حميد.. زي التكنو قبل ده ما فارقنا زول بعد الرسول

اللهم أغفر لعبدك (حميد)
وأنزل على قبره شآبيب الرحمة .. آمين]

(بريــدك يا زول بريـدك
بعشـــقك حتّى الهيام
أريحيتـك عد تزيدك
مهابة وليك القيـــام)

(باغتنا ريح الفجعة ليل

فرنب في جوفنا مرابنات الصبر

شات سعن الجلد

صادنا الذهول ..

زي التكنو قبل دا

ما فارقنا زول بعد الرسول

واللاّ التقول أول قلوب في الدنيا

يغشاها القدر بعدن تضيع منّو الدروب

تنطمبج الساحات حريق

يدغي الطريق المحتمل

كل الفريق سوقر وراك

يا جرحنا الكيف يندمل

ما بار وراك شهد الغنا

ونحل الحناجر ما همل

صادر خلايا أبو الدبر

صاقر حناياه نمل .. نمل

وين ماشي ..

يا نبض الرحيق

سايب المشاعر ريق دقيق)

(يا نسمة نشدتك بالله
كان ماشي علي نوري
تزوري
حبّاني وأهلي وخلايي
………..
أغريله سلامي
وقوليله
المطرة إن صبّت
يا الجايي
العرق الناقع
دا الليله
وأولابو كشينبة وإنقايي
…. …. ….
قندول الشوق حد ما لبّن
دندح حبّايي وحبّايي
الطير ورياحاً قد هبَّن
ينفزعوا ويرموا الحاحايي
إندلِّي على الجرف الليلنا
وجيبيلي معاك
كركجايي
ما هو الكركجي
خلق نيلنا
وساحرني صفاهو الشبّايي)

(أيوة بحبك حباً جمة
وياما بعزك يا نادوس
أحبك وانتي ماساتي
في زولاً حب ماساتو
بحبك صاح
أحبك يا ندى الاصباح
يا بهجة صدى الافصاح
شايلك وفكرو شقيش راح
عيونك ياها ناساتو
أحبك وانتي ماساتي
في زولاً حب ماساتو
بحبك من زمن مو أسع
وأحبك لزمن لسع
يا عشم البدو النجع)

(النخلة في الليل المهول .. وحيدا في عز الرياح
فارس يدارق في الرماح .. الجايا من كل اتجاه
رغم الجراح .. شح إلمي .. الزاد والسلاح
راكز يصول .. لا أنّ ولا حنى للجباه
لا خان بصيرتو الإنتباه
لا حتى قال ديل المغول
لا ختّ آه على عز قديم .. روح عجول
طول مداميك الصبر .. سدابا طاقات النباح
كل ما نزف من جوفو دم .. كل ما عزف لحنو الصباح
نجم الميامين الحمش ..
ينضارى شان تشرق شمش
تدي الحياة .. الناس .. الحقول .. الدابة .. والطير .. والبمش)

(ولي زول وراهو شغل بعيد .. جابرا الظروف
يطلع قهيوتو وشاي صباح
وآخر المطاف ..
الموت بيلفح بسمة من توب الزفاف
الموت بيشرق نسمة في كل الصبا
النخلة ترباية العباد .. بي جلالا تنحول رماد
ورمادا ينحول سماد
وسمادا يدخل كم بلاد
وديانا تخضر والبطاح
شوف كيف كفاح النخلة .. شوف كيفن بتتحدى الرياح
تعبر على مر الحياة وتنمطق الموت بي جلد
من بعدما ملت البلد .. شتلاً معمر بالألوف
وشايل مخلف بارتياح
طول المصير .. النخلة حوتة الصحرا .. نوارة الجروف
تلقاها في أجمل وشاح
بي جراحا رجّتنا الصباح .. يا القلتو ما بترجى الصباح
النخلة تحت الأرض سر .. والنخلة فوق نخلة نصاح
والدنيا أوسع ما تكون .. والجو براح
وكل الرياح فوقا بتمر .. يكفيها دا .. ويكفيها صاح
ما استسلمت لي ريح غريب .. وكل الرياح فوقا بتمر ..
والنخلة ما بتخبر خلاف ريح اللقاح
والهمبريب وريح الصلاح
يا معوض الليل بالصباح
يا معود النار اللهيب .. روض نخلنا على الرياح
وفي لجة البحر الغريب .. أدي الرواويس الصلاح
يكفينا دا .. ويكفيها صاح)

[غربل عليك ليل المدائن الكان زمانك حالا زين .. ناشدتها
فتش نهارات القرى المتكية فوق شعب الصبر .. ساندتها
علم بطانا الشيطنة
غنيت معاهن .. سودنا .. يا سودنا .. يا سودنا
لملمتهن والدنيا ليل .. والقمرة بت فاتا القطر
وصف لهم حس شليل .. ردد حروفهم ردتها
وقف سحابي مع الدغش .. شهدتها
شهدت معايا على العذاب .. الهد أضلاع الغبش .. راعفتها
تكلت خدودا على بكاي .. لاقي السجون .. جاهد بها
بي جيهة الجذب القديم .. دخلت مكندكة بالشباب .. خنت التراب .. راودتها
وفوق ها التراب .. واعدتها
ولا إنتي جيتي ولا هي آه .. روحت وين]

[يا منقاش أحزان وإنشرت .. وادي الفرح إتمدد صي
يا راحلين عِنْ دُغُش الليل .. ما لاقيتو جناياً زي
تكية نخل الفجر الجاسر .. في المترة عراجين ضي
يا رعّاوة العرب الرُّحّل .. ما لاقاكم في المطراني
في كاويق الجرف الأمحل
بين أسراب الرهو الراحل .. ساند أكتاف الليل الميّلْ
عِنْ ساساق الغيمة عليكم
بين رقراق الخيمة معاكم .. ما أديتوهو شوي بي حرجل
آ رطانة الليلهم ليّلْ
ما لاقاكم في ونساتكم
بين الشادي وبين كاساتكم
في صلواتكم .. عِنْ دعواتكم
أو دقساتكم عِزْ خلواتكم
زول زول الله إن ِمحِن آ بسأل
الهبّاد لي غُلْب اخواتو
الفرّاح عوّان الحلِّي
الفدّار لي الليل ظلماتو
آ نجمات شقيش قولِنلِّي
ما لاقاك طالع مندلي
المطعوم من طيبة أماتو]

[ست الدار سامعاني يا اخيتي ومرتي وامي وأم الكـل
أنا بندهلك من شارع الله .. فوقي هجير والتحتي بقل
سبي معايا الشردو راجلك .. والحرمونا شوية الضل
سبي الحالة العالة علينا .. حتى احكيلك بالتفصيل
حاصل الحاصل يا بت أحمد]

[فرحانابك يا أحزان
فرح النار بي لوح الزان
مبسوطابك يا المبسوط
ما هزاني مصيرك
قدر ما هزوني الميتين عامل
ميتين عامل في فد مرة
ميتين أسرة تروح وين
في الأيام النجسـة المرة
ميتين عامــــــل؟؟
والله مهـــــازل
والله عمايـــــل]

Quote: إنّا لله وإنّا إليه راجعون "يا ايتها النفس المطمئنة ارجعى الى ربك راضية مرضية وادخلى فى عبادى وادخلى جنتى" اللهم أرحم الشاعر المبدع/ حميد وأسكنه فسيح جنّاتك اللهم باعد بينه وبين خطاياه كما باعدت بين المشرق والمغرب اللهم نقّه من الخطايا والذّنوب كما يُنَقّىَ الثّوب الأبيض من الدّنس اللهم أغسله بالثلج والماء والبرد اللهم أبدله داراً خيراً من داره وأهلاً خيراً من أهله اللهم أجمعنا وإيّاه في مستقرّ رحمتك اللهم إنّا نسألك بإسمك الأعظم أن توسّع مدخله اللهم آنس في القبر وحشته اللهم ثبّته عند السُّؤال اللهم لقّنه حجّته اللهم باعد القبر عن جنباته اللهم أكفه فتنة القبر اللهم أكفه ضمّة القبر اللهم أجعل قبره روضةً من رياض الجّنّة ولا تجعله حفرة من حفر النار اللهم إن كانت محسناً فزد في إحسانه ، وإن كانت مسيئاً فتجاوز عن سيّئاته اللهم ألحقه بالشُّهداء اللهم أفتح عليه نافذة من الجّنّة وأجعل قبره روضةً من رياضه إنّا لله وإنّا إليه راجعون

عزالدين عباس الفحل
ابوظبي

.

.

.