Post: #1
Title: حليل حميّد ...
Author: وليد محمد المبارك
Date: 03-25-2012, 01:43 PM
حليل حميّد ...
فات البيت ..!!
ما وادعنا ..
ولا بكلامو الزوق متعنا
فات البيت ...
فات حميد ...
كان حميد
كل قصيده !!
يصوتها عصيده ...
يقدمها لينا في كورة جديدة
نحن لقم ... و تاني يزيد
كل كليمة .. وراها كليمة
يترسها حميد بخيط من غيمة
يخيطها هديمة
ونلبس نحنا قصائد ديمة
جديد في جديد
كل معاني .. معاها اماني
يقوم حميد .. يصيغها أغناني
نردد فيها ....
يحفظها لينا بدون ما نعاني
مره يجدد ومره يعيد
ثم سكت !!
يآآآآآآ حميد ....
يالضحكت عدوك بغناك
يالكشمت سنون مولاك
لاك اضينة ولاك غتيت
مابتهادن .. ديمه مصادم
ما بترازي بعيد لبعيد
كل الامه الليلة اتفجعت
فيك يا فحل البقر الراقد
يا صنديد
ثم بكت !!
يا حميد
كسرت المرق الساند سقف الشعر المايل
اصلو كلامك في خشوم تانية
ما بكون خايل
ياخي حليك
قادل وصايل
خاتي وشايل
وياما مسائل صعبة شديد
عندك ساهلة كشراب موية
انت حمار الوحش القادل
ابيض واسود لونك واضح
ماك حربوية
وصوتك دايما داوي وصادح
صادم وفاضح
ما متردد
كراع في الطين و كراع في الموية
الخميس 22 مارس 2012
|
Post: #2
Title: Re: حليل حميّد ...
Author: لطفي علي لطفي
Date: 03-25-2012, 05:50 PM
Parent: #1
سلام يا وليد
حضرنا ولم نجدك في وفاة العم والخال عصام ود العميد له الرحمة و حميد ووردي ونقد فكلهم فقد للوطن العزيز
لطفي
تخريمة:
علمت من الاخ بدرالدين عمر الحاج موسي حينها انك في دبي, مرطب
|
Post: #3
Title: Re: حليل حميّد ...
Author: وليد محمد المبارك
Date: 03-26-2012, 05:44 AM
Parent: #2
اخبارك يا لفطي انا غير محظوظ لاني لم اقابلك
وصحيح اني كنت في الامارات اخر العام السابق وبداية هذا العام
كما اني ادخل المنبر في الفترة الاخير لماما
حقيقي غير محظوظ بعدم مقابلتك
|
Post: #4
Title: Re: حليل حميّد ...
Author: مريم بنت الحسين
Date: 03-26-2012, 01:15 PM
Parent: #3
البركة فيكم في حميد ووردي وال
بالله يا وليد ود العميد ببقى ليك؟ انا برضه قريبي الله يرحمه ويغفر ليه.. الوالدة امس مشت تعزي فيه...
لطفي ازيك...
|
Post: #5
Title: Re: حليل حميّد ...
Author: وليد محمد المبارك
Date: 03-27-2012, 09:12 AM
Parent: #4
مريم ازيك
تحياتي لنادر ياخ
|
|