قالوا (......) فقل /ضع كلمة عن شاعر الكادحين و الغلابة حميد

رحمه الله رحمة واسعة

فقد كان شاعرا شعبيا تتمدد كلماته في اركان البلاد

وتدخل اشعاره الي كل بيت وكل شخص وكل جهة


لان شعره يمثل نبض الغلابي ولسان حال الغبش

الرحمة ورحمة الله واسعة ومغفرته اوسع
لك الرحمة يا حميد
أللهم اسكنه فسيح جناتك مع الصديقين والشهداء وحسن أولئك رفيقا
أنت ولي ذلك والقادر عليه

العزاء لكل الشعب السوداني لكل الكادحين عمال ومزارعين جمل حميد همهم
تغنى باسمهم

ومن الواسوق ابت تطلع
ومن الأبرول ابت تطلع
من المدفع طلع خاذوق
خواذيق البلد كترت

لك الرحمة يا انشدت لنوري
نورة هي الشعب الكادح

هي اقيفن نوري فيكن
نور نقاحة الجروف
نوري حلابة اللبيني
للسغيرين والضيوف
نوري ساعة يحر
تنقلب نسمة وتطوف
تدي للجيعان لقيمي
وتدي للعطشان جغيمي
وتكسي في الماسين عرايا
وفوقا يتقطع هديمي

نوري في الدونكا لدغت
جا الفقير بالليل حواها

تبكيك الجابرية الحزن إرثها يامن خلدتها حروف تنشد

الجابرية تحي الشعب
دايرين بوسطة ومدرسة اوسطى
والشفخانة قصاد البوسطة

تبيكيك النخيلة في الليل المهوووووول

النخلة في الليل المهول
وحِيدا في عو الرياح
فارس يدارق في الرماح
الجايا من كل إتجاه
رُغم الجِراح
شوف حالنا والزاد والسلاح
راكز يصول
لا أنّى لا حنى لي الجباه
لاخان بصيرتو الإنتياه

لك الرحمة والمغفرة
تنوح ترثيك ست الدار بت أحمد ( ام التومات )
زيني الزين
أبـ حالاً زين

نواحاتك ما بتنوم الليلي
السرة بت عوض الكريم تبكيك دموعها فاصدا الخد

وجات داخلّي
زي مرقت غضب من جوف حليم
في زمن صعب
رمت السلام
زي شنطة من كتف المسافر
من التعب زي ردخا رب

تبكيك كل كل نخلة في الشمال
تبكيك كل زرة مكامدا في الصي البعيد
تبكيك كل زبدة موجة في النيل العظيم
تبكيك كل ابنوسة وباباية وبافرا مطبوخة للجاين بعد شقى يوم طويل
يبكيك التبلدي والعطرون
تبكيك التاكا وتوتيل والجروف في السواقي
تبكيك كل دفرة سيل في الكربكان والعوتيب العاتي
تبكيك ورش عطبرة والعمال رقد صوتهم واتوسد التقيلة تراب
تبكيك كل قرى الوادي راقدة علة ضفة النيل القديم
تبكيك بنية القراصة شايلا كراسا تستسق لي المدرسي
يكيك كل الشعب وبدمع الشعب في قلوبنا خالد يا حميد
وما مات من ترك
تركت كبيرة وكبير فينا
سوف تظل في قلوبنا ونحملك نسمة بادرة تداري اوجاعنا وألمنّا في الزمن الصعيب
نعشك مشى والباقر ذكرك وذكرك مداد حرفك منقوش في العيون في القلوب جوة راقد بين طيات الحنايا
لك الرحمة والمغفرة
وإنا لله وإنا إليه راجعون

شاعر بروعة بلادي
بنقاء سمائها
بطعم ماء نيلها العذب
إنسان بكل ماتحملة الكلمة من معاني
بكاه ملايين المحبين

Quote: هاجر سيد احمد الاستاذ بكرى مافى كلمة او احساس حيعبر عن حميد..مفجوعة انا كواحده من الناس الاتربو بيد حميد..شعرا وانسان..مفجوعة نورا وغبشها..مفجوع عم عبدالرحيم..الجابرية ..وكل الغبش الماعندو ليهم غير نغيم..كلمات حميد كانت مماسكانا فى كل حزن..موردنا ومرجعنا ..غلبها تماسكنا فى فقدو..كذاب البقول كلمة ولا قصيده يلخص بيها حياة انسان بحجم ماضينا وحاضرنا والمليون ميل مربع..بطول النيل وعرضو..بخصوبة ترابو وقامة نخيلو ..بجرحنا ..فقدنا والشرخ ..خبر رحيلو نزل على واكيد على كل السمعو بصمت..ودهشة مابتقدر تقول عليها حزن ولا احساس بانعدام الوزن..فقدان معنى للحياة او هى احساس بالتشتت..زى حيطة شلت طوب اساسها ولا سبحة وقطعته خيطها..احساس صعب وصفو..وحميد عارف وقال ........... زي التكنو قبل دا ما فارقنا زول بعد الرسول واللاّ التقول أول قلوب في الدنيا يغشاها القدر بعدن تضيع منّو الدروب تنطمبج الساحات حريق يدغي الطريق المحتمل كل الفريق سوقر وراك يا جرحنا الكيف يندمل ما بار وراك شهد الغنا ونحل الحناجر ما همل صادر خلايا أبو الدبر صاقر حناياه نمل .. نمل وين ماشي .. يا نبض الرحيق سايب المشاعر ريق دقيق .................... كانو بوصف فى حالنا وعجزنا ومشاعرنا البقت ريق دقيق..نشفنا من كتر الدموع و فترنا من غشيان القدر ..ياجرحنا الكيف يندمل ..وكل مانقول اخر حزن واخر فقد يطلع علينا حزن جديد وفقد جديد .. حميد يا نجم الميامين الحمش .. ينضارى شان تشرق شمش تدي الحياة .. الناس .. الحقول .. الدابة .. والطير .. والبمش ..ترحل كيف ولسة نحن قدامنا الكتير نتعلمو منك ..ترحل كيف و وآخر المطاف .. الموت بيلفح بسمة من توب الزفاف الموت بيشرق نسمة في كل الصبا يلفحنا منك او يلفحك منا ..قبل ما نقولو ده وكتو؟ اقيف شوية باقيلك "إنت" بلاك في زين ما تهشم إبريق الرضا .. خنست نسيمات السمح والبسمة زي حبة قمح لفحا وطفر طيراً كُترْ أورث عصافيرها الضنى .. يبّسْ غُناها مع الفجر هطل على الشدر الهموم .. وشاشات نهارات الهنا ........... مافى كلام ممكن نقولو اصدق من كلماتك مافى وجع ورثاء ونواح بورى احساسنا وراك ياحميد خبرك دخل زى مرقة غضب من جوف حليم فى زمن صعب.. حسيت بأني متل حجر .. جدعوهو في نص البحر .. قام البحر بنى فوقو طين......وياحميد كضب ..معروفة مامن قوة تحمى الفرح ولا الترح حين اندلاقو على القلب..ونحن مافى كلمة فى قصايدك جهزتنا لى فقدك ده ولا فى طريق ممكن نمشيهو عشان نمرق من حزننا عليك..انا ببرطم ساى وماعارفة كلامى مرتب ولا مفهوم زى احساسى الحالى ..ياحميد انا مازومة ومهزومة بفقدك ..وعاجزة عن التعبير..يكفيك انك حميد وكفى..........وداعا ياعشمنا يا روحنا وضميرنا الحى وداعا ياتاريخ وياعشم فى باكر وياحلم غبش ...اقيف شوف الخلوق محنانا

كان إنسان من طينة نقية
سوداني كامل الدسم ...

له الرحمة والمغفرة

حتي متي هذا الحزن كل يومٍ يطل شفيفا
ويرحل منا كل يوم فذ
من تبقي لهذي الارض من عشاقها
حزني عليك كبير يا ايها الفياض عشقاً
يا مترف الكلمات رقراق العيون
يا صوت شعبي في متاهات الحقيقة

محمد الحسن سالم حميد
شاعر الناس الغلابة وشفع العرب الفقارى ، انتماءه للكادحين لم يقيد إبداعه أو يكبل فكره بل سما به إلى أفاق أرحب في الإنسانية ، فهو أشبه بتلك النخلة التي غنى لها مع الراحل وردي
شوف كيف
كفاح النخلة
يوت
لا حيله
تتحدّى الرياح
تصبر على مُر الحياة
وتتمطق الموت
بي جلد
من بعدِ ما
ملَت البلد
شتلاً
معمِّر بالألوف
لك الرحمة وللبؤساء والفقراء والكادحين (عمال المدن ، كلاّت الموانى ، الغُبُش التعانى ، بحّارة السُفُن ‘حشّاشة القصوب ‘ لقاطّة القطن ، الجالبة الحبال ، الفِطن الفُرُن ، الشغلانتو نار والجو كيف سُخُن ) إليكم جميعا خالص العزاء ولكم ولنا السلوى فيما ترك لنا من إرث ثقافي وفكري كلما جئنا على ذكره ترتجف مفاصل الديكتاتورية وترتعد ، لك الله يا حميد ولنا الصبر وتعظيم الأجر .

آآه يا غبش

آه يا غُبُشْ .. ما عندي ليكم غير نغيم ..
برجوه ينفُض لي غبار زمن القسا الكتّاح
يهِزْ عرجون نخل صبر الغلابة الطالْ يحِتْ يخرِتْ
تباريح الأسى الممدودة فوق نور الدُّغُشْ
يا نورا آه ..
يحرَد كنائسنا المسيح .. يعرش مدارسنا الصّدى
ييبس .. يباس حلق العصافير الوديعة من البُكَا
يندَرْدَرْ الصّوت البعيدْ .. أسيان يصُد من دون صدى
ينكَفْرَنْ الفجر الصّبوح .. يحمي الزهيرات الندى
تختا الدراويش الضّريحْ .. يسكن خلاوينا الجنون .. يهجر جوامعنا الإله
يا نورا آه ...
تطرح غيوم الشوق تئِنْ .. تشرَقْ تموت
خيل كلمة الحق التّناهِدْ في الشِّفاه
تعقِر بسيمة الصِّحْ مع لوبي الجّروفْ
تغرِزْ ضريعات الحروفْ
ينشف مُرَاح الأمسيات .. تتمطّق الأرضة المروق والأغنياتْ
اللّي الشّروق .. والأرض والحب والمطر تضْهَب تتوه
وكتين يضيع عرق الجِّباه الشُّم .. شمار في مرقة
آه يا نورا آه .. من دّرْبِكْ التّور نَفَس خيل الصّبُر ..
فَتّر خطاوي الشّوق وراه
يا نورا آه ..


وداعا صديقي

حميد رحيل بقامة وطن يا لحزنك

رحل حميد .. احسن الله عزاكم اخى محمد عبد الجليل

الريس بكرى حميد له بصماته التى كانت ترسم شخصيته بدون شك
العمى بس هم الذين لا يدركون ما يقول لان قوله يصادم شهواتهم

عمرت اشعاره وجداننا بالخير
في زمان بعيد
كان الاحباب يأتوننا باشعاره محملة علي اشرطة الكاسيت
اشعلت تلك الاشعار في نفوسنا نار حب لن تنطفيء
غيرت تلك الاشعار مسيرة حياة الكثيرين من جيلي

" الضو بكا
بكاهو صوت الطائرات"

كانت تلك الاشعار في قامة كتاب كامل تقرأه لتعي ما حواليك
تقرأه ليملأك الجمال لمن تقول كفي
احببنا في حميد
حبه للناس
حبه للتراب
حبه للبطولة
حبه للحق

" ايد العامل
هي القاع تعمل مو المكنات الامريكية
زيت العامل هو القاع يطلع مو المكنات الامريكية"

حميد من مزامير العزة صوته
صوته قديم و أكيد الانتماء لمياه النهر و رمال الشمال
صوته أكيد الانتماء الي كل ذرات تراب الوطن

فلنحب حميد حيا و ميتا
لان الموت في الحقيقة غياب قسري
حميد الان سجين الموت
فليطلق الموت سراحه
و ليصرف الموت وجهه القبيح عنا و ليكتفي
لقد اخذت مناايها الموت الكثيرين
و لم تبق لنا غير الخراب




طه جعفر

انا لله وانا اليه راجعون ... فقد كبير ومصاب جلل وحزن مقيم

ماذا يمكن ان نقول في شاعر قال كل شئ
مشاعر بكل كائن وجماد داخل جلباب رجل


كتب حميد عندما حدثته عن صديقي ميرغني النعمان الذي كان يناضل بشعره
اليوم رحل هو ايضاً هناك وكلاهما يحلم بوطن سلام سمح واسع سليم

منو البعدك ؟؟

منو بعدك البيسمع صوت الغبش .. و آنين الغلابة ؟

منو بعدك البترجم آهات وجع مكتوم فى نفوس محزونة فى زمن الكآبة ؟؟

منو بعدك البقدر يشيل حملك و يصون تركتك و يناصر أهلك ؟

مشيت خليتم بلا نصير ما ليهم غير كلماتك يرددوها لما الفجر يطلع !!

و لما فجرهم يطلع .. بمسحو دموعهم و بجو يزوروك .. شايلين باقات ورد.. يبشروك بأن صباحهم اشرق



اللهم اغفر له و ارحمه و اجعل الجنة مثواه ..

شاعر بحجم امة .
وكان نيليين فى وطن

اللهم أرحمه رحمة العارفين بالله اللهم أوسع له فى القبر
وآنس وحشته فيه وأنر له الجنبات ودرجه فى عتبات صراطك
المستقيم اللهم أرفعه لأعلى الفراديس اللهم لا تحرمنا وأهله
من أجره ولا تفتنا ولا تفتنهم من بعده وأغفر لنا ولهم وله
وصادق العزاء لأهله وذويه والعزاء لكل الأصدقاء عاصم محمد حنفى
وللأخ محمد عبدالرحمن شقل وللإخوه جعفر إسماعيل وحسن إسماعيل
ولجميع أعضاء المنتدى الأدبى الذى كان من نجومه ولا حوله ولا قوة
إلا بالله.



منصور

محمد الحسن الحسن سالم (حمّيد) .. إله الشعر عند العُربان ..

عفارم عفارم يا شعباً مسالم

يا حر الإرادة جمال وقيادة

يا وقتين تصادم بروقك تضوي

ورعودك تدوي ورياحك

تقصقص رقاب المظالم

نسأل المولى القدير أن يتقبله قبولا

حسنا ويدخله الجنة مع الصديقين والشهداء

حميد
كنت اري فيك الوطن
والان
حلم الوطن راح
كنت اري فيك الوطن
اتعلمنا منك
سمح الكلام
من وين كنت يجيب الكلام
...
ياوطن حقيقي
صادق في دمعتك
وقف الكلام
عم الصمت
ابي يقيف الدمع
...
مشيت شايل هم البلد في صفحتك
بس نعاود محطاتك
فينا
انت وطن
زي ما علمتنا
غسل الطهارة من الوثن
ورد الشعب ...الناس
فقدناك ياحميد
فقدناك ياوطن
فقدناك ياحب .
. كل الناس
كنت شمعة
في صحرا
سموما لاهب
وليلا ضاهب
.. وزي كنا نكوسك .. نلاقاك في كلامك
نلقي جوانا فيك
ونظل نبكيك
انت مننا وفينا
من زمن بدري
من يوم عرفنا الحروف
تاتيه
وتقوم تمشي

كان الرائع الإنسان
مع الناس كل الناس
في أفراحهم وآمآلهم
في أحزانهم وألآمـهم
عاش معهم معاناتهـم
عمالاً وزراعاً.. طلاّبا
ويتاعـين ورنيـش !
كان خنجراً في خاصرة
الشموليين من كل لون
رحمات الله الواسعة عليك يا حمـيد
بؤاك الله جنات الفردوس وغفـر لك
ذنبك وصـبر أفراد أسرتك وأهلك وأحبابك
-----------
يا الحاضر الغايب في الدنيا ما جايب خبر المدينة الكان
على رغم ما فيها من فاقة من حرمان
مرات اياديها تعطف على الإنسان
بي فكة في قروشا
بي كلمةً طيبة بي فضلة في مطعم او برتكانايتاً ضرباني في كوشة
والليلة بانت زي بيتاً في آخر الحي ناساتو منبوشة
يا جرحنا الهايم طول النهار حايم
يلبد إذا ما شاف صحبانو مكشوشة
يضحك إذا الكومر قبل على كوبر
ولا المديرية ينمطق الفرحة بس فرحة مغشوشة
إن تنجا من كشة دردير وتلتيلة
كيف تنجا من جوعة من بردها وليلا
عزت برنداتا واوكارها مطروشة
بيت الله قافلنو
مستشفى غافرنو ساحاتو مرشوشة
كم يوم يعز النوم
رغماً عن المشموم والدوخة والدوشة
دي مدينة ما هيلك
مافي البيشبهلك ما في البناديلك
لافي البخاويلك
غير ناس أحاويلن قطعن أحاويلك
أصحابك الساعتك لا بد يعاينولك
صمتاً يجيبولك
باكر تلاقيهن في وجبة فوق كوشة
جنب مجرى يحكولك
ودونا لي ضابط كالعادة وانكفرن قال وين أوديهن
والعندي ما قادر بالموية أكفيهن
والعسكر أدونا
سوطين وفكونا
كالعادة يا اخونا حيكومة مربوشة
دايرين شغل مافيش
غير نغسل العربات غير نضرب الاورنيش
عتالة جرسونات شغلاً ما يوكل عيش
وبالحالة دي الكشة
بلدية والبوليس مرات يجيك الديش
ما يقبضوا الباعوض ما يقبضوا الضبـــان والما بدور فتيش
الارزقي السمسار إشمعنى نحنا وليش
إحنا الحرامين ولا البدسو العيش
الزول يخاف يكفر يرجع يقول معليش
شقيش نقع شقيش حتى السجن مافيش
مافيش يا عيوشة

" عم عبالرحيم ما بخبر زعل ، كل الناس هناك ما تخبر زعل،تزعل من منو، وتزعل في شنو، كل الناس صحاب، كل الناس اهل، والماهم قراب قربم العمل".

" حكومات تجي وحكومات تمر تحكم بالحجي بالدجل الكجور...زي الحال دي يوم ما كان ما حصل".

عم عبد الرحيم .. كت فلّاح في يوم فى ايدك تنوم على كيفك تقوم
لا دفتر حضور لا حصة فطور تقرع بالقمر تزرع بالنجوم
لكن الزمن دوار آ بدوم
عم عبد الرحيم ماشي على الشغل
في الباب القديم انعارض تكل
إنشايح جراح ياما كيف الغسل
الدنيا ام صلاح تبدأ من التكل
من حجة صباح في حق الملاح
في اللبس الجديد ..
في القسط القديم .. وبيناتن عشم
في الفرج البعيد ..
امونة الصباح .. قالتو النعال والطرقى إنهرن ..
ما قالتو جيب ..
شيلن يالحبيب غشهن النقلتي والترزي القريب
بس يا ام الحسن طقهن آ بفيد طقهن آ بزيد
إنطقن زمن وان طق الزمن لازمك توب جديد
بي أي تمن ...
غصبًا للظروف والحال الحرن
عشان يوم الرحوم ما تنكسفي يوم...
لو جاراتنا جن مارقات لي صفاح ..
او بيريك نجاح ..
دا الواجب اذن ..
وايه الدنيا غير .. لمة ناس في خير او ساعة حزن

حميد قصيدتنا الأخيرة ...

رحل ولم يقل حتى وداعآ للرحيل ..

اللهم أجزل له الرحمات من عندك

كان احد الذين كتبوا الكلمة القوية دون خوف وداعاً شاعر الغلابة
- اللهم ارحمه فوق الارض وتحت الارض ويوم العرض عليك . اللهم قه عذابك يوم تبعث عبادك .
- اللهم انزل نورا من نورك عليه
- اللهم نور له قبره ووسع مدخله وآنس وحشته
- اللهم ارحم غربته وارحم شيبته
- اللهم اجعل قبره روضة من رياض الجنة . لا حفرة من حفر النار
- اللهم أغفر له وارحمه واعف عنه واكرم نزله ...

جف الحبر في اقلامنا ..فجعنا فجع الشعب السوداني كله لاجد مااقول خير من شعره ..ماذا نقول فقد قال حميد وكفي ووفي ..

صياعة مع الغفاري واهل الله في زمن غلط

تستغرب يا رسول الله
يا أول وتاني الخلفاء
تستغرب يا أبذر لو جيت
في هذا الزمن الجهجاه
لو فيكم حد يا حنفاء
إتجاسر وقال ما معناه:
(في الدين الطيب لا إكراه)
وبني آدم أدرى بدنياه
أو أن العالم شركاء
في الكلاء ..النار ... وفي الماء
أو حاول ينصح وينطاول
لي حاكم ظالم وقال لا
يا لاقى جهنم مأواه
فتحولو ترابيس شالا
يا راجع نفسه أقلاه
السيف فوق رأسو مخاواة
بالذات الزيك يا أب ذر
بالذات الزيك لو جاء
راكب دغريتو العرجاء
دايماً غلباوي وغالاط
لخباط للعيشة الخمجاء
بالذات الزيك لو جاء
في زمن الزيف المنشر
والتشريعات العوجاء
يا إنباع يا راجي الراجا
يا واقف فوق عمق الدين
يا شايف لي آخر دنياه
يا طيب ... يا إبن الغبراء
الشركة يسارك يا أب ذر
من إسمك واللا من الذر
الكسحت ديكا كريسيدا
داك سيدا أب دقنا شمطاء
وجيب إيدك يلا النيلين
لو درت تشوف العنقاء
يا صاحب النفس الأمارة
بالوعي الديني المحتارة
دا الدين ... المقلعة ده الدين
والمزرعة من فضل الله
سال سيفك داقش شقيش
قدامك عاين كم ديش
الزمن إندقش دقيش
الأمن .. محاكم التفتيش
في كل المدن العربية
حا تلاقي شدرتك مسبية
يا إنتحرت بي بترودين
وعصفورك منزوع الريش
أجلاف كنزوها بلايين
والناس بي الله ويا آمين
بتحلحل دين الكنتين
تنلفت كايس لي مين
الأمن ... محاكم التفتيش
وأصحابك جوة زنازين
وأسيافن صقروا ما فيش
ما إنبعنا وباعتنا قريش
ولأمريكا وبي حبة عيش
والحاكم قبض البقشيش
سال سيفك داقش شقيش
الأمن ... محاكم التفتيش
جنسيتك...بظبورتك...الفيش
في كل المدن العربية
حا تلاقي النفس العربية
في مصحة أمراض عصبية
بين الحجبات والأرتيل
تنململ شاحبة وصفراء
وقافلاها متاريس الديش
والكضبة عمايل الأمراء
سال سيفك داقش شقيش
إتراجع يا أبن الغبراء
يا صاحب النفس الأمارة
بالثورة القادرة الجبارة
إتراجع وأنسى الفقرا
أمثال العسكر غدارة
زراعك تنفد تتنفض
عمالك منك تتجارى
وكل الكادحين الشرفاء
وراح تفضل وحدك في الدارة
راح تفضل وحدك في البر
لا زوجة لا قطة ولا غطاء
لا تكتل نفس يا أب ذر
سيب خونة مكة وتجارا
إتراجع يا إبن الغبراء
في لجة انكسرت بي السارة
زلقتني عجالة الشعراء
فلقتني من الربذة حجارة
سرقتني بدمي الصحراء
أب ذر لا سمعني ولا تبعني
طبطب على همي بيسراه
وكان دمي إنماذج بدماه
بي دم الغبش الشهداء
من اول وتاني الخلفاء
إتجمع في رسول الله
زي نهر بيحفر مجراه
مصلوب فوق عتب الفيحاء
مجلوب في السوق السوداء
وما صرخت بنت أبي بكر
وا إسلاماه ... وا إسلاماه
كانت هي الأخرى وراء القصر
تنململ بين الدهماء
تجار الدين الساقطين
الجنرالات الجبناء
مكتوفة الأرجل والأيدي
مكفوفة الأعين عمياء

يا جمة حشى المغبون

حمـــــــــــــــــــــــــــــــــــــــــــــــــــــــــــيد
يا جمة حشى المغبون .. فى الزمن الهلاك من جاء
تكون حانت مواعيدك .. يكون وقت المطر قد جاء
وشرق ضوى البلد عيدك .. وطابت نسمتو العرجاء
و نمون يا طيبة تمينا .. وبدين ونعنه وغنينا الغنا الراجا
وبدت كاس المودة تدور عشق من حلفا لى راجا
حبابك ألف .. حبابك ألف
وياعنزنا القرجة
ويا لبانة فى الزمن المراحو نشف
ويا ########ة للخوانة للخوانة والعوج البدورلو ولف
دميرتنا البتروى جرف
مسيرتنا وتميراتنا الكانوا وقف
أصابعين الرجال رصاص سعر راس البنية سقف
تكون دار بى زمن عندك
نكون لمينا فى الفاتنا تكون فاتت ملامحنا وتضاريسنا
القبيل غمرت .. عرش بتنا وطوابيرنا
وبدت شتلات بعد غمرت
ضراعيك يا الولد كبرت
مراعيك يا البلد خدرت
خضار .. خدرت غزار غزرت
خضارا زين برغم الصيف وأناتو
عصافير الجلد كبرت
تباصر نسمة منتحرة
تطمن غيمة مندحرة
تضاير الغابة والصحرا
من الغمة وظلاما شين
ومنك يت قرير تنفك
وتكون اتحلت عقدة الدين
ويا جمة حشى المغبون فى الزمن
الهلاك من جاء
تكون حانت مواعيدك .. يكون وقت المطر قد جاء
وغابت شمس الابداع فى بلادي .. الله يرحمك ياحميد

حميد يا صوت الغلابى..
لك نسأل الله الرحمة والغفران..
اللهم أرحمه بواسع رحمتك وأسكنه فسيح جناتك..
"إنا لله وإنا إليه راجعون"

[/green]

زول سوداني بسيط مننا وفينا مليان إنسانية
مدرسة اتعلمت منها كتييييييييير
رفيق ومناضل ثوري صاح مظبوط
بشبهنا وزينا وبنضم شعر بكلامنا السوداني
مليان حنية وحب وسلام
زول من ضوء ووضوح
زولا دغري وغلباوي
سوداني جد
علمنا الحقيقة والانحياز للحق وغير الغبش ما اختار
السرة بت عوض الكريم وست الدار ونورا و و و و الضوء بكي الليلة
مصابيح السماء التامني طشيش يابا حميد
عفارم عفارم وماشين في السكة نمد من سيرتك للجاين والجابرية الليلة حزينة يازول من ضوء
بلدنا منكوبة ياعم عبدالرحيم وسلامي للمشوا قدامك من رفاق وما يغشاك شر وعقبال الخير يترادم علي بلادنا والدنيا تمش دغرية

خبرك
وجانا مع الجايات
وإن كترن
هن جنيات ونحن أمات
وخبرك شالن وفات
هينة الكباد أم دم
والحشا المفتت وما بتلم
والقلب المضمخ هم
والعرق الممدد مات
وباقي العيون مرقن
تفتش في ترى الدمعات
المدخورة لي شكرا
يومو اتولد
شكرا جزيل يا ولد
وقبل الوداع ... سلامات

فتّاح يا عليم
رزّاق يا كريم
صلى على عجل
همهم همهمة
حصّن للعباد .. وهوزز سبحتو
دنقر للتراب .. هم فوق همهمه
صنقع للسما
وكان فى الجو فى غيم
وكم نجمات بُعاد
وكان الدنيى صيف
لا قالتلو كيف
كيف أصبحت .. كيف
لا لمسة وداد
لا لمسة حنان
لا رمشة طِريف
من قلباً وفى
زى أيام زمان .. أيام الدِفِى

كانت ماها فِى .. كانت فى المراح
شدَّتلو الحمار .. تحلب في الغنم لى شاى الصباح
والطير ما نضم .. ما رسـّل نغم

عم عبدالرحيم
إتوكـّل نزل .. فى المُشرَع لِقَى
زُملان الشقا
الجا من الجريف .. الجا من الجبل
علْ الناس بخير
صبّح هاظرُمْ .. نقْنقْ ناقَرُمْ
غاظوهو .. ونعَل
وعم عبدالرحيم ما بخَبِر زعل
كل الناس هنا ما بتخبِر زعل
تزعل فى شِنو .. وتزعل من منو..
كل الناس هِنا .. كل الناس صِحَابْ .. كل الناس أهَل
والماهُم قُرَاب .. قرّبـُمْ العمل

الطاق اليَطُقْ .. عشتْ .. أبوالزَمَل
بى الحال العليك .. بى الفال .. بى الأمل

عم عبدالرحيم ..
كُتْ فلاح فى يوم
فى إيدك تنوم .. على كيفك تقوم
لا دفتر حضور .. لا حصة فطور
تزرع بالقمر .. تقرع بى النجوم
لكن الزمن .. دوّار .. آ .. بِدُوم

عم عبدالرحيم ..
ماشى على الشغل
فى البال القديم .. انعارض تُكل
تنشايح جِراح.. كيف الغُسُل
الدِنيِى أم صلاح تبدا من التُكُل
من حِجـّة صباح .. فى حق المُلاح
فى الغُبُن الجديد .. فى القسط القديم
وبيناتِن عشم .. فى الفرج القريب

أمونة الصباح ..
قالتْلُو النـِّعال والطِرقى .. إنَهَرَنْ
ما قالتْلُو جِيب
شيلِن يا الحبيب غشّهِن النُقُلْتـِى والترزى القريب
بس يا ام الحسن ..
طقّهِن .. آ .. بِفيد .. طقّهِن .. آ .. بزيد
إنطقّن زمن
وإن طقّ الزمن .. لازمِك توب جديد بى أيـّاً تمَن
غصباً لى الظروف .. والحال الحَرَنْ

شان يا أم الرحوم .. ما تنكسفى يوم
لو جاراتنا جَنْ .. مارقات لى صُفاح
أو بيريك نجاح
ده الواجب .. إذن
وأيه الدِنيِى غير .. لمّة ناس فى خير
أو ساعة حُزُن

عبد الرحيم يا حُر إت ماكا حُر
يا ريت التمر .. ياريت لو يشيل كلِّ تَلاتْ .. أشـُرْ
ولاّ أيام زمان كانت ما بتمُر
كان ماجاك هوان .. ما لاقاكى ضـُر
كان لا ضِقت ضيق
لا أنغرغرْ صبر
ولا شابيت غريق .. ولا طوَحْ فقُر
كان ماكان .. وكان ..كان أكيسيك دُر

حيكومات تجى..وحيكومات تغور
تكم بالحِجِى .. بالدجل الكِجُور
مرّة العسكرى .. كسـّار الجِبُور
ويوم بإسم النبى .. تحكمك القبور
هِم يا الفنجرى .. يا الجرف الصبور
كل السمتو مات.. باقى على التِمور
وأرضك راقدِى بور
لا تيراب وصل .. لا بابور يدور
والماهية أُفْ
عيشة هاك .. وكُف
فى هذا الزمن .. تـُف يادنيا .. تـُف
يا العَبِد الشقى
ما أتعوّدْ شكى
لكن الكفاف فوقك .. منتكى
والسوق فيك يسوق
حالك ما بتسـُر
إِلا كمان فى ناس فايتاك بى الصبُر
ساكنين بالإيجار .. لا طين .. لا تمُر
وواحدين بى الإيجار .. ما لاقين جُحُر
سِلعـتُمْ الضُراع .. والعرق اليخُر

عمال المدن
كلاّت الموانى
الغُبُش التعانى
بحّارة السُفُن
حشّاشة القصوب
لقاطّة القطن
الجالبة الحبال
الفِطن الفُفُن
الشغلانتو نار
والجو كيف سُخُن

فرقا شتى بين ناساً
عيشا دين مجرورة وتجر
تكدح بالأجر ومرة بلا أجر
عيشُنْ كمّهو .. وديشُن هان كدُر

ناساً حالا زين
مصنع .. مصنعين
طين فى طين .. ووين
ما مرابا مُر.. بارد همها
لا يعرق جبين .. لا وشاً يصُر
عين والله .. عين
كلها كمها .. وعزها هان قدُر

فى الجنة أم نعيم .. فى الجنة أم قُصُر
يا عبد الرحيم إلا ورا القبُر
ويلكد فى الحمار
لاتسرح كتر
فتاح يا عليم
وإن كان الفقر يا عبدالرحيم
أشبه بالكُفُر

حيكومات تجى..وحيكومات تغور
تكم بالحِجِى .. بالدجل الكِجُور
مرّة العسكرى .. كسـّار الجِبُور
ويوم بإسم النبى .. تحكمك القبور
هِم يا الفنجرى .. يا الجرف الصبور
كل السمتو مات.. باقى على التِمور
وأرضك راقدِى بور
لا تيراب وصل .. لا بابور يدور

ونقرط للحمار
نقريط الحمار .. لاتنسى النِعال
الطِرقِى الخدار
اللِّبِس الجديد
تسريح السفر .. للماشى الصّعيد
ماشى الدّيش .. نَفَر
والبال إشتغَل
بى الأبى ما يعِيد .. الحول ما أشتغل
الغُبُن الشديد .. السابا ورحَل
الضيق .. المحَل
والفرج القريب
الجا .. وما وصَل
زى الحال ده يوم .. لا كان .. لا حصَل
والبال إشتعَل
السكة الحديد .. يا عمو القَطَر
يا عبدالرحيم قِدّامك قطر

وسال الدم .. مطر
وطارت دمعتين .. وإنشايح وتر

يا طاحن الخبر
ما بين القضا .. ومَرْحاكة القدر
الشِّهدوا الدموم .. والدمع الهَدَر
إيدُمْ فى التُراب .. والعين فى القطر
عارفين الحصل
عارفين فى حذر
الخبر اليقين .. بوّخ .. وإنتشر
أطفال القرى .. وعمال الحضَر
أدوهو الطيور .. ودَّنوا البحر
إنصاعت سحاب
وإنْدافَقْ مطر
عم عبد الرحيم .. فى الشارع عَصر
لى تال اليسار
متفادى الكَجر .. دورية الكجر
جفّلت الحُمار .. وطلوَح زى حجر
وعم عبد الرحيم .. إتلافا القطر
فتاح يا عليم .. سال الدم مطر
جرتق للتُراب
منشور بى كتاب
روشتّة .. وجواب
ماهية شهر
مفتاح الضراب .. أورنيكين سَهَر
جنب لِبدة حُمار
مقطوعين ضَهر

عم عبد الرحيم ..يا كمِّين بشر
صحِّى الموت سلام
ما يغشاك شر ..
صحِّى الموت سلام
ما يغشاك شر

رحم الله الشاعر الفذ حميد

وأيه الدِنيِى غير .. لمّة ناس فى خير
أو ساعة حُزُن

حميد أحد صناع انتفاضة ابريل
اليوم غيَّب الموت الشاعر الضخم محمد الحسن سالم حميد الذي لقى مصرعه في طريق شريان الشمال الذي هو عبارة عن شريط ضيق من الاشرطة الاسفلتية التي تحصد الارواح ويسمونها في بلادي طرق سريعة بينما يتهكم من بؤسها مهندسو الطرق وحتى عابرو السبيل. كان حميد أحد صناع انتفاضة مارس ابريل- عام 85 بشعره مع شعر صنوه القدال والدوش ومحجوب شريف وآخرين ذلك الوهج الشعري الذي كان حادياً لقوافل الذين خرجوا للشوارع وهم يعلنون العصيان المدني ويذهبون بالديكتاتورية الثانية إلى مزبلة التاريخ. حميد احد صناع تلك الانتفاضة المجيدة وقد فرخ اتجاهه الشعري الباذح المئات من الشعراء الجدد حداة الثورة المقبلة التي لا شك في قدومها ونحن نشهد ارهاصاتها حتى في شكل تشييع عظمائنا وهذا الخروج العظيم.ماتم حميد مبذولة مفارشه في كل بقعة في السودان وفي الخارج كما كان الحال في ماتم وردي.وعدد من قادة الفكر والراي والفن. شعر حميد سيبقى ما بقي هدير موج بسليل الفراديس ، كما بقي شعر خليل فرح والتجاني والمجذوب وغيرهما من شعراء السودان المجيدين. لقد فجر حميد اللغة.بعده أصبحت لغة نوري وما جاورها منتشرة في السودان كله.وجاء حميد بالصور الشعرية الجديدة البديعة مما لم تعهده العامية السودانية من قبل إلا على ألسنة ومخيلات عدد قليل ممن هم صنوه من الشعراء. والأهم كان قلب حميد قريباً من قلوب المواطنين البسطاء في مختلف شرائحهم وسحناتهم وأعمارهم.هذا فقد جلل يا سودان.فقد جلل.عاش حميد بسيطاً وكابد الأهوال.وكل من وقف في وجه هذه العبقرية الضخمة من أنظمة شمولية ظالمة لن تلقى من محبيه إلا الإزدراء.وداعاً ايها الشاعر العملة النادرة . ألا فليرحمك الله.

هو الشاعر الوحيد ، على ظهر هذا الكوكب الذي يعج بالشعراء، احتفظ له بشريط كاسيت فيه صوته الذي يملأ الذات رحمنا و يقينا شفيف..!

فيه تشاجرت ، تخاصمت ، تعاركت..و قتلتني الغيرة ، حينما قالت حبيبتي: انها رأت حميد و تحدثت معه..و امتلأت من عوالمه البهية فكتبت لي نصها الخجول (اخافك..تسافر.. اخاف التساب)..فعلمتني ان اقرأ (الضو و جهجهة التساب) للمرة المليون..و يغمرني الحزن / الفرح/ الدهشة/ السؤال/ اليقين/الحلم..!

و حينما تجولت في الوطن الذي كان يسمى سودان من نمولي لحلفا ، و هو يشمل البقاع النائية التي تباهي الدنيا برمالها الذهبية النقية ، كانت اشعاره تطأ معي ارضا لم تطأها قدماه..و كنت اراه في شفاه المعلمين و المعلمات في البقاع النائية الذين/اللائي لم يضرسهم/يضرسهن غبار العنصرية و التمايز الهايف اياه..يقرأنوه و هم الغرابة الذين يعتزون بجهويتهم..و قبائلهم و اثنياتهم..يقرأنوه و هم العمال الذين يضيئون ظلمات الأقاليم البعيدة.. ليمر قطار الخميس (الخرطوم نيالا) و قطا ر الإثنين (الخرطوم /واو)..يقرأنوه..و الزمان قد قتل ظاهرة القطار..و قتل معها مدينة واو..و اشياء كثيرة اخرى..!

في عواصف الجليد ، و في نص براري كندا العتية ،..يحكي لي عن حيطة تتمطى و تفلع في قفا الزول البناها..فاقول له: هداك الله يا حميد..عليك بالقهوة البكر من تيم هورتون..ياخي عساك تفهم شوية أنو الراسمال مش سئ لهذه الدرجة..!

كلمة حميد النبوءة.. علمتني التصالح مع الذات الشاردة ..كيف تكون عاملا كادحا..ولا تشعر حيال الدنيا بالغبن..و انما تتصالح معها..و تحاول ان تلبسها لبوس حلمك..يا الله..هو انسان يعلمك كيف تحلم دون أن تحس بالخجل من تفاهـــة حلمك الصغير..!

ذهب الضمير السوداني ، و كاذب من يقول انه لم يرى ذاته في مرآته الصقيلة الناصعة..!!!
سلاما حميد في الرائعين طرا..
سلاما حميد.. في الخالدين طرا..

كبر

...

( يا شدو عصفورنا البسيط ... كل الخلوق إتوكًتك
إن ما بتبيت فوق السبيط .. طوَل مسافة ركَتك
ما خوَفك صيَاد غتيت ... لا الريح قدر يوم سكًتك
عذراً إذا حال الوطن ... بالجاتو ذات ليل بكَتك )
....
من مرثية حمّيد لمصطفى سيدأحمد .

حينما تسقط نخلة 00 يسقط وطن !!!!
فالنعمل لأجل أن تنهض النخلة في قلوبنا مدى الحياة
حتى يظل حميد باقياً وساكنا في كل ازقة أحاسيسنا
ولنتركه يتمشى بكل حرية على طرقات الشرايين
ويتكيء على زوايا الأوردة
70 كلم بالتمام يختصرها لي هذا الانسان المرهف حينما اسمع عم عبد الرحيم
والله أغنية مليئة بالاحساس
ىلاتحتاج الى تصوير مطلقا
تجعل خيالك خصبا
فيها لوحة من أروع اللوحات المحببة الى نفسي
الغبار
والوطن
والجروف
والتوب الجديد
والقطر
وحتى رائحة الدم
تذهب الأغنية
وتترك وراءها كل غبار الوطن
وحتى ان حاولت ان تنفضه عن ثيابك تجده عالقاً في كل مساماتك !!!
ياله من شاعر مدهش
يدخل الى قلبك دون استئذان
مثلما تهطل السماء على الأرض دون حتى أن تخبرها بمواعيد الهطول
وحميد غيث
سقى قلوبنا وأوردتنا وأحاسيسنا
حميد عجننا بطمي الوطن
وشكل فينا عجينة كاملة الدسم
رحمك الله ايها المبدع
ربما الولدان المخلدون ينتظرونك مثلنا لتحكي لهم عن القرية
وعن البساطة
وعن الغلابة
وعن التعب
رحمك الله وجعلك شمعة تضيء كل دواخلنا
من بعدك يطلق الرصاص في وجه الفقر والبؤس ؟؟؟

رحمة اللة رحمة واسعه ..

فقد كبير
اللهم أرحمه وأغفر له
لا حول ولا قوة إلاّ بالله

لمـّا أفوتك من دون خاطر

أو دون خاطر منى تفوتى

بلقى حبايب فى كل حِتـّة

وكل بيوت الفُقرا .. بيوتى

انشاء الله الى دارا خير من دارك يا حميد و أهل خير من أهلك وتلقى حبايب في كل حتة تطمن روعك ببسمة دايمه لاها تمني و لا مصنوعة...و تغني كيفما شاء لك الغناء و سيرد لك كل الشعب بالدعاء...حتى و ان رحلت بجسدك عنا يا حميد سيبقى صوتك و يبقى نشيدك و نطلع كلنا يوسف من بطن الجب و تبقى غنواتك كما تمنيت... سُندالة .. وعود طورية...ضراع رجالة .. كتاب أطفالا...وجملة بالا .. الما مكرية
سدّة مالا .. وبقـّة فالا...فى ليلة الدخلة على أسمى قضية...
يا حميد لقد كنت هُدى للناس الحيارى...و كنت ندى الفجر الببلِّل نور عِو ينات الفقارى...

يا راحلين عِنْ دُغُش اللّيل ..
ما لاقيتو جناياً زي
تكية نخل الفجر الجاسر ..
فوق لي المترة عراجين ضيْ
يا رعّاوة العرب الرُّحّل ..
ما لاقاكم في المطراني
في كاويق الجرف الأمحلْ
بين أسراب الرهو الرّاحل ..
ساند أكتاف اللّيل الميّلْ
عِنْ ساساق الغيمة عليكم
بين رقراق الخيمة معاكم ..
ما أديتوهو شوي بي حَرْجَلْ
آ رطانة الليلهم ليّلْ
ما لاقاكم في ونساتكم
بين الشّادي وبين كاساتكم
في صلواتكم ..
عِنْ دعواتكم
أو دقساتكم
عِزْ خلواتكم
زول زول الله إن ِمحِن آ بسألْ
الهبّاد لي غُلْب اخواتو
الفرّاح عوّان الحلِّي
الفدّار لي الليل ظلماتو
آ نجمات شِقّيشْ قولِنلِّي
ما لاقاك طالع مندَلِّي
المطعوم من طيبة أمّاتو
كالفَجّاج الندّ نباتو
موج البحر الأحمر هوجتو
وعِرْق العَرَق اللاّوي ثباتو
جانا الشُّدَر الأخضر منو
ونار الشُّدر الأخضر جاتو
راح شقيش أب قولاً واحدْ
ليش ما يرجع من غُرباتو

الى جنة عرضها السموات و الأرض يا حميد...

دحين شن أقول لعم عبدالرحيم
وللأم الدارعا مخلايتا مكدنكا بالغبار
وللوطن الزادت الخوازيق في جسمو
وقلبو ينزف ليل نهار
شن اقول لبت الخليفة وربيعة
وللي ماعرفوك صغار
وشن اقول لقلبي
الفتر من الحزن ومن الحصار
ومن زمن فراق ‏
وزمن غدار
ولسه واعدنا بحزن جديد
‏ ‏
أرسل دموعي عبر الأثير
أم أطير من بلد بعيد
وأضمك قبل الرحيل الأخير
20/3

دحين شن أقول لعم عبدالرحيم
وللأم الدارعا مخلايتا مكدنكا بالغبار
وللوطن الزادت الخوازيق في جسمو
وقلبو ينزف ليل نهار
شن اقول لبت الخليفة وربيعة
وللي ماعرفوك صغار
وشن اقول لقلبي
الفتر من الحزن ومن الحصار
ومن زمن فراق ‏
وزمن غدار
ولسه واعدنا بحزن جديد
‏ ‏
أرسل دموعي عبر الأثير
أم أطير من بلد بعيد
وأضمك قبل الرحيل الأخير
20/3

شاهدتُ اليوم تسجيلا للراحل المقيم ( حميد ) يتحدث فيه عن الراحل المقيم ( مصطفى سيد أحمد )، ثم بكى وهو يستمع لإحدى أغنيات مصطفى.
وطالب الجهات المختصة بتجميع أعمال مصطفى سيد أحمد.

وأقول : لا شك أن هناك أعمال لم يقم الراحل بطباعتها أو تسجيلها.
فلنناشد من يعلم أن يبادر بجمعها وطباعتها

***

حميد قلادة تتدلى في أعناق الشعب

- اللهم ارحمه فوق الارض وتحت الارض ويوم العرض عليك . اللهم قه عذابك يوم تبعث عبادك .
- اللهم انزل نورا من نورك عليه
- اللهم نور له قبره ووسع مدخله وآنس وحشته
- اللهم ارحم غربته وارحم شيبته
- اللهم اجعل قبره روضة من رياض الجنة . لا حفرة من حفر النار
- اللهم أغفر له وارحمه واعف عنه واكرم نزله ...

ياحميــد بعــدك كُــر مــن حــالنـا كُـر ..

قـاعـدلنـا فـوق قيــزان جمـــر ...

لا حول ولا قوة الا بالله

انا لله وانا اليه راجعون

ابن البلد الاصيل

روح الغلابة

يا فاكهة المجالس
بالكلم الطيب

بالشعر الراقي

بالضحكة الضاحكة


بالطيبة والبساطة

يا شاعر الملايين

حبيبنا وصديقنا واخونا

حميد

لك الله ندعو ان يجعل قبركم روضة من رياض الجنة وان سكنكم فسيح جناته مع الصديقين والشهداء