Post: #1
Title: بحر مدّد عبابو على السواحل ضو.... نجاة عثمان ترثي الراحل حميد
Author: الصادق سلفاب
Date: 03-24-2012, 01:19 PM
Parent: #0
بحر مدّد عبابو على السواحل ضو....
شن بنسو؟؟؟
لا دمعاتنا لا سكليب بنات الحلة
لا النيل اللي فاض من حزنو
فارق للمصب ولهان على البلد المكونة كلمة
قالت لو ويا ريت لو
وليش خليتنا للخلا والرياح النو
كت راجياك تقولي ألو ...
ويا قدال أخوي أندهني ..
من وسط اللهيب الطالني ..
اتمسّخ حدايا ولحني...
من هول السمعتو وهالني ...
قوللي صحيح أخوي فارقني
لا وصّالي لا وادعني..
أنطارشني ..
ولا تركني غير زاد قايدي فيّ المحني
قلتلو يالشريف أنفحني...
من بركاتك العلويي يالعالي المقام أمنحني...
و اتمدّد سناكَ علي المدائن ضو...
كت راجياك تقولي ألو ...
كعبي الدنيا ياحميد بلاك ....
تالاك في الفردوس توهّج تو....
تزيّن تو ...
تلألأ تو....
وياحمييييييد
عليك دمع البلد قال شو...
واتحنضل وراك قنديلنا....
حزني أحالني..
لى غيهب حزن وأغتالني ...
شال الفرحة شنشل شالني..
.واتحّداني واتلقّاني...
واتمدالي بيني وبين صداك ..
أسدالي حي...
يا خوي حي ...
ياغالي ...
وان كان الحزن كتّالي ....
ماكل الكلام الدايرة قلتو ...
لا الأسرار ورا حميد بتتفتّالي...
عند الحلي وادع سّرو...
في العرجون..ونخلو العالي...
في الأبنوس ...
في الفولة ...
وفي عرق اللي عاش تربالي ...
في القادوس
ولى نادوس والروّاسي والعتّالي...
والجابودي والجراري...
والناس البسترو الحال...
والطمباري...
ياحمييييييد
عليك دمع الوطن قال شوو...
مجرتق بالضريرة..
لابس في ايديك سوميته ومعاها حرير.ة...
مغطى بالنور اسمك الأتخط....
تضوي كما صفا البللور...
وزفوك لى بنات الحور.....
بحر مدّد عبابو على المدائن ضو...
مدائن الضو...
مدن من ضو ....
نسوي نسو...
|
Post: #2
Title: Re: بحر مدّد عبابو على السواحل ضو.... نجاة عثمان ترثي الراحل حميد
Author: على زين العابدين
Date: 03-24-2012, 01:58 PM
Parent: #1
Quote: كعبي الدنيا ياحميد بلاك ....
|
|
Post: #4
Title: Re: بحر مدّد عبابو على السواحل ضو.... نجاة عثمان ترثي الراحل حميد
Author: باسط المكي
Date: 03-24-2012, 02:12 PM
Parent: #2
Quote: لا دمعاتنا لا سكليب بنات الحلة
لا النيل اللي فاض من حزنو
فارق للمصب ولهان على البلد المكونة كلمة
قالت لو ويا ريت لو
وليش خليتنا للخلا والرياح النو
كت راجياك تقولي ألو ...
ويا قدال أخوي أندهني ..
من وسط اللهيب الطالني ..
اتمسّخ حدايا ولحني...
من هول السمعتو وهالني ...
قوللي صحيح أخوي فارقني
لا وصّالي لا وادعني..
أنطارشني ..
|
التحية لنجاة عثمان التي عرفتنا بالزمن الفلاني
وياحيبنا في عينك عايشة ناس
التحية لها واعزيها في حميد وصدقني يا الصادق
حميد سيظل خالد معني وكلمة ورمز لكل الانسانية
شكرا لك
|
Post: #3
Title: Re: بحر مدّد عبابو على السواحل ضو.... نجاة عثمان ترثي الراحل حميد
Author: الصادق سلفاب
Date: 03-24-2012, 02:04 PM
Parent: #1
لا فض فوك استاذه نجاة
فحميد رقم يصعب تجاوزه. غادرنا و نحن في أمس الحاجة لأن يكون بيننا
كم نشعر باليتم بعده ذلك الفذ الذي اسهم في تكون اخيلتنا وتشذيب اشياءنا
ورفد وجداننا بمعاني ان نكون سودانيين.
فطب حيا وميتا يا هذا الشاسع .
|
Post: #5
Title: Re: بحر مدّد عبابو على السواحل ضو.... نجاة عثمان ترثي الراحل حميد
Author: الصادق سلفاب
Date: 03-24-2012, 02:22 PM
Parent: #3
فعلا يا علي الزين
كعبي الدنيا شديد بعد حميد
فقد فقدت الاشياء بهجتها وصدقها
له الرحمة ولنا الصبر الجميل
|
Post: #6
Title: Re: بحر مدّد عبابو على السواحل ضو.... نجاة عثمان ترثي الراحل حميد
Author: الصادق سلفاب
Date: 03-24-2012, 02:39 PM
Parent: #5
الاستاذ باسط سلام
وشكرا علي المرور والاضافه
Quote: التحية لنجاة عثمان التي عرفتنا بالزمن الفلاني
وياحيبنا في عينك عايشة ناس
التحية لها واعزيها في حميد وصدقني يا الصادق
حميد سيظل خالد معني وكلمة ورمز لكل الانسانية
شكرا لك |
نجاة عثمان فنانه مبدعه وشفافه
وهي واحده من ايقونات الشعر التي
تفتحنا علي ايديها فلها منا الف تحية وتحيه
حميد عوالم من الصدق والشفافية هو صوت البلاد في أزمنة الصمت
ولسان الحقيقة في ازمنة الزيف .. وسيظل خالداً في قلوب الناس ما بقي النيل ..
الف رحمة ونور تنزل عليه الي يوم الدين
|
Post: #7
Title: Re: بحر مدّد عبابو على السواحل ضو.... نجاة عثمان ترثي الراحل حميد
Author: الصادق سلفاب
Date: 03-24-2012, 11:36 PM
Parent: #6
*
|
|