سلام عليك حميد ف دم الراحلين كتاب

كيف يرحل البدر؟؟

وكيف يموت ؟؟

كيف يفيض النهر؟؟

وكيف يجف ؟؟

كيف هُمود السحر ؟؟

كيف يموت إنسان في روعة حميد!

ويكتئب القلم

وكأن الحبر دموع تخضب الصفحة

وأنا مذهول!

أأصدق أن حميد رحل بهموم الكادحين

هل تلك الجموع تزرف دموع وداعه حقا مات حميد؟

لكن كيف يموت من يملك وجدان ألامه

أنا لم ألمح في عينيه شحوب الموت

حين سامرنا بالكلمات القصيد أول أمس

حين خضب أنامل الشعب لآخر مره

كان قويا مثل السيل

وكان جميلا مثل الزهرة

يرنو حينا للآفاق البعيدة ويروي شعره

آه يا قلبي ..مات حميد

أمات الشاعر

لكن مهلا...

حميد ذاك الحالم بالجوزاء

ذاك الجامح..

ذاك الثائر..

ذاك الشاعر..

ذاك الجاثم ..

ذاك النائم..

ذاك العابر ..

عند جدار القبر أودع الحُلم

رقد حزينا كالصفصاف المؤرق

سار النعش علي الأكتاف تشيعه

فلول الأمة المكلومه

تهفو مصدومة وغدت ياليل محرومة

وأنا والنعش يغادرني في سكر مثل المخمور

والصدر يجيش بهموم الغلابة من لهم بعدك حميد

والحزن تدفقاته تتدافع حينا وتفور

حميد:

اتخذناك حُلما ولن ننسي يا صاحي أحلامك والقصيد

وغدا موعدنا يا شاعري

القيا في الملأ الأعلى.


،،،،أبوقصي،،،،

وقفوا الخلوق أمام المعبود

شهدوا الحق بالقوافي الحداد

حزنت الطيور طار الرباب

قطع وتر النضم ضٌمْ

رحل حميد السماح كحل الليل السواد

رحل الكلام في جوف الطريق ضّـــل

سكت الرجوع ماهو حال السواد الاعظم من الجموع

لاحول ولا قوة إلا بالله

،،،،أبوقصي،،،،

عم عبد الرحيم

أشعار / محمد الحسن سالم حميد

فتّاح يا عليم
رزّاق يا كريم
صلى على عجل
همهم همهمة
حصّن للعباد .. وهوزز سبحتو
دنقر للتراب .. هم فوق همهمه
صنقع للسما
وكان فى الجو فى غيم
وكم نجمات بُعاد
وكان الدنيى صيف
لا قالتلو كيف
كيف أصبحت .. كيف
لا لمسة وداد
لا لمسة حنان
لا رمشة طِريف
من قلباً وفى
زى أيام زمان .. أيام الدِفِى

كانت ماها فِى .. كانت فى المراح
شدَّتلو الحمار .. تحلب في الغنم لى شاى الصباح
والطير ما نضم .. ما رسـّل نغم

عم عبدالرحيم
إتوكـّل نزل .. فى المُشرَع لِقَى
زُملان الشقا
الجا من الجريف .. الجا من الجبل
علْ الناس بخير
صبّح هاظرُمْ .. نقْنقْ ناقَرُمْ
غاظوهو .. ونعَل
وعم عبدالرحيم ما بخَبِر زعل
كل الناس هنا ما بتخبِر زعل
تزعل فى شِنو .. وتزعل من منو..
كل الناس هِنا .. كل الناس صِحَابْ .. كل الناس أهَل
والماهُم قُرَاب .. قرّبـُمْ العمل

الطاق اليَطُقْ .. عشتْ .. أبوالزَمَل
بى الحال العليك .. بى الفال .. بى الأمل

عم عبدالرحيم ..
كُتْ فلاح فى يوم
فى إيدك تنوم .. على كيفك تقوم
لا دفتر حضور .. لا حصة فطور
تزرع بالقمر .. تقرع بى النجوم
لكن الزمن .. دوّار .. آ .. بِدُوم

عم عبدالرحيم ..
ماشى على الشغل
فى البال القديم .. انعارض تُكل
تنشايح جِراح.. كيف الغُسُل
الدِنيِى أم صلاح تبدا من التُكُل
من حِجـّة صباح .. فى حق المُلاح
فى الغُبُن الجديد .. فى القسط القديم
وبيناتِن عشم .. فى الفرج القريب

أمونة الصباح ..
قالتْلُو النـِّعال والطِرقى .. إنَهَرَنْ
ما قالتْلُو جِيب
شيلِن يا الحبيب غشّهِن النُقُلْتـِى والترزى القريب
بس يا ام الحسن ..
طقّهِن .. آ .. بِفيد .. طقّهِن .. آ .. بزيد
إنطقّن زمن
وإن طقّ الزمن .. لازمِك توب جديد بى أيـّاً تمَن
غصباً لى الظروف .. والحال الحَرَنْ

شان يا أم الرحوم .. ما تنكسفى يوم
لو جاراتنا جَنْ .. مارقات لى صُفاح
أو بيريك نجاح
ده الواجب .. إذن
وأيه الدِنيِى غير .. لمّة ناس فى خير
أو ساعة حُزُن

عبد الرحيم يا حُر إت ماكا حُر
يا ريت التمر .. ياريت لو يشيل كلِّ تَلاتْ .. أشـُرْ
ولاّ أيام زمان كانت ما بتمُر
كان ماجاك هوان .. ما لاقاكى ضـُر
كان لا ضِقت ضيق
لا أنغرغرْ صبر
ولا شابيت غريق .. ولا طوَحْ فقُر
كان ماكان .. وكان ..كان أكيسيك دُر

حيكومات تجى..وحيكومات تغور
تكم بالحِجِى .. بالدجل الكِجُور
مرّة العسكرى .. كسـّار الجِبُور
ويوم بإسم النبى .. تحكمك القبور
هِم يا الفنجرى .. يا الجرف الصبور
كل السمتو مات.. باقى على التِمور
وأرضك راقدِى بور
لا تيراب وصل .. لا بابور يدور
والماهية أُفْ
عيشة هاك .. وكُف
فى هذا الزمن .. تـُف يادنيا .. تـُف
يا العَبِد الشقى
ما أتعوّدْ شكى
لكن الكفاف فوقك .. منتكى
والسوق فيك يسوق
حالك ما بتسـُر
إِلا كمان فى ناس فايتاك بى الصبُر
ساكنين بالإيجار .. لا طين .. لا تمُر
وواحدين بى الإيجار .. ما لاقين جُحُر
سِلعـتُمْ الضُراع .. والعرق اليخُر

عمال المدن
كلاّت الموانى
الغُبُش التعانى
بحّارة السُفُن
حشّاشة القصوب
لقاطّة القطن
الجالبة الحبال
الفِطن الفُفُن
الشغلانتو نار
والجو كيف سُخُن

فرقا شتى بين ناساً
عيشا دين مجرورة وتجر
تكدح بالأجر ومرة بلا أجر
عيشُنْ كمّهو .. وديشُن هان كدُر

ناساً حالا زين
مصنع .. مصنعين
طين فى طين .. ووين
ما مرابا مُر.. بارد همها
لا يعرق جبين .. لا وشاً يصُر
عين والله .. عين
كلها كمها .. وعزها هان قدُر

فى الجنة أم نعيم .. فى الجنة أم قُصُر
يا عبد الرحيم إلا ورا القبُر
ويلكد فى الحمار
لاتسرح كتر
فتاح يا عليم
وإن كان الفقر يا عبدالرحيم
أشبه بالكُفُر

حيكومات تجى..وحيكومات تغور
تكم بالحِجِى .. بالدجل الكِجُور
مرّة العسكرى .. كسـّار الجِبُور
ويوم بإسم النبى .. تحكمك القبور
هِم يا الفنجرى .. يا الجرف الصبور
كل السمتو مات.. باقى على التِمور
وأرضك راقدِى بور
لا تيراب وصل .. لا بابور يدور

ونقرط للحمار
نقريط الحمار .. لاتنسى النِعال
الطِرقِى الخدار
اللِّبِس الجديد
تسريح السفر .. للماشى الصّعيد
ماشى الدّيش .. نَفَر
والبال إشتغَل
بى الأبى ما يعِيد .. الحول ما أشتغل
الغُبُن الشديد .. السابا ورحَل
الضيق .. المحَل
والفرج القريب
الجا .. وما وصَل
زى الحال ده يوم .. لا كان .. لا حصَل
والبال إشتعَل
السكة الحديد .. يا عمو القَطَر
يا عبدالرحيم قِدّامك قطر

وسال الدم .. مطر
وطارت دمعتين .. وإنشايح وتر

يا طاحن الخبر
ما بين القضا .. ومَرْحاكة القدر
الشِّهدوا الدموم .. والدمع الهَدَر
إيدُمْ فى التُراب .. والعين فى القطر
عارفين الحصل
عارفين فى حذر
الخبر اليقين .. بوّخ .. وإنتشر
أطفال القرى .. وعمال الحضَر
أدوهو الطيور .. ودَّنوا البحر
إنصاعت سحاب
وإنْدافَقْ مطر
عم عبد الرحيم .. فى الشارع عَصر
لى تال اليسار
متفادى الكَجر .. دورية الكجر
جفّلت الحُمار .. وطلوَح زى حجر
وعم عبد الرحيم .. إتلافا القطر
فتاح يا عليم .. سال الدم مطر
جرتق للتُراب
منشور بى كتاب
روشتّة .. وجواب
ماهية شهر
مفتاح الضراب .. أورنيكين سَهَر
جنب لِبدة حُمار
مقطوعين ضَهر

عم عبد الرحيم ..يا كمِّين بشر
صحِّى الموت سلام
ما يغشاك شر ..
صحِّى الموت سلام
ما يغشاك شر

(أيوة بحبك حباً جمة
وياما بعزك يا نادوس
أحبك وانتي ماساتي
في زولاً حب ماساتو
بحبك صاح
أحبك يا ندى الاصباح
يا بهجة صدى الافصاح
شايلك وفكرو شقيش راح
عيونك ياها ناساتو
أحبك وانتي ماساتي
في زولاً حب ماساتو
بحبك من زمن مو أسع
وأحبك لزمن لسع
يا عشم البدو النجع)