نُقد ما ح يعفي لينا .. لو صلّى علي جنازتو (كوز)!

قبل الأمس رحل محمد وردي
وحزنا بعده لرحيل محمد حُميد
والآن يرحل هرمآ آخر وهو محمد نُقد


لا حول ولا قوة إلا بالله العظيم واللهم لا إعتراض علي حُكمك


نعم لم نستفيق بعد من صدمة رحيلهم جميعآ ولكن علينا أن نعرف
وكما عودونا دومآ ك.لاب النظام و حُثالتهم بأن يتاجروا برحيل المُناضلين
وكم قتلوا قتيلآ وذهبوا إلي جنازته!
ربما لم يقتلوا المُعلم نُقد بأيديهم ولكنهم قتلوه مرات ومرات حينما أشبعوه همآ وغمآ!
قتلوه ب هَم تغيير الأوضاع في هذا الوطن المُثقل بالجراحات
فهم قتلوه بشكلٍ أو بآخر

وأعلم بأن هُؤلاء الحُثالة الآن يرتبون لكيفية تدنيس جنازته وكيفية سرقة هذا اليوم
وأعلم بأن البشير وكلابه يريدون أن يتشرفو بالصلاة علي جنازة المناضل نُقد

إنه يوم الجُمعه حيث يحتشد أكبر عدد من الشعب السوداني لمواراة جثمانه الطاهرة
فأرجو من كل
الزملاء
الأصدقاء
الرفاق
الأحباب
الأشقاء
المقاتلين
النُشطاء وكل المناضلين في بلادي بأن لا يسمحوا لهؤلاء الأوغاد وخصوصآ قياداتهم بأن يتاجروا بهذا اليوم
إنه ليس بيوم وداع فقط! ولكنه يومآ لنكشف فيه عن تقديرنا وعرفاننا لما قدمه هذا الرجل!
وأكاد أجزم بأن واحدة من وصاياه بأن لا يأتي من كانوا سببآ في معاناتنا إلي جنازته
فهو الذي قضي كل عمره مكافحآ ومنافحآ أفكارهم التي أوصلتنا لهذا الوضع الأليم

فرجاءآ أن نقف صفآ واحدآ من أجل عدم حضور هؤلاء وإن تعمدوا وأتوا فيجب طردهم طردآ حتي تكون عبرة لغيرهم من المجرمين
ويجب التوثيق لهذا الطرد... حلفناك يا نجلاء سيد أحمد وكل الشباب

الرحمة والمغفرة للقامة محمد نقد
العزاء لكل الشعب السوداني

مالها الأحزان كترت علينا ؟

توالت الأحزان على الوطن
انهم يرحلون تباعا..
فقد عظيم
ومصاب أليم
نسأل الله أن يتغمده بواسع رحمته وغفرانه
وان يجعل الجنة مثواه..
البركة فيكم الأخ رضوان داوؤد
وجبرالله كسر الجميع ..
والعزاء للوطن ..
" إنا لله وإنا إليه راجعون "

ملاحظة مهمة وبوست أكثر أهمية


الرحمة والمغفرة لسيدي محمد إبراهيم نقد

الفاضل رضوان

تعازيه وربنا يصبر الجميع....

Quote: ويجب التوثيق لهذا الطرد... حلفناك يا نجلاء سيد أحمد وكل الشباب

مش غريبه انه ناسكم ديل يا رضوان ناس قرفنا يغلبهم تغطية احداث اليوم؟!

يعني نجلاء سيد احمد لو سافرت نيروبي خلاص الكاميرات كلها معها؟!

بتبالغوا يا ناس قرفنا الداخل غايتو!

اليوم كسر الشعب على اسرة نقد بشارع الستين!!

فاين انتم؟!

الكاميرات و المعدات البتترسل دي كلها بقت ملكيه خاصه ولا شنو؟!

غايتو الله يعينيكم على الراغبين في الانفراد بالامجاد الشخصيه!

Quote: نُقد ما ح يعفي لينا .. لو صلّى علي جنازتو (كوز)!

له الرحمة والمغفرة ..من المفترض ان يصلي عليه امام الشيوعيين

شكراً يا رضوان على التنبيه
اتمنى الا يحاول مطلوب الجنائية الصلاة على نقد كما فعل في تشييع
الأستاذ محمد وردي لأن حضوره لمراسم التشييع فقط لن يكون سهلاً ناهيك
عن الصلاة عليه ..



كم اتمنى ان يصلي الإمام الصادق المهدي على نقد
فهو اكثر القادة معرفة بقدر الأستاذ نقد

Quote:
ان يصلي عليه امام الشيوعيينUnquote
yes, there are many real Imams among the Comuunists I knew in my life...
The late comrade Nouri, my neighbor, was a leader in the Communist part chapter of Riyadh and was a second Imam for the neighborhood mosque

We don't need an Imam to do the funeral prayer if he was not insync with the believes of ustaz/Nugud. an Imam who belive in the freedom of expression and the equal rights for women and men

That what we should do at least to our late Nugud...

mohamed elgadi

دي مشكلتكم الكبيرة جدا

نقد دا رجل شعبي يمشي البيكات ويشيل صينية فطور رمضان يختها فيالشرع مع الجيران
وما قاعد يسألهم انتو كيزان ولا حيران

نقد االمات دا زول بسيط ولد بلد ما بيخلط بين ما هو اجتماعي وماهو غير اجتماعي

في عائلة نقد ذيها وذي اي عائلة فيها الوان الطيف السياسي السوداني
كيزان انصار سنة اتحادين حزب امة الخ الخ

كلامكم هذا يشرخ النسيج الاجتماعي للمجتمع السوداني الذي عاش المرحوم عمره كله بقوانينه

يبدو ان الاجيال الجديدة فارت الاصول كما هو زاضح للعيان الان..

Quote: The late comrade Nouri, my neighbor, was a leader in the Communist part chapter of Riyadh and was a second Imam for the neighborhood mosque

لا امامة لتائب يا دكتور
مافي مجاملات في الدين

رضوان,
البركة في جميع الشعب السوداني, وربنا يرحم محمد ابراهيم نقد و يجازيه بقدر ما احب الخير للناس عامة.

يا رضوان, نقد عندما تصدي لقيادة الحزب الشيوعي في الحقيقة شال على كتفيه هم قيادة الشعب السوداني نحو وطن خير ديمقراطي ينعم فيه الناس بالسلام و المحبة.
اتمنى ان ارى كل الشعب السوداني متحدا في تشييع قائد الشعب.
هلموا ايها الناس فان نقد ارادكم شعبا واحدا فكونوا شعبا واحدا في وداعه.

ابعدوا السياسـة يا شباب الحزب، ولا اقول اكثر من ذلك فى وقت حزين. نقد شخصية عامة وتاريخية مهما كانت خلافات 
السياسة ومن واجب الدولة كان دكاتورية او ديمقراطية، ان تحترم رحيله وتشيعه بما يجب. 

Quote: كم اتمنى ان يصلي الإمام الصادق المهدي على نقد فهو اكثر القادة معرفة بقدر الأستاذ نقد

Quote: نقد دا رجل شعبي يمشي البيكات ويشيل صينية فطور رمضان يختها فيالشرع مع الجيران وما قاعد يسألهم انتو كيزان ولا حيران نقد االمات دا زول بسيط ولد بلد ما بيخلط بين ما هو اجتماعي وماهو غير اجتماعي

خالتو نجاة سلامات
طبعآ بعض مرات تحيري عديل!
وعندك شترات كدا بتعرفيها براك.
أول حاجة بتفق معاك إنو الأستاذ نقد كان إنسان بسيط وود بلد لكن عمرو ما خت إيدو مع ال######انين ديل
إنتي ما سمعتي لما الكيزان قالوا دايرين يعالجوه، قال ليهم شنو؟؟
ما كان يقول ليهم أوكي عالجوني لأنو دا موضوع إجتماعي وما عندو علاقة بالسياسة!
كان زول مبدئي وطالع من هذا الشعب عشان كدا فضّل يتعالج من قروش الشعب.
الكيزان ديل كم مرة كتلو زول ومشو في جنازتو؟ وكم مرة تاجروا متاجرات رخيصة بوفاة مُناضل؟
باللاي دايرانا نقول ياخي دا موضوع إجتماعي ونخلي المجرم دا أو واحد من حُثالتو يجي يصلي بالناس؟
لا لا المرة دي ما بتبقي ولا بتمشي فينا كلو كلو.. وآآآآآه لو كنا في السودان! لكن أنا عارف الشباب ما ح يقصرو!

Quote: كلامكم هذا يشرخ النسيج الاجتماعي للمجتمع السوداني الذي عاش المرحوم عمره كله بقوانينه يبدو ان الاجيال الجديدة فارت الاصول كما هو زاضح للعيان الان..

كلامك الفوق دا وبرغم الحزن الفينا بالجد خلاني أضحك الضحكة القصيرة بتاعة الزول لما يكون زعلان شديييد داك ويقول (ها)!
باللاي الجماعة ديل خلو للنسيج الإجتماعي شنو في البلد؟
ولو الأصول بتقول إنو لازم نرضى بناس ذي ديلا.. فالتذهب الأصول إلي الجحيم ولنؤسس لأصولٍ جديدة تحكمها قيمٌ جديدة.

ومعآ لمنع هؤلاء من تدنيس الجنازة والمتاجرة السياسية الرخيصة..

شكرآ علي المرور

رضوان داؤد

وحينما استشهد الزميل قاسم امين
ونقل جثمانه الى السودان
كانت رسالة الميدان السرية فى حينها
واعتقد مقالة كتبها الزميل عبدالرحمن (نقد)
وكان عنوان المقالةفوق الحزن والغضب

.
.
.
يامن تبحث عن البطولات في زمان الفجيعه ليس هذا وقتها ولا تلك هي طريقتها
نقد كان مننا فينا سودانيين اولاد بلد جد مريخاب وهلالال كيزان وشيوعيه وكل الالوان
ننتصر حد التطرف لما نراه صحيح لكننا ما تجرانا يوما بالمساس بذلك الانسان السوداني
المكون لنا نحزن معا كماينبغي ونفرخ معا في اوان الفرح

من قال ان نقد ابن الحزب الشيوعي فقط فقد كذب


من قال ان مجاهدات نقد هي نكسب الحزب الشيوعي فقط فقد كذب


من قال ان الحزن على نقد حصريا على الحزب الشيوعي فقط فقد كذب


نقد منا وفينا اهل السودان نبكيه معا ونصلي عليه معا

وفي هذا المقام صار نقد القاسم المشترك بين كل اهل السودان والمجمع لهم حزنا

فرفقا بهذا النسيج المتهري اصلا!!!!

Quote: يامن تبحث عن البطولات في زمان الفجيعه ليس هذا وقتها ولا تلك هي طريقتها نقد كان مننا فينا سودانيين اولاد بلد جد مريخاب وهلالال كيزان وشيوعيه وكل الالوان ننتصر حد التطرف لما نراه صحيح لكننا ما تجرانا يوما بالمساس بذلك الانسان السوداني المكون لنا نحزن معا كماينبغي ونفرخ معا في اوان الفرح

أي بطولاتٍ هذه التي تتحدث عنها يا البصاص؟ هذا البوست مجرد تنبيه فقط لما ظل يكرره الكيزان في الآونة الأخيرة
وبعدين منو القال ليك إنو السودانين ديل هلالاب ع مريخاب، كيزان علي معارضة دايمآ سوا؟
ومنو القال ليك كسودانين بنفرح سوا ونحزن سوا؟
باللاي خلينا من الكلام العاطفي الفضفاض دا!
إنت كنت وين لما الكيزان أقامو إحتفالات ومهرجانات ونسوانهم زغردتو برحيل د/خليل؟؟؟؟؟ ولا لا خليل دا ما سوداني؟
كنت وين لما طلاب المؤتمر الوطني كانو في إجتماع وعرفو خبر وفاة زيدان قامو هاجو وملو الدنيا صفافير وعياط.
ومنو القال ليك أصلآ ناس ذي الكيزان ديل ممكن يحزنو علي وفاة زول معارض بقامة نُقد؟

Quote: من قال ان نقد ابن الحزب الشيوعي فقط فقد كذب من قال ان مجاهدات نقد هي نكسب الحزب الشيوعي فقط فقد كذب من قال ان الحزن على نقد حصريا على الحزب الشيوعي فقط فقد كذب نقد منا وفينا اهل السودان نبكيه معا ونصلي عليه معا وفي هذا المقام صار نقد القاسم المشترك بين كل اهل السودان والمجمع لهم حزنا فرفقا بهذا النسيج المتهري اصلا!!!!

مافي زول قال إنو نقد إبنآ للشيوعين فقط! ولكن بأي حال لا يمكن أن يكون إبنآ للمؤتمر الوطني، فهو إبنآ للشرفاء فقط!
ونضالاتهو مكسب للوطن ولكل الشرفاء وهم وحدهم من يحزنون (بصدق) وليست حزن الكامرات والمتاجرات الكيزانية.
ونعم نقُد قاسم مشترك بين السودانين ولكن هؤلاء ليسُ من الشعب السوداني.

شكرآ أبوعبيدة

إطمئن يا رضوان ...
حتي لو يلحق أستاذنا وقائدنا محمد إبراهيم نقد برفاقة ناس عبدالخالق ... بأن لا يُعرف لهم قبر
فسوف لن يسمح الرفاق بأن تختطف الأجهزة الأمنية جثمان الذاهد ..........

ده كلام فيه الدم سيكون ....... حدو الرُكب .......
وقادة هذه الأجهزة يعرفون ذلك .........

Quote: إطمئن يا رضوان ... حتي لو يلحق أستاذنا وقائدنا محمد إبراهيم نقد برفاقة ناس عبدالخالق ... بأن لا يُعرف لهم قبر فسوف لن يسمح الرفاق بأن تختطف الأجهزة الأمنية جثمان الذاهد .......... ده كلام فيه الدم سيكون ....... حدو الرُكب ....... وقادة هذه الأجهزة يعرفون ذلك .........

شكرآ جزيلآ مكاوي
وأعلم بأن الشباب منتبهون تمامآ

Quote: نُقد ما ح يعفي لينا .. لو صلّى علي جنازتو (كوز)

غرييييييييييبة !!!!!!!!!!
لان رأي الراحل (نقد) نفسه مختلف في الكيزان وعن الكيزان
وهنا أذكر ما قاله نقد أثناء أول زيارة يقوم بها رئيس تحرير صحيفة ألون استاذنا (حسين خوجلي) لـ»دار الحزب الشيوعي»
أنه أي (نقد) يعول على (الرئيس البشير) في جمع صف السودانيين مؤيدين ومعارضين حول برنامج وطني لأنه الوحيد الذي يجيد فن الإستماع للآخر، ولأنه كرئيس وكعسكري قادر على اتخاذ «قرارات عصية» لكنها مفيدة.(على حد تعبير نقد )
وفي السياق رأى نقد أن الدكتور حسن عبدالله هو الرجل الوحيد القادر على حل «مشكلة السودان» إذا ارتفع الدكتور حسن الترابي فوق جراحاته، وقال مبتسماً: «إذا سخا».(برضو على حدق قول نقد)



نسأل الله ان يتغمده بواسع رحمته
ويلهم الشيوعييين الصبر والسلوان
وحزن العزاء بدون مشاترة واساءة لسيرته وتاريخه
كما فعلوا مع الشاعر الراحل (حميد) مؤخرا

يا ميادة وبيان سلام ..

يا شباب انقول انو الشيوعيين ديل راكبم الغلط ليييييييييييييييييييييييييييييي راسهم في رفضهم انو يصلي بالجنازة كوز او عمر البشير مثلا ..


ياخ مالو النريحهم فيييييييييييييي حنانهم دا ونقيف في الصفوف الخلفية للجنازة ونخلي الصادق المهدي ولا اي زول بريهم نفسيا يصلي بقائدهم الراحل..مالو يعني فيها حاجة ..


انا المتاكد منو انو البشير ذاتو ما حيدخل نفسوا مع الشيوعيين في حرج ..

مسالة وردي الاحراج من عبد الرحيم العامل فيها قريب الاسرة




-------------------------
يا بيان مداخلتك دي اتقول شايلنها من بوست تبارك بتاع البقالة والمطعم

Quote: ده كلام فيه الدم سيكون ....... حدو الرُكب .......

يلا عاد اقطع تذكرتك وتعال خلي الدم يصل الركب

نضال عزومية المراكبية دا بنفع

سيصل جثمان نقد وحتتلمى الناس كلها في استقباله
كل الشعب السوداني..ولا في زول حيقدر يفتح خشمو.. خاصة الناس التي كتب لهم يوما حضرنا ولم نجدكم..

Quote: غرييييييييييبة !!!!!!!!!! لان رأي الراحل (نقد) نفسه مختلف في الكيزان وعن الكيزان وهنا أذكر ما قاله نقد أثناء أول زيارة يقوم بها رئيس تحرير صحيفة ألون استاذنا (حسين خوجلي) لـ»دار الحزب الشيوعي» أنه أي (نقد) يعول على (الرئيس البشير) في جمع صف السودانيين مؤيدين ومعارضين حول برنامج وطني لأنه الوحيد الذي يجيد فن الإستماع للآخر، ولأنه كرئيس وكعسكري قادر على اتخاذ «قرارات عصية» لكنها مفيدة.(على حد تعبير نقد ) وفي السياق رأى نقد أن الدكتور حسن عبدالله هو الرجل الوحيد القادر على حل «مشكلة السودان» إذا ارتفع الدكتور حسن الترابي فوق جراحاته، وقال مبتسماً: «إذا سخا».(برضو على حدق قول نقد)

خلي التأليف والكضب ياميادة!!

يا داؤد مافي شئ بستحق اكذب عشانه
واليك الاقتباس من المصدر

Quote: قال لـ«ألوان» في دار الشيوعي .. نقد: البشيــــر قادر على جمع الصـــــف.. والجنــــــوب عائد للشمال الكاتب: الخرطوم: رئيس التحرير الإثنين, 03 تشرين1/أكتوير 2011 19:36 Share أوضح السكرتير العام للحزب الشيوعي محمد إبراهيم نقد أن السبيل لخروج البلاد من أزمتها السياسية الراهنية يكمن في «إعتراف الإنقاذ» بأطراف المعارضة اعترافاً «عملياً»، ومشاركتها في اتخاذ القرارات المصيرية الكبرى. وقال نقد أثناء أول زيارة يقوم بها رئيس التحرير حسين خوجلي لـ»دار الحزب الشيوعي» إن أي حل لمشكلة دارفور دون الحوار مع الفصائل التي تحمل السلاح «فعلياً» لن يحقق أية نتائج. ودعا نقد لعدم عزل الجنوب عن الجنوب في اتخاذ القرارات التي تهم السودان الكبير، وبدا وهو يتحدث لرئيس التحرير «مطمئناً» على عودة الجنوب إلى السودان عاجلاً أم آجلاً، وظل يردد مقولة القيادي الشيوعي جوزيف قرنق الذي أعدم في 19 يوليو 1971م للجنوبيين: «إنكم ستظلون مجرد أقلية لا قيمة لها إذا اتجهتم صوب كمبالا أو نيروبي أو أديس أبابا، والخير لكم أن تتجهوا نحو الشمال، لأنه على الأقل يعترف بقضيتكم». ووصف نقد رئيس حزب الأمة السيد الصادق المهدي بأنه رجل «صبور» يبحث دائماً عن مساحة للتلاقي مع خصمه، مساحة تتيح للآخرين العمل السياسي المفتوح، ولو أدت إلى إعادته للسجن، مدللاً على ذلك باتفاقيات المصالحة الوطنية مع النميري وحكومة الإنقاذ. وقال نقد إن «الإتحاديين» مشغولون هذه الأيام بترتيباتهم وتناقضاتهم الداخلية، بيد أنه يرى أن خلافات الإتحاديين ستقود لوحدتهم في نهاية الأمر. ورفض نقد تقديم أية تصريحات حول ما سيفعله هذه الأيام بقوله إنه يعمل ضمن منظومة المعارضة، وإنه غير «مأذون» للحديث باسمها. وعول نقد على الرئيس البشير في جمع صف السودانيين مؤيدين ومعارضين حول برنامج وطني لأنه الوحيد الذي يجيد فن الإستماع للآخر، ولأنه كرئيس وكعسكري قادر على اتخاذ «قرارات عصية» لكنها مفيدة. وفي السياق يرى نقد أن الدكتور حسن عبدالله هو الرجل الوحيد القادر على حل «مشكلة السودان» إذا ارتفع الدكتور حسن الترابي فوق جراحاته، وقال مبتسماً: «إذا سخا». وخطأ نقد أهل دارفور والجنوب والنيل الأزرق في تحميلهم لـ «أخطاء» السودان للشمال وحده بقوله: «الشمال للحقيقة والتاريخ ظل يحمل همهم قبل همه، لكنهم الآن لا يعبرون إلاّ عن أنفسهم». وبدا نقد أثناء الحوار مفعماً بالأمل في خروج السودان من اللحظة التاريخية الحرجة التي يعيشها وتجاوزها وقال: «لو لم يكن هو كسكرتير عام للحزب الشيوعي السوداني مطمئناً لهذا الأمل فلن يبقى له سوى القبر»، وإنه متأكد من أن شعب السودان سينال حقوقه كاملة في العدالة والحرية وأنه قادر على صناعة حاضره ومستقبله. وأبدى نقد موافقته لتسجيل تجربته العامة والخاصة في السياسة السودانية، وخلاصة حياته الفكرية وذكرياته وأسراره لبرنامج «أيام لها إيقاع» بفضائية أم درمان، ويبدأ تسجيل الحلقة الأولى منه السبت القادم.

ورغم ان مثلي لا يسأل عن مصدر
لكن عشان جني وجن الكضب والكضابيين
هااااااااك قزقز بالمصدر
بس ان شاء تقتنع
http://www.alwansd.com/2011-02-05-11-14-52/10...08/10366--lr---------

Quote: . وآآآآآه لو كنا في السودان

نقد اتوفى بوم الخميس العايز يحي يلاقي الجثمان لو في نيوز لندا ممكن يصل الى حين وصول الحثمان السبت او الاحد
مافي اي عذر آآآه لو كنا في السودان ..

Quote: رو ما خت إيدو مع ال######انين ديل إنتي ما سمعتي لما الكيزان قالوا دايرين يعالجوه، قال ليهم شنو؟؟

دا كلام ماصحيح دائما قاعد ينسق معاهم وطلع من الاختفاء ولم يرفض العلاج الا لانه لا يريد اموال الشعب السوداني
حيث لا يظن انه يستحقها ودا البخليه رجل محترم ومختلف منكم ومن ناس كتار وبتخلي الناس كلها تحبه..

Quote: ولو الأصول بتقول إنو لازم نرضى بناس ذي ديلا.. فالتذهب الأصول إلي الجحيم ولنؤسس لأصولٍ جديدة تحكمها قيمٌ جديدة.

ترضى بشنو؟
نحنا اصولنا البنحافظ عليها كسودانين هي ان الفراش مكان مفتوح للعدو والصديق يجو يعزو ما سمعنا باي زول طرد ناس من فراش..

قيمكم الجديدة مرفوضة جدا من الشعب السوداني والدليل ان اي زول في اي حزب حيمشي الدافنة وبيت الفراش.

Quote: والمتاجرة السياسية الرخيصة..

هذا البوست نموذج للمتاجرة الرخيصة وشن الحروب بالجثامين الجثامين لا تحارب يحارب الاحياء

اين كنتم عندما حضر وككتب لكم حضرت ولم اجدكم؟
وليتم الادبار واسع مرقتو للتنظير.
الله يرحمه رحمة واسعة عاش بطل ومات بطل

Quote: نُقد ما ح يعفي لينا .. لو صلّى علي جنازتو (كوز)!

(كوز
والله امر مؤسف
طيب رايك شنو لة صلى عليه كوز من المؤتمر الشعبي ذى الترابي بتاع بيوت الاشباح مثلا
او اي دباب من العدل والمساواة بتاعين حروب جبال النوبة وجنوب السودان
والله في الحقيقة
ما توفى نقد وحده
بل توفى اخر الرجال المحترمين
بعد ده تاني مافي حزب شيوعي ولا حاجة
الله يرحم نقد الاكاديمي والمفكر
امشو ذاكرو في كبته التي الفا واسعو لاعادة نشرها
عشان تمحو اميتكم الشيوعية وهضربتكم الفارغة دي
والله (نعر اليسار 2012) عينة

منقول من بوست الصديق محمد نيالا

Quote: سيصل جثمان الفقيد محمد إبراهيم نقد من لندن إلى مطار الخرطوم فجر الأحد 25 مارس 2012م. وإستناداً على ذلك سيكون مسار موكب التشييع بعد نقل الجثمان من المطار الى منزل الفقيد، على النحو التالي: في تمام التاسعة صباح الاحد يتحرك موكب التشييع من منزل الفقيد الى المركز العام للحزب الشيوعي السوداني بالخرطوم (2) ومن هناك مباشرةً الى مقابر فاروق حيث يوارى الجثمان الثرى.

معآ لتشيعه بشكلٍ يليق بمقامه والوطن.

سمعت سبدرات امس في قناة النيل الازرق و هو يذكر ان نقد وصي ان يصلى عليه شحص من ناس القطينة و لم يذكر سبدرات اسم هذا الشحص ....

Quote: دا كلام ماصحيح دائما قاعد ينسق معاهم وطلع من الاختفاء ولم يرفض العلاج الا لانه لا يريد اموال الشعب السوداني

Quote: دا كلام ماصحيح دائما قاعد ينسق معاهم وطلع من الاختفاء ولم يرفض العلاج الا لانه لا يريد اموال الشعب السوداني

هذا الكلام غير صحيح البتة ......ونقد تعلم في مدارس السودان وجامعة الخرطوم حتي فصل منها لاسباب سياسية .. وكان قبل الانقاذ يتمتع بكامل حقوق المواطنة من تعليم مجاني وعلاج مجاني قبل مجئ الانقاذ فما الجديد في ان يرفض هذه الفرصة التي استفاد منها سابقاً ؟..فلماذا لم يرفض تلك الاموال سابقاً ورفضها هذه المرة؟ ثم مارأيك انت يابيان في من عرض هذه الاموال عليه ؟
الواقع ان محمد ابراهيم نقد رمز للنضال السوداني .....ورمز للعفة السودانية ...
ولنا في محمد ابراهيم نقد أسوة حسنة ..

بالجد يا النعيمة بقت عندك بيان سندروم


اي حاجة اكتبها لازم ترد عليها لو قلت الله واحد تقول لا الله واحد
يا زول ما تعب نفسك معاي في حياتي ما قدرت اصل السطر التاني في اي حاجة تكتبها
لانك ممل ومماحك وما عندك سالفة.. شوف ليك زول غيري اتلحو بعد ..

انتو البلد دي ما فيها زول بعـرف يصلي غير البشـير و و كيزانو و لا شـتنو ؟

و ما لكم مصـرين أن الحالة واحـدة وممكن يجي يزايد و يصلي على المرحـوم , الميزة شــنو أن يصلي عليه كـوز ؟ هل هم الأكثر علما وتدين

المشـكلة وين أن الناس تقول ما عايزين كوز يصلي على فقيدنا

الفقيد عندو اصدقاء ومعارف اكثر تدينا و صدقا من الكيزان و اي وحد منهم ممكن يصلي عليه

بس كـوز لا و دي أعرفها من اســرة نقــد

اها يا شــباب / ت عندكم رأي في خيار اهله

طبعا ممكن اي زول يجي يعزي , في كيزان جو العزاء تم اسـتقبالهم و تلقي العزاء منهم , لكن حكاية أن كوز يصلي على نقـد فدي ما مبلوعة

و ما فيها أي زعـل خاصة لوكان دا خيار اهله ,


تنبيهك في محلو يا رضـوان

وكمان ما اظن أن جنازة المرحوم ما ح تكون بالعشـوائية دي , ح تكون مرتبة بمراســـيم محددة ومن الآن ممكن يكون معـروف الح يصلي منو

لا حول ولا قوة إلا بالله
رحم الله عبده محمد إبراهيم نقد
الرجل الإنسان والقائد والمفكر الكبير..
أسرة المرحوم وحدها هي من له الكلمة في تحديد
أين يدفن نقد ومن يصلي عليه من الأئمة فربما يكون ترك وصية بذلك..
نعم ساءني أن يصلي على المرحوم وردي المجرم عمر البشير
لكن أنا على ثقة أن جنازة نقد سيكون مرتباً لها بشكل منظم
دعونا نترحم على الفقيد ونذكر محاسنه ومآثره الكثيرة..
تغمد الله نقد برحمته الواسعه ومغفرته وتقبله مع الصالحين..

Quote: نعم ساءني أن يصلي على المرحوم وردي المجرم عمر البشير

سبحان الله ويسوءك لي شنو ؟؟؟ ...المرحوم وردي ذاتو كان مع البشير سمن على عسل والدليل الجلسة التي تغنو فيها سوياً

رحم الله موتانا وجنبهم متاجرة السياسيين بعواطف رحيلهم

الحزب الشيوعي السوداني – المكتب السياسي
اللجنة المنظمة لتشييع الاستاذ محمد ابراهيم نقد
خط سير موكب التشييع

سيصل جثمان الفقيد محمد ابراهيم نقد على متن طائرة الخطوط الجوية البريطانية في الثانية إلا ربعاً من فجر الأحد 25 مارس، وسيتم نقل الجثمان إلى منزل الفقيد بالجريف غرب.
في تمام الساعة السادسة والنصف صباحاً سيتحرك موكب التشييع من المنزل إلى المركز العام للحزب الشيوعي بالخرطوم (2).
سيتحرك موكب التشييع الرئيسي من المركز العام للحزب الشيوعي في تمام التاسعة صباحاً، إلى مقابر فاروق، وسيكون الموكب راجلاً وصامتاً.
يصلي على جثمان الفقيد شيخ الطريقة الإدريسية، بناءاً على وصية الفقيد.
يخاطب المشيعين بمقابر فاروق الاستاذ يوسف حسين عضو المكتب السياسي نيابةً عن الاسرة والحزب الشيوعي.
يتحرك موكب المشيعين بعد الدفن وخطاب الاستاذ يوسف حسين إلى سرادق العزاء لتناول وجبة.
تبدأ في الثالثة عصراً مراسم رفع العزاء بكلمات من أسرة الراحل والحزب الشيوعي والقوى السياسية.

الحارث أحمد التوم
رئيس اللجنة

Quote: يصلي على جثمان الفقيد شيخ الطريقة الإدريسية، بناءاً على وصية الفقيد.

يعني باختصار الراحل المقيم تارك وصية محددفيها مين يصلي عليه مافي داعي للجدل في لا شيء .

أبو قصي

Quote: Quote: يصلي على جثمان الفقيد شيخ الطريقة الإدريسية، بناءاً على وصية الفقيد.

شكرآ أبوقُصي وكل المتداخلين
ورحم الله الفقيد بقدر ما أعطي لهذا الوطن

Quote: مافي مجاملات في الدين

What relgion? definitely what you were talking about is not mine... The Islam I belive and share with other Communists/leftists is not the Islam you are talking about ya Doctora...

mohamed elgadi

الي الجهلاء من مدعي النضال



عليكم بقراءة الاحكام الفقهية الخاصة بمن له الحق في الصلاة علي الميت


وهي عبادة ومحددة وليست مجالا للمزايدات السياسية


وللمساعدة


http://www.moqatel.com/openshare/Behoth/Denia...th/sec05.doc_cvt.htm


http://www.mojtamai.com/books/index.php?optio...9%84-1&limitstart=15

Quote: 15 What relgion? definitely what you were talking about is not mine... The Islam I belive and share with other Communists/leftists is not the Islam you are talking about ya Doctora...

ايوا بالتأكيد وماعايزة مغالطة دينكم ما يهو دينا ولا اسلامكم ياهو اسلامنا



اللهم ألهمنا رشدنا، وقنا شرور أنفسنا، وأصلح شأننا كله، وأعذنا من مضلات الفتن. اللهم اجعلنا لنعمك من الشاكرين، واجعلنا هداة مهتدين،
على الحق ثابتين، وعند النعماء من الشاكرين، وعند البلاء من الصابرين، ولك من الذاكرين، وعند الجزاء من الفائزين، وفي الجنان منعمين
، وعن النيران مزحزحين، ولا تجعلنا ممن اجتالتهم الشياطين، وشغلته بالدنيا عن الدين...

آميييييييييييييييييين

انا لله وانا اليه راجعون

تغمدك الله بواسع رحمته
الاستاذ محمد ابراهيم نقد هرم سياسي متفرد, ومناضل كرس عمره مهموماً بقضايا الوطن,
عفيف, خلوق لم تلن له قناة ولم يهتز عوده قط ايماناً راسخاً بالوطنية الحقة..
ألا رحمة الله عليهم جميعاً وتشملهم مغفرته في جواره مع الصديقين والشهداء..
وسيظلوا مخلدين في وجدان الشعب السودان المكلوم الصابر
وحضوراً ثراً بأعمالهم وارثهم الذي لا يقيم بثمن..

سأصلي عليه
وأدعو له
شئتم أم أبيتم