يا أبشورا
لساتك طيرك ما ركّا
فوق حِيَط الذمم المأجورا
و القَصر الما هو مزكّا
يا شِعبة بلداً مستوره
عميانه عليكَ بتتوكا
حميد آخوي فوت جورا
بي مهله إن كان أو جكّا
مليون آ خالد هي الفوره
و الظلم وحاتك بندكّا
يا سابر بيرا و جُب غورا
درويشاً بحلم بي مكه
ماعونك ماهل ما كَوره
صبّار في أي محكه
فقّاد الفقرا الفي حورا
زي سِعناً ما هو موكّا
يا سيد القافيه البندورا
عدّال الفينا متكّا
البلد الخِرفت آحميد
الـزَلَق الكَسَر المخروقه
الخبر إندافق للبيد
إتوسّد روحنا المحروقه
بسم الله الحاصل يا سيد
يا دنيا خبارك مشروقه؟!
في كفك غارز ها القيد
و الفرحه المنك مسروقه
الخطوه الصادا اللبيد
السم الفرتق لي عروقه
حميد الطاعم حميد
الزول الكان لك تبروقه
يا عين البلد الغميد
يا بلداً ميت بي شوقه
يا جرحاً ما بي الضميد
يا وجعه تلاوح مُر طوقه
ما طبّب جرحك كميد
لا شِبعت بلدك في الروقه
طوريه تناقر واسوق
بتناتل روحه لي مروقه
البرق الحرقص من فوق
و الجرف الراجي للبوقه
الغبش الشعبك بالروق
و الدمعه الفوقك مدفوقه
يا عالَم تالت و بالشوق
ممحون آنورا بالعوقه
إنعاقوا غلابه و ماروق
للأرض البعدك ممحوقه
الناشفه لِهاتُن كروق
مديونه وحاتك من سوقه
يا فُقَرا بتلفو المَـعَرُوق
ما دّرت أرضك در نوقه
الحَلفَا الدِيسَه المعيوق
ما أنجرّ وحاتك واسوقه
أرضا وطن كامل
عرضا بماثل الطول
فرضاً علي العامل
الصانع و أي زول
حميد يا آمه زامل
حميد ما فيكَ قول
أرضاً صباح
و الليل بطول
عمداً جراح
ما تمّ حول
مطلق صراح
حميد رسول
أرضاً حصاد
حميده زاد
كل العباد
حميد بلاد
حميد وطن
الما دايرنو ..
بعيش
إن وقعت طياره
و الدايرنو ..
بموت
إن عترت حماره
الما دايرنو نحن
أصلاً ما بموت
و الفينا بشوف
في ثانيه بفوت
في حلق الوطن
كم شوكة حوت؟
في خشم البلد
كم بوت !؟
حميداً فات في جوفو
سبعه وجعات
حميداً فات و في قلبو
سبعه طعنات
حميداً فات و في حلقو
سبعه عبرات
حميداً فات و في دربو
أجمل غنوات
حميداً حي في بلدو
حميد ما مات
أبحرفاً حي زي ولدو
للدنيا ثبات
سلام حميد سلام
طايل دوام معناك
سلام حميد سلام
طاعم أكيد مغناك
سلام حميد سلام
الموت لما إصطفاك
سلام حميد سلام
نضيف بهرج صفاك
سلام حميد سلام
فايت تقابل مصطفاك
سلام
حميد
سلام
مليون سلام
عليك سلام
و
علي
الوطن
السلام
_______________
فاروق أبحُــوّه
الإمارات
20 مارس 2012

جميل هذا الاندياح الذي اضمر قليل من هجير حزننا يا فاروق عساك طيب